Judg 13 | XteSC | STEP | Ataruda kange di ton cap, Israel nesaladi Allah dinai tupa malipu kuramipa, Allah er si Yahwehdi, ‘Ne songe,’ teneramu. Ukuramipa Allahdi tamupra karepupa, yuk yala nesala, sun si Filistin nesala bisbisa kapidi, keteng tamun denge dumbari (40) tahun deiki di Israel nesala sun nong deiki, ikin keca weik deriramipa, mali kange doupra kurami.

Judges 13

Simson deipi taru tep, seku upu

1 Ataruda kange di ton cap, Israel nesaladi Allah dinai tupa malipu kuramipa, Allah er si Yahwehdi, ‘Ne songe,’ teneramu. Ukuramipa Allahdi tamupra karepupa, yuk yala nesala, sun si Filistin nesala bisbisa kapidi, keteng tamun denge dumbari (40) tahun deiki di Israel nesala sun nong deiki, ikin keca weik deriramipa, mali kange doupra kurami. 2 Ataruda, nimi tenpu ngebo er sida, Manoa kuramu. Manoa er mutuda, Sora mutu ngebo kuramu. Manoa er yalada, Dan yala ngebo kuramu. Ataruda, Manoa er ner mundu men douramnga cadi, sun nyapu men deriramrei.

3 Ukupra dakuramreipane, tenpu tumida Allah er malaikat aner damai yaudi pepu. “Allahdi upepkere. ‘Uku dakupyakamem taru yumada, mundu men douramumdi, mi men derirum dinin, ukutaruda kan mundu doupmamemnyane, sal mi deipkamreme.’ Allahdi upepkere,” pepu. 4 Upepudi aupu ton pepu. “Atep nengeda, ami mundu doamem taruda, moupra kalekdamemdi kunkamrume. Ada anggur me kange yawaramnange cap, yuk yala me kange yawaramne me yuma cap, pio men jenkamrume.

Tonda, pumun taruda Allahdi Musa tep, ‘Israel nesalada ne mawa nesala cadi, ayala jen keca cap, ayala jen keca capda jena meme,’ pepra deipu. Ange utopu, ukutaru di dipra amenda yankamre taru neitamaida, Allahdi mem upu deiki peipseu jen keca yala yumada, kanda pio men jenkamrume.

5 Deiyoda, mundu douamumnyane, amenda taru kandi sal mi deipkamruma tepa. Ami konum deipmempa, gam kunkamre taru yumada, kandi do, er pedi do, yuk nengdi do, tema ton, gunting ton dopra, er potong tupa-tupa pio men tounkamrume. Deiyoda ake. Ami kan mundu pumbon tupa kapkamre taruda, Allahdi ami tep konum wepra deipkamre. Wepra deiprepa, yuk neng yumadi er tep, ‘Erda Allah er mawa ngebo kurura cadi, erda Nasaret ngebo kunkamre,’ pepra kael kepkamenge. Amenda taruda, Allahdi er tep melimrepane, angebodi Israel nesala Pilistin nengdi taleamipa, sun amu kungai di dalupra dopropkamre. Israel nesala, sun melipra lyemna tep gonga kemna ngeboda, ami pua.” Allah er malaikatdi, Manoa er ner tep pepu.

6 Upepu pangeda, Manoa er nerdi tamupra, er nenge damai yana pepu. “Nimi ton Allahdi wepra deipmau ngebo, ne damai yanmanere. Angebo er urasinda, malaikat Allah damai kungedi, pel donge neng utopu ngebo yaupa, epmanuada, erda ila mambul ngebo kupmaupa, ne kware weike kupmanu. Tonda nedi angebo tep, ‘Kanda dan mutu di yanmarem do?’ pepra, men asipetepmane. Tonda, erdi ne tep, er sida men pepmanere.

7 Dinino, erdi upepmanue. ‘Uda pumun taru yumada, mundu men douamumdi, mi men deiamum dinin, ukutaruda, kan mundu doupmamemnyane, sal mi deipkamreme. Atep nengeda, ami mundu doamem taruda, moupra kalekdamemdi kunkamrume. Ada anggur me kange yawaramnange cap, yuk yala me kange yawaramne me yuma cap, pio men jenkamrume. Tonda, Allahdi Musa tep, ‘Ayala jen kecada jena meme,’ pepra, mem upu deiki peipseu jen keca yala yumada, pio men jenkamrume. Deiyoda, amenda taru sal mi deipkamrum mida, Allahdi ami tep konum wepka cadi, konum deipmempa, gam kunkamre taru yumada, erda Allah er pel dona ngebo, er mawa ngebo pio kunkamre. Ukunkamra tep, amida Nasaret ngebo ^{▼▼Nasaret ngebo perami ngeda, deiyo ake. Sun anengdi, Allah tep, pedina upu pedirami. Ukupmanto upuda, “Keteng tamun pamu bari neitamai di, Allah kan amutara kunedi, kan pelpu donkamkene,” pepra pediramitopu, aketeng tamun pamu bari neitamai di, sun giso potong cap, bana potong cap pio men tourami. Tonda, nimidi anggur me jepmengepa, kange yawaramamre meda, sundi pio men jerami. Tonda Allahdi, ‘Ayala kecada pio men jenkamrume,’ pepra, deiamu jen keca yala-yala yumada, pio men jerami.} kunkamre. Nasaret ngebo pio dakunmaryane, amenda taru depkamre.’ Malaikatdi upepmanue,” Manoa er nerdi pepu.

8 Upepu pangeda, Manoadi Allah er si Yahweh tep moropu. “Ne nai Allah, kanda akeca-keca yuma talepra, ila puto ngebo kuruma cadi, neda pio putapnerepa, piripra moropkene. Kandi dokotepsemum malaikat, kan pel dona ngeboda, kange di ton cap dokotepsemempa, nun damai yaryopda, erdi tupa peterepkamsere. Ada, kandi wepra deiamum mi, ne nerdi sal mi konum deipre pangeda, kan pel dona ngebo dokotepsetumpa, erdi peterepsetupane, kael keptenemedi, nun deipkamnem sal mi meliamsememnyane, ami telep kupra nepkamre.” Upepra Menoadi moropu. 9 Moropu pangeda, Allahdi Manoa tep pepu upu gekepu. Gekepudi, amalaikat kange di ton cap dokotepupa, aner bura tara wa kunmauai yau. Malaikatdi aner damai yau dinin, acada er nenge pe kikiman men kunmareiya tep, er nengedi amalaikat men epu.

10 Atep, aner adipapu sepdaro er nenge damai beudi, “Ne kabo, ortumi deiki yanmaneu malaikatda, ukutaru ue butene taru konum tamupra ne damai yanmanere,” pepra lap pepu. 11 Apepmau upu, Manoa gekepra tekrapudi, er ner cap kikiman bereidi, amalaikat damai berei. Angebo tekmauai berei pangeda, Manoadi angebo tep pepu. “Naio, ne ner tep upu pepmamum ngeboda, kandi do, yuk ngebodi do?” pepra asipetepu. Upepu pangeda, angebodi, “Jo, kan ner tep upu pepmanu ngeboda, ne adano,” pepu.

12 Upepupa, Manoadi tamupra er tep asipetepu. “Kandi, pepmaserem upu konum kupseryopda, ne nerdi ami konum deipkamre taruda, ami ware pel donkamre do? Tonda, ami er gam kunkamre taruda, ‘Amida Allah teneretopu telep kupra kunkamre’ tenen, nundi, ‘Ukunkamrume, angeda ton men kunkamrume,’ pepra, ware mem upu pepra ami tep peteremkamep do?” pepu.

13 Upepupa, Allah er si Yahwehdi, dokotepmau malaikatdi, tamupra Manoa tep pepu. “Nedi kan ner tep pepmanu upu utopu moupra kalengdankamre. Nedi, ‘Ukunkamrume, angeda ton men kunkamrume,’ pepmanutopu, angepu kunkamre. 14 Ada, kan nerdi anggur co du cap, anggur du me cap, akeca yumada, pio jena gume. Anggur mokon kange yawaramne me cap, yuk yala me kange yawaramne me cap, tonda, Allahdi, ‘Akeca jena meme,’ peramu yala yuma capda, pio jena gume. Nedi, ‘Ukunkamrume,’ pepmanu ngeda, pio tenepra kunkamre.” Malaikatdi Manoa tep pepu.

15 Upepupa, Manoada mangkau kange doupra, ‘Angeboda, Allah er si Yahwehdi dokotepu malaikat adano,’ men tenepudi, amalaikat tep pepu. “Naio, ne kabo tenedana tep, acapu kunmatumpane, nundi kambing mi tenpu popra, kan tep kalepkukeneme. Akambing jepmemnyopda, dabenkamrume,” pepu.

16 Upepupa, Yahwehdi ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} dokotepu malaikatdi tamupra Manoa tep pepu. “Kandi ne tep aca naipnememdi, kan keca popra kalepra deipnememnyopda, sundi kalepkunererum keca men jeptene. Upepmaken dinin, yuk taru kandi gam keca poprapmemdi, ‘Uku dongopkune,’ tenepmemnyopda, ne tep karena gume. Akecada, Allah er si Yahweh tep, er gispal dona cap, er si eremna cap tep, uku dongopkurume,” pepu. 17 Upepu pangeda, Manoadi Allah er si Yahweh, er malaikat tep pepu. “Kan si dano. Kan si kael keptepyopda, amenda taru kandi, ‘Ukupkamre,’ pepmarem keca, tek sisi konum kupre pangeda, kan tep gispal dopkamkepe. Ada, ‘Angebodi peiamutopu, tek sisi kupmasere’ tenen, ‘Angeboda mambul weike’ pepra, kan si tep gispal dopkamkepe,” Manoadi pepu.

18 Upepu dinin, Allah erdi dokotepu malaikatdi tamupra pepu. “Kandi ware keca deiyo tep, ne si asipetepmanerem do? Ne sida nimi men kael kepmanto ngebo tep, ‘Deiyo ace,’ men teneptenge. Atep ne sida, ila mambul si tep, pio tali tuai nesalada men gekeptenge,” pepu.

19 Malaikatdi aupu konum pepu pangeda, Manoadi weni kambing mi cap, jagung weninge cap, doprapudi gel pala taplakra deipudi, Allah er karena tep, uku sekra akeca dopra, uku dongopu. Dongopu dingeda, Manoa cap, er ner capdi, akeca dinmarei. Dinmareipane, Allahdi nimi men kupmanto keca, ila mambul pel dopu. 20 Ada, dinmareipane, agel pala taplakra yakeipyai deiki, uku bu jenmaua di, uku bu im deiki welenmau taruda, amalaikat peda, auku bu welemaua kan-kanpu im deiki welepu. Ukupu pangeda, Manoa cap, er ner cap, akupunge eprei dingeda, ‘Uo’ tenepra, Allah er gispal dona tep, adipapu sun butene tu deiki urasin genepra mapdongopreidi, im deiki dina gum dipapu, Allah tep er si ereprei.

21 Allah er si Yahwehdi dokotepu malaikat, im deiki welepu taru di, Manoa cap, er ner capdi, malaikat sun damai ton cap pio men didarami atep, adim pepka deiki di, Manoa kael kepudi, ‘E, ayanmau ngeboda, er urasinda malaikat utopu dinino, tek sisi ada Allah er si Yahwehdi, er pedi dokotepmau malaikat nun damai yanmaue,’ tenepu. 22 Konum tenepra kael kepu dingeda, Manoadi er ner tep pepu. “Uo ka nero, nundi Allah er nonge utopunge konum epmanema tep, ukutaru tek sisi depkamneme,” pepu.

23 Dinin, Manoa er nerdi pepu. “Gume, Allahdi, ‘Aneng butene popkamane,’ tenepmatu teptoda, nundi er gispal dona tep, kambing popra uku dongopmanem keca cap, jagung cap karepmanem kecada, men dopropmatue. Erdi konum adipapu popmasetue. Dinino, nundi karepmanem keca konum dopropmasera tep nengeda, ‘Allahdi men popkamasere,’ tenepne. Tonda erdi mambul pel dopmaunge cap, tonda erdi pepmaser upu yuma capda, men peipsetudi, ton men karepsetue. Dinino, erdi akeca yuma konum lap pepra karepmasera tep, ne kangeda, Allahdi men popkamsere tenepne,” pepu.

24 Uda sun butene dakunmareianen, amenda taruda, Manoa er ner sal mi deipu. Deipu dingeda, “Ami er sida Simson,” pepu. Ami konum nepbaramu taruda, Allahdi meliamnga deiki di, sun mi telep kupra nepbaramu. 25 Simson konum nepu pangeda, Allah er Sambaladi Simson tep, meliamupa puto weike kupbaramu. Ataru neitamaida, Dan yala nesala kurami mutu si, Mahane-Dan mutu neitamai, Simson ton acapu kuramu. Mahane-Dan mutuda, atarada mutu si Sora mutu, ortara Estaol mutu kwamngai dinin, daneitamai kuramu.