Judges 14

Simsondi Timna mutu ner dopu upu

1Tenpu taruda, Simsondi Timna mutu beudi dinmaupa, Filistin yala nesaladi deiami ner, kaber ner tenpu epudi, aner tep kange deipu. 2Epu dingeda, ka tamupra yaudi er nai cap, er nin cap, sun damai beudi upepu. “Ne Timna mutu benmanudi, Filistin yala ner ton epmandi, ne dipru gipropmanera tep, sun berumdi anerpu moropra duyanererumupa, anerpu dopkamne,” pepu.

3Upepu dinin, er nin cap er nai capdi upeprei, “Ware keca deiyo tep, kan Timna mutu bemumdi, Filistin yala ner epra, ‘Anerpu dorbenererume,’ pepmaserem do? Anesalada Allahdi, ‘Den bam bol deiki tarange sengkamrume,’ peiamseu ngeda, sun Filistin nengdi men kununge. Tonda, anengda, Allahdi, ‘Ukunkamrume,’ pepra deiamseu upuda, sundi men gekenunge. Sunda, nun yala nesala gume. Nun yala nesala kan-kanda, urasin telep ner tenpu pe ton men kungepa, men doproptum do? Ange tep penmarem do?

Tonda, nun Israel nesala kan-kan telep ner tenpu peda men kungeya tep penmarem do? Tenpu ner peda men kurepa, men doptum do?” pepra weneprei. Upeprei dinin, Simsondi tamupra er nai bo tep, “Gume, ‘Anerda ne doptene’ tenen, pio putanerure atep, mororbememdi, ne tep duyankamnerume, naio,” pepu.

4Uda, ataru neitamai yuma, Israel nesalada Filistin yala nengdi taleamipa, sun amutara kuramya tep, Allahdi, ‘Ware kuptenepa, go kwapneryopda, Filistin nesala wenepra popkamne do? Tonda, dan taru di Filistin nesala bisbisa kapkamne do,’ teneramu. Allahdi ukupra teneramu dinin, Simson er nai cap, er nin capdi, ange yuma men tenepreidi, men kael keamrei. Ada Allahdi, ‘Simsondi aner doptua deiki di, Filistin nesala popkamne,’ tenepkada, men kael keamrei.

5Ataruda Simson cap, er nai cap, er nin cap yuma, ‘Timna mutu kikiman benkup’ tenen, bisi banmai. Banmaipane, abisi neitamaida, Timna nesala anggur wa peamyai yakanmai pangeda, dato-dato di, bura kam utopu kecada, kaber singa tenpu, ‘Angebo popra jepkun’ tenen, er ila upu peprapudi, Simson damai sepdaro yaupa, Simsondi epu.

6Ataru dipapu, Allah er Sambala dato-dato di, Simson er nong wekudi, er puto weik karepupa, Simsondi asinga kam bana damai bena, er buru di talepra poptapudi cepropu. Ukupu ngeda, er puto weik kupka tep, kanam dipapu kupu. Ada tali kambing poptaptua utopu, aila singa bura kam talepra poptapu. Akupu kecada, Simson er nin cap, er nai capdi men eprei. Tonda, Simsondi sun gekenai, ‘Ukupmane,’ pepra men lap pepupa, sun butene men kael keprei.

7Uda ukupu dingeda, Simson aner kuramngai beudi, ‘Aner dopkamne,’ tenepudi, aner cap, Simson cap antapreidi, tali-tali upu penmareipa, Simsondi aner tep ila kange deipu. Kange deipudi, ka tamupra er pe mutu beu.

8Uda, ue metekanun ton cap mapmaidi dakunmaiyane, yuk-yuk kunmaipane, amenda taruda, Simsondi, ‘Ukutaru aner dopkune,’ tenepudi aner damai banmau. Banmauanen, bisi neitamaida bena dinmaupa, singa kam men di poptamngaida, singa kam nong pumbonda, madu mong weik amuramupa, epu. Ukuramupa, aca beudi dinmaupa, akeca lyuramngai pumbonda, madu mong cap, mong mokon cap kwamu.

9Ukuamu ngeda, er buru di torokrapudi, among mokon gwepra doupudi jepbanmau. Jepbanmauanen, er nai cap, er nin cap, sun damai yau dingeda, among mokon sun ton, dan tara bokra karepupa jenmarei. Dinino, erdi sun tep, “Among mokonda, singa popsai di, nong lyuramngai pumbon di, ne pe buru di torokra gwepra dopropsi,” pepra men lap pepu.

10Ukupu pangeda, Simson er naidi, ‘Ne midi kange deipu nerda, ne pedi asuru epkamne’ tenen, akaber ner er mutu dirbeu. Er dirbeu taruda, Simsondi amutu beudi, sun amutu nesala kuramitopu, ila kailya bena kalepu. Ada, amutu nengdi, ner don taruda ange kuramya tep, Simson pedi utopu kailya kalepu. 11Ukupu pangeda, Filistin neng damai beu pangeda, Filistin nengdi, er pel melipra dona cap, kikiman kuna cap tep, kaber neng denge weneri 30 neng wepra deipipa, er damai yai.

12Yaipa, Simsondi adenge weneri neng tep, domona utopu upu pepu. Erdi upepu, “Ware nengdi do, nedi nukusen keca, ‘Deiyo ace,’ tenepra kael kepmumdi, ‘Deiyo ace,’ pepra lape pepnerumnyopda, telep keca karepkamsene. Ada, menmena sundi pepnetumpa, sundi dopropkamrume. Atumi di nukra yoneitam bari tumi nukbanmanyane, yoneitam bari tumi kapul men kupre taruda, pepkamnerume. Ada akailya jenkamep taru neitamai tep pepne. Gum dingeda, men doproptume.

Dinin, ‘Deiyo ace,’ pepra, lape pepnetum pangeda, nedi sun tep pio telep kunumna weik opkale, denge weneri 30 cap, tonda yuk yala dinin, kenengna telep opkale ton denge weneri 30 cap, yuk-yuk karepkamne. Ange tep nengeda, nedi sun tep go karepsenepa, yoneitam bari tumi deiki di ner don kailya jenkamrume,” pepu.

13Upepudi aupu ton pepu, “Dinino, sundi ne pepkusen upu, ‘Deiyo ace,’ men pepnetum pangeda, sundi ne tep pio telep, kunumna weik opkale denge weneri cap, tonda yuk yala dinin, kenengna telep opkale ton denge weneri cap, yuk-yuk karepkamnerume.” Upepupa, sun Filistin neng yumadi, er tep, “Jo, apepmaseremtopu kupkupe. Atep kan kwapmaker domona upu utopu upuda, pepkusereme,” pepi. 14Upepi pangeda, Simsondi adomona utopu upu pepu.
“Jene jerur keca pumbon di, jepmanto keca doproptume. Ila puto kurur keca pumbon di, jen keca tau weiknge doproptume.” Simsondi pepu.

Simsondi upepupa, gekepi dinin, ue weneri tumi deiki di, ‘Ange tep pepmasere, deiyo ace,’ tenepra, men kael kepmanto kunmaiya tep, men pepmanto kunmai.

15Ukunmaipane, ue dumbari tumi deiki di, men kael kepmanto kupidi, sundi Simson er ner tep bena pepi. “Sun dano? ‘Amutu jeryarume,’ pepmaseruma deiyoda, ‘Aneng sun keca upula dopropkamnem’ tenen, upupserum do? Kandi, kan nenge tep, telep upu pepmemnya deiki di, erdi pepmaser domona utopu upuda, ‘Deiyo ace,’ pepra lape pepkerepa, kandi lap peryankamsereme. Gum dingeda, nundi kan pe cap, kan nai er ati cap, er ati kunge nesala yuma cap, sun ati neitamai derimenge keca yuma capda, uku dongopkamepe. Poptapkamsepe,” pepi.

16Upepi atep nengeda, Simson er nerdi Simson damai beudi, engenmaua deiki di pepu. “Uo, kandi ne tep wilipra deipmanereme. Kandi ne tep bicau men tenepnerem do? Ne tep songe, tenepnerem do? Kandi ne mal neng tep, domona utopu upu pepmumdi, sun tep, ‘Deiyo ace pepkamnerume,’ pepmum dinin, ne tep nengeda, aupu deiyo ton men lape pepnemume. Angeda warya tep do? Aupu deiyo lap pepnemempa kael keptene. Atep lap pepneo,” pepu. Upepupa, Simondi tamupra pepu. “Adomon upu akwaprepane, aupu deiyoda, ne nai, nanin sisi capda, sun tep men lap pepsipa, sun peda men kael kemrerunge. Atep ware keca deiyo tep, nedi, kan tep lap pepkuken do? Ange men pepkukene,” pepu.

17Simsondi, upepka tep, er nerdi, kailya kalemami taru yuma, yoneitam bari tumi neitamai yumadi, pio buka engenapu kunmau. Yoneitam tumi deiki di tupa moronapu kuramudi, engenapu kunmaua tep, yoneitam bari tumi deiki di, Simson dabal kupupa, er ner tep adomon upu deiyo lap pepupa, kael kepu. Kael kepu dingeda, adipapu ange doupra, anerdi er mal neng cap, er tara neng cap tep, lap perbeupa, sun yuma peda kael kepi.

18Ange tep nengeda, yoneitam bari tumi neitamaipu, keteng kapul men dangbenmau taruda, amutu neng yumadi, Simson tep pepi.
“Madu mong mokonda, tau pio weik cadi, ware keca di tau weik ton peptu do? Tonda singa kamda, ila puto weik keca cadi, wareto keca di, bisbisa kapra singa kam poptu do?” pepi.

Upepi pangeda, Simsondi domona upu deiki di tamupra pepu.
“Sundi ne ner sapi bisam dopra, abisam puto di wa tu men palipropmumnyopda, nedi pepsisi domona upu deiyoda, men lap pepmanto kuptume,” pepu.

19Upepu tarupu, dato-dato di Allah er Sambala puto weik, Simson dipruai wekupa, adipapu Filistin neng tara neitamai dinin, mening dam mutu Askelon mutu beudi, nimi denge weneri tiga puluh (30) neng bena popu. Popu dingeda, sun taleami keca yuma dopropudi, sun telep opkal kenekaminge yuma dalupra dopropu. Dopropudi, ka tamupra Timna mutu yaudi, arup poptapu neng opkal dopropu ngeda, Timna neng denge weneri 30 neng tep karepu. Ada erdi domona upu peptamunge deiyo lap pepi neng tep karepu. Karepu dingeda, yu weik kupu. Yu kupu ngeda, uku bu jeramretopu kunmaupa, er dopu ner acapu tapudi, er nai ati, tonda er pe mutu tamupra beu.

20Tonda Simson beupa, er ukupu dopropu nerda, Simson er nai bodi aner dopra, Simson er kabo tep karepu. Aner karepupa, dopropu ngeboda, ada Simson ner dona tep, kailya kalemai taru neitamai, Simson melipmau ngebodi, Simson er ner dopropu.