Judges 15

Simson yu kupupa, erdi Filistin neng tep popbisipu upu

1Sun yuma dakuramipane, amenda taru sun kouami keca, gandum du konum nong kepupa, sekra kipkunge taruda, Simsondi er ner kuramngai beu. Bankou taruda, kambing mi ton tomopra, er ner tep debeu. Er ner damai beu dingeda, er ner, er nai, Simson er yamal bo tep upepu. “Ne ner kunmar ati benkune,” pepra moropu. Upepra moropu dinin, Simson er yamal bodi pepu. “Gume aner ati men betume,” pepu.

2Upepudi, aner er nai bodi Simson tep, aupu ton dukdongopra pepu. “Gume, nedi kan tep tenipkesi ngeda, ‘Angeboda, aner tep wilipra deiamnga cadi, pio song,’ konum tenerura tep, ‘Kange di ton cap aner men doryankamre,’ tenen, aner dopra, kan kabo tep konum karepsi. Dinino, aner, er weit ner, kaber nerda, urasin pio telep ner kurura cadi, men di dopmum ner pununa tep, karepketene. Kandi, ‘Er weit ner doptene,’ tenepmemnyopda, aner dopra dona telepe pua,” pepu.

3Upepu pangeda, Simsondi tamupra pepu. “Uda, sundi ne tep, pio mali kupmanerume. Ange tep nengeda, ne Filistin neng tep, ikin keca ila weik, sun nong deiki deipkamne. Ukutaruda aneng popkamne,” pepu. 4Utenepudi, upepka tep, Simson sepdara beudi, bura kam denge weike tiga ratus (300) tomoprapudi, sun amnge butenepra koupdongopra embeu dingeda, akam amnge butene-butene koupdongopmauai di, weica tenpu-tenpu gerekdongopra embeu.

5Ukupu pangeda, aweica uku bu jenmaua kepman, Filistin neng sun gandum wa peamipa, kapul men sekra kiamngaida, loptapra dongopupa, abura kam embandanmaidi aweica uku bu gwengmaipa, awaidam yuma uku jepra sengpepu. Awa peami keca yumada, tupa akapunge cap, sekra koupdongopra tekra deipmainge cap, tonda sun anggur tapu cap, anggur du cap, zaitun co du wa cap, akeca-keca yuma uku jepbanmauanen, ange yuma jeprapudi, gawal daku.

6Ukupu keca, Filistin neng bena epi dingeda, “Akupmar kecada, ware ngebodi kupmaser do?” pepi. Upepi pangeda, yuk nengdi pepi. “Gume Timna mutu ngebodi, er ner dopra Simson karepu. Aner dopropu ngebo Simsondi kupmasere. Deiyoda, mesum tep gume, er dopropu nerda, er nai bodi er ner mi dalupra, yuk ngebo, Timna mutu ngebo karepmaupa, Simson yu kupupa, ange kupmasere,” pepi.

Upepipa, Filistin neng gekepi dingeda, adipapu beidi, aner cap, aner er nai bo cap, sun ati cap yuma, uku dongopra uku jepra gawal dakupa, sun deprei.

7Ukupipa, ataru Simsondi sun Filistin neng tep pepu. “Uo sundi ne dopkamne ner cap, er nai bo cap popmarumada, sundi ne tep pio mali keca kupmanerume. Atep, nedi tamupra ila di ange tep kwang dakamsene. Pio men tapkamne. Ila yu kupneunge yumada, kapul gawal dakmane taruda, kapula. Ange tep nengeda, pio popnapu kupkamsene,” pepu.

8Upepu dingeda, adipapu gonga kepra, Filistin neng tep, pio kange mun podana podanmaipane, Simsondi aneng tep, weika di yo copra popupa, pio weik depi. Ukupudi, mutu si Etam mutu bena, gel imir pumbon bena wekrapudi, inipu.

9Tonda sun Filistin nengdi, Yehuda yala neng kurami tara neitamai dinin, mutu si Lehi mutu bena, ke taru tep sun dodin opkal ati, tenda ati deipi. 10Ukupi pangeda, sun Yehuda yala nengdi, Filistin neng tep, upepi. “Sunda ware keca deiyo tep, nun mutu poryanmaserum do?” pepipa, sun Filistin nengdi tamupra pepi. “Gume nunda, ‘Simson tomopra ateng koupkup’ tenen, yanmape. Tonda, ‘Erdi nun tara neng tep popra, mali kupseua utopu, nun peda er tep popkamep’ tenen, yanmape,” pepi.

11Upepi pangeda, Yehuda yala neng gekepi dingeda, denge weike tiga ribu (3.000) neng kwerepidi, Simson Etam mutu gel imir kuramngai beidi, Simson tep upepi. “Kao kandi Filistin neng tep, ware kupmumpa, nun mutu yana popkamaseng do? Tonda, sun Filistin nengda, nun deiyo neng utopu kupra talesenungada, men tenepmarem do? Ware keca deiyo tep, nun damai yana mali kupra deipmaserem do?” Upepi pangeda, Simsondi tamupra pepu. “Gume, sundi ne tep mali kupra deipneitopu, nedi tamupra sun pe tep nedi mali kupsi,” pepu.

12Upepu pangeda, sun Yehuda yala nengdi tamupra Simson tep, “Kan ateng koupkepedi, Filistin neng karepkamakepe,” pepi. Upepipa, Simsondi tamupra pepu. “Telep dinin, sundi ne tep tek sisi upepkunerume. ‘Tek sisi, nun buru dipapu kan tep, men popkamakepe. Popkepyopda, Allahdi wenepra popkamsere,’ pepra, pedina upu pepkunerume,” pepu. 13Upepupa, sundi tamupra pepi, “Apepmaseremada, teka. Nunda talipu ateng koupkepedi, Filistin neng damai dubenkukepe. Nun pedipapu men popkukepe,” pepi. Upepi dingeda, adipapu ila gat tapu, ukupunge doprapidi, er buru butenepra ateng koupi. Ukupidi ateng koupra, agel imir di dubei.

14Yehuda nengdi, Simson doupra banmaiyane, Filistin neng kunmaiyai, Lehi mutu damai bei pangeda, Filistin neng yuma, ila di upu penmaidi, er damai sepdara yakanmai. Yakanmai taruda, Allah er Sambaladi Simson dipruai wekudi, er puto dato-dato di karepupa, Simson er puto weik kupu. Ukupu pangeda, Simson er buru ateng koupmai tapuda, adipapu boun kupupa, er puto di atapu buluktapupa, atapu bulukra saku.

Ada, atapuda, ukudi jepra gawal dangamretopu, boun kupupa, er puto di atapu buluktapupa saku. 15Ukupu pangeda, Simson dinmaupa, keledai bisam popmaiyai tenpu kunmauai benapudi, ukupu kwamu keledai bisam si bana yo tenpu, er buru di douprapudi, Filistin neng nimi denge weik, seribu (1.000) neng bongopra popupa depi.

16Depi pangeda, Simsondi mut penmaudi pepu.
“Keledai bisam si bana yo doprapsidi, Filistin neng denge weike seribu neng popmanue. Anengda, pio mali neng tep, nimidi tali keca taplaktamengetopu, aneng popsidi, sun nongda, tali-tali taplaktapmanue. Keledai bisam si bana yo doprapsidi, Filistin neng denge weik, seribu neng konum poptapmanue,” pepra mut penmau.

17Ange konum pepu dingeda, keledai bisam bana yo tenpu buru di doprapudi aca doptapu. Ukupka tep nengeda, amutu sida Ramat-Lehi, pepi. (Sun Ibrani upu deiki di aupu Ramat-Lehi deiyoda, ‘Keledai bisam si bana yo kamo mutu kurure,’ penunga tep, asi karepi). 18Uda ataruda, Simsondi me pio putapupa, Allah er si Yahweh tep, ila di moronmau. “Uo naio, neda kan amutara kunedi, kan pelpu donune. Atumida kan puto ila di ne deiki deipmanerempa, nimi weike popmanu dinin, ukutaru ne ila di me putanmanera deiki di, boun kupnera tep depkaman do? Depnyopda, sun Filistin nengdi, ne nong dopropkameng do? Sunda, kan tep teka men tenenunga cadi, den bam bol sengna gum neng kunung dinin, amali neng kan-kan depkamne do?” Simsondi pepu.

19Upepu taru dipapu, Allahdi amutu buma Lehi gel neitamai di, me bungna pakeipu. Ukupupa, Simsondi ame jenmau. Jenmaupane, er nong yuma puto weik kupu pangeda, kange di teleppu kupu. Ange yuma ukupka tep, ame bungna er sida, ‘En-Hakore’ penunge. (Sun Ibrani upu deiki di, aupu En-Hakore deiyoda, ‘Morona ngebo er me bungna’ tenen, penunge). Ada Simsonda boun kupupa, Allahdi melipra me karepka tep, amutu sida, En-Hakore me bungna tupa penunge. Ame bungnada, ukutaru peda, Lehi mutu tupa akurure.

20Ange utopu, Simsondi keteng tamun denge weik, dua puluh (20) tahun deiki di, Israel neng taleprapudi, sun deiyo ngebo kuramudi sun upu bongdiramu. Israel neng sun deiyo ngebo kuramu taru neitamaida, sun Filistin neng ton tupa kurami.