Judges 16

Simsondi Gasa mutu beu upu

1Tenpu taruda, Simsondi Filistin nesala tara neitamai dinin, mutu si Gasa mutu beu. Gasa mutuda, Filistin nesala sun tara neitamai kwamu. Amutu neitamaida, tali-tali nyangdana ner ton epudi, amenda sun antapdareidi, er cap mapra kunmarei. 2Akati tupa kunmareipane, yuk nengdi Gasa mutu neng tep, “Simsonda, sun mutu neitamai ayanmare,” pepipa, konum gekepra kael kepi. Atep sun Gasa mutu nengdi utenepi. ‘Simson er kureaipu bepedi, akati dana-dana tara kalekra dinmapyane, er mapmarya berekyopda, Simson popkamape,’ tenepi. Utenepya tep, alukunda neitamai yumada, akati dam buluprapidi, ongopgenepra kaleki. Tonda, sun ati arum domyai, beilya bisi buplan damai ton kalengmai. Alukunda neitamai yuma, tali dimpepra kunmaidi, ‘Ipna taru popkamepe,’ tenepi.

3Utenepra kunmai dinin, Simsondi amutu neitamai yambula dipu mapmaua, lukunda neitamai bukrapudi, akati pum di bena, abeilya bisi buplan dam beu dingeda, buplan dekna butene cap, bisi buplan ikdongomi co dana-dana cap, adipapu kweneprapudi, takol deiki deipra doprapudi, tenpu mutu buma deiki bena deipu. Amutu deiki tekmengedi, Hebron mutu katuai dinunge.

Simsondi mali ner, er si Delila tep, kange mun peramu upu

4Amenda taruda, Simsondi Sorek ban mutu kuramu ner, Filistin yala ner er sida Delila, ‘Aner dopkun’ tenen, er kange aner deiki deipudi dopu. 5Dopu taruda, sun Filistin nesala talepra, nimi deiyo talepra kurami neng, aner damai yaidi, aner tep yana upu moupra deipi. Sundi upepi, “Ukutaruda, kandi Simson tep mawa di upenkamrume. ‘Simsono, kan putoda, ware keca deiki di kukerur do? Yuk nengdi, ware kuptenga deiki di, kan tep bisbisa kapra popketenge do? Kan tep popmanto keca lape pepnemempa, kael kepkune.’

Upepra Simson tep perbenkurume. Upepmempa, lap pepkere pangeda, nun damai yana lap peryankamserume. Konum pepsememnyopda, nun kayape di er ateng kouprapmepedi, er puto kure keca yumada, gum kupra deipmepedi, er tep bisbisa kapkamepe. Atep, aupu pepsemem pangeda, kunumna weik keca, perak 13 kilo nukra, nundi yuk-yuk dinin, kan tep karepkamkepe,” pepi.

6Upepipa Delila gekepudi, amenda taru erdi Simson tep pepu. “Kao kandi nungna upu ton pepnetumpa gekeptene. Kan ila putoda, ware keca deiki di kukerur do? Tonda yuk nengdi, ware kuprap di, kan tep ateng kouptengedi, bisbisa kapketenge do? Ange yumada, lape pepneo,” pepu. 7Upepupa, Simsondi tamupra pepu. “Ne ateng kouna tep nengeda, jen tapu gelal sena gum, ukupunge yoneitam bari tapu di koupnetengopda, puto boun kupnutupa, tali kurameng neng utopu puto boun kupkamnere,” pepu.

8Upepupa, gekepudi, lap perbeu pangeda, sun Filistin mutu talepra kurami nimi deiyo nengdi, jen tapu ukupunge, gelal sena gumnge yoneitam bari doupra yaidi, Delila karepi. Karepipa, yuk taruda, Deliladi, Simson mapmau taru di, ajen tapu dopra, Simson tep ateng koupdongopu. Ange kupu taruda, adeiyo nengda, yuk ati dayanamaidi, inipra gekenmai.

9Inipmaidi gekenmaipane, Deliladi ayoneitam bari tapu yumadi, Simson konum ateng koupdongopu dingeda, Simson tep upepu. “Uo Simsono, sun Filistin nengda, yanpopkukenge,” pepu. Upepupa, Simson gekepudi, Simson adipapu atapu yuma buluktapra embeuada, benang do, karet do, uku jepredi gwining doramreto kupupa, Simsondi atapu buluktapra beu. Ange tep nengeda, er ila puto kuramu keca deiyo ngeda, men kael kepi.

10Ukuramnga cadi, er ner Deliladi tamupra Simson tep, upepu. “Uo ne kabo, kandi mok upu pepra, kan inimna upu tek sisinge men pepnemumpa, sun yuk nengdi, autunenunge. Walwal ner utopu kunune. Atep, ukutaruda, kandi tek sisi upupu pepkunerume. Ware kuprap yuk nengdi ateng koupketengepa, kandi atapu buluktapra men loptadatum do?” pepra asipetepu. 11Upepupa, Simsondi ton cap tamupra pepu. “Ne ateng koupkuneng dingeda, ukupu tapu, nimidi talena pe, pel dona pe pio gum tapu di, koupnetengopda, ne puto gum kupnetupa, tali nesala kuramengtopu, puto boun kupkamnere,” pepu.

12Amenda taru, Simson mapmau taruda, Filistin neng mening dam wekmaidi gekenmaipane, Deliladi ukupu tapu doprapudi, Simson ateng koupdongopu. Ukupu dingeda, “Uo Simsono, sun Filistin nengda, yanpopkukenge,” pepra, mali pepra ngolongmaupa, Simson gekepudi, adipapu er puto deiki di, Deliladi er ateng koupmau tapu yumada, bukrapudi, benang buluksakredi gwining doramretopu kupudi loptapu.

13Ukuramnga cadi, aner Deliladi tamupra ton cap Simson tep, upepu. “Uo ne kabo, kandi mok upu pepra, kan inimna upu tek sisinge men pepnemumpa, sun yuk nengdi, autunenunge. Neda walwal ner utopu kunune. Atep, ukutaruda, kandi tek sisi upupu pepkunerume. Ware kuprap yuk nengdi ateng koupketenge do?” pepra asipetepu.

Upepupa Simsondi tamupra pepu. “Ne potong wipdongopra koupsinge, yoneitam bari akapmarenge talepmengedi, opkal wirameng keca deiki benang tapu cap, okpal cap, ne potong cap, wisipra wipdongopmengedi, tonda co cap getepra dongopnetengopda, ne puto boun kupnutupa, tali nesala puto boun kuramengtopu kupkamne,” pepu.

14Upepka cadi, Simson mapmau taruda, Deliladi, er potong yoneitam bari wipdongoprapudi doupra, opkal wirameng keca neitamai wisipra wipdongopudi, koupra co cap getepdongopu. Ukupu dingeda, Deliladi Simson tep, “Uo Simsono, sun Filistin nengda, yanpopkukenge,” pepra, mali penmaudi ngolongmaupa, Simson gekepu dingeda, bukroudi adipapu er puto deiki di, er potong cap, opkal wirameng keca cap, aco cap, ange yumada ereprapudi, loptapudi tekrou.

15Ukupu pangeda, amenda taru Deliladi Simson tep pepu. “Kao kandi ne tep, ‘Kanpu tenepsa cadi, bicau tenekenune. Kanpu dopkamne,’ pepnemum dinin, kan inimna upu men lap penereme. Atep, kan dipruai di tek sisi men tenepnemume. Ue weneri tumi tali upupu pepmanumudi, kan puto deiyo tep inimna upu ton, ne tep men nukeipnemumpa, ne tara nengdi, autunenunge. Neda walwal ner utopu kunune. Kan kumem keca pepnemempa kael kepkune,” pepu. 16Uda, Deliladi tupa-tupa mali kange doupra, “Kan puto deiyo keca tek sisinge lape pepneo,” pepra peramupane, amenda taruda Simsondi, ‘Ne gekena dabale, dadepkamne,’ tenepu.

17Dabale weik kupupa, utenepudi, amenda taru Simsondi Delila tep, er puto deiyo keca tep, er inimna upu yuma lape pepu. Upepu, “Ne kapul ukupu deipnei taru, Allahdi, ‘Angeboda ne damai kuredi, ne pel donkamre,’ teneramneua cadi, neda Nasaret ngebo kuramsanen, tupa kunune. Atep, ne nai yapudi, ‘Ami deipmenge taru, adine oryankamre taru yumada, er giso potongda, gunting di do, silet di do, pio men toupkamrume,’ peiamnei. Upeiamneiya tep, ne giso potongda, pio men touramnei. Dinino, ne giso potong toupnetengopda, ne puto boun kupnutupa, tali nesala sisa kuramengtopu, puto boun kupkamnere,” pepu.

18Upepu pangeda, Delila gekepra kange deipudi, ‘E, ukuda er inimna upu yuma konum tek sisi pepmanere,’ tenepu. Utenepudi, erdi Filistin neng, sun ila deiyo neng damai upu peipupa perbei. Sun damai bena upepi, “Ue tenpu taru ton cap tamupra yarume. Simsondi er inimna upu yuma konum pepmare,” pepi. Upepi pangeda, sun Pilistin mutu nimi deiyo neng yuma tamupra yaidi, Delila karepkami kunumna weik gel uang, er sida perak, doupra yan karepi.

19Ukupi pangeda, Deliladi Simson tep, “Kanda ne damai mapo,” pepupa, mapu pangeda, anerdi Filistin ngebo tenpu tep kongpepupa, yaue. Yaupa, Deliladi pepu. “Yamemdi er potong lyomnye wipra, yoneitam baringe yuma toupkurume,” pepupa, apotong yuma toupropu. Ukupu pangeda, Simson er puto gum kupbanmaupane, amenda taru er puto yuma konum gum kupu.

20Simson er puto konum gum kupupa, anerdi, “Uo Simsono, sun Filistin nengda, yanpopkukenge,” pepra, mali kange doupra ngolongmaupa, gekepudi bukrou. Bukra dipetepudi utenepu, ‘Gume yuk taru yuma kuramsitopu, tekrapsidi tapu loptapra, tali kange doupra benmasitopu kupkune,’ tenepu. Utenepu dinin, ataruda, Allah er si Yahwehdi Simson tep konum tapra bendopupa, Simsonpuda, ange kapul men tenepra kael kepu. Ada, sun Filistin nengdi, er giso potong toupya deiki di, Allah tapupa, Simson er puto gum kupupa, sundi er bisipmemei.

21Ukupi dingeda, Filistin nengdi talepdongoprapidi, Simson er asuru du kotokra lukropi. Ukupi dingeda, doupdara Gasa mutu dubei. Dubeidi, ila gat keca, er sida tembaga rantai tapu butene keprapidi, ateng koupra wenemna ati pumbon dongopidi pel dimami. Apelda, gandum du taingna pel dimaipa, apelpu weik doramu. 22Dinino dakuramnganen, amenda taruda, er giso potong kange di ton cap gonga keprapudi likbaramu.

Simson depu upu

23Ange yuma konum kupu pangeda, dakuramipane, Filistin deiyo neng cap, amutu kurami nesala cap yuma, isok si eremna tep, ila kailya kalepra jenmaidi, isok er sida, Dagon peprapidi upenmai. “Kandi nun podan ngebo dopra, nun damai duyana karepmaserempa, konum bisipmape,” penmaidi, mut weipra semai. 24Ataruda, sun deiyo nengdi, Simson dopra duyaipa, amutu nimi weika di bulupra dinmaidi, sun isok si eremna tep, bulupra wekmaidi, Simson tep epidi upepi. “Uda, nun nai isokdi, nun podan ngeboda, dopra karepmaserpa, dopra deipmape. Simsondi nun mutu neitamai mali kudiramseu. Tonda nun kapu neng weika di poptapseue,” pepra mut penmai.

25Ukunmaipane, sun kange konum telep kupu pangeda, ila upu deiki di upepi. “Simson dopra nun damai deipsemumpa, er tep autupra kange deipkupe,” pepipa, Simson wenemna ati deiamya upupipa, Simson dopra duyana deipi. Akatida ila lyom ati, weik ati cadi, akati pumbonda, ila lyom ayumnya kwamnga neitamai, Simson duyana deipmaipa teku. 26Simson duyanmai taruda, Simsondi er buru talepra duyanmau ngebo tep upepu. “Kao, akati arum eremna tep, ila ayumnya co dan-dana neitamai deipnetumpa, ne beipye peingna tep aco baripra tekune. Ukupnedi ne buru co dan-dana talepnedi bepekra teknedi, sun kunmarum keca beta gekenkusene,” pepu.

27Uda akatida yambul ati gume. Akatida ila pala lyom gel dopramidi akati domi. Akati arumda, ban kepra domipa, alukunda taru akati arum deiki nimi ton denge weik tiga ribu (3.000) neng welepra tengmai. Tonda, alukunda taru, akati pumbonda, nimi cap, nerapu cap yuma, pio weika di wekmaipa dekpepmau. Filistin mutu talepra ila nimi deiyo neng peda, sun yuma akati pumbon kunmai. Akati lana deiki tara, arum deikida, nimi cap, nerapu cap dengeda, tiga ribu nesala utopu kunmaidi, Simson tep dinmaidi, autupra nyek-nyek penmai.

28Ukupra kunmai taruda, Simsondi Allah er si Yahweh tep moronmau. “Uo, ne nai Allah, kanda akeca-keca yuma talepra, ila puto weik ngebo kurume. Ukutaruda nedi kan tep moropkene. Kanda Ila Eremna Ngebo, akeca-keca talepra kurumdi, ‘Ukupkamne,’ tenerumtopu kurum ngebo cadi, kandi ne tep, tenpu taru ton cap tenepnememdi, bicau tenepra puto karepnetume. Ukutaru dipapu puto weik karepneo. Puto weik karepnemempa, ‘Ne asuru du butene lukropneia tep, tamupra Filistin neng weika di popkun’ tenen, moropkene,” pepu.

29Upepu dingeda, Simsondi akati pumbon, ila ayumnya co butene ngeda, er buru butene di giso dipdongoprapudi, tebalal buru di dana tara co, dumsisi buru di dana tara co talepra teku. Ukupra tekudi, bepekropupa, alau ati yuma daksakapudi, anesala yuma popu. 30Aco butene talepdongopra tekudi, bepekropkou taruda, Simsondi pepu. “Ukutaru ne cap, Filistin neng cap, kikiman depkupe,” pepu. Upepudi er puto weika di ayumnya co dan-dana talepdongopra bepekropupa, alau ati yuma daksakapudi, akati neitamai kunmai nesala yuma popupa depi. Ada, alau ati saku pangeda, akati ila pala gel yuma cap, akati arum cap loka sakudi, akati pumbon wekmai nesala deiki saka popu. Saka popupa, amutu nesala denge weike, sun Filistin neng cap, nerapu cap, sun ila nimi deiyo neng yuma cap, Simson cap, acapu taikra poptapu. Ange tep nengeda, Simson gam kuramu taruda, nimi yambul weika di poramu dinin, er popdau taruda, amutu Filistin nesala popu ngeda, pio weika di popupa, nimi weik depi.

31Ukupu pangeda, Simson er tara neng yuma, nimi cap, nerapu cap, nyapu cap, er weit yapu cap yuma, bulupra yaidi, er nonge dopdara debei. Beidi er pe mutu tamupra duyai. Yaidi, Sora mutu cap, Estaol mutu cap neitamaida, er nong dopra peirbei. Ada er nai Manoa depupa peirbenamyai, amutupu Simson er nong peda acapu bena peipi. Simsonda, Israel nesala talepra kalengna tep, denge weike butene, ada keteng tamun dua puluh deikipu kuramnganen, depupa peirbenami.