Judg 18 | XteSC | STEP | Nimi tenpu ngebo er si Mikha. Erda Efraim mutu neitamai iknapi dam tara pirmanai dakuramu.

Judges 18

Mikha di nimi urasin utopu keca patung tep, si eremamu upu

1 Nimi tenpu ngebo er si Mikha. Erda Efraim mutu neitamai iknapi dam tara pirmanai dakuramu. 2 Tenpu tumida, Mikhadi er nin sisa tep pepu. “Nino, kan gel uang kunumna weiknge, perak seribu seratusda, (1.100) wangaptapkeupa, ne gekenai di upula dopmatu ngebo tep, kan nindi wipmauada, ne ton gekepsi. Dinino, nanino, adano. Nino, kan kunumna weik gel uang perakda, nedi kan gel uang upula dopropmakenu ngeda, ake. Kange di tamupra karepkene,” pepu. Upepkopda, Mikha er nindi tamupra pepu. “Gume, upula dopropnemum dinin, ka tamupra karepmanerema cadi, ne mi kanda, ‘Nun nai bo Allah Yahwehdi pio telep kweipkerepa, pio teleppu kunkamreme’ tenen, Allah moronkamkene,” pepu.

3 Mikhadi er nin kunumna weik keca perakda, tamupra karepu. Ukupupa, er nindi tamupra pepu, “Tek sisi kanda ne mi, nedi upula dopropneu ngebo tep wina upu pepdongomsi ngeda, tek sisi konum luprone. Kan deiki men kupkamkere. Ange tep nengeda, ne Allah Yahweh er si eremna tep, ne kunumna weik gat keca, er si perak karepne. Ange karepnepa, akeca perak deiki di, ne mi kandi, nimi urasin utopu kupra, patung ketekepra deipkamrume. Sun patung keca ketkemdina nengdi, perak palepra derinkamenge. Atep, agel uang, perakda, nedi adipapu tamupra karepkene,” pepu. 4 Uda, akunumna weik gel uang perakda, Mikhadi er nin tamupra karepu pangeda, er nindi gel uang weikanun ton, dua ratus (200) gel uang perak tapakra deipudi, keteneipu. Tonda, agel uang dopra, nimi tenpu ngebodi perak petumna ila kael ngebo tep karepu. Ukupu dingeda, erdi angebo tep, “Nimi urasin utopu keca petuprapmemdi, patung tenpu dopkurum ngeda, akunumna weik keca, er si perak dopra, akeca deiki palepra deipmemdi dopkurume. Ukupmem dingeda, ketekepra adoipnemem patung, nimi urasin utopu ngeda, ne mi Mikha, er ati pumbonpu deipkurume,” pepu.

5 Uda, angebo Mikhada, er men di isok si eremnai tep, er ati pumbonpu tenpu konum keteneiamu. Konum keteneiamnga cadi, ware kupra patung keca, yala cap do? Tonda, yuk puto keca cap, isok si cap tep eremna keca yala yumada, acapu deiamupa kwamu. Tonda, Mikhadi tenpu opkal ton keteneipu. Ada, sun imam nengdi, ‘Nun walwal kupsere taruda, Allahdi, ‘Ukupkurume,’ pepra, lap pena petenkemna tep, akeca epmepedi kael kepkamep’ tenen, deiki opkal, er si kain efod utopu keca, Mikhadi konum ketenepra deiamu.

Tonda, tali keca si eremna tep, nimi urasin utopu keca, er si patung ton ketekepra deiamudi, erdi deipu ngebo tenpu weprapudi, ‘Kanda ne makuna tep, imam nengdi pel dorameng utopu talepra pel donkamnerume,” pepra, er mi tenpu ereipupa, apel talepra doramu. 6 Ataru neitamaida, sun Israel yala nesala, sun ila nimi deiyo neng, Raja neng ton pio men kuramya tep, amutu-amutu yumada, talepra upu men lepsisikra perami. Israel nesaladi talipu kurami. Ukurami taru neitamai yumada, ware ngebo do yuma, sun yuk-yuk dinin, sun pedipapu, ‘Angeda tek sisinge,’ tenepnetopu, angepu kurami.

7 Uda, ukupra dakurami taru neitamaida, nimi kaber ngebo tenpu, erda Lewi ^{▼▼Lewi – Lewi yala nengda, pio mambul pel dorami. Ada, menop taru Allahdi, sun Lewi yala nengda, ne si eremna ati pumbonpu, ne melimna tep, akati pumbonpu pel talepra donkamnunge,” pepra deipu. Atep, sun Lewi yala nengdi, imam neng sun melimna pel dorami.} yala ngebo kuramu. Pumun taru erda ila pala tara Yehuda dinin, daneitamai yambul ati arumda, Betlehem mutu bena kuramu. 8 Dinino, ataru neitamai, er angeboda adipapu Betlehem-Yehuda mutu neitamai di taprapudi, ‘Yuk mutupu bena kunkamne’ tenen, epra embaramu. Aepra embaramu taruda, Mikha Efraim mutu neitamai iknapi dam tara kuramngai bena epu. 9 Beu pangeda, Mikhadi aLewi yala ngebo tep asipetepu, “Ne kabo, kanda dan mutu ngebo do?” pepupa, angebodi tamupra pepu. “Gume, neda Lewi yala ngebo, Yehuda tara neitamai dinin, yambul ati arumda, Betlehem mutu ngebo kunune. Dinino, ukutaruda, ‘Dan mutu bena kunkamtene do?’ tenen, ne kunkamnai tep, amutu-amutu yuma epra embanune pepu.”

10 Upepupa, Mikhadi angebo tep pepu, “Ne cap kikiman aceipu kunkamneme. Ukunemedi, kanda ne nimi deiyo ngebo kepra, upu lepsisikra pena ngebo cap, imam ngebo cap kunkamnereme. Ange kumemnyopda, nedi kan tep gel uang, kunumna weiknge, morokyo di dutara, sepuluh (10) perakda, aketeng tamun, aketeng tamun yumada, pio karenkamkene. Tonda, kan kenekamrum opkal tenpunge cap, kan putapkamker jen keca cap yumada, ne dipapu karenkamkene,” pepra moropu. 11 Upepupa, kaber ngebo aLewi yala ngebodi, “Jo telepe, apepmaneremtopu kunkamneme,” pepu. Upepupa, er cap kikiman Mikha ati kuramudi, akaber ngebo Mikha, er mi sisa utopu kupra kuramu.

12 Ukuramreiyanen, Mikhadi akaber ngebo dopra, ‘Imam pel donkamre’ tenen, imam ngebo kepra wepra deipu. Mikha er ati kuramu mi, imam pel doramudi, akatipu tonpa kuramrei. 13 Ukupra tonpa kuramreiya tep, Mikhadi pepu. “Teka, ukutaruda nedi tenepne. Ne kangeda, Allah Yahwehdi pio telep kudinkamnere. Ada, Lewi yala ngebo tenpu wepra deipsipa, erdi ne tep konuma, imam pel donkamnere,” pepu.

14 Mikha er ati damai konum bena kunmai taruda, sun pamubari neng, ada Laish mutu dirbenmai nengdi, upepi. “Nun kayapu, sun ton konum kael keamrum do? Akati neitamai ton, nimi urasin utopu keca, er sida patung ketekepra deipidi, gat keca er si perak di palepdongomi nge cap, tonda yuk tali keca si eremna tep yambul patung ton dopra deiaminge capda, akati pumbon tupa akurue. Ange kael keprum do? Ange utopu, tonda, Allahdi nimi tep, ‘Ukupkamrume,’ pepra, lap pena tep, petenkemna keca, er si Efod ^{▼▼efod – Akeca er si Efod, angeda sun imam neng, sun deiyo ngebodi akeca dopra, er nong urasin tara dinin, er taram deiki kenengamu. Akeca Efod deikida, urasin pio telep gel warna-warna yuk akapunge palepra deiami. Ton gelda, er si Urim, ton gelda er si Tumin kwamu. Agel-agel yuma dipeteramipa, Allah er puto deiki di, agel warna yuk kepra deiamnga deiki di, sun imam nengdi, ‘E, Allah Yahweh, erdi nun tep, ‘Ukupkurume, tek sisi ngeda ake, sun kael kepkurum ngeda ake, sun kunkamrum ngeda ake,’ pepra deipserada akonuma’ tenen, akeca deiki moupra kael kemamidi, Israel tara nesala yuma tep lap perami. Atep nengeda, akeca Efod deiki deiami gel, Urmin cap, Tumin cap, diramya deiki di, peten kemna tep keca kupka cadi, adeiki di sun kunkami keca kael keami.} opkal ton, akati pumbon neitamai akurure. Atep nengda, sundi, ‘Ware kupkamep do?’ tenen, tenepkurume,” pepi. 15 Upepya tep nengeda, sun Dan yala nengdi, adipapu Mikha ati damai bei. Akati neitamai peda, Lewi yala kaber ngebo ton akuramu. Ukuramupa, sun apamubari nengdi er tep, “Telepe,” pepidi, yana upu talenmai.

16 Aupu pepi taruda, sun Dan yala nesala, sun jen talen neng denge pio weik, enam ratus (600) neng, sun mar pona tep keca jen cap, mar du cap, akeca yuma keteneprapidi, akati arum ongopgenepra weiami gel beilya damai dinin, akati arum wengbana tep bisi, ila bublan potokra deiamyai damai bena tekmai.

17 Aceipu tekmai pangeda, sun apamubari nengda, ada ‘Amutu neitamai wareto kurur do?’ tenen, yana dinmai nengda, sunda akati arum neitamai yana weki. Weki dingeda, co deiki di petuprapidi, nimi urasin utopu ketekepra deiamidi, kunumna weik gat keca, er si perak di palepra deiamidi domi patung cap, tonda yuk yala yambul patung cap, tonda kain efod capda, ‘Ange dopropkup’ tenen, akati yana wekidi. Ange yuma doronmai taruda, Lewi yala kaber ngeboda, sun enam ratus (600) jen talena neng cap, kikiman bisi bana ila buplan damai tekmai. 18 Apamubari neng konum Mikha ati weki dingeda, erdi deiamu efod cap, nimi urasin utopu keca, er si patung cap, berhalah si eremami isok-isok tep, yambul patung cap dopra deiamipa, dopropi. Ukupipa, Lewi yala kaber ngebodi asipetepu. “Angeda sun ware keca deiyo tep kunmarum do?” pepra, asipetepu.

19 Upepupa, sundi tamupra pepi, “Kanda kan burudi kan sipyal kinipdongopmemdi, dim pepo! Asimnada, pio meme. Nundi pepkepetopu, melipra nun upupu gekenkamserume. Atep, amenda taru kanda, nun imam ngebo cap, tonda nun nai bo utopu upu pena deiyo ngebo cap keipkamkepe. Imam tenpu gung tepapu kepmum ngeda gume. Pio telep ngeda, tenpu mutu yala neng yuma tep, upu lepsisingna cap, imam kepra derina capda, pio telepe!” pepi. 20 Aupu penmai pangeda, aLewi yala kaber ngebo, sun apenmai upu pio moupra gekenmau. Gekenmaua cadi, kain efod cap, tonda nimi urasin utopu keca, patung-patung cap, berhalah si eremna isok-isok cap, akeca yumada dopropu dingeda, sun aupu penmai neng cap, kikiman bei.

21 Ukupi dingeda, sun Dan yala nesala yumadi, sun bisi embanmaiya di, sun men di baramitopu dukdongopra bei. Bisi banmai taruda, sun mepra banmai ngeda, ake. Ada, sun nyapu cap, nimidi peirameng gam keca cap, tonda sun bung keca yala-yala yuma capda, doupra mepra banmaipanen, sun jen talena nengda, amenda tara yakanmai. 22 Ange yuma konum ukupra banmaiyanen, sun konum yambul karenai ortara mutu konum beiopda, Mikhadi er cap, er kayapu neng, akati pumbon kikiman dakurami neng yuma cap tep, kong pepupa, yai pangeda, sun cap kikiman wisipra, Dan yala nesala benmai bisipu dombei. Konum sun anesala damai bei. 23 Mikha er tara neng yuma, ila upu deiki di kong pepi. Upepipa, sun Dan yala nesaladi tamupra dipetepidi, Mikha tep asipetepi, “Ada ware keca deiyo tep, kanda nimi pio ila di nun amenda tara yakanmarum do?” pepra, asipetepi.

24 Asipetepi pangeda, Mikhadi tamupra pepu. “Gume, sunda nedi petupra deiamsi keca, isok si eremna tep, nimi urasin utopu keca, er sida patung-patung cap, ne imam ngebo, Lewi yala kaber ngebo cap, upula doupra, dubenmaneruma tepa. Ukupmanerumpa, neda akeca-keca pio gum kupmanera tep, sundi, ‘Ware kunkamar do?’ tenen, asipetepnerum ngeda, ware deiyo tep, aupu pepmanerum do! Tali dim pepra kunkaman do? Gume,” pepu. 25 Upepupa, sun Dan yala nengdi tamupra pepi upuda ake. “Kanda kange moupkurume. Pio telep ngeda, sipyal kinipdongopkurume. Ada kandi ato upu pepmempa, kundenkapmengedi, sunda nun kankan kunge yu neng gekepkengopda, kan dopra ila di wenepkengedi, kan poryakenunge. Ukupsengepa, kan cap, kan ati neng yuma capda, depkamrume,” pepi. 26 Aupu konum upepi pangeda, sun Dan yala nesela yumada, bisi deipra sun baramitopu kupra, ortara mutu bei. Mikhadi dinmaupanen, banmaianen, ‘Uo, sunda ila puto kunung dinin, ne putoda metekanunpu kunerura cadi, dakwapye, ne tapnedi nepe atipu tamupra benkamane,’ tenepu. Atep, sun Dan yala nesalada, pera orkaren mutu bei dingeda, Mikhadi ila puto di, er pe ati damai sepra beu.

Sun Dan yala nesaladi, Lais mutu nesala popinge tep, seki upu

27 Dan yala jen talena nengda, Mikhadi ketekepra deiamu patung-patung cap, efod cap, kunumna weik keca perak di ketekeipu keca cap, tonda er melimna tep Lewi yala kaber ngebo, imam pel doramu ngebo cap yumada, konum upula doupra bei. Ukupi dingeda, sun adipapu Lais mutu porbei. Uda, sun Lais mutu kurami nesalada, ila kange telep deiki di kuramidi, yuk mutu nesala tep nengeda, podana pio gum dipapu, telep kange dopra kurami. Ukupra dakuramyaipu, sun Dan yala nengdi, Lais mutu neng tep mar porbei. Ukupidi, sun ati-ati yumada uku dongopra gawal daki.

28 Amutu neitamaida, tenpu ila pala ban mutu er sida, Bet-Rehob mutu kwamu. Dan yala nengdi, sun Lais mutu neng yuma popropi taruda, yuk mutu nesaladi, Lais mutu neng tep, ton yana men melimyaia deiyoda, sun Lais mutu nengda, pio bura tara neitamaito kurami. Ukuramya cadi, sunda yuk mutu nesala cap upu men sisingdarami. Sunda, ila karen mutu, Sidon mutu damai men kurami. Ila karen mutu ortara kuramya cadi, yuk mutu nengdi, sun Lais mutu nesala makuna tep, ton yana men melipi. Dan yala nengdi, Lais mutu bisbisa kapidi, sun domi ati yuma uku dongopra gawal daki dinin, amenda taruda, sun Dan yala nesela dipapu, amutu neitamai ati-ati yuma punupra dopra, sengpepi dingeda, amutu neitamaipu sundi talepra kurami.

29 Amutu tep punupidi, amutupu dinin, ukupu si sipepi mutuda, Dan mutu pepi. Asi pepinge deiyoda, sun apu yapudi deipipa, dadeipdanen yakarami nengdi peiami sipu pepi. Tonda, sun co puna ngeboda, er sida Dan perami. Tonda, amutu si tep, Dan pepinge deiyoda, Yakop erdi deiamu mi Dan tep, asi wepra si sipepi. Dinino, pumun taruda, amutu sida, Lais mutu perami.

30 Tali keca si eremna tep, nimi urasin utopu keca petupra deipi ngeda, apatung isok-isok si eremami kecada, Mikha ati pumbon di dalupra dopropidi, dubenami patung-patung yumada, akeca erepra deipidi, isok-isok sipu eremami. Ukupi dingeda, Musadi deiamu ngebo, er si Gersom, er angebodi deiamu ngebo Yonatan cap, tonda Yonatandi deipupa dadeipdanen yakarami neng cap, sun Dan yala nesala tep, imam utopu pel dorami dinin, isok si eremnapu kurami. Sun adeipdanen yakarami nengdi, imam neng kepra deipyakaramidi, isok sipu eremami. Ukupra dakupyakaramiyanen, amenda dorkunkamu taruda, yuk karen mutu ila yu nengdi, ^{▼▼yu neng – Yu neng seki ngeda, ada yuk karen mutu jen talena neng, sun Asyur mutu yala nesala tep seki. Sunda ila yu cap, ila puto cap kurami neng cadi, amenda ataru neitamaida, Israel nesala kurami mutu-mutu yumada popidi, Israel neng denge pio weika di dopra, ateng kouprapidi, sun pe mutu tamupra dubeidi, ila ikin pel dimamipa, acapu ikin kange doupra kurami.} amenda taru mar poryaidi, sun Dan yala nesala tep popi. Popi dingeda, aneng tomopra, ateng kouprapidi, sunda karen mutu dubei. 31 Tonda, Mikha erdi nimi urasin utopu kepra, deiamudi petupra domu keca patungda, tali isok-isok si eremna ngeda, perak di palepra, deipudi doumu ngeda, sun Dan yala nesaladi dalupra dopropidi, men taru Lais mutu perami dinin, amutu si teppu, Dan mutu perami mutu neitamaipu deipidi, aisok sipu eremami. Amutu kurami taru neitamai yumada, Allah Yahweh er si eremna ati, tek sisi ngeda, tenda opkal bol deiki di, keana dodin tenda ati deipi ngeda, Silo mutu neitamai adeiamipa kwamu dinin, sun Dan yala nesaladi, ‘Allah er si eremna atida, damai akupmare,’ tenena gum di, sun isok sipu eremami.