Judges 19

Nimi tenpu Lewi yala ngebo cap, er kikiman mana tep, ner upula dopropunge tep, seki upu

1Ataru neitamai yumada, Israel mutu neitamai ila nimi deiyo kepra Raja kuna neng ton, pio men kurami. Tenpu Raja ngebo peda, sun Israel nesala yuma tep, men taleamudi, upu men peramnga cadi, sun anesala yumada, sun pe kange tenena deiki di, tali lupra malipu kurami. Nimi deiyo neng Raja ton men wepra deiami taru neitamaida, nimi tenpu Lewi yala ngebo, tali bura mutu dakuramu. Erda Efraim mutu dinin, iknapi dam tara kuramu. Amutuda, nimi weik ton men kurami. Metekanunpu dakurami. Angeboda ukuramyai dakuramudi, erdi kaber ner tenpu, Yehuda tara neitamai dinin, Betlehem mutu kuramu kaber ner, er tek sisi dona tep gum dinin, tali nyangdana tep, aner upula dopropudi dopu. 2Ukupudi kikiman dakuramrei dinino, akaber nerdi, ange Lewi yala ngebo tep derepudi, yuk neng cap kikiman maramrei. Ukuramudi, aLewi ngebo tep derepu, adipapu angebo taprapudi, tamupra er pe nai bo sisa, er ati Yehuda tara dinin, Betlehem mutu beu. Beudi, er nai damai kuramu taruda, ware dumbari deiki di bena dakuramu.

3Bena dakuramupanen, er dopu ngebo, aLewi yala ngeboda, amenda taru er damai yau. Ada, erdi, ‘Aner naprapnedi, ne ati doupra yankamne’ tenen, beu. Abeu taruda, erdi nimi tenpu er pel melimna ngebo cap, doupra beu. Tonda, keledai bisam butene cap doupra beu. Amutu neitamai konum beu pangeda, anerdi doupra, er nai ati damai dubeu. Dubeu pangeda, aner er naidi angebo konum epu. Epkopda, er nai adipapu ange bo tep, kange deipudi, gispal dopu. 4Tonda, aner er naidi, ‘Gume angebo tep, er mutuda tamupra men benkamarenge,’ tenenapu kuramu. Ange tep nengeda, tumi ue weneri deiki di apu kuramu. Tonda, jen keca jena cap, me jena cap, mana cap yumada, er ner upula di dopra domu ner cap, kikiman er nai bo ati apu kurami. 5Dumbari tumi konum kupu pangeda, sun ipna bereng tamne taruda, ‘Adipapu benkamnem’ tenen, keteneprei. Dinino, aner er naidi aLewi yala ngebo tep upepu. “Jen keca jepmepepa, puto kupserya deiki, sun adipapu bisi benkamrerume,” pepu.

6Upepu pangeda, er Lewi yala ngebo cap, aner er nai bo cap, abukmaidi, sun anesala yuma cap, kikiman jen keca jena cap, tonda me jena cap, kunmai. Dinino, er adipapu tekrapudi, ‘Benkune,’ tenepu. Utenepupa, aner er naidi, “Banada gume,” pepra napdongopu. “Kan kangeda, pio telep kangepu doupmemdi benkamrume,” pepu. “Tonda atumida, acapu mapkamape,” pepu.” Upepu pangeda, Lewi yala ngebo akunmaupanen, lukunda tenpu ton amapi. 7Ange utopu, sun damapmaiyanen, bereng tamne taru di, ‘Adipapu benkamep’ tenen, ketenepi. Dinino, aner er naidi, Lewi yala ngebo tep upepu. “Tonda atumida, acapu mapkamape,” pepu.” Upepu pangeda, Lewi yala ngeboda, akunmaupanen, lukunda tenpu ton amapi.

8Ange utopu, ue pamubari tumida, pio ipna sisa, aLewi yala ngebodi, ‘Neda benkamane,’ tenepu. Utenepupanen, utopu aner er naidi pepu, “Uda, jen keca jepmepedi, amenda taruda benkurume,” pepu. Upepupa, sun butene yuma, sika dipu jenmai taruda, adipapu keteng konum wekrou. 9Ukupu dingeda, Lewi yala ngebo cap, er ner upula di dopropudi dopu ner cap, tonda er pel melimna ngebo capdi, ‘Nun benkup’ tenen, ketenepi dinin, aner er naidi upepu, “Kao, atumida konum ina damai kupre. Atep metekanun dortaruda ipkure. Telep ngeda, nun kange pio telep-telep deiki dipapu amapkupe. Mapmapyanen, berekyopda, ambutumi ipna sisa di, bukropedi, kan pe atida, tamupra pio benkamarume,” pepu.

10Dinino, aLewi yala ngebo erda, ‘Acei mana ne songe,’ tenepu. Er cap, er ner upula di dopropudi domu ner capda berei. Tonda er pel melimna ngebo cap, keledai bisam butene cap, keteneipu. Ada, sun akeledai bisam bali deiki, er kum damai deipinge, nimi bukra ban keca, er si pelana, akeca deiki bukra, sun yuma kikiman bei. 11Abanmaipanen, konum ipmanto damai kupu. Ada, Yebus mutu perami mutu damai bei. (Uda, amutu si tep peramyada, Yerusalem mutu ton perami). Amutu bei dingeda, angebo er pel melimna ngebodi, er deiyo ngebo tep pepu. “Ne deiyo ngebo, nunda keana tep, Yebus yala neng sun mutu acapu maptepe do?” pepu. 12Upepu dinino, er deiyo ngebodi tamupra pepu, “Gume, nunda amutu neitamaida, sun Israel yala nesala ton men kununge. Yuk yala nengpu amutu kununga cadi, amutu neitamai di nun beipye men peikupe.

13Atep, nun ton cap yambulanun dukdongopra bapepanen, ortara Gibea mutu damai do, Rama mutu damai do, bena mapkupe,” pepu. 14Ange tep nengeda, sun adipapu dukdongopra benapu kunmaiya cadi, Yebus mutu beipye ton men bepeiki. Banapu kunmaiyanen, Gibea mutu dinin, sun Benyamin yala neng kurami mutu neitamai banmai taruda, ipropudi adipapu konum wekrou. 15Atep, sun adipapu amutu neitamai bei dingeda, ‘Nunda keana tep amutu bena mapkupe,’ tenepi. Ukupra tenepidi, akati arum neitamai bena wekidi, ila pala tu keteneipyai, nimi bupra bungamidi, upu sisingamya neitamai, bena buki dinino, amutu ati damai tu deikipu bena bukmai. Abukmai taruda, nimi amutu neng kan-kan di, tenpu ngebo peda ton, yana kikiman marbana tep, men napra sun ati pio men napra dubenmai. Kaukemnapu kupmaipa, acapu bukmai.

16Abukmaipanen, ipropkou taruda, sun amutu ati dam tu pirman tara deikipu tupa bukmai. Abukmaipanen, wisi ngebo tenpu, er wa peramnga cadi, pel donmauanen yau. Tek sisi er derin mutuda, iknapi dam tara dinin, Efraim mutu neitamai deiami. Dinin ukutaruda, keana tep Gibea mutu neitamai kuramu. (Ataruda, Gibea mutu neitamai kurami nengda, sun Benyamin yala nengdi deipgerekdanen nengpu kurami.) 17Awisi ngebo yau dingeda, dinmaupa, erdi aLewi yala ngebo amutu neitamai ati dampu bena bukmaupa yana epu. Epudi asipetepu, “Ne kabo, kan dan mutu ngebo do? Tonda, kan dan mutu benkamrem do?” pepra, asipetepu.

18Upepupa, Lewi yala ngebodi tamupra pepu. “Nunda ukupu Yehuda tara neitamai dinin, Betlehem mutu di yakanmape. Tonda, ataruda nun pe ati, ‘Ne mutu sisa tamupra bankamap’ tenen, ukupu banmape. Ada, nun mutu yambul atida, iknapi dam tara dinin, Efraim mutu bankamape. Atep ne deipnei mutuda, Efraim mutu di deipnei ngebo kunune. Atep nun amutu neitamai, abukmap dinin, amutu nengdi, nun ton men napropsengedi, ‘Nun ati kikiman mapkupe,’ men penmasenga cadi, tali abukmape. 19Tonda, nun yuk-yuk keca ton pio men putanmasera cadi, men moropkamsepe. Nun jen kwal tep nengeda, nundi konum kipmape. Tonda, nun keledai bisam manaida, kalkal pepu betei cap, sun jen keca yala-yala yuma capda, konum kipmepu. Utopu ne cap, ne ner cap, tonda ne pel melimna ngebo cap, nun jena tep nengeda, roti kwaneng cap, anggur me cap konum kipmepu. Dinino, ‘Ati pumbonpu maptepye’ tenen, putapmaserpa, abukmape,” pepu.

20Upepu pangeda, awisi ngebodi tamupra pepu, “Kan kwar tenena pio meme. Nedi melipkukene. Amutu neitamai ati dongedi, akati dam aca tapmasengaida, mana meme. Nati pumbonpu kikiman mapkupe,” pepu. 21Upepudi adipapu anesala yuma doupra, er pe ati dubeu dingeda, anesala sun keledai bisam yumada, jen karepupa jepi. Tonda, er ati yanmai nimi bo neng, sun yan yumada, yan me kupra deipudi, jen karepupa, sun yuma kikiman jen jenmai.

Sun Gibea mutu nesaladi pio mali kupinge tep, seki upu

22Sun anesala yuma kange deipra akati neitamai buplan dekdongopra weki taruda, amutu neitamai kurami neng, yuk neng sun yu weik neng, dato-dato di yaiopda, akati yuma warekra ongopdongopi. Ayu neng puto di akati buplan yana gogo penmaidi, akati deiyo wisi ngebo tep upenmai, “Kandi doupra, kan ati neitamai dongopmarem ngeboda, adipapu doupra nun karepso,” pepra moronmai. Karepsemem pangeda, nundi angeboda, nun tenepmaptopu, pio mali kweipkamape. Ada, nun nimipu akunmapapu dinin, angebo cap kikiman mapkamepe,” penmai. 23Awisi ngebo buplan pakra bura tara yaudi, sun aneng tep upepu, “Uo ne kayapu neng, sundi, ‘Ukupkamepe,’ tenepmarum ngeda, pio meme! Sun yuma tep nedi tek sisi pepsene. Pio mali kun keca yala yuma cap, tonda nimidi tenena gum keca yala yuma capda, pio kuna meme. Ange tep nengeda, angebo erda ne nimi bo ngebo kurura cadi, er dopra sun tep men karepsetene,” pepu.

24Upepudi, aupu ton dukdongopra pepu. “Dinino, sun namna tep nengeda, angebodi doprapudi domu ner, nedi aner dopra tali karepkamasene. Tonda, nedi deipsi kaber ner, nimi dona gum nerda, er cap sun butene nerapuda karepkamasene. Sun awekmarum nengdi, ‘Ukupkamepe,’ tenepmarum ngeda, atenepmarumtopu anerapu butene tep, sun tenepmarumtopu kupkurume. Dinino, sunda ne ati yanmaner nimi bo ngebo tep nengeda, ‘Mali kupra deiptepe,’ tenenmarum ngeda, pio men kupkamarume. Angeda pio meme,” pepu. 25Dinino, angeda sun yu nengdi awisi ngebo penmau upu yuma pio moupra men gekepi. Ukupya tep nengeda, er Lewi yala ngebo er upula dopropudi domu nerpu dopra, buplan pakrapudi, sun amali neng wekmaidi moronmaiyaipu dokotepu. Dokotepu pangeda, sun ayu neng yumadi, sun beipye peingna gum di, alukunda neitamai yuma, pio mali weik kunmaiyanen, aner er nong deiki pel donmaipanen bereku.

26Konum berekupa, ipna taru dipapu akaber ner tamuprapudi er domu ngebo kunmauai beu. Beu dinino, awisi ngebo er bisi buplan damaida, er domu ngebo peda, akati damai kunmauaipu bena, loka dourbeu. Akati damai apu kupmaupanen, berekopda ipna taru peda, pio acapu kupmau. 27Aipna taruda, er nenge upula di dopra domu ngeboda, bukrou. Tonda, er ati pum di bura benkoua tep, akati buplan pakudi, er ner upula di dopra doamu ner, akati bisi buplan damai apu wirikra deipdanmauai di, aner er buruda bisi buplan talepra kupmaupa epu.

28Epu dingeda, adipapu er ner tep pepu, “Ukutaruda, nun benkunema cadi, bukromemdi, tekroyo,” pepu. Upepupanen, er ner upula di dopra domu nerda, konum depmaua cadi, upu ton tamupra men pepu. Ukupmau atep, angebodi adipapu er ner depmaupa, er nongda, erepra keledai bisam bali deiki deiprapudi gerekdongopu. Ukupu dingeda, er Lewi yala ngebo adipapu doupra, sun pe atipu tamupra dubeu. 29Konum sun ati dubeu dingeda, er Lewi yala ngebo sun ati pumbon wekrapudi, tema doupra yauopda, er ner upula di dopra domu ner, depmaunge er nong sekra gelepsingipu. Tema di aner nong gelepsingipunge er dengeda, amuldam di dutara dua belas (12) galemna sekra deipu. Ange konum kupu dingeda, er Lewi yala ngebodi er ner galemna yumada, bokrapudi amuldam di dutara 12 akaputopu, sun Israel yala nesala kuramyai mutu 12 kuramnga cadi, galemna 12 dokotepu.

Amutu-amutu yuk-yuk dinin, amutu yuma galemna yuk-yuk tenpu-tenpu sun damai dokotepu. Tonda, aner er nong galemna cap, upu cap dokotepu taruda, akeca karerbana tep nengeda, nimi ton wepra doproipudi, ‘Aupu perbankamrume,’ pepu ngeda ake. ‘Nun Israel yala nesala, Mesir mutu neitamai di doupra, yakaramupu taru di dipra, dakupyakaramupkanen, akunmap tumi peda, pio amali weik keca utopunge ton, pio men kuramupa, men diramupu,’ pepra, pepbarumudi, akeca agalemnada, Israel yala nesala kunungai yuma karerbenkurume,” pepu. 30Ukupra karerbanmai taruda, amutu-amutu kurami Israel nesala yumada, ange epidi upepi, “Uo anengo, angeda nun damai utopu keca ton pio men kuserure, ange utopu ton pio men diramepu. Nun, Israel yala nesala Mesir mutu neitamai di, yakaramupu taru dordi dipra, aneitam taru pe, atumi peda, apio mali keca utopunge ton men kuramupupa, pio men diramepu. Ange tep nengeda, nun Israel yala nesala yumada, dim pepra men kunkamepe. Nunda pio upu moupra pena cap, tonda ‘Angeda ware deiyo tep kupmar do?’ peprapmepedi, nundi, ‘Ange kupka cadi, ware kupkamep do?’ tenen, upu talenkamepe!” pepi.