Judg 2 | XteSC | STEP | Uda Israel nesala Bokim mutu kunmai taruda, Allah er sida Yahweh, er malaikatda, Gilgal mutu di Bokim mutu welepra beu. Ke taru tep, Israel nesala bulupra Bokim mutu kunmai mutu amalaikat beu. Amalaikatda, Allah er ila mambul upu lap perbana ngebodi beu. Beudi sun Israel nesala tep aupu pepu. Allahdi upepsere. “Sun Mesir mutu kuramrumpane, nedi lyepropsisidi, doupra Kanaan mutu neitamai deyakaramsisi. Tonda sun apu yapu tep, ‘Ukupu pio telep mutu karepkamsene. Angeda men tapkamne,’ pepra pediramsi upuda, men tapsi. Tek sisi amutu konum karepsisipa, doproprumdi, pio tep amutu talepra kunkamrume. Tonda, nedi sun apu yapu tep, ‘Ne mawa nesala kunkamrum’ tenen, ‘Pio melimsenepa, telep kweipkamsene,’ pepra, deipsi upuda, pepsisi. Ne cap, sun Israel nesala cap, telep kupra kikiman kuna tep, ‘Telep kweipkamsene,’ pepsi upuda, pio men tapkamne. Ada, sun ukutaru kurum nesala cap, sundi deipmarumpa, dadeipkameng nesala pe tep, aupu pepsene.”

Judges 2

Bokim mutu Allah er malaikat yaudi pepu upu

1 Uda Israel nesala Bokim mutu kunmai taruda, Allah er sida Yahweh, ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} er malaikatda, Gilgal mutu di Bokim mutu welepra beu. Ke taru tep, Israel nesala bulupra Bokim mutu kunmai mutu amalaikat beu. Amalaikatda, Allah er ila mambul upu lap perbana ngebodi beu. Beudi sun Israel nesala tep aupu pepu. Allahdi upepsere. “Sun Mesir mutu kuramrumpane, nedi lyepropsisidi, doupra Kanaan mutu neitamai deyakaramsisi. Tonda sun apu yapu tep, ‘Ukupu pio telep mutu karepkamsene. Angeda men tapkamne,’ pepra pediramsi upuda, men tapsi. Tek sisi amutu konum karepsisipa, doproprumdi, pio tep amutu talepra kunkamrume. Tonda, nedi sun apu yapu tep, ‘Ne mawa nesala kunkamrum’ tenen, ‘Pio melimsenepa, telep kweipkamsene,’ pepra, deipsi upuda, pepsisi. Ne cap, sun Israel nesala cap, telep kupra kikiman kuna tep, ‘Telep kweipkamsene,’ pepsi upuda, pio men tapkamne. Ada, sun ukutaru kurum nesala cap, sundi deipmarumpa, dadeipkameng nesala pe tep, aupu pepsene.”

2 “Ange utopu, sundi ne upu tapmumdi, Kanaan mutu talepra kunge nesala cap tep, ‘Nun cap, sun cap, podana gum dipapu, telepe kange doupra kikimanpu kunkamepe,’ pepra, pedina upu men deipkamrume. Sun Israel neng cap, amali neng cap, kikiman men kunkamrume. Sun amutu taleamidi, si eremenge isok-isok tep, pala gel taplakra deriramengai cap, sun isok ati cap yumada, sundi uruptapkamrume. Ange yumada, nundi kikiman pepra deipdamepu dinin, ne upu moupra gekepra men dombarume. Ange yaniptaprumdi, amutu nesala mali kunge kecada, tupa akapmare. Ware deiyo tep, ne upu men gekepra dombarum do?”

3 Ukuramruma tep nengeda, nedi sun tep upepsene. “Nedi sun podan neng, amutu kunungada, nedi bisbisa kapra men dokotepkamne. Amutu neitamai embaramrumpane, sun menop taru di amutu kurami nesalada, apu kunkamenge, tapra, men bendopkamenge. Atep nengeda, amutu mali nesala, Kanaan mutu neitamai akunmangepane, sunda ikine weik kunkamrume. Tonda, sun si eremenge isokda, sun Israel nesala tep, mali kweipserepa, ikin kange doupra kunkamrume. Ukupmumnyopda, tek sisi pena youramretopu kupkamsere.” Allah er malaikatdi, Israel nesala yuma tep pepu.

4 Allah er si Yahweh, er malaikatdi aupu konum pepra sengpepkopda, sun Israel nesala yuma, ila di mali pepra engenmai. 5 Engenmaiya tep, amutu er sida, Bokim mutu pepra deipi. Israel nesaladi penung upu deikida, Bokim deiyoda, ‘Engena nesala’ tenen, penunge. Atep, amutu sida Bokim mutu pepi. Tonda, Israel nesaladi amutu neitamaida, Allah er gispal dopra karena tep, sun pein keca, domba cap, kambing cap popra, uku dongopi.

Yosua konum depupa, amenda taru sun Israel nesaladi, isok si eremaminge tep, pepu upu

6 Yosuadi er upu sirya konum pepu dingeda, erdi, ‘Daberume,’ pepu pangeda, Israel nesala amutu tapra beidi, Kanaan tara neitamai dinin, sun pe mutu yuk-yuk tamupra beidi, yuk-yuk bena taleprapidi kurami. Pumun taru di, Allah er si Yahwehdi, ‘Sun cap sundi deipmumpa, dadeipdanen kunkameng nesala cap, amenda taru amutu kunkamrum’ tenen, amutu yuma bokrapudi, sun Israel nesala yala yuk-yuk kareputopu, sun yuk-yuk bena talepra kurami.

7 Yosua tupa gam kuramu taruda, sun Israel nesala yumadi, Allah er si Yahweh, er amutara kuramidi, er upu gekepra dombaramidi, er si eremami. Tonda, Israel nesala sun upu bongdina deiyo neng, wisi nengda, Yosua cap kikiman kurami dinin, Yosua menmena depu. Konum depupa, sun awisi neng tupa gam kurami taruda, Israel nesala tupa telep kuramidi, Allah er sipu eremami. Yosua cap, awisi neng yuma capdi, Allah er si Yahwehdi, Israel nesala melimna tep, ila mambul pel doramunge yuma, sun pe asuru di diramya tep, aneng tupa gam kurami taruda, sun Israel nesala yuma, Allah er sipu tupa eremami. Sun gam tupa kurami taruda, sun yuk tali Israel nesala yumadi, Allah er upu gekepra er sipu eremami.

8 Ukupra dakuramipane, amenda taruda Yosua depu. Ada tali ngebo gum dinin, Yosuada, Allah er upu gekepra, er amutara kuramudi, Allah er pel dona tep wepra deiamu ngebo Yosua depu. Yosua er nai boda, gam kuramu taruda, er si Nun kuramu. Nun er mi Yosuada, er kuramu taru dengeda, 110 keteng tamun kuramnganen, depu. 9 Depu pangeda, er nong doupra, er menop taru kuramu mutu dubeidi, tu palipra peipi. Amutuda, menop taru Allahdi er tep kareramupa, er Yosua pe bena dopropudi kuramu mutu si, Timnat-Serah perami mutu dubeidi, tu palipra, Yosua er nong peipi. Amutuda, Efraim yala neng talepra kurameng mutu kurure. Yosuada, Efraim yala ngebo kuramnga cadi, amutu neitamai er nong peipi. Tonda amutu deiki, dutara kwamu mutuda, Gaas mutu perami.

10 Uda, Yosua cap kikiman kurami neng, ataru Israel gam kurami nesala keteng tamun denge weik dakuramipane, amenda taru sun yuma depbaramipa, yuma gum kupu. Ataru kurami nesala yuma depra gawal daku dinin, sundi derirami nyapuda, tupa gam kuramidi, nepbarami. ^{▼▼Pumun taru – kurami Israel neng, Mesir mutu neitamai di yakarami nengda, Allah ila mambul pel doramunge yuma, sun pe asuru di dirami dinin, mali-mali weik kuramya tep, Allahdi aneng yuma tep wenepu. Allahdi sun wenemna tep, ‘Kanaan mutu men wekamenge’ tenen, me gum mutu neitamai keteng tamun denge weik 40 tahun neitamai di, tali daembaramipane, sun du nesala yuma konum derami pangeda, Kanaan mutu men weki. Sundi deiami nyapu puda, amenda taru Kanaan mutu weki.} Atep amenda taru ereipi nesala yumada, Allah tep betapra men tenerami. Sundi, tek sisi Allah er si Yahweh kure kecada, men kael keami. Tonda, Allahdi pumun taru Israel nesala tep melimamudi, nimi men kupmanto keca kuramu ngeda, sun pe asuru di men diramya tep, men kael keami.

11 Ange tep nengeda, ataru kurami Israel nesaladi, pio mali-mali keca kuramipa, Allah er kangeda, ‘Ne songe,’ teneramudi yu kupu. Tonda, ataru kurami nesaladi, ‘Allah er si eremna nun songe,’ tenepra tapidi, Kanaan tara neitamai kurami nesala isok si eremna keca, er sida Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupkada, ‘Baal pepmengepa ikin kuprur’ tenen, Bahal sekmupke. Si yuk sekmepu dinino er tenpua.} si talepra si eremamidi, mem ati dopra, isok si Bahal, asi erepra mali kurami.

12 Ukuramya deiki, sun Israel nesaladi, Allah er si Yahweh tep yaniptapi. Ada, sun apu yapudi si eremamipa, meliamu Allah tapi. Tonda, Yahwehdi sun apu yapu, Mesir mutu neitamai di lyepra doupra yakaramudi, ukupu telep mutu doupra deriryau ngebo, Allah tep yaniptapi. Ukuramidi, Kanaan tara neitamai dinin, amutu-amutu bena kuramya neitamai, amutu-mutu kurami nesaladi si eremami kecapu, sun Israel nesala peda, aisok si eremna kecapu talepra si eremamidi, isok keca pel doramidi, amali pel dombarami. Ukuramya tep nengeda, Allah er dipru tulum weik kupupa, Allah diramudi, yu pio weik kupu. 13 Ada tali tep gume. Sun Israel nesaladi Allah taprapidi, amutu neitamai kurami nesaladi si eremami isok, sun peda si eremami. Amutu isok sida, Bahal cap, tonda isok ner er sida, Asytoret, sun Israel nesaladi, talepra si eremna ati dopidi, aisok si butene eremamya tep, Allah yu pio weik kupu.

14 Ukurami pangeda, Allah er si Yahwehdi, er yu sun Israel nesala deiki deipu. Ukupka tep, erdi sun wenemna tep, kareramupane, sun bura tara mali neng, podan nengdi, Israel nesala yan poprapidi, sun bung keca yuma dalupra dororami. Allahdi Israel nesala, ‘Sun mali tep dakwapye, dakunkamenge,’ tenepudi, sun podan neng tep puto karepupa, anengdi dana-dana tara di, Israel nesala damai yana, bisbisa kapra popbarami. Allahdi sun Israel nesala tep, ton cap men meliamupane, sun puto gum kupka cadi, sun podan neng tep, men popmanto kurami pangeda, sun podan nengdi bisbisa kamami. Allah er putoda, sun podan neng deiki deipka tepa.

15 Ange tep nengeda, ataru-ataru yuma Israel nesaladi, sun podan neng tep, ‘Porbenkamepe,’ teneramidi, bena poteremami dinin, men kupmanto kuramipa, sun yu nengdi Israel nesala tep, popbisipra kurami. Ange ukurami ngeda, menop taru di, Allahdi Israel nesala tep, ‘Sun mali kuprumdi, ne tapnerumnyopda, sun wenemna tep, sun podan neng puto karepnepa, sun Israel neng damai yana poptapkamsenge,’ pepra pediramutopu kupu. Yu nengdi sun tep, ponapu kuramya tep, sun Israel nesaladi, ila mali kange doupra kuramidi, ‘Uo,’ tenepra, ikin weik kuramu.

16 Ukupra dakuramipane, amenda taruda, Allah er si Yahwehdi tamupra yana, sun tep meliamudi, sun lyemna tep, upu bongdina deiyo neng, puto neng ton wepra deipbaramupane, anengdi Israel nesala meliamipa, sun podan neng cap, sun bunga dalupra dororami neng cap tep, popbisipipa, amali nengdi tapra bura saka bendopi.

17 Allahdi ukupra meliamupa, erdi kareramu deiyo nengdi, Israel nesala lyepra meliami dinin, sun Israel nesaladi aneng tep, sun upu men gekepra kuramidi, kange di ton cap aneng tep tamami. Sun deiyo neng tamamidi, angetopu, sun nai bo Allah tep tamamidi, yuk isok si gispal dona tep, gutam tu dipdongoprapidi, isok si talepra si erepbarami. Menop taruda, sun apu yapudi, Allah er si Yahwehdi, ‘Angeda kunkamrume, angeda men kunkamrume,’ pepra deipu upu gekepra, dumsisi bisipu kupbarami dinin, ataru kurami nesalada, sun utopu men kurami. Sun anesalada, sun apu yapu dumsisi bisi barami utopu men kuramidi, mali-malipu kupbarami. Ukupidi, Allah er upu tapidi men gekepra dombarami. Malipu kupbarami.

18 Ukupbarami taru yumada, Allahdi sun tep, kange di ton cap bicau teneramudi, sun melimna tep, upu bongdina deiyo neng, puto neng ton wepra karepbaramudi, aneng tep er puto kareramupa, anengdi sun Israel nesala podan neng tep popbisipbarami. Allahdi wepra deriramu neng, tupa gam kurami taruda, Allahdi meliamupane, sundi Israel podan neng tep, popra bisbisa kamami. Deiyoda, yuk mutu nengdi, Israel nesala popbisipidi, sun nong deiki ikin keca weik deriramipa, mali kange doupra kurami pangeda, Allah diramudi, ka di ton bicau teneramudi, sun Israel nesala tep, upu bongdina deiyo ngebo ton karepupa, meliamudi lyepropupa, kange di ton cap teleppu kurami.

19 Ke taru tep telep kurami dinin, amenda taruda, aupu bongdina deiyo neng, eremdiramu neng ton konum depropi pangeda, Israel nesala kange di ton cap malipu kupbarami. Ada, sun telep deiyo neng depropnen baramipa, aneng ton men weiamne taruda, Israel anesala tupa, mali keca weika di ton cap, tapakra malipu kupbarami. Men di sun apu yapudi mali kurami ngeda, yambul mali kurami dinin, amenda taru Israel nengdi, tapakra mali kurami ngeda, ila mali kuna tepa. Tonda, sun nai bo Allah tapra, yuk tali isok si erepra, isok si eremamidi dombarami. Ataru yumada, ‘Angeda mali,’ tenena pio gum dipapu, balila kuramidi, mali kuraminge cap, isok si eremaminge cap yumada, men tamami. Tumi-tumi yuma malipu kupbarami.

20 Ukuramya tep nengeda, ukurami pangeda, Allah er yu weik kupupa, sun Israel nesala tep pepu. “Sun mali kurumnya tep wenepkamsene. Ada pumun taru nedi, sun apu yapu tep, ‘Ne cap kikiman telep kupra kunkamep’ tenen, ‘Ukunkamrume, angeda men kunkamrume,’ pepra deiamsi upu, gekepra men dombaramrume. Tonda, sun konum tapnerumdi, ne upu ton men gekepneruma tep, wenepkamsene.

21 Ada, Yosua depu taruda, Kanaan tara neitamai, yuk yala nesala weik tupa kurami. Ada, Yosuadi sun yuk yala nesala kapul men poramnga cadi, Kanaan tara neitamai tupa kununge. Menopada, ato nesala tep enepra dokotepsipa, sun Israel nesaladi, sun mutu bena doupra kuramrum dinin, ukutaru di dipra, doryankamre taru neitamai yumada, angetopu men makupkamsene. Sun yuk yala nesalada, men enepra dokotepnepane, amutu neitamai tupa dakunkamenge. Amutu-amutu yuma kunge nesalada, nedi men enepra dokotepkamne.

22 Ange tep nengeda, nedi sun yuk yala nesala men enepra dokotepnepa, anengdi, sun Israel nesala tep, ikin keca sun nong deiki deipmengopda, adeiki di kurpetesenedi, moupra dinkamsene. Ada, ‘Israel nesaladi ne tep tek tenenenung do, gum do? Telep kunkameng do, mali kunkameng do?’ tenen, dinkamne. Nedi sun tep kupetepsenedi dinkamsene. Ada, ‘Sun apu yapudi, ne Yahwehdi pediramsi upu gekepra pio talepra kuramitopu, ukutaru kurumu nesala, sun yuma peda utopu kunkamrum do, gum do?’ tenena tepa. Atep nedi sun yuma tep kurpetenkamsene, pepne.” Allahdi Israel nesala tep pepu.

23 Uda, Kanaan tara neitamai dinin, amutu-amutu talepra tupa kurami nesala tep, Allahdi uteneramu. ‘Dakwapye, sun yuk yala nesalada, Kanaan tara neitamai dakunkamenge,’ teneramu. Ange tep nengeda, menop taru Allahdi Yosua deiki men kareramupane, Yosuadi upu men peiamupa, sun Israel jen nengdi, sun yuk yala nesala tep, menmena men bisbisa kapra dokotemamipa, tupa dakurami. Allahdi ukuramu deiyoda, ‘Amenda taru amutu neitamai kunkameng nesala, sun yuk yala nesala deiki di, Israel nesala tep kurpetenkamne,’ teneramnga tepa.