Judg 20 | XteSC | STEP | Lewi yala ngebodi, er upula di domu ner depupa, er nong sekrapudi, Israel nesala kurami mutu yuma, dokotepupa epi. Atep nengeda, sun Israel yala nesala yuma cap, iknapi mutu (arah selatan) kurami nesala cap, dapu mutuda, (arah utara) Dan mutu neitamai di dipdongopra, tonda keteng yakan tara (arah timur) Gilead tara kurami nesala yuma peda, bulupra yai. Ada, ‘Uo, angebodi pio mali kupunge kunumna tep, ware kupkamep do?’ tenen, tonda, ‘Upu talenkamepe,’ tenepidi bulupi. Sun Israel nesala yala-yala yuma, kikiman wisimna cap, tonda tenpu kemna cap tep, Mizpa mutu neitamai dinin, Allah Yahweh er si eremamyai bulupra wengyai.

Judges 20

Israel yala nesala yuma pio podanapu kuramya tep, seki upu

1 Lewi yala ngebodi, er upula di domu ner depupa, er nong sekrapudi, Israel nesala kurami mutu yuma, dokotepupa epi. Atep nengeda, sun Israel yala nesala yuma cap, iknapi mutu (arah selatan) kurami nesala cap, dapu mutuda, (arah utara) Dan mutu neitamai di dipdongopra, tonda keteng yakan tara (arah timur) Gilead tara kurami nesala yuma peda, bulupra yai. Ada, ‘Uo, angebodi pio mali kupunge kunumna tep, ware kupkamep do?’ tenen, tonda, ‘Upu talenkamepe,’ tenepidi bulupi. Sun Israel nesala yala-yala yuma, kikiman wisimna cap, tonda tenpu kemna cap tep, Mizpa mutu neitamai dinin, Allah Yahweh er si eremamyai bulupra wengyai.

2 Abulupra wengyai neng, sun dengeda, pio weik empat ratus ribu (400.000) jen talena neng bulupra yai. Tonda, sun Israel nesala yala-yala yuma, sun mutu neitamai nimi deiyo kepra, upu peramidi, amutu taleami nimi deiyo neng yuma peda, Mizpa mutupu bulupi. 3 Ukunmai pangeda, nimidi sun Benyamin yala neng tep, ‘Uda, Israel yala nesalapu dinin, yuk-yuk yala nesala yumada, buluprapmengedi Mizpa mutu neitamai konum wengyakanmange,” pepra, lap pepipa, gekepi dinin, sun ton Mizpa mutu men bei. Atep Israel yala nesala yumadi, “Uo, apio men diramepu keca, pio mali keca kupu ngeda, lap pepseo,” pepipa, aLewi yala ngebodi pepu. “Jo, nedi upula ner dopra domsi nerda, Gibea mutu benemupa, alukunda neitamai, amutu yu nengdi aner tep, pio mali kweipidi pomi,” pepu.

Upepupa, deiyo neng, awekmai nengdi, ner domu Lewi yala ngebo tep, asipeptepi. “Ukutaruda, kandi nun damai, ayu nengdi kupi ngeda, ware kupi do? Ange yuma lap pepseo!” pepi. 4 Upepipa, Lewi yala ngebodi tamupra pepu, “Ne cap, ne ner upula di dopra domsi ner cap, Gibea mutu neitamai dinin, sun Benyamin yala nengdi talepra kunge mutu, keana tep, nun butene yana kupmanemudi, amutu yana mapmanemu. 5 Ukupmanemupanen, sun Gibea mutu mali kurami neng yumadi, alukunda neitamai di, ne tep eryanei. Ukupi dingeda, ne mapmasi ati damai yana, warekdongopra ongopdongopnei. Sundi tenepra yanmai ngeda, ne pona cap, ne nyakra mali kudina cap tep, ayu neng dayanmai. Dinino, sundi ne ner upula di dopra domsi nerpu, er nong deiki pio mali-mali weik dakunapu kunmaidi, nyangmaiyanen, ne domsi ner popipa depu.

6 Ukupi pangeda, ne dipapu, ne ner er nong doprapsidi, sekra galemna yuk-yuk 12 kepsi. Ange konum kupsi dingeda, amul dam di utara, 12 mutu cap, nun mutu Israel nesala kunup mutu neitamai akuretopu, amutu-amutu yuma dinin, galemna yuk-yuk di, tenpu-tenpu dokotepsi. Nedi ange ukupsinge deiyoda, ake. Ada, sun Gibea mutu neitamai kurami nengdi, yu keca, pio mali weik keca kupidi, nun Israel yala nesala yuma tep, pio ali dangne keca kupra deipsei. 7 Ukupra pio mali weik kweipseiya tep nengeda, sun Israel nesala yala-yala yuma, sun deiyo neng aca kumumnyada, Israel yala nesala pua. Ange tep, nedi sun tep, pepsene. ‘Tenimkamrume. Ware kupkamep do? Tonda, sundi, ‘Amalinge menenga tep nengeda, angeda telepe, amali kunange wenemna tep, menenga kecada, ake,’ tenepmarum ngeda, lap pepserume,’ pepra moropsene!” pepu.

8 Upepu pangeda, sun Israel yala nesala, sun yuma aca kikiman ketenepra wekmang neng yumadi, tenpu wisiprapnedi, tenpu ngebo kuna utopu kepra, aupu pepi. “Gumde! Akupi ngeda, pio mali weik cadi, nun yumada, nun keana tep, aca deipmap dodin tenda ati pe, nun kunup mutu neitamai dopmepu ati sisa peda, pio tamupra men benkamepe. 9 Nundi adipapu sun Gibea mutu kunge nesala tep kupkamep ngeda ake. Ada, nundi ‘Ukupkupe’ tenen, peten kemdin keca, er si undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} deiki di dopmepepa, sun Gibea mutu neng porbana tep nengeda, mepra mar porbenkameng yala nesala, sun sida menmena katawai kepkamre. Ukuprepa, epmepedi, asi yuk-yuk menmena katawai kepre sida, sun ayala nengdi gonga kepmengedi, mar porbenkamenge.

10 Nun Israel nesala yala-yala yuma neitamaida, seper sepuluh ^{▼▼seper sepuluh – Aupu seper sepuluh penunga deiyoda, ake. Ada, ware keca do yuma, 10 akapyopda, 1, tenpungepu wepra derinunge. Angetopu, 100 akapyopda, 10 wepra derinunge. Angetopu, 1000 akapyopda, 100 wepra derinunge.} di nimi ton bokra deipkamepe. Ukupmanto ngeda, jen talena neng, sun gung dengeda seratus 100 neng kununga neitamai di, 10 neng wepra deipkamepe. Ukupra wepra deipkamep nengda, sundi jen keca yala-yala yuma bulupmengedi, ketenepra derirbenkamenge. Ada, Gibea mutu mar porbenkameng jen talena neng, sun jenkamnung keca ketenemna tepa. Sun jen talena neng, Gibea mutu kunge dinin, Benjamin yala nesala tep porbengedi, ikin keca sun nong deiki wenemna keca deribenkamenge ngeda, sun anesaladi Israel yala neng yuma tep, pio mali keca, nun ali dangserur keca, nun deiki deiamya tep, kupkamnupe,” pepi.

11 Upepya tep nengeda, sun Israel nesala yala-yala yumadi, kange dipru tenpu keprapidi, Benjamin yala neng dinin, Gibea mutu kurami neng tep mar porbei. 12 Ange yuma kupi taruda, sun Israel nesala, yala-yala yumadi, jen talena neng ton konum wepra deipidi, doproipipa, sun Benyamin yala neng kurami mutu neitamai yuma tep, “Bemumdi aupu lap perbenkurume,” peipi. Ada, “Sun Benyamin yala nengda, sun tara neng ware keca tep, pio men kupmanto keca, mali pel dopmangu do? Akupmai ngeda, moupra tenepmarum do? Gum do?

13 Atep nengeda, sun Gibea mutu kunge neng, pio men kupmanto mali kupi nengda, tomoprumudi, nun tep karepsemumpa, nun Israel yala nesaladi poptapmepedi gawal dakupe. Tonda ange ukupmepe dingeda, nun Israel neng kunup mutu neitamai di, apio mali kun kecapu, talepra kunung nesala yumada, gum kupra deipkamape,” pepi. Upepi dinino, sun Benyamin yala neng yumada, sun kayapu neng, Israel nesala kurami dinin, yala-yala yuk neng, sundi penmai upuda, teka men tenepi. 14 Sun Benyamin yala nengdi, teka men tenepya tep, Gibea mutu neitamai kurami neng, Benyamin yala nengpu, Gibea mutu ila ati arum damai bulupra yaidi, ‘Israel yala nesala, sun yuk-yuk kunge yala nenge yumada, nun dipu popkamep’ tenen, sunda yai. 15 Atumida, sun Benyamin yala neng kan-kan neitamai di, sun jen talena nengda, denge pio weik, dua puluh enam ribu (26.000) neng bulupra yai. Ada, Gibea ati arum damai dinin, dana-dana tara bukamu yambul mutu-mutu yuma bukamnga neitamai di, bulupra wengyakanmai. Tonda, ange ukunmai taru dipapu, Gibea ati arum domidi, acapu kurami nesala sun peda bulupra yai.

16 Uda, sun Gibea mutu neitamai di wepra deipi jen talena neng neitamai di, tujuh ratus (700) jen talena neng ton wepra deipi. Aneng yumada, nimi pon keca ila di konum kael keami. Sun yuma, sun buru putoda, tebalal tarange di pel dorami. Atep, sundi keneki kecada, sunda nimi pona tep, gel dona ila kael neng kuramya cadi, akeca er si umbanda, tebalal tara buru deiki keneki. Gibea mutu neng akeca tebalal buru deiki keneknopda, tenpunge dopna peda, pio ton men tamami. Ukupmantoda, pio metek keca, nimi giso potong tenpungepu ton akupmaunge peda, umban keca di gel dokotepipa, agel di apotong tenpu pomu. 17 Tonda, sun Israel nesala dinin, yuk-yuk yala nesala, ton tara neng yumada, bulupra wengyai neng dengeda, pio weik empat ratus ribu (400.000) jen talena neng wengyai. Ajen talen neng yumada, peteremaipa, mar podan keca yumada, pio moupra ila di kael keami nengpu bulupra yai. Sun yumada, Gibea mutu damai bulupi.

Podaramyanen, Benyamin yala neng popbisipi upu

18 Sun Israel yala jen neng yumada, buluprapidi sun Allah si eremna tep wengamyai, Betel mutu neitamaipu bulupra bei. Bei dingeda, sun nai bo Allah tep asipetepi, “Teka nun nai Allah Yahweh, nun yuma aca bulupra yana akunupa neitamai di, menmena taruda, ware yala nesala cap, ware mutu nesala capdi, Benyamin yala neng tep, menepra mar porbenkup do?” pepra, asipetepi. Upepipa, Allah Yahwehdi tamupra pepu. “Gume, Yehuda yala jen talena nengpu, sun mepra mar porbenkunge,” pepu. 19 Upepupa mapmaiya berekopda, ambutumi ipnada, sun Israel yala nesala yuma gonga kepra bei dingeda, Gibea mutu meneng damaipu bena, ‘Amutu neng warekra mar popkup’ tenen, sun keana tenda opkal bol di domi ati dopra deipmai. 20 Ukupi dingeda, sun Israel yala nesala jen neng mepra ketenepidi, sun podarbana tep wepra tengbei. Ukupi dingeda, Gibea mutu neng urasin damai didapedi, ‘Popdankamep’ tenen, sun Israel yala nengdi, lepsikra kurupu lelepra, tekra keteneipidi, Gibea mutu neng damai porbei.

21 Ukupmai dinin, atumida, sun Benyamin yala nengda, Gibea mutu di gonga kepra bena, porbei taruda, sun Israel yala nesala jen talen nengda, dua puluh dua (22.000) neng, ataru dipapu popra gawal daki. 22 – 23 Sun Benyamin yala nengdi, Isarel yala nesala dinin, yuk yala neng weika di popbisipinge tep nengeda, sun Israel yala nesala yumadi tamupra, sun Allah si eremami ati damai bena, Allah Yahweh tep, engenmaipanen lukunda kupu. Ukupra engenmai taruda, sundi asipetepi. “Uo, nun nai bo Allah Yahweh, nunda ton cap nun kayapu neng sun Benyamin yala neng damaida, kange di ton cap bepedi mar porbenkamap do?” Upepipa, Allah Yahwehdi tamupra pepu. “Teka, mar porbenkurume,” pepu. Ange tep nengeda, ataruda sun Israel neng yuma kange di ton cap kange deipi. Kange deipi dingeda, sun tengna tep, lepsikra menmena taru nepra tekmaidi kwamitopu, nepra teki.

24 Sun yuma mapmaiya, berekopda, ue butene tumi deikida, sun Israel yala nesaladi, sun kayapu neng Benyamin yala neng tep, ‘Mar porbenkup’ tenen, porbei. 25 Porbei pangeda, ange utopu butene taru ton, sun Benyamin yala nengdi Israel neng tep mar porbei. Mar porbei taruda, Benyamin yala jen talena nengdi, Israel jen talen neng popya dengeda, pio weik delapan belas ribu (18.000) neng sun Israel yala nesalada, pio weik poptapi. Ada, tali neng tep men popi. Sun Israel jen neng popyada, tek sisi pio ila kael keami jen talena nengpu popi. Tonda, sun aneng yumada, jen cap, parang ya cap doupra podanmaiyanen, popra gawal daki.

26 Benyamin yala nengdi, Israel yala neng weika di popmai pangeda, sun tupa gam kunmai Israel yala neng yumada, tamupra Betel mutu bei. Bei dingeda, sun nai bo Allah Yahweh, er damai bena bukidi engepi. Amutu neitamai kunmai taruda, sun Israel nesala yuma, jen jena gum di, ‘Allah er sipu erepkamep’ tenen, jen si tepra kupmaipanen, lukunda konum kupu. Tonda, ‘Nimi cap, Allah cap, telep kupra kikiman kutepe’ tenen, ‘Meneng damai antaptepye,’ tenepya tep, yapi keca poprapidi, yana Allah Yahweh tep karepi. Tonda, ‘Nun mali kupe keca, kaukepsetudi, telep kweipsetu’ tenen, yapi keca popnedi, Allah karena tep, akeca dopra, er damai uku dongoryakarami. 27 Ataru neitamaida, Allahdi, “Angeda kunkamrume, angeda pio men kunkamrume,” pepra deiamupa, gel pala deiki di sekra, co bekin, er sida Peti Perjanjian ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Tonda, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu dopra, apeti pumbon dongopi. Tonda, akeca tep, ‘Pedina Upu Kin Bekin’ peptepe. Peti Perjanjian kael kemna tep, Keluaran 25:11 dinkurume.} pumbon deiami ngeda, menop taru Betel mutupu deiamya cadi, tupa acapu kwamu. Akecada akwamnga cadi, Harundi deiamu ngebo Elieser kuramu. Tonda, Elieser, erdi deiamu ngebo Pinehas, erda imam pel dona ngebo kepra akuramu.

28 Atep, sun Israel yala nesala yumadi, Allah Yahweh tep, “Uo naio, nun ware kupkamep do?” pepra, asipetepidi moropi. Tonda, sundi asipetepi upuda ake. “Allah Yahweh, nunda ton cap adipapu nun kayapu neng, sun Benyamin yala nesala tep, mar porbenkamep do, gum do? Agum dingeda, nundi, ‘Mar podarbanapuda dakwapye! Kange di ton cap men podankamepe,’ pepkup do, gum do? Naie, kandi pepsetumpa gekepkupe,” pepra, asipetepidi moropi. Upepra asipetepipa, Allah Yahwehdi tamupra pepu, “Gume, sunda adipapu sun Benyamin yala nesala tep, ambutumi porbenkamarume! Ukupmumpa, ambutumida, nedi sun tep ne puto karepsenepa, sundi Benyamin yala nesala tep, porbisina deiyo keca karepsenepa, tek sisi sundi Benjamin yala nesala tep, porbenkamarume,” pepu.

29 Allah Yahwehdi upepunge konum gekepi dingeda, sun Israel yala nesala sun jen talen neng yumada, yuk nimidi men epmantoai sukum, Gibea mutu dana-dana damaipu inimbei. 30 Upepu pangeda, ue weneri tumi deikida, sun Israel yala nesala jen talena nengdi, Benyamin yala tara neng, sun jen talena neng nepra tekidi, Gibea mutu neitamai tumi butene ortumi kunmamaitopu kupi. 31 Sun Benyamin yala nesala yuma peda, ataru neitamai poryai. Tonda, sun Israel nesala peda, Benyamin yala neng tep, Gibea mutu di napra bei. Ada, ortumi di kunmaitopu, sun Benyamin yala nengdi, Israel yala nesala pona tep, katuai di gonga kepra, Betel mutu cap, Gibea mutu cap, benkuna tep, bisi bana neitamai di popdanmaitopu kupi. Ada, ila ati arum damai gum dinin, katawai mutu neitamai di podanmaiyanen, sun Benyamin yala nengdi, Israel yala nesala gungda, tiga puluh (30) neng popra gawal daki.

32 Ukupmai taruda, sun Benyamin yala nengdi utenepmai. ‘Gume, sun Israel yala jen talena nengda, ortumi deiki kupmapudi poptapmaputopu, atumi peda konum poptapkupe,’ tenepi. Utenepi dinino, Israel yala nesala jen talena nengdi, ‘Gume, sun Benyamin yala neng popkamepe. Sun ila ati arum damai di tapra, nun akunmap tara mangkau di yatengopda, nundi sun tep poptaptepe,’ tenepidi gopropipa, sun Benyamin yala jen talena nengdi, domyai. Domyaidi ila bisi damai embanmai. Ada, ila ati arum daramya damai di, gopda pepra karenai kunmai. 33 Ukunmaiya tep nengeda, Israel yala neng sun jen talena neng, weik tara ngeda, sundi gopropmaidi, ortara mutu Bahal-Tamar mutu damai bena tekmai. Ukupmai taruda, sun Israel jen talen neng gungda, yambul di Gibea mutu damai inipra kunmai nengda, gupra katuai yai. Sunda, Gibea mutu damai dinin, keteng dangban tara kunmai.

34 Ayai neng yumada, Israel mutu neitamai di, nimi podana ila kael neng wepra deiami nengpu poryai. Ada, anuki neng dengeda, pio weik sepuluh ribu (10.000) neng porbenmai. Sun popdai taruda, Gibea mutu neitamai ila kange mun podana sepuluh ribu (10.000) nengdi sun Gibea mutu neng tep popdai. Dinino, sun Benyamin yala nengdi, ‘Nunda nun mar podan nengdi poptapkusenge,’ men tenepi. Tali mangkau kange doupra kunmai. 35 Sun Benyamin yala neng yumada utenepmaidi, tali kange doupra wekmaipanen, Allah Yahwehdi porbisina deiyo kecada, sun Israel yala nesala deiki deipupa, Benyamin yala neng pio weika di poptapi. Ange ukupi taruda, Israel nesaladi Benyamin yala jen talen neng popbisinge dengeda, pio weik dua puluh lima ribu, seratus (25.100) neng popra tapidi, gawal daki.

36 Sun podanmai taru neitamaida, sun Benyamin yala neng yumadi dato-dato di tenepi, ‘Uo, sun Israel yala nesala, sun jen talen neng yumadi, nun konum poptapkusenge,’ tenepi. Tonda, Benjamin yala nengdi, Israel tara neng kunmaiya damai poryaipa, sun Israel jen talen nengda, dinopa di gopda pepra, tamupra ortara sepdara benmai. Ukupmaiya deiyoda, yambul ortara Gibea mutu ila ati arum damai inipmai neng, sun tara nengpu orkunmaiya cadi, ‘Nun kayapu nengdi yana melipsengedi, Benjamin yala jen talena neng tep, poryankamenge,’ tenepi.

37 Benjamin yala nengdi, Gibea ati arum tapra, ‘Israel neng popkup’ tenen, ortara di yambul karenai benmaipa, sun Israel jen neng, akati arum damai inipmai neng yumada, adipapu Gibea mutu neitamai yana weki. Sun Gibea mutu ila ati arum doramya neitamai wekidi, sun parang ya dopmaiyadi, akati arum kunmai nesala yuma ponapu kunmaiyanen, gawal daki. 38 Uda, sun Israel tara jen talen nengda, menmena taru di konum upu talepidi upepi. “Nun weik tara jen nengdi, Gibea mutu neng cap podanapu kunmapyanen, sun jen talen neng yambul gung nengda, inipra kunkamrum dinin, go ton akapyopda, akati arum wekrumudi, sun ati yuma uku dongopkamrume. Ukupmumpa, amutu neitama di ila bukam ket ton welepyopda, nundi tamupra akati arum damai sepdara poryankamepe,” pepi.

39 Dinino, ataru dipapu sun Benyamin tara jen talena nengdi, sun Israel yala jen talena neng tep, popdanmaiyanen, tiga puluh (30) neng popi. Ukupi dingeda, sun Benyamin yala nengdi, ‘E, ortumi deiki di, nundi sun Israel yala nesala poptapmaputopu, atumi peda utopu konum ukupmepe,’ tenepi. 40 Utenepidi, kange deipmai dinino, sun Israel neng inipmaiya di, Gibea mutu ati-ati yuma uku dongopipa, dato-dato Gibea mutu neitamaida, ila ket welepupa, sun Benyamin yala jen talen nengdi epi. Ila ket welepu pangeda, sun Benyamin yala nengdi, sun amnyo tara tamupra dinmaipa, amutu neitamaida ila uku bu di jenmaupa, sun ila ati arum doramyaida, epidi kware pio weik kupupa, kange mun kange doupi.

41 Mambul kange doupipa, ataru neitamai dipapu, sun Israel yala nesala, sun ila kael jen talena neng, gung weik tara yumada, arupda amnyo karikra sepra banmai dinin, adipapu menmena tamupra sun Benyamin yala neng tarada, tamupra yana poryai. Ukupipa, Benyamin yala jen talena neng yuma kware pio weik kupidi, yo moropsepu, ‘Uo anengo, ukuda sun Israel yala nesaladi, nun Benyamin yala nengda, konum popra bisipmasenge,’ tenepidi kware pio weik kupu. 42 Atep, sun Benyamin yala jen talen neng yumada, adipapu sun ila ati arum tara tapra, ‘Lyepdankup’ tenen, sepdaro mutu katawai mutu ban tara bei. Bei dinino, sun anesala yumada, kap birikra men bei. Anesala yumada, Israel yala neng, sun jen talena ila kael neng, gung weik tara nengda, Benyamin yala jen neng weika di ponmaiyanen, tonda ataru dipapu, Gibea mutu ortara ila ati arum damai inipmai dinin, ataru poryakanmai Israel jen neng ton, amutu bisi di yakanmai gung yumadi, warekra ongopdongopi.

Ongopdogopipa, sun Benyamin yala neng yumada, adipapu popbanmaiyanen, nimi weika di popra gawal daki pangeda, sun Benyamin tara nengda, ila kange mun keca cap, ikin keca cappu dopropi. 43 Sun Israel yala nesala yumadi, adipapu ongopdopra pio domembanmaianen, tenpu mutu sida Noha di dipra ortara keteng yakan tara, Gibea mutu neitamai bei pangeda, ongopdongopidi Benyamin yala nengda, weika di popropi. Ukupra anesaladi, pio domembanapu kunmaiyanen, bena popidi gawal daki. 44 Sun Benyamin yala jen talen neng denge pio weik, delapan belas ribu (18.000) nengda, ila kael keami jen talen nengda, sunda kware pio gum neng, kika weik kuramidi, puto weik jen neng dinin, sun yuma popra gawal daki. Ada Israel yala nesala, sun jen talen nengdi, Benyamin yala jen talen neng weika di popra gawal daki.

45 Ukupi pangeda, Benyamin yala neng, sun jen talen neng yuk neng yumada, ‘Sepdara bepedi, lyepdankup’ tenen, tamupra seprapidi, katawai mutu tara di keamyanen, gel dup mutu dinin, Rimon perami mutu tara di kepra bei. Tonda, sun kayapu nengpu dinin, lima ribu (5.000) neng ton bokra, ila bisi neitamai di popi. Tupa gam kunmai neng yumada, pio dombanapu kunmaiyanen, ortara bukamu mutu, Gideon mutu damai bena, Israel nengdi, sun Benyamin yala neng adombanmai nengpu, ton cap dua ribu (2.000) jen talen neng popra gawal daki.

46 Ange tep nengeda, atumi deiki di, sun podanmai taru neitamaida, Benyamin yala neng sun ila kael jen talen nengda, Israel nengdi popi neng dengeda, pio weik, dua puluh lima ribu (25.000) jen talen neng yumada, ila puto neng cap, ila kael kware tenena gum neng kurami dinin, sun yumada popra gawal daknapu kupi. 47 Dinino, sun Benyamin yala nengpu dinin, sun gung neitamai di, ton neng bokrapidi, katawai mutu tara di sepdara benamyanen, gel dup mutuda Rimon mutu tara kepra yai jen neng dengeda, denge yambul weik, enam ratus neng (600) inipra bei. Sunda Rimon mutu bei dingeda, amutu neitamai dipu dakurami. Ada ware denge dumbari deiki di, amutu bena inipra kurami.

48 Ange yuma konuman kupra seng pepyopda, sun Israel yala neng jen talena neng yumadi, tamupra tupa gam kunmai Benyamin yala nesala tep poryai. Ada, Israel nengdi Benyamin yala neng tep, yambulanun gawal tupa tapmai ngeda, nimi cap, nerapu cap, sun nyapu yuma cap, tonda sundi talepra peirami gam keca yala-yala yuma cap, ange yumada popra gawal daki. Ukupi dingeda, amutu neitamai dinin, dana-dana tara kwamu yambul ati arum, dorami mutu yumada, sun Israel yala nesala yumadi, Gibea mutu neitamai kwamunge yumada, uku di dongopipa, jepra gawal daku.