Judg 21 | XteSC | STEP | Men taru neitamaida, Israel yala nesala yuma buluprapidi, Mizpa mutu neitamai yana wekidi, Allah Yahweh er gekenai tep pepi. Ada, “Tenpu ngebo ton, sun Benyamin yala nesala tep, nundi derinup kaber nerapu ton, pio men karenkamepe. Sun Benyamin yala nengdi, “Nun tara kaber nerapuda, men donkamenge,” pepra, pedina upu deiki di, Israel tara neng tep pepdai.

Judges 21

Kaber nerapu yumada, Benyamin yala nesala, sun donkami nerapu keteneipya tep, seki upu

1 Men taru neitamaida, Israel yala nesala yuma buluprapidi, Mizpa mutu neitamai yana wekidi, Allah Yahweh er gekenai tep pepi. Ada, “Tenpu ngebo ton, sun Benyamin yala nesala tep, nundi derinup kaber nerapu ton, pio men karenkamepe. Sun Benyamin yala nengdi, “Nun tara kaber nerapuda, men donkamenge,” pepra, pedina upu deiki di, Israel tara neng tep pepdai. 2 Upepi dinin, sun Israel yala nesala yuma, tamupra Betel mutu bei. Tonda, Allah Yahweh er si eremamya damai beidi, pio gutam tu dipdongopra, sun dipru kange mun kange douprapidi bukmaipanen, lukunda kupu. Sun Israel yala nesala yumadi, bulupra wekidi, engenmaidi upenmai. 3 “Uo Allah Yahweh, kanda tek sisi nun Israel neng, nun nai bo Allah kurume. Kan sipu eremkunupe. Deiyo warya tep ange yumada konum kupre do? Benyamin yala nesalada, nun Israel nesala kan-kan neitamai kununga cadi, nun ila yala Israel deiyoda tenpu. Akunung dinin, sun putapre ngeda, men dopropmanto kununga cadi, kange mun kange doupra kununge. Nun peda utopu tenenupe,” pepi.

4 Atep, sun mapmaiya berekopda, ambutumida ipna taru dipapu sun Israel nengda, Betel mutu adipapu Allah karena tep, yapi keca poprapidi, uku dongonai, er si mesba dopra deipi. Ange konum kupi dingeda, adipapu Allah Yahweh er tep gispal dona cap, er si eremna cap tep yapi keca popra duyaidi, uku dongopi. Tonda, ‘Allah cap, nun cap telep kupra antamdana cap, telep kuna cap kunkamep,’ tenena tep, ton telep keca, yuk yapi keca cap, popra keteneipidi, Allah Yahweh tep karepi. 5 Ange yuma konum kupi dingeda, sun Israel yala nesala adipapu nimi yala-yala yuk-yuk cap, Israel tara mutu kurami nesala yala yuk-yuk neng dakurami neng cap yuma ton bulupra, Allah Yahweh er si eremnai dinin, ‘Mizpa mutu ton bulupra men wekmai ngeda, ware kuprap neng do?’ tenen, tenepidi wepetepi.

Atenepinge deiyoda ake. Ada men taru neitamaida, sundi upepidi, pedina upu ton pepi. Ada, ‘Nunda tek sisi pepmepe. Nimi ton, ‘Allah Yahweh er si eremna tep, Mizpa mutu bulupra yarume,’ pepra kong pepmupupanen, gekepra Mizpa mutu neitamai men yanmange neng do, men yanmare ngebo do, aneng tep adipapu ikin keca deipmepedi, popmepyopda, dadepkamenge,’ pepra, konum pedina upu deiki di pepya tepa.

6 Upepi dinin, Allah er mawa neng Israel yala nesaladi, sun kayapu neng Benyamin yala neng yuma tep bicau kupu. Bicau kupupa, sun Israel yala nesaladi upepi, “Gume atumida, nun Israel yala nesalada, weik akunup dinin, nun yala neng, tenpu mutu neitamai akunung Israel yala nesala ton, sunda konum wangapmaredi, gum kupmanto kupmara cadi, uo, nun ikin kange dounmape,” pepi. 7 Upepidi aupu ton dukdongopra pepi. “Uda, tek sisi, men taruda, Allah Yahweh er gekenai di, nun yuma pedina upu deiki di konum pepmupu. Ada, “Nundi nun kayapu neng sun Benyamin yala neng yambul metekanun akunmang neng dinin, nundi nun derinkamep kaber nerapu dopra, sun anerapu dona tep, ton pio men karepkamepe,” pepmepu. Ukupra pepmupka cadi, ukutaruda sun Benyamin yala nengdi, sun ner dona tep nengeda, “Nun tara nerapu ton pio men donkamnung do? Ware kuptepepa, sun Benyamin yala nengdi, ware nerapu ton doptenge do?” pepra, upu talepi.

8 Atep, sun adipapu bulupra wekidi, pio dipetepra tenipetepidi, ada Israel yala nesala tenpu ton, Mizpa mutu neitamai upu bulupra wengna taruda, men bulupra benmai neng ton tenepidi kael kepi. Ada, “Ware kupya deiki di do?” pepra, wenenmai. Upepra wenenmaidi tenenmai taruda, sun Israel yala nesala neitamai dinin, Gilead tara neitamai kurami nesalada, amutu sida Yabesh mutu kurami nengda, Mizpa mutu men yanmaipa, konum kael kepi. 9 Ada, Mizpa mutu kunmai taru, ‘Ware yala neng ton bulupra yanmangu do?’ tenen, Israel nesala yala-yala yuma, sun si yuk-yuk pepmaipanen, sun Yabesh-Gilead mutu neng kan-kan, pio tenpu ngebo sisa peda ton, men kael kepi. Mizpa mutu bulupra men benmaiya tepa. Sun Yabesh mutu neng, tenpu ngebo peda, si ton men kupmaupa epi.

10 Ange tep nengeda, Israel tara kurami nesaladi, sun amutu-amutu neitamai kurami nesala yumada, upupipa, bulupra wengyanmai jen talena neng, sun dengeda pio weik, dua belas ribu (12.000) neng, sun dokotepidi upepi. “Sunda ortara Yabesh mutu damai berumudi, sun amutu kunung nengpu dinin, Yabesh mutu neng porbenkurume. Ada, wisi neng cap, kaber neng cap, nimi konum domi nerapu cap, sun nyapu yuma cap, aneng yumada sun parang ya di poptaprumudi, gawal dakamrume,” pepra deipidi, dokotepi. 11 Aneng dokotepyopda, sundi Israel yala deiyo nengdi aupu ton pepi, “Yabesh-Gilead mutu neitamai kunung nimi yuma poptapkurume. Tonda, nimi konum domipa, sun kikiman kurami nerapu yuma cap, anerapu yuma popra gawal dakamarume. Sun anesala yumada, ada Allah Yahweh er gispal dona utopunge cadi, ‘Ton tapkup’ tenena gume, anesala yuma poprumudi, tenpunge peda tupa gam men kunkamenge,” pepi. 12 Upepra deipipa, sun Israel tara jen nengdi apeipitopu bena kupi. Dinino, anesala porbenmai taruda, Yabesh mutu neitamai kurami kaber nerapuda, denge pio weik, empat ratus (400) nerapu epi. Ada nimi dona gum dipapu, tali kaber kurami nerapuda, nimi cap kikiman ton kuna gum nerapu weika di kunmaipa epidi, tomopra doupra bei. Sun akaber nerapu yumada doupra, Kanaan tara neitamai dinin, mutu sida, Silo mutu damai dopra Israel nesala kurami ati neitamaipu doupra bei.

13 Ange konum kupyopda, sun Israel yala nesala, amutu neitamai kurami neng, wepra deipidi dokotepipa, Benyamin yala nengda, gel si dam mutu dinin, amutu sida, Rimon perami mutu neitamai kurami Benyamin yala neng, sun damai bena, “Nun kayapu nengo, nun Israel nesala cap, sun amutu neitamaida, Benyamin yala nesala, tupa gam kurum nesala cap, antapmepedi telep kange deipdapedi, mar porbana pio gum, telep kupra kikiman kunkamepe,” pepra, pedina upu deiki di pepdai. 14 Ange tep nengeda, sun Benyamin yala neng, denge pio weik, enam ratus (600) neng yumada, tamupra Israel nesala kuramyaipu tamupra yai. Ukupipa, sun Israel yala nesala, sundi nimi dona gum di tali Yabesh-Gilead mutu kurami kaber nerapuda, dopra sun Benyamin yala neng, ada nimi men popmai neng tupa akunmai neng tep karepipa, sun anerapuda aneng dopi. Uda, akaber nerapu yumada, denge pio weik empat ratuspu (400) kurami dinino, sun Benyamin yala nengda, denge pio weik enam ratuspu (600) kunmaiya cadi, sun kikiman utotopu ton men kupu. Ukupka tep, ton nengda ner ton men dopi.

15 Sun Israel tara nengdi, sun kayapu neng Benyamin yala neng tep, ‘Uo, sunda ner ton men doptenge. Ware kuptengepa, sun yala nengda, gum kupkamre do?’ tenen, bicaue kupu. Deiyoda, Allah Yahwehdi puto weik karepupa, Israel tara nengdi, sun kayapu neng, Benyamin yala neng tep, konum bisbisa kapidi, popra gawal dakmanto konum kupya tep, Israel yala nesala kan-kan neitamaida, ila go utopu ton kwamu. 16 Atep nengeda, sun Israel tara ila nimi deiyo kepra kurami neng yuma Betel mutu neitamai bupra weki nengdi upepi, “Benyamin yala neng sun kurami mutuda, kaber nerapu metekanunpu tupa gam kununge. Nerapuda pio weik gum cadi, ware kupkameng do? Sun yalada, pio gum kupbankameng do? 17 Atep nengeda, nundi ware kupra kuptepepa, sun Benyamin yala nengdi nerapu ton doptenge do? Sundi nerapu ton men doptengedi, nyapu men deipdanen bantengedi, yal dakdanen ban keca gum kuprur tepa. Sun damai pio akupbankamre nyapuda, men deiptengepa, dadeipdanen men yakaramtengopda, nun Israel nesala kan-kan neitamaida, sun Benyamin yala nengda, tek sisi gum kupredi, wangapkamre ja.

18 Sun yala gum kunada, nun songe. Ange mali dinino, nun Israel yala nesalada, nun ner nyapu kaber ner nyapuda, nundi ‘Telepe,’ peptepepa, sun Benyamin yala nengdi nun ner nyapuda, pio men dopsetenge. Deiyoda, nun tara neng, Israel yala neng yumada, nun deiyo ngebo Allah gekepkai di, ‘Sun Benyamin yala nengda, nun ner nyapu pio men dodankamnunge. Ware ngebo do yuma, er ner nyapu dopra, sun Benyamin yala neng tep karpemengopda, Allahdi angebo tep wipdongopkamre,’ pepra, pedina upu deiki di pepmepu! 19 Ange tep nengeda, tenpu bisi ton akupmare ngeda, ake. Aketeng tamun neitamaida, Allah Yahweh er si eremna cap, gispal dona cap tep, ila kailya kalenup ngeda, aketeng tamun Silo mutu akapkamre. Uda, Betel mutu atara dinin, dapu mutu tara mutu dinin, (ara utara peramengenge), ortara keteng yakan tarada, Silo mutu ila ati arum ton domipa akwamu cadi, ila tumi kupne pangeda, ila kailya ketenemdirami. Tonda, Silo mutu damai di dipra, Betel mutu di Sikhem mutu bisi bana tep, barami bisi dinin, keteng yakan tara kurure. Libanon mutuda, itara, iknapi dam tara kure. Dinin, aca di dipra, dapu tarada, (ara selatan), Siloh mutu akapu.

20 Siloh mutu di, sun Kanaan yala nesala, ila kailya kalepkamenga cadi, ataru neitamai, sun Benyamin yala neng yambul tupa akunmarum neng yumada adipapu, Silo mutu damai bemumdi, aneitamaida sun anggur tapu du peamyai neitamaida, inimbenkurume. 21 Konum inipmum dingeda, amutu neitamai moupra kalengkamrume. Ataruda, Kanaan tara nerapu dinin, sun Silo mutu kaber nerapudi, ila tumi cap, ila kailya cap tep, aketeng tamun neitamai kalemna tep, kange deipra yangedi mut semkameng taruda, sun dato-dato di, anggur wa peamengai dainipmamumyai di, gupra menmena yankamrume. Ukupmum dingeda, sun Benyamin yala nengdi, sun Siloh mutu kaber nerapu yuk-yuk sepra yamumdi, adipapu tomopkamrume. Tonda, ukupmumnyopda adipapu doupra, Benyamin mutu neitamaipu dubemumdi, doupmum dingeda, sun pe nerapu kepropkamrume.

22 Ange ukupmumpanen, akaber nerapu, sun nai yapu do, sun malneng nengdi do, nun damai yangedi, “Nun kaber nerapu upula dopropseiyada, ware deiyo tep do? Sun tamupra karepso,” pepra moropsengopda, nundi upenkamepe. “Gume, tek sisi pepmepe, sun ner nyapu, ortara Benyamin yala nengdi dopropropmangada, adipapu ‘Telepe teneptumopda, sun Benyamin yala neng tep telep kweipkamrume. Tonda, akaber nerapuda, sun Benyamin yala nengdi mar podanmai taru men dalupra dopropi. Tonda, sun Siloh mutu kurum nesaladi, sun pe kange dipu, aner nyapu dopra sun Benyamin yala nesala tep men karepruma cadi, sun ton mali men kuprume. Men di, ‘Nun ner nyapuda sun Benyamin yala neng tep pio men karepkamepe,’ peprum upuda men yanipmarume. Ange gum dinino, sun Benyamin yala nengdi, sun ner nyapu upula dopropya cadi, sun Siloh mutu nengdi, mali pio men kupmarume. Atep nengeda, dakwapye,” pepi.

23 Israel tara nengdi, sun Benyamin yala neng tep upepi pangeda, Benyamin yala nengdi, ‘Teka ukupkamepe,’ tenepidi, sun Israel yala nesaladi pepra deiamitopu kupi. Sun Benyamin yala neng yumada, akaber nerapu cap, nimi cap tenpu-tenpu kikiman wisipra yuk-yuk, Silo mutu neitamai mut semnaipu bendopi. Ukupi dingeda, sun adipapu akaber nerapu dopra, tamupra Benyamin mutu, sun pe mutupu bei. Tonda, abei mutu neitamai yumada, mar podan taru uku dongopipa, jepropu ati arum yumada, kange di ton cap ukupu ati dopidi, acapu kurami. Ukupidi, Benyamin yala neng yumada, amutupu talepra kurami. 24 Tonda, sun Israel nesala, yala-yala yuma cap, ayala yuma neitamai dadi, nimi cap, sun nyapsilip cap, sun nerapu cap yuk-yuk dinin, aneng yuma peda, adipapu sun pe mutu yuk-yuk bena kurami. Sun tamupra sun pe mutu tu neitamaida, amutu pala yumada, yuk-yuk bena talepra kurami. Ada sun yala-yala yuk-yuk cap, tonda mutu-mutu yuk-yuk cap, amutu neitamaipu talepra bena kurami.

25 Uda, asekmap upu kwamu taru neitamaida, sun Israel yala nesala talepra kuna tep, ila nimi deiyo neng Raja ton pio men kurami. Amutu neitamai kurami nengdi, sun pe kange dipapu, ‘Angeda pio telepnge ake,’ tenepnetopu kurami.