Judg 3 | XteSC | STEP | Allahdi, ‘Anesala yumada, Kanaan tara neitamaipu kungedi, sundi Israel nesala tep kurpetenkamenge’ tenen, sun menop di Kanaan mutupu kurami nesalada, tupa acapu tapupa, sunda amutupu kurami. Ada, Israel nesala Kanaan mutu kurami nesala cap popdanaminge kael kemna gum nesalada, sun amutu tupa tapu nengdi poryakangepa, ‘Marda, ukupra-ukupra podarami,’ tenepra, nimi podana keca yuma kael kepkameng’ tenen, tupa tapu.

Judges 3

Men di Kanaan mutu tupa akurami nesala tep, pepu upu

1 Allahdi, ‘Anesala yumada, Kanaan tara neitamaipu kungedi, sundi Israel nesala tep kurpetenkamenge’ tenen, sun menop di Kanaan mutupu kurami nesalada, tupa acapu tapupa, sunda amutupu kurami. Ada, Israel nesala Kanaan mutu kurami nesala cap popdanaminge kael kemna gum nesalada, sun amutu tupa tapu nengdi poryakangepa, ‘Marda, ukupra-ukupra podarami,’ tenepra, nimi podana keca yuma kael kepkameng’ tenen, tupa tapu. 2 Tupa atapunge deiyoda, Israel nesaladi deipdanen bankameng nesala yumada, “Kanaan mutu nesaladi nimi porbana tep nengeda, ukunkamrume,” pepra, ‘Peteremkameng’ tenen, tamu. Ada, ‘Nimi porbana tep nengeda, ukununga, tenena ngeda, men keal keami nesala tep, peterepmengepa, kael kepkameng’ tenen, tamu. 3 Tamupra, amutu tupa kurami pamubari yala, sun ila nimi deiyo neng ton akurami. Sun anesala sida ake. Filistin neng mutu neitamai akurami. Ada, Kanaan tara nesala cap, Sidon mutu nesala cap, tonda Hewi mutu nesalada, mutu dam tara, Libanon mutu dam kurami nesalada, sunda Bahal-Hermon dam tara di gonga kepra, dipdongopra benamnganen, Hamat mutu bana tep bisi ban tarada, sunpu kurami.

4 Allahdi anesala tamupa, sun amutu tupa kuraminge deiyoda, sun anesaladi, Israel nesala kurpetena keca sun deiki kunkamya tep, Allah erdi anesala tamupa kurami. Ukupnepa, Israel nesalada, ‘Allahdi sun apu bo Musa damai peiamu upu tep, angepu melipra dombankameng do?’ tenen, kurpeten keca, Kanaan mutu nengdi sun Israel nesala deiki kurami. Ada, ‘Sundi angeda epra kael keptepe’ tenen, kurpeterami. 5 Ange tep nengeda, menop taru Kanaan tara kurami nesala cap, Amori mutu nesala cap, tonda Feris yala nesala cap, Hewi yala nesala cap, Yebus mutu kurami nesalada, Israel nesala cap tupa Kanaan mutu neitamaipu, sun tonpa kurami. 6 Ukuramidi, sun Israel yala nesalada, Kanaan mutu nesala cap, tali dopdanapu kurami. Israel nengdi Kanaan tara nerapu dorami. Ange utopu, sun Israel yala nengdi derirami nerapuda, ‘Sun Kanaan tara neng dopkameng’ tenen, karerami. Israel neng cap, Israel nerapu capda, Kanaan mutu nesalapu dopdarami. Amutu nesaladi, sun si eremami isokpu, sun peda aisokpu si erepra kuramidi, mali weik kurami.

Otniel tep seki upu

7 Israel nesaladi, Allah damai mali kecapu kurami. Ada, Allah Yahwehdi, ‘Angeda pio mali cadi, ne songe,’ teneramungepu kurami. Ton ngeda, Allah er sipu men eremami dinin, Allah erdi peramu upu men gekeramidi, yaniptaprapidi, tali isok er sipu eremamidi, isok Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupkada, ‘Baal pepetepmengepa, ikin kuprepa, ‘Bal sisa tenepnung’ tenen, nundi Bahal sekmupke. Si yuk sekmepu dinino aisokda tenpua.} er si cap, tonda, isok Asyera er si cap tep, sun Israel yala nengdi, aisok-isok si ton erepbarami. 8 Ukuramya tep nengeda, Allah Yahwehdi sun Israel nesala tep, ‘Ila di wenepkune,’ tenepudi, Allahdi sun tep melimamu ngeda, tapupa, Mesopotamia mutu ila nimi deiyo kepra, talepra kuramu ngebo, er sida Kusyan-Risyataimdi yana, Israel nesala weika di, yana popbisipudi, sun kurami mutu yumada, dalupra dopropudi, er angebo dipapu nimi deiyo kepra talepu. Er ange bodi taleamu keteng tamun dengeda, banbari (8) keteng tamun neitamai di, Israel nesala taleamu. 9 Taleamupane, sun Israel yala nesaladi, “Uo, nun nai Allah, kandi nun tep melipra lyepserume,” pepra, engepra moropipa, Allah Yahwehdi, ‘Angebodi Israel nesala melipra lyepkamre’ tenen, tenpu ngebo er si Otniel wepra deipupa, Israel nesala sun deiyo ngebo kepudi, lyepra telep kweipu. Otniel erda Kaleb er weit bo, sun naida Kenas kuramu.

10 Otnielda, Allah er ila puto Sambala karepudi, adeiki di Otniel melipupa, Israel nesala sun deiyo ngebo kepu. Ukupu taruda, yuk mutu nesala porbana tep, erdi gonga kepupa, Mesopotamia mutu kurami nesala porbei. Amar porbei taruda, Allah Yahwehdi er deiki puto karepupa, sun Israel nengdi Mesopotamia nesala, sun deiyo ngebo er si Kusyan-Risyataim popbisipidi, angebo amutu men di taleamu ngeda, Otniel dipapu talepu. 11 Otniel dipapu amutu taleamu taru neitamai yumada, dumsisi teleppu kuramidi, yuk mutu neng tep mar ton men podaramidi, tali kange doupra teleppu kurami. Ateleppu kurami keteng tamun dengeda, empat puluh (40) tahun mami. Ukuami dinin, 40 keteng tamun konum kupu pangeda, Kenasdi deiamu ngebo Otniel depu.

Ehud tep seki upu

12 Otniel konum depu pangeda, dakuramyanen, sun Israel yala nesaladi, Allah Yahweh er damai pio mali kurami. Ada, Allah Yahwehdi, ‘Angeda pio mali cadi, ne songe,’ teneramunge kurami. Ukurami pangeda, Eglonda Moab mutu ila nimi deiyo ngebo Raja, er deiki Allah er puto karepupa, Israel nesala yumada, sun puto yambul kupupa, Moab mutu deiyo kepra kuramu ngebo, er dipapu amutu yuma puto kupra talepu. Deiyoda, Allah Yahwehdi, ‘Angeda pio mali kuramya cadi, ne songe,’ teneramu ngeda, sun Israel nesaladi talepra kuramya tepa. 13 Nimi deiyo ngebo Eglonda, Kanaan tara kurami nesala kan-kan di, Amon yala nesala cap, Amalek yala nesala cap, ‘Kikiman mar porbenkamep’ tenen, tonpa wisipra yaidi, Israel yala nesala yana, popra bisipidi gawal daki. Ukupidi, Yerikho mutu kurma co du weik kuramu. Amutu yumada, sun anengdi yana dalupra dopropi. 14 Ukupidi, Moab ila nimi deiyo ngebo Raja Eglondi, Israel mutu nesala taleamu keteng tamun dengeda, delapan belas (18) tahun deiki di talepra kuramudi upu peramu.

15 Ukuramupane, sun Israel yala nesaladi, “Uo, nun nai Allah, kandi nun tep melipra lyepserume,” pepra, engepra moropipa, Allah Yahwehda, ‘Angebodi Israel nesala melipra lyepkamre’ tenen, tenpu ngebo er si Ehud wepra deipupa, Israel nesala sun deiyo ngebo kepudi, lyepra telep kweipu. Ehud, er nai bo sisada, Gera kuramu. Gerada, Benjamin yala ngebodi, Ehud deiamu. Tonda, Ehudda, er puto kuramu buruda, tebalal tarange dinin, er dumsisi tara buruda gume. Er angebo Ehutdi, Israel nesala sun kurami mutu ila deiyo ngebo Raja Moab, er karena tep nengeda, co bo cap, yuk kunumna telep keca cap, bupra deipnepa, Raja Eglon tep karerbana ngebo kuramu dinin, tonda Ehuda, sun yambul amutara nimi deiyo ngebo kepu. 16 Ehuddi, ukupra kuramu taru neitamaida, tenpu tumi ton, Ehuddi er sida butene takke kwamu parang ya dopra deipu. Aparang ya, er lyomda tenpu meter, tonda neitamai ton (1.5 meter) kwamu. Ange doprapudi, er nong dumsisi tara deiyo teng pumbon kikipdongopra, opkal di singipdongopmaudi kunmau.

17 Ukupmau dipapu, Israel nesala sun kurami mutu ila deiyo ngebo, Raja Eglon karena tep, co bo cap, yuk kunumna telep keca cap, bupra deipmainge doupra, ila nimi deiyo ngebo Raja Eglon damai dubeu. Eglon er nong galemnada, pio weik ngebo kuramu. 18 Aco bo cap, yuk kunumna telep keca cap, konum bena karepu dingeda, Ehuddi, “Aco bo cap, yuk kunumna telep keca cap tep, melipmarumdi, topra duyanmarum nengda, sun pe ka di tamupra dubenkurume,” pepupa, doupra bendopi.

19 – 20 Dinino, Ehud er puda, Gilgal mutu damaida, gel deiki di urasin yuk-yuk keca petupra derirami mutu damai yana, tamupra Raja Eglon damai beu. Ukupmauanen, tamupra Raja Eglon er ati damaipu beu. Ataruda, Eglonda er ila ati dinin, alup ati bupu kupre taru beipye peingna tep, itara dopi ati kunmau. Alau ati pumbon beipye peinmaupa, Ehuddi Eglon damai yanmaudi upepu. “Naie, nedi ila mambul upu Allahdi kan tep peipmaker upuda, duyakene,” pepu. Upepupa, aupu gekepudi, Eglon adipapu tekroudi, er ati pumbon melimna neng yuma tep, “Dipterepmumdi, bendopso,” pepupa, sun yuma akati pumbon di tapra bendopi.

21 – 22 Eglon tupa acapu tekmau taruda, Ehud adipapu nimi pona tep keteneipu parang yada, er dumsisi tara kail tu deikida, agetepra kikipmau temada, er puto buruda, tebalal tara ngebo kuramnga cadi, tebalal tara buru di doprapudi, Eglon er mundu neitamaida, ila puto di lukdongopu. Eglonda nong galemna weik ngebo cadi, er galemna pumbon wekroua tep, katuai ton belepupa, men epu. Ehuddi, ukupu dingeda, alyom parangda, angebo er nong deiki abekmaupapu, gudona gum di tapra beu. 23 Ehuddi, Raja Eglon konum popupa, depu pangeda, akati buplan dekdongopudi, selok di dekdongopudi, akati alau tara atolong deiki di sakra bendopu. 24 Konum buplan dekdongopra beu pangeda, amenda taru Eglon er melipra pel dona tep nengda, akati yai. Yaidi dinmaipa, ila nimi deiyo ngebo Raja er alau atida, buplan dekdongopnapu kupmau. Ukupmaupa, er pel dona neng sundi enmaiyada, ‘Raja, erda alau ati pumbon kupmardi, akati pumbon deibar ati keana tep kunmara dia,’ tenepmai. 25 Utenepra dakunmaianen, konum kupkopda, sun deiyo ngebo kunmau ati buplan men pakmanto kupka tep, sundi, ‘Uo, ware kupkup do?’ tenepidi, tupa dinmaipa, ali dakmaidi, mali kange doupidi, akati buplan pangna keca kunci, doropra akunci di buplan pakra dinmaipa, sun deiyo ngeboda, asonai apu popra tapbenmaupa epi.

26 Ukupmaupa epi dingeda, sun yumadi, ‘Ware kuptepe do?’ tenen, kapul kunmai taru di, Ehut er adipapu sepdara, Seira mutu damai di petupra derirami gel dam tara mutu di kepra beudi lyepdaue. 27 Ehut banmaune, Seira mutu dam beu dingeda, ‘Israel nesala gekepmengedi yakankameng’ tenena tep, Ehuddi bung-bung pena er sida, terompet pena lelim bena, Efraim mutu gon deiki tara pepupa gekepidi, ‘E, nimi porbenkup’ tenen, yai. Israel nesala konum gekepidi yai pangeda, erdi gonga kepupa, sun yumada amutu deiki di kwererbei. Er mepra benmaupa, sunda, ‘Nun deiyo ngebo kupkamser’ tenen, er amnyo tarapu melipra yakanmai.

28 Yakanmaiya tep, Ehuddi sun tep, upepu. “Sundi ne melipkamnerume. Allah Yahwehdi sun tep melipseredi, sun podana neng, Moab mutu nesala yuma poptapkamsere. Melipseryopda, sundi sun Moab nesala tep, tek sisi poptapkamrume,” pepu. Upepupa, Ehut er gonga kemna Israel nesala yumada, amutu deiki di kwerepi. Kwerepidi, Yordan me goupra, ortara barami bisaida, yana sekdaropi. Ukupi taruda, sun podana tep, Moab neng pe, sun yuk neng pe, tenpu ngebo peda ton, me goupra ortara men benmanto kupi. 29 Ataru neitamaida, sun Israel nengdi, Moab neng cap podanmai taruda, Moab mutu jen talena neng, denge pio weik sepuluh ribu (10.000) neng ton popipa, depi. Sun poptapi nengda, tali neng gum dinin, sunda puto weik neng, nong telep neng, kip nengpu poptapi. Telep kuramu ngebo tenpunge peda ton, tapipa men bei. Apodanmayaidi, nimi denge weik neng yuma popra gawal daki.

30 Ukupmaiya tep nengeda, atumida Israel nesaladi, sun Moab yala neng yuma popra gawal daki. Ukupipa amutu neitamai yumada, dim pepra, telep dipapu kurami. Ukuramiyanen, keteng tamunda, delapan puluh (80) tahun neitamaida, mar podana gum dipapu, telep kange doupra tali dakurami.

Samgar tep, pepu upu

31 Uda, amenda taru Ehud depupa, er yo punupudi nimi deiyo ngeboda, Anat er mi Samgardi deiyo kepu. Er angebo peda, ‘Ware kuptenya deiki di, sun Israel nesalada, telep dumsisi kutenge do?’ teneramu ngebo kuramu. Ada, er angebo dipapu sapi bisam pein kun taruda, enemdongona tep, takke lupra douamu maca di Filistin neng dengeda, enam ratus (600) neng popu.