Judges 4

Debora cap, Barak cap tep, seku upu

1Ehudda, pumun taru Israel nesala, sun upu bongdina deiyo ngebo ton dakuramu dinin, er konum depu pangeda, Israel nesala weika di mali-mali kuramipa, Allah er si Yahwehda, er kangeda, ‘Ne songe,’ tenepu. 2Ukuramya tep nengeda, Allahdi anesala doupra, Kanaan mutu talepra ila nimi deiyo kuramu ngebo, er si Yabin tep karepupa, Yabindi Israel nesala bisbisa kapudi, anesala taleramu. Raja Yabin er atida, Hazor mutu kuramu. Yabin er jen talen neng, sun deiyo ngebo er sida, Sisera kuramu. Er atida, mutu si Haroset-Hagoyim mutu neitamai ati dopra kuramu.

3Raja Yabin nimi porbana tep, kuda bisam gipra, tu deiki barameng keca, kereta kuda dengeda, sembilan ratus (900) deiamu. Akeca yumada, besi keca di domi. Ukupya tep, Raja Yabin er puto weik kuramudi, keteng tamun denge butene, dua puluh tahun (20) deiki di, Israel nesala taleamudi, sun nong deiki ila ikin keca weik deriramudi, yu weik kuramu. Ukuramnga tep, sun Israel nesalada, ikin weik kupra, kange mun kange doupra kurami. Raja Yabin kuramu taru yumada, Israel nesala yumadi mali peramidi, Allah er si Yahweh tep, ‘Uo naio, lyepseo,’ pepra mororami.

4Uda, ataru Israel nesala, sun ila nimi deiyo ner, er sida Deboradi Israel nesala talepra kuramudi, sun upu bongdina ner kuramu. Tonda, Allahdi peipupa, er upu gekepra yuk nesala tep lap peramu ner kuramu. Tenpu ngebo, er nimi si Lapidotdi, aner Debora dopudi sun kikiman kuramrei.

5Israel nesala sun yu kupra, mali kange doupra deremdaramidi, upu deiki pangdarami taruda, Deborada sun upu bongdina tep, tumi-tumi yuma tenpu ila co, er sida korma co, aco amutara bukra, sun tep upu bongdiramudi, ‘Ukupkamrume, ukupkamrume,’ peramu. Aco si tep, Debora er korma co perami. Acoda, Efraim tara dinin dana tarada, Rama mutu, dana tarada, Betel mutu, neitamaipu bukra, upu gekeramudi bongdiramu. Israel nesala yumadi, deremdarami taru yumada, aner damai yakaramidi, “Nun upu karepserume,” peramidi, sun upu lap peramipa, Debora gekeramudi Israel nesala tep, sun upu bongdiramu.

6Ukuramnganen, tenpu tumi ton, Deboradi tenpu ngebo Abinoam er mi Barak tep upupu. Barakda er kuramu tarada, Naftali tara neitam dinin, mutu sida, Kedes mutu akuramu. Deboradi, Barak tep upupupa, yau pangeda, upepu, “Israel nesala tep kalekra melimrur Allah, er si Yahwehdi peipmaker ngeda ake. ‘Zebulon yala neng cap, Naftali yala neng cap, nimi denge weik, sepuluh ribu (10.000) neng ton doupra, mutu si Tabor mutu dabenkamrume. Kan cap, kan nyapsilip cap menmena benkamrume.

7Yuk taruda, ne Allahdi Yabin er jen talen neng, sun deiyo ngebo Sisera tep, upu mawa di pepnepa, er nyapu cap, nimi porbana tep, kuda bisam tu deiki gipra embare kereta cap, me si Kison mekin yankamange. Ada kan Barakdi Yabin tep popkamrem tenena tepa. Aneng yumada, doupra kan buru deiki deipnepa, popropkamareme.’ Allahdi upeipkerepa, nedi pepkene,” Deboradi upepra deipu. 8Upepu pangeda, Barakdi Debora tep pepu. “Kan ton ne cap kikiman benemedi, melipnemem pangeda, ne peda kan pepneremtopu benkamne. Ada kandi ne tep melipkamnetumtoda, ne bana telepe. Dinin kan cap bana gum dingeda, ne pe yuk men benkamane,” Barakdi pepu.

9Upepunge tep, Deboradi tamupra pepu. “Telepe kan pepmaneremtopu kupkamneme. Ne ton melipkamken dinin, kan kael kepkurume. Ne cap, kan cap benkamnema tep, Yabin neng popmepyopda, yuk nengdi, kan tep gispal dopra, kan tep ila si karepra, kan si men erepkamkenge. Deiyoda, Allah er si Yahwehdi, Sisera dopra, tenpu ner buru deiki popyopda, nimidi, ‘Tenpu ner si deiki di, Siserada popya,’ pepkamenge,” Deboradi pepu. Upepu pangeda, Debora cap Barak cap, Kedes mutu berei. 10Berei taruda, Barakdi Zebulon yala neng cap, Naftali yala neng cap, dengeda sepuluh ribu (10.000) neng upupupa, yai pangeda, adipapu Barak cap, Debora cap melipipa, Tabor mutu bei.

11Uda ataruda, nimi si Heber, erda Keni yala ngebo dinin, Keni yala neng kuramyai di goprapudi, yuk mutu bena kuramu. Ada Zanaim mutu dinin, Kedes mutu damai bena, er dodin opkal ati adopta-adopta kemamngane, co si tarbantin co damai bena deipu. Keni yala nengda, ada Musa er ner ngebo, er sida Hobab, er cap, er yala neng capdi derirami nesala tepa. Heberdi aneng damaipu gopra, Kedes mutu damai kuramu.

12Uda, yuk nengdi Sisera tep, “Gume Abinoam er mi Barak cap, tonda er jen neng cap, Tabor mutu konum welepra embenmange,” peipipa, Sisera gekepu. 13Gekepudi, adipapu er jen talen neng yuma upupupa, yai dingeda, sun kuda bisam tu deiki gipra embarami keca, besi keca di domi kereta ton, denge weik sembilan ratus (900) wepra deipupa duyai. Sisera er nyapu cap, kuda bisam tu deiki gipra embarami kereta bukra, Haroset-Hagoyim mutu di podana tep, Kison mekin bei.

14Ukupi taruda, Deboradi Barak tep upepu. “Allah er si Yahwehdi kan tep melipkerepa, ukutaru atumi deiki, kandi Sisera popbisipkureme. Nun nai Allah, er si Yahwehdi konum melipkeredi, mepra banmarpa, kan amenda benkurem ngeda, betapra men tenipmarem do,” pepupa, Barakdi gonga keprapudi, Tabor mutu di kwerepupa, er nyapsilip denge weik sepuluh ribu (10.000) neng cap kwerepra bei. Tabor mutu dam dinin, ban kwamu mutu bena, podana tep kwerepi.

15Barak cap, er nyapsilip cap, menepra kwerepipa, adipapu Allah er si Yahweh melipka deiki di, Sisera er nyapsilip cap, er kuda bisam tu deiki gipra embaraminge cap yuma, bena warekya deiki di, sun parang ya di popra bisbisa kapi pangeda, Siserada, kware weik kupu. Kware kupupa, er kuda bisam gipra, bukra embaramu keca deiki bukmaua di, tuai busuka sepdaro beu. 16Ukupu taruda, Barak cap, er nyapsilip capdi, sun kuda bisam gipra adeiki bungamai neng tep dombanmaua, Haroset-Hagoyim mutu neng tara bei. Abisi benmai taruda, sun parang ya di, Sisera er nyapu bena popra, gawal daki. Tenpu peda ton men tapi.

17Ukupi dinin, Siserapuda yuk. Sisera kwar kupupa, yan dopra sepdaro, tenpu ner er si Yael er dodin tenda ati dam beu. Yaelda, ada nimi si Heber er ner kuramu. Heberda, Keni yala ngebo kuramu. Sisera aner dodin tenda ati dam beua deiyoda ake. Ada, Hazor tara taleamu ngebo Yabin cap, Heber er yala neng, Keni yala neng cap, kange deipdanamidi, sun upu tonpa sisingami atep, aner er dodin tenda ati dam beu.

18Sisera beudi, Yael damai yau pangeda, Yaeldi er damai bena upepu, “Nai kan kwardana gume. Telepe yakanmayo, nati wekronmayo,” pepupa er ati beu. Wekra beupa, Yaeldi lyom opkal doprapudi, galupdongopra inipu. 19Siseradi Yael tep pepu. “Me putanmanere, me ton karepnemempa jepkune,” pepra moropu. Me sisa tep moropupane, anerdi kambing bisam moum teyung me gwepra karepupa, jepu pangeda, asingipmau keca adipapu tamupra singipdongopu.

20Ukupu taruda, Siseradi Yael tep, pepu. “Buplan dam kalekunerume. Ne tep ton nimi yuk nengdi, ‘Nimi ton kan ati yana wekmang do?’ pepra asimnenge pangeda, kandi, ‘Gume,’ pepkurume,” pepu. 21Sisera boun kupmaua tep, udungna pio weik kupupa, mapu. Sisera mapmau taruda, Yaeldi, er dodin tenda ati ikra derina tep, gat co takke lupra deiamnga di dopra, er amul yo damai deipra potokdongopupa, dana tamna belepra tu bena beku. Ukupupa adipapu depu.

22Ukupu pangeda, yambulanun amenda taruda, Barakdi, ‘Sisera popkun’ tenen, Yael damai yau. Yael damai yau pangeda, Yaeldi er damai bena pepu. “Telepe, yamempa, kan enmarem ngeboda peterepkukene,” pepupa, sun butene akati bo wekra bereidi eprei. Ada, Barak enmau ngebo Siserada, apopmauaipu depmaupa eprei.

23Ange yuma ukupka tep nengeda, atumi dipapu Allah er si Yahwehdi makupka deiki di, Israel nengdi Kanaan tara talepra, ila nimi deiyo kuramu ngebo, er si Yabin, er nyapu weik popra gawal dakipa, Yabinda ali weik kupu. 24Ataru di gonga kepra, sun Israel nengdi, Kanaan mutu taleamu deiyo ngebo Raja Yabin cap, er jen talen neng cap, er nyapu yuma cap tep, popbisip yakaramyanen, sirya taru er cap, er tara neng yuma cap, poprapidi gawal daki.