Judges 5

Allah gudina tep Debora cap, Abinoam er mi Barak capdi, mut peprei upu

1Atumipu Debora cap, Abinoam er mi Barak cap, Allah tep gudin mut penmarei. Sun penmarei upuda ake.
2Israel nesala, sun mar deiyo nengdi ketenepnedi, menmena gonga kepmengedi, nimi mar porbenkameng taru pe, tonda Israel nesala yumada, ‘Allah peseretopu kupkupe. Tonda, nun podan neng tep porbenkupe’ tenen, kange tenimtona gum dipapu, pel domenge taru peda, mambul kange doupra, Allah er si Yahweh tep, er si eremkamepe.
3Sun ila nimi deiyo neng yuma, yuk yala neng talerumdi, yuk-yuk mutu neitamai kunge deiyo neng yumada, nun pepkup upu gekepkamenge. Sun yuma gekepso. Tonda sun Raja neng yumada, nun pepkup upu gekepkamenge. Sun ton gekepso. Nundi nun nai bo Allah er si Yahweh tep, mut penkupe. Tek sisi mut penkupe. Israel nesala tep pio kalekra melimrur Allah tep, nundi nun nai bo Allah er si Yahweh tep, mut pena deiki di er si eremkamepe.
4Nun nai bo Allaho, kanda Yahwehdi, menop taru nun tep lyepramsemum taruda, nun Israel nesala dopra nimi cap, me cap, gum mutu neitamai duyasemume. Amenda taruda, nun podan neng pona tep, Sier mutu di bemum taru cap, Edom mutu di bemum taru capda, mutu ban-ban yuma loku. Tonda ukupmum taruda, im bokropupa mo weik cepu. Tonda, dua weik kunukupa, mo weika di cemamu.
5Israel nesala sun nai bo Yahwehdi, Sinai mutu dam nimi men kupmanto pel doramu ngeboda, yaupa, mutu-mutu yuma ila di lokamu. Ada Israel nesala tep pio kalekra melimrur Allah, er si Yahweh yau taruda, mutu ban-ban yuma lokamu.
6Anat er mi Samgar cap, tonda aner Yael cap kuramrei taruda, Israel nesala yuma, ‘Yuk mutu benkup,’ tenerami. Dinino, ataruda, ila karayong bisi di tali lupra men embarami. Ange gum dinin, ‘Nun podan neng, yu neng epsengedi popsenung’ tenen, kware weik kupupa, bura kwanen bisipu inipra barami.
7Ataru neitamaida, Israel nesala yuma menop taru tali kange doupra, sun ati arum domi neitamai, telep kupra kuramitopu pio men kurami. Amutu-amutu kurami neng yumada, kware weik kuramupa, sun pe mutu tapra yukai inimbenamidi, amutu nesala yumada dimpeprappu kurami. Tali kange doupra men embarami. Ukuramyane, mali kange doupra kuramipane, tenpu ner er si Debora tekamu taruda, ‘Israel nesala melipra lyepkamne’ tenen, Israel neng gamapra deipseue.
8Uda, Israel nesaladi Allah si tapra, isok si eremamipane, amutu neitamai yumada, mar podana gonga keamipane, siryada nun pe ati dan-dana beilya buplan dam, nun podan neng yakarami. Ataru neitamaida, Israel neng dengeda, empat puluh ribu (40.000) neng kurami dinin, tenpu ngebo peda jen cap, mar cap, teng cap, men talepra kurami. ‘Yu nengdi popbisipsenunge,’ tenena tep dimpeprappu kurami.
9Sun anengda ukurami dinin, Israel sun ila nimi deiyo neng cap, tonda tali neng capdi, ‘Nun poryakasenung nesala porbenkupe’ tenen, bulupi. Buluprapidi, balila kupra porbenmaidi, nun podamdan neng tep bisbisa kapi. Ukupya cadi, sun porbenmaidi bisbisa kapi neng tep nengeda, nun kange ila di deipsepe. Nundi sun tep, ‘Sunda pio telepe,’ pepsepe. Nun nai bo Allah tep, er sipu eremnupe!
10Dan mutu ila deiyo neng do yuma, anengo, sun ila neng yuma, selimut dopra, sun kurun keledai bisam bali deiki deipmumdi, bukra embaramrum deiyo neng cap, tonda tu bisi tali embaramrum deiyo neng cap, mutu-mutu yuma nimi talepra kurum deiyo neng yuma tep, ‘Tenipetepso,’ pepsepe. Apopbisipmepu ngepuda, nimi bukmengai nukamenge upu tenipetepso.
11Ada bisi neitamai, me gwendam yuma mut pepmenge nesala penge upuda, gekepetepkamrume. Aneng peda, mut penunge. Mali nengdi ikin keca weik nun nong deiki deriramseu dinin, nun nai bo Allah er si Yahwehdi, er pio telep, dumsisi kuramudi lyepseu keca tep, tenengedi mut penunge. Tonda, Allah er nyapu, Israel nesala sun jen talepra porbarami neng kurami keca tep, tenengedi mut penunge. Mut pepmenge deiki di, ‘Allahdi tek sisi nun tep melipra lyepseunge ace. Nun podan neng tep popbisipu ngeda ace,’ pepra si eremnunge. Amut pepra si eremenge ngeda, sun ton moupra gekenkamrume. Uda, Allah er si Yahweh, er amutara kurami nesaladi, sun ati dana-dana ongomgenem kepra, beilya ikami buplan dam beidi, upepi.
12“Deborao, keteneproyo, keteneproyo! Ketenepmemdi, Allah er si eremna tep, mut ila di pepkamrume. Tonda Barako, keteneproyo! Kan tekmemdi, nun podan neng popbisipmum nengda, amali neng dopra wenemna ati deipmum neng ada, dopropmemdi nimi urasinai dubemempa, epmengopda, ‘E amali neng konum bisbisa kapmepu’ tenen, kael kepkamenge. Nimi si Abinoam, er mi Barako, nun podan neng, yu neng konum popbisipmum nengda, ateng koupra bulupra wenemna ati pumbon konum dongopmum ngeda, aneng yuma dopra, katuai deipkamserumpa dinkamepe,” pepkepe. Aneng epmepedi, ‘E, anengda Barak cap, Debora capdi konum popbisiprei neng adano’ tenen, kael kepkamepe.
13Amutu tupa dakunmai neng, luproami neng, sun deiyo neng damai ketenepra yai. Allah er si Yahwehdi wepra deiamu nesalada, sun puto neng kikiman ne damai yan bulupi. Ada, ‘Nun podan neng porbenkup’ tenen, bulupra yai.
14Ton nengda, Efraim yala neng, sun mutuda Amalek nesala kurami mutu di, ban mutu kwerepra yai. Yai dingeda, sun mepra yaipane, Benyamin yala nesala ton amenda yakanmaiyanen, kikiman yai. Dukdongopidi amenda taruda, Makir mutu neng, sun jen talena deiyo neng cap, sun jen neng cap, ‘Porbenkup’ tenen, yana bulupmai. Ataru peda, Zebulon yala neng dinin, jen talen neng, sun ila deiyo neng cap, sun jen talen neng cap, ‘Porbenkup’ tenen, bulupra yai.
15Isakar yala neng, sun ila deiyo-deiyo neng cap, sun nyapu tonpa cap, Debora cap, sun podan neng tep kikiman porbei. Tek sisi, ukupi taruda, Isakar yala neng cap, Barak cap yaipa, ‘Mali neng porbenkup’ tenen, sun yuma Tabor mutu deiki di, ban mutu kikiman sepdaro kwerepi. Dinino, Ruben yala nengpuda, ‘Yuk nengdi konum porbenmang dinin, nun puda, dukdongopra porbenkup do, gum do?’ tenen, tenimnapu kunmaiya tep, sun ton men melipi.
16Sun yumada, ware keca deiyo tep, sun dodin tenda ati dam, uku peikra talipu kuprum do? Ada, ‘Domba bisam pein nesaladi, sun domba bisam upupmengepa, gekeptepe’ tenen, nun tapra tali bepe peikra dakuramrum do? Tek sisi Ruben yala neng kurami tara yumada, sun tenimtona kuramya deiki di, men melipra yai.
17Ange utopu, Gilead yala nesalada tali dimpepra, Yordan me goupra ortara, keteng wengbaramre tara talipu kunmaidi, nun cap men porbenmepu. Nun podan neng porbana tep, nun tep men yana melipseiye. Tonda, Dan yala nengda, ware keca deiyo tep, mokon deiki umpena damai apu kunmaidi, nun podan neng porbana tep, men yan melipsei do? Utopu ton, sun Asyer yala nengda, ila laut mokon sirikai, mokon deiki umpena kapal deriramengaipu tupa dakunmaidi, sun ton men yan melipseiye. Nun cap men porbemepu.
18Ayala-ayala nengda, nun podan neng porbana tep men melipsei dinino, Zebulon yala nengda, kwar gum dipapu yaidi, podan taru melipseiya deiki, yu nengdi sun tep mar popmanto kupya cadi, sun mambule. Sun kupi utopu, Naftali yala neng peda, kwar gum dipapu, nun podana neng popdamepu mutu yana melipseiye.
19Ataruda, Kanaan mutu ila deiyo neng yaidi popterepsei. Sun Kanaan mutu ila deiyo nengda, Tahanak mutu yan popterepsei. Ada Megido me puai apu mar podarami dinino, ‘Gad keca perak cap, aneng talenung keca, kunumna weik keca dalupra doropkamap’ tenen, yakaramidi popterepsei dinin, men popbisipseiya tep, tenpu keca pe ton men dalupra dororami.
20Sun popterepsei taruda, kuru im deiki kapunge yuma peda, ila ngebo Sisera er pona tep, lung-lung pepidi, Sisera er pona tep melipseiye.
21Ukupi pangeda, me si Kison me, Kison me gonga kemna me deipra opupa, bental weik kupka cadi, sun kuda bisamdi gipra, tu deiki embaramu kecada, men benmanto kupka tep, aneng popra gawal dakmepu. Ange tep, nun kange dipruda, kwar dangna gum dipapu, puto di, ‘Nun podan neng tep dombenkamepe,’ teneramepudi, aneng yuma dombena porbemepu.
22Ataruda, amali neng, sun kuda bisam bali deiki bukra banmaipane, akuda bisam puto weik banmaiya tep, ila lelim pepu.
23Allah er si Yahweh, er pel don ngebo malaikatdi, Meros mutu kurami nesala yuma tep, ‘Mali ikin keca sun nong deiki deipkamsene,’ pepra wipdongopu. Deiyoda, Allah er si Yahweh, er nyapu Israel nesala mar porbei taruda, Meros mutu nengdi, men yana meliamya tepa. Sun Kanaan tara nengda, puto weik neng popterepsei dinin, Allah melipseua deiki di, nundi aneng porbemepu taruda, Meros nengdi, yana men meliamseiya tep, Allahdi aneng wipdongopu.
24Amutu-amutu neitamaida, dodin tenda ati kunge nerapu weik akunung dinin, sun akurami nerapu yuma gum dinin, Heber er ner Yael, erda Keni yala ner ada, Allahdi meliprepa, anerda pio teleppu kunkamre. Deiyoda, Allahdi Sisera tep, ‘Ukupra popkamne,’ teneramutopu, anerdi Sisera popka tepa.
25Siseradi me sisi moropupane, moum teyung me, susu dopra karepupa jepu. Yaeldi ila nengpu jerameng mau utopu mau dopra, moum teyung dikdongopra karepu.
26Karepupa, mapmau taruda, Yaeldi er dodin tenda ati derina tep, takke co doprapudi, er dumsisi buru di, palu doupu. Co cap, palu cap doupudi, Sisera er amol dam co takke deipudi, palu di co takke deiki popdongopupa, dan tara belepudi, tu cap bena luku. Ukupupa, Sisera giso yo olokroupa depu.
27Yaeldi Sisera popupa, er yan dam dourbeu dingeda acapu kupu. Er sakmauaipu acapu mapupa, popu pangeda, depu. Konuma aca mapmauaipu popupa depu.
28Uda yukaida, Sisera er nin jendela bon bisi dinmaupa, jendela lelipdongopmai keca iriamu tara di, “Uo, ware keca deiyo tep, Sisera er kuda bisam tu deiki gipra embaramre keca kapul men yanmar do?” penmau. Tonda, “Uo, Sisera er kuda bisam tu deiki gipra embaramre keca, lelim yana ton men pepmarada, ware deiyo di do? Ware deiyo tep sika dipu yanmar do?” penmaudi, mali kange doupra engenmau.
29Upenmaudi, Sisera er nin er dipru neitamai di tenepra, aupu tenedanmaue. Tonda, erda ila ner cadi, er kunai pel dorami nerapu, ila kael nerapudi upepmemei. “Gume kwardana gume. Sika di yankameng ja,” penmai.
30Sisera er nin, er dipru neitamai tenepunge cap, tonda er melimna nerapudi, er tep ange ton penmai. “Gume, Sisera cap, er nyapu cap, sika di yanmanga deiyoda ake. Ada, sundi Israel nesala popbisipidi, sun taleami keca upula doprapidi, bongmaiya tep, kapul yanmange. Ukutaruda, ajen talen neng yumadi, ‘Anerapuda dorona gum dinin, nun pel tali donkameng’ tenen, kaber nerapuda, butene doropne neng ton, tenpu doropne neng kemai.
Tonda, Siseradi Israel nesala popbisipudi, er dalupra dopropmau keca bongmardi, ketenepmare. Tonda, akunmai taruda, Siseradi urasin pio telep opkal, kain kamo pio telepnge dopropka cadi, akeca konum ketenepyopda, yankamar ja. Aopkalda dopra duyaredi, neda er nin tep, ne kum dam deriryankamnera tep, sika dipu yankamar ja,” pepra, Sisera er nin cap, sun yuk nerapu capdi pepdai. Upepdai dinin, Siserada, aner Yaeldi popka cadi, er mutu tamupra men yaue.
31Nun nai Allaho, yuk taruda, Allah kan si Yahweh tep yu tenekenung nengda, Sisera cap, er nyapsilip cap, depi utopu kupkamenge. Dinino, kan tep teka teneramengedi, kan tep kange deriramenge nesalapuda, keteng yaredi, mutu yuma berengamra utopu, puto weik kunkamenge. Sun Debora cap, Abinoam er mi Barak cap, mut upu peprei.
Uda, Sisera konum popi pangeda, keteng tamun denge dumbari deikida, Israel nesala podana gum dipapu, kange deipra teleppu kurami.