Judg 6 | XteSC | STEP | Menop taru kuramitopu, kange di ton cap, Israel nesaladi mali keca weik kuramipa, Allah diramudi, dabal kupupa, ‘Angeda ne songe,’ teneramudi, anesala yuma dopra, Midian tara neng, sun amutara deipu. Ukupu pangeda, Midian nengdi Israel nesala popbisipidi, sun nong deiki ikin keca weik derirami. Ada, keteng tamun yoneitam bari deiki di, Israel nesala taleami.

Judges 6

‘Israel nesala makunkamre’ tenen, Allahdi weiamu ngebo, er sida Gideon tep, pepu upu

1 Menop taru kuramitopu, kange di ton cap, Israel nesaladi mali keca weik kuramipa, Allah diramudi, dabal kupupa, ‘Angeda ne songe,’ teneramudi, anesala yuma dopra, Midian tara neng, sun amutara deipu. Ukupu pangeda, Midian nengdi Israel nesala popbisipidi, sun nong deiki ikin keca weik derirami. Ada, keteng tamun yoneitam bari deiki di, Israel nesala taleami. 2 Midian nengdi Israel nesala taleami taruda, yu weika di ikin keca weik, sun nong deiki deriramya tep, Israel nengdi Midian mutu neng tep, kwar weik kuramu. Ange tep nengeda, bura sakapidi, ke taru kuna tep, gel imir pumbon cap, mutu dam tara gel kwamngai cap, bura tara tali lupra men benmantoai cap, benap-yanap kurami.

3 Midian nengdi Israel nesala taleami taru neitamai yuma, Israel neng sun koun keca, wai dam konum koupra ati yan taruda, sun Midian neng cap, Amalek neng cap, tonda keteng yakan tara, yuk yala neng yuma cap, Israel nesala sun wa kouami keca upula dona tep, sun mutu ban-ban yuma wengyakaramidi, katuai dipapu sun wa keca dalupra dororami.

4 Wengamidi, sun Midian nengdi, Israel nesala sun kundam yana, ke kuna tep, dodin opkal ati doprapidi, Israel nesala sun wa kourami keca yuma, upula dona cap, kwemtamna cap kurami. Ukupra embaramidi, Gasa mutu bei. Sun wekra embarami mutu yumada, Israel nesala domba bisam cap, sapi bisam cap, tonda keledai bisam cap yuma, doupra bei. Ton ngeda poptapi. Tenpu peda ton, pio men tapipa, Israel neng sun kourami keca cap, peirami keca cap, gum kupupa, jen putapu.

5 Sun yuk-yuk mutu nesaladi, Israel nesala kundam yakarami taruda, gung meteka di men yai. Sunda pol po denge pio weika di yakaramengtopu, aneng peda, sun nesala cap, sun peirami keca cap, pio weika di men nukmanto yakaramidi, sun keana dodin tenda ati deipra kurami. Atep nengeda, aneng yuma cap, sun peirami keca, sapi bisam cap, unta bisam capda, men nukmanto kurami. Sunda, ‘Israel nesala popmepedi, Israel mutu neitamai kure keca, telep keca yuma upula dopropkamepe’ tenen, nimi pio weika di yai.

6 Ukurami taruda, Midian mutu nesala di men taru di, sun Israel nesala, sun keca upula dororami ngeda, pio weik kuramnga tep, sun Israel nesala pio ikin weik kupupa, mambul kange doupra, ‘Uo, Allah er si Yahwehdi melipra lyepkamser’ tenen, Allah tep mororami. 7 Israel neng adipapu Midian neng tep, Allah er si Yahweh tep mororamidi, ‘Uo nun nai Allah lyepkamserume,’ pepra mororami.

8 Mororami pangeda, Allah er si Yahwehdi, Israel neng sun kan-kan di, ‘Ne upu lap pena ngebo, nabi kunkamre’ tenen, wepra deiamudi dokotepupa, Israel nesala sun damai beudi aupu pepu.

Sun Israel neng tep kalekra makurur Allah, er sida Yahweh, erdi sun tep upepsere. “Sunda Mesir mutu nengdi sun tep, karena gum dipapu, ateng koupra pel dimamseipane, ikin weik kuramrum taru neitamai di lyepramsisi. 9 Ada Mesir mutu nengdi sun tep popbisipidi, puto di taleamseidi, mali pel dimamseipa, lyepra deiamsisi. Tonda, amenda taru Kanaan tara neitamai dinin, yuk-yuk mutu nesaladi, sun tep ikin keca kareramseipa, anesala yuma tep, nedi enepramsipa bei. Bendopi pangeda, sun yuk mutu nesala taleami mutu yuma, nedi dopra, sun Israel nesala tep kareramsisipa, teleppu kuramrume.”

10 “Ataruda, nedi sun tep uperamsisi. ‘Neda Yahweh, sun nai bo Allah kunune. Ange tep nengeda, sun kunkamrum mutu, Amori nesala talepra kunge mutu kan-kan kunkamrum dinin, isok si eremenge ngeda, sun peda aisok si men eremkamrume,’ pepra peramsisi. Ukupra peramsisi dinin, sunda ne upu men gekeramnerume. Ange tep nengeda, nedi karepsipa, sun Midian tara nesaladi, sun Israel neng tep, kange di ton cap bisbisa kapmengedi, sun keca upula dopropmengedi, talenkamenge.” Allahdi upepsere. Allah er nabi ngebo tep lap peipupa, anabidi Israel nesala tep pepu.

11 Tenpu tumi ton, Allah er si Yahweh, er malaikatda, mutu si Ofra mutu beu. Beudi, Abieser tara ngebo tenpu, er sida Yoas kouamu co, aco amu di yana bukmau. Ataruda, Yoas er mi Gideondi, aco damai, ‘Gandum men jepmanto bam keca gum kupkur’ tenen, gandum du taingmaue. Akupmauada, ‘Midian nengdi epnengedi ne gandum upula dopropnenung’ tenen, tali lupra yuk neng epmantoai men taiku. Erda, gandum du dopra, gel pala potokra deiamya pumbon, ada anggur tapu du me purunai pumbon deipudi, gandum du taingmau.

12 Gandum du taingmaupane, Allah er si Yahweh, er malaikat angebo Gideon er damai yaudi, pepu. “Ne kabo, kanda puto weik jen talen ngebo kurume. Allah er si Yahwehdi kan tep, telep kupra melimkerure,” pepu.

13 Upepupa, Gideondi, “Naio, ‘Allahdi ne cap, nun Israel neng cap tep melimserur,’ pepmanerem dinin, erdi nun Israel neng tep meliamsetutoda, mambul-mambul keca, nun Israel nesala damai tupa men kuramsetu. Nun nai yapudi, ‘Gume, Mesir mutu neng amutara kuramepupa, ikin weik kuramepu taru neitamai di, Allah er si Yahwehdi lyepra yanamseu. Ataruda, nimi men kupmanto keca weika di pel doramseu,’ pepra nungamsei. Uperamsei dinin, ukutaruda, nimi men kupmanto kecada dan do? Ware keca deiyo tep, Allahdi akeca deiki men melimserur do? Ukutaruda, Allah er si Yahwehdi nun konum tapseupa, Midian tara nengdi popbisipseidi, yu di talesenunge,” Gideondi pepu.

14 Upepupa, Allah er si Yahwehdi tamupra Gideon tep upepu. “Ukutaru ukunkamrume. Ataru kan puto kupkera deiki bememdi, Israel nesala yuma Midian mutu nengdi taleramsei ada, kandi lyepropkurume. Nedi kan tep weipkenedi, dokotepkenepa, men melipkamken do? Gume, weika di melimkamkene,” Allahdi pepu.

15 Upepupa, Gideondi tamupra pepu. “Naio, upepnerem dinin, ware puto deiki di Israel nesala tep nedi lyeproptene do? Manase yala neng neitamaida, puto neng weik kunung dinin, ne yala nengpuda, Manase tara neng kunup dinin, nun putoda metekapu kuserure. Ada, ne apu bodi deamupa, dadeipdanen yakaramami nengda, nunda puto neng men kunupe. Tonda, ne nai sisa di deamu neng, nun yala neng kan-kanda, neda pio men kupmanto ngebo kunune. Ne puto men kwapmanera tepa. Pio metek puto kapneu ngeboda, ne pua,” Gideondi pepu.

16 Upepupa, Allah er si Yahwehdi Gideon tep pepu. “Gume, nedi kan tep melipkene pangeda, tek sisi kanda Midian mutu neng yumada, popbisipkamrume,” Allahdi pepu. 17 Upepupa, Gideondi tamupra Allah tep pepu. “Uda, kandi ne tep kange deiamnememnyopda, tenpu peten kemne keca ton, ne damai kupra deipnemempa, epkune. Akeca epnyopda, adeiki di, ‘E, tek sisi Allah yanmaudi peipmaneue’ tenen, kan tep teka tenepra kael kepkamkene,” Gideondi pepu.

18 Upepu dingeda, aupu ton Allah tep pepu. “Kan acapu kwapmamempane, kan gispal don keca ton dopra yanedi, yana karepkukene,” Gideondi pepu. Upepupa, Allahdi, “Telepe akwapmanepa, kan tamupra yankamareme,” Gideondi pepu. 19 Upepu pangeda, Gideon beudi kambing bisam poprapudi, Allah er karena tep keteneipu. Tonda, gandum du taikunge, er si tepung, akecada 22 liter doprapudi, roti dapra keteneipu. Arotida, nena deiyo keca ton men dongopua tep, dapupa men nepu. Ange yuma konum kupu dingeda, kambing bisam galemnada, tapu di wirameng keca keranjang pumbon kipu. Tonda kambing bisam gapmau meda, bukmau pumbon kiprapudi, co si tarbantin co dam bukmauai doupra yaudi, ‘Allah gispal dona tep karepkun’ tenen, keteneipu.

20 Ukupupa, Allah er malaikatdi pepu. “Kambing bisam tu cap, nena gum roti cap, agel pala deiki deipkurume. Ukupmem dingeda, kambing gapmaum meda, agel deiki dikipkurume,” pepupa, upepu utopu kupu. 21 Ukupu pangeda, Allah er malaikat er buru di doupmau maca gum-gum di, atu cap, aroti cap bena dukpepupa, adipapu uku bu dingpepudi, akeca yuma jepra gawal daku. Ataruda, Allah er si Yahweh, er malaikat adipapu dimpepupa, Gideondi amenda taru ton cap men epu.

22 Ukupupa, Gideondi akeca epka deiki di, betapra tenepudi kael kepu. Ada, ‘E, ne damai yanmau ngeboda, Allah er si Yahwehdi, er talerur malaikat dokotepmaupa, ne damai yanmaue,’ tenepu. Utenepu dingeda, kwar kupupa, Gideondi Allah Yahweh tep pepu. “Uo, ne nai bo, kanda akeca-keca yuma talepra, Ila Eremna Ngebo kumemdi, kan ila puto deiki di tenerumtopu kurume. Kan pel don ngebo, malaikat konum antapdanmanemdi, er urasin epmanua tep nengeda, ne mambul kupnerepa, ‘Depkun do?’ tenen, kware kupnere,” pepu. 23 Upepupa, Allahdi tamupra Gideon tep pepu. “Kan kwardana gume, men depkamarema tep, telep kangepu doupkurume. Teleppu kunkamrume,” pepu.

24 Upepupa gekepu dingeda, Gideon adipapu gel pala doprapudi, Allah er si Yahweh, er gispal dona tep, gam keca popra karenai tep, gel taplakra yakeipu. Betapra deipu dingeda, akeca tep si sipepu. Agel pala derinai sida, ‘Allahdi kware kuna gum di, kange derina deiyo keca kareserur ngebo,’ pepra sipepu. Ataru peda, akeca deipkaida, tupa mutu si Ofra dinin, Abieser yala neng sun mutu tupa akurure.

25 Atumi lukunda dipapu, Allah er si Yahwehdi Gideon tep pepu.

“Kan nai bo, er sapi bisam gemnge butene ngeda, keteng tamun yoneitam bari keamrenge dopra keteneipkurume. Ukupmemnyopda, kan nai bodi, ‘Isok er si Bahal, ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupkada, ‘Baal pepmengepa ikin kuprepa, ‘Bal sisa tenepnung’ tenen, nundi Bahal sekmupke. Si yuk sekmepu dinino aisokda tenpua.} er si eremna tep, gam keca popra karenkamne’ tenen, gel pala taplakra yakeipunge cap, isok si eremna ati cap, tonda akati dam isok ner si Asyera tenipetepra, aisok ner er si eremna tep, ikamu ayumnya coda, kweneprapmemdi, akati cap, aco cap yuma uruptapkurume,” pepu.

26 “Ukupmemnyopda, akati kwapkaipu, amutu pasikne deike, Allah Yahweh, er si eremna tep, gam keca popra karenaida, pala gel taplakra yakra deipmemdi, betaipmem dingeda, deipkamreme. Ukupmemnyopda, kandi kan nai bo sapi bisam butene ngeda, Allah tep popra karepkureme. Petenkemna tep yuma pepkukene. Ukupkurema tep, isok ner si tenepra, ikami lyom coda, kandi kwenepra tapmarem ngeda dopra, gel pala deiki uku sekrapmemdi, acapu sapi tu dopra dongopmempa, uku jepropkamare. Ada, Allah er gispal dona tep, akupkurume,” Allah er si Yahwehdi, Gideon tep pepu.

27 Upepu pangeda, Gideondi er nyapu dengeda, morokyo nukra (10) wepra deipu pangeda, Allah er si Yahwehdi peipmau utopu kupi. Ange yuma ukupi dinin, Gideonda, er yala nesala cap, er mutu nesala cap, kware kupka tep, apel dopu ngeda, keteng komuni taru men kupu. ‘Ware tenepnenung do?’ tenen, tenepetepudi, Allahdi peiamu ngeda, lukunda neitamaipu pel dopi.

28 Ukupya tep, amutu nesala mapmaiya, ipna bukra dinmaipa, sun isok Bahal er karena ati cap, tonda er si eremna cap tep, pala gel taplakra yakeiaminge, urupra daktapmai ngeda, epi. Tonda, sun isok ner Asyera, er si tenepra ingami lyom ayumnya co kwenepunge cap, ange yuma epi. Tonda, Allah er gispal dona tep, gel pala deiki uku sekra, sapi bisam dongopmaipa, uku jepropupa sikke bukmaupa kwal ton epi.

29 Ukupmaupa epidi, sun pe neng tepapu bamur asimdanmaidi, “Angeda ware ngebodi kupmar do?” pedanmai. Upepdanmaiyane, yuk nengdi, “Gume Yoas er mi Gideondi kupmare,” pepipa konum kael kepi. 30 Kael kepi dingeda, sun amutu nengdi Yoas tep pepi. “Kan mi dopra karepserume. Erdi nun isok si eremna tep, pala gel taplakra yakeipmepuai cap, akati dam isok ner si tenepra ingamepu lyom ayumnya co cap, akeca yuma dakra uruptapmasera tep, kan mipu duyamempa popkupe,” pepi.

31 Upepipane, Yoasdi ayu neng yuma tep pepu. “Sun isok Bahal, er upu men peptua cadi, sundi er makuna tep pepkurum do? Tonda, er si tep mali kupmai ngeda, sundi lepsisikra deiprumdi peprum do? ‘Isok si Bahal tep lyepropkamepe’ peprum do? Ware ngebo do yuma, isok Bahal tara kepkunge nesala yumada, atumi dipapu depkamenge.

Amenda taruda, gam tupa men kunkamenge. Isok si Bahal, er gispal dona tep, gam keca popra, pala gel taplakra yakra deriramengai, nimidi urupra daktapmengopda, isok si Bahalda, Allah puto utopu puto akwapyopda, Bahal er dipapu aneng poptudi lyepdankamtue. Erda tek sisi Allah puto utopu puto men kwapyopda, ange men kuptue,” pepu.

32 Upepka tep nengeda, amutu nesaladi Gideon tep, “Ukutaruda, er sida Yerubaal,” pepi. Ada isok si Bahal er gispal dona tep, amutu nengdi, ‘Nun isok si Bahal tep, gam keca popra karenkamep’ tenen, pala gel taplakra yakra deriramyaida, Gideondi urupra daktapka cadi, sun upu deikida, ‘Jerub-Bahal’ si pepra deipi. Aupu deiyoda, ‘Bahal tep yanipre ngeboda, Bahal er pedipapu angebo wenepra popkamre,’ tenepidi asi peramya tep, asi pepra Gideon tep karepi.

33 Uda, ataruda sun Midian tara cap, Amalek mutu neng cap, tonda yuk-yuk mutu neng, keteng yakan tara kurami neng cap bupra, tenpuaipu wekidi, Yordan me goupra, ortara ila pala mutu, er sida Yisreel me bongongai bena, sun keana opkal dodin tenda ati deipi. 34 Ukupi pangeda, ataruda Allah er si Yahweh, er Sambaladi, Gideon nong deiki yana melipupa, bung-bung pena, er si terompet deiki di pung pepudi, Abiezer neng tep upupupa, gekepidi, er damai yai.

35 Tonda, Gideondi nimi wepra deipupa, er pe yala neng, ada Manase yala neng damai bena, ‘Sun jen cap, mar cap, parang ya cap ketenepmumdi, Yordan me gopra ortara yan melipneso,’ pepra upupupa yai. Tonda, Asyer yala neng cap, Zebulon yala neng cap, Naftali yala neng cap, upupupa, gekepi dingeda, ayala-ayala neng yumadi, Yordan me goupra ortara bupra weki.

36 Ataruda, Gideondi Allah er si Yahweh tep pepu. “Allah kandi ne tep, ‘Melipkenepa, Israel neng lyepropkamrume,’ pepra peamnemume. ‘Ukupkamnerem do, gum do?’ tenen, kange tenimtona kupnera tep, peten kemdina keca deipkukene,” pepu. 37 Upepudi ange ton dukdongopra pepu. “Naio, ukupkune. ‘Kandi peamnemum utopu, kupkurem do gum do?’ tenen, peten kemdina keca deipkuken keca ake. Ada, domba bisam potong touprapnedi, nun gandum du taingnai atu deikida, domba potong toupropmanyadi, aca deipnepane, ambutumi mo puru apotong deiki akapkamar dinin, dana-dana tara atu deiki ton, mo puru tenpu peda ton men sakyopda, adeiki di kael kepkamane. Ada, ne nai Allah, kandi ne tep melipnememdi, Israel neng lyepropkamreme. Ne pepmantopu kupyopda, kandi peamnemumtopu teka tenen, kael kepkamane,” pepu.

38 Upepudi, Gideon mapmaua buku taruda, erdi pepmaua utopu kupu. Ada domba bisam potong deipmauaida, mo puru akapu dinin, tu dana-dana yumada, tenpu peda men kwapupa, tuda kel-kel pepra kupu. Ukupu pangeda, domba bisam potong bena talepra bul weik cadi, adomba potong purupupa, ameda mau tenpu gwepupa deipu.

39 Ukupu dingeda, Gideondi Allah tep pepu. “Nai kandi ne tep yu tenena gume. Tenpu keca ton moropkukene. Ange tep nengeda, ne deremna gum dinin, kandi ton cap kurpeten keca deipkukene. Kandi melipnemempa, ne kael kemna tep nengeda, adomba bisam potong deikida, me mo puru gum dakredi kalapyopda, tu deikipu me mo puru weik akupyopda, adeiki di, ‘Akonuma, Allahdi peipneutopu kupkamare’ tenen, teka tenepra kael kepkamane,” pepu.

40 Alukunda adipapu, Gideon er moropmau utopu, Allahdi kupupa, mo puruda tu deikipu weik akapu dinin, adomba bisam potong deikida, tenpu peda men kwapu. Kel-kel pepra kupu.