Judg 7 | XteSC | STEP | Gideon, er si ton Yerubaaldi, er kurpeten keca moropupa, Allahdi karepu. Ange yuma konum kupkopda, Gideon cap, er jen talen neng cap, mapmaiya ipna di bukra, Harod me giso damai bena, dodina opkal ati dopi. Sun dodina opkal ati deipmaiyai acapu dinin, sun deiki tara, yambul karenaida, sun Midian yala nengdi, sun keana dodin tenda ati ton deipmai. Ada mutu si More mutu dam kunmai.

Judges 7

Gideondi Midian tara neng popbanapu upu

1 Gideon, er si ton Yerubaaldi, er kurpeten keca moropupa, Allahdi karepu. Ange yuma konum kupkopda, Gideon cap, er jen talen neng cap, mapmaiya ipna di bukra, Harod me giso damai bena, dodina opkal ati dopi. Sun dodina opkal ati deipmaiyai acapu dinin, sun deiki tara, yambul karenaida, sun Midian yala nengdi, sun keana dodin tenda ati ton deipmai. Ada mutu si More mutu dam kunmai.

2 Ataruda, Allah er si Yahwehdi Gideon tep pepu. “Kan jen talen nengda, pio weik cadi, nedi sun tep melipsenepa, Midian yala neng men popbisipkamrume. Ukupnepa, Midian nesala popmum pangeda, Israel nesaladi, ‘Gume, Gideon er jen talen neng weik cadi, nun pe puto deiki di popbanapmape, tenepnung’ tenen, pepsene. Ukupmumya deiki, ‘Ne si Yahweh tep men eremnenunge. Sun pe sipu erepnung,’ tenena tep pepkene,” Allahdi pepu.

3 Upepudi aupu ton pepu. “Ange tep nengeda, kan nyapu yuma tep pepkurume. ‘Ware ngebo ton kwar kupre ngeboda, Gilead mutu damai di tamupra ati arum doramengaipu benkurume,’ pepkurume,” Allah er si Yahwehdi Gideon tep pepu. Allah peiputopu Gideondi pepu pangeda, adipapu denge weik, dua puluh dua ribu (22.000) neng ton bendopi. Sun konum bendopi dinin, denge weik sepuluh ribu (10.000) nengda tupa akunmai.

4 Ukupi dinin, ngedi ton cap Allah er si Yahwehdi Gideon tep pepu. “Kan jen talen neng pio weik tupa akunmanga cadi, doupra mekinai duberume. Ukupra bena deipmemyaida, ‘Ton nengda men porbenkameng’ tenen, aneng tapnedi, ‘Aneng kan-kan dinin, yuk neng porbenkameng’ tenen, yuk neng wepra deipkamakene. Nedi kan tep, ‘Angebo kan cap benkamrume,’ pepnyopda, er cap adipapu kikiman benkamrum dinin, nedi, ‘Angeboda kan cap men betue,’ pepnyopda, adipapu angebo tapkamrume,” Allahdi pepu.

5 Upepupa, Gideon konum gekepudi, er nyapu yuma doupra, mekinai dubeu. Dubeu pangeda, Allah er si Yahwehdi Gideon tep pepu. “Ware ngebo do, ame tep, kamdi lyu lyangamre utopu kupre ngeboda, kandi wepra yuk deipkurume. Tonda, ware ngebo gutam tu dipra jepre ngeboda, sun wepra yukai deipkurume,” pepu. 6 Upepupa, me jenmai taru Gideondi dipterepupane, denge weik tiga ratus (300) nengpu, meda kamdi lyu lyangamre utopu, sun buru deiki me gweprapidi, sipyal dam deipra jenmai dinin, yuk neng yumada, gutam tu dipra tali lupra jepi.

7 Ukupi pangeda, Allah er si Yahwehdi Gideon tep pepu. “Uda sun denge tiga ratus (300) neng, sun buru deiki kam lyu lyangamre utopu kupmang nengda, nedi melipsenya deiki di, lyepropsenepa, sun Midian yala nesala popbisipkamrume. Sun gutam dipra, tali lupra me jenmai neng yumada, sun tep tapkurume. Kandi pepmempa, sun pe mutu yuk-yuk tamupra bendopkununge,” Allahdi pepu.

8 Ange tep nengeda, Gideondi sun tiga ratus nengpuda, “Akunkurume,” pepu dinin, sun yuk neng yuma tep nengeda, “Sun pe keana dodin tenda ati tamupra benkurume,” pepu. Sun benkoi nengda, sun bung-bung pena terompet cap, jen kwal cap yumada, sun tiga ratus nengdi dopropi. Ada sundi Midian mutu tara kunge nesala yuma popbenkoiya tepa. Uda, Gideon cap, er tiga ratus jen talen neng capda, sun mutu deiki kunmai dinin, sun Midian tara nengda, dutara ban neitamaipu kunmai.

9 Alukunda neitamaipuda, sun yuma mapmaipa, Allah er si Yahwehdi Gideon tep pepu. “Gideon bukmemdi, Midian mutu neng porbenkureme. Ne puto kan deiki deipnepa, ne puto deiki di, Midian mutu neng yuma popbisipkureme.

10 Dinin, kan kwar dingeda, kan melimne nyapu, er sida Pura pepmempa, er cap sun podan neng damai benkurerume. 11 Bemumnyopda, sun penmange upu gekepmum dingeda, ‘Ne duka di porbenkune,’ tenepkamareme,” Allahdi Gideon tep pepu. Atep, Gideon cap er melimne ngebo Pura cap, sun podandam neng, Midian yala nesala, sun keana dodin tenda ati dam sirikai inipra berei.

12 Uda, sun Midian yala neng cap, Amalek yala neng cap, tonda yuk yala neng, keteng yakaramre tara kurami neng cap, mekinai, ila ban neitamai konum ati dopra kurami. Sun nimida, sul po pio weika di amuramengtopu, men nukmanto kurami. Tonda sun unta bisamda, ^{▼▼unta bisam – Akeca gambar dina tep, Kejadian 12:15 dinkurume.} me wenenga yamuramra utopu, pio weik kupiya cadi, men nukmanto kupi. Atep sun nimi cap, unta bisam capda, men nukmanto kupi.

13 Alukunda neitamai, Gideon cap, Pura cap, sun podan neng ati dam berei taruda, tenpu Midian mutu ngebodi, er kabo tep, kene mapmaunge tep nungmaupa, Gideon gekenmau. Angebodi er kabo tep upepu. “Ake, ne ken mapmanpa, ila roti kwaneng bumnge topra sakredi, gamup yakanmaua, nun wengamepu dodin tenda ati dam, ila puto di gamupra douryaupa, akati yuma urupra sakropmaue,” pepu.

14 Upepupa, er kabo gekepudi upepu. “Uo, lumkai bote, angeda tali tep kene men mapmaume. Aken deiyoda, Yoas er mi Gideon, Israel ngebo kupkamserenge tep, mapmaumdi kene epmaume. Angeda, Allahdi puto kareprepa, Gideondi Midian yala neng cap, nun yuk yala neng yuma cap, poryankamasera tepa. Er yaryopda, er parang ya di, nun yuma popbisipkamsera tep, ken mapmareme.” Midian ngebodi er kabo tep pepu.

15 Gideondi aupu gekepu dingeda, er pe kange neitamai di, Allah er si tep erepu. Ukupudi, ka tamupra Israel neng, sun pe dodina ati dampu yaudi pepu. “Israel neng, bukroso. Tonda, ketenepkurume. Nun nai bo Allah, er si Yahwehdi melipkuserya deiki di, Midian yala neng cap, nun podan neng yuma cap, konum popbisipkamepe,” pepu. 16 Upepu dingeda, er jen talen neng, tiga ratus neng yuma neitamai bokrapudi, gung weneri kepra deipudi, anengda tenpu-tenpu, bung-bung pena terompet cap, tonda ila ember utopu keca, kendi mau cap karepu. Amau pumbonda, yuma upna ton kipdongopra karepu.

17 Karepu dingeda, Gideondi er jen talen neng tep pepu. “Ne nyapu, ne kupkamantopu, sun peda kupkamarume. Ada, sun Midian yala nesala dodin opkal ati dam bepedi, ne kupkaman keca epmumdi, ne kupnetopu, sun peda utopu kupkamarume. 18 Tonda, ne cap, ne kikiman benkunge neng cap, nun bung-bung pena terompet pu pepmepyopda, sun peda nun pepmepe utopu pepmumdi, ila upu dingpepmumdi, ‘Allah cap, Gideon cap tep, aneng popkupe’ pepra, ila upu di pepkamarume,” pepu.

19 Alukunda dinin, ‘Sun Midian nesala, kalengna neng udungna kupnung’ tenen, yo punupdongopmai taru, pio lukunda manduk-manduk neitamai taruda, Gideon cap, er kikiman benmai neng, seratus neng cap, sun podan neng kurami opkal dodin ati dam belepi. Akati dam wekidi, sun doupmai bung-bung pena terompet pung pepidi, kendi mau doupmaiya olokipa, akeca pumbon dongopmaiya upnada, uku katuai kupupa dirin kupu.

20 Sun Gideon cap kupmaitopu, Israel nesala sun gung butene ton ngeda, utopu kupidi, dan-dana tara di yakanmaidi, sun doupmai bung-bung pena, terompet pung pepidi, sun doupmai mau oloki. Sun tebalal buru di upna erepra doupmaidi, bung-bung penada, dumsisi tara buru di doupra erepidi, upepi. “Allah er si Yahweh ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} cap, Gideon cap tep, ya doupra aneng popkupe,” pepra ila upu dingpenmai. 21 Aneng yumada, akati dana-dana tara yuma ongomgenem pepra, nukra yuk-yuk tekmaiyaipu dimpepra tekmaipa, Midian yala neng epidi, sun kware kupupa, kwepdana ngolokra banmai.

22 Ataruda Gideon cap, er nyapu capdi, nimi kupmaitopu, bung-bung pena terompet ila lelim penmai pangeda, Allahdi karepupa, sun Midian yala neng cap, ayuk yala neng cap popdai. Ada Allahdi aneng tep, ‘Sun popdankunge’ tenen, kware cap, kange wang-wang pena cap karepupa, sun pe dourami ya doprapidi, sun pepu adipapu popdai. Ton neng dingeda, sepdaro beidi, karenai Bet-Sita mutu bei. Amutuda, Zerera mutu barami bisi dinin, daneitamaida Habel-Mehola tara sirikai bei. Tonda amutuda, Tabat mutu neitamai kupu. Acapu bendopi.

23 Ukupipa, Gideondi peipupa, kai upu pena neng perbeipa, yuk Israel nesala dinin, Naftali yala neng cap, Asyer yala neng cap, tonda Manase yala neng dinin, sun keteng yakan tara neng cap, tonda sun keteng darbanai neng cap, gekepidi bulupra yai dingeda, sun Midian mutu neng tep dombei.

24 Ange utopu, Gideondi Efraim mutu dam neng yuma tep, upu dokotepu. Upepu, “Sun kwerepmumdi Midian yala neng tep poryarume. Tonda, sun taleami mutu yan arapra dopropkurume. Tonda, Yordan me damai embankamengai bemumdi, Midian neng tep popbisipkamrume. Ada aca di dipra, Yordan mekin deiki tara yuma dinin, mutu si Bet-Bara mutu dam bememdi, sun bisi sekdongopkamrume.” Upepu pangeda, Efraim neng yuma gekepidi, er pepmau utopu kupi.

25 Ukupi dingeda, sundi Midian yala neng nimi deiyo neng butene, sun si Oreb cap, Zeeb cap tomoprapidi popi. Oreb popi ada, mutu si Oreb gel deiki popi. Tonda Zeeb popi ada, anggur du purupra me gweramyai, Zeeb er anggur du yanipra gweramiai tep perami mutupu dubena popi. Tonda ataruda, Efraim nengdi Midian neng domnapu kuramidi, Oreb popidi, er giso cap, Zeeb popra er giso cap dopra, Gideon kuramngai, Yordan me damai doupra bei.