Judges 8

Midian deiyo neng Sebah cap, Salmuna cap tep popbisipi upu

1Efraim mutu nengdi Gideon tep upepi. “Orketeng tamun neitamai, kanda Midian tara neng porbenkomum taruda, warya tep nun ton men peamsemum do? Ukuamsemumada, ware keca deiyo tep, mali kupsemum do? Nundi kan tep mali kange doupmepe,” pepra, Gideon damai peryaidi, er tep mali-mali weike peami.

2Upeami dinin, Gideondi tamupra pepu. “Sunda ila mambul neng. Ne puda yambul pua. Ne pel doramsi ngeda, yambul mambul pua. Dinin, sundi kupbanmarum ngeda, meteka gume, sunyeda ila mambule. Tonda, sun kaele. Abiezer yala nengdi, sun anggur du li taru neitamai yuma, dangamenge anggur du yumada, yambul weik dinin, sun Efraim mutu anggur du dangamrumanen, li taru sirya gawal dakamrum ngeda, pio weike. ‘Metek pel dopmepe,’ teneprum dinin, sun pel doprum ngeda, ila mambul weik kurura tep, nedi pel dopsi ngeda, yambula pua, pepsene,” Gideondi pepu.

3Upepudi aupu ton pepu. “Tonda Allah puto sun deiki deipupa, Midian yala nesala, sun ila nimi deiyo neng butene Oreb cap, Zeeb cap, poprum ngeda, ange ton kael kepkurume. Ada ila mambule dinin, nedi kuramsi kecada, yambul mambul pua, sun utopu gume,” pepra, Gideondi sun aneng namna tep upepupa, anengdi ton men pepidi, sun mali kange douami ngeda, gum kupbaramupa, er Gideon tep kange deipi.

4Ataruda, Gideon cap, er nyapu denge tiga ratus neng cap, Midian tara neng sepdaro bei neng porbana tep, tupa dombanmai. Sun podan neng tep, tupa dombanmai dinin, sun puto boun kupmaupapu banmai. Beidi Yordan me damai goupra, ortara bei. 5Benmaiyane, mutu si Sukot mutu dam bei dingeda, Gideondi amutu kurami neng tep pepu. “Ne nyapu jen depmangdi puto boun kupmara tep, sundi jen ton karepseso,” pepra moropu. “Ukupnemumpa, ne jen talen neng jepmengepa, nunda Midian mutu deiyo neng butene Sebah cap, Salmuna cap, dombenkupa tepa,” pepu.

6Upepu dinin, Sukot mutu deiyo nengdi pepi. “Warya tep Sebah cap, Salmuna cap, kapul men tomopmarum dinin, nun jena moropmaserum do? Aneng butene tek sisi tomopkurem do, gum do, nun walwal atep, ware keca deiyo tep kan nyapsilip jene karepkusep do? Gume, men karepkusepe,” pepi. 7Upepi pangeda, Gideondi tamupra pepu. “Allah er si Yahwehdi, ‘Sebah cap Salmuna cap poptue,’ tenepneredi, go karepnerepa, konum poptapne taruda, tamupra sun damai yanedi, sun yuma ila takke keca cap, tapel-tapel tapu cap di, sun nong bol bongopra seknedi wenepkamsene,” pepu.

8Gideon er nyapsilip Sukot mutu mapmaiya, beidi banmaiyane, Penuel mutu bei dingeda, amutu neng tep utopu, Gideondi jen keca moropu. “Ne jen talen neng, jen depmanga cadi, jen ton karepseso,” pepupane, sun Penuel mutu nengdi, Sukot mutu neng pepmai utopu, “Gume, men karepkusepe,” pepi. 9Upepya tep nengeda, Gideondi sun amutu neng tep pepu. “Sebah cap Salmuna cap konum poptapne taruda, sun wenemna tep, tamupra sun damai yanedi, amutu ila lyom ati doprum ngeda, yana uruptapkamne,” pepu.

10Menop taruda, sun keteng yakan tara kurami neng, sun jen nengda, denge pio weik seratus tiga puluh ribu neng (135.000) kurami dinin, Gideon cap, er nyapu capdi, denge weike dua puluh ribu neng (20.000) poptapipane, yambulanunpu lima belas ribu neng (15.000) tupa gam kurami. Atep nengeda, ataruda Sebah cap, Salmuna cap, tonda sun nyapu jen nengda, lima belas ribu (15.000) nengpu, mutu si Karkor mutu kunmai.

11Sun dakunmaipane, Gideondi, ‘Aneng porbenkun’ tenen, nimi tali lupra barami bisi, katuai bisi men beu. Erda, nimi ati men dorami nesala embarami bisi beu. Ada, aban, orban kemamidi, embarami nesala, sun katuai gum bisi deiki, mutu si Nobah mutu cap, Yokbea mutu cap damai dinin, keteng yakan tara beu. Midian neng mangkau kange doupra awekmaipa, Gideon dato-dato di bena pepra akunmai jen neng bena popra gawal dau.

12Ukupupa, sun ila nimi deiyo neng butene, Sebah cap, Salmuna cap, kwarapra bura saka bereipane, Gideon amenda dombeudi, abutene neng bena tomopudi, ateng koupra duyai dinin, sun jen talepi neng weika di popi dinin, men gawal daki. Ton jen nengda, bura saka sepdaro bendopipa, men poptapi dinin, dana-dana tara yuma sepdara bendopi.

13Ukupudi, Yoas er mi Gideon cap, er nyapsilip cap, aneng popra benamya tamupra yakanmaidi, mutu si Heres Pasikne mutu weleprapidi tamupra yai. 14Yai dingeda, Gideon tamupra Sukot mutu damai yaudi, kaber ngebo tenpu ton yan tomopudi asipetepu. “Sukot mutu deiyo talepra kunge neng, sun wisi nengda, sun si sekra karepneo,” pepupa, angebodi tujuh puluh tujuh neng (77) sun si yuma sekra Gideon tep karepu.

15Konum kael kepu dingeda, Gideon tamupra Sukot mutu deiyo neng damai beudi pepu. “Sun tep nedi jen mororamsisipa, men kareramnerum ngeda, tenipso. Sundi ne tep, upepnerume. ‘Warya tep Sebah cap, Salmuna cap, kapul men tomopmarum dipapu, jen moropserum do? Aneng butene tek sisi kapul men tomopmamum taruda, ware keca deiyo tep kan nyapsilip jen depmaipa, jen karepkusep do? Gume sun jen men karepkusepe,’ pepnerume. Sundi aneng tep nyek-nyek peanerum dinin, ukutaruda, nedi ateng koupra duyanman nengda, Sebah cap, Salmuna cap, anengda adano, sun ton epso,” pepu.

16Upepu dingeda, Sukot mutu sun deiyo neng wenemna tep, nimi gum mutu neitamai di takke keca cap, tapu si cap dakra doupropudi, aneng sun nong bol deiki bongopra popupa, sun nong bol yuma terakra dopropupa, yapi embeu. 17Utopu Penuel mutu neng pepe. Ka tamupra sun mutu beudi, sun lyom ati dominge uruptaprapudi, amutu nimi yuma popra gawal dau.

18Ange konum kupu dingeda, Gideondi Sebah cap, Salmuna cap tep asipetepu, “Tabor damai poamrerum nengda, wareto kamo neng kupi do? Angeda kael keprerum do?” pepra asipetepupa, Sebah cap, Salmuna capdi peprei. “Sun aneng kamoda, kan kuramremtopu kupi. Ada kan kamo utopua, anengda ila nimi deiyo neng kuramengtopu kupi,” peprei. 19Upeprei pangeda, Gideondi pepu. “Uo, ada nanin er nyapu cadi, ne du yapu sisa. Nun nai bo Allah tek sisi gam kuretopu, tek sisi upu pepkusene. Sundi ne du yapu men poamretum pangeda, tek sisi nedi sun ton men popsetene,” pepu.

20Upepudi, Gideon er menmena deipu mi, er sida Yeter tep pepu. “Kandi aneng popkurume,” pepupane, Yeterdi er ya men doupudi, tali dimpepra teku. Deiyoda, Yeterda er wisi derina gum, kaber ngebo tupa kuramnga cadi, nimi ponada er kware kupu. 21Ukupupa, Sebah cap, Salmuna capdi, Gideon tep peprei. “Kanda nimi dingeda popserume. Ware ngebo do yuma, sun nimi kamo kuramengtopu, sun puto peda utopu kurure. Kan pe buru di popseo,” pepreipa, Gideondi aneng poptapu. Popu dingeda, sun unta bisam kum dam kwerya tep gerekamrei keca yumada, kwinipdaropu.

Gideondi mali kupunge tep, pepu upu

22Ange yuma konum kupu pangeda, Israel nesala yumadi Gideon tep pepi. “Midian yala nengdi taleamseipane, kandi lyepmaserem atep, kan cap, kan mi cap, kan midi deipkamre mi ton, sundi, nun ila nimi deiyo neng kepra, nun talepkamserume,” pepi. 23Upepipa, Gideondi tamupra pepu. “Gume, ne cap, ne mi cap, nun butene sun ila nimi deiyo neng men kepteneme. Sun deiyo ngeboda, Allah er si Yahweh, er pua. Yahweh dipapu talenkamsere,” pepu.

24Upepudi aupu ton dukdongopra pepu. “Ne moropsen ngepuda, sun poprum neng amol pumbon, emas di ketenepra amol deiki kemami ngeda, Midian neng deiki kwiriproprum ngeda, sun yuk-yuk dinin, sun yumadi tenpunge dopra, ne tep karepkunerume,” pepra moropu. (Uda, ataruda, sun Ismael yala neng yuma kuramitopu, sun Midian neng peda kurami. Ada, sun amul bon potokra, emas amol deiki kepra embarami. Ange tep, Israel nesaladi, ayala neng popbisipi taruda, emas weik dopropi).

25Gideondi, emas keca amul kenekaminge moropupa, sun Israel nengdi tamupra pepi, “Angeda telepe cadi, nun kange telepa di dopra karepkukepe,” pepi. Upepi dingeda, galupra marameng keca, tu deiki yakra deipipa, sun Midian neng popi taru doproami emas keca neitamai di bokra, tenpu-tenpu di aopkal deiki deriryakanmai.

26Deriryakanmaipane, emas kunumna weik keca, Midian nesala amol dongomami keca cincin yuma ikinda, ‘Ware kuprap do?’ tenen, piripterepidi, timbang kepipa, denge sembilan belas setengah kilo (19.5) kupu. Amol dam kenekami keca kilo kepidi nuki dinin, sun ila nimi deiyo neng, Midian nengdi taleamipa, dopropi keca yuk yala keca yumada men nuki. Ada, kunumna weik opkal, mirin opkal cap, sun unta bisam kum dam gerekami emas rantai cap, uda yuk-yuk yala urasin telep keca, kunumna weik keca dinin, ange peda akapupane, ange yumada men nuki.

27Gideondi peipupa, adopropu kunumna weik keca emas di, urasin pio telep opkal ton wipra ketenepra deipipa dopropu. Ada, Allah cap, nimi cap antamdina deiyo neng, sun ila deiyo ngebo, er taram deiki kenekamu opkal urasin utopu keca, emas dopropudi ketenepra wipi. Aopkal sida, efod perami. Gideondi, er pe mutu Ofra mutu damai akeca efod deiamupane, amenda taru sun Israel neng yumadi akeca damai bendi, si eremami. Ukurami ngeda, pio mali-mali weik kurami.

Ada Allah teppu men teka teneramidi, Gideon emas di ketenepra wipi keca, efod deipua, anesala epidi, akeca si ton eremami. Tonda, akeca talepra kalengami neng tep, ‘Nun ware kupkamep do?’ tenen, asimyakaramipa, anengdi akeca efod dipetepidi, adeiki di lap pen upu karerami. Ukuraminge yumada, pio mali. Ukuramnga deiki di, Gideon cap, er nerapu cap, er nyapu yuma capda, pena youramre utopu kupu. Akeca tep pio mali kurami.

Gideon depka tep, pepu upu

28Arup pepmaptopu, sun Israel nesaladi, Midian tara neng tep popbisipi. Ataruda, Midian mutu neng, sun puto kange di ton cap men kupu. Sun ton men teki. Ange tep nengeda, Israel mutu nengdi, sun yuk yala neng konum popbisipipa, Gideon gam kuramu taru yumada, keteng tamun denge dumbari (40) deiki di, amutu neitamaida teleppu kurami. Podana ton men kurami, tali kange doupra teleppu kurami.

29Midian yala neng tep podaramyane, konum kupi dingedi, Yoas er mi Yerubaal, ada er si ton Gideon, er pe mutupu tamupra bena kuramu. 30Gideon er nerapu weik doamu cadi, er pe nyapu deiamnga yumada, denge yoneitam bari, 70 nyapu deiamupa kurami. 31Tonda er melimna ner tenpu ton doamu ner, Sikem mutu kuramudi, tenpu mi ton deipu. Gideondi ami er sida Abimelek peramu. 32Yoas er mi Gideon konum wisi deiya deipu. Depupa, er nai bo Yoas peiamyaipu, mutu si Ofra mutu neitamai peipi. Ofra mutuda, ada Gideon, er yala nengpu, Abieser yala neng sun mutu kupu.

33Gideon konum depu pangeda, adipapu Israel nesaladi, men di kuramitopu, kange di ton cap, Allah tep ton, teka men tenepidi, er tapra, isok si Bahal yala isok dinin, isok si Bahal-Berit, kange di ton cap aisok sipu eremami. 34Ukupi dingeda, sun nai bo Allah, er si Yahweh tep, tupa men teneramidi, er si men eremami. Menop taruda, yuk mutu nengdi, ‘Israel neng popra gawal dakamep’ tenen, sun dana-dana tara weik kuramipane, Allahdi Israel nesala tep lyepramu.

Ukuramu dinin, ukutaruda, sun nai bo Allah, er si Yahweh, erdi Israel lyepra deiamu ngebo, Yahweh er si ton tupa men teneramidi, ataruda kange di ton cap mali kurami. 35Tonda, Yerubaal, ada er si ton Gideon, erdi Israel nesala sun makuna tep, telep pel doramunge yuma tep nengeda, telepe pena gum dipapu, Israel nengdi er nyapu yuma tep, telep kupra men melimami. Tali kaukemamidi, tamami.