Judges 9

Abimelekdi, ‘Ila nimi deiyo ngebo kunkamne,’ teneramudi, Sikem mutu talepu upu

1Ataruda, nimi si Yerubaal, tonda er si Gideonda, er mi Abimelek, er nin er weitap duap cap, er nin er yala nesala yuma cap, kuramyai beu. Amutu sida, Sikem mutu beu dingeda, er nin yala nesala tep aupu pepu. 2“Sundi, Sikem mutu kunge nesala yuma tep, upepkurume. ‘Sun yuma tenipetepkamrume. Ila telep ngeda, Yerubaal er nyapu yuma, denge weik tujuh puluh (70) nengdi, ila nimi deiyo neng kepmengedi, Sikem mutu kurum nesala tep talenkamseng do? Agum dingeda, tenpu ngebo dipu talepserepa, sun ila nimi deiyo ngebo tenpupu kunkamser do?’ Tonda, sun luprona gume. Neda, sun yala nerdi deipneua tep, ne yapi cap, ne tu capda, sunge pua,” pepu.

3Upepupa, Abimelek er nin, aner er weitap duap gekepidi, lap perbeipa, sun Sikem mutu kurami nesala gekepi dingeda, anesala yumadi utenepi. ‘Teka, nun yala nerdi Abimelek deipka cadi, erda nun mi kurura tep, telep ngeda, er dipu talepserepa, erpu melipra dombankamepe. Erdi nun ila nimi deiyo ngebo kunkamsere,’ tenepi.

4Utenepyopda, amutu nesaladi sun isok Bahal-Berit, er si eremna ati pumbon di, kunumna weik keca, er sida uang perak, denge weik tujuh puluh dopra, Abimelek neng tep karepi. Uang perak denge tujuh puluh dopra karepi pangeda, Abimelekdi, ‘Ne melimkamneng’ tenen, jen talen neng tep karepudi kunupropu. Ada, ‘Anengda ne jen talen neng kupnepa, sun melimkamnenge’ tenen, karepu pangeda, anengdi er melipra dombarami. Ajen talen nengda, ‘Amenda taru, ware kupkamser do?’ tenena pio gum neng. Tonda, ‘Co bo karepsengepa, nimi podan nengpu kunkamepe,’ teneramidi, balila weik kupra, mali nengpu kurami.

5Tonda, Abimelekdi, er nai Gibeon er mutu sisa, Ofra mutu bena, ka di tamupra er nai bo ati beuopda, er pe weitapsilip denge tujuh puluh (70) yuma tenpu ila pala gel deiki di poptapudi, gawal dakmanto kupu. Ada er pe nai bo Yerubaaldi deiamu neng tep poptapu. Ukupu dinin, tenpu ngebo er sida Yotam, ada er nai bodi sirya deipu mi, er kale midi, ‘Abimelekdi popnerur’ tenen, inipdongopu. Inipmaupa, Abimelekdi men epka tep, men poptapupa, Yotam gam tupa kuramu.

6Abimelek er jen talen nengdi, er weitapsilip yuma konum popmai pangeda, sun Sikem mutu kurami nesala cap, mutu si Bet-Milo mutu kurami nesala cap, yuma buluprapidi, Sikem mutu ila ba co tekamnga damai, ila lyom gel ikra deipyai bei dingeda, ‘Abimelek wepra, nun ila nimi deiyo ngebo kunkamsere’ tenen, er tep tekra deipi.

7Akupi ngeda yuk nengdi, Abimelek er weit bo Yotam damai lape pepipa, Yotamdi ange konum gekepu dingeda, mutu si Gerizim mutu deiki bena welepra teku dingeda, Sekem mutu kurami nesala tep, sun tara dinmaudi upu ila di penmau. “Uo, Sikem mutu kumum nesala gekepneso. Ne upu gekepnerumnyopda, Allahdi sun upu peda gekepkamsere,” Yotamdi pepu. 8Yotamdi domon upu deiki pepu ngeda ake.

Tenpu taru ton, bura tara co palpal kwamu co yuma bulupra upu talepi, “Nun ila deiyo ngebo wepra deipkamepe,” tenepidi pepi. Ukupi dingeda, zaitun co tep upepi, “Kanda nun ila deiyo ngebo kunkamsereme,” pepi.

9Upepipa, zaitun co di tamupra pepu. “Ukupnyopda, ne kunerur minyak mokon tali lupra tapkamne do? Nimidi, ila neng wepra deipmenge taru, ne minyak mokon gwepra giso deiki dingdinunge. Angetopu sun isok si eremkunge taruda, ne minyak telelnge dopra, nong deiki bena lingdinunge. Angeda mambul weik cadi, sun tali co tep sun deiyo ngebo men kupsetene. Tali co tep ila ngebo kupnyopda, ada telep do, gum do? Ne kangeda, gum tep, neda sun ila deiyo ngebo men kunkamsene,” pepu. 10Upepka tep nengeda, sun tali co yumadi, kwarang co tep upepi. “Nun putapsere ngeda, kanda nun ila deiyo ngebo adipapu kunkamsereme,” pepi.

11Upepi dinin, kwarang co di tamupra pepu. “Nimidi ne co du tep, ‘Aco duda pio tau perur keca cadi, kange deipra jenupe,’ tenenunge. Atep, sun ila deiyo ngebo kupnyopda, ne du moupnepa jenung ngeda, tali taptenya tep do? Angeda pio mambul weik cadi, ange tapnyopda, tali co tep ila ngebo kupnyopda, ada telep do, gum do? Ne kangeda, gum tep, neda sun ila deiyo ngebo men kunkamne,” pepu.

12Upepu pangeda, sun tali co yumadi anggur tapu tep upepi. “Kanda nun ila deiyo ngebo kunkamsereme,” pepi. 13Upepipa, anggur tapudi tamupra pepu. “Gume, ukupnyopda, ne du mounerepa, nimidi anggur me mokon ketenepmenge ngeda, tali lupra tapkamne do? Ne du taikmengepa, anggur mokon ketenepmenge ngeda, nimi jepmengedi kange derinunge. Tonda, isok si eremenge nge cap tep, anggur me jepra kange derinunge. Angeda mambul weik cadi, ne mokon tapnyopda, tali co tep ila ngebo kupnyopda, ada telep do, gum do? Ne kangeda gum tep, neda sun ila deiyo ngebo men kunkamne,” pepu.

14Upepupa siryada, atali co yumadi, takke keca tuai paramrenge tep upepi. “Kanda nun ila deiyo ngebo kunkamsereme,” pepi. 15Upepipa, takke keca di tamupra aco yuma tep pepu, “Jo sundi tek sisi, ‘Erpu nun deiyo ngebo Raja kunkamsere,’ tenepnemumnyopda, adipapu sun yuma bulupra, ne amutara kauwai tengyakankurume. Dinino, sundi, ‘Er gume,’ tenepnemumnyopda, ne takke neitamai di, uku yaredi jerepa, ila lyom co, co si aras co, Libanon mutu kure co yuma uku jepropkamre.” Uda adomon upu yumada, Yotamdi Sikem mutu nesala tep pepu.

16Upepu dingeda, Yotamdi ton cap aupu dukdongopra pepu. “Uda, sun yumada, Abimelek er wepra deipmarumdi, ‘Ila deiyo ngebo kunkamser’ tenen, tekeipmarum taruda, sun dipru kange yuma, ware kupra tenepmumdi angebo tekeipmarum do? Sun dipruda telep kupra, dumsisipu kuredi tekeipmarum do, mali do? Gume, dipru mali kupmumdi, angebo tekeipmarume.

Tonda, Yerubaal cap, er nyapsilip cap tep, dumsisipu telep kupra meliamrum do, gum do? Erdi pio telep kuramutopu, sun pedi er tep telep kupra kupmarum do, gum do? Gume, akupmarum ngeda, mali pua. Telep kuptumtoda, Abimelek tep sun kange deipra kunkamrume. Ange utopu Abimelekdi sun tep, kange deipra kunkamre. Dinino, ne kangeda, sundi telep men kupmarume.

17Ne kangeda, sundi ne nai Yerubaal tep, telep kupra men kuprume. Sun tenipetepso. Erdi sun tep telep kuramutopu, sundi er tep telep men kupmarume. Ada tali tep gume. Ne nai Yerubaaldi, ‘Sun Midian nesaladi popnenung’ tenena gum dipapu, sun Sikem mutu nesala lyemna tep, yanamudi Midian nesala popbisipudi, loptapra lyepseudi makuramseue.

18Ne nai bodi pio palepra makupseu dinin, pumun taru sundi ne nai tep ‘Nun song’ tenen, taprumtopu, ukutaru peda, er yala neng cap, er nyapsilip cap tep, ‘Nun songe’ tenen, minina kuna di, pio mali kupmarumdi tapmarume. Ada, ne nai er nyapu denge yoneitam bari (70), tujuh puluh nengda, tenpu ila pala gel deiki konum poptapmarume. Angepu gum dinin, sun Sikem mutu nesaladi, ne naidi deiamu neng sisi tapra, er tali pel melimna nerdi deipu mi, Abimelek wepra, ‘Nun pe yala ngebodi Abimelek, nun mutu nimi deiyo ngebo Raja kunkamser’ tenen, tekeipmarume. Angebo Abimelekda, ne nai er tali melimna ner dipu deipu ngebo kurure. Ukupmarumnge yumada, ne kangeda, pio mali kupmarume.

19Ange tep nengeda, atumida ne nai Yerubaal tapra, Abimelek wepra tekeipmaruma deiki di, Yerubaal cap, er yala neng cap tep, dumsisi kupra telep kweipmumnyopda, amenda taru sundi Abimelek tep, kange deipra kunkamrume. Ange utopu, Abimelek peda erdi sun tep ila kange deipra kunkamsere.

20Dinino, atumi kupmarum ngeda, malipu kweipmumnyopda, ne kangeda Abimelek cap, sun Sikem mutu neng capdi, ‘Nun songe,’ tenedamumdi, podankamrume, tenepne. Ukupmantoda, Abimelek erda kel-kel manmaneng neitamai uku sekmengepa, belepredi akeca-keca yuma damai kupre ngeda, uku jepra gawal dangamretopu, Abimelekdi sun Sikem mutu kunge nesala yuma cap, Bet-Milo mutu nesala yuma cap tep, ‘Ne songe’ tenepserepa, popdarumdi gawal dakdankamrume. Ange utopu, sun Sikem mutu nesala cap, Bet-Milo nesala capdi, er Abimelek tep, ‘Nun songe,’ tenepdamumdi, popdankamrume. Ukupmantoda, sun damai di, uku belepredi, kel-kel manmaneng uku jepra gawal dangamretopu, sundi er Abimelek tep, ‘Nun song’ tenen, podankamruma tep pepsene.” Yotamdi sun Sikem mutu nesala tep pepu.

21Upepu dingeda, adipapu Yotamdi er du bo Abimelek tep kware kupupa, sepdara beudi, yuk mutu si, Beher mutu dabena kuramu. 22Abimelekda, weneri keteng tamun deiki di, Israel nesala talepra, sun ila nimi deiyo ngebo kuramu. 23Keteng tamun weneri konum kupu pangeda, Allahdi pio mali isok dokotepupa, Abimelek er dipru cap, Sikem mutu nesala sun dipru cap, wekrapudi talepupa, sun yuma pio mali kange doupra kuramidi, sun yuma malipu kupdarami. Ukuramidi, sun Sikem mutu nesaladi Abimelek tep, mali keca weik kurami.

24Allahdi aisok dokotepkada, tali tep gume. Deiyoda, Abimelekdi peramupa, er nyapsilipdi er nai Yerubaal deriramu nyapu, er pe weitap duap yuma, tenpu pala gel deiki poptapya tepa. Ukupya tep, Allahdi aneng sun wenemna cap, kange mun keca winange cap, sun nong deiki deipu. Angeda sun yo cap, sun yapi embeua cap, yo pununa tep, aneng wenepu. Ange utopu, sun Sikem mutu nesaladi, Abimelek melipya deiki di, er weitap, duap yuma poptapi. Atep nengeda, anesala peda Allahdi win keca karepka deiki di wenepu.

25Ange tep nengeda, Sikhem mutu ila deiyo nengdi, Abimelek tep yu kupupa, ‘Angebo kalekra tomopkamep,’ tenena tep, nimi ton wepra deiamipa, amutu dana-dana tara yumada, mutu dam dinin, mutu dup dabena kalengami. Akalekamyaida, ware neng do yuma, abisi ton tali embanmai pangeda, sun wakrekra inipmai neng dipapu poramidi, sun bung keca yuma dalupra dororami. Ukurami nge cap, ‘Abimelek tomona tep, kalengkamepe,’ tenepinge capda, yuk nengdi Abimelek tep, yana lap pepipa, erdi amutu damaida, men benamu.

26Ataru neitamaida, Ebed er mi Gaal, er kayapu neng cap, er nyapsilip cap, ‘Sikhem mutu kunkamep’ tenen, Sikhem mutu yana kunmai. Acapu kunmaipanen, sun Sikhem mutu kurami nesaladi, ‘Jo telepe, tek sisi nun damai konum pio yana kunkamenge. Gaal tep nengeda, teka tenenupe,’ teneramidi, er tep kange derirami. 27Ukupra teneramidi, er cap, sun cap, tonpa anggur wa pen dam beidi, anggur du dakra deipidi, sun kikiman tonpa jena tep, anggur du taikra, ‘Anggur kange yawaramne me keteneipkamep’ tenen, anggur du me purupra ketenemdinmai. Ukupra keteneipmai dingeda, sun yumadi ila kailya kaleprapidi, isok si eremna ati neitamai bena wekra jenmaidi, Abimelek tep mali upu pepra, nyek-nyek penmai. Sundi, “Nunda ware keca deiyo tep, ‘Abimelekda nun deiyo ngebo kurure,’ pepra, er tep gispal donup do? Gume, er angeboda, tapkamepe,” pepra, malya pepra, penmai.

28Ebed erdi deiamu ngebo Gaaldi upepu, “Nunda, wareto nesala kupedi, Abimelek er upupu gekepra, er amutarapu kunkamep do? Erda wareto ngebo kurya tep do? Abimelekda, er nai boda Yerubaal kuramu. Atep, erda Gideon tara ngebo kurura cadi, nun tara ngebo men kurure. Tonda, Abimelekdi Zebul wepra deipupa, erdi deiyo keprapudi, nun mutu deiyo ngebo gubenur utopu kuserure. Tek sisi telep ngeda, nunda, nun apu bo Hemordi deiamupa, dadeipdanen yakarami neng, sun er tara nengpu sun amutara kutepe. Sun atara nengdipu, nun deiyo neng talepsetengepa, sun amutara kutepe. Hemorda, amutu Sikhem mutu kunup nesalada, nun co puna ngebo kuramnga tep, er tara nengdipu nun talepsetenge.

29“Ukupmanto, nedi Sikhem mutu nesala tep, deiyo ngebo kepra taleamtenetoda, tek sisi nedi Abilelek tep, bisbisa kaptenedi, gum kupra deiptene. Tonda, Abimelekdi, ‘Ukuptene,’ tenerurnge yumada, adipapu gum kupra deiptenye. Tonda, nedi Abimelek tep, gum kupra derina tep nengeda, nedi Abimelek tep, “Ukuda kan jen talena neng cap doupra, nun damai yankurume. Nun cap, nun jen talena neng cap, sun tara neng yuma tep, mar podankamepe,” peptene. ‘Telep ngeda apua,’ tenenune,” Gaaldi pepu. 30Gaaldi upepupa, yuk nengdi Gaal pepu upu lap pepipa, Sikhem mutu ila ati arum talepra kuramnga deiyo ngebo Zebul, erdi aupu gekepkopda, ataru dipapu tamupra ila di derepu. 31Derepkopda, Zebuldi nimi ton doproipupa, Abimelek Aruma mutu kunmauai perbei. Aperbei upuda ake. “Ebed erdi deiamu ngebo Gaal cap, er nyapsilip cap, er tara neng cap, Sikhem mutu ayana kunge nengdi, nun Sikhem mutu kunup nesala yuma tep, ‘Anengo, ange-ange yuma kupmumdi, nun talerserur ngebo er Abimelek tep, popbisipkurume,’ penmakere.

32Ange tep nengeda, kan cap, kan tara jen talena neng cap, sun yumada lukunda dipapu ormutu bemumdi, ‘Ambutumi aneng popkamap’ tenen, bura tara wai dampu warekra inimbenkurume. 33Ukupmamumyanen, ukupmantoda, ambutumi ipna keteng pakra yare taruda, kan cap kan tara jen talena neng capdi, menmena Sikhem mutu ati arum orbena popbisipetepkurume. Ukupmum pangeda, Gaaldi epkeryopda, er cap, er tamna neng cap, sundi, ‘E, Abimelek cap, er tara neng cap, bena popkup’ tenen, mangkau di kan kunkamarumai yange taruda, kan go konum kupkamara cadi, adipapu angebo popra yawa poptapkurume,” pepra, lap peipi. Tonda, sundi, ‘Ukupkurume,’ pena upu ton pepipa, Abimelek gekepu.

34Upepi pangeda, Abimelek cap, er jen talena neng cap, sun yuma alukunda dipapu menmena bokra, gung dum bari kepra, Sikhem mutu damai ongopgenepra bena inipi. 35Abimelek cap, er jen neng cap, Sikem mutu dinin, bura tarapu inipra dakunmaidi, wekra dinmaipanen, berekopda, ipna taruda Gaaldi, akati arum doramyai bisi wengbana tep, buplan damai bena tekra dinmaupa, Abimelek er tara nengdi epi dingeda, sun inipmayai di, gupra sepdara yai. 36Gupra yakaipa, Gaaldi sun aneng epudi, er kap Zebul tep upepu. “Kau, mutu dam tara di, nimi weika di yakanmangada, kan ton epmarem do?” pepra asipu. Asipetepupa, Zebuldi tamupra pepu. ‘Gume naio, ada nimi yakanmanga guma. Kandi epmaremada, mutu dup di mutu kukuya kwereryanmarpa, epmarem gum daca. Mutu kukuyapu epmarem dinin, ‘Angeda nimi do?’ tenepmaremdi pepmareme,” pepu.

37Upepupnen, Gaaldi tamupra pepu, ‘Gume, ne tek sisi pepmakena. Nimida, mutu pikil tamna di kwerepra yakanmanga dano? Tonda gung tenpu ton, ortara mem co, ba coda, ila di tekamupa, sun asuru kwa nengdi, aco damai tep, amutu sida, mambul mutu tep, ‘Ter pentin co tekwa dam,’ penupe. Apenupai atara di kepra, agung ton yakanmange. Tonda, ortara di ton gungda, mutu si, Tabur-Erez mutu di yakanmange,” pepu. 38Upepu atep, Zebuldi Gaal tep tamupra upepu. “Amio, ‘Ware keca deiyo tep yakanmang do?’ tenena gume. Amiyo, sunda tali men yange. Kandi Abimelek tep, ‘Erda, warya tep nun deiyo ngebo keipmepudi, er pepsere upupu gekenkamep do?’ tenen, tulum kupmakeupa, kandi mali upu pepmamuma tep, menenga tep ayakanmang adano. Atep, kan puto dingeda, adipapu menmena bememdi, ayakang jen talena neng tep, bena popra sirya dakurume,” pepu.

39Upepu pangeda, Gaaldi gonga keprapudi, mepra banmaupa, sun Sikhem mutu kurami ila deiyo-deiyo neng capda, ‘Abimelek cap, er tara jen talena neng cap tep, anesala dopra, popra gawal dakup’ tenen, mar porbei. 40Beipane, Abimelekdi, ‘Angebo Gaal popkun’ tenen, sepdara popra dombeupa, Gaal bura saka beupa, amenda dombanmaudi nimi weik ponmaipa, deipbanmaiyanen, sun ila ati arum dopra kurami ati buplan damai peda, bena popipa, nimi weik depi. 41Ange yuma konum ukupi pangeda, amenda taru Abimelekda, tamupra mutu si Aruma mutupu yana kuramu. Aruma mutuda, atara mutu neitamai kwamupa, Sikhem mutuda, yambul ortara karenai mutupu kwamu. Ukuramupane, Zebuldi Gaal cap, er kayapu neng cap tep, “Sunda Sikhem mutu kuna gume,” pepra, eneproupa, sun anengda, Sikhem mutu tapra, yuk mutu bena kuramya cadi, Sikhem mutupu tamupra men yai.

42Uda, Sikhem mutu damaida, sun yuma mapmaiya bereku pangeda, Sikhem mutu nesalada, ‘Nun wa pel donkamep’ tenen, atumi di gonga kepra, sun kurami ati arum tapra, bura tara wai dampu bei. Wai dam bei pangeda, yuk neng epidi, Abimelek damai lap perbei. “Naio, sun Sikhem mutu nesalada, sun wai dam yanmange,” pepra, Abimelek damai bena lap pepipa, gekepu. 43Aupu gekepudi, Abimelek er tara nesala, sun jen talen neng yuma bupra deipu. Abupra deipu nesala yumada, gung weneri ketenepra, aneng bokra deipu. Ukupupa, sun aneng yumada, Sikhem mutu nesala talerami wai dampu bena inipi. Ukupi taruda, Abimelekdi dinmaupanen, sun Sikhem mutu nesalada, ‘Nun wai dam benkup’ tenen, yakaipa, Abimelek epudi, sun inipmaiyai di gupra, yaudi, sun aSikhem mutu nesala yumada popu. 44Popidi, Abimelek er jen talena neng, ton gung butene dingeda, sun wai dam kunmai nesala tepapu, epra embana porbenmai dinin, tenpu gungda, Abimelekdi gonga kepupa, sun adipapu menmena Sikhem mutu damai, ati arum dopra, kurami ati wengbana bisi buplan dam beidi wareki.

45Bena warekami taruda, Abimelekdi atumi-atumi neitamai yuma porbanapu kuramnganen, akati arum yuma popudi, sun bung keca yuma dalupra dopropudi, amutu dopra kurami ati arum yumada, er dipapu dopra talepu dinin, akati arum yumada, uruptapra deipu. Uda, amutu kurami nesala yumada, er dipapu popra, gum kupra deipu. Tonda, ‘Sun mutu tu yumada, pio mali kuprepa, kourameng keca ton pio men papkamre’ tenen, sun tu deiki yumada, garam yukdongopka deiki di, amutu tu pio mali kweipu.

46Ange ukupu taruda, yuk neng epidi, lap perbeipa, sun Sikhem mutu neitamai gum dinin, yambul ortara karen mutu, ila gel taplakra deiamidi, lyom beilya wiamipa, akati arum neitamai kurami nesala yuma, aupu gekepi. Gekepidi, sun adipapu, sun si eremamai isok, El-Berit isok, er si eremna tep, ketenepra deiami gel ati, atara wengbeidi inipi. 47Amutu neitamai wengbeipa, yuk neng epidi, Abimelek er damai tep, yana upepi. “Naio, ila gat gel beilya wipra kurami ati pumbon neitamai, Sikhem mutu men di kurami deiyo neng ton, buprapidi, sun si eremami isok, er si El-Berit, er si eremna tep, lyom ati damaipu bena kunmange,” pepra, lap pepi.

48Atep nengeda, Abimelek cap, er tara jen talena nesala cap, sunda Salmon mutu dam tara bei. Bei dingeda, Abimelekdi kapak ya doprapudi, co teru-teru weika di yatupra, morokyo deiki deipra duyau. Ukupudi, er tara nesala yuma tep pepu, “Sunda, ne kupnetopu menmena ukupkurume,” pepu. 49Upepupa, sun yuk-yuk dinin, sun peda co teruda, kapak ya di bena yatupra, tenpu-tenpu dopra topidi, Abimelekpu melipi. Melipmaipa, sun yumadi aco doupra bei dingeda, El-Berit isok, sun Sihkem deiyo nengdi er si eremna tep dopra deiami ati, akati deiki tara bena deipra uku dongopi. Ukunmai taruda, Sikhem mutu nesalada, akeca amutarapu kunmaipane, akeca uku jenmaudi, akunmai nesalada, nimi pe, nerapu pe yuma, uku jepunge dengeda, pio weik seribu (1.000) nesala ukudi jepupa depi.

50Ange konum kupu dingeda, Abimelek adipapu Tebes mutu beu. Beudi amutu kurami nesala yuma tep, popra gawal dakudi, amutuda er dipapu taleamu. 51Ukupu dinino, akati arum domya neitamaida, ila lyom gel ati ton, gat keca di deipra domidi, kuramya cadi, amutu kurami nesala yuma cap, akati arum kuramya ila deiyo-deiyo neng capda, akati damaipu sepdara wengbei. Wengbei dingeda, buplanda dekdongopi. Ukupidi, alyom gel ati alau tarapu welepidi kunmai. 52Ukunmaipanen, Abimelekda ila lyom ati gat gel di deipra domi ati damaipu yau. Er konum yau dingeda, ‘Akatida, uku dongopkun,’ tenepu. 53Utenepudi, akati damai kunmau taruda, akati alau tara kunmau ner tenpu, roti jen keca deiyo keca, gandum du utopunge taingna tep, ketenepra deiami gel, ila ikin nge dopra dokotepupa, Abimelek er giso deiki douryaudi, er giso bongopra tapupa, depmanto kupu.

54Ukupka tep, Abimelekdi er jen talen kaber ngebo tenpu tep pepu. “Uo ne mio, menmena yarume,” pepra, ila upu deiki pepu. Tonda upepu, ‘Kan doupmarem nimi pon parang ya dipapu dopra, yana lukra poptapneo. Deiyoda, yuk nengdi, ne Abimelek tep, ‘Er angeboda, tali nerdi poptapu,’ pepra, nyek-nyek penenunge. Angeda, ne pio songe,” pepu. Upepra moropupa, ajen talen kaber ngebodi, lukra popupa depu. 55Ataruda, sun Israel yala nesala yumadi dinmaipanen, Abimelek konum depu pangeda, sun yuma apodanmai mutu tapra, sun pe mutupu tamupra bei.

56Uda, Abimelekda tali men depu dinin, men taruda, Abimelekdi er nai bo damai mali kwamunge tep depu. Ada er nai bo, er kayapu neng, sun weitapsilip cap, er kayapu neng denge pio weik, tujuh puluh (70) neng ton, Abimelekdi pomunge tep, Allahdi tamupra kwang daku. 57Ton deiyoda, Sikhem mutu nesala, sun pe mali kuraminge menenga tep, Allahdi wenepra popu. Akupu ngeda, Yerubaal, ton er sida Gideon, erdi deiamu ngebo, er si Yotamdi, sun Sikhem mutu nesala tep, “Tek sisi sun damaida ikin keca yankamre ja,” pepra wipdongopudi, ‘Ukupkamsere,’ peiamutopu kupu.