Lamentations 1

“Yerusalem kunung nesala, ikin keca dopra sun nong deiki deipnepa, engepra donkamenge,” pepu upu

1Pumun taru kurami mutu yumada, pingpinga di kange deipra teleppu kurami. Dinin, ukutaru kunup Yerusalem mutuda, walangaipu kupka cadi, ukutaruda dimpepupa bouna di dimpepra kunupe. Menop taruda, mutu ban-ban yuma teleppu kupra kurami dinino, uktaruda solu nerapudi kuramengtopu kununge. Dortaru di dipdongopra kupyakaramepunge yumada, pio telep dinin, ukutaruda tamupra mali kupra deipi. 2Atumi lukunda yumada, upepra er bicau kupupa engenmankapudi, er asi me saka er katum deiki dourbeudi, er nong deiki palepu. Ukunmau taruda, er kayapu neng ton pio gume. Er kayapu neng, sun kikiman kurami neng yuma peda, tapmengedi ataru tamupra, er cap podan nengpu kununge.

3Yehuda mutu neitamai talepra kunung nesala yumadi, sun pe mutu tamnunge. Ukupra tapmengedi, ‘Mali kupra kunkamepe,’ tenepra kungedi, pio mali pelpu talepra kununge. Sun amutu neitamai kunge nesala yuma cap, sun anesalada bouna di dopropmanto keca sun damai ton pio gume. Ware nesala do, ‘Menmena wektene’ tenen, wekre ngeboda, erdi doproptue. ‘Sun tep popkamepe,’ tenena neng yumadi warekra ongopdongoptenge ngeda, sun anesala yumadi mali kange douptenge.

4Tonda, ila tumi konum damai kupre taruda, nimi tenpu ngebo peda nun nai Allah, er ati damai men yakarure utopu, ‘Sun mut penkameng’ tenen, wepra deipi kaber nesala yumada, mali kange doupra kununge. Tonda, Allah er ati siltong keca dopra yaupa, uku dongona neng, sun imam-imam neng peda, ‘Uo’ tenen kununge. Sion mutu ila bisi buplan neitamai, tenpu ngebo tektu ngebodi, pio bicaue men tenepkamsere.

5Sun podan neng yuma konum kupmenge dingeda, konuma tenepmengedi, sal nong-nong kamnunge. Ukupra gemenge nesala yumada, ne Allah Yahwehdi kange mun keca sun nong deiki deipkamsene. Ada, sun mali kun keca pio weik kuruma tepa. Amutu neitamai kunung nesala yumada, malipu kupra upu yanina neng kununge. Tonda, sun nyapu yuma, sun podan neng damai embangedi dopra donongbanunge.

6‘Yerusalem mutu neitamai dordi kupyakarami deiamne kecapu kupnedi, ne yuk kupmane,’ pepra sun gemerami. Sundi, ‘Ukupkurume,’ pepra perami nimi deiyo neng yuma peda, puto boun kupnepa kurami. Ukupmantoda, Rusa bisamdi er jen keca putapmarepa maramretopu, kuramretopu kurure. Sun anengda, ‘Nun kayapu neng, podan nengdi adomyakanmasenge,’ men tenenunge. 7Ataru ikin keca konum kareprepa, sun mali kange doupmengopda, Yerusalem nesala pumun dordi kuramidi tenerami kecapu tenenunge. Utenengedi, sun anesalada, ‘Isomka keca weika di taleptepe,’ tenenunge. Atep nengeda, amutu kunung nesala yuma, sun mar podan neng buru deikipu doupra benkamenge. Ukupmengepa, nimi tenpu ngebodi ton bicau pepra, men lyepra deipkamre. Sun podan neng yumadi, sun saka popmarepa dinmangedi, autunapu kunkamenge.

8Yerusalem mutu kunge nesala yumada, sun nong deiki mali kupra deipkamenge. Ukungedi, pio mali kuna cap, yu kange tenena cap kununge. Pumun taru kurami keca yumada, er tep gispal doramidi kuramitopu kuna telepe. Ukutaruda, nong banangapu epmapa deiki di, ‘Nun songe’ tenen, tamnunge. Ukunung nge peda, er aso yuma leliprore pangeda, ‘Bicaue,’ tenenere dingeda, er dipru pu jeprepa yamrure.

9Mali kun keca katuai beleprepa yamnunge. Dinino nimi ton, amenda er nong neitamai cap, opkal bol deiki palepkamrenge capda, er pio moupra men tenerura deiki di, amngaipu wekredi, sangdongorure. Angebo er tep nengeda, er kupunge sisa peda, melipra ‘Bicau,’ men teneptenge. Ne Allah Yahweh tep, ‘Angebodi bicau pepnetu’ tenen, moropnetua peda, men meliptene. Angeda, er cap podan nengda, konum bisirura tep, nedi angebo tep men melipkamne.

10Nimidi, ‘Akecada, nepu taleptene,’ tenenung keca yumada, sun podan nengdi yuma dalupra doronunge. Ukupra dororamenge dingeda, sun yuk nesala dinmangepapu, Allah er ati neitamai wengbanunge. Allah Yahwehdi er nyapu sisa kupra kuna gum neng tep, ‘Pio ukupra men kunkamrume,’ pepra deipu.

11Amutu neitamai kunung nesala yumadi, ‘Uo, ware keca jeptepe do?’ tenepmengedi, ‘Nun jen keca gum kupserur’ tenen, sun kunumna weik keca dopra, yuk neng tep kunupmengedi, aco bo deiki di, sun jen keca kunumbanunge. Atep, ‘Ware keca kunuptepe do?’ tenengedi, sun talenung keca neitamai di, eramenganen, konum epmenge dingeda, sun jen keca kwaneng cap kunumnunge.

Ukupra kunupmenge dingeda, ‘Nunda gam pio kunkamepa cadi, nunda pio men denkamepe,’ tenenunge. Sun Yerusalem mutu neitamai kunge nesala yumadi upenunge. “Allah Yahweh nun putaserur keca yumada, kan dipapu kael kemserume,” penunge.

“Yerusalem mutu neitamai kunge nesala yumadi, ‘Uo,’ tenenunge,” pepu upu

12Uo, sun amutu bisi neitamai embarumu nesalada, pio moupra dinkamrume. Ukutaruda, kurpeten keca pio weika di, ne nong deiki kupetepneupa dopropsi. Awenemna keca yumada, ne nai Allah Yahwehdi, ne tep dopra deipneu. Angeda, Allah er yu ila wenemna keca, ne damai dopra karepneu. 13Akarepneu kecada, uku bu im deiki di dokotepupa kwereryaudi, akeca yuma jepra gawal dakrapudi, nimi tenerameng keca yuma gum kupra deipu. Tonda, ne sangna tep, ketenepra deipneu ngeda, kapang bisi banai mangkau tapu deriramengtopu, ne bisi banai konum ketenepra deipneudi, ‘Amenda taru abisi di sakamre’ tenen, keteneipneudi kalekra dinapu kunerure. Tonda, tumi-tumi yuma, dipru pu jepra kurure.

14Ukuredi, ne mali kune keca yuma, erpu dopra tenpuaipu dopra, ketenepra derinerure. Tonda, ne kum damai garangameng keca utopu kupra derinerure. Ukunerepa, akune keca ikin di, ne nong yuma puto boun kepra derinerure. Ukuneredi, ne nai Allah Yahweh, ne ila deiyo ngebodi, ne yu tenena kangepu karenerure. Adeiki di ne nong puto boun kupra, sun tep pona kange pio men kunerure.

15Allah Yahweh, ne ila deiyo ngebodi, ‘Ila puto jen talena deiyo neng, sun kange dipru eremenge nengda, amutara kunung neng pua,’ tenerure. Aneng sun jen talena deiyo nengda, amutara neng karepnepa, sun aneng yuma popra gawal dakamenge. Ukupmengedi, amutu neitamai yuma yanipra sepnedi, sikke buktapkamne. Ukupmantoda, anggur tapu wa peamre ngebodi wisiprepa kipredi, taingamenge pumbon dongopra, taikra pururamengtopu kupkamne.

16Ange tep nengeda, ne asi me sangnerure, Ada nimi yuk neng ton, telep kupra derina cap, telep kupra gispal dona cap, men kunenga tep, ‘Bicau’ tenen, ne asi me sangnerure. Ne mutu sisa yumada, akeca-keca yuma pio gum kupra deipnepa, gum kupkamre. Ada, amutu neitamai yuma, sun yu nengpu dinikamenge. 17Ne buru erepnedi, ne putana keca tep moropkamne. Dinino, ne tep bicau tenepra melimnada, pio men karepkamsere. Ada, nun deiyo kepra kunup neng yuma tepa. Allah Yahweh erdi podana tep dokotepkamsere. Ukupserepa, ne damai yangedi poryankamsenge. Ukupmengepa, nedi sun tep kupkamne ngeda, jen keca bambama dokoterbaramengai utopu kupra deipnedi, bung keca dopra, sikke bungtamamengtopu, sun damai di ukupkamne.

18Dinino, Allah Yahweh erda, tek sisa ngebodi upu pepra deiamu ngeda, ne konum yaniptapsi. Atep ne penkamne upuda, sundi moupra gekenkamnerume. Ada ake. Uo, mutu ban-ban yuma kurum nesalao, moupra dineso. Neda pio ila kange mun keca ne damai kupnere. Atep, ne nyapu kaber neng cap, kaber nerapu cap yumada, sun podan neng damai bemumdi podarbenkurume. 19Nedi ne kapu neng sisa, nun kikiman kunup nesala tep, upupnepa yankamenge dinino, sundi ne tep, ‘Songe,’ pepra tapkamnenge. Tonda, Allah er ati pel talepra donung neng, imam cap, amutu neitamai nimi deiyo kepra talepipa, kunung neng yuma capda, amutu bisi neitamaipu depkamenge. Ukupmengedi, tamupra sun gam tupa kununa tep, jen jena gum di, si tepra ne tepapu pio enkamenge.

20Allah Yahweh, er dipapu ne tep, pio moupra kalekra dinerure. Ukunerepa, ne nong neitamai yumada, buma bolpu kunerure. Tonda ne dipru neitamaida, kange yuma ortara benapna, yanapna kupra, ne dup damaipu weleapna, kureapna kunerure. Atep, neda konuma, nimi pona utopu kunune. Ukunedi, nimi depmengedi baramenga ati dam utopu kunune.

21Yuk dakunge nengdi, “Angeboda kange mun kange doupra kuredi, engenapu kurure. Tonda, er melimna neng cap, er dipru kwa dimna neng capda pio men kununge. Er yukpu kurure,” pepra lap pepipa, ne tep, ‘Nun songe,’ tenenenung neng gekepidi, ‘E, walito ikin weik kurure. Nunda kange deipra kunupe,’ tenepidi, pingpinga di kurami.

Atep ne nai bo Allah, kandi, nun pona tep neng tep nengeda, “Amenda taruda, nedi ila ikin keca dopra, sun deiki deipnepa, kange mun taru yana kunkamsere,” pepra, pedina upu deiki konum peipmum ngeda, konuma, adipapu aikin keca doupra nun pona tep neng, sun deiki deipkurume naio! Ukupmem pangeda, ne ukutaru ikin weik kunerepa, engenuntopu, sun peda amenda taruda, sun damai ikin weik kuprepa, kange mun kange doupra kunkamenge.

22Ukupkamrumnya deiki di, ne pona tep nengdi, mali-mali weik kunge keca yumada, kandi moupra dimemdi, sun tep ila di wenepkamrume. Ada, nedi kan upu yaniptapsidi, mali kuramsipa, kandi ne tep wenepnemumtopu, ‘Kandi ne pona tep neng peda, ila di wenepkamrum’ tenen, moropkene. Ne naio, angeda tali tep men moropkene. Deiyoda, ikin weik kunerura cadi, ne dipru pu jenerepa, engena cap, malye pena cap weik kununa tep, ange moropkene naio!