Lam 2 | XteSC | STEP | Uo, Allahdi nun Yerusalem mutu kuramepu nesala tep, pio yu kupupa wenepseue. Ukupmantoda, Allah er yuda, ila dua bum di kemdongoramretopu kupra, nun damai yana lelipngopseupa, pio ali kuserure. Men taru Yerusalem ila ati arumda, urasin pio telep mutu kuramu dinin, ukutaruda Allahdi amutuda, urasin pio mali kupra deipu. Ada ukupmantoda, im deiki pio telep keca akwaptupa, im deiki di tuai mutu dokoteptua utopu, pio amutarapu deipseue. Ada, Allah er yan beipye peingnai utopu keca, ‘Ne songe,’ tenen, taptua utopu keipseue. Deiyoda, Allahda akeca-keca yuma talepra, ila puto weik ngebodi, nun Israel nesala tep, yu kupupa derepseua deiki di, amutara nesala utopu kepra deipseue. Ataru dipapu erdi wepra deiamupa, er si eremna tep dorami ati cap, Yerusalem mutu yuma peda taproudi, pio amnyo karikrou.

Lamentations 2

Allahdi Yerusalem mutu neitamai kurami nesala tep yu kupupa, wenepu upu

1 Uo, Allahdi nun Yerusalem mutu kuramepu nesala tep, pio yu kupupa wenepseue. Ukupmantoda, Allah er yuda, ila dua bum di kemdongoramretopu kupra, nun damai yana lelipngopseupa, pio ali kuserure. Men taru Yerusalem ila ati arumda, urasin pio telep mutu kuramu dinin, ukutaruda Allahdi amutuda, urasin pio mali kupra deipu. Ada ukupmantoda, im deiki pio telep keca akwaptupa, im deiki di tuai mutu dokoteptua utopu, pio amutarapu deipseue. Ada, Allah er yan beipye peingnai utopu keca, ‘Ne songe,’ tenen, taptua utopu keipseue. Deiyoda, Allahda akeca-keca yuma talepra, ila puto weik ngebodi, nun Israel nesala tep, yu kupupa derepseua deiki di, amutara nesala utopu kepra deipseue. Ataru dipapu erdi wepra deiamupa, er si eremna tep dorami ati cap, Yerusalem mutu yuma peda taproudi, pio amnyo karikrou. 2 Tonda, Allahdi akeca-keca yuma talepra, ila puto weik ngebo kurure. Erdi, nun apu bo Yakub, erdi deipupa, dadeipdanen yakaramyanen, deipipa, Yehuda tara kurami nesala, amutu neitamai kurami nesala, sun ati dorami ngeda, bicau men tenepudi, yu kupupa, sun ati tenpu peda, ton men tapu. Sun ati yuma urupra sikke buktapu. Ada, Allah er yu pio weik kupupa, derepseua deiki di, amutu ati arum doramepudi kuramupkai yumada, urupra tapseu.

Ukupmantoda, nimidi, ‘Yu nengdi bisbisa kapsenung’ tenen, sun ati dana-dana tara, lyom gel beilya deipra wirameng dinin, jen talena nengdi, ange yuma urupra tamamengtopu, nunda telep kuramepupane, Allahdi tenpu ati peda ton men tapu. Ayuma urupra tapu. Allah erdi Yehuda yala nesala tep, ila nimi deiyo neng kepra kurami Raja neng cap, sun amutara yuk-yuk pel tep, deiyo kepra kurami neng cap tep, nun amutu nesala yuma tep nengeda, ‘Sunda mali,’ tenepseudi, amu kepra deipseu.

3 Atep, nun Israel nesala yumada, menop taru puto kuramepu dinin, ukutaruda Allahdi yu kupupa, derepseua deiki di, nun Israel nesalada puto boun kupra deipseue. Tonda, nun Israel nesala pona tep, nun podan nengdi pona tep, wareng yakasenge taru peda, Allah erdi men melimserure. Ukupmantoda, er dumsisi tara buru puto weik kure ngeda, men taruda ange di kalengamseu dinin, ataruda konum tapseudi, kalekra men melimserure.

Tonda, nun apubo Yakubdi deiamseupa, deipdanen yakapedi kunup nesala deikida, Allah er yuda, nun deiki deipseupa, uku jeramre utopu kuserure. Auku bu welepredi, nun kun keca yala-yala yuma cap, nun tara nesala cap, nun damai kururnge yuma capda, uku jepra gawal dangdoseretopu kupra, er yu deiki di konum gum kupra deipseue.

4 Nun podan nengdi, sun marda jen deiki deipra, nun maramna tep keteneipmengetopu kupra, Allahdi nun menenga tep, konum wenepra gum kupra deriserure. Uda, Yerusalem mutu kungepa, nundi sun tep ila di bicau tenenup neng, nun nyapsilip yumada, Allah erdi aneng yuma popra gawal dakra deipmasere. Ada, Allahdi nun tep, yu kuprepa derepseredi, Yerusalem mutu kunup nengda, wenepra gawal dangdoserure. Ada uku bu belepredi, akeca-keca yuma jeramredi, gum kupra deriramretopu kupredi, Yerusalem mutu deiki ila ikin keca konum karepserepa, jepra gawal dakmasere.

5 Allah ^{▼▼Allah – Akayat cap, ayat 7 cap neitamaida, Ibrani upu di, ‘Adonay’ pepra sekya cadi, sun kael kemna tep, nundi aupu ‘Adonay’ deiyo ngeda, jenek kupra sekmupu.} akeca-keca yuma talepra, ila puto weik ngebodi, nun podan neng utopu kupra, konum wenepra ikin keca weik kareserure. Erdi nun amutu neitamai kunup nesala yuma, nun Israel nesalada, popra yawa poptapmasere. Allah erdi nun talesenge nimi deiyo neng, sun Raja nengda, sun pio telep kupra doramidi kurami ati, akati sida istana yuma cap, nun ila ati arum dopra kunupai cap, amutu kunup nesala kalengna tep, ila pala gel dopra, lyom gel beilya wiamidi, ‘Yu nengdi yana popsenung’ tenen, kalengnungai cap yumada, urupra tapseu. Allah erdi nun Yehuda mutu kunup nesala deikida, ila kange mun kecada, pio weik kupra deipmasere. Ukupmasera tep nengeda nun Yehuda tara neitamai kupe nerapu cap, nun nimi cap yumada, ikin kange doupra, engenapu kunmape.

6 Bura tara tali paramre co kwepra tamamengtopu, nun nai Allahdi go karepupa, nun podan dam nengdi, Allah er si eremna ati peda, dakra tapi. Ada, Allah er nyapu sisa, nun Israel nesalapu, bulupra wekmepedi, er si eremnup atida konum daktapsei. Ukupseia deiki di, nun Israel nesaladi, nun nai Allah gispal dona tep, beipye peingna tumi, Sabat tumi cap, Allah er gispal dona tep, ‘Atumida ila tumi acei, atumi peda, ila tumi ton acei,’ pepra keteneipmepu tumida, ‘Lupropmengedi, kalya kalepra men kunkamenge’ tenen, iki keca weik nun deiki deipseue. Tonda, Allah er yu kupka deiki di, nun mutu Raja neng cap, imam cap peda, sun yumadi penge upuda, erdi ton men gekerure. ‘Sunda dakwapye,’ tenen, men gekepredi tamdongoserure.

7 Allah er lengna keca karena tep, gel pala taplakra yakra deipidi, gam keca popra kareryakaramipa, imam nengdi akeca dopra, adeiki uku sekra, Allah tep kareraminge, er si mesba, ange peda, ‘Ne songe’ tenen, tapra kau kemrure. Angetopu, Allah er si eremna ati, pio pumbon telep lengnai peda, tapra kau kemrure. Allahda, akeca-keca yuma taleredi, ila puto weik deiyo ngebo kurure. Erdi nun tep, kaukepseudi, go karepu pangeda, nun podan neng yaidi, nun mutu deiyo nengdi kunge ati, istana cap, nun kunup ati dana-dana tara, ila lyom gel beilya wipra ongopdongopmupunge cap, ange yumada dakra tapmasenge.

Atep nengeda, nun podan neng yaidi, popra gawal dakropsei dingeda, men taru nun Israel nesaladi Allah er si eremna tumi kepnepa, akati weka, er si eremna tep, gudina cap, pingping kange deipra mut pena cap, kurameputopu, nun podan neng peda, tali lupra akati neitamai wekidi, “Nundi sun Israel nesala yumada, konum poptapmupudi, sun mutuda dalupra doropmap adano,” pepra, gudinapu kunmai.

8 Ukupra kupi ngeda, tali tep gume. Deiyoda, Yerusalem mutu ati arum domepudi, ila lyom gel beilya wipra ongopdongopmupunge tep nengeda, Allahdi, ‘Sun Israel nesala wenemna tep, nedi ange yuma dakra tapkamne,’ tenepu. Utenepka tep, Allahdi aila lyom beilya wiamupkai yumada, lyom tapu di kunupetepudi, ‘Sun podan neng tep, go karepnyopda, sundi abeilya yumada dakra sikke buktapkamenge,’ tenepu. Ange teneputopu, kupu. Ila lyom gel beilya wipra ongopdongomupunge pe, amutu ati arum dopra kuramepu nesala kalengna tep, dopra deiamepupa kalengamsei lyom ati cap yumada, dakra tapupa, nun ila ati arumda walangyopu kupu. Ukupmantoda, nimidi ila kange mun kange doupmengedi, ‘Uo’ tenen, engenapu kuramengtopu, akati yuma cap, abeilya capda, mali weik kupu.

9 Ukupupa, akati arum ongopgenepra wiami beilya neitamai dinin, nimi ila wengyakan bisi buplan yumada, gat keca er si besi di keteneiaminge yumada, dakra tuaipu tapi. Tonda, abuplan dam wengyakanai tep kemdongomamepunge yumada, nun podan nengdi ange yuma dakra tapi. Ukupsei dingeda, nun podan nengdi, nun ila nimi deiyo ngebo Raja cap, er amutara pel yuk-yuk deiyo kepra kurami ila neng cap yumada, aneng doupra, sun karen mutu kurami nesala, yuk mutu nesala sun mutu dubeidi deipipa, amutu nengdi talenunge. Adeiki di, Allah erdi pepra deiamupa, sekamu ngeda, ton men peteremsenunge.

Tonda, Allah er upu peiprepa, lap pena deiyo neng, sun nabi-nabi nengda, ukutaruda Allahdi sun kori ton yana men perure. Tonda, ken maramenga deiki di, Allah Yahwehdi, ‘Ukupkurume-ukupkurume. Amenda taruda akeca ton yankamra cadi, ukupkamrume,’ pepra menop taru peramutopu, tupa ton men lap perura cadi, anabi nengdi nun Israel nesala tep, ton men lap pesenunge.

10 Ukutaruda, Yerusalem mutu kunge wisi-wisi neng, deiyo kepra upu pesenge nengda, Allah er upu talepra pel donge nengdi, nun Israel yala nesala tep upu pesenge neng yumada, ataruda tali dimpepra, tu deikipu bungnunge. Angeda, sundi, ‘Uo, ware keca tep kupseu do?’ tenen, ikin kange doupra, dipru pu jerepa, peten kemna tep nengeda, sun anengdi tu but dopra, sun giso deiki deipra kununge. Tonda, pio mali opkalpu kenekra kununge. Tonda, amutu kunung kaber nerapu yuma peda, ‘Uo, ware kupkup do?’ tenen, sun urasinda, tu deikipu genepdongopra bungnunge. 11 Ne Yeremiada, men tamnune. Tupa-tupa engenapapu kunepa, ne asuru nenerure. Ne dipru pu jenerepa, ne dipru bulungsangnerure. Ne puto pio gum kupneu. Ukupmanto, ne dipruda kulupra tuai sangamretopu kupneu. Ada, tali tep gume. Deiyoda, ne mutu nesala yuma gum kupka tepa. Tonda, nun jen keca gum kupseua deiki di, nun nyapu cap, metek nyapu yuma capda, sun puto gum kuprepa, Yerusalem mutu bisaipu depmanto kungedi dorbena sangnune.

12 Ukungedi anyapu yumada, pio puto bounpu kurura cadi, anyapu yumadi, sun nin yapu tep, “Uo nun nin yapu, nun jen cap, me cap tep, adipapu karepserume,” pepra, engena deiki di moronunge. Sun anyapudi, ukupmantoda, nimi podangepa, suse dila weik kwamre nengdi, bisai saka dourbengedi, depmanto kurameng utopu kununge. Anyapudi ukunmangepane, anyapu sun isin gum kupbaramrepa, sun nin yapudi iripra doupmangai deikipu denunge.

13 Uo, sun Yerusalem mutu kurum nesalao. Tonda, sun Yerusalem mutu kurum ner nyapuda, pio kange mun keca doupra kurumu nesalao, sun damai ila kange mun keca yaupa doroprum ngeda, yuk mutu nesala damai yakarepa dororameng utopu ngeda, men doproprume. Sun yuk mutu nengda, yambula dipapu ikin keca doronung dinin, sun Yerusalem mutu nesalada, sunda kaberto nerapu, nimi kapul men domi nerapu utopu kurum dinino, tek sisi pio ila ikin keca, kange mun kecapu konum doproprume.

Atep nengeda, ware keca deiki kunupeteptepya guma. “Ukupmantoda, ila laut mokon weik cap, kaurye cap, pala weik cap deipka utopu, ila kange mun keca, ikin keca sun damai yau ngeda, men nukmanto. Ada, Yerusalem mutu ila ati arum yuma, konum sikke buktapupa epmarume. Akupseu ngeda, tek sisi ware ngebodi tamupra telep kuipsetupa, kange di telep kuptu do? Gume, angeda tek sisi men kupmanto!

14 Yehuda yala nesala sun damai dortaru kupkamre keca tep, Allahdi lap peprepa, sun gekepmengedi, lap pesenung neng, nabi-nabi nengdi penung upuda, tali mok upupu penunga cadi, nong men kupkamre dipapu, tali upupu pesenunge. Sun Israel nesaladi, mali kupmum dipunen, anabi nengdi sun mali kumum ngeda, ‘Ace,’ pepra, men lap pesengepa, sun mali kumum keca yumada, tapmumdi tamupra yamumpa, Allahdi men lyemdoserure. Sun anabi nengdi sun damai lap pesenung upuda, ‘Dumsisi kuna tep bisida, ace,’ pepra men pesenunge. Ange gum dinin, mok upu deiki dipapu, mali kun tara bisi banange tep ngepu, lap pesengepa, sun abisipu berume.

15 Yuk nesaladi Yerusalem mutu ati arum dopra kuramrum nesala tep, sun amutu bisi embangopda, sundi mali pepra, buru bongopmengedi, autusenunge. Ada, “Allahdi sun wenemna tep, ikin keca sun nong deiki deipka tep, ikin kange doupra kununge,” pepra, autupra mali pesenunge. Sun abisi embanung nengdi, ange epsengedi, sun giso gadung-gadung pengedi, mali upu pesenunge. Ada, “Aton dipetepso! Yerusalem mutu ati arumda, menop taru pio urasin telep mutu kuramupa, nimi ban-ban yumadi, ‘Uo, amutuda pio telep cadi, kange deipmepe,’ pepra lolomami. Dinino, ataru epmep mutuda, tek sisi amutu be?’ pepra, nyek-nyek pepra nalemengedi, autusenunge.

16 Sun Israel nesala, sun podan nesala, yuk mutu neng yumadi, sun aso deiki dipetepsengedi, ‘Anengda, pio malipu kununge,’ tenepsengedi, yu tenesenunge. Sun anesaladi sun tep, si derekna pedasengedi, nalepra autusengedi upesenunge. “Amutu ati arum dopra kuramyaida, konum popra gum kweipmepu! ‘Atumida menmena yatupa, kuptepe’ tenen, pio dinapu kuramupu. Ukutaruda, akati arumda, mali kuprepa, adinapu kuramupu tumida, atumi konum kuprepa, epmepe. Atep kange deipmepe,” penunge. 17 Pumun taru dordi, Allahda, ‘Mali kupmengepa, nedi sun wenemna tep ukupkamne,’ tenepra keteneiamudi, “Sun damai tep ukupkamne,” pepra, lap pediramseu ngeda, ukutaru konum kupseue. Allah erdi nun tep, bicau tenena gum dipapu, dakra tapseudi, sikke buktapseue. Ada, Allah erdi nun podan nesala, sun deiki puto karepupa, yana popra bisipseiye.

Allah erdi nun podan nesala tep, ‘Kange telep kupra deipnedi, go karepnepa, Israel nesala popmengedi, bisbisa kapkamenge,’ teneamutopu, erdi puto karepupa, nun podan nengdi, nun kuramepu mutu yumada, dakra sikke buktapseidi, telep kange doupra kungedi, gemepra kari ponunge. Erdi sun podan neng deiki puto weik kareamupa, sundi nun tep popra bisbisa kapseidi, nyek-nyek pepra nalemsengedi, kange derinunge.

18 Uo, Yerusalem mutu tep, ila lyom gel beilya wiamseinge yumada, Allah tep, moronkamrume. Ada, Allahda akeca-keca yuma taleredi, ila puto weik ngebo kurura cadi, sundi er tep, ‘Uo, melipsememdi, lyepserume,’ pepra, moroptumopda, ne kange deiptene. Ada sun Israel nesalada, asi meda tupa ipna, lukunda yumada, me embaramretopu kurumudi, Allah er tepapu, “Uo, melipserume,” pepra, engepmumdi moropkurume. Tamna gum dipapu, sunda pio engenapu kunkamrume. Beipye ton men peingkamrume. Ukuramrumupa, sun nong yumada, puto bounpu kupkamserure.

19 Tonda, lukunda neitamaida, mapra bukra, tupa-tupa kumumdi, sun dipru neitamai tenemumnge yumada, Allah damaipu pepra deipkurume. Ada, sundi Allah, nun ila puto deiyo ngebo tep, “Uo, melipserume,” pepra, sun buru ereiprumudi, moropmumpa, erdi sun nyapu jen putarepa, bisi kwangdanai loka dourbengedi, depmanto kunung nge yumada, “Bicau kupketupa, lyepropkamserume,” pepra moronkamrume. 20 Uo, nun nai Allah, kanda akeca-keca yuma talepra, ila puto deiyo ngebo kurumnya di, nun damai ikin keca deipsemumpa, dopropmepudi kange mun kange doupra kunup ngeda, kan epmemdi tenipetepkurume. Yuk mutu nesala tep nengeda, aikin utopunge ton, sun nong deiki deiamum do? Nun deiki deipsemum ngeda, ila ikin nge kurur do? Naio epra tenipetepkurume. Sun nyapu deiami nerapudi, sun pe meneng nyappu popra jenunge. Angeda pio men kuptenge!

Tonda, imam neng cap, nabi neng capda, Allah kan si eremnai, akati pumbon, pio lengna ati neitamai dipapu, yu nengdi yana popra tamnungada, telep do naie? Ne kangeda, ange men kupmantonge tenepne. Naio, ange ila ikin keca karepsemum ngeda, Kan men di ton kuramumtonge kupmum do? Gume tenepne.

21 Tonda, bisai neitamai but deikipu, wisi neng pe, kaber neng pe, nimi embanung bisi neitamaipu saka dourbanunge. Angetopu, kaber neng cap, kaber nerapu cap yumada, nun podan nengdi, nimi pon yadi popra tamnunge. Allah kandi nun tep yu kupkeu tumi yanmara cadi, Kanda nun tep ton, bicau men teneserume. Kandi go karepmumpa, nun podan nengdi, tali lupra potamnapu kusenunge. Ange peda kan dia.

22 Uo nun nai bo Allaho, kandi nun kwar tenenup neng, nun podan nesalapu pepmempa, “Ila kailya kalepmangedi, jen keca tonpa jenunga utopu kupkupe,” pepra upuramengtopu kupra, kandi nun podan neng upupmempa, sun yuma dana-dana di yakangedi, nundi deiamepu nyapu, nundi kalengnup nyapu cap, bicau tenenup nyapu cap yumada, yana popra tamsenunge. Nun nai Allaho, kan yu kupkeupa, kumem tumida, tenpu ngebo peda, bura saka sepdara men betue. Nun podan nengdi, nun nyapsilip yumada, konum popra gawal dakmange.