Lam 3 | XteSC | STEP | Ne Yeremiada, ila kange mun keca dopramsidi, konum kael keamsi ngebo, Allah er yu kupupa, wenemna keca ne deiki ikin keca kareamneupa, dopramamsi.

Lamentations 3

Allahda, bicau teneserura cadi, keana taru tep, wenemserur dinin, amenda taruda, er pedina upu deiki peserenge yumada, tek sisi karenkamsera tep, pepi upu

1 Ne Yeremiada, ila kange mun keca dopramsidi, konum kael keamsi ngebo, Allah er yu kupupa, wenemna keca ne deiki ikin keca kareamneupa, dopramamsi. 2 Ukupmantoda, neda Allahdi dirine pe pio gumai, kunuknapu kwamnga neitamai enepra dokotena tep, doupra bena deiamneue. 3 Allah erdi, neda atumi-atumi yuma bicau tenena gum di, tupa er buru di pio ponapu kuramneudi, menenga keca kareramneu. 4 Ikin keca weik kareramneua deiki di, ne nong deikida, Allah erdi ponapu kuramneupa, suse dilapu kupneudi, ne nong tu cap, ne nong bol cap, puto boun kupneudi, nong bol gum kupbarure. Ataru yumada, ne nong bol malipu kunerure. Tonda, ne yo yuma belepneudi, ne nong bol mali kupneue.

5 Allah erdi ne deikida, kange mun kun keca cap, pu jena keca cap, pio ikin keca cap pu, ne nong deiki dopra deiamneua deiki di, ila kange mun kange dounune. 6 Neda, Allah erdi dopra kunungna neitamai bena deiamneue. Ukupmantoda, pumun taru di deamne neng utopu kupra deiamneue. 7 Allah erdi neda pio gat ikin tapu di, nimi ateng koupra deriramengtopu, kuamneu. Ukuamneupa, ne bisi embana peda, men embaramsi. Neda men lyepdanmanto kuramsidi, pio telepai men benmanto kuramsi. 8 Nedi Allah tep, “Melipra lyepneo,” pepra, ngolongamsidi mororamsi dinin, erdi ne upu men gekepmanto kuramneu. 9 Erdi, ‘Ne embankun,’ tenepne bisi yumada, ila lyom gel beilya wipra kepdongopra embarameng utopu kuramneu. Tonda, ne dumsisi bisi embaramsinge yumada, gwalipdanen ban bisi utopu kupra deiamneua cadi, yukai men benmanto kunune.

10 Ukupmantoda, Allah erda, ila yu pus singa utopu, tonda bura mutu pio yu keca er si beruang utopu kupra, gam keca kange tenena gum dipapu, tali embangepa, ayu keca kalekmanadi, inipra poramretopu kuramneu. 11 Erdi ne tep inipra kalekmanadi, dombenpa, neda, dumsisi bisi bana gum di, lerekra yuk bisi benpa, amenda dombendi, si topra tu deiki siptapnedi, bol bolokra potamamneutopu kupneu. Pio akeca-keca gum mutu utopu kupneu. 12 Ukupmantoda, Allah er jen deikida, ‘Angebo er taram deikipu mar popkun’ tenen, mar dopra deipnedi, ne damai tara keipra dopnepa, amar di ne nong deiki bengyakaramneue. 13 Pio ikin keca weik ne nong deiki deriramneua cadi, ukupmantoda, Allah erdi ne damai mar doramneu ngeda, ne nong neitamai wekrondi, ne dipruaipu lungamneu utopu kupneu. 14 Ne tara nesala yumadi, ne tep auturamneiye. Tonda, tenpu tumi neitamai yumada, tamna gum dipapu, sundi ne tepapu, mut pena deiki di nyek-nyek pepra nalemamnei.

15 Allah erdi ne tep, kange mun keca weik kareamneua cadi, ukupmantoda, pio piripra su keca karepmengepa jeramengtopu kupra karepneupa, ikin weik kuramsi. Tonda, metu me yunge karepmengepa jerameng utopu, me karepneupa jepsipa, boupneue. 16 Kange mun kange doupra kununa cadi, ukupmantoda, Allah erdi ne aso deikida, tu doropra pulupneue. Tonda, erdi ne sida, gel dopra coptapneupa, gonga deipneue. Tonda, nimidi yuk neng poptapmengedi, but deiki dourbena sakmengepa, yaniramengtopu kupneu. 17 Ange-ange yuma tep nengeda, ne akunun taru yumada, ne kange tenenange neitamai do, ne dipru neitamai do, kange telep ton doupra men kunune. Telep kuprepa, pining kange doupra kurameng ngeda, men di konum luprosi.

18 Ange tep nengeda, ne pio puto men kupneudi, bounpu kupneua cadi, ‘Tupa telep kupra gam men kunkamne,’ tenepsi. Tonda menop taru nedi Allah tep, ‘Ukupra-ukupra telep keca ton karepkamnerure. Pio telep kweipkamnere,’ teneramsinge yumada, konum gum kupneua cadi, kange mun kangepu dounune. Ange yuma tupa men tenenune, konum luprosi. 19 Uo, nedi, ne kange mun kupnere keca cap, ikin kupnere keca cap, ne ati gum kupneunge cap tep, ange yuma tupa tenipnyopda, neda pio kange mun deikipu kunune. Pio ikin weik kunerura cadi, ukupmantoda, neda pio su peramre kecada, konum jepsi utopu, tonda pio su peramre metu meda, konum jepsi utopu kunune. 20 Neda ange yuma tepapu pio tupa-tupa tenenapu kunune. Adeiki di, ne kange neitamaida, pio dipru pu jenerure. Ne dipru yuma peda buluksakneue.

21 Tek sisi pio ikin weik kunerur dinino, akunerya peda, ‘Ange-ange ton lumdongona gume. Ange ton pio tenenapu kunkamne,’ tenena kange ton kupneryopda, kange di tamupra, ‘Angepu kupkamne ja, amenda taru kange di ton cap telep kupkamne ja,’ tenenune. 22 Neda, kange di ton cap tenenun kecada ake. Ada, Allah erdi tupa nun tep pio bicau teneserure. Tonda, Allah erdi nun tep, Ukupkamsene, sundi ne upu talepra kupmumnyopda, nedi sun tep ukupra-ukupra telep kweipkamsene,’ pepra, pedina upu deiki di peipseunge yumada, men tapkamre. Ange yuma tek sisi nong kupkamre ja. Allahdi, ‘Ne mawa nesala tep nengeda, tupa teleppu kweipkamsene,’ teneserur ngeda, men gum kupmanto. Angeda pio tep akunkamre.

23 Allahdi, ‘Ne mawa nesala tep nengeda, tupa teleppu kweipkamsene,’ teneserur ngeda, tumi-tumi yuma, ipna taru di gonga kepredi, tenenapu kuseredi, teleppu keimderiserure. Allah erdi nun tep bicau teneseredi, erdi, “Ukupkamsene,” peserur upu yumada, tek sisi nong kupkamre ja. Men tapkamsere. Tupa weika di telep kupra melimkamsere. 24 Ange tep nengeda, ne kange neitamai dingeda, utenepra penune, “Allah Yahweh, erda ne nai bo Allah kunerura cadi, yuk keca ton men putanerure. ‘Er dipapu, pio melimkamner ja,’ tenenuna cadi, er deikipu ne dipru kange yumada derinkamne,” penune.

25 Ware neng do yuma, sundi, Allah er tep, ‘Er dipapu melimkamser ja,’ tenepra, er tepapu teka tenepra, tenenapu kunung nesalada, sun tep telep kupra derirure. Tonda, sun kange dipru neitamai, er tepapu enung nesala tep nengeda, erdi pio telep kudirure. 26 Atep nengeda, telep kunada ake. Ware nesala do yuma cap, tonda nun yuma peda dimpepra kupedi, er tepapu, ‘Er dipapu melimkamsere’ tenen, dinkamepe. Ukuramepepane, Allah Yahweh erda nun tep melipra lyemdonkamsere.

27 Tonda, telep ngeda, nun kaber tupa kunmap taruda, ikin keca yana kupserya peda, ‘Uo ware keca deiyo tep kupmaner do?’ tenena gum dinin, dipru kange tenimtona gum dipapu, dimpepra kunangepu, moupra kael kepmepedi, dakra kunkamepe. 28 Ukupmepedi, Allah Yahweh er kange dipapu, nun tep, kange mun keca nun deiki deipserepa, ikin kange doupra kunup taruda, konuma, dakra bukmepedi, ‘Uo ware deiyo tep do?’ tenen, upu weika di pena gum, nun pe yuk dimpepra kunkamepe.

29 Uda, nun dipru amutara kepra kupedi, ikin weik kunup taruda, ukupmantoda, nun tu deiki mapmepedi, sun sipyal bam bolda, but deikipu deiptepedi, ‘Gume, amenda taruda, Allah dipapu yana melipra lyepropkamsere,’ tenenapu kunkamepe. Ada, nundi, ‘Ange yumada, Allah dipapu kuptua cadi, er dipapu melimkamsere,’ tenepra tenenapu kunkamepe.

30 Ange utopu, ukupmantoda, yuk yu nesaladi nun katum dam yana bongopra popsengopda, ton tara katum peda ketenepra deipmepepa, dongopra ponkamsenunge. Tonda, yuk yu nesaladi nun tep, autupra nalemsenga peda, “Dakwapye, danalemseso,” pepra, kau kemkamnupe. 31 Ukunkamepa deiyoda, ake. Ada, Allahda ^{▼▼Allah – Aca cap, tonda ayat 36-37, 58 capda, Ibrani upu di, ‘Adonay’ pepra sekya cadi, sun kael kemna tep, nundi aupu deiyonge jenek kupra sekmupu.} akeca-keca yuma taleredi, ila puto weik ngebo kurure! Erdi nun tep, “Sunda dakununge. Anesala konum tapmana cadi, ton cap pio men melimkamne,” pepra, men tapkamsere. Erdi nun tep pio-pio tep men tapkamsere.

32 Allah erdi nun damai keana taru tep, kange mun keca kareserepa, nunda kange mun kange doupra kunkamep dinin, erdi teneretopu deipserepa, konum kupmepyopda, er dipapu nun tep tamupra tenepseredi, melipra lyepkamser ja. Ada, Allah erdi nun tep, ila di bicau teneseredi, ‘Sun tep ukupra melipra telep kudinkamsene,’ tenepra, pedina upu deiki di peseretopu, tupa melimkamsere. Tek sisi pio tep men tapkamsere. Erda ila di bicau teneserura cadi, tamupra pio tep bicau tenepseredi, pio weika di melimkamser ja.

33 Ukupkamra deiyoda ake. Ada, Allah er kangeda, nun ikin keca doronapu kupedi, kange mun kuserur ngeda, ‘Telepe,’ men tenerure. Ila di bicau teneserura tepa. 34 Ukupmantoda, yu nengdi ateng koupsengedi, wenemna ati dongopsengepa, akati pumbon bukmepedi, kange mun kupserepa, yu nengdi yanipsengepa, kange bongtoserur taru peda, Allah Yahwehdi diserure.

35 Tonda, yu nengdi, ‘Allah tenere ngeda, dakwapye’ tenen, er upu yanipmengedi, yuk nesala yuma tep, ‘Sunda dakwapye. Sun putan keca cap, kalengna keca cap, melimna keca cap yumada, pio men karenkamepe,’ tenepmengedi, anesala yuma sun nong deiki yanipmenge taruda, Allah erda akeca-keca yuma talepra, deiki tara kuredi, Ila Puto Eremna Ngebo kuredi, aikin kunge nesala yuma dirure. ^{▼▼dirure – Ayat 35 neitamaida, Ibrani upu deiki di, Allah er si tep, ‘Allah Elyon’ pepra seki. Indonesia Allah upu buku neitamaida, ‘Allah yang Mahatinggi’ pepra sengnunge. Dinino, aupu deiyoda, sun kael kemna tep, angeda konum jenek kupra sekmepu.}

36 Tonda, nundi mali men kupmepe dinin, yuk nengdi mok upu pepmenga deiki di, sun upu lepsisikra penge deiyo neng gekepmengedi, deiyo men kwapmarepapu, nun tep wenemna kecada, derisenunge. Atep, nun nai Allah ^{▼▼Allah – Acada, Ibrani upu di, ‘Adonay’ pepra sekya cadi, nundi aupu deiyonge jenek kupra sekmupu.}, akeca-keca yuma taleredi, ila puto weik deiyo ngebo kurura cadi, ange epra konum kael kemserure.

37 Allahda, akeca-keca yuma taleredi, ila puto weik deiyo ngebo kurure. Atep, ukupmantoda, Allah erdi, ‘Akeca ton kuptue,’ men teneramtutoda, tek sisa ware nimi dipapu akeca-keca ton kuramtepe do? Gume, Allahdi, ‘Ange kupkamre,’ men tenere keca yumada, nimidi tek sisi men kuptenge. 38 Deiyoda, ake. Sun ton tenipetepso, malinge pe, telepnge peda, Allah erda akeca-keca yuma talepra, deiki tara kuredi, Ila Puto Eremna Ngeboda, er dipapu, ‘Angeda kupkure,’ pepra, derirure.

39 Nun tuai mutu nesala yumadi, mali kun keca kupmepyopda, Allahdi menenga keca karepserepa, ikin weik kupseryopda, ware deiyo keca tep, nun nimidi, “Angeda men kupsetue, angeda mali men kuptue,” penup do? Gume, nun tuai mutu kupedi, isin gam tupa kuramep nesala yumada, “Uo, ada warya deiyo tep wenemserur do?” pepra, mali men peptepe. Allah er dipapu, nun mali kun keca kuramepepa, erdi, ‘Wenepkun,’ tenepseryopda, adipapu wenemserure. Nundi upu ton men sektepe. 40 – 41 Telepe, nun nimi gam kunup taru di, nundi kunup keca yuma tep nengeda, moupra didapedi, ‘Angeda telep do? Angeda malipu kurur do?’ tenen, kael kemdankamnupe. Ukupmepyopda, nun adipapu nun mali kunange taprapmepedi, nun nai bo Allah Yahweh, er kururaipu dirbepedi, nun buru ereipmepedi, nun dipru kange neitamai di, er tep upepra moronkamepe.

42 “Uo, nun nai Allah, nundi kan damai mali kupedi, kandi peipsemum upu cap, kan pel cap, tali lupra yanipra tamnupe. Ukupepa, Allah kandi nun mali kunup keca yumada, pio men daemdoserume. Tupa tenenapu kurume. 43 Nunda kandi domembasememdi, nun mali kunup keca wenemna tep, popra tamserume. Allah kandi nun tep, bicau teneramsemum ngeda, pio inipromumdi nun damaida, kan yupu deriserume. 44 Allah kan yuda ukupmanto, nun damaida, ila dua bum topra yaredi, yana dekperamretopu kupsemempa, nundi kan tep, “Melipserume,” pepra, morokepe ngeda, kan damai pio men yakarure.

45 Allah kandi nun tep nengeda, mali kweipsemuma deiki di, nesala ban-ban yuma disenungai di, tali bam keca tamamenga utopu kupra tapsemumpa, nimi yumadi, ‘Uo, sunda tek sisi mali neng, lyun keca utopu kununge’ tenen, disenunge. 46 Nun dana-dana tara kunung podan nesala yumadi nun tep, malya nenemsengedi, nalepra autusenunge.

47 Atep nengeda, nun damai pio ikin keca yaudi, malipu kweipseua deiki di, nyekra yawa poptapseupa, kware kuserepa nun kwar-kwara deiki dipapu kupepa pesenunge. 48 Ne asi meda, ila me embaramretopu kunerure. Ada, ne mutu nesala yumada, pio yawa popra tapudi, gum kupropka tep kunerure.

49 Neda ton tamna gum dipapu, tupa-tupa pio engenapu kunkamne. 50 Ukuramnepane, ne nai Allah kan im deiki kumemnyai di, nun ikin weik kunupnge tep, epra kael kepkamsereme. Kael kepsememnyopda, ne asi me dim pepnetue.

51 Nun kaber nerapuda, yu nengdi mali kweipya tep, anerapu sun ikin weik kungenge yuma epnyopda, ne dipru neitamaida, mali kange dounedi, ne dipru pio pu jenerure. 52 Neda mali ton men kupmanepapu, ne podan nengdi, tupa epra domnapu kunenunge. Ukupmantoda, bura kuramre ma tep, nimidi, ‘Ama popkamap’ tenen, domameng utopu, ne pona tep neng peda, utopu kunenunge.

53 Ne podan nengdi, neda tomopra bunkwan me tep paliami dinin, me cepramudi, gelal sepropu pumbonda, ne nong dopra gam kepman dokotepnei. Dokotepneia di, deikida, gel di dopra kepdongoprapneidi, popneiye. 54 Bunkwan me paliami pumbon dongopneipa weksi pangeda, me deipra welepudi, ne giso damaida banapneue. Ukupneuopda, “Neda depnapu kupkune,” pepsi. 55 Neda depmanto kupsi dinin, ne nai Allah Yahweh, neda bunkwan me paliaminge pumbon weksi taruda, kan tep, “Uo naio, kandi melipneo,” pepra, kan si deiki di moropkesi.

56 – 57 Nedi Allah kan tep pio moropsi. “Nedi kan tep moropkesi ngeda, kan amul kinidongona gum dinin, kandi gekepra melipnerume,” pepra moropkesi. Tonda, nedi kan tep, “Melipnerume,” pepra morokesi ngeda, gekepnemumdi ne damai yanemume. Ukupmum dingeda, ne tep, “Kanda kwar dangna yapo,” pepnemume. 58 Ne nai Allah kanda akeca-keca yuma talememdi, ila puto weik deiyo ngebo kuruma cadi, kandi ne ikin weik kuramsi ngeda, lepsisikra konum telep kupra deipnemume. Ukupnemuma deiki di, kandi ne nongda konum lyepropnemume.

59 – 60 Ne nai Allah Yahweh, ne podan nengdi mali keca ne damai kunung ngeda, kan konum dirume. Ada, sundi ne tep yu tenenengedi, ‘Angebo poptapkup’ tenen, upu sisingnenunge. Atep nengeda, ne nai Allah, kandi ne tamna kepromemdi, ne kunun nge yumada, ‘Telep kuramu do, gum do?’ tenen, upu lepsisiknerume. 61 Tonda, ne poryakanenge nengdi ne tep, malya pepra nalemnenung ngeda, Allah Yahweh kanda konum gekepmume. Sundi ne tep, ‘Angeboda ukupkamepe,’ tenenung ngeda, kan konum kael kemrume.

62 Ne poryakanenge nengdi ne pona tep, atumi komuni yumada, “Angeboda, nun songe cadi, ukupkupe, ukupkupe,” pepra, mali upu sisingnenunge. Ada, sundi ne pona tep, “Ukupmepedi popkamepe,” pepra, upu sisingnenunge. 63 Ne tepapu taru donmanengedi upu sisingnenung ngeda, ipna di dipra asisingmangepane irure. Ukungedi, sun bukmenge taru pe, tekra embange taru mut pena upu deiki di, ne tepapu nalepra autunenunge.

64 Atep nengeda, ne nai Allah Yahweh, kandi sun aneng yumada, akununga autopu kupra, sun peda weneprume. Sundi mali kuramneitopu kupra, kandi sun tep mali kweipkamrume. 65 Kandi sun tep wipdongopkurume. Ukupmempa, sunda dipru kika kuprepa, kange bongtona deikipu kunkamnunge. 66 Im alau deiki tara cap, amutu tuai tara cap, mutu neitamai kunung nesalada, ne nai Allah kan yu weik kupkerepa, kandi ne poryakanenge neng sun yuma tep, epra domembememdi, aneng yuma popra, pio gum kupra deipkurume. Im iriamu tara tuai mutu yumada, tenpu ngebo peda gam men kunkamnunge.