Lam 4 | XteSC | STEP | Nun nai Allah, kan mawa neng, Israel nesalada, emas leng-leng peramretopu, pio telep kurami dinin, emas leng-leng peramrenge urasin pio mali kupbaramretopu, anesala peda, tupa telep ton men kununge. Angetopu, Allah kan si eremna ati pumbon, moupra deiamepu urasin pio telep gelda, nun podan nengdi ange yuma dakra tapidi, bisi embana tep, gonga kemnaipu yamupra tapi. Angetopu, nun kaber neng yumada, nun podan nengdi ponapu kuramipa, sun yuma dana-dana tara bura saka bendopi.

Lamentations 4

Yerusalem mutu dakra tapu taruda, ila ikin keca yaupa doropu upu

1 Nun nai Allah, kan mawa neng, Israel nesalada, emas leng-leng peramretopu, pio telep kurami dinin, emas leng-leng peramrenge urasin pio mali kupbaramretopu, anesala peda, tupa telep ton men kununge. Angetopu, Allah kan si eremna ati pumbon, moupra deiamepu urasin pio telep gelda, nun podan nengdi ange yuma dakra tapidi, bisi embana tep, gonga kemnaipu yamupra tapi. Angetopu, nun kaber neng yumada, nun podan nengdi ponapu kuramipa, sun yuma dana-dana tara bura saka bendopi. 2 Pumun taruda, Sion ^{▼▼Sion – Sion mutuda, ada Yerusalem mutu ila ati arumpu dinin, amutu si Sionda, menop taru amutu tenpu tep uperami. Amutu sida butene dinin, amutuda tenpua.} mutu kurami kaber nesalada, pio telep, mambul neng kuramya cadi, sun kamoda kunumna weik keca, er si emas, telep kuramre utopu kurami. Dinino, ukutaruda sun kamoda, akeca kael nengdi gat tu dopra, tali gamne me mau dodiramengedi, gamne taru dakyopda, ‘Dakwapye,’ tenerameng utopu, nun ataru Sion mutu neitamai kunup kaber neng tep nengeda, nimi yumadi nun tep, ‘Dakwapye, sunda pio telep mambul neng pio gume. Gum kupmenga peda, dakwapye, nun songe,’ tenenunge.

3 Bura tara kuramre ner kamdi, er nyapu tep bicau teneramredi, moupra moum karerure. Dinino Allah er nyapu, Israel nesala tep nengeda, katawai mutu kuramre sanip mada, yu weik kuramredi, er ma du tali tapredi embaramretopu, ukutarada Allah er nyapu sisa, Israel nesala peda, yu kange doupra, sun nyapu tep pio malipu kununge. 4 Ada, sun nyapu yumada, moum telep kupra men karengepa, moum cap, me cap pio putanapu kununga cadi, jena gum deiki di, sun sipyal pumbon pio kalkal peramrepa, ukupra kuramenganen, sun anyapu yumadi, “Uo, nun nin yapu, nun jen pio putaserura cadi, nun jen ton karepserume,” pepra, engena deiki di moronung dinin, sun nin yapu cap, yuk neng capdi, sun jen ton pio men karenunge. Anyapuda denapu kununge.

5 Pumun taruda, sun isomka nengda, pio kunumna weik opkal, urasin mirin nge kenengamidi, pio telep-telep jen kecapu dopra, jeramidi sun urasinda, pio teleppu kurami dinin, ukutaruda anesala peda, jen putana tep kungedi, ‘Nimi tapmange jen keca akapmarepa, angepu dopra jepkup’ tenen, buru bisipu bangedi, jen keca bam-bama donongbangaipu epra banunge. Tonda, jen pio putaprepa, embandanmankapmengedi, puto boun kupre pangeda, nimi embarameng bisai-bisaipu denunge.

6 Ange yuma deiyoda ake. Ada, sun Israel nesala mali weik kuramipanen, siryada, Allahdi yu kupupa, sun menenga tep, er nyapu deikida, ila ikin keca deipupa dopropi. Ada talinge gume. Men taruda, Sodom mutu kurami nesaladi, pio mali weik kuramipa, sun deikida, ikin keca sun damai deiamupa, dopraminge deiki di, popra tapupa, sun yuma gawal daku. Ue tenpu tumi dipapu amutu kurami nesala yuma popra tapu. Ataruda, sun Sodom mutu kurami nesala pona tep nengeda, nimi sun buru deiki di, anesala tep ikin keca men karepi. Ange yumada, nimidi kuna gum dinin, Allah er pe buru di amutu nesala wenepra poptapu. Dinino, pumun taru Sodom nesala wenepu ngeda, yambul ikine pua. Ataruda, Israel nesala tep, Allahdi wenepkame ngeda, tek sisi ila ikine.

7 Men taru di talepra kuramsei nimi deiyo nengda, pio teleppu kurami. Ukupmantoda, pio lengamre keca, ngari ma kurun potong pio lek kuramretopu kurami. Ada, sun kun keca yumada, pio telep, dumsisipu kurami. Sun nong peda, pu jena gum cadi, pio putopu kupra, telepepu kurami. 8 Ukurami dinino, ataru sun urasinda uku di gaptaprepa miriramre kalum urasin utopu doupra kununge. Ange tep nengeda, sun bisi embange taruda, yuk nengdi, ‘Sun aneng embanmanga’ tenen, men kael kemnunge. Sun bol urasinda pio tumakropudi yopu palepropka deiki di, sun urasin mali kupu. Sun nong bolda, bol mali kupka tep, nimidi peingameng co kuna utopu, pio gelal sepropu.

9 Mar podanai di podanmankapnedi, ya di popmenge neng denungada telepe pua. Dinino, jen putaramrepa kunung nengda, pio kange mun deikipu kuramenganen denunge. Ada, sun wa peamenge nge nong men kuprepa, jen keca peda men jepmengedi, jen putarepa pio tep kange mun kange doupra kuramenganen, denapu kununge. 10 Allah er nyapu sun deiki yaupa dopropi ikin kecada, pio kange mun nge kupupa, adeiki di sun nyapu derirami nerapuda, nimi men kuptenge keca, pio malinge kununge. Ada, yu weik nengdi Allah er mawa nesala tep, popmengedi anesala yuma gawal dakmenge taruda, Israel nesala yuma, sun jen keca pio gum kupka tep, pio kange mun kuprepa, sun Israel nerapuda, dipru boun nerapu kurami dinin, sun pe meneng nyapupu popmengedi, gapmengopda jenunge.

11 Israel nesaladi pio mali weik kuramya tep, Allah er yu pio weik kupupa, ‘Sion mutu cap, amutu kunge nesala yuma capda, tenpunge peda men tapkune’ tenepudi, go karepupa, sun podan nengdi uku sekipa, amutu yuma uku di jepra gawal dakropu. Akati-akati yumada, ‘Ati puto kupkamre’ tenen, ati iriamu tara deiami gel peda uku jepropupa, sikkepu bukra tapu.

12 Ukupu pangeda, sun ila nimi deiyo talepra, Raja-Raja kurami neng cap, yuk mutu nesala ban-ban yuma cap, kuramidi tenerami ngeda, ‘Gume, Yerusalem mutuda, nimi podan nengda, tenpu ngebo peda, Yerusalem mutu ila ati arum dopra kuramyaida, tek sisi pio men wekra betenge,’ tenerami dinin, ange konum kupidi bisbisa kapra gawal dakropi.

13 Utenerami dinino, Allah er pedi go karepupa, angeda tek sisi konum kupu. Allahdi amutu yuma gawal dakunge deiyoda, ake. Ada, sun imam-imam neng cap, Allah upu lap perami neng, sun nabi-nabi neng cap, sun pio mali weik kuramya deiki dia. Sun amambul pel talepra kurami nengdi, mali men kupman neng dinin, telep dumsisi kuna neng ton, Yerusalem ati arum neitamai di, tali lupra poramya tepa. Sun atelep neng, sun yapi embaramnga menenga tep nengeda, Allahdi amutu gawal dakropupa, akange mun keca yumada kupu.

14 Ataru neitamaida, asuru puamre nengdi, kopra tali bisi embaramengtopu, sun imam neng cap, nabi neng capdi, tali bisipu embanmai. Deiyo men kwapmaupapu, sundi dumsisipu kurami neng poramipa, sun pe kemami opkalda yapipu palepupa, yuk neng yuma epidi, ‘Gume, aneng sun bol cap, sun opkal capda, telep nengdi men bepmanto kunmanga cadi, sun damai men betepe’ tenen, yukaipu keprapidi kunmai.

15 Atarupuda, bisi embanmai nengdi, sun imam neng cap, nabi neng cap tep, upenmai. “Atamna yakana meme! Anengda, sun nong deikida, men bepmanto keca, pio mali keca yapi akapmara cadi, aneng sun damai bana gume. Sunda bendopso, nun damai yakana meme!” perami. Tupa mali men kurami nengdi aupu peramya cadi, uperamipa amutu talepra kurami nabi neng cap, imam neng cap yumada, Israel nesala kurami mutu di tapra, bura saka bendopidi, yuk karen mutu neitamai di, tali embanapu kurami. Embanapu kurami pangeda, yuk karen mutu kurami nesala epidi, sun ton uperami. “Sunda nun song cadi, nun mutu neitamaida, sunda pio sika di mana gume. Nun mutu neitamaida, tek sisi men kunkamrume,” perami.

16 Ada tali tep gume. Deiyoda, Allah Yahweh, er dipapu, aimam neng cap, nabi neng cap enepra donokupa, sunda yuk-yuk mutu neitamai embanapu kurami. Allahdi aneng yuma tep, tupa men kalengkamrure. Tonda, sun mali weik kurami imam pel dona neng cap, Allah upu lap perami nabi neng cap, amutu talepra upu perami neng cap, menop taru nimi deiyo kepra kurami dinin, Allahdi anesala wenepu taru di dipra dortaru yumada, yuk nengdi sun tep, ‘Anengda nun song,’ teneramidi, “Sunda nun deiyo neng cadi, telepe,” pepra, men peramidi, aneng tep gispal ton men dorami.

17 Akange mun kange doupra kuramepu taruda, nun tupa gam kuramepu Israel yala nesaladi, ‘Yuk mutu nengdi, nun melipkamseng do?’ tenen, tupa-tupa kaleka dinapu kuramepupa, nun asuru pu jeramseue. Dinino, tali tepapu kaleka diramupu. Deiyoda, ‘Sun melipra lyepropkamseng ja,’ teneramepu mutu neng yumada, nun tep men yana melimamseie. Yuk-yuk mutu nesala, tenpunge peda, “Tonda yuk nesaladi, nun tep yana melipkamseng ja,” penup dinin, sundi ton men yana meliamseie.

18 Nun ati di gupsaka bisai ton men embanupe. Ada, gupsaka bisi embapyopda, ‘Nun podan nengdi popsenung,’ tenena tepa. Sundi tupa kalengnapu kusenunge. ‘Nun dena tep taruda, konum dam kepre. Nun dena tep tumida, konum nukpetepmupka cadi, atumi konum kupre do?’ tenen, kware kuramepu. 19 Nun nengdi nun tep, ‘Anesalada poptapra gawal dakamepe’ tenen, domembaramsei. Ada ukupmanto, ambun ma lakra embaramre ngeda, sik piriramre dinin, nun podan nengdi domsei ngeda, pirina gum dipapu menmena domembaramsei. Sun anengdi, nunda mutu dam tara embaramepu taru pe, tonda mutu kawatai mutu neitamaipu embaramepu taru peda, sundi nun tep dombanapu kuramseidi, nun damai yana popra tamsei.

20 Allah Yahweh, erdi, ‘Angeboda, nimi deiyo kepra, ne mawa nesala Israel neng talepra Raja kunkamre’ tenen, wepra deiamu ngeboda, nun podan nengdi tomopi. Nun Raja tep nengeda, nundi, ‘Gume, erda erepra nun deiki tara utopu kurepa, nunda er amutarapu kunkamepe. Er dipapu kalekra melimkamsere. Ukupseryopda, yuk mutu nesala yala-yala yuma, sun neitamai kupmepya peda, teleppu kunkamepe,’ teneramepu. Uteneramupu dinino, er peda, nun podan nengdi yana tomopi. Ada, nimidi tu pumbon ila bon palipmengepa, bura tara gam keca mangkau yakandenkapredi, atu pumbon sakrepa tomoramengtopu, tomopi.

21 Sun Edom mutu tara kurum nesala cap, Uz mutu kurum nesala capda, sundi nun tep, ‘E, walito, sun Israel nesalada konum ikin weik deiki di kununge,’ tenepra autuserum ngeda, amenda taru gum kupkamre ja. Ada, Allahdi telep taru go kareprepa, sun damai peda, ikin keca ton yarepa, doropkamrum ja. Sun peda, yu me jepmengepa, puto di pel doprepa, nong bananga maramengtopu kupkamrum ja.

22 Dinino, sun Sion mutu nesalada, sun pe mali kuramrumpa, adeiki di menenga keca, kange mun keca yaupa doroprume. Ataru neitamai di, sun podan nengdi, sun amutu kuramrum nesala ateng kuopidi, sun pe mutu tamupra deubeidi, ikin pel dimami. Dinino, sun wenemna taruda, konum sirya dakmanto kupre. Atep, yuk mutu nengdi tek sisi kange di ton cap, yuk mutu pio men doupra derirbenkamsenge.

Dinino, Allah Yahwehdi, sun podan neng, sun sida Edom tara neng tep nengeda, Allah erdi pio men kaukepredi, yu weika di wenemkamre.

Tonda, sun Edom tara nengdi, mali kuna weika di inipra kuramrume. Inipra kuramrum dinin, Allah Yahwehdi ange yuma dirura cadi, er dipapu sun mali kuna ngeda, lakepra deipseredi, wenepkamser ja. ‘Erdi men wenepkamser’ tenena gume.