Lam 5 | XteSC | STEP | Uo, ne nai Allah Yahweh, kandi karepsemumpa, nun damai ikin keca pio weik kusere ngeda epsemume. Kange mun keca weik kupseua deiki di, yuk neng yumadi, nun tep, ‘Sunda telep neng,’ men tenesengedi, tupa gispal men dosenunge. Atep, kandi nun tara diryasememdi, nun tep ikin keca deipra mali kudisenung ngeda, kandi konum dirume.

Lamentations 5

“Bicau tenepsememdi, kange di ton cap telep kweipkamserume,” pepra, Allah tep moropi upu

1 Uo, ne nai Allah Yahweh, kandi karepsemumpa, nun damai ikin keca pio weik kusere ngeda epsemume. Kange mun keca weik kupseua deiki di, yuk neng yumadi, nun tep, ‘Sunda telep neng,’ men tenesengedi, tupa gispal men dosenunge. Atep, kandi nun tara diryasememdi, nun tep ikin keca deipra mali kudisenung ngeda, kandi konum dirume. 2 Nun nai yapudi talerami kecada, nun tep karepsetenge dinin, nun dopropmanto keca yumada, yuk mutu neng dipapu dorosenunge. Nun mutu sisa neng, nun tara nengdi gum dinino, nundi men kael keamupu nimi bo neng, sun dipapu nun ati cap, nun bung keca yala-yala yuma cap, yana doronunge. Sun aneng dipapu doronunge.

3 Nun podan nengdi, nun nai yapu yuma konum popropseiya cadi, ataruda nun nin yapuda, solu nerapu utopu kununge. Nun nai yapu yumada, konum popipa depya tep, nunda lyan nyapu kunupe. 4 Nun jen keca cap, me cap, nun uku dongona co cap yumada, kunumnapu kunupe. 5 Nunda sapi bisam dopra, er kum dam dinin, bali tara deiki, ikin co deipmengedi, tapu gerekdongopmengepa, ikin pel doramretopu kunupe. Ada, yuk mutu nengdi nun tep, “Sunda, nun pelpu tali dopseso,” pepra, ikin pel dimnapu kusenunge. Dipmasengepa, pel donmapyopda, pio puto boun kupmaserepapu, sundi nun tep, “Pel donapu kunkurume, beipye peingna pio meme,” pesenunge.

6 Ikin kange doupra kunupa cadi, nun jen kecada, metekanunpu kupsere. Atep, nunda Mesir mutu nesala kori bepedi, jen keca roti kwaneng bena benepra jenupe. Angetopu, Asyur mutu nesala kori peda bepedi, jen bena moropra jenupe. 7 Uo, menop taruda, nun co puna neng dipapu mali kurami. Dinino, sun yuma deiamipa, ataru yuma peda, sun gam tupa men kununge. Ada, gam tupa men kununga deiyoda, sun pe mali kuramya menenga deiki di konum depropi. Depropi dinin, nun ataru tupa gam kunup nengda, sun men taru kurami nengdi, mali kuraminge tep, menenga keca dopronupe.

8 Nun co bo deiki di kunupmepupa, nun pel melipra doramsei nengda, sundi tamupra nimi deiyo kepra talepseidi, nun tep ikin pel dimnapu kusenunge. Sundi nun tep talepseidi kusenung ngeda, yuk nengdi melipra men lyepmanto kusenunge. 9 Amutu ati arum dopra kupyai di, mutu katawai tara jen keca kirbepe taruda, akatawai mutu neitamaida, nun podan nengdi yana, nun pona tep kalekmasengadi, ya dopra potamsenunge. Atep nengeda, amutu katawai di, jen keca tep erbanada, pio kware kuserure.

10 Tonda, nun jen kecada, tupa putanapu kuserure. Ukuserya deiki di, nun bol peda, uku jenmaredi bupu weik kuramretopu kuserure. 11 Yerusalem mutu neitamai kunung nerapu, nun pe dopmepu nerapuda, nun podan nengdi, nun posenge tara nengdi, upula dopra kikiman manunge. Ange utopu tonda, Yehuda mutu neitamai kunung kaber nerapu peda, nun poryakasengedi, yana upula dopra, kikiman manunge. 12 Nun tep deiyo kepra talesenung neng yumada, nun podan nengdi tomopra dubengedi, co deiki deipra gerekotepmengedi ponunge. Nun podan nengdi, nun deiyo kepra talesenung wisi-wisi neng, upu pesenge deiyo neng tep, “Sunda tali neng pua, nun songe,” pepra, gispal ton pio men donunge.

13 Nun nyapu kaber nengda, gandum du taingne pelda, ila ikin ngepu dimengepa pel donunge. Tonda, nun nyapu kaber nengda, uku dongon co tep, ila-ila co koupna eremangepa, saka porepa boun kurure. 14 Nun tara wisi-wisi nengda, ton cap ila ati arum dopra kuramupu buplan damaida, mambul upu sisingna tep, pio men bupra wengbanunge. Tonda, akati arum neitamaida, nun tara kaber nengdi, bung-bung pena doungepa lelim perepa, mut ton men pengepa, men gekenupe.

15 Nun kange dipru neitamai telep kuramseu ngeda, konum gum kupra deipseupa, dipru pu jeserure. Ange utopu, kange deipra mut semamupu ngeda, tamupra mali kange doupmupu di, engenapu kunupe. 16 Men taru nunda eremna nesala utopu kuramepupa, nun mutu kurami nesaladi, nun tep si eremdiramseidi, gispal dona tep, urasin telep keca, er si mahkota, nun giso deiki deriramsei. Dinin ukutaruda, nun pe mali kuna menenga di, akeca sakupa, nun damai ikin keca yaupa dopropmepu. Cadi, sundi nun tep men si eremsenunge. Konum tapsei.

17 – 18 Sion mutuda, nesala ton men kununga cadi, konum tapipa, ati walang yopu kupudi, pio dim bulung pepu. Ukupupa, bura tara kuramre yu kampu kungedi, embadanapu kununge. Ukungepa, nun dipru pio pu jeserure. Tonda, nunda engenapu kupepa, nun asi me embadoseredi, nun asuru yumada, konum pupseue.

19 Dinino, nun nai Allah Yahweh, kandi nun tep, pio puto di talepsemum utopu, dorkunkamre taru yuma peda, Kandi nun tep pio talenkamsereme. Akeca-keca yuma talepra kunkamrem ngeda, pio tep akunkamre. Pio gum kupmanto men kurure. 20 Ange tep nengeda, nun nai Allah, kandi nunda ware keca deiyo tep, ataru neitamai yumada, pio tapsemum do? Kandi nun tep, pio konum luprosemum do?

21 Uo, nun nai Allah Yahweh, nunda kan damaipu tamupra duyasemempa, yapedi, yana kikimanpu kunkamepe. Angeda pio putaserure. Kandi nun tep pumun taru telep kupra deiamsemumpa kuramepu utopu, ukutaru peda, telep kupra deipsemempa, teleppu kunkamepe. 22 Ange gum dingeda, nun tep kandi pio tapkamserem do? Kandi nun tep, yu weik tenepsememdi, deremserum ngeda, men taptum do? Pio akunkamre do?