Lev 1 | XteSC | STEP | Allah Yahweh cap, nimi cap, antamdina tep, opkal bol di keana dodin tenda ati dominge neitamai di, Allahdi Musa tep, “Ne damai yankurume,” pepra,’ upupupa, yau. Yau pangeda, Allahdi, ‘Ne karena tep nengeda, ukunkamrume, angeda karenkamnerume,” pepra Musa tep lap pepra deipu.

Leviticus 1

Allahdi, “Israel nesala yuma, sun mali kunge kecada, ‘Allahdi kaukepkamser’ tenen, gam keca popra uku dongona tep, pepu upu

1 Allah Yahweh cap, nimi cap, antamdina tep, opkal bol di keana dodin tenda ati ^{▼▼tenda bol di dopi ati - Pumun taruda, Allahdi sun Israel nesala tep, “Ne karena tep, sapi bisam bol di keana dodin ati dopkamnerume,” pepu. Akati deiyoda, Allah Yahweh er si eremna cap, Allah cap nimi cap antamdina cap tep, dopi. Tonda, Allahdi Israel nesala, sun mali kurami keca kaukemna tep nengeda, akati damai cap, akati pumbon capda, Musa cap, yuk imam deiyo neng capdi, gam keca popra, uku dongorami. Tonda, agam keca popnepa, imam nengdi yapi doupra akati pumbon neitamaipu, yana Allah karerami. Ange yumada, atenda bol di dopi ati damai cap, akati neitamai capda, apel dorami. Amenmena keteneiami ati sida, Kemah Pertemuan, perami. Amenda taru Allah er karena cap, er si eremna cap tep, yuk weik ati dopi. Akatida, Yerusalem mutu neitamai ton dorami. Adorami atida, ila gel di dorami. Akati sida, Bait Allah perami} dominge neitamai di, Allahdi Musa tep, “Ne damai yankurume,” pepra,’ upupupa, yau. Yau pangeda, Allahdi, ‘Ne karena tep nengeda, ukunkamrume, angeda karenkamnerume,” pepra Musa tep lap pepra deipu. 2 Upepu dingeda, aupu ton dukdongopra pepu.

Apeipne upu yumada, sun Israel nesala yumadi, moupra talepmengedi, ne pepsenetopu kunkamnunge. Dan taru do yuma, Israel nesala kankan neitamaida, tenpu-tenpu nengdi, ne Allah Yahweh karena tep, ‘Gam keca doupra bena karepnepa, popra uku dongopkunge,’ tenepre ngeboda, er peiramre keca neitamai, sapi bisam do, domba bisam do, kambing bisam do, uda ma do, ange dipapu doupra kareryakankamrure.

3 Tonda ukupmanto, tenpu ngeboda, ‘Allahdi ne mali kune keca yumada, kaukepkamner’ tenen, gam keca popra karepnepa, imam ngebodi ange yuma uku dadongopkamre,’ tenepre dingeda, jem sapi bisam dopra, bena karepkuryopda, beta enepetepredi, pio bol telep sapi bisam galemnapu duyakankamrure. Bol malinge ton duyakana pio gume. Asapi bisamda, bol telep ngepu doupra, Allah Yahweh cap, nimi cap antamna tep tenda opkal bol di dopi dodina ati wengbana tep, bisi buplan damaipu doupra yana derinkamrure. Ukupre ngebo tep nengeda, erdi dopra deipkamre keca tep nengeda, Allah Yahwehdi akeca deipkamre ngebo tep, kange pio derinkamre. 4 Tonda, ukunkamenge. Ne tep karenkamneng keca yuma doupra yana deipyopda, angebo er buruda dopra, agam keca er giso deiki deipyopda, ne Allah epnedi, ‘Telepe, ayana karepmaner ngeda, angebo er pununa tep, dopropne. Ada, angebo er mali kure keca wenemna tep, tali poptaptene dinin, er kaukemna tep, angebo er pununada, agam keca dopropne,’ tenenkamnune. Ne Allahdi kange deipra agam keca doronkamne. Ukupne dingeda, angebo er mali kwamre ngeda, adipapu daeptapnedi, angebo tep, telep kupra derinkamne.

5 Ukupyopda, angebodi er sapi bisam adipapu ponkamrure. Ada, ne Allah Yahwehdi dinkamna cadi, ne damai utopu agam keca ponkamrure. Popyopda, asapi bisam er yapi dopra, Harundi deiprepa, dadeipdanen bankameng neng, sun imam-imam nengda, ada Harundi deiamu nyapudi ayapi doprapmengedi, ne Allah Yahweh tep karenkamnenunge. Ada, Allah cap, nimi cap, antamna tep tenda bol dodina ati, er urasin damai tarapu karepkamnenunge. Angeda ake, sun imam nengdi, agam keca er yapida, doroprapmengedi, autopu gam keca popra uku dongona tep, gel pala di yakra keteneiamrumai, agel er kumun damai dana-dana tara bena dingdeirinkamnunge. Agel yakra keteneiamrum ngeda, Allah cap, nimi cap antamna tep, adodina ati er urasin damai tarapu dingdeirinkamnunge. 6 Agam keca doupra yare ngeboda, er pe dipapu popredi, abisam bol kopra deipyopda, asapi bisam er nongda sekra, yuk-yuk galepra deipredi keteneipkurure.

7 Ukupyopda, agam keca popmangenge yana uku dongona tep, apel dona deiyo neng, Harundi deiamu neng, sun imam-imam nengdi, ‘Allah karena tep, gam keca popra uku dongonkameng’ tenen, gel pala taplakra yakra, keteneipyaipu bena, adipapu co lelepra deipmengedi, akecada uku sekamenge. 8 Uku sekmengepa, jere pangeda, adeiki uku bu di akecada jedonkamrure. Ada, apopmare gam keca sesekra, yuk-yuk deipmare ngeda, abisam giso cap, tonda, er meta cap yumada, sun aneng dipapu doupra bengedi, uku bu belenmaredi, jenmarya deiki bena, deipra dankamnunge. 9 Ukunkamnung dinino, apopmare bisam er yan tu cap, deiplyu deiki paleramre meta capda, er angebo dipapu doropra, me kuprapredi, telep kupra ketenemdinkamrure. Apel dopra keteneipre pangeda, Allah cap, nimi cap, antamdana tep, opkal bol di keana dodin tenda ati neitamai pel dona tep neng, sun imam neng dipapu, aketeneipmarenge dopra, gel pala di taplakra yakra keteneipyaipu bena, uku dongoprepa, ange yuma uku jepredi, siltong telep ngeda, Allah Yahweh damai welerepa, gekepredi, er kange telep kunkamre. Akecada, Israel nesaladi, ‘Nun mali kunup keca yuma Allahdi kaukepkamser’ tenen, gam keca popra, nong yuma dopra, uku dongonkamnung kecada, Allah er tep, akeca karerbengepa, er dipapu kange derinkamrure.

10 Ware ngebo do, erdi, ‘Allah Yahweh tep, ne mali kune kecada kaukepkamner’ tenen, Allah er karena tep, ‘Sapi bisam do, kambing bisam do, karepkun,’ tenepyopda, jemnge bol pio telep bisam jemngepu karenkamrure. Ange utopu, bol mali douamre domba bisam do, kambing bisam do, angeda karena pio gume. 11 Ange konum doupra yaryopda, angebo adipapu, abisam dopra, Allah Yahweh, er damai di ponkamrure. Abisam popkure tarada, ‘Gam keca popra dana tep, gel pala di taplakra yakra ketenepra deiprumai dinin, utara di, bena ponkamrure. Popre taruda, ne Allahdi dinkamnune. Ne dine taru konum popre pangeda, Allah cap, nimi cap, antamdana ati pel dona deiyo neng, sun imam-imam nengdi, abisam yapi emberenge dopra, yapi keca uku dongona tep ketenepra deiyamumnya, kumun damai dumbari dana-dana bena, dingdeirinkamnunge. Ukupmengopda, ayapi dourbena agel pala deiki palepkamrure. 12 Ange konum kupmengopda, agam keca popra konum sekra deipyopda, ‘Ange ton doropkune,’ tenepretopu doropredi, yuk ketenepra derinkamrure. Aketenepra derinkamraida, ake. Agam keca, er giso cap, tonda er meta cap, er nong yuma capda, ketenepra deiprepa, Allah Yahweh cap, nimi cap antamna ati pel dona deiyo neng, sundi yapi keca popmengedi, dopra dubengedi, dana tep, gel pala di taplakra yakra ketenepra deipyaipu bengedi, uku sekmengepa, uku bu co jenmarya deiki di, bena derinkamnunge.

13 Dinino, agam keca popmare ngebo dipapu, abisam er yan tu yuma cap, er deiplyu yuma capda, er angebo dipapu, doroprapredi, me kuprapredi, telep kupra ketenemdinkamrure. Ukupra ange yuma konum pel dopra keteneipre pangeda, Allah Yahweh cap, nimi cap antamdana tep, opkal bol di dopi dodina ati neitamai pel dona neng, imam-imam neng sun deiyo ngebo dipapu, aketeneipmare keca dopra, uku dongoprepa, ange yuma uku jepredi, siltong telep ngeda, Allah Yahweh er damai welerepa, gekepredi, Allah er kangeda, pio telep kunkamre. 14 Tonda ukupmanto, tenpu ngebodi, ‘Gam keca popra karepnepa, Allahdi ne mali kune keca kaukepkamner’ tenepyopda, gam keca yala dinin, ‘Ma doupra Allah Yahweh tep, kareryankune,’ tenepredi, ma duyankure ngeboda, Be ma do, yal ma utopu ma do, mi ukupu deipmarenge, ukupungepu doupra, kareryakankamrure. Ada, pio bol telep douramrenge ngepu kareryakankamrure.

15 Ukuprepa, Allah cap, nimi cap, antamdana ati pumbon pel dona deiyo neng, sun imam-imam neng kankan, tenpu ngebo dipapu ama poprapredi doupra, gam keca popra Allah karena tep, gel pala di yakra ketenepra deiprumai bankamrure. Doupra bere dingeda, ama kum talepnurupredi, bupatek taleprepa, kum yo copyopda, denkamrure. Ama er gisoda, yapi keca dana tep, ketenepra deiprumai dipapu uku dongonkamrure. Tonda, ama er yapi embare ngeda, Allah karena tep gam keca popra uku dongona tep, gel pala di yakra keteneiprumai, er si mesba damaipu bena, ama acapu deipmumpa, ama yapi sakredi, gel pala di yakra keteneiamrumai, er kumun dampu, dana-dana tara bena, adeikipu dikeipmengepa, palenkamrure.

16 Ma giso uku jepmarya, er nong konum damai deriramrenge cap, tonda er deiplyu cap, potong cap, ange yumada, adipapu dopra, Allah Yahweh karena tep, gel pala di yakra ketenepra deiprumai, er si mesba damai dinin, sikke lukra dokotemrumai, keteng yakan tarapu bena donkamnunge. 17 Tonda, imam ngebodi, ama er pol potong siriknge dana-dana tara talepredi, lyengdonkamrure. Dinin, er potong lyengne taruda, bouna di moupra lyengkamrure. Puto di lyengdenkapredi, ‘Potong tupa kuna cap, dila kuna cap kuprur,’ tenena tep, ukunkamrure. Imam ngebo ukupre dingeda, ama er nongda, adipapu yapi keca dana tep, gel pala yakra ketenepra deiprumaipu, dankamrure. Ukuprepa, er nintong telep ngeda, Yahweh gekepredi kange telep kunkamre. Ange pel donkamrenge yumada, ‘Allahdi, nun mali kun keca kau kepkamser’ tenen, uku dongopmengepa, ange yuma uku jepredi, siltong telep ngeda, Allah Yahweh er damai welerepa, gekepredi er kangeda pio telep kunkamre.