Lev 10 | XteSC | STEP | Tenpu taru ton, Harun er nyapu butene, sun sida, Nadab cap, Abhiu cap, sundi uku sengna tep, buru di talerameng lungna keca, er sida perbaraan, ange ketenepra deiami ngeda, sun aneng bereidi, bena doproprei. Doproprei dingeda, akeca deiki yuk-yuk uku sekreipa, jeu pangeda, Allah Yahweh karena tep, siltong telep keca uku dongoprei. Ukuprei dinin, asiltong telep keca uku dongoprei ngeda, Allah Yahwehdi sun tep, “Sundi ange uku dongoprerumdi, ne tep akecada karepkamarerume,” men pepu. Allah Yahwehdi, ange tep, “Telepe,” men pepka cadi, sundi uku sekra, asiltong telep keca dongoprei ngeda, Allah er tep yanina utopu kupreidi, pio mali kuprei.

Leviticus 10

Nimi si Nadab cap, Abhiu cap, sundi mali kuprei upu

1 Tenpu taru ton, Harun er nyapu butene, sun sida, Nadab cap, Abhiu cap, sundi uku sengna tep, buru di talerameng lungna keca, er sida perbaraan, ange ketenepra deiami ngeda, sun aneng bereidi, bena doproprei. Doproprei dingeda, akeca deiki yuk-yuk uku sekreipa, jeu pangeda, Allah Yahweh karena tep, siltong telep keca uku dongoprei. Ukuprei dinin, asiltong telep keca uku dongoprei ngeda, Allah Yahwehdi sun tep, “Sundi ange uku dongoprerumdi, ne tep akecada karepkamarerume,” men pepu. Allah Yahwehdi, ange tep, “Telepe,” men pepka cadi, sundi uku sekra, asiltong telep keca dongoprei ngeda, Allah er tep yanina utopu kupreidi, pio mali kuprei. 2 Atep, Allahdi men peipmaunge kupreia tep, Allah Yahweh er dinmaua cadi, uku dokotepupa, sun aneng nong deiki uku bu di talepudi, abutene neng jepropu. Jepropupa, Allah cap, nimi cap atamdana tep, opkal bol di keana dodin tenda ati deiyamyai damaipu, Allah Yahwehdi dinmauai, acapu sun butene nengda deprei.

3 Ukupka tep, Musadi Harun tep pepu. Autopu ngeda, ‘Sun damai kupserur’ tenen, men taru Allah Yahwehdi konum pepra deiamseue. Allahdi pepu upuda ake.

“Ne si eremna ati pumbon pel donkameng neng yumada, ‘Uo, Allahda, tek sisi pio ila lengna ngebo kurure tenepra, kael kepkamenga’ tenen, ne kune keca benbenepnepa, epkameng ja. Neda, mali keca tenpu peda, men kunerura cadi, neda ila lengna ngebo kununa tep, sun peda, kael kepkamenge. Ne ila puto katuai kweipnepa, adeiki di, sun Israel nesala yuma peda, epmengedi, ‘Uo, Allah erda, tek sisi pio telep, ila lengna ngebo kurure’ tenen, kael kepkamnenge.” Musadi Harun tep, “Allahdi aupu peiamseu,” pepu. Upepu dinin, Harundi tamupra upu ton men pepu. Dim pepnapu kupu.

4 Atarupuda, Harun er mambo Uzieldi deiamu nyapu butene neng ton, sun sida, Misael cap, Elsapan cap tep, Musadi kongpepu. “Sunda, ne damai yankurume,” pepu. Upepra kong pepupa, konum yarei pangeda, upepu. “Sundi sun neiki yapu buteneda, Allah cap, nimi cap, antamdana tep, tenda opkal bol di dodina ati buplan damaipu depmarenga cadi, sun adipapu abutene neng, aca dipu, sun nong dopra, nun Israel nesala tenda opkal ati deiyamupkai di, bura tara pio yukai derirbenkurerume,” pepu. 5 Upepka cadi, Harun er nyapu butene nengdi, akati buplan damaipu yareidi, sun neiki yapu, adepmarei nengda, sun nong dopra, Israel nesala kuramyai di, bura tara duberei. Ada, Musadi sun tep, “Ukupkurume,” peiputopu kuprei. Abutene neng deprei taruda, Allah er si eremna ati weka pel don taru, imam-imam neng kemna tep lyom opkal, nong deiki tara ngeda, tupa akepmareitopu depmareipa, Misael cap, Elsapan cap epreidi, aneng sun nong dopra, alyom opkal pumbon di geteprapreidi, Israel nesala kuramyai dinin, bura tara duberei.

6 Ataruda Musadi, Harun er nyapu butene neng tupa gam kunmarei nengda, sun si Eleasar cap, Itamar cap, tonda Harun cap, sun yuma tep, upepu. “Uda, nun Israel nesaladi, nun kayapu neng depmengepa, kuramnuptopu men kunkamrume. Ada, sunda, sun weit yapu adepmareng neng butene engena tep, kurumumdi, ‘Uo’ tenen, mali kange doupra, sun kenengamum opkal gweleprumudi, men engenkamarurume. Tonda, sun potong touna gum di tapmumpa, men du mounkamserure. Apepmasen ngeda, tali tep men pepsene. Deiyoda, sun kayapu nengdi, pio mali keca kupmareipa, Allahdi wenepra popmaua cadi, sundi ne peipmasen upu men gekeprurumnyopda, sun weneri cap, Israel nesala yuma cap, nun yuma peda adipapu depkamepe.

Tonda, sundi ne peipmasen upu men gekepmarumu pangeda, Allah Yahwehdi nun Israel nesala yuma tep, yu tenepkamsere. Dinino, sun yala neng cap, sun yuk Israel nesala yala-yala yumada, sun adepmareng neng tep, ‘Uo’ tenen, mali kange doupra kungedi, engenada telepe pua. Adepmareng nengda, tali men depmareng dinin, Allah Yahwehdi uku dokotepmarpa, jepmara deiki di depmarenge. 7 Tonda, ataruda sun gam tupa kunmarum imam nengda, Allah Yahweh cap, nimi cap antamdana tep, tenda opkal bol di dodina ati wengbana tep, buplan damai di tapra, bura tara yuk-yukai bana gume. Bura tara bemumnyopda, sun peda adipapu depkamarume. Deiyoda ake. Sun weneri neng tep nengeda, nedi, ‘Sun anengda, Allah Yahweh er ati pumbon pel donkameng’ tenen, konum wepra deipmasendi, apel gonga kemna tep, minyak me sun giso deiki konum dikra deipmasena tep pepsene,” Musadi Eleasar cap, Itamar cap, Harun cap tep, pepu. Upepupa, sun aweneri neng gekepidi, Musadi, “Ukupkurume,” peiputopu, sun yuma akati damaipu kunmai.

Imam-imam neng, sun pel dona tep, “Apeipsen ngepu kupbankamrume,” pepu upu

8 Allah Yahwehdi Harun tep pepu.

9 Harun kan cap, kandi deiamum neng, kan nyapu cap, sun yumada kange yawaramne anggur me yunge do, yuk yala kange yawaramne me do, jeprumu taruda, ne Allah cap, nimi cap antamdana ati pumbonda, pio men wengyakankamrume. Apepmasen upuda bisipmumdi, yaniptapra men gekepmumdi, tali lupra akati wekmumnyopda, sun adipapu depkamrume. Aupu peipsen ngeda, sun cap, sundi deipmumpa, dadeipdanen bankameng neng, sun imam-imam neng cap yumada, pio men tapkamrume. Aupupu peipdanen bamumdi, pio talepra kunkamrume. Aupuda, pio men tamkamrume. 10 Tonda, sun dipapu, ‘Allah erdi, ‘Telep ngeda ake. Ne damai men yanmanto ngeda ake. Ne mawa ngeda, ake. Tali akapmare ngeda ake’ tenen, moupra teneprumudi, wepra keteneipkurume. Tonda, Allah damai men deipmantonge, mali ngeda, ake. Allah damai deipmantonge, telep ngeda, ake,’ tenepra, mouprumudi, wepra keteneipkurume. ‘Akeca-keca yumada, utotopu kurure,’ tenepra, men kunkamrume. Tali kunada, pio meme. 11 Tonda, kan cap, kandi deiamum neng cap, ne Allah Yahwehdi, “Ange kunkamrume, ‘Angeda pio men kunkamrume,” pepra deipsisinge tep, Musa damai bena peipsi upu yumada, Harun kan cap, kan nyapu capdi, ‘Sun Israel nesala yuma gekepmengedi, kael kepbankameng’ tenen, sun gekenai tep peteremkamrume. Allahdi Harun tep pepu.

12 Upepu pangeda, Musadi, Harun cap, Harun er nyapu buteneda, Eleasar cap, Itamar cap, sun yuma tep aupu pepu.

“Jen keca, roti kwaneng dana deiyo keca, er sida, gandum do, tepung do, Allah Yahweh tep, yana karepmangenge ton, gawal tupa akapkamare ngeda, sun imam-imam neng dipu dopra jenkamrume. Ada, gam keca gum dinin, roti kwaneng dana deiyo keca, Israel nesaladi, Allah tep kareramenge ngeda, uku dongopkamrum dinin, tupa akapkamre ngeda, sun dipu jenkamrume. Tonda, atepung do, gandum do, yakung do, akeca doropmum dingeda, roti kwaneng nena deiyo keca, er si ragi tapangdongona gumnge ton, angepu jenkamrume. Aroti kwaneng jen keca konum dapra keteneipmum dingeda, yapi keca popra uku dongona tep, mesba ketenepra deipyai, amnyo tarapu bena deipra jenkamrume. Ajen kecada, Allah er mawange, pio lengna jen kecapu kurura tep, taliyaipu bena jena meme. Mesba damaipu bena jena telepe pepsene.

13 Tonda, aroti kwanengda, sun adipapu doupra bemumdi, mali keca men kapmaryai, pio telepaipu bena deipra jenkamrume. Ajen kecada, Allah Yahweh er karena tep, Israel nesaladi, kareryakanung jen keca tep pepsene. Aroti kwanengda, Allah Yahweh tep uku dongopra kareyakanung nge cadi, kan cap kandi deipmum nyapu dinin, Israel nesala karenkamnenge neitamai dipu dopra, sun apepmasen nimipu dopra jenkamrume. Aupu yumada, Allah Yahwehdi ne Musa tep, “Ukunkamrume,” peipneunge tep, sun Imam-iman neng tep lap pepsene. 14 Angeda, sun Imam nengpu jenkamrum dinino, Harun kan cap, kandi deiamum neng cap, nerapu cap, ada sal nyapu pe, ner nyapu peda, sun yuma jena tep nengeda, lap pepkusene. Ada, Israel nesaladi, Allah tep karepmengedi, Allah er din tarapu buru erepra doupmengedi, ‘Telepe,’ pepra, bena peterepkamenge nge peda, apel yuma konum dopmengopda, abisam taram tu cap, abisam yan kail dumsisi tarange cap doropropmemdi, yamempa kan cap, kan nyapsilip yuma cap, sal nyapu pe, ner nyapu nge peda, jenkamrume.

Angeda, Allah er kangeda, ‘Gume, akeca yumada, Israel nesaladi, ne tep kareryakankamneng, dinin, akeca yumada, sun imam-imam neng, sun jen nge cadi, Israel yala nesala yuma, sundi, ‘Nun cap, Allah cap telep kupra kikiman kunkamep’ tenen, doupra kareyanmange keca tep pepsene. Ajen kecada, taliyai men jenkamrume. Ange gum dinin, pio lengnai dipapu dubena jenkamrume. Tali yukai bena jena meme. Mali kun keca ton men kwamyaida, tali lupra jenkamrume. 15 Uda konum lap peipsisitopu, abisam yan kail tu dumsisi tarange cap, abisam taram cap, Allah Yahweh er karena tep, er urasin damai tarapu, Israel nesaladi, sun buru erepra doupmengedi, bena peterepmengedi, ‘Telepe,’ pepmenge pangeda, sun imam-imam nengdi akeca ketenepra sekra derinkamrume. Tonda, akeca duyakankameng tarupuda, abisam meta capda, adipapu doupra karerbankamenge. Israel nesaladi, akeca yuma Allah karena tep, adoupra bemenge dingeda, imam nengdi mesba damai bena uku dongonkamrume.

Dinino, abisam taram cap, dumsisi tara yan kail tu cap, meta capda, tupa kapkamre ngeda, kandi dopropkamrume. Abisam taram cap, dumsisi tara yan cap, meta capda, Harun kan cap, kan nyapu yuma cap, sun jena tep kupkamrure. Atep akeca yumada, dopra jenkamrume. Ada, men taru Allahdi, “Sun imam-imam neng cap, sun nyapsilip capdi, jenkameng kecada, ake. Sundi ukuramengtopu, sundi deipmengepa, dadeipdanen bankameng nesala yumada, ange utopu doryankamre taru peda utopu pio ukunkamnunge,” pepra deipseutopu pepsene. Allah Yahwehdi, ne tep aupu ne damai yana peipneua tep, lap pepsene.”

Aupu yumada, Musadi Harun cap, er nyapu cap yuma tep lap pepu.

16 Tonda, Musadi Harun cap, er nyapu cap tep, asipetepu. “Israel nesala sun mali kunung nge tep, ‘Allahdi kau kepseredi, nun malinge yuma pununa tep, Allahdi daepkamasere’ tenen, doupra yanmangu kambing bisamda, ware kupmarum do?” pepra asipetepu. Upepra asipetepupa, Harundi tamupra pepu. “Gume, angeda, Eliasar cap, Itamar cap, sundi akambing popra, uku dongopmarungu ngeda, uku di konum jepropu,” pepu. Upepupa, Musa aupu gekepudi, yu weik kupupa, sun abutene neng tep derepudi upepu.

17 “Uo, sun mali kupmarerume. Ware keca deiyo tep, Israel nesaladi, ‘Nun mali kupmapu ngeda, pununa tep, Allahdi kaukepra daepkamsere’ tenen, doupra yanmangu kambing bisam yumada, uku dongopmarumpa, uku jepmare. Akupmarum ngeda, telep gume. Telep ngeda, sun ton wilipra doropmatumdi, pio telepaipu, Allah er si eremna ati urasin tara, telep lengnai dubenmatumdi akeca jepmatum ja. Deiyoda, ake. Akambing bisam karepmangu kecada, Allah er kangeda, ‘Angeda pio lengnangepu kurure,’ tenerure. Tonda, Allahdi, ‘Alengna ngeda, sun imam neng sunpu jenkamenge. Imam-imam nengdi, akambing tu jepkamenga deiki di, Israel nesala sun mali kunge keca daepnedi, sun tep telep kweipkamne ja’ tenen, kareserure. Israel nesala akeca karepmangua deiki di, ‘Allahdi nun mali kun keca tep, wenepra poptapsetu dinin, akeca karepmepyopda, punupkamsere. Allahdi nun mali kun keca daepseredi, lyepropkamser’ tenen, karepmangu.

18 Akambing bisam yapida, Allah cap, nimi cap antamna tep, tenda opkal bol di dodina ati neitamai, Pio Telep Lengna Ati penupai pumbon, sundi doupra men benmarurume. Tonda, ‘Allahdi Israel nesala sun mali kunge keca daepkamser’ tenen, ayapi yambulanun buru di burupra, Pio Telep Lengna Ati pumbon, men gege pepmarume. Apel konum dopmatum dingeda, akambing bisam galemna yumada, akati bura tara dinin, akati urasin tara damai dubena adipapu jepmatum ja. Sun kaele. Nedi sun tep, ‘Ukupkamrume,’ pepra konum lap pepsisi dinin, sundi men kupmarerume.” Musadi Harun er nyapu butene tep, wenepudi, aupu pepu.

19 Musa pepu upu yuma gekepi dingeda, Harundi tamupra Musa tep pepu. “Teka atumida, Israel nesala yumadi, ‘Nun mali kunup keca pununa tep nengeda, Allahdi kaukepra daepkamasere’ tenen, kambing bisam doupra kareyanmaungue. Tonda, ange utopu, yuk gam kecada, karepmangupa, ne nyapu butenedi, ange dopra uku dongopmaurunge. Ange yumada, Allah er karena tep karepmangue. Allah Yahwehdi apel dopmangu keca yuma epmaue. Dinino, sun butenedi mali keca ton konum kupmarungu ngeda, ne mambul kange doupne. Atep ne ton asipetepkukene. Ne dipapu akambing tu karepmangupa, ne nyapu butenedi atu cap, yapi cap yuma uku dongopmarungu ngeda, nedi akambing tu yambulanun dopropmatenedi, konum jepropmatene pangeda, ange teptoda, Allah Yahwehdi, ange tep, telepe tenepnetudi, kange deipmanetu do?” pepra, Harundi, Musa tep asipetepu.

20 Harundi aupu pepupa, Musadi gekepu dingeda, ‘Uo, angeda tek sisi pepmare,’ tenen, kange deipudi aupuda tapu.