Lev 11 | XteSC | STEP | Allah Yahwehdi Musa cap, Harun cap tep, aupu pepra deipu.

Leviticus 11

Allahdi Israel nesala tep, “Yapi keca ton ngeda, jenkamrume. Ton ngeda, pio men jenkamrume,” pepu upu

1 Allah Yahwehdi Musa cap, Harun cap tep, aupu pepra deipu.

2 Ada sun Israel nesala yuma tep, aupu pepkurume. Tuai tara kunge gam kunung kecada, yala-yala weik kurure. Ton ngeda jena telepe. Ton ngeda men jenkamrume. Atep, tuai tara kunge gam kun keca neitamai di, tali lupra poprumudi, jeptum kecada lap pepkusene. 3 Ada, ware gam kure keca do yuma, sun yan gala, buru gala kapu kecada, neitamai di konum kwakupa, buru gala butene utopu kwamre ngeda, tonda agam kecada sun jen jepmangedi, dakunmanganen, amenda taruda, mundu kange di weleprepa, kange di ton cap jenunge. Akure gam keca utopunge yumada, sun Israel nesala yumadi popra jena telepe pua.

4 Dinino, yuk yala keca, gam kure keca ngeda, sun jen keca kange di butene taru jenunge. Dinin, sun yan galada men kwakupa, butene utopu men kurure. Ange utopu kure gam kun kecada, popra men jenkamrume. Ukupmanto ngeda, unta bisamda, er jen keca butene taru jerur dinin, er yan galada men kwaku. Atep, unta bisamda, Israel nesaladi men popra jenkamrume. Allah, ne kangeda, ‘Akecada mali kurure. Unta bisamda dereng utopu keca kurura cadi, men jenkamrume,’ tenenune. 5 Ange utopu, yuk gam kure keca ukupmantonge ton, pepkune ada, er si pelanduk bisamda, er jen keca butene taru jerur dinin, er yan gala puda men kwaku. Atep nengeda, agam keca men jenkamrume. Ne kangeda, ‘Angeda mali, dereng utopu keca kurure,’ tenenuna cadi, akecada pio men jenkamrume.

6 Ukupmantonge ton, kelinci er jen keca konum jepredi, dakunmaryanen, amenda taru kange di ton cap ajen keca mundu neitamai di, ‘Jen ton jeptene,’ tenenange weleprepa, butene taru jerure. Ukurur dinino, er yan galada men kwaku. Atep nengeda, kelinci peda men jenkamrume. Ne kangeda, ‘Angeda mali, dereng utopu keca kurure,’ tenenuna cadi, kelinci ton men jenkamrume. 7 Tonda, ange utopu, sun Israel nesaladi bisam sisa ton men jenkamrume. Deiyoda ake. Bisam sisada, er yan gala kwaku dinin, er jen jeryopda, ajen keca mundu neitamai di, ‘Jen ton jeptene,’ tenena nge weleprepa, butene taru ton kange di ton cap men jerure. Atep nengeda, sun Israel nesaladi bisam sisa men jenkamrume. Ne kangeda, ‘Angeda mali keca, dereng utopu keca kurure,’ tenenuna cadi, sun Israel nesalada bisam sisa ton popra men jenkamrume.

8 Atep nengeda, bisam sisa cap, kelinci cap, pelanduk bisam capda, sun tu peda pio men jenkamrume. Tonda yuk nengdi popmengenge do, tali dadepmarenge do, ange yuma peda, er bol men benkamrume. Angeda talena pio meme. Ada, Ne kangeda, ‘Agam keca wenerida malingepu kurure. Sunda, dereng utopu keca kurure,’ tenenuna cadi, sun Israel nesalada, akeca ton pio men jenkamrume. Ada meme pepsene. 9 Uda, me mokon do, embare me do, laut mokon neitamainge do, me neitamai kure keca tep pepkusene. Embaramre me cap, me mokon cap, laut mokon cap, ame pumbon kurur kecada, yala-yala pio weik akure keca neitamaida, sun bol deiki kurur kecada, buru gala bol utopu keca, er si sisik cap, tonda er embana tep sirip cap akapunge yumada, sun Israel nesalada, jena telepe pua. Ikan yala keca dinin, sirip cap, sisik cap kure ngeda, ^{▼▼sirip cap, sisik cap - Ange mekinada, nundi ikan mi kota mutu bena kunupmepedi, nun mutu neitamai mokon pumbon dongoramep ikan, ange urasin utopu kurure -} sun Israel nesaladi akeca popra jenkamrume. 10 Dinino, embaramre me do, me mokon do, laut mokon pumbon do, me pumbon gam kure keca dinin, er sirip cap, sisik cap, men kurepa, buru gala utopunge kalkal bol men kapunge ^{▼▼kalkal bol men kapunge - Kalkal bol men kapu ngeda, er bolda bal utopunge kurure. Tonda, adeipmepu gambar ton dinkurume. Akeca sida, Indonesia upu deiki di, kepeting cap, belut cap, cumi-cumi cap penunge} yala-yala yumada, sun Israel nesaladi popra pio men jenkamrume. Akeca yala-yala yumada, ne Allahdi, ‘Angeda dereng utopu keca kurure,’ tenenuna cadi, sun peda, ‘Akecada, nun jenda, pio nun songe,’ tenepra kunkamrume. Ajen kecada pio meme, pepsene. 11 Tonda, me pumbon neitamai kurur keca yala-yala yuma dinin, sun kalkal bol, er si sirip cap, er embana tep keca sisik cap men kapu keca yala-yala yumada, sundi popra men jenkamrume. Akeca yala-yala yumada, er tu dopra jenada pio meme. Tonda, ame mokon pumbon gam kure kecada, yuk nengdi tamopmengdi deipmangenge cap, tali dadepmarenge peda, sun Israel nesaladi akeca bol bena peda, pio men kunkamrume. Ataru di dipra, dorkunkamre taru peda, ‘Akecada, pio men jenkamepe, ada meme,’ tenenkamrume.

12 Deiyoda ake. Ware gam kure keca do yuma, mokon pumbon neitamai do, embaramre me do, laut mokon pumbon kuramre dinin, er bol deiki sirip cap, er embana tep sisik cap men kure kecada, sun Israel nesaladi, men popra jenkamrume. Akeca yuma tep nengeda, ‘Nun jena pio songe. Tonda, angeda jena pio meme,’ tenepra kunkamrume. 13 Uda ma yala-yala weik akure dinin, sun Israel nesaladi men popra jenkamrum ngeda, lap pepkusene. Amada ake. Raja wali penge ma cap, konum depmarepa lyun keca jerur ma, er sida Hantu ma penge ma cap, Rajawali mirin ma cap, men popra jenkamrume.

14 Ange utopu, Kout ma cap, Muldamnye ma yala-yala yuma cap, 15 Tonda, mirin ma er si Solnyau ma yala-yala yuma cap, 16 Gagak ma cap, tonda Unta ma cap, Camar ma cap, Belekok ma, er si ton Elang yala ma yuma cap, 17 Pungguk ma cap, mokon deiki bukredi mut peramre ma, er si burung Dendang air cap, ila Hantu ma cap, tonda mekina poramre ma cap, er si ton Pungguk cap, 18 tonda, Undan ma ^{▼▼burung Undan - Ama tep nengeda, Indonesia upu deiki di burung Hantu putih, burung Undan, burung Ering, burung Ranggung penunge. Tonda adeipmepu gambar ton dirume} tonda, lyun keca jere ma er si Ering ma, er si ton burung Nasar ma cap, 19 tonda, Bangau ma yala yuma cap, Kasa ma capda, sun Israel nesala yumadi, apepmasen ma yala-yala yuma popra men jenkamrume. Angeda meme pepsene.

20 Tonda, metek gam kunung keca dinin, pol deiki di embangedi, kange di ton cap tuai mutu deiki yan dumbari deiki di yanipra embaramre kecada, er si serangga peramenge nge, ayala-yala keca yumada, sun Israel nesalada, ‘Akeca yuma tep nengeda, nun jena pio meme,’ tenepra kunkamrume. Allah ne kangeda, akecada mali kecapu kurura cadi, sun Israel nesaladi akeca pio men jenkamrume. 21 Dinino, yan dumbari di tu yanipra embaramre keca, er sida serangga yala keca dinin, sunda, pol ton akapmare ngeda, sun Israel nesaladi popra jena telepe pua. Sun yan gap-gap cap, buru gap-gap akapmarepa, adeiki ila lyoma di, im kurunga mengtopu kemnung keca, sul po utopu yala kecada, popra jena telepe pua. 22 Ayala kecada, ukupmanto ngeda, sul po cap, ganum cap, tonda mirin po si belalang-belalang peramenge nge yala-yala yuma capda, sundi popra jena telepe pua.

23 Dinino, pol deiki di lakra embangedi, ton tu deiki ton yanipra yan dumbari di embarur keca, ila di im men kurungredi, lompat men kungedi, tu deikipu embangedi, bungnung keca yala-yala yumada, dopra men jenkamrume. Sun Israel nesaladi, ‘Ayala kecada, pio meme,’ tenepra kunkamrume. 24 Ange lap pepmasen keca yala-yala yumada, jena meme. Tonda, sun nong peda bena cap, talena cap peda meme. “Allah er kangeda, ‘Akecada pio mali kurura cadi, jena meme,” ada konum lap pepmasen keca yala-yala yumada, pio men jenkamrume, tonda men talenkamrume. Aupu gekena gum di, tali lupra jepmumnyop do, bol bepmumnyop do yumada, Allahdi, sun pe tep, ‘Anesalada, ne damai men yatenge, konum mali kweipdanmanga cadi, sunda dereng nesala utopu kununge,’ tenenkamsera tep pepsene. Tonda, alap pepmasen keca depmarenge akaprepa, epmumdi talepmumnyopda, adeiki di, mali kweipdankamrume. Ada, nedi sun tep, ‘Sunda dereng nesala utopu kununga cadi, ne damai men yatenge,’ tenenkamsene. Atep, ayala keca yumada bena cap, talena cap gume.

Tonda, ware ngebo do yuma, ‘Akecada dereng utopu kurura cadi, Allah er kangeda, amali keca pio men jenkamrume,’ peipseunge, dadepmarepa, epmumdi, er nong talepmumnyopda, angebodi konum mali kweipdanmare. Akeca talepre taru di dipra, atumi neitamai yumada, angeboda mali keca utopu kunkamre. Dinino, keteng wekrepa ipkamre taruda, atumi lukunda konum yaryopda, ‘Ka di ton cap telep kupkamre,’ tenenkamne. 25 Tonda, ware ngebo do yuma, amem keca yala-yala yumada, dadepmarenge epredi, buru di doupra talerur do, tali beprur do, angeboda konum mali kweipdamarura cadi, adipapu er opkal yuma kwiripraredi, er opkal yuma me kupkamrure. Opkal me kupkamrur dinin, akeca talepmare taru di dipra atumi neitamai yuma cap, keteng wekrepa ipkamre taru peda, malipu kupkamre. Ada, er pe nong peda, tupa malipu kunkamre. Dinino, atumi lukunda konum yaryopda, ‘Ka di ton cap telep kunkamrure,’ tenenkamne.

26 Amem kecada, pio men jenkamrum ngeda, ka di ton cap lap pepkusene. Ada, ware gam kun keca do, er yan gala cap, buru gala cap kwakredi, yambulanun buteneto kuramre dinin, tek sisi er yan galada, butene men kure kecada, sun pio men jenkamrume. Tonda, akeca er yan gala kwakredi, gala butene akapmar dinin, er jen keca butene taru kange di ton men jere keca yumada, Allah er kangeda, ‘Akeca yumada, dereng utopu cadi, malipu kurure,’ tenerure. Atep, sun Israel nesaladi akeca pio men jenkamrume. Tonda, ware ngebo do yuma, amem keca dadepmarenge epredi, akeca nong doupra talerur do, tali beprur do, angeboda konum mali kweipdanmarura cadi, Allah er kangeda, ‘Angebo mali utopu kurura cadi ne damai men yatue,’ tenerure.

27 Tonda, tali bura tara gam kunung keca, sun yane dumbari kapu dinin, sun yanda potong akapmare ngeda, uda kam do, metek pus do, singa pus do, kapang yala-yala yuma do, er yan dumbari deiki di yanipra embanung keca yala-yala yumada, Allah er kangeda, ‘Akecada mali kurure,’ tenerura cadi, sun Israel nesalada ayala keca yuma popra pio men jenkamrume. ‘Ada meme,’ tenepra kunkamrume. Tonda ware ngebodi ato keca depmarenge bol bepyopda, ton akeca nong doupra er buru di talepyopda, akeca nong bepre ngeboda, adipapu er konum mali kudidarure. Akeca talepmare taru di dipra, atumi neitamai yuma cap, keteng wekrepa ipkamre taru peda, malipu kupkamre. Ada, er pe nong peda, tupa malipu kunkamre. Dinino, atumi lukunda konum yaryopda, ka di ton cap telep kunkamrure.

28 Ware ngebo do yuma, apepmasen gam keca dadepmarenge epredi, dopra talepyopda, malipu konum kweipdanmarura cadi, adipapu er kemamre opkal yuma kwiriprapredi, mepu kunkamrure. Er opkal me kupkamrur dinin, akeca talepmare taru di dipra atumi neitamai yuma cap, keteng wekrepa ipkamre taru peda, malipu tupa kupkamre. Ada, er pe nong peda, tupa malipu kunkamre. Dinino, atumi lukunda konum yaryopda, ka di ton cap telep kunkamre. Deiyoda, apepmasen gam keca yumada, Allah er kangeda, ‘Akecada malipu kurura cadi, sun Israel nesalada, akeca jena cap, talena capda, pio meme. Ukupmengopda, ne damai men yatenge,’ tenerure. 29 Uda, yuk mem yala keca ton lap pepkusene. Tu deiki yanipra embarur keca neitamai dinin, sun men popra jenkamrumnge cap, men dopra talenkamrumnge cap tep, lap pepkusene. Ada, wayum cap, metek kup cap, yan dumbari di tu yanipra embarur bal weiknge cap, mem bal cap, tenoinge cap, tonda sai bal cap yumada, popra men jenkamrume. Tonda, men talenkamrume. Deiyoda, Allah er kangeda, ‘Akeca yumada malingepu kurure,’ tenerura tep, sun Israel nesala tep nengeda, akecada mem kecapu kurure.

30 Ange utopu yan bal meteknge cap, tonda siawi bal buru dumbare deiki di, dapu mutu embaramre ila yan bal, er bali deikida takke weik cap, er nongda lyom bal er sida buaya cap, yambul yan bal er si landak cap, tonda ange utopu yan dumbare deiki di tu deikipu embare bal, mem bal er sida biawak cap, metek yan bal er nong bol warna yuk-yuk kemamre ngeda, er si bunglon capda, ange-ange yuma popra men jenkamrume. Ange yumada, men talenkamrume. Deiyoda, Allah er kangeda, ‘Akecada malipu kurure,’ tenerura tep, sun Israel nesala tep nengeda, akecada mem kecapu kurure. 31 Tu deiki yanipra embarur keca, yala-yala weik akurur dinin, nedi lap pepmasen yala kecada, sun Israel nesaladi popra men jenkamrume. Ange utopu, ware ngebo do yuma, apepmasen keca yala yuma, sun bol bena cap, tonda dadepmarenge epredi, er bol bepre ngeboda, er pe nong deiki yumada, malipu kudidarura cadi, Allah er damai men betue. Akeca talepre taru di dipra atumi neitamai yumada, malipu kunmaryanen, keteng wekredi ipropyopda, ka di ton cap telep kupkamre.

32 Tonda, ‘Ayala kecada mem keca cadi,’ lap pepmasen nge yumada, depredi, sakamrepa, gat keca co deiki do, gel deiki do, opkal deiki do, gam keca bol kopra keteng bupu di kalapunge do, amem keca saka douryaredi, akeca bepyopda, atali gat keca pe, tali akapmare keca dinin, amem keca sakrepa, bepmare keca tep nengeda, malipu kurure. Ada, ware keca do, deipmarumu opkal bol deiki do, ason deiki do, karong deiki do, amem keca depredi, douryaredi agat keca deiki bol bepyopda, abol bepre keca yuma peda, mali ngepu kunkamre. Atep nengeda, abepmare keca yumada, dopra mokon pumpu dongortamkamrume. Ataru di dipra atumi neitamai yuma amokon pumpu kuramrepanen, dinino, keteng dangbankamre taruda, kange di ton cap, teleppu kupkamre. 33 Ukupmantoda, gat tu deiki di ketekeipmengedi gamameng mau mankau di deipmamumpane, adeiki amem keca lap pepmasen keca yala-yala yumada, sakrepa, ame mau pumbon dourberyopda, amau cap, amau pumbon kamre keca cap yumada, malipu kupra derirure. Atep alap pepmasen mem keca yala-yala yumada, akeca bepre mauda, sun adipapu amau copra tamnapu kunkamrume.

34 Tonda, amali mem keca saka bol bepmare mau di me gwepra gapmangepa, bepmare jen keca peda, pio men jenkamrume. Ange utopu, ame mau pumbon di gapmange me cap, amau di me gwepra embek taru di jepmanto me cap, amali keca di ame mau konum bepmarura cadi, ame mau di me pio men jenkamrume. Ame mau pum kure keca peda, malipu kunkamre. 35 Arup pepmasen mali mem keca yala-yala yumada, amali keca di saka bol bepmare keca yuma peda, mali kecapu kunkamre. Ada tu deiki di doprapmengedi, telepmengepa me mau utopu kemrur keca do, tu di telepra uku sengna tep ketenepra derinung nge deiki do, yana saka bol bepre pangeda, dangtamnapu kunkamrume. Ada tali tep gume, deiyoda, ne Allahdi, ‘Akecada mem keca,’ pepmasen ngeda, mali keca bepmarepa, adeiki di abepmare keca peda mali kupmarura tep pepsene. 36 Amali mem keca sakredi, bol deiki bepkamre keca yala yumada, malipu kupra derinkamre dinin, me bungna deiki sakrenge cap, tu pumbon palipmengepa, me mokon deriramrenge cap, akeca butene puda, mali keca depredi, nong sakrepa, akeca butenepu beptua peda, mali kupra men derinkamre. Tupa teleppu kurure.

37 Tonda, Ukupmanto ngeda, mali kun keca deamredi lyuramrenge sakredi, ‘Yal keca koupkamap’ tenen, deipmange keca deiki douryare dingeda, mali kupra men derinkamsere. Ada, tupa telepepu kunkamre. 38 Dinino, yal keca deiki me diktapmamumpane, bul kuprepa, amali keca deamredi lyuramrenge yana saka, yal keca bol bepre ngeda, mali konum kupmarur cadi, ayal keca puda tamkamrume. 39 Tonda, yuk gam kure keca yala-yala weik jeptume. Dinino, ajena telepnge peda, agam keca depredi, yambula dipapu lyuramrepa, ware neng do yuma, adepmareng bol bepyopda, mali konum kweipdanmarure. Atep aipna taru di dipra akunmangepane, keteng wekredi inkamre taru yumada, adepmare keca bol bepmarur cadi, angeboda mali neng utopupu kunkamenge. Ataru neitamaida, ne Allah damai men yatenge.

40 Ange utopu, ware ngebo do, apotamna keca do, tali dadepmare keca do, ange bepmare ngebo peda, akeca er buru di talepra duyankamre ngebo peda utopu, tonda akeca galepra jepkamre ngebo pe, akeca talepmare ngebo peda, er ataru kenengamre opkal yuma, kwiriprapredi, me kunkamrure dinin, ame kupmarya peda, ipna di akunmarepane, keteng wekredi ipkamre taru yuma peda, depmare keca bol bepmarya tep, mali utopu ngebopu kunkamre. Atep, ataru neitamai di, ne Allah damaida pio men yatue. 41 Ware yala keca do yuma, gam kuredi, mundu deiki di tu deiki yanipra embarepa, buta paleramre keca yala-yala yumada, sun Israel nesaladi pio men jenkamrume. Ada meme pepsene.

42 Ange utopu, tu deiki yan dumbare keca do, tonda yan weika di kwapu keca do, mundu deiki di tu deikipu embarepa, buta paleramre keca yala-yala yumada, mali kecapu kurure. Atep, akeca yala-yala yumada, sun Israel nesala yumada, pio men jenkamrume. Ada meme pepsene. 43 Sun Israel nesaladi, apepmasen keca yala-yala yuma ton, popra jepmum pangeda, tonda talepmum pangeda, sun pepu mali kudidankamrume. Atep ato kecada men jenkamrume, tonda men talepkamrume. Angeda pio meme pepsene. Akeca talepmumnyopda, ne Allah damai men yatume. 44 Ange pepmasen upuda, tali tep men pepsene. Deiyoda, neda Allah Yahweh, sun nai bo Allah kunune. Neda pio telep, pio lengna ngebo kunune. Atep sundi moupra kalengdanapu kumumnyopda, ‘Nunda, Allah erngepu kunupe’ tenen, kunkamrume. Neda pio telep, lengna ngebo kununa cadi, sun peda ne mawa nesala kuruma cadi, sundi mali kuna pio gum dipapu, pio telep kupra kumumdi, lengna nesala utopu kunkamrume.

45 Apepmasen upu deiyoda, ake. Ada, Neda Allah Yahweh kunune. Sunda, Mesir mutu kuramrumpane, nedi sun loptaprapsisidi, telepai doupra yanamsesi. Atep neda sun nai Allah Yahweh kunune. Atep sundi, ‘Nunda Allah erngepu kunupa cadi, lengna nesalapu kunkamepe,’ tenepmumdi, teleppu kunkamrume. Ne Allahda, pio lengna ngebo kununa cadi, sun peda ne mawa nesala kuruma cadi, sundi mali kuna pio gum dipapu, pio telep kupra kumumdi, lengna nesala utopu kunkamrume. Ne lek ngebo kunetopu, sun peda utopu kunkamrume.

46 – 47 Atep apepra deipmasen upu yuma tep nengeda, tali gam kurur keca yala-yala yuma neitamaida, ton ngeda ne kangeda, ‘Angeda mali, mem keca,’ tenenuna cadi, sun Israel nesaladi ayala keca popra men jenkamrume. Ton ne kangeda, ‘Angeda telepe pua,’ tenenuna cadi, sundi ayala keca popra jenkamrume. Ange yuma tep nengeda, ‘Angeda pio telepe, angeda mali, teneprumudi, betapra kael kepkamrum’ tenen, aupu yuma nedi lap pepmasene. Atep, nedi sun tep, peipsen upu yumada, pio moupra gekepmumdi, angepu talepra kunkamrume. Ada, douai tara yan di yanipra, tu deiki embanung keca yala pe, tonda ma pe, me pumbonpu embaramredi kure keca yuma pe, tonda mundu deiki di embanung keca pe tep, ‘Ange popra pio men jenkamrum ngeda, ake. Popra jenkamrume ngeda, ake. ‘Ange yumada moupra kael keprumudi, telep kupra kunkamrum’ tenen, pepsene.

Allah Yahwehdi, Musa tep aupu yuma lap pepra deipu.