Lev 12 | XteSC | STEP | Allah er si Yahwehdi, Musa tep, ‘Nerapu mi konum deipmenge taru, sun telep kupra derina pel dona ngeda, ange kunkamrume, angeda pio men kunkamrume,’ pepra deipu upuda, ake.

Leviticus 12

Nerapudi mi konum deipmenge taru, ‘Allah damai kange di ton yatenge’ tenen, telep kudina pel tep, pepu upu

1 Allah er si Yahwehdi, Musa tep, ‘Nerapu mi konum deipmenge taru, sun telep kupra derina pel dona ngeda, ange kunkamrume, angeda pio men kunkamrume,’ pepra deipu upuda, ake. 2 Tonda, Israel mutu neitamai kunung nerapu neitamai di, tenpu ner ton, sal mi deipyopda, komuni yoneitam bari tumi yuma, anerda yambulanun mali kunkamrure. Ada, ne Allah damai men yatue. Angeda, nerapu sun yapi embaramre taru, yambul mali kurameng utopu kurura tep pepsene. 3 Ukuramrepane, ue ban bari tumi konum kupyopda, adipapu anerdi deiamre mi, er den bol deiki tarange yambula di sengkamnunge.

4 Ami konum den bol deiki tarange sekmengepa, aner tupa kunkamre taru yumada, ue tiga puluh tiga hari tumi neitamai yumada, mali utopu kunkamra cadi, ne damai ton men yatue. Deiyoda, er yapi embankamrura cadi, anerda mali keca tupa akurure. Atep anerdi, Yahweh er si eremna tep pel don keca yumada, bol pio men benkamrure. Tonda, Allah Yahweh er si eremna tep, opkal bol di keana dodin tenda ati domyai neitamaida, pio men wengkamrure. Akuramrepane, er telep kupra derina tumi konum kupyopda, akati neitamai yana wengkamrure. 5 Dinino, ukupmantoda, Israel nerapu yuma, sun akuramenga neitamai di, ware ner do, tenpu ton ner mi deipre nerda, empat belas hari tumi neitamai yumada, mali keca tupa er nong deiki akunkamre. Angeda, nerapu sun yapi embaramre taru, yambulanun mali kurameng utopu kunkamrura tep pepsene. Tonda, ‘Amenda taru, kange di ton cap, telep kweipkamneng’ tenen, enam puluh enam hari tumi neitamai di kunkamre nge yumada, erda yambulanun mali kurura tep, ne Allah damai ton pio men yankamrure.

6 Sal mi do, ner mi do, aner erdi deipredi, mali dakuramreyanen, amenda taru er telep kudina tep, dakuramrepanen, nedi peipsene tumi yuma konum kupyopda, er adipapu Allah karena tep, keteng tamun tenpu domba bisam mi doupra, sun Imam neng damai duyankamre. Ada, Allah Yahweh cap, nimi cap, antamdana tep, opkal bol di keana dodin tenda ati damaipu, adomba mi doupra, Imam neng tep yana karerbankamrure. Ukuprepa, aimam ngebodi adomba mi popra uku dongonkamrure. Tonda, er mali kure keca yuma tep, ‘Allahdi daepredi, kaukepra lyepkamner’ tenen, Yalma ma cap, Be ma cap, ukupu nenmarengepu, doupra yakankamrure. Ada, sun mali kunge keca yuma lyepra, telep kudina tep kareryakankamnunge. 7 Imam ngebo er dipapu akeca yuma douprapredi, Allah Yahweh tep kareryakankamrure. Tonda, ‘Allahdi aner er mali kuramrenge tep, telep kweipkure’ tenen, Imam ngebo er dipapu apel yumada donkamrure. Ange ukupra dopya deiki di, aner er mali kuramrenge daepredi, telep kupra derinkamre. Apeipne ngeda, ware nerapu yuma, sal mi do, ner mi do, nyapu deiamengane, ‘Allahdi telep kupra deipkusere,’ tenepmenge dingeda, angepu kunkamnunge.

8 Ukupmantoda, ami deipre ner, er domba bisam mi pio ton men kwamre ner do, men kunupmanto ner do, aner adipapu Yalma ma ukupu weni nenmarengepu, butene doupra yakankamrure. Agum dingeda, Be ma utopu ma, er sida tekukur ma, ukupu weni nenmarenge butene doupra, kareryakankamrure. Akareryankamre ngeda, aneitamai di imam ngebo tenpudi ma ton doprapredi, mesba deiki, uku dongonkamrure. Ton ngeda, aner er mali kuramrenge daemna cap, kaukemna cap tep, kareryakankamrure. Imam ngebo er adipapu, aner er mali keca telep kupra derina tep, pel dona ngeda, ketenepra donkamrure. Ukupya deiki di, Allahdi, aner er mali kuramre ngeda, daepredi, telep kupra derinkamre.