Leviticus 13

Nimi nong bol deiki, ila mambul susu jeramrenge tep, “Ange-angepu kunkamrume,” pepu upu

1Allah Yahwehdi, Musa cap Harun cap tep, “Ange-ange yumada, ukupra kunkamrume,” pepra, deipu upuda ake. 2Ukupmantoda, Israel yala ngebo do yuma, tenpu ngebo, er nong bol deiki, lolopra nepredi jeramyanen, er yapun bapredi, embaramre susu cap, tonda bol deiki di, bolkona utopu kupra jeramrenge cap, tonda ange deiki ila kange mun kot susu do, akeca utopunge jeramre ngeboda, sun yuk nengdi adipapu angebo doupra, Imam ngebo damai duyakankamrume. Ada, Imam Harun cap, er di deiprepa dadeipdanen bankameng neng cap dinin, aneitamai di ‘Imam pel dona deiyo ngebodi, asusu jeramre ngeboda, erdi dipetepkamre’ tenen, sun damaipu doupra, yakankamnunge. 3Adipapu, Allah si eremna ati pumbon pel talepra dona deiyo ngebo, Imam erdi, ila kange mun susu nong bol deiki jeremre ngeboda, ajeramre tarada, moupra dirpetenkamrure. Ada, angebo bol deiki susu jeramre tara di, ‘Er nong bol deiki paramre potong ton, kururamre do, gum do’ tenen, epkamre. Tonda, angebo nong bol deiki susu jeramare dinin, nong bol amu tara, daneitamai wekra jeramrepa epyopda, ‘Uo, angeda kot susu jerure,’ tenepkamre. Ange epya deiki di, “Er angeboda, pio mali susu jerura cadi, angebo erda Allah damai men yatue,” pepra, nimi yuma gekenai di, katuai di lap penkamrure.

4Dinino, angebo er bol deiki bot-botoma laramre susu, er si panu taleamre dinin, asusu di angebo er nong bol amu tara, tu neitamai jepra men wengna cap, tonda asusu taleamredi, jeramre tara di, er nong bol deiki kamre potong men kuruna cap, kamyopda, Imam ngebodi, er angebo tep, “Kanda, kange mun susu, ila kot susu jenmaker do, gum do’ tenen, dipetenkamne. Atep, kanda keana tep, nimi kuna pio gumai, bura tarapu, yoneitam bari tumi mapkamarume,” penkamrure. 5Tali dakuramyanen, yoneitam tumi konum kupyopda, Imam ngebodi, angebo er susu ajeremnge tep, ka di ton cap tapakra jeramre do, ajerengepu tupa akapmar do, gum do’ tenen, Imam ngebodi dipetepredi, “Gume, susuda men di ajerengepu kapmare, ton cap tapakra men jenmare,’ tenepre dingeda, ton cap, komuni yoneitam bari nimi kuna gumai, bura tarapu bena, deiprepa kunkamarure. 6Komuni yoneitam bari ton cap konum kepre pangeda, Imam ngebo er dipapu, angebo er bol deiki susu jenmarenge tep, ‘Kaikmar do, gum do’ tenen, dipeteprepa, susu ton cap men jenmaredi, konum gum kupmaredi, telep kunmarepa, epre dingeda, er adipapu yuk neng gekenai tep, “Ukutaruda, angebo er bol deiki ila kange mun susu jerengeda, konum kaikmare penkamrure. Atep, kange di ton cap, Allah er damai yakana telepe pua,” penkamrure.

7Dinin, aimam ngebodi, asusu jeramre ngebo tep, “Konum kaikmakerdi telep kupmakere,” pepmarepanen, dakunmareyanen, ka di ton cap asusu tamupra jere pangeda, er angebo adipapu, Imam ngebo er damipu tamupra yakankamrure. 8Yarepa, Imam ngebodi tamupra dipetepredi, asusuda men di jeramre susupu tamupra jenmarepa epyopda, angebo tep, “E, kanda, tek sisi men di jeramkeu ila kange mun susupu jekerure,” penkamrure. Asusuda, nong bol deiki jeramyane, nong bol neitamai sangdongorur susu, kange mun kot susunge jenmara cadi, ukutaruda kanda mali ngebo utopu kurume. Atep nengeda, Allah er damai ton cap pio men yankurume,” penkamrure.

9Atep nengeda, ware neng do yuma, kange mun kot susu, er nong bol deiki jere ngeboda, yuk nengdi adipapu er angebo doupra, Imam ngebo er damaipu duyakankamnunge. 10Adoupra yange ngeboda, Imam ngebo erdi, moupra dipetepredi, ‘E, angeboda, er nong bol deikida, lolopna kuredi, er nong bol neitamai yuma yarukra doredi, bi laramre susu kuredi, asusu jere bol deiki tara di, tengrur potong deikida, asusu yapun emberedi bamrepa, apotong yumada kurunapu kurur do, gum do’ tenen, moupra dirpetenkamrure. 11Dipetepya deiki di, alap pepmasen keca, susu jeramyai tu bi laramrenge tupa akwapyopda, Imam ngebodi, “Uo, angebo er bol deiki cap, er nong bol neitamai capda, tek sisi ila kange mun susu jerure,” pepra lap penkamre. Tonda, Imam ngebodi, asusu konum jeramrepa, kael kepre dingeda, er angebo tep, “Kanda, nimi ati pumbonpu dabena kunmamemnyane, tamupra yamempa, ka di ton cap dipetepkamakene,” men di peramra utopu, men penkamrure. Deiyoda, tek sisi er angeboda, amali susu konum jeramrepa, kael kemrura cadi, ton cap tamupra men dirpetenkamrure. Angeboda er konum mali kurura cadi, Allah er damai ton pio men yakankamrure.

12Tonda Imam ngebodi, angebo er nong bol deiki dipeteprepa, er bol deiki yuma, lolopra gisiksingipmaredi, susu dipapu angebo er yan bulbul dipra potong sirik yuma amuamredi, susu jeramrepa, imam ngebo dipapu ‘Ware kuprap taru di do?’ tenenkamre. 13Ada, Imam ngebodi, ‘Angebo er nong bol deiki kot susu jeramrenge cap, nong deiki susu jeramrenge cap yumada, dipterepnedi, angebo er nong bol deiki yumada, kurupnapu kupmara tep, gume, angeboda telep konum kupmare,’ tenepre dingeda, Imam ngebodi, “Angeboda, konum kaikmare. Er nong bol deiki yumada, konum kurupmara cadi, er jeramu susu konum kaikmare. Eda telep kupkamara cadi, Allah er damai ton tamupra yakana telepe pua,” pepra, nimi gekenmangai di lap penkamrure. 14Dinino, angebo er nong neitamai susu jeramredi, yarukra doramrepa, bi kwamre tu epyopda, Imam ngebo er dipapu ton cap tamupra dirpetenkamrure. Ange akapyopda, imam ngebodi, “Angeboda, nong bol malingepu kurure. Erda, Allah er damai ton men yakankamrure,” penkamrure.

15Tek sisi angebo, er nong deikida, yarungna susu jeramrepa, bi kwamrenge epyopda, “Gume, angeboda, mali kot susu tupa jerure,” pepra katuai di lap penkamrure. Ada, “Er nong bol deiki ila kange mun susu tupa jerure,” pepra lap penkamrure. 16Dinin, er nong tu, ayapi bi akaprenge, yarungna susu jeramre nge, konum kaekropyopda, asusu jeramyai er dilada, kurunkamre. Asusu konum kaikredi, er bol deiki tara yuma telep kupra kurupre pangeda, angeboda adipapu Imam ngebo damai tamupra yakankamrure. 17Imam ngebodi, ka di ton cap tamupra dirpetena tep, yakankamrure. Ukupra yana dipetepredi, er angebo ila kot susu jeramya kaikropmardi, aceida bol kurupmarepa epyopda, Imam ngebodi, “Er angebo kot susu jeramrenge tep, mali susu jememere ngeda, konum kaikropmardi, telep kupmare. Atep, Allah er damai ka di yakankamrure,” pepra lap penkamrure.

18Tonda ukupmantonge ton. Ware ngebo do, er nong bol deiki di, toro deiyamredi, susu jeramyanen, kaikropkamre. 19Dinino, atoro deiamya dila deiki di, Ka di ton cap lolopmaredi, kuruna do, yapi bi kweingna do, akupre pangeda, angebo adipapu, Imam ngebo er damaipu yakankamrure. 20Ada, Imam ngebodi dipetepredi, angebo er nong bol deiki susu jerurai, lolona susupu kupredi, jenmarepa, asusuda nong bol deikipu gum dinin, tu neitamai ton konum jeryopda, asusu deikida yapunpu kupkamre. Tonda, abol deiki lolopmaredi, yapun embanmare nong bol tara tekamre potong yuma kurupmarepa, epyopda, imam ngebodi, ‘Gume, angeboda mali kot susupu jerure,” pepra lap penkamrure. Mali kuna susu jena tep, gonga kemnada, toro deiamyai, dila deiki di deipredi, yapun kupkamre ngeda, acei di kot susu gonga kepra sangdonongrure.

21Dinin, Imam ngebodi, lolopna susu jeramre ngebo tep, er bol deiki, asusu jeramre tara yuma betapra dipetepredi, atara nong bol deiki cap, nong tu neitamai cap jeramrepane, nong bol deiki di pamre potong ton men kuruna cap, tonda asusu nong neitamai men jepbana cap, men kuramrepa epyopda, Imam ngebodi, er angebo tep, “Ue yoneitam bari deiki di, kanda yukaipu bena ati pum neitamai apu kunmamnyanen, kange di tamupra, ne damai yamemepa, ton cap dirpetenkamkene,” penkamrure. 22Dakunmareyanen, yoneitam tumi konum kupyopda, angebo er lolopna susuda, ton cap lolopra tapakredi, angebo er nong bol deiki weika di kupre pangeda, ‘Imam ngebodi, angebo tep, “Angeboda, ila mali kot susu er nong deiki tupa jerure. Erda mali kurura cadi, Allah er damai ton men yakankamrure,” pepra, lap penkamrure. 23Dinino, angebo er lolopna susu jeramyaidi, ton cap men lolop gisikmaredi, weik men kupredi, telepepu kupmaryopda, ‘E, ada tali lolopna susu jerure,’ tenenkamre. Ada, men taru di toro deiamnga dila deiki di, lolopna susu jenmara,’ tenekamrure. Utenepya tep nengeda, “Er angebo, ila kot susu jeredi, mali men kurure. Telepepu kurura cadi, Allah er damai ton yakankamrure,” pepra lap penkamrure.

24Uda, yuk upu ton pepkusene. Ada ukupmantoda, nong bol deiki di, yalena cap, betengna cap, uku jena cap susu taleamre dinin, ayalena susu deiki di yapunda, yapi binge embankamre. Ukupre pangeda, imam ngebodi, ange susu tek sisi dirpetepkamrure. 25Imam ngebo, erdi moupra dipetepredi, angebo er nong bol deiki susu jerurai yuma, lolona susupu kupredi, jenmarepa, asusuda nong bol deikipu gum dinin, tu neitamai ton konum jeryopda, tonda asusu deikida, yapunepu kupkamre. Tonda, abol deiki lolopmaredi, yapun embanmare nong bol tara tekamre potong yuma kurupmarepa, epyopda, imam ngebodi, ‘Gume, angeboda mali kot susupu jerure,” pepra lap penkamrure. Mali kun susu jena tep, gonga kemnada, uku jeamngai, dila deiki di deipredi, yapun kupkamre ngeda, aca di kot susu gonga kepra sangdongorure’ tenen, kael kemkamrure. Ukupra kael kepre dingeda, Imam ngebodi, “Asusu jeramre ngebo tep, erda mali kot susu talepmare,” pepra, lap penkamrure. 26Dinin, ‘Auku jeamu susu dila talepmare nong bol deiki tara di, tekamre potong ton kuruna cap, tonda susu nong neitamai jepra bana cap kunmarepa, men epmaryopda, Imam ngebodi, er angebo tep, “Kanda ue yoneitam bari tumida, nimi kuna gumai, ati pumbonpu bena, kunmamemnyanen, tamupra yankamarume, peprepa, angebo yukai bankamrure.

27Dakunmaryanen, yoneitam tumi konum kupyopda, Imam ngebodi, er susu jeramre ngebo tep, kange di tamupra ton cap dipeteprepa, angebo er bol deiki lolopna susuda, tapakra lolop gisikmaredi, er nong bol tara weika di ton cap konum kupmare pangeda, imam ngebodi, “E, angeboda, kot susu konum talepka cadi, mali kupke. Erda, Allah damai men yakankamrure,” pepra, lap penkamrure. 28Dinino, susu lolopra jenmare ngebo, er bol deiki ton cap lolorgisingna cap, lolopna susu kamo yuknge ton kuna cap, men kupredi asusu jeramre bol deiki yuma kurupnapu kupre pangeda, Imam ngebodi, ‘E, angeboda, ila mali kuna susu, kange mun nge men jeramre’ tenen, kael kemkamrure. Ukupra kael kepre dingeda, “Er angeboda, mali kuna tep kot susu ton pio men jerura cadi, Allah er damai ton yakankamrure,” pepra lap penkamrure. Deiyoda, ‘Asusu uku jeamngai dila pua,’ tenenkamrure.

29Uda, yuk upu ton pepkusene. Nimi do, nerapu do, giso bol deiki jeramre susu talepredi, jenkamre do, agum dingeda, nimida, bana amu tara tepna-tepna lana susu, er si panu talepredi, jenkamre do’ tenen, dipetepkamrume. 30Autopu tep tapeka kuna susu talepre ngebo do, ner do, angeda adipapu Imam ngebo er damai yarepa, dirpetenkamrure. Dipeteprepa, atapeka lana susuda, nong neitamai jepbankamre. Tonda, bana amu tara cap, nong bol deiki cap, tapeka lana susu taleamngai di, nong bol kurupredi, apamre potong yuma, upda-upda pepra embanmarepa, epyopda, “Gume, angeboda, ila mali kot susu jerure,” pepra, lap penkamrure. 31Imam ngebodi atau pena susu betapra dipetepredi, ‘Angeda, tek sisi mali susu men talepmare. Ada, angebo er nong neitamai di jena gum cap wengna gum cap, tonda susu jerur nong bol tara deiki di, tengrur potong yuma ton, kuruna cap, porona cap men kupmare, tonda daneitamai di mirin potong men parure’ tenen, konum kael kepyopda, amali kupmanto susu talepmare ngebo tep, “Kanda, keana tep, ue yoneitam bari tumi deiki di, dabena ati pumbonpu dakunmamemnyane, ue yoneitam bari tumi konum kupyopda, ne damai tamupra yankurume,” pedinkamrure.

32Dakunmaryanen, ue yoneitam bari tumi konum kupre pangeda, atumi adipapu ton cap dirpetena tep, Imam ngebo damai tamupra yakankamrure. Yare pangeda, imam ngebo dipterepredi, atalepmare susu ton cap jertapangna cap, nong bol amu tara wengbana cap men kunmaredi, ateptepeka lana susu taleamre bol tara di, paramre potong deikida men kuruna cap, porona cap, tonda bana potong kuruna cap men kupmarepa, utopu ateptepeka lana susu di, nong neitamai jepbana cap men kupmarepa, epkamre. 33Epre dingeda, asusu jeramre ngebo, er giso deiki talepre pangeda, potong yumada, toupra tamkamrure. Tonda, bana potong yuma peda, toupra tamkamrure. Ukupkamre dinin, tau pena pu jeramraipu paramre potongpuda men toupkamre. Ukupre pangeda, ton cap angebo tep, Imam ngebodi, “Kanda, kange di, ue yoneitam bari tumi ton, dabena ati pumbonpu dakunmamemnyane, yankurume,” pedinkamrure.

34Upeprepa, dabena kunmarepane, ue yoneitam tumi konum kepre pangeda, adipapu Imam ngebo damaipu tamupra yarepa, moupra dirpetenkamrure. Dipetepredi, agiso potong pamya deiki cap, bana potong toupmarya deiki cap di, tapeka lana susu cap, tau penange cap, ton cap tapakra jena cap men kunmarya tep, tapeka lana susu di, nong neitamai jepra bana cap kunmarepa, men epyopda, angebo tep, “Kan susuda, ton tapakra men jeramkere. Adeiki di kan nong bol yumada, konum telep kupmakera tep, Allah damai ton yakankamrume. Tonda, kan kemrum opkalda, me kupkurume,” pepra derinkamrure.

35Dinin, “Telep kupmakere,” pepmarepa, angebo beredi, dabena kunmarepane, amali tau pena susu kange di talepyopda, ka di tamupra imam ngebo damai yakankamrure. 36Angebo adipapu tamupra Imam ngebo damai yaredi, yana peprepa, imam ngebodi atau pena susu jenmarai tamupra dirpetenkamrure. Dipeteprepa, angebo er bol deiki yumada, amali susu tapakra jenmarepa, epyopda, bana amu tara peda, asusupu konum talepmarura cadi, ‘Ton cap dipetepkune,’ men tenenkamrure. Ada, ‘Ila kange mun kot suse konum talepmare,’ tenen, kael kepkamrure. Imam ngebodi, “Angeboda, tek sisi amali susuda, kange di tamupra talepmarura tep, Allah er damaida pio men yakankamrure,” penkamrure.

37Dinino, Imam ngebodi dipetepredi, ‘Gume, angeboda mali kot susuda, ton cap tapakra men jenmare. Tonda, nong bol peda, atep, ‘Gume, amali susuda konum kwetepmare,’ tenenkamrure. Utenepre dingeda, Imam ngebodi, er asusu jeramre ngebo tep, “Kan susuda, konum telep kupkamakere. Atep Allah er damai yakankamrume,” penkamrure. 38Ukupmantoda, nimi tenpu ngebo er bol deiki do, nerapu bol deiki do, “Baprikna buknedi me turungne susu urasin utopunge talepyopda, 39Asusu talepre ner do, nimi do, adipapu Imam ngebo damai yarepa, erdi moupra dirpetenkamrure. Dipetepyopda, me turungne susu akapyopda, Imam ngebodi, “Ada, bol deiki tali giringna susupu talepka cadi, telep kupkamar ja. Tonda, “Angebo er susuda, telep kupkamare. Atep, Allah er damai tupa yakankamrure,” penkamrure.

40– 41Ukupmantoda, nimi giso deiki potong cap, giso dana-dana potong cap yuma bupra sakredi, delau kupbaryopda, adelau katuai kuprenge tep, ‘Ada kot susu jeredi, mali kurure,’ men tenenkamrume. ‘Angeboda, Allah er damai tupa yakankamrure,’ tenenkamrume. 42Dinino, giso delau buamya deiki di do, er giso deiki tara do, bol deiki, yapi bi kweikmaryanen, lolopna susu gonga kepredi, jepbaryopda, ‘Ada ila mali kot susu, er bol deiki cap, giso deiki cap, talepmare’ tenen, kael kemkamrure. 43Atep nengeda, Imam ngebo damai yarepa, dirpetenkamrure. Dipetepredi, angebo er delau deiki do, er giso deiki tara bol deiki do, yapi bi kweikmaredi, lolopna susu jenmarepa epyopda, ‘E, ada kot susu utopu susu jenmare’ tenen, kael kemkamrume. Asusuda, tali nong bol deiki yapi bi kweikmaredi, lolopna susu jeramrenge utopunge tep pepne.

44Imam ngebodi, “Er angeboda tek sisi er delau deikida, mali kot susu talepmara cadi, Allah er damai men yakankamrure,” pepra, lap penkamrure. Imam ngebodi, aupu lap penkamra deiyoda, angebo er delau deiki, yapi bi kweikmaredi, lolopna susu jenmarya tep, “Ada kot susu konum jenmara,” pepra, lap penkamrure. 45Mali kot susu jeramre ngeboda, telep opkal ton pio men kemkamrure. Mali opkalpu kemkamrure. Tonda, er potong telep-telep kupra men wenkamrure. Er potong tali taprepa, potong dupu mounkamrure. Akot susu jeramre ngebo, er bisi embankure taruda, yuk neng sun kael kemna tep, er aso deiki cap, er sipyal bambol cap, lelipdongopra embaredi, “Uo, neda, mali kot susu talepneua cadi, Allah damai ton men yakankamne,” pepra ila upu di pepembankamrure. 46Kot susu jeramre ngeboda, susu men kaekamredi, tupa jeramre taru yumada, angeboda mali kot susu jena ngebopu kunkamre. Atep nengeda, Allah er damai ton men yakankamrure. Tonda, er angeboda, yuk Israel nesala ati dopra kuramengai ton, men kunkamrure. Acei di gopra peda, yukai bura tara nimi kuna cap, embana cap gumaipu, ati dopra deipmengepa, bena kunkamrure.

Kot susu taleamre ngebo, er kenengamre opkal kuna tep, pepu upu

47Ukupmantoda, kot susu talamre ngebo kemkamre opkalda, ‘Akot susu deiyo kecada, aopkal deiki cap, pumbon cap akapmar’ tenen, aopkal dopra imam ngebo damai dubenkamrume. Imam ngebodi akeca dipetepkamre. Ada, domba bol di wiamenge opkal do, tonda pio telep kain lenan di wiamenge opkal do, kot susu jeramre ngebo kemamre opkal yuknge deiki do, kot susu urasin utopunge katuai kunkamre. Ada yambul co bo embeknge do, yapi binge do, katuai kunkamre. 48Tonda, angepu gum dinin, angebo er kemamre opkal do, yuk yala keca, gam keca bol kopra, ange deiki di deipra winung opkal do, lenan opkal er tapu pumbon do, domba potong di wiamenge opkal er tapu pumbon do, akot susu jeramre ngebo, er opkal yala-yala yumada utopua. 49Aopkal bol deiki peten kemkamre er kamoda, porona cap, co bo embek cap, yapi bi cap, kan-kana kupkamre. Ukure pangeda, ‘Uo, ada kot susu jenmanere’ tenen, erdi kael kemdankamrure. Ukuprepa, konum kael kepyopda, angebo er adipapu Imam ngebo damai yarepa, dirpetenkamrure.

50Ukupyopda, Imam ngebodi, angebo cap, er opkal yuma cap, er kamo yuma dirpetenkamrure. Dipetepredi, aopkalda, ‘E, angeda kot susu akapmare ngeda ake,’ teneprenge yumada dopra, ue yoneitam bare deiki di yukaipu bena derinkamrure. 51Uwe yoneitam bari tumi konum kupyopda, atumipu aopkal dopropredi, ton cap tamupra dirpetenkamrure. Tonda, aopkal deiki yumada, aopkal tapu pumbon do, abol deiki do, mali susu jeramrenge urasin utopunge, tupa akapmaryopda, ton cap tapakmarepa, weik ton cap akapmaryopda, aimam ngebodi, ‘Gume, aopkal deikida, mali kot susu talepke. Atep, yuk neng aopkal mankau di bepmengopda, akot susu sun nong deiki ton sakronmanto kurure. Cadi, aopkalda, konum mali weik kurure’ tenen, kael kepredi, lap penkamrure. 52Akot susu mali deiyo kecapu, tupa paleamare pangeda, Imam ngebo er dipapu akeca dopra, uku dongonkamrure. Ada, amali kupmare opkal deiki do, aopkal tapu pumbon do, abol deiki palepmarenge do, ange yumada, yuk neng sun bol deiki sakronmanto kuprura tep, ukupu dongoprepa, ukudi jepra, gum kudinkamrure.

53Dinino, Imam ngebodi aopkal keca yuma moupra dipetepredi, angebo er kenengamre opkal deiki di do, aopkal tapu pumbon do, ton cap tapakra men kapyopda, imam ngebodi, ‘Yuk nesala men benepmanto, akot susu deiyo keca yuk nesala deiki men sakronmanto,’ tenepyopda, kaukemkamrure. Ukupredi, ange yumada, uku men dongonkamrure. 54Tonda, yuk neng tep, “Aopkalda, telep-telep kupra me kupkurume,” peprepa, adipu me kunkamnunge. Konum me kupra deipmenge pangeda, adipapu kemna gum dinin, ue yoneitam bari tumi yumada, nimi men kunungai dapu bena derinkamrure. 55Ue yoneitam bari tumi konum mapmengopda, atumipu Imam ngebo damai doupra yangepa, dirpetenkamrure. Dipeteprepa, ton gum kamredi, men di akamre urasinpu tupa akamre pangeda, tonda yambulanun ton men tapakmarepa, epyopda, “Gume, aopkal deikida, mali kot susu jere ngeda, tupa akapmara cadi, akecada pio mali weik kurure. Atep, adipapu uku dongopkurume,” penkamrure. Ada, kot susu mali kuna deiyo kecada, aopkal iri tara do, amnyo tara do, tupa akapmara tep, “Ukupu dongopkurume,” pepra, lap penkankamrure.

56Dinino, Imam ngebodi, dipetepredi, aopkal deikida, mali kot susu deiyo keca er kamo ton men kamre pangeda, aopkal tapu pumbon do, bol deiki do, kot susu utopu keca akapkaida, sirikai gwelepra, sakmanto kamyaipu sengtamkamrure. Ada, ‘Kange di ton cap belepredi, tupa katuai kapkamre do, gum do’ tenen, kunkamrure. 57Dadeipmarepanen, amali keca gwelepra sektamrepa, gum kupmare dinin, aopkal deiki do, opkal tapu neitamai do, bol deiki do, ka di ton, mali kuna susu urasin jenek kepyopda, imam ngebo, er pedipapu dopra, asusu deiyo keca kapmaryai gwelepra sektapredi, uku doprepa, uku di aopkal yuma jenkamrure. 58Konum me kupmengepa, mali kun keca ton aopkal bol deiki do, opkal tapu neitamai do, bisam bol deiki do, susu deiyo keca kamrenge, me kupmengepa, akeca gum kupmare pangeda, ton cap tamupra me kunkamnunge. Ada, ‘Akeca tamupra kange di konum telep kunkamre’ tenen, kupkamrume. Telep kupre pangeda, konuma.

59Mali kot susu jeramre neng kenengamenge opkalda, domba potong di deipra wirameng nge do, tonda bi tapu wol di wirameng lenan opkal do, tonda yuk keca bol di koprapmengedi, dopra wirameng opkal do yuma tep nengeda, nedi, “Angeda mali cadi ukupra kunkamrume, angeda tupa telep cadi, ukupra kunkamrume,” pepra deipmasentopu, angepu kupbankamrume.

Allahdi, Musa cap, Harun cap tep, upepra deipu.