Lev 14 | XteSC | STEP | Allah Yahwehdi Musa tep, aupu ton karepudi peipu

Leviticus 14

“Sun nong bol deiki ila kange mun kot susu jeramserenge, me kupra telep kupmumdi, Allah upu ati wengkamrume,” pepu upu

1 Allah Yahwehdi Musa tep, aupu ton karepudi peipu 2 Nong bol deiki yuma ila kot susu jeramre ngeboda, me kupra telep kudina tumi tep kunkamrum ngeda pepkusene. Ada, “Angepu ukupra-ukupra kunkamrume,” peipkusene ngeda ake. Kot susu jeramu ngebo, Imam neng damai berepa, ange yuma teleppu kunkamre. Kot susu konum kaekyopda, adipapu sun Imam neng damai doupra bankamnunge. Ukupyopda, sundi, “Angeboda, konum telep kupmare,” penkamenge. 3 Ukupkamenga tep nengeda, sun Imam nengdi adipapu angebo dopra akati bura tara dubengedi, angebo dirterenkamenge. Er nong yuma moupra dipetepmengedi, kot susu jeramunge yuma men kapyopda, ‘E, angeboda er kot susu konum kaekmare,’ tenenkamenge.

4 Ukupre dingeda, aimam ngebodi upenkamre. “Ware ngebo do, ‘Telep kupnere,’ tenepyopda, er melimna tep, sun yuk nengdi, ma butene gam kepmanpu duyakankamenge. Ada, nong malinge pio gume. Nong telep ngepu duyakankamenge. Tonda, cemara co sekropa, tenpunge cap, yapi bi wol tapu cap, metek co bo kwamre keca, er si Hisop co teru sekropa koupna tenpu cap, duyakankamenge. 5 Ange doupra yaryopda, Imam ngebodi, “Ukupkurume, kot susu jeramu ngebodi, ‘Ne konum telep kupkunere,’ tenepyopda, er telep kudina tep, ma tenpu doupra yaryopda, tu di telepra ketkemdinung me mau belanga deiki di, yo me bungna pio telep mepu embaramyai deiki di, ama popmemdi, ame mau pumbon kipdongopkurume. Ada, gelal tu deiki di ketekepi me mau pumbon apopmarum ma deipkarume,” peipkamsere. 6 Dinino, ma tenpu ton cap, gam kunmarenge adipapu dopropmemnyopda, cemara co cap, hisop co tenpu cap, bi tapu cap keprapmemdi, men di mepu embaramyai deiki ma tenpu ton popmaumnge, er yapi ketenepra deipmamumnyaipu burupropkamrume.

7 Aimam ngebodi, ma yapi dopra, kot susu jeramu ngebo, er nong deiki lingdiramrepane, angebo ue yoneitam bari, deiki di lingderinkamre. Lingdiramrepane, konum telep kupyopda, angebo tep, ‘Ada konuma, telep kupmare,’ tenepredi pepkamre. Tonda, ama tenpu ton, yapi burupropmarenge, tupa gam kunmare ngeda, talipu loptapmempa, ama tali bura tara lakra bankamre. 8 Akot susu konum kaekmare ngeboda, adipapu er opkal yuma me kunkamre. Tonda, er potong yuma peda, tourtamkamre. Ukupredi, me gekrepa er nong yuma telep kunkamre. Me kuprepa, ange yuma telep kupyopda, Israel nesala kunungai, ka di ton cap, sun ati damai bana telepe. Yuk nesala ati damai yatu dinin, adipapu er pe ati pumbon peda, menmena men wektue. Ue yoneitam bari tumi maptuopda, er pe ati pe wektue. Tali bura tarapu dakuramyanen, ue yoneitam bari tumi konum mapyopda, er pe ati pumbon wengkamre.

9 Ue yoneitam bari tumi konum mapyopda, er giso potong yumada tourtamkamrume. Tonda, giso potong cap, bana potong cap, asuru dipunya potong cap, nong deiki kusere potong yumada, tourtamkamre. Ukupre dingeda, er kemamre opkal yumada, me kunkamre. Tonda, er nong yuma me gekrepa, Ange yuma kapsakredi pio teleppu kunkamre. Ataruda, Allah damai yakana telepe pua. 10 Ukupra dakuramrepane, ue ban bari tumi konum kupyopda, angebodi domba bisam mi butene, bol pio telepnge cap, ner domba bisam mi pio telepnge cap, doupra yakankamnunge. Ada, nesala yuk-yukpu doupra, yakankamnunge. Ange yumada, bol pio telepnge pua. Ton yuk ngeda, tepung tiga (3) kilogram cap, minyak saitun me mokon cap, talwalipra wipinge nge cap, saitun minyak me mokon seper tiga liter, (0.3 liter) cap, doupra yankamrume. 11 Ange yuma konum duyaryopda, Imam ngebodi angebo adipapu er nong cap, erdi duyanmare keca cap, yuma doupra, ‘Allah Yahwehdi dinkamre’ tenen, Allah cap, nimi cap, antamdana tep tenda ati buplan damai doupra bankamre.

12 Aimam ngebodi, ajem domba bisam mi tenpu ton dopropredi, minyak saitun me mokon seper tiga liternge cap, yuma dopra, er mali kupunge daemna cap, yo pununa cap tep, er keca yuma dopra, ‘Allah Yahwehdi akeca epkure’ tenen, buru di doupra erepredi, benbenepredi, Allah tep karenkamre. ‘Ange yumada, Allah Yahweh er penge tepapu,’ tenepra karenkamre. 13 Ajem domba bisam mi dopra, adipapu ‘Allahdi nun mali kupne keca kaukemkamsere’ tenen, gel pala di yakra deipidi, keteneipyaipu bengedi, akeca yuma popra sekmengedi, uku dongopmengopda, ‘Nun mali keca yuma kaukemkamser’ tenen, uku dongonkamre. Adombada, adipapu mali kun keca kaukemna tep dubengepa, amali kuramenge keca, daemna cap, yo pununa cap tep, kaukemkamre. Tonda, ange yuma ukupyopda, Pio Telep Lengna Ati, alengna ati pumbonpu karenkamrure. Deiyoda, sun mali kupmenge keca kange mun tenenange kaukemna tep karen keca cap, sun mali kunge keca pununa tep karen keca cap, abuteneda Imam neng sun ngepu kurure. Tonda, ange yumada, Allah erngepu kurura cadi, pio lek kecapu kurure.

14 Tonda, sun mali kupmenge keca daemna cap, yo pununa cap tep, kange mun tenenange kaukemna tep karen keca yapida, Imam ngebodi adomba bisam mi yapi yambulanun dopra, akot susu jeramu ngebo, er dumsisi amul damai iriamu tara lingdinkamre. Tonda, dumsisi tara pamu buru du cap, yan du dumsisi tarange cap, abutene deiki likeiprepa, akupkamra deiki di, susu jeramu ngebo telep kupkamre ja. 15 Ange utopu, sun imam nengdi, minyak Saitun me mokon, seper tiga liter ketenepra deipmaunge di, metekanun ton dopra, imam ngebo er pepu tebalal buri deiki ton dingdinkamre. 16 Minyak saitun, er tebalal buri deiki konum dikeipyopda, er dipapu er buru dumsisinge di, aminyak Saitun me mokon pumbon widonkamrure. Wipra burupropyopda, ue yoneitam bari deiki di, (tujuh kali) ‘Allah Yahwehdi dinmaner’ tenen, er ati damaipu gege peprepa, aminyak dourbena palenkamrure.

17 Ukupre dingeda, aminyak Saitun me mokon ton, metekanun ton tupa akapre ngeda, aimam ngebo, er buru deiki di akupre ngeda, adipapu er buru di burupra, kot susu jeramu ngebo, er dumsisi amul damai iriamu tara, yapi likeipmaryaipu lingdinkamrure. Ange utopu, angebo er dumsisi buri, pamu buru du deiki cap, er yan du dumsisi tarange, weik yan du deiki cap, likeipkamre. Tonda, sun mali kupmenge keca, daemna cap, yo pununa cap tep, kange mun tenenange kaukemna tep, gam keca popra, yapi karepmanguaipu, ayapi deiki ton likeipkamre. Ukupyopda, tek sisi kot susu jeramu ngeboda, konum telep kupkamre ja. 18 Tonda, asaitun minyak mokon ton, imam ngebo er buru tang deiki tupa akapmare ngeda, adipapu dopra, asusu jeramu ngebo, er giso deiki dingdinkamre. Ukupre dingeda, aimam ngebodi, angebo er susu jeramudi mali kamunge, ‘Allahdi kaukepredi, er mali kuramunge gum kupra deipkamemer’ tenen, apel ton dopkamre.

19 Ada, aimam ngebo dipapu, asusu jeramu ngebo, ‘Er mali kuramemeunge kaukepkumemer’ tenen, mali kupne keca pununa tep karen keca yuma dopra, Allah tep karenkamre. Ada, ‘Allahdi angebo er mali kuramunge kaukepredi, gum kupra deipkamemer’ tenen, apel ton donkamrure. Ange konum karepre dingeda, uku dongopkure gam keca ton, popkamarure. Ada, ‘Angebo er mali kun keca yuma tep kaukepredi, telep kudinkamre’ tenen, agam keca popredi, ketenepkamrure. 20 Ukupre dingeda, imam ngebo adipapu akeca dopra, uku dongona tep keca, gel pala di taplakra yakra keteneipyaipu bena, uku dongonkamre. Ukupyopda, imamdi angebo er mali kun keca pununa cap, telep kudina cap tep, apel konum dopyopda, apel dopna deiki di, ‘Angeboda, konum pio telep kupre. Ukutaruda, erda Allah Yahweh, er damai ka di yakana telepe pua,’ tenepredi, penkamrure.

21 Dinino, asusu jeramu ngeboda, kan-kanpu kuramredi, akaren keca yuma pio men kupmanto ngebo kuramyopda, er mali kun keca kaukemnange daemna cap, yo pununa cap tep, jem domba bisam mi tenpu dekankamrure. Ukuprepa, imam ngebodi akeca dopra ‘Allah dinkamre’ tenen, er buru di akeca erepra benbenepkamre ja. Tonda, yuk ngeda, tepung pio telepnge, tenpu kilogram cap, minyak Saitun me mokon cap, purupra ketenepredi, er mali kun keca kunumna cap, pununa cap tep, dekankamrure. Tonda, minyak Saitun co du mokon, seper tiga liter cap deriyakankamre. Ange yumada, Allah Yahweh tep karenkamrure. 22 Ange utopu, er dipapu ma butene, ada Be ma utopu gum dingeda, Yal ma utopu ma ton doupra yakankamrure. Ada er akapretopu, tonda er kunuptutopu dekankamrure. Ama tenpu ngeda, er mali kun keca kunumna cap, pununa cap, daemna cap tep karenkamrure. Ma butene ngeda, ‘Allahdi ne mali keca kaukepneredi, gum kupra deipkamner’ tenen, uku dongona tep, karenkamrure.

23 Uda, ue ban bari tumida, kot susu jeramu ngebodi, ‘Ne telep kupkuner’ tenen, akeca yuma dopra, sun imam neng damai dekankamrure. Ada, Allah Yahweh cap, nimi cap antamdana tep tenda ati buplan damai doupra deriyakankamrure. Ada, Allah Yahweh, er damai dekankamrure. 24 Ukupre pangeda, aimam ngebo kot susu jeramu ngebodi, ‘Ne mali kupsi keca tep kange mun kange doununada, kaukepneredi, punupra daepkamner’ tenen, domba mi cap, minyak saitun me mokon seper tiga liternge cap yumada, dopropredi, ‘Allah Yahweh erdi epredi, kange deipkamser’ tenen, buru di doupra erepredi Allah er damaipu benbenepkamrure. Ada Allah tep karenkamrure. 25 Atep, susu jeramu ngebo er mali kun keca tep, kange mun kange douramrenge daemna cap, yo pununa cap tep, imam ngebo kareprepa, er dipapu, er duyanmare domba bisam mi popkamre. Popyopda, yapi yambulanun ton dopropredi, er dumsisi buri du di burupra, asusu jeramu ngebo er dumsisi amul deiki tara ton lingdinkamre. Ange utopu, er dumsisi buru dinin, pamu buru du deiki cap, er dumsisi yan dinin, ila yan du deiki cap likipkamrure. Ada, ‘Angebo telep kupkamre’ tenen, kunkamrure.

26 Tonda aimam ngebodi, minyak saitun me mokon metekanun ton dopra, er pe tebalal tara buru tang deiki ton dikra derinkamre. 27 Ukupre dingeda, aminyak me metekanun ton, er dumsisi buru tang deiki akapre ngeda, aimam ngebo er buru deiki di doupra, ue yoneitam bari deiki di Allah Yahweh er ati damai gege peprepa, emberepa, dourbena palepkamrure. 28 Konum kupyopda, minyak mokon yambula di, er buru deiki tupa men di dikeipmare ngeda, men di yapi keca dopra lingdiryaipu, aminyak me palepmarenge peda, lingdinkamre. Ada, asusu jeramu ngebo, er mali kupu keca tep, kange mun kange teneramunge daemna cap, yo pununa cap tep, tonda angebo telep kudina tep, yapi dikeipmauaipu, er dumsisi amul deiki tara likeipkamre. Tonda, er dumsisi buru dinin, pamu buru du deiki cap, dumsisi tara yan dinin, weik yan du deiki cap, likeipkamrure. Ayapi keca lingdinaipu bena, minyak me mokon ton likeipkamrure.

29 Ange utopu, imam ngebo er buru tang deiki minyak mokon ton tupa akapre ngeda, ‘Adipapu angebo telep kupkamre ‘tenen, er giso deiki dingdinkamre. Ukupkamrura deiki di, kot susu jeramu ngebo, er mali kun keca daemna cap, tonda, er telep kudina cap tep, kupkamrure. Ange konum telep kupyopda, Allah Yahweh er damai ton yakankamrure. Allah cap dukdongopra kikiman teleppu kunkamre. 30 Tonda, kot susu jeramu ngebo, erdi duyanmare Be ma ukupu nge cap agum dingeda, yalma ma utopu ma ukupunge cappu duyanmaredi deipmare ngeda, aimam ngebo dipapu dopra Allah tep karenkamre. Ada, aduyanmare ngebo kunupmantonge tep pepne. 31 Ama butene doupra yakankamre. Tenpu ngeda, er mali keca kaukemna cap, daemna cap tep, duyakankamre. Ton tenpu ngeda, er mali kun keca daemna tep, uku dongopmengepa, adeiki di er mali kuramre keca gum kupra derina tep karenkamrure. Tonda, roti dana deiyo keca tepung terigu do, yakung do, ange ton duyana deipkamrenge peda, imam ngebodi Allah tep karenkamrure. Ange ukupnopda, aimam ngebodi, angeboda ukupmara cadi, ‘Allah Yahweh er ati damai bena, ‘Allahdi angebo er mali kun keca daepredi, telep kweipkamre’ tenen, karenkamrure. Ukupnopda, ‘Erda konum telep kupmare,’ tenenkamre. 32 Aupu pepman ngeda, tenpu ngebodi, domba bisam do, yuk kunumna weik keca do, pio tek sisi pio men kunupmanto ngebo ton, er nong bol deiki kot susu jeramrepane, ‘Telep kweipkuner,’ tenepra kunkamrenge tep, “Ukunkamrume,” pepra deipne. Allahdi pepu.

“Ati pumbon lyun keca lyuredi tong peryopda, ukunkamrume,” peipu upu

33 Allah er si Yahwehdi, Musa cap, Harun cap tep pepu. 34 Nedi sun tep Kanaan mutu karepsenepa, bena wekmumdi, amutupu talepra kunkamrum taru yumada, apeipkusentopu kunkamrume. Israel nesala sun ati dopra kunkamrumai yumada, ne Allahdi karepsenyopda, sun ati pumbon lyun keca lyupredi, tong weik perepa, ‘Uo, nun ati pumbonda, kot susu konum kunmare,’ tenepmumnyopda, ukunkamrume. Ada, akot susuda, ne damai di dopra deipsenepa, sun petenkemna tep, sun damai yakankamsere. 35 Akange mun pu deiyo keca, sun damai deipsenyopda, ware nesala do yuma, sun kayapu neng ati yumada, kot susu talepredi, tong peseryopda, adipapu imam neng damai tep, lap peryankamrume. Ada, sundi, “Uo, ne ati pumbonda tong keca ton kapmanere,” pepra lap peryakankamrume.

36 Lap pepmumpa, Imamdi akati pumbon lyunmaredi, tong penmare kot susu keca tep, kapul men diryare taru di, upu peiprepa, akati pumbon neitamai kamre keca yumada, bura tarapu kolupra dokotemkamrume. Ada, ‘Akati neitamai ukupmepepa, mali kun keca ton men kunkamre’ tenena tep kunkamrume. Ukupmumnyopda, aimam ngebo yaredi petenkemna tep, ‘Kot susuda, akati pumbon ton tupa akapmar do?’ tenen, diryankamre. 37 Akot susu jeramredi, lyupra tong peramre keca yuma tep, dipembankamre. Dipembankamre taruda, akati dela taramaida, peten kemdina tep ‘Er urasinda poronkamre do, binge yala kunkamre do?’ tenen, akati dela deiki neitamaida, ‘Ila ikin kupmarpa, dela deikipu gum dinin, adela pumbon konum akapmar do?’ tenen, dinkamre. Kot susu deiyo keca utopunge akapyopda, imam ngebo er adipapu akati tapra, bura tara benkamre. 38 Aimam ngebodi, ukupra dipetepyoda, akot susu deiyo keca utopunge ton weik akapyopda, akati pumbon di tapra, bura beredi, akati buplan dekdongopredi, ue yoneitam bari tumi dakunkamrure. Ataru neitamaida, nimi ton pio akati neitamai men wengbankamenge.

39 Yoneitam bari tumi konum kupyopda, imam ngebo kange di tamupra, akatipu yaredi, ‘Konum telep kupu do, gum do?’ tenen, kot susu petenkemna tep yana dipembankamre. Ukupra dipetepyoda, akot susu deiyo keca utopunge weik, akati dela pumbon konum akapyopda, imam ngebodi ukunkamrure. 40 Akati yana dipetepre dingeda, er aimam ngebodi peiprepa, akati dela taram deiki yumada, amali keca kot susu jeramrenge do, susu gala do yapun do, deamredi tong peramyai yumada, yana dipetepredi, upenkamrure. “Akot susu deiyo keca beamre ati dela gel yuma uruprapmumdi, beamyai yuma pauprapmumdi bura tara mali kuramredi, lyupra tong peramre keca donongmengaipu, dopkurume. Ada Israel nesala kunungai damai gum dinin, sun ati tapra yukai, yambul karenaipu dubena dopkurume,” penkamre. 41 Tonda, imam ngebodi upu peiprepa, yuk nengdi, akati dela pumbon cap, akati bura tara cap, ati dela paledongon keca pelester menopnge yuma, urupropkamenge. Ukupmengepa, imam ngebodi, “Amali keca yuma dopra, sun Israel yala nesala kunungai damai gum dinin, sun ati tapra yukai, yambul karenaipu dubena dopkurume. Ada, bura tara mali kuramredi, lyupra tong peramre keca donongmengaipu, bemumdi dopkurume,” penkamre.

42 Ukupmengopda, aurupra dokotepmum gel, yo punupra derina tep nengeda, adipapu ukupu gelpu punupra deipkurume. Akati dela taramai ukupu gel deipmumnyai yumada, paledongon keca, er si pelester ukupu ngepu palepra deipkurume. Ada, ‘Ati taramai urasinda, telep kupkamre’ tenen, paledongon keca, er si pelaster tep pepne. 43 Ukupra men di lyuramrenge ton urupra bura tara konum dopmengopda, ati taramai paledongona tep keca, er si pelester ukupu ngepu palepra konum deipmengedi, ange yuma urupra seng pepmenge pangeda, akati tali dakuamyanen, amenda taru aimam ngebodi akati kange di ton cap dipetepkamre. 44 Dipetepredi, kot susu deiyo keca ton tupa akapyopda, akati pumbon akeca konum tapakra weik ton cap akuryopda, sundi utenenkamrume. ‘Gume akati kange di utopu konum kupmara tep, tek sisi kot suse ila kange mun nge akati konum akapmare. Angeda, yuk nesala sun nong deiki sakronmantonge kurure,’ tenenkamrume. Akatida konum mali kurura cadi, Allah er kangeda, ‘Akatida, songe,’ tenerure. Ware nesala do yuma, akati pumbon wengbana gume. Akati dam bana do, wengna do, konum kupmengopda, Allah er damai ton men yakankamenge.

45 Akati neitamai malipu kupyopda, adipapu urumtamna pua. Ada, imam ngebodi peiprepa, yuk nengdi akati deipra domenge gel cap, dela co cap, palepra deiyamenge keca pelester yuma capda, paupra uruptapmengedi, akati bura tara mali kuramre keca donongamengaipu donokamenge. Ada, Israel nesala kunungai damai gum dinin, sun ati tapra yukai, yambul karenaipu dubena dopkamenge. 46 Tonda, ware ngebo do, akati urumtamna kapul taru di, akati menmena wekre ngeboda, amali kun keca damai konum benmarura cadi, ataru dipapu, apio kaprepanen, keteng dangbare taru neitamai yumada, Allah er kangeda, ‘Angebo konum mali kweipdanmara cadi, ne damai ton men yakankamrure,’ tenenkamrure. 47 Ange utopu, ware nesala do yuma, amali kamre ati pumbon wekra mapmenge nesalada, sun opkal yuma me kunkamnunge. Utopu, akati pumbon di, jen jepmenge nesala peda, adipapu sun opkal yuma, telep kupra me kunkamnunge.

48 Dinino, imam ngebo kange di tamupra akati diryare taruda, ange yuma dipembanmarepa, kange di ton lyuna cap, tong pena cap men kuramredi, paledongon keca pelester di getepdongomengetopu kamrepa epyopda, er aimam ngebodi, “Akatida, konum telep kupmara cadi Allahdi akati tep kange deipre,” penkamre. Atep, ‘Pumun di akati lyuramudi tong peramupa, aceida ukuamu dinin, konum telep kurure. Tek sisi konuma, kot susu jeramu ngeda, konum gum kupmare,’ tenenkamre. 49 Tonda, akati pumbon konum telep kamrepa, epre dingeda, imam ngebo erdi ma butene cap, cemara co cap, bi wol tapu kirmizi cap, metek co teru er si hisop co, tenpu koupna ton cap doronkamre.

50 Ukupre dingeda, tenpu mada, amali kamrenge er kunumna tep, popre dingeda, tu di dopra ketkemdinung mau belanga di embaramre me pio telep me bungna deiki tarapu, ama popkamre. 51 Ange ukupyopda, imam er dipapu, cemara co cap, bi wol tapu kirmizi cap, hisop co teru koupna tenpu cap, ma ton tupa gam kunmarenge cap, ange yuma tapakra, men di telep yo me embaramya deikipu popmare ma yapi doupra deipmarenge pumbon dongopkamre. Akeca-keca yuma, apopmare ma, er yapi pumbon dongopredi, yapi buruprapre dingeda, akati pumbon neitamai yuma cap, akati bura tara cap, embankamre. Ukupre dingeda, ayapi bepmare keca yumada, gege peprepa, akati dela yuma dourbena palepkamrure. Akupkamre ngeda, yoneitam bari deiki di kupbankamre.

52 Apel yuma dopkamrura deiki di, men taru di akati kot susu deiyo mali keca akamupa, malipu kuramu dinin, akati telep kudina tep, apopmare ma yapi cap, telep yo embaramre me cap, bi wol tapu kirmizi cap, hisop co teru koupna tenpu cap, ma ton tupa gam kunmarepa, gam kepman loptapkamrenge cap yumada, adeiki di akati telep kupra deipkamrure. Konum kupyopda, ‘Akati konum telep kurure,’ tenenkamrure. 53 Ange yuma me kupra konum telep kupyopda, imam ngebodi agam tupa kunmare mada, adipapu tamupra loptaprepa, sun Israel nesala kunge mutu di tapra, bura tarapu tali lakra bankamrure. Ange-ange yuma pel dopkamra deiki di, ‘Allahdi akati mali kwamunge yuma, gum kupra deipkamre’ tenen, akati pumbon mali kamre keca konum me kupyopda, akati yumada, pio teleppu kupkamre. Ataru dipapu akati kange di ton cap wengbana telepe pua.

54 “Ange ukunkamrume,” peipsi ngeda, kot susu nong bol deiki jena do, giso gapum jena do kuseredi, ila tau pena pu do, aila kange mun keca talepseryopda, ne Allahdi, “Ukunkamrume,” pepsene. 55 – 56 Ange utopu, ila kange mun kot susu tep nengeda, asusu talepseredi leng-leng pena cap, susu dila bungsingina cap, yapun turungna cap, susu nong pumbon jena cap, kuseredi sun ati pumbon do, opkal deiki do, bepseredi lyupra tong peseryopda, akeca ka di telep kudina tep nengeda, apeipsentopu kunkamrume. 57 Aupu peipsendi, amali keca talepsere pangeda, “Ukunkamrume,” peipne topu, angepu talepra kupmumnyopda, adeiki dipapu, akot susu tep, ‘E, angeda, konum telep kupra kunmare, dinin angeda tupa jenmara cadi, malipu kurure,’ tenen kael kepkamrume. Atep, ila kange mun kot susu jeramrenge tep, “Angeda ukunkamrume,” konum lap pepsene. Allahdi pepu.