Leviticus 15

Nimi cap, nerapu cap, mali keca embasere pangeda, “Ukunkamnunge,” pepu upu

1Allah er si Yahwehdi Musa cap, Harun cap tep pepu. 2Apepra deipnedi, “Ukupra-ukupra kunkamrume, peipne upu, Israel nesala tep lap perbenkamrurume,” pepu.

Sundi Israel nesala yuma gekena tep upepkamrume. Sun kan-kan neitamai di, nimi ton pu jeredi yapun utopu kupra, lin kun bisi di yapun utopu kupra me embare pangeda, ‘Akecada pio mali pua,’ tenenkamrume. Apu jerepa akapre taruda, anengda Allah er damai ton men yakankamenge. 3Amali keca talenkamser ngeda, yapun tupa embaramre taru pe, embaramre dinin, keana taru neitamai di, gum kuprepa, angebo talipu er nong pumbonpu tupa kupre taru peda, Allah er kangeda, ‘Akecada pio mali pua,’ tenerura cadi, sun peda ange kael kepra tenenkamrume. Akeca akapre taruda, anengda Allah er damai ton men yakankamenge. 4Atep ware ngebo do yuma, lin kun bisi di yapun utopu kupra me embaredi, apu talepre ngebo, er kunkamyai cap, er bungnai cap, er manai cap yuma peda, malipu kunkamre. Allah er kangeda, ‘Apu yalada, pio mali pua,’ tenerura tep pepne.

5Tonda, ware nesala do yuma, lin kun bisi di yapun utopu do, me utopunge do kupra embaramrenge, amali keca er si lenan pu talepredi me do, yapun do, embaramre nengda, yuk nengdi angebo er manai talepmengopda, sun peda konum mali kweipdanunge. Atep, sun nong cap, sun opkal cap, pio telep kupra yo telep me di me kupra derinkamenge. Ukupkameng dinin, akeca bepmenge taru di dipra, akeca tupa akwamretopu, keteng komuni neitamai yuma daneitam taruda, Allah er kangeda, ‘Angeboda, konum mali kweipdanmara cadi, ne damai ton men yakankamre,’ tenerure. Dinino, keteng dangbaryopda, Allah er kangeda, ‘Ukuda ka di ton konum telep kupkamre,’ tenerure. 6Angetopu, ware nesala do yuma, alin bisi di yapun utopu pu jeramre ngebo er bungamyai deikipu bukmengopda, ‘Amali keca palepmaser do?’ tenen, sun nong cap, sun opkal cap, pio telep kupra yo me di me kupra derinkamenge. Ukupkameng dinin, apu talepre ngebo, er bungnai deiki bukmenge taru di dipra, keca tupa akwamretopu, keteng komuni neitamai yuma kaprepanen, daneitam taruda, Allah er kangeda, ‘Angebo konum mali kweipdanmara cadi, ne damai ton men yakankamrure,’ tenerure. Dinino, keteng dangberyopda, Allah er kangeda, ‘Ukuda ka di ton konum telep kupmare,’ tenerure.

7Tonda, angetopu, ware nesala do yuma, alin bisi di yapun utopu pu jeramre ngebo, er nong talepmengop do, talipu bepmenge do, ‘Amali keca palepmaser do?’ tenen, sun nong cap, sun opkal cap, pio telep kupra yo telep me di me kupra derinkamenge. Ukupkameng dinin, apu talepre ngebo, er nong bepmange taru di dipra, akeca tupa akwamretopu, keteng komuni neitamai yuma daneitam taruda, Allah er kangeda, ‘Angeboda, konum mali kweipdanmara cadi, ne damai ton men yakankamre,’ tenenkamre. Dinino, keteng dangbaryopda, Allah er kangeda, ‘Ukuda kange di ton konum telep kupmare,’ tenerure.

8Tonda, alin bisi di yapun utopu pu jeramre ngebodi, er silong tulurtamamrepa, yuk nesala, sun nong palepyopda, ataru dipapu sun peda konum mali kununge. Atep, ‘Amali keca palepmasera tep, mali konum kunmape’ tenen, sun nong cap, sun opkal cap, pio telep kupra yo telep me dipapu, me kupra derinkamenge. Ukupkameng dinin, apu talepre ngebo, er silong tulurtamamrepa, yuk nesala sun nong palepmare taru di dipra, akeca tupa akwamretopu, keteng komuni neitamai yuma kaprepanen, daneitam taruda, Allah er kangeda, ‘Angeboda, konum mali kunmara cadi, ne damai ton men yakankamrure,’ tenenkamre. Dinino, keteng dangberyopda, Allah er kangeda, ‘Ukuda kange di ton konum telep kupmare,’ tenerure.

9Tonda, ware ngebo do, alin bisi pu taleamre ngeboda, er linkun bisi di yapun embare ngebo, er kuda bisa deiki bana tep, bungamre keca er sida pelana, abungkamrai cap yumada, malipu kudinkamre. Ada, ‘Akeca er nong bepmara cadi, apu deiyo keca konum palepredi, sangdongonapu kunkamre,’ tenena tepa. 10Ware neng do yuma, apu taleramre ngebo er kuramredi bungamyai cap, taleramre keca cap, er kenengamre opkal cap, beramre keca yuma capda, mali pua. Atep, yuk nesaladi, amali keca talepmengopda, sun peda konum mali kupra deridanmange. Akeca talepmenge taru di dipra, aketeng komuni neitamai yuma kaprepanen, keteng dangbare taru neitamai yumada, Allah er kangeda, ‘Angebo konum mali kunmara cadi, ne damai ton men yakankamrure,’ tenenkamrure. Amali keca tupa akwamretopu, keteng wengbankamre. Mapmanga berekyopda, kange di konum teleppu kunkamenge.

Tonda, angebo er kuramre keca dopra yukai dubenge nengda, sun peda konum mali kudidanmange. Atep, sun peda, adipapu me gengdona cap, sun opkal me kuna cap kunkamnunge. Akeca talepmenge taru di dipra, akeca tupa akwamretopu, keteng komuni neitamai yuma kaprepanen, daneitam taruda, Allah er kangeda, ‘Angeboda, konum mali kunmara cadi, ne damai ton men yankamre,’ tenerure. Dinino, keteng dangberyopda, Allah er kangeda, ‘Ukuda ka di ton konum telep kupmare,’ tenerure. 11Tonda, apepmasen utopu keca talepredi, er nong neitamaida, linkun bisi di yapun do, me do embaramre ngeboda, er buru me pio men kupyopda, mali kunkamre. Ukupya deiki, er kuramrenge yuk neng beneprur tep, akeca talepre angebodi, yuk neng talepyopda, aneng peda konum mali kununge. Atep, angebo talepre nesala yumada, sun opkal yumada me kuna cap, sun nong pio me gengna cap kunkamnunge. Apu taleramre ngebo, er nong talepmenge taru di dipra, akeca tupa akwamretopu, keteng komuni neitamai yuma kaprepanen, daneitam taruda, Allah er kangeda, ‘Anesalada, konum mali kunmanga cadi, ne damai ton men yakankamnunge,’ tenerure. Dinino, keteng dangberyopda, Allah er kangeda, ‘Ukuda ka di ton konum telep kupmange,’ tenerure.

12Tonda, apu taleramre ngebodi, dopra pel doramre keca yuma peda, mali kupkamre. Ukupmantoda, tu di dopra, ketekemdinung mau, er sida belanga, talepyopda, konum mali kupmara cadi, adipapu ame mau copra donkamnunge. Dinino, co di ketekemdinung keca yala-yala yumada, apu taleramre ngebodi, dopra pel doramre keca yuma peda, mali kupkamre dinin, akeca pio telep kupra me kupmengopda, konum kange di telep kunkamre. 13Uda, Ware ngebo do, er nong neitamaida linkun bisi di yapun do, me do embaramre ngeboda, amenda taru kaikrepa, konum telep kupre ngeboda, er nong telep kupre tumi di nukra, adipapu yoneitam bari tumi ton cap mapra dinapu kunkamre. Diramrepane, tupa telep kupyopda, yo me embaramyai neitamai di, er nong pio telep kupra me gengkamre. Tonda, er opkal pio telep kupra me kunkamre. Konum pio telep kupra me kupyopda, ‘Angeboda, er pu konum kaikmaredi, ka di ton konum telep kunmara cadi, Allah damai ton yakana telepe pua,’ tenenkamrume.

14Ue ban bari tumi konum mapyopda, ma butene, ada Yalma ma do, be ma do, menmena weni deipmare ngepu, doupra yakankamre. Doupra yaredi, Allah Yahweh cap, nimi cap, antamdana tep, opkal bol di keana dodin tenda ati buplan damaipu yaredi, aduyanmare ma butene dopra, imam ngebo er tep yana karenkamre. 15Amada doupra, Imam ngebo er damai yana kareprepa, aimam ngebo erdi Allah Yahweh tep karenkamre. Ma butene cadi, tenpu ngeda, ‘Apu jeramu ngebo er mali kun keca tep, Allahdi kaukepredi, ange yuma daepkamre,’ tenena tep karenkamrure. Ton butene mada, apu jeramu ngebo, er mali kun keca yo pununa tep, imam ngebodi ama poprapredi, uku dongonkamrure. Imam ngebodi ange pel butene konum ukupra dopyopda, ada angebo er mali kun keca kaukepra daemna tep konum dopropmarura tep, apu jeramu ngeboda, konum telep kunmara cadi, kange di ton cap Allah Yahweh er damai yakankamrure.

16Ange utopu dinin, yuk upu ton pepkune. Ada, ware ngebo do yuma, ton er yapida lin kun bisi di ul me utopunge embare ngeda, er nong yuma bamdankamra cadi, telep kupra me pio gengkamre. Akeca baprepane, ataru di dipra, akeca tupa akwamretopu, keteng komuni neitamai yuma daneitam taruda, Allah er kangeda, ‘Angeboda, konum mali kweipdanmara cadi, ne damai ton men yakankamre,’ tenerure. Dinino, keteng dangberyopda, Allah er kangeda, ‘Ukuda kange di ton konum telep kupmare,’ tenerure. 17Tonda, ware yala keca do yuma, angebo er lin kun bisi di embaramre me bepkamre ngeda, lyom opkal bol deiki do, nimi nong bol do, nerapu nong bol do, akeca bepyopda, ange peda konum mali kupmare. Atep, adipapu anesala sun nong yuma cap, akeca bepmare opkal cap pio telep kupra me kunkamenge. Akeca bepmare taru di dipra, tupa akwamretopu, keteng komuni neitamai yuma daneitam taruda, Allah er kangeda, ‘Anesala cap, akeca cap yumada, konum mali kunmara cadi, ne damai ton men yakankamenge,’ tenerure. Dinino, keteng dangberyopda, Allah er kangeda, ‘Ukuda ka di ton konum telep kupkamenge,’ tenerure.

18Ange utopu ton, ner tenpu cap, nimi cap antapdarengedi mapmarengepa, angebo er lin ku bisi di akeca embare pangeda, angebo pe aner pe, sun butene adipapu telep kupra me gengkamrenge. Akeca kupmarenge tep, me gengmarengepane keteng dangbankamrure. Deiyoda, akeca sun nong baprepane, ataru di dipra, aketeng komuni neitamai yuma akaprepanen, keteng dangberyopda, Allah er kangeda, ‘Anesalada, konum mali kweipdanmarenga cadi, ne damai ton men yakankamenge,’ tenenkamrure. Dinino, keteng dangbaryopda, Allah er kangeda, ‘Ukuda ka di ton konum telep kupmarenge,’ tenerure. 19Uda, yuk upu ton pepkusene. Tenpu ner ton er yapi embare taruda, ange peda, mali keca utopunge cadi, atumi di dipra yoneitam bari tumi deiki di anerda mali kurure. Allah er damai ton men yakankamrure. Ataru neitamai yumada, aner pe, ware neng do yuma, aner kikiman mana do, er bol bena do, konum kupmengopda, ange peda mali kun keca cadi, amali kupmarepane, keteng dangbankamre. Ada, ataru di dipra, akeca tupa akwamretopu, keteng komuni neitamai yuma kaprepanen, daneitam taruda, Allah er kangeda, ‘Aner cap, aner kikiman bepmange nesala cap, konum mali kweipdanmanga cadi, ne damai ton men yakankamenge,’ tenerure. Dinino, keteng dangberyopda, Allah er kangeda, ‘Ukuda kange di ton konum telep kupkamenge,’ tenerure. 20Tonda, ayapi kunmare nerda, ware keca yala do yuma, er cap kikiman bungna cap, mana cap, bol bena cap yumada, mali kurure. Akeca yumada, aner bepyopda, amali keca tupa akupmarepapu cadi, mali kurure.

21– 22– 23Tonda, ware ngebo do yuma, aner maramre asonai cap, aner bungamyai capda, amali keca beramrura cadi, angebodi akeca talepyopda, adeiki di konum malipu kupra deridarure. Ada malipua. Yapi tupa embanmare ner cap, er maramyai cap, bungamyai bepyopda, adipapu angebo er opkal yuma me kupredi, er nong yumada, telep kupra me gengkamrure. Ada, ataru di dipra, akeca tupa akwamretopu, keteng komuni neitamai yuma kaprepanen, daneitam taruda, Allah er kangeda, ‘Angeboda, yapi embaramre ner bapmara cadi, konum mali kunmare. Atep, ne damai ton men yakankamre,’ tenerure. Dinino, keteng dangberyopda, Allah er kangeda, ‘Ukuda kange di ton konum telep kupmare,’ tenerure. 24Ange utopu, nimi tenpu ngebo ton, yapi embanmaredi tong penmare ner cap, antapdarengedi kikiman maprengopda, angebo er peda, malipu kurura cadi, tumi yoneitam bari deiki di er yuk mankamrure. Tonda, angebo ayoneitam tumi neitamai di, er mapkamrai peda malipu kupkamrure. Atep er maramyai yuma mapyopda, adeiki pio mali kunkamra cadi, er pe, erdi bamamre keca peda Allah damai men yakankamre.

25Tonda tenpu ner ton, war-war yuma er yapi embare taru utopu gum dinin, yuk tali taru neitamai dipapu, er linkun bisi di yapi embare pangeda, angeda mali. Ukupmantonge ton pepkune ada, war-war yuma er yapi embaramrenge utopu gum dinin, tupa weika di embaramre pangeda, kange mun kange doupra kunkamre. Er yapi embaramre taru neitamai yumada, akecada mali keca cadi, Allah er damai ton men yakankamrure. 26Aner er yapi embaramre taru neitamai yumada, er maramre ason do, er bungrurai do yumada, pio mali kurure. Akecada bamrura cadi, ataru neitamaida, ange yumada malipu kudidarure. 27Ware neng do yuma aner yapi embaramredi beramyai bepmengopda, ange peda mali pua. Angeda malipu kurura cadi, sun pe, sun opkal peda, konum mali kudidanunge. Ukupmengopda, adipapu pio telep kupra me kuna cap, nong yuma me gengna cap kunkamnunge. Ada, akeca bepmenge taru di dipra, akeca tupa akwamretopu, keteng komuni neitamai yuma kaprepanen, daneitam taruda, Allah er kangeda, ‘Angeboda, yapi embaramre ner bapmara cadi, konum mali kweipdanmara cadi, ne damai ton men yakankamre,’ tenerure. Dinino, keteng dangberyopda, Allah er kangeda, ‘Ukuda kange di ton konum telep kupmare,’ tenerure.

28Dinino, aner yapi embanmaredi, dakuramyanen, yapi konum dim pepredi, konum gum kupyopda, ataru dipapu anerdi nukbaramyanen, ue yoneitam bari tumi konum kupyopda, utenepkamre. ‘Gume, Allahdi peipseutopu, atumi konum kupmara cadi, Allah er kangeda, ‘Anerda konum telep kupmare,’ tenedankamrure. 29Ukupredi, ue ban bari tumi konum kupyopda, er akamrenge kunumna tep, ma butene yalma ma do, agum dingeda be ma do, butene ma ukupungepu doupra, Allah Yahweh cap, nimi cap antamdana tep ati, er si eremna ati buplan damai yaredi, Imam tep yana karenkamre. 30Ama butene doupra, yana karepre pangeda, aimam ngebodi aduyanmare ma dopropre dingeda, aner er mali kun keca kunumna cap, daemna cap tep, Allah karenkamre. Ton tenpu mada, er mali keca daepnedi kaukemna tep, ton tenpu ngeda, uku dongopnepa, telep kudina tep, uku dongonkamre. Ange yuma kunkamrumada, Imamdi aner er mali kun keca cap, er yapi embaramunge cap tep, telep kupra derina tep, apel doprepa, amali keca yuma kuramre nerda, ka tamupra Allah Yahweh er damaipu yakankamrure.

31Allah Yahwehdi Musa tep aupu yuma peipu dingeda, “Apeipne ngeda, kandi Isarel nesala yuma tep, pepmempa gekepmengedi, moupra kungedi, ato mali kun kecada, dan taru kuptu do, gum do, ange kupre taruda, ne Allah Yahweh ati pumbon neitamaida, pio men yakankamenge. Mali keca akapmaretopu, sun mankau di, ne ati damai yangopda, adipapu nedi sun tep wenepra poptapkamne. Atep, ‘Ukupkamser’ tenen, sun mali men kunkamnenge, ne atida sun kunkamenga kan-kan neitamaipu kunkamre dinin, sun cap mali keca cap akapyopda, ne ati damai yakana pio meme. Ada, sun Israel nesaladi mali keca akapre taruda, ne ati bo yana kupmengopda, ne si eremna ati peda mali kupserure. Ukupmengopda, anesala yuma denapu kunkamenge.

32Ange tep nengeda, ne konum lap pepsene. Ware yala mali keca do yuma, nesaladi amali keca talepmengepa, mali konum kweipdange taruda, “Sundi ukupra-ukupra kunkamrume,” pepra deipne upuda, moupra kunkamrume. Ada, nimi ton pu jeredi, lin kun bisi di yapun cap, me cap, yapi cap embare pangeda, nedi peipsene upupu talepra pio kunkamenge. 33Ange utopu, tenpu ware ner do yuma, er yapi embaramre taruda, mali konum kurura cadi, ne damai ton men yakankamrure. Aner peda, nedi, “Ukunkamrume,” pepsene upu kunkamrure. Tonda, ner do, nimi do, sun linkun bisi di, me utopunge do, yapi do, yapun do, embaramre pangeda, sunda konum malipu kununge. Tonda yapi embaramre ner, akeca tupa kunmarepapu, nimidi aner cap mapmengopda, adeiki di konum mali kudidanunge. Angeda, pio mali cadi, angebo peda ne damai ton men yakankamre. Er peda, nedi, “Angeda ukunkamrume,” pepra deipmasen upu moupra kunkamre. Allahdi Musa tep upepra deipu.