Lev 16 | XteSC | STEP | Harun er nyapu buteneda, sun pe kange dipapu, Allah er si Yahweh , er damai tali lupra bereiya deiki di, pio mali kupreipa, Allahdi uku dokotepupa jepupa, abutene neng deprei. Sun mali kuprei ngeda, kange moupra tenena gum dipapu, uku dopra, Allah er si eremna ati pumbon tali lupra wekreipa, Allahdi uku dokotepka deiki di, aneng poptapu. Allahdi, ‘Telepe, dakwapye,’ men pepudi poptapu.

Leviticus 16

Israel nesala, mali kuraminge tep, Allahdi tali lupra poptaptu dinin, sun yo pununa tep, Allahdi “Sun mali keca daemna tep, gam keca popra karenkamnerume,” peiamupa, pel dorami upu

1 Harun er nyapu buteneda, sun pe kange dipapu, Allah er si Yahweh ^{▼▼Yahweh – Allah er si, tek sisi ngeda, Yahweh kurure. Allahdi Musa tep, aupu katuai di lap pepu (Keluaran 3:15). Ibrani upu deiki di ‘YHWH’ sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH angepu sengnunge. Dinino, Allahdi Musa tep, “Gume, ne sida Yahweh kunerure. Asi Yahweh kael keprumdi, asipu erepra ne tep gispal donkamnerume,” pepu. Ibrani nesaladi huruf YHWH angepu sengnung dinin, ‘Angepu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua.}, er damai tali lupra bereiya deiki di, pio mali kupreipa, Allahdi uku dokotepupa jepupa, abutene neng deprei. Sun mali kuprei ngeda, kange moupra tenena gum dipapu, uku dopra, Allah er si eremna ati pumbon tali lupra wekreipa, Allahdi uku dokotepka deiki di, aneng poptapu. Allahdi, ‘Telepe, dakwapye,’ men pepudi poptapu.

2 Sun konum deprei taruda, Allah er si Yahwehdi Musa tep pepu.

Kan du bo Harun tep, upepkurume. “Kao, kan pe kange dipapu, tonda kan pe kange tenepmem taru dipu, Allah er si eremna ati pumbon, ada mambulai, Pio Telep Lengna Ati ^{▼▼Pio Telep Lengna Ati sekmupada, ‘Ada kurun ati kwamu,’ tenena gume. Aupu deiyoda, mali keca pio gumai, pio telep ati kupka tep, ‘Pio Telep Lengna Ati’, sengnupe. Akatida, imam-imam neng, sun ila deiyo ngebo dipapu, akati wengamudi, Allah si eremna pel doramu.} pumbon, tali lupra men wekamrume. Allahdi, ‘Akatida mem ati,’ peipseua tepa. Allah er si eremna ati pumbon, deripkotepu lyom opkal amnyo tara, tali lupra wekmemnyopda, Allahdi popkamkere. Deiyoda, co bekin deiki emas palepra, akati pum betapra deipinge, er sida Peti Perjanjianda, ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co bekin ketenepi. Tonda, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku upu dopra, apeti pumbon dongopi. Akeca, er sida Peti Perjanjian pepi. Ange kael kemna tep, Keluaran 39:35 dinkurume.} aco bekin buplan deiki damai men yatume. Abekin buplanda, ‘Allahdi nun mali keca daepseredi, gum kupra deipkamser’ tenen, derinung keca pio memai tepa. Tonda, Allah er pedi, abuplan deiki damai, dua kan-kan neitamai tengyakarura tep, acada pio memai, pio telep ati cadi, men betume. Kan du bo Harun tep aupu perberume.” Allahdi Musa tep pepu.

3 Upepudi aupu ton dukdongopra pepu.

Aupu ton Harun tep, “Allahdi upepkere,” pepra perbenkurume. Harundi ne si eremna ati pum, ne pedi tengyakanunai wengbenkure taru yumada, ukunkamrure. Harundi sapi bisam mi gemnge dopra, er cap, Israel nesala cap, sun mali kunge keca daemna tep, keteneipkamrure. Amenda, asapi bisam popbankamrure. Tonda, domba bisam gemnge dopra, duyakankamrure. Amenda taru, sun mali kunge keca kunumna tep, adomba popredi, uku dongopkamar dinin, kapula. Akeca karepkamnernge peda, Israel nesala sun mali keca lyemna tep, karepbankamrure.

4 Akeca konum ketenepre dingeda, ataru kunkamre ngeda ake. Allah er si eremna ati dinin, mambul ati er sida, Pio Telep Lengna Ati kapul men benkure taruda, mem ati pio telepai wekamra cadi, menmenada er nong yuma me gengkamrure. Me gekre dingeda, Allah cap, nimi cap antamdina deiyo neng kemamenge opkal, pio lek kurun opkal kenengkamrure. Ada er opkal amunge pe, tonda opkal bura tarange peda, kurun lengna opkalpu kenengkamrure. Ukupredi, alek opkal yalangepu dinin, lyomnge dopra, er deiyoteng koudongonkamrure. Ukupre dingeda, er giso yuma kurun opkal dipu getenkamrure. Alek opkal men kenekyopda, ne Pio Telep Lengna Ati men wektue. Allahdi upepu dingeda, aupu ton dukdongopra pepu.

5 Israel neng peirameng keca neitamai di, sun jem kambing bisam butene doupra, Harun tep karenkamenge. Angeda, sun mali kunge keca daemna tep, akambing butene popra, ne tep karenkamnerume, pepkene. Ange utopu, Israel nengdi jem domba bisam tenpu dopra, Harun tep karenkamenge. Ada, ‘Allahdi nun mali kun keca daepseredi, gum kupra deipkamser’ tenen, Harundi agem domba doupra popredi, uku dongopredi, ne Allah tep karenkamnerure. Kan Musadi, Harun tep uperbenkurume. Allahdi pepu.

6 Allahdi upepu dingeda, aupu ton lap pepu.

Uda, akarenkamnerur keca deiyo lape pepkune. Harundi er cap, er nerapu cap, er nyapu yuma cap, sun mali keca daemna cap, sun yo pununa cap tep, adipapu agem sapi bisam poprapredi, ne Allah tep karenkamnerure. 7 Ukupre dingeda, sun Israel nengdi kambing bisam gemnge butene karepkamengenge doupra, neda Allah, ne si Yahweh tep karenkamnerure. Ada, ne Allah cap, nimi cap, antamdana tep tenda ati, ^{▼▼tenda ati – Akeca gambar dina tep, Imamat 1:1 dinkurume.} ne si eremna ati buplan damai duyarepa, ne Allahdi dinkamne.

8 Agem kambing bisam butene tep nengeda, ‘Ange wepkun do, ange wepkun do?’ tenen, wena deiyo keca, er si undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} pel dopkamre. Angeda, co butene wepra tenpunge deiki ne si sekamre. Yuknge deiki, ‘Bura tara dokotemne kambing’ sekamre. Ukupredi asuru dina gum di, tenpunge tali lupra dopropkamrure. Ukupkamrada, tenpu kambing wepredi, neda Allah, ne si Yahweh tep karepkamnerure. Yuk kambingda, amenda taruda tali bura dokotenkamrure.

Deiyoda, Israel nesala sun mali kunge keca tep wenepra popsetene dinin, sun mali kuna yo pununa tep, akambing er nong deike, sun mali kuramenge keca dopra deipredi, akambing loptaprepa, nimi pio men kunge mutu neitamai, bura tara bendopkamrure. Ukunkamre ngeda er sida, ‘Azazel’ penkamrume. Akambing butene wena tep, undi pel donkamrure. 9 Ataru Harun undi pel dopredi, neda Allah, ne si Yahweh karena tep kambing konum wepre dingeda, akambing Israel nesala sun mali kuramenge keca daepra lyemna tep, akambing bisam popkamrure.

10 Dinino, undi pel dopra wenmarepane, Israel nesala sun mali kuramenge keca yo pununa tep, bura tara dokotemne kambing, ada Azazel kambing perami ngeda, adipapu loptapkamrure. Dinino, wepre dingeda, gam kepman adipapu ne si Yahweh, ne Allah damai duyankamnerure. Israel nesala sun mali kuna tep, adipapu wenepra poptapsetene dinin, sun yo pununa tep, akambing dopra amenda taru, Israel nesala sun mali keca er nong deiki deipnepa, Harundi loptaprepa, nimi men kunge mutu neitamai bendopkamrure. Angeda, ‘Ne Allah cap, nimi cap, antaptepedi, telep kupra kikiman kuptepe,’ tenena tep, Israel neng sun mali kun keca, akambing deiki deipnepa, akambingdi sun mali keca dopra, nimi men kunungai, bura tara katuai mutu neitamai bendopkamrure. Allahdi pepu.

11 Upepudi, aupu ton dukdongopra pepu.

Uda, Harun er cap, er nerapu cap, er nyapu yuma cap, sun mali keca tep, lupra poptaptene dinin, sun malinge daepra lyemna tep, adipapu jem sapi bisam poprapredi, ne Allah tep karenkamnerure. Ada, er pe cap, er nerapu cap, er nyapsilip pe cap, sun mali kun keca daepnedi, sun lyepkamna tepa. 12 Ukupre dingeda, er adipapu gel taplakra yakeipkai deiki di, gam keca popra uku dongoramre kalum tupa bupu kunmarenge doupra, yangdin mau pumbon ongopra keteneipkamrure. Neda Allah, ne si Yahwehdi dinkamne. Tonda, er buru butene di siltong telep keca, sikke utopunge doprapredi, ne Allah si eremna ati pumbon dinin, lelipdongomi opkal amutara duyankamrure. Ada Pio Telep Lengna Ati pumbon duyankamra tep pepne.

13 Anintong telep keca dopra, ne si Yahweh, ne Allah damai bentekredi, ‘Ne depnun’ tenen, siltong keca sikke utopu ngeda, uku deiki deipkamrure. Deiprepa, uku di nintong telep keca jepre pangeda, kete weik welepredi, betapra deami bekin singidongonkamre. Amambul bekin cap, abekin pumbon Allah mem upu peramupa, Musa sekeipupa abekin kipinge cap, abekin er mem buplan cap, ange yumada, kete weik welepredi singidongonkamre. Ukupre pangeda, Harun men epkamra cadi, men depkamre. ‘Nimi mali kun keca daemna tep, ne Allah cap, nimi cap antamdina tep, karen keca, abuplan deiki deiamengai jenek men epkamre’ tenen, kunkamrure. Allahdi pepu.

14 Upepudi aupu ton pepu. “Harundi sapi bisam popkamre ngeda, er yapi yambulanun ton, buru likropredi, amambul bekin urasin deiki gege peprepa, palerbankamrure. Ange utopu, ka di ton cap, sapi bisam yapi yambulanun ton buru likropredi, gege pepre ngeda, yoneitam bari taru di, gege peprepa, abekin buplan urasinai damai cap, abekin deiki tara cap, palerbankamrure.” Allahdi upepu dingeda, aupu ton pepu.

15 Ange konum kupre dingeda, ange ton kupkamrure. Israel neng sun mali keca daemna tep, Harundi kambing bisam popredi, er yapi yangdin keca pumbon dongopredi doupra, Allah ne si eremna ati pumbon, lyom opkal deridokotemnai amnyo tara dubenkamrure. Duberedi, sapi bisam yapi doprapredi, mambul bekin urasinai cap, abuplan deiki cap, buru di gege peprepa, palerbankamrurtopu, akambing yapi peda, abekin deiki gege peprepa palerbankamrure.

16 Akupkamrenge deiki di, neda Allah cap, nimi cap, antamdana tep tenda ati, ne si eremna ati pumbon dinin, Pio Telep Lengna Ati, mem ati tep, pukam kupra deipkamnerure. Israel neng, sun mali kunge keca yala-yala yuma cap, tonda Allah ne upu men gekenung nge cap tep, Harun akupkamrenge deiki di, ne Allah cap, nimi cap antamdana tep tenda ati pumbon dinin, Pio Telep Lengna Atida, pio mambulai pukam kupra deipkamrure. Apel yuma lap pepmantopu, Harundi, neda Allah, ne si eremna ati bura tarange pe, pio neitamainge peda, apel utopu pel dopredi, pukam kupra deipkamrure. Deiyoda, akati sun Israel nesala mali-mali kupmengedi kununga neitamai, ne si eremna ati domipa kurura cadi, sun mali kunga deiki di, akati mali kweipiya tep, akati pukam kemna pel donkamrure, pepkene. Allahdi upepu dingeda, aupu ton pepu.

17 Harundi neda Allah, ne cap, nimi cap, antamdana tep tenda ati, ada ne si eremna ati pumbon dinin, Pio Telep Lengna Ati wengbere taruda, tenpu ngebo ton cap, akati dinin, yambul bura tara ati Allah cap, nimi cap antamdina ati, er si Telep Lengna Ati, wengna gume. Ada, Harun er yuk, neitam ati er si, Pio Telep Lengna Ati pumbon pio memai wekredi, er cap, er nerapu cap, er nyapu yuma cap, Israel nesala yuma cap, sun mali keca daepra lyemna tep, pel dopkure taruda, yuk neng akati damai yuma wengbana gume. Israel neng yuma, sun mali kun keca daemna tep, Pio Telep Lengna Ati pumbon wekredi, mambul pel dopkure taru yumada, yuk neng yuma akati wengna pio meme. Allahdi upepu dingeda, aupu ton pepu.

18 Uda, ne Allah karena tep, gam keca popnedi, apopmau keca nong cap, yapi cap, gel taplakra yakeipyai damai yaredi, popmau gam keca adeiki deipkamrai tep nengeda, pukam kupra deipkamrure. Apel donkamre taruda, neda Allah, ne si Yahwehdi dinkamne. Ada, Allah si eremna ati pumbon, Pio Telep Lengna Ati pum tapra, ka di ton bura tara yaryopda, pala gel taplakra yakeipuai, gam keca popnedi, akeca deiki deipkamrai dam yaryopda, er buru di, yapi dopra gege peprepa, palerbankamrure. Ada, sapi bisam gemnge popmaunge yapi cap, tonda kambing bisam popmaunge yapi cap, yambulanun dopra, agel pala deiki sirik-sirik sapi bisam giso takke utopu keca belepra deipyaida, adeiki gege peprepa palerbankamrure.

19 Harun er buru di, yapi yambulanun buruprapredi, ue yoneitam bari di gel pala deiki sirik-sirik gege peprepa palerbankamrure. Akunkamra deiyoda, Israel neng sun mali kunge keca deiki di, apala gel taplakra yakeipuaida, konum mali kurura tep, amalinge daepra telep kudina tep, apel donkamrure. Gum dingeda, sun cap, ne Allah cap men antapdatepe. Allahdi upepu dingeda, aupu ton pepu.

20 Ange yuma konum kupredi, neda Allah cap, nimi cap, antamdana tep tenda ati, ne si eremna ati pumbon dinin, Pio Telep Lengna Ati ila memai cap, akati yambul bura tara, er si Telep Lengna Ati cap, uda gam keca popnedi, pala gel taplakra yakeipkai, adeiki deipkamrai cap, ayuma tep, mali keca konum daepredi, telep kupra deipyopda, kambing bisam gemnge gam kepman dopra, akati dam duyankamrure.

Akambingda, loptaprepa, nimi kuna gum mutu, katuai mutu neitamai, bendopkamrure. Ange deiyoda, Israel nesala sun mali kun keca akambing deiki deipra, bura dokoteprepa badonkamrure. Ukupra bura berya deiki di, sun mali kun keca dopra bankamrure. Allahdi upepu dingeda, aupu ton pepu.

21 Harun er buru butene di doupra, akambing bisam gam kepmanye giso deiki deipkamrure. Ukupkamrada, Israel neng sun mali kun keca tep, jenek kupra penkamrure. Ange utopu, neda Allah ne upu men gekepmengedi, tamnung neng mali kunge keca yumada, nimi gekenai katuai lap pepredi, akeca yuma akambing bisam giso deiki deipre dingeda, adipapu akambing lortamkamrure. Ukupyopda, akambing taprepa, nimi kuna gum mutu, bura tara katuai mutu neitamai, akambing badonkamrure.

Ataruda, konum keteneiamenge ngebo tep, wepra deipnedi, akambing dopra, bura mutu neitamai duberedi dokotepkamrure. Akambing tamupra pio men yankamre, dapio badonkamre. 22 Agam kepman jem kambing bisamda, konum wepra keteneipmenge ngebo gipra duberedi, akambing er giso deiki Israel neng sun mali kunge keca yuma doupra beredi, nimi pio men kunung mutu neitamai benkamre dinin, akambing bisamda, mutu katuai apu benkwaptapkamre. Allahdi pepu.

23 Akonum bere taruda, Harun adipapu, Allah cap, nimi cap, antamdana tep opkal bol di domi tenda ati, Allah er si eremna ati pumbon dinin, akati sida, Telep Lengna Ati wekredi, er lek kurun opkal arup taru kenekmaunge, ‘Ila mambulai, Pio Telep Lengna Ati wengbenkun’ tenen, kenekmau ngeda, bena kwiripra, akati pumbonpu derinkamrure. Allahdi pepu.

24 Upepudi aupu ton pepu. Ange konum kupre dingeda, akati pumbon dinin, er pe yuk tenpu telepai ton beredi, er nong me kupkamre. Ukupre taruda, arup taru er pe yuk opkal kwiripra deipmare ngeda, kange di ton cap kenekre dingeda, akati tapra bura bankamrure. Beryopda, er mali kun keca daemna tep, gam keca popredi, uku dongonkamrure. Ange konum kupredi, Israel neng yuma, sun mali kunge keca daemna tep, gam keca ton popredi, uku dongonkamrure. Ange deiyoda, ne Allahdi anesala yuma tali lupra poptu dinin, sun yo pununa tep, gam keca popnedi, uku dongonkamrure. Allahdi upepudi, aupu ton dukdongopra pepu.

25 Ukupyopda, sun mali keca daemna tep, jem kambing popmare ngeda, akambing meta doupra, uku dongonkamrure. Ada, pala gel taplakra yakeipkai deiki, gam keca danai tep, uku dongopra dankamrure. Uku dongopre pangeda, uku jeredi, kete welenkamrure. 26 Nimi gum mutu neitamai kambing loptapra dokotepkamrur deiyo ngeboda, adipapu Israel nesala damai men yanapre taruda, er opkal cap, er nonge cap, me konum gekre dingeda, tamupra sun Israel nesala kungai yankamrure.

27 Sapi bisam cap, kambing bisam cap, Israel nesala sun mali keca daemna tep yapi doupra, neda Allah, ne si eremna ati pumbon, ila memai Pio Telep Lengna Ati karenkamrure. Dinino akambing cap, asapi cap, abisam bol cap, tu cap, deiplyu cap, kwal tupa deipmarenge yumada, uku dongonkamrure. Uku dongopkamrur dinin, ada Israel nesala sun kungai bura tara, akeca yuma duberedi, uku dongoprepa, uku jedonkamrure.

28 Tonda abisam kwal tupa deipmarenge yuma, uku dongorbenkamre ngeboda, adipapu me gekredi, er opkal me kupyopda, er adipapu Israel nesala cap antamna tep, bura tara di, sun kungai tamupra yakankamrure. Allahdi pepu.

Mali kuraminge tep, ‘Allahdi lyepkamser’ tenen, pel dorami upu

29 Allahdi Musa tep pepu.

Ukutaru apepkusen upu yumada, pio tep, adipapu ukunkamrume. Apel yuma men tapkamrume. Ada ware yoneitamnge, awar neitamai ue dangol di dana tumi (tanggal sepuluh) deiki di utara tumi, konum kupre pangeda, sun dipru bouna di kupra, Allah er amutara kumumdi, jene jena gum, pel peda ton dona gume. Akunkamrum ngeda, ada sun Israel neng sisa peda, sun damai tengyakan neng peda, sun yuk mutu nesala dinin, sun kikiman kunge neng peda, sun yuma tep pepsene.

30 Sun yuma, “Ukunkamrume,” pepmasenada, mesum tep gume. Deiyoda, ake. Sun mali kuna tep adipapu poptapsetene dinin, atumida, sun mali keca yuma daepnedi, sun mali kun keca lyemna tep konum kupnyopda, ne kangeda, sun mali kun keca konum gum kupkamre. Atep, sun cap antaptepe. Ne Allah, ne si Yahweh damai tali lupra men yatume. Ne cap antamna tep, sun lek kupra, teleppu konum deipsenepa, sun mali keca konum gum kupyopda, ne damai yakana telepe.

31 Atumida, tenepmumdi, jene jena gum, tonda pel yala-yala yuma pel dona gum dipapu, dipru bouna di kuprumudi, neda Allah ne amutara kupmumnyopda, atumida pio tep, beipye peingna tumi kunkamsere. Angeda pio men tapkamrume, pio kunkamrume. Ne Allahdi pepsene.

32 Uda, orketeng tamunda, ne Allah cap, nimi cap antamna tep, mali kun keca lyemna pel dona deiyo ngebo, er giso deiki minyak dikipmengedi, neda Allah ne pel dona tep wepra deiprumu ngeboda, apel donkamrure. Ada, sun poptapsetene dinin, sun yo pununa tep gam keca popra, ne karena tep donkamrur pel tep pepsene. Tonda, wepkamrum ngebo, er nai pel doramu pel punupra dopbankamre ngeboda, apel donkamre taru yumada, erdi lek opkal, telep kurun opkalpu kenekamrure. Ne Allahdi pepsene.

33 Ukupre dingeda, gam keca popredi yapi dopra, ‘Allahdi nun mali kun keca daepra lyepkamsere’ tenen, pel donkamrure. Ada, ne Allah cap, nimi cap, antamdana tep tenda ati, ne si eremna ati, akati pumbon dinin, menmena ati, er si Telep Lengna Ati cap, tonda butene ati, pio memai, akati si Pio Telep Lengna Ati cap, tonda akati bura tara dinin, gam keca popra, uku dongopkamrurai, ada pala gel taplakra yakeipyai cap, telep kupra daepkamrure. Ada, ne Allah cap, nimi cap antamna tep, pel dona deiyo neng, sun mali kuna cap, tonda tali Israel nesala yuma, sun mali kunge keca cap, akeca yuma tep, gam keca popra karepnerepa, telep kupra daemkamsene. Ada, ne Allahdi, “Sun mali keca lyemna tep, apel-apel ton donkamrume,” pepsisi utopu, doryankamre keteng tamun tupa apelpu donkamrure. Ne Allahdi pepsene.

34 Apepmasen ngeda, sun pio tep keteng tamun, keteng tamun yuma, ue tenpu deiki dipu, apel dopbankamrume. Ada, ne adipapu poptapsetene dinin, sun yo pununa tep, Israel neng sun mali kun keca daepra lyemna tep, apepmasen pel pio donkamrume. Ne Allahdi pepsene.

Ange yumada, Allah er si Yahwehdi, “Ukunkamrume,” pepra, Musa tep peiputopu, Harundi apepmaunge yuma utopu bena pel dopbaramu.