Lev 17 | XteSC | STEP | Allah er si Yahwehdi, Musa tep, aupu pepra deipu.

Leviticus 17

Gam keca duyamumdi, yana ponkamrumnge, “Er yapi tep, ukunkamrume, angeda men kunkamrume,” pepu upu

1 Allah er si Yahwehdi, Musa tep, aupu pepra deipu.

2 Musa kandi, Harun cap, er nyapu cap, tonda Israel yala nesala yuma cap tep, “Allah er si Yahwehdi, ‘Angeda ukupra-ukupra, kunkamrume,’ pepra deipseu upu yumada, ake.” Sun Israel nesala damai tep lap pepmempa gekepkamnunge.

3 Sun Israel yala nesala yumada, tenpu ngebo peda, sun yuk-yuk domba bisam mi do, sapi bisam do, tonda kambing bisam do, sun Israel nesala kuruma damai do, yukai bura tara do, agam keca doupra yana popmenge taruda, ne Allah tep, kareryakankamnunge. 4 Dinino, ware ngebo do yuma, apepmasen gam keca popmenge dinin, akeca doupra ne si eremna ati, opkal boldi dodin tenda atida, akati buplan damai men duyangopda, ada mali pua. Tek sisi “Ukunkamrume,” pepsen ngeda, ake. Ne Allah Yahweh cap, nimi cap antamdana ati buplan damai agam keca popmengengepu doupra yangedi, ne Allah tep karenkamnenunge. Dinino, ukupmanto ngeda, sundi agam keca Allah kareryakana tep nge, tali yukai di popmengepa, akeca er yapi embere ngeda ada, ne Allahdi, ‘Angeda ukupra kupmumdi, ponkamrume,’ peipsisitopu kupra men popmanung nge tep, ukupmengopda, ne upu konum yaninunga cadi, ada pio mali pua.

Deiyo ada, agam keca er yapida, yuk bura tara embenmarura tepa. Tonda, akeca doupra ne Allah tep men karenenunge. Atep nengeda, ange utopu kupre ngeboda, ne nyapu Israel nesala kankan ton, pio men kunkamre. Angebo dopra, sun kurumai tapra, bura tarapu dokoteprumdi tamkamrume. Angeboda, tapkamna cadi, ne mi utopu men kunkamrure. Er depkamre ja. 5 Ne Allahdi aupu yuma pepra deipsena deiyoda, ‘Israel nesala yumadi, aupu gekepmengedi, yapi keca Allah Yahweh tep karepkunge ngeda, adipapu doupra, Allah cap, nimi cap, antamdana tep, tenda opkal bol di dodin tenda ati damaipu duyana, ne Allah tep acapu karenkamnenunge. Tonda, tali bura tara, sun pe tenepmengaipu ton cap men popkamnung’ tenen, pepsene. Ukupmengedi, sun yuma adipapu tenpu ngebo yuk-yuk Allah si eremna tep, ne cap, nimi cap antamdana tep, opkal bol di keana dodin tenda ati buplan damaipu duyangedi, Imam neng dinmangai dipapu ponkamnunge. Ukupmenga deiki di, sun mali kuramenge keca yumada, ne Allahdi kaukemkamne. Ukupnyopda, sun cap, ne Allah Yahweh cap, telep kupra kikiman kunkamepe.

6 Tonda, Imam ngebodi adipapu adomba bisam mi cap, sapi bisam cap, kambing bisam cap, douprapredi, Allah Yahweh cap, nimi cap, antamdana tep, opkal bol di dodin tenda ati buplan damaipu duberedi, gam keca popra uku dongonai, er si mesba keteneipyai, er kumun dam sirikai dana-danada, ayapi di burupra gege pepre pangeda, ayapi dourbena palepkamrure. Ukupyopda agam keca metada, dopra uku dongoprepa, nin tong telepnge weleprepa, ne Allah Yahweh gekepnedi, ne kange telep kunkamnerure. 7 Sun Israel yala nesala yumada, Allah Yahwehdi, “Ukupra ange kunkamrume, angeda pio men kunkamrume,” pepra deipungepu pio tep, moupra talepmengedi, kunkamnunge. Tonda gam keca poprapmengedi, sundi men kael kemnung keca, mali kunung isok-isok si eremna tep, kambing bisam urasin utopu petupra deipmenge keca si eremna tep, agam keca popra men karenkamnunge. Aisok-isok si eremna tep, gam keca popra karepmengopda, ada yuk tali nerapu upula nyangdana utopu kun keca tep pepsene. Angeda, ne pio songe. Atep, Allahdi konum peipmaser upu, ‘Angepu ukupra talepmumdi kunkamrume,” peiseu ngeda, apu pio tep, moupra talepmengedi kunkamnunge.

8 Tonda, Musa kandi, sun Israel nesala tep upepkamrume. Ukupmantoda, Israel nesalada tenpu ngebo do, tonda yuk mutu di tengyakan nimi bo neng dinin, sun Israel neng tara kepipa, sun cap tonpa kunge neng cap yumada, Allah karena tep, yapi keca popra uku dongona tep, tonda yuk pel dona tepnge yuma peda, sun adipapu yuk-yukpu, doupra Allah er si eremna ati damaipu kareryakankamnunge. 9 Dinino, ware mali kupmare ngebodi do, er keca adipapu Allah Yahweh karena tep doupra yana men yankarenkamrur ngeboda, ada Allah Yahweh cap, nimi cap, antamdana tep, opkal bol di dodin tenda ati buplan damaipu doupra men yakankamre ngeboda, pio malipu kurure. Ayapi kecada, tali yukai bura tara di popredi, ‘Allah tep yana karepkune,’ tenepre ngeboda, er angebo tep, ne mi sisa men kunkamre. Er angeboda, ne nyapu sun Israel nesala kankan ton, pio men kunkamre. Angebo dopra, sun kurumaida tapra, bura tarapu dokoteprumudi tamkamrume. Angeboda, ne peda tapkamna cadi, ne mi utopu men kunkamrure. Erda depkamre ja.

10 Tonda, sun pe Israel yala neng do, yuk mutu di tengyakan nimi bo neng dinin, sun tara keamengepa, sun cap tonpa kuramrum neng do, aneitamai di tenpu ngebo ton, gam keca popmengedi, yapi embaramrenge doprapredi, ayapi jepre ngeboda, Allahdi, ‘Angeda pio men kunkamrume,’ peipunge yanipra kurura tep, wenemkamre. Tonda, er angeboda, Allah nyapu sun Israel nesala kankan ton, pio men kunkamre. Angebo dopra, sun kurumai tapra, bura tarapu dokoteprumudi tamkamrume. Angeboda, Allah peda tapkamra cadi, er mi utopu men kunkamrure. Erda depkamre ja. 11 Aupu peipmasen ngeda, tali tep men peipsene. Deiyoda ake. Gam kunung keca yala-yala yumada, yapi deiki dipapu gamanunge. Atep nengeda, ne Allah Yahwehdi, ‘Yapi men jenkamrume,’ peipsisingepu kunkamrume. Tonda, gam kure keca yuma popmum dingeda, “Ayapi yumada, doupra yamumpa, Allah si eremna ati damai yana karepmengepa, uku dongonkamrumai, er si mesba deiki, ayapi dikra deiprum ngeda, ukuprumya deiki di, sun mali kumum keca yumada, daepsenedi, gum kupra derinkamsene. Yapi karenkamnerumya deiyoda, yapi neitamaida, gam kuna deiyo keca akurure. Atep, yapi karepnerumnya deiki di, sun mali kun keca yuma pununa tep, ange yuma gum kupra deipsenedi, lyemkamsene.

12 Atep nengeda, Israel nesala cap, tonda yuk mutu di tengyakan neng dinin, sun Israel tara kepmengepa, kikiman kunkameng neng cap yumada, yapipu jena meme, tonda yapi kepman jenada, pio meme. 13 Ange utopu, tonda ukupmanto ngeda, Israel nesala cap, tonda nimi bo tengyakan neng, sun Israel nesala tara keprongepa, sun cap kikiman kunkameng neng cap yumada, aneitamai tenpu-tenpu nengdi, ma do, uda, yuk tali gam kuramre keca do, popmum dingeda, ‘Er tuda telepnge cadi, angepu tali lupra jenkamnunge,’ pepu keca, tomopredi poprepa, yapi embere ngeda, ayapida jena meme. Adipapu dopra, tupu palipra dongopredi, adeikida singidongonkamrure.

14 ‘Yapipu jena meme,’ pepsesi ngeda, tali tep gume. Deiyoda, gam kunung keca yala-yala yumada, yapi deiki dipapu gam kununge. Atep nengeda, ne Allahdi, sun Israel nesala yuma tep, “Yapi kunmarepapu, akepman jena meme,” peipsisi. Ada, ware ngebo do, amem peipsinge dopra, jepre ngeboda, ne mi sisa men kunkamre. Gam kunung keca yala-yala yumada, yapi deiki dipapu gam kununge. Atep nengeda, yapi jere ngeboda, sun adipapu angebo dopra Israel nesala kunungai neitamai di dubena bura tarapu enepra dokotepkamrume. Ne Allahdi angebo wenepkamne. Ukupnepa, er depkamre ja.

15 Tonda, Israel nesaladi do, nimi bo neng dinin, Israel neng tara keamengepa, sun cap tonpa kunkameng nengdi do, bura tara gam kuramre keca ton depmarenge bupra, jepmare ngebo cap, tonda tali bura tara gam kunung keca dipapu, yuk gam keca ton poptapmare ngeda, er ton dopra jepmare ngebo capda, er adipapu mepu gengkamrure. Tonda, er kenekmamre opkal yuma peda, mepu kunkamrure. Ukupra kunmaredi dinmarepane, sin tara kepredi, keteng wengbere pangeda, ‘E, mali kupman ngeda, konum gum kupnerdi, telep kupnere,’ tenenkamrure. Ataruda, ne Allahdi, ‘Angebo ne damai yakana telep,’ tenenkamne. 16 Er angebodi er nong cap, er kenengre opkal cap, ange me men kupyopda, ange men kupmarya tep menengada, ikin keca er damai yakarepa, doronkamre. Er nong cap, opkal cap me men kupyopda, er mali kuramre keca tep, wenepkamne ja.