Leviticus 18

Allahdi Musa tep, “Nimi cap, nerapu cap, antamnada, autopu ngeda men kunkamrume,” peipu upu

1Allah er si Yahwehdi, Musa tep, peipu.

2Apeipken upuda, kandi, sun Israel nesala yuma tep, “Allahdi upeipmasere. ‘Neda, Allah Yahweh, sun nai bo Allah kunune. Sunda nedi wepra deipsisi neng kurume,’ peipmare.” Upepkurume. 3Tonda upepkurume. Ada, Mesir mutu kuramrum taru, Mesir mutu nesala kuramipa, sun diramrum keca yumada, sundi, ‘Nun ton kupetepkupe’ tenen, men kunkamrume. Ange utopu tonda nedi, Mesir mutu di doupra, Kanaan mutu duyasene. Atep, ukutaruda, ‘E, Kanaan mutu nesala kuramenge keca ton kupetepkupe’ tenen, men kunkamrume. Ada Kanaan mutu deiyo nengdi, “Angeda ukunkamrume, angeda men kunkamrume,” pengepa, Kanaan mutu nesala gekepmengedi kuramenge kecada, sun Israel nesaladi men kunkamrume.

4Ange gum dinin, nedi, sun tep, “Ange kunkamrume, angeda men kunkamrume,” pepra, konum deipsisi upupu yala-yala yuma puda, moupra talepmumdi, angepu pio kunkamrume. Neda, Yahweh, sun nai bo Allah kunune. 5Ton cap pepsene. Sunda, ne amutara kumumdi, nedi sun tep, “Ange kunkamrume, angeda men kunkamrume,” pepra deipsisi upupu moupra talepmumdi, angepu kunkamrume. Sundi apeipsen upu yuma gekepra kumumdi, angepu talepra dombamumnyopda, sun telep kupra kunkamrume. Sun kunkamrumnya yumada telepepu kunkamrume. Neda Yahwehdi aupu pepra deipsene.

Allahdi Israel nesala tep, “Akeca yumada pio men kunkamrume,” pepra deipu upu

6Allahdi, “Ange-angepu yumada, pio men kunkamrume. Ange yumada pio meme,” pepra deipu ngeda, ake.

Tenpu ngebo ton, er weit bo sisa do, er yala sisadi do, er kabo sisadi deiamre ner mida, pio men donkamrume. Tonda, ‘Aner mi cap, ne cap kikiman mapteneme’ tenen, pio men tenenkamrume. 7Tonda sun nai bodi domre nerda, sun nin sisa, pio men nyangkamrume. Ada, sun nai bo sisa, ernge pu kurure. Tonda, anerda sun nin sisa kurura tepa. 8Tonda, ange utopu, sun nai bodi domre nerda, yuk nerapu peda, sun cap nyana pio meme. Anerapu kankan di tenpu ner doropra, nyakmemya deiki di, sun nai bo sisa tep, konum yanipmarema utopu kunkamruma tep, ange peda pio meme pepsene.

9Tonda, sun duner do, sun weit ner do, ‘Aner cap kikiman mapteneme,’ tenena cap, nyangna capda pio meme. Angetopu, sun nai bodi deiamre ner nyapu do, tonda sun nin sisadi deiamre ner nyapu do, sun nai bodi yuk ner ton domredi, anerdi deiamre ner mi do, ‘Aner cap kikiman mapteneme,’ tenena cap, nyangna capda, pio meme. Ada, aner mi deiamrei mutuda, kan cap kikiman kurum mutu do, yuk karen mutu neitamai di deiamrei ner mi do, utoto pua. Ada, sun kikiman ati tenpu kuramrumuai di deipkamrur do, yukai dadi deipkamrur do, utoto pua. Autopu ner nyapu yumada, pio men nyangdankamrume. Ada pio meme pepsene. 10Tonda, kan ner mi sisadi, deiamre ner mi do, kan mi sisadi deiamre ner mi do, aner nyapuda men nyangdankamrume. Autopunge kuprumnyopda, sun pedi sun pepu yanidana utopu kudaramrumdi, ali kudidankamrume. Deiyoda, sun pe deipgerekdani deipdanen bangedi, deipdanen bana ngeda, sun pedi, konum mali kudirume. Angeda pio meme pepsene.

11Tonda, sun nai bo sisadi nerapu ton dopyopda, amenda taru aner doamredi, sun butenedi deiamrerung ner nyapu yuma tep nengeda, ‘E, aner nyapu cap kikiman mapteneme’ tenen, putana cap, tenena cap, nyangna capda, pio meme. Deiyoda, sun tenpu nyapsilip kuruma tepa. 12Sun nai bo er weit ner do, er du ner do, er mal yumada, er tamna ngepu kununga cadi, kan nau yapu yuma tep nengeda, ‘E aner cap kikiman mapteneme,’ tenena meme. Anerapuda pio ton cap men nyangkamrume. 13Ange utopu, tonda sun nin er deiyamya, er tara nerapu yumada, sun nau yapu kununga cadi, anerapu yuma tep nengeda, ‘E aner cap kikiman mapteneme,’ tenena meme. Anerapuda, pio men nyangdankamrume.

14Tonda, sun mam doamre ner men nyangdakamrume. Ada sun mambo er ner sun nau ner kurura tep, angeda pio meme. 15Ange utopu, kan midi domre ner tep nengeda, ‘E aner cap kikiman mapteneme,’ tenena meme. Anerapu cap, pio nyangdana meme. Tamdongonkamrume. 16Tonda, kan weit bo do, kan du bo do, er domre ner tep nengeda, ‘E aner cap kikiman mapteneme,’ tenena meme. Anerapu cap, pio men nyangdankamrume. 17Tonda, tenpu ner cap, anerdi deiamre ner mi cap, men nyangkamrume. Tonda, anerdi deiamre mi, er di deamre ner mi ton men nyangkamrume. Tonda, anerdi deiamre nermi, erdi deiamre ner mi ton, pio men nyangkamrume. Anerapu yuma tep nengeda, ‘E anerapu cap kikiman mapteneme,’ tenena meme. Anerapuda, pio men nyangkamrume. Deiyoda, anerapu yuma sunda, meneng damai nesala kununge. Sunda tenpu nyapsilippu kunge nesala cadi, men nyangdankamrume. Ange ukupmemnyopda, ila mem keca, pio malinge kupmemdi, ali dangnange kunkamreme.

18Tonda kan domem ner tapmemdi, gam tupa kuramrepapu, er weit ner do, er du ner do, pio men donkamrume. Anerapu cap pio men nyangdankamrume. Ukupmempa, sun anerapu butenedi, ‘Uo,’ tenen, mali kange doupra deremdanapu kunkamrenga tep pepsene. Angeda pio mem keca cadi, angeda men kunkamrume. 19Uda, ware ner do yuma, ‘War gawal dangne taru tep, pu jerepa, er yapi embare taruda, sun cap tonpa men mankamrume. Deiyoda, aner er yapi embare taruda, Allahdi, ‘Angeda mali utopunge cadi, ataruda aner ne damai men yatue,’ tenerura cadi, ayapi tupa embanmare taru neitamai yumada, er cap, tonpa men mankamrume. 20Kan kayapu neng, yuk nengdi sun doamenge nerapu cap, tonpa men mapkamrume. Upula men nyangkamrume. Ange kupmumya deiki di, kan pepu mali kudidankamrema cadi, Allah er kangeda, ‘Akeca kure ngeboda, ne damai men yatue,’ tenenkamkerure. Atep ukunada pio meme.

21Kan nyapu deiyamemnge ton bokra, ‘Isok er si Molok si eremna tep, bena popnedi karepkune’ tenen, doupra men karerbankamrume. Utenepra kan mi dopra, isok Molok karepmemya deiki di, kan nai bo Allah tep, ‘Erda talinge pua. Er sida, malinge pua,’ tenen kupkamruma cadi, angeda pio men kunkamrume. Neda, Allah Yahwehdi pepsene. 22Tonda, nimidi, sun pe nimipu men nyadankamrume. Angeda pio meme. Ada, tenpu ngebodi, ‘E, ne cap, nerapu cap kikiman manuma utopu, nimi cap, ne cap kikiman nyangdankamneme,’ tenerurnge tep pepne. Autopu kun kecada, Allahdi, ‘Angeda, ne pio songe. Akeca kure ngeboda, ne damai pio men yatue, ne dabale,’ tenerure. 23Angetopu, nimi pe, nerapu peda, tali bura tara gam kurameng keca tep, ‘Tonpa maptepe,’ pio men tenenkamrume. Tali gam kuna keca cap, tuai nesala cap, tonpa maprumu dingeda, sun nong deiki pio mali kudinkamrume. Atep nengeda, ange pio men kunkamrume.

24Tonda, Allahdi upepu.

Uda, apeipmasen upu yumada, ‘Ange-ange ton pio men kunkamrume. Ada pio meme,’ pepra deipmasen keca dinin, tali lupra kumumyopda, adeiki di, sun pe deikipu mali kweipdankamruma cadi, ‘Angeda pio meme. Angeda pio men kunkamrume. Balila di, akeca yuma tali lupra kupmumnyopda, Allah er damai men yakankamrume. Sun tep nengeda, Allah erdi, “Gume, akeca kunge nesala tep, ne pio dabale,’ tenerure. Tonda, ‘Amem keca kununge,’ tenena tep nengeda, Kanaan mutu neitamai kunung nesala yuma enepronkamrure. Ada, sun Israel nesaladi, Kanaan mutu kunge nesaladi, sun kunge keca epmengedi, ‘E, nun ton kupkamepe,’ tenepmengedi, ‘Mali kupnung’ tenen, sun amutu kapul men bena kunmarum taru di, Kanaan mutu kunung nesala yuma Allahdi, enepronkamre. Ukuprepa, sun amutu bemum dingeda, telepepu bena kunkamrume.

25Kanaan mutu neitamai kunge nesaladi, autopu keca weik konum kuramya deiki di, Kanaan mutu ban-ban yuma konum mali kupmare. Atep nengeda, amutu mali keca kapu utopu menengada, nedi, amutu ikin keca weik deipsipa, amutuda dukna dungamengtopu kupredi, amutu kunung nesala yuma, enepropnepa, amutu tapra yukaipu bendopkamenge. 26Dinino, sun Israel nesalada, nedi sun tep, ‘Ange kunkamrume, angeda men kunkamrume,’ pepra, deipsisi ngeda, adipapu moupra talepmumdi, kunkamrume. Tonda, ‘Angeda pio mem keca,’ pepra deipsisi keca yumada, tenpunge pe men kunkamrume. Ada, sun Israel yala nesala pe, sun mutu neitamai kunkameng nimi bo neng pe, sun kankan kunkameng tali tengyakan neng pe yumada, nedi peipsesinge neitamai di, tenpu mali kun keca peda, pio men kunkamrume.

27Ada, tali tep men pepsene. Israel nesala, sun amutu men yanamrum taru kurami nesala yumada, mali kun keca yala yuma weika di kurami. Adeiki di amutuda, konum mali kupra deipi atep, pepsene. 28Atep nengeda, moupra tenenkamrume. Ne Allahdi, ‘Angeda kunkamrume, angeda pio men kunkamrume,’ pepra deipsisi upu, yanipmumdi, tali lupra kupmumnyopda, ne Allahdi, amutu ikin keca weik deipsipa, amutuda dukna dungamengtopu kupredi, amutu kunkamrum Israel nesala yuma peda, enepropnepa, amutu tapra yukaipu bendopkamrume. Ada, menop taru amutu kurami nesaladi, mali weik kupbaramipa, Allahdi anesala enepra dokotemamutopu, ‘Allahdi, nun pe tep wenepseredi, enepropserur’ tenen, kange moupkamrume. Ada, Israel nesala, sun amutu men yana kuramrum taru kurami nesala, mali kuramipa, ‘Allahdi enepra donoamutopu kupserur’ tenen, kange moupra tenemumdi, teleppu kunkamrume, tenen, lap pepsene.

29Ange tep nengeda, sun konum kael keprume. Ware nesala do yuma, “Angeda meme,” pepra deipmasen keca dinin, amali kun kecapu talepra kunung nesalada, Allahdi wepra deiamu nesala, Israel nesala kunungai neitamai di men kunkamenge. Anesala dopra bura tara enepropkamrume. Ukupmumpa, Allahdi anesala wenepra poptapkamre. Er nyapu sisa men kunkamnunge. 30Atep nengeda, neda Allah Yahwehdi pepsene. Nedi, sun tep, “Ange kunkamrume, angeda mem keca cadi, ange pio men kunkamrume,’ pepra, deipsisi upupu moupra talepmumdi, teleppu kunkamrume. Israel nesala, Kanaan mutu neitamai kapul men yanamrum taruda, aKanaan mutu kurami nesala amem keca weik kuraminge ton, sun pio men kunkamrume. Akurami mem keca ukupmumya deiki di, sun pepu mali kweipdankamrume. Neda, sun nai bo Allah Yahwehdi pepsene. Allahdi pepu.