Lev 19 | XteSC | STEP | Allah er si Yahwehdi Musa tep pepu.

Leviticus 19

Allahdi “Ukunkamrume, ange ton men kunkamrume,” pepra deipu upu

1 Allah er si Yahwehdi Musa tep pepu. 2 Kandi Israel nesala yuma tep pepkurume. “Sunda mali kun keca yuma tapra, dumsisi kumumdi, pio teleppu kunkamrume. Neda Yahweh kunune. Neda sun nai Allah, mali keca tenpunge peda men kwapmanerpa, dumsisi lekpu kunetopu, sun peda mali keca yuma tapra, dumsisipu kunkamrume. 3 Tonda, nimi yuma adipapu sun nin yapu cap, sun nai yapu cap tep, ‘Sunda mambule’ tenen, gispal dopra kunkamrume. Ukupmum dingeda, yoneitam tumi yumada, pel dona gum dipapu, atumi deiki Allah nedi peiamsitopu, ne sipu erepra gispal donkamnerume. Neda sun nai Allah, Yahweh kunune. Sun nai Allah ne tenpu kunune.

4 Sundi tali keca do, isok-isok do, yuk keca tep si eremna pio meme. Tonda ware keca do yuma, emas do, perak do, besi keca do, akeca doprapmumdi, petupra nimi urasin utopu kuprap ketekepra deipnedi, ‘Nun Allah adano’ tenen, akeca tep si eremna meme. Ne puda Allah kununa cadi, sundi ne sipu eremkamnerume. Neda Yahweh, sun nai Allah ne tenpu kunedi pepsene.” Allahdi pepu.

5 “Atep sundi, ‘Nun cap, Allah er si Yahweh ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} cap, antapra dukdongopra, telep kupra kunkamepe’ tenen, gam kuramre keca popra, Allah karenkamrum taruda, ne pepsenetopu karenkamnerume. Ukupmum pangeda, nedi kange deipsenedi, sun karenkamnerum keca dopropkamne. Nedi, ‘Ukunkamrume,’ pepra peipsenetopu men kupmumnyopda, ne men gekenkamsene. 6 Tonda, ne karena tep, gam kuramre keca demumdi, sun cap, ne cap, antapra dukdongopra kuna tep, popmum dingeda, adipapu atumi cap, ambutumi cap, akeca tu galepra jenkamrume. Tumi ue butene deiki di, jenmamumnyanen, gawal dakamrume. Ue butene tumida, atu keca meteka pe ton tupa akwapre pangeda, ue weneri tumida, adipapu uku dongopra sengpenkamrume. Akecada kwal ton derina pio meme.” Allahdi pepu.

7 “Dinino, akeca yuma jenmanganen, gawal tapmange ngeda, ue weneri tuminge, kwal tupa akapre ngeda, ada pio mem keca utopu, mali keca utopu kurure pepsene. Akecada ne songe. Tonda akeca men karepnetume. Tonda, sun peda men jenkamrume. Angeda meme, pepsene. 8 Ware nesala do yuma, tumi weneri deiki abisam kwal deipmangenge dopra jepmengopda, nedi wenepkamne. Deiyo ake, ne Allah Yahwehdi, ‘Akeca u weneri tumi deiki jena meme. Akecada pio mambule, ne mawa keca, lek keca,’ pepra konum peipsa tep, men jenkamrume. Atep nengeda, akeca jepre ngeboda, wenepra popkamne. Angebo akeca dopra jepya deiki di, ‘Gume akecada tali keca pua’ tenena utopu kurura deiki di, yaniptapmanerdi, akeca mali kudirura cadi erda pio mali kurure. Ukupyopda, atali ngeboda, pio wenepra tapkamne. Israel yala neng cap, kikiman pio men kunkamre. Er bura tara dokoteprumpa, nedi wenepra popnepa, pio gum kupkamre.” Allahdi pepu.

“Sun wai dam keca yuma, gawal dakra men kinkamrume,” pepu upu

9 Allahdi Israel nesala tep upepu.

“Sun kouamrum kecada, sun wai dam dana-dana peiamenge nge wisipre pangeda, sundi akeca yuma men kipra gawal dakamrume. Ya sekra bupra, tenpuai men derinkamrume. Ange gum dinin, wa sirikaida, dakwapkamre. Wa sirikai kupre ngeda, kipra gawal dangna gume. Tonda, ‘Metekanun akapre ngeda, mangkau kange doupra yuma kipropman do? Tupa ton tapman do?’ tenen, dipetepmumdi, tupa akapmare ngeda, ‘Yuma kipra gawal dakamne’ tenena gume. Awai dam, ka tamupra kirbana gume. Wa sirikai kupre ngeda, kipra gawal dangna gume. Ada sun tali kankan kunge nesala kipkamenga tep pepsene.

10 Ange utopu, sundi anggur tapu du wai dam bemumdi, anggur du yuma buluprap tenpuai men derinkamrume. Tonda anggur du dangmumpa, tuai tali sakre ngeda, sundi burbana gume. Anggur du tuai sakre ngeda tapmumpa, amenda taru sun tali kankan kunge nesala cap, yuk karen mutu di tali tengyakan nesala, nimi bo nesala cap, yuk mutu nesala cap, sun pe wa men kwapmara cadi, sun dipu akeca bupra jenkamenga tep pepsene. Angeda sun nge pua. Neda Yahweh, sun nai Allah ne tenpu kunedi pepsene,” Allahdi pepu.

“Yuk neng tep, upula dona cap, mok upu pena cap, mali kudina cap, meme,” pepu upu

11 Allahdi Israel nesala tep upepu. “Sundi yuk nesala yuma sun keca tep, upula dorona meme. Tonda, yuk neng yuma tep, minina upu pedana pio meme. Yuk neng tep mali kudina pio meme.” Allahdi pepu. 12 Upepu dingeda, aupu ton cap dukdongopra pepu. “Sundi mok upu pepnya deiki, ‘Yuk nengdi teka tenepkamneng’ tenen, ‘Allah er si deiki, tek sisi upu pepkene,’ pio men penkamrume. Ne Allah si deiki tapakra, mok upu pepmumnyopda, ada ne si mali kudina tep pepsene. Ne si tali men pertamkamnerume. Neda Yahweh, sun nai Allah kunedi pepsene,” Allahdi pepu.

13 “Ton ngeda, sun yala neng pe, sun kayapu neng pe tep, mok upu pena deiki di, minina upu pena cap, mawa di pena cap, sun keca upula dorona capda, pio meme. Tonda sundi, ‘Sun melimna tep pel dopmepepa, kunumna keca dopropkamepe’ tenen, pel melipra dosenge nesala tep nengeda, mali kudina gume. Sun pel konum dopmengopda, atumi dipapu sun kunumna keca karenkamrume. Sun pel donmasenge tep, kunumna doron kecada, mapmamumyane berekrepa karena gume. Pel donmange tumipu karenkamrume.

14 Sundi amul kinin nesala tep, ‘Mali upu pepmepepa men kael kepsetenge’ tenen, ‘Tali lupra sun tep mali upu penkupe,’ tenena meme. Amul kinin nesala tep, mali upu pena gume. Tonda asuru pun ngebo embare taruda, ‘Er yan giso gel dukamre’ tenen, bisai gel derina pio gume. Ange yuma gum dinin, sundi ne tep, ‘Nun nai bo Allah, er Yahweh kurura tep, erda pio mambule cadi, nun kware,’ tenenkamnerume,” Allahdi pepu.

Kwirye kuna cap, bicau tenena cap tep, pepu upu

15 “Sunda, ‘Pio tek sisi kunkamep’ tenen, dumsisipu kunkamrume. Ada, ‘Telep kupmang do, gum do?’ tenen, upu talena cap, upu bongna cap taru yumada, dumsisipu upu talepra kunkamrume. Ataruda kankan kunge nesala tep, ‘Uo, bicaue, sun malinge dakwapye,’ tenepra kuna gume. Tonda, ‘Sun weika di melipkamepe,’ tenepra kuna gume. Ange utopu, isomka neng pe tep, ‘Mali kupmang dinin, sunda isomka neng cadi, dakwapye’ tenen, aneng tep kware tenena pio gume. Kankan neng pe, isomka neng peda, dumsisi kupra, upu telep kupra, sun kurameng utopu dumsisikrap upu bongdinkamrume. Sun mali kupmenge neng tepangeda, ‘Ne kayapu neng tenepra, sun malinge dakwapye,’ tenena gume. Yuk nesala yuma tep, dumsisipu upu talepra bongdinkamrume.” Allahdi pepu.

16 Tonda, upepu. “Sundi yuk neng yumada, mali men kupi dinin, yuk nengdi, ‘Anengda mali kununge tenepkameng’ tenen, tali upu peptapra, nimi kan-kan lap perbana gume. Tonda, ware nesala do yuma, sun damai kunge nesala tep nengeda, ‘Anesala nedi mali kweipnun’ tenen, bicau tenepmumdi, pio moupra kalengkamrume. Sundi, ‘Jo dakwapye, dapoptenge,’ tenepra tali kuna gume. Melipra kalengkamrume. Neda Yahweh, sun nai Allahdi pepsene,” Allahdi pepu.

17 Tonda ware neng do yuma, sun kayapu neng tep, sun kange dipru neitamaida, ‘Anengda ne songe,’ tenen, yu tenedana gume. Tonda sun kayapu nengdi mali kupmengopda, adipapu “Angeda meme, yaprume,” penkamrume. ‘Dakwapye’ tenena gume. Gum dingeda, sun tali lupra mali kupmenga deiki di, sun epmum dinin, men wenepmumnyopda, sun peda mali kupruma tep pepne. Mali kun keca tep, ‘Angeda meme,’ pepra, katuai dipu lap pedankamrume. Ukupmumnyopda, mali men kupkamsere. Ne Allah Yahwehdi pepsene.

18 “Tonda, sundi yuk Israel nesala yuma tep nengeda, yu kupserepa deremdana gume. Ada, ‘Uo, anengdi ne tep mali kupneiya tep, nedi sun tep kwang dakamne ja,’ tenena meme. Ange utopu, sun kapu neng tep, ‘Angebodi ne tep, mali kweipneua tep, angeboda ne songe,’ tupa men tenedankamrume. Ange gum dinin, sundi sun kayapu neng yuma tep, bicau tenedankamrume. Ada sun pedi, sun pe tep, bicau tenerumtopu, sun kayapu neng yuma tep, bicau tenen, kange deipdankamrume. Neda Yahweh, sun nai Allahdi pepsene,” Allahdi pepu.

19 “Sun nai Allahdi, ‘Angeda kunkamrume, angeda ton men kunkamrume,’ pepsene upu yumada, bouna di gekeprap kunkamrume. Ware gam kure keca do yuma, yala yuk-yuk tapakra waldodana meme. Angeda pio mali. Utopu tenpu wa neitamai, yal keca butene tapakrap, tenpu tu pumbon men kounkamrume. Ange utopu ton, tenpu opkal dinin, ton yala opkal win keca cap, ton yuk yala opkal win keca cap, butene apu tapakra men wipra kenengkamrume. Tenpu opkal deiyo keca wepra, opkal wipra kenengna telepe. Opkal deiyo keca butene tapakra wina gume.” Allahdi pepu.

Pel dona melimna nerapu cap, kikiman mana tep, pepu upu

20 “Uda, ware ngebo do yuma, sun melimna tep co bo deiki di kunumenge nerapu tep, ‘Tali ner cadi, dakwapye’ tenen, tali lupra kikiman mana meme. Amelimna ner, yuk ngebodi, ‘Ne dopkamne,’ konum pepyopda, angebodi aner kunumna tep, co bo kapul men karepra peda, yuk tali ngebodi aner dopra kikiman mana meme. Aner tep mun peramre ngebodi, amelimna ner er yo pununa tep, kunumna keca karena gum dipapu, yuk ngebodi aner cap nyakdarenge pangeda, angeda pio mali weike. Atep wenepkamrume.

Wenepkamrum dinin, apel melimna ner cap, nyakmau ngebo capda, adipapu pona meme. Aner kunuamu deiyo ngebodi, menmena aner er yo pununa tep, kunumna keca karepredi, konum loptapyopda, sun butene poptum dinin, gum dingeda, pio gume. Aner tep mun pere ngebodi, kunumna keca men karepre tarupu, apel melimna ner, yuk tali ngebodi upula nyakyopda, adipapu aner cap, angebo cap, sun butene men poptapkamrume. Angebodi nyakmare nerda, er yo pununa tep, co bo kapul men karepre dipapu nyakre pangeda, pio mali kupmareng dinin, sun butene adipapu men poptapkamrume.” Allahdi pepu.

21 Upepudi aupu ton pepu. “Angebodi, pel melimna ner tali lupra nyakyopda, er ukupmarenge kunumna tep, domba bisam, gemnge dopra, Allah cap, nimi cap, antamdana tep, lyom opkal bol di dodin tenda ati buplan damai deriryankamre. Ada, ‘Allah er si Yahwehdi ne mali kupsi keca kaukepneredi, ne mali kupsi keca yumada, daemna cap, yo pununa cap tep, gum kupra deipkamner’ tenen, domba bisam duyankamre. 22 Ange ukuprepa, sun Allah cap, nimi cap antamdina deiyo nengdi, adomba gemnge popra, Allah karenai bena uku dongopkamenge. Ada amali kupmare ngebo, er mali kunangeda, daemna cap, yo pununa cap tep, adomba popra Allah tep karepkamenge. Uku dongopmengepa, siltong Allah damai beryopda, angebo er mali kupmare keca yumada, ne Allahdi kaukepnedi, gum kupra derinkamne,” pepu.

Co du mouramre co kouna tep, pepu upu

23 “Uda, sun Kanaan mutu wengbemum taruda, ‘Co du jenkamepe’ tenen, co du mouramre co yala-yala yuma koupmumpa, keteng tamun weneri deiki di, aco du pio weike mouprepa, sun adipapu men dakra jenkamrume. Aco du yumada, keteng tamun u weneri deiki di, mem keca utopu kupkamra tep, aco du jena meme. 24 Dinino, keteng tamun u dumbari deikida, aco du yumada, Allah er mawa keca utopu kupmara cadi, ukupkamra tep, sundi aco du men dakra jenkamrume. Ne Allah tep karenkamnerume. Karepnemum dingeda, ne Allah, ne si Yahweh tep, ‘Erda pio mambule cadi, telepe,’ pepra, ne si Yahweh eremkamnerume.

25 Keteng tamun pamu bari mapmum dingeda, aco du gonga kepra dakra jenkamrume. Ada, sundi angeda pio ketenepra deipmumdi kupbaramum pangeda, aco duda tamna gum di, pio dakra jena telepe. Apepsenetopu kupmumnyopda, sun co du yala-yala yuma weik kupbaredi, du moupbankamre. Neda Yahweh, sun nai Allahdi pepsene,” pepu.

Gam kure keca yapi jena cap, nimi potong cap, nimi nong cap tep, pepu upu

26 Sundi akeca-keca yumada, yapi kepman jena pio meme. Tonda, ‘Amenda kupkamre keca kael kepnedi lap pepkamne,’ tonda, ‘Puto di pel doptene,’ tenen, isok si eremna cap, isok puto deiki pel dona cap pio meme. 27 Utopu tonda, sun nai bo Allah teka tenena gum nesala, potong touramengtopu men kunkamrume. Ada, sun Israel nengda, giso potong, amul damai dana-dana potongda, men tounkamrume. Tonda bana potong lyom potong urupaida, pio men tounkamrume.

28 Ange utopu ton, konum depmange nesala tep, gispal dopra engenmangedi, ‘Yapi embankamre’ tenen, sun nong bol deiki tema di lungdana meme. Tonda takke keca cap, tinta cap di, sun nong bol deiki petumdana meme. Tonda, takke keca di, sun nong bol deiki sekdamumpa susu jepseredi, dila kuna gume. Ato keca sun nong deiki peten kemdina pio men kunkamrume. Angeda, ‘Sun Allah teka tenena gum neng kurameng utopu, men kunkamrum’ tenen, pepsene. Neda Yahweh, sun nai Allahdi pepsene, pepu.

29 “Tonda, sundi, ‘Nun ner nyapu deipmepepane, erdi tali-tali nyangdan ner keprepa, co bo weik doproptepe,’ tenena meme. Ukupmumnyopda, ada pio mali kurume pepsene. Tonda, ukupmum pangeda, yuk neng ton epmengopda, sun peda utopu kupkamenge. Ukupmengopda, amutu neitamai yuma, mali keca yala-yala yuma pio weik kupbankamre. Atep, ukuna pio meme,” Allahdi pepu.

Allah tep gispal dona cap, dumsisi kuna cap, wisi neng tep gispal dona cap tep, pepu upu

30 “Yoneitam tumi tep nengeda, sundi Sabat tumi perum tumida, sundi ‘Allah er mawa tumi, ila tumi,’ teneprap, tali pel yala-yala yuma men donkamrume. Tonda, ne si eremna ati neitamai, ne lek ati bena yana kemna gum ati tep, akati tep kware kunkamrume. Neda Yahweh, sun nai Allahdi pepsene. Atep, keteneipmumdi, ne Allah tep gispal doprap kunkamnerume.

31 Tonda, sun balila deiprap derameng nesala, sun sambala cap sisingamenge neng kungai mororbana pio meme. Ange utopu, Seramki puto deiki di, amenda kupkamre keca lap penung neng damai bana pio meme. Ange yuma kupruma deikida, mali kudidarume. Neda Yahweh, sun nai Allahdi pepsene,” pepu.

32 “Tonda dan ati do yuma, sun bukmum taru, sun wisi neng pe, wisi nerapu peda, ato neng sun bukmumyai yangopda, adipapu, tekra, ‘Telepe’ pepra, gispal donkamrume. Ange utopu, neda sun nai Allah kununa cadi, ‘Nun nai bo Allah er si Yahweh, erda ila mambule’ tenen, ne tep kware kupserepa, sundi ne sipu eremkamnerume. Neda Yahweh, sun nai bo Allahdi pepsene,” pepu. 33 “Tonda, sun mutu neitamai dinin, sun amutu kurum neng cap, yuk karen mutu nesala cap, nimi bo neng cap, telep kupra kikiman kunkamrume. Nimi bo neng tep nengeda, sun nong deiki ikin keca men derinkamrume. Mali men kudinkamrume, telep kupra kikiman kunkamrume.

34 Tonda, sun mutu neitamai sun cap kurumu nimi bo neng peda, sun kumumtopu kunkamenge. ‘Anengda, yuk mutu neng cadi, nun songe’ tenena gume. ‘Nun yuma tenpu mutu neng pua, nunda tenpu yala neng pua,’ tenenkamrume. Sun Israel nesaladi, sun cap kikiman kurumu nimi bo neng tep, bicau tenenkamrume. Deiyoda, sun peda pumun taru Mesir mutu kuramrum taruda, nimi bo neng utopu kuramruma tep pepsene. Neda Yahweh, sun nai bo Allahdi pepsene,” pepu.

Kunumna tep, pepu upu

35 “Tonda, yuk neng tep minina upu men penkamrume. Angeda, ikin keca dina cap, timbangan derina cap, ‘Lyom do, bum do?’ tenen, tonda ‘Weik do, metekapu do?’ tenen, ukur kemna taru yumada, mok upu men penkamrume. Dumsisi upupu, ikin do, kanam do, akuretopu penkamrume. Ada, lyom keca nungna cap, pala keca nungna cap, ikine kilonge nungna cap, me deiki di, dikdongopra nungna cap, peten kemna keca moupra dimumdi, tek sisi upupu penkamrume. Uda kilo do, meter do, mokon gwepra dingdongona do, ayumada mok pena pio gume.” Allahdi pepu.

36 Upepu dingeda, aupu ton cap dukdongopra pepu. “Uda, kunumna keca meter cap, kalkal keca ikin tep kunumpeten keca timbangan cap, mokon keca gweprap dingdongon keca kunumna cap yumada, moupra dipetepmumdi, pio telep dumsisingepu, akeca ikin kuretopu pepra talenkamrume. Kunumna taru yumada, dumsisipu kunkamrume. Neda, sun nai bo Allah, Mesir mutu neitamai di doupra, yanamsisi ngebodi pepsene. Neda Yahweh, sun nai bo Allahdi pepsene,” pepu.

37 “Ange tep nengeda, bouna di kumumdi, ne Allahdi, ‘Ukunkamrume, angeda pio men kunkamrume. Telep kunada ake, mali kunada ake,’ pepra pedisene upupu, moupra gekepmumdi kunkamrume. Neda Yahweh, sun nai bo Allahdi pepsene,” pepu.