Lev 2 | XteSC | STEP | Tonda ware nesala do, tenpu-tenpu nengdi wa pepra koupra jenung keca, yakung do, terigu do, beras utopu keca do, ‘Allah Yahweh tep, yana karepkune,’ tenepre ngeda, pio telep kupra taingmenge nge, er si tepung, pio telepngepu duyankamrure. Dinin, minyak zaitun me mokon di dikra deipmaredi, uku dongorameng nin tong telep keca, er si kemenyan di, ajen keca deiki singipdongopra deipmarengepu doupra, kareryakankamrure.

Leviticus 2

Jen keca dinin, yakung do, terigu do, Allah Yahweh karena tep, pepu upu

1 Tonda ware nesala do, tenpu-tenpu nengdi wa pepra koupra jenung keca, yakung do, terigu do, beras utopu keca do, ‘Allah Yahweh tep, yana karepkune,’ tenepre ngeda, pio telep kupra taingmenge nge, er si tepung, pio telepngepu duyankamrure. Dinin, minyak zaitun me mokon di dikra deipmaredi, uku dongorameng nin tong telep keca, er si kemenyan di, ajen keca deiki singipdongopra deipmarengepu doupra, kareryakankamrure. 2 Adoupra yakana tep nengeda, er pe aketenepra deipmare ngebo dipapu, Harun erdi deipupa, deipdanen yakange nengdi, ne si eremna ati pumbon neitamai pel talepra donung imam-imam neng, sun damai doupra yaredi, yana karepkurure. Ukupre pangeda, imam yala neng dinin, atumi, akati pumbon neitamai pel donmare ngebodi, atepung ton tenpu buru di yambulanun ton doropkurure. Utopu, minyak saitun me mokon cap, tonda nintong telep keca, er si kemenyan perameng keca cap, doroprapredi, akeca yumada, uku dongona tep, gel pala di yakra taplakra ketenepra deipyai, mesba duberedi, uku dongopkurure. Auku dongopya deiki di, ange yumada, ‘Yahweh tep, konum karepne,’ tenen, peten keipkurure. Apel konum dopya deiki di, uku jerepa, nintong telepnge Allah Yahweh damai berepa, gekepredi, kange derinkamrure.

3 Uda, Allah si eremna tep, atepung doupra yanmange dinin, Imam nengdi Allah tep konum karepmengepa, akeca tupa akapkamrenge yumada, weik tara ngeda, Harun cap, erdi deiamu neng cap, ada er nyapu cap dopropkamenge. Ada, sun Allah cap, nimi cap, antamdana tep ati pel don neng, sun imam neng kununga cadi, sun dipapu akeca dopra jenkamenge. ‘Adarameng jenda, pio telep lengnenge, Allah erngepu kurure,’ tenenkamrume. Deiyoda, Allah Yahweh er karena tepapu, ange yumada, uku dongopmengepa, pio telep lengna ngepu kunkamra tepa. 4 Ukupmantonge ton, Allah er si eremna tep, roti kwaneng yala keca karepkamane’ tenen, roti dan keca er sida kompor pumbon dapkunge dingeda, roti kwaneng nena gum ngepu dankamnunge. Aroti kwanengda, er sida tepung, pio telepngepu doupra, minyak saitun tapakmumdi, urasin yambul kue utopunge dapra karenkamrume. Ange gum dingeda, roti dana deiyo keca nena gumnge, tepung doupra, yambula di pala kepra kue metek boun kepra adipapu dankamrume. Tonda, apala keca deiki peda, minyak saitun me mokon cap doupra, aminyak saitun me di, akue deiki yambula di likra derinkamrume.

5 Tonda ukupmanto, ‘Allah si eremna tep, roti kwaneng yana karepkune,’ tenepmumdi, yana dankamrum kecada, pala gat keca deiki dapkumum dingeda, aroti kwaneng dan keca deiki dipapu bupukmum dingeda, tepung telep boun nge cap, tonda minyak saitun mokon cap, tapakra keteneipmumdi, dapkurume. Dinin, roti nena deiyo keca ton tapangna gume. Roti kwaneng nena gumngepu dapra, yana karenkamrume. 6 Allah tep karepkumum roti kwanengda, roti deiyo keca er sida tepung, pio telepnge doupra, adipapu neitamai di totopra deipmumnyopda, atopra deipmamumnya neitamaida, minyak saitun me mokon di dikdongopra derinkamrume.

7 Tonda, ukupmanto ngeda, ‘Allah karena tep, roti kwanengda, yang din keca er si kuali deiki deipra dapkune,’ tenepmum dingeda, aroti kwanengda, tepung pio telepnge cap, minyak saitun me mokon cap dipapu tapakra dapkurume. Konum dapmamum dingeda, Allah Yahweh tep yana karepkamrume. 8 Allah karena tep, aroti kwaneng yala yumada, ange lap pepmasentopu kupra dapmumngepu, adipapu Allah Yahweh tep yana karenkamrume. Ada, Allah cap, nimi cap antamdana tep, er si eremna ati pumbon neitamai pel talepra dona deiyo neng, sun imam neng damai bena kareprumupa, sun aneng dipapu uku dongonai, gel pala yakra deiprumai, er si mesba damai dubankamnunge. Dubengedi, uku dongona pel donkamnunge. 9 Allah er si eremna ati pumbon neitamai pel dona ngebo imamdi dorapredi, aroti kwaneng deiyo keca, er si tepung neitamaida, tenpu buru di, yambulanun doropredi, uku dongomna tep mesba damai beredi, adipapu uku dongoprepa, uku di jepropkamrure. Deiyoda, ‘Ange yuma, er Allah Yahweh tep konum karepne’ tenen, peten kemdina tep ukunkamrure. Akeca doupra uku dongoprepa, uku jeredi, nintong telepnge weleprepa, Allah Yahweh gekepredi, er kange telep kunkamre.

10 Tonda, ange neitamai di, peten kemdinange konum dopropredi, uku dongopre dingeda, Allah si eremna tep, doupra yanmange nge, weik tara tupa akapkamre ngeda, Harun cap, er nyapu cap doronkamnunge. Ada, Allah cap, nimi cap, antamdana tep, Allah er si eremna ati pumbon pel dona deiyo neng, sun imam neng dipapu, akeca yumada dopra jenkamnunge. Ada, ‘Aroti kwanengda Allah erngepu kurura cadi, aroti kwanengda, pio telep lengnangepu kurure,’ tenenkamrume. Deiyoda, Allah Yahweh er karena tep, konum ketenepra uku dongonunga tepa.

11 Tonda, ange moupra tenenkamrume. ‘Allah tep, roti dana deiyo keca, er si tepung doupra yana karepkupe,’ tenepmum jen keca yumada, madu mong me mokon cap, tonda, roti kwaneng nena deiyonge er si ragi cap, tapakra men dankamrume. Deiyoda, mong mokon cap, roti kwaneng nena deiyo keca capda, Allah Yahweh tep men karenkamrume. Ada, Allah Yahweh er si eremna tep karenkamrum ngeda, akeca cap tapakra, pio men dankamrume. Akeca buteneda, Allah karena tep keca damai, uku men dongonkamrume. 12 Sundi, aketeng tamun, aketeng tamun neitamai yuma, wa pepra koumum keca yala-yala yuma konum wisiprepa, weni yupra kinkamrum ngeda, neitamai di bokra, mong mokon cap, roti nena deiyo keca cap, abuteneda Allah karena tep nengeda, akeca doupra, Allah Yahweh tep, kareryakana telepe pua. Ada weni keca karen tarupu karenkamrume. Ataruda, akecada karena telep dinin, ‘Allah Yahweh karena tep, akeca doupra uku dongopmepepa, nintong telepnge welerepa, Allah kange derinkamrure,’ tenena gume. Akeca buteneda, roti kwaneng nena deiyonge cap, mong mokon capda, doupra yamumdi, gel pala di taplakra yakra keteneiprum keca, er si mesba deikida, uku yana men dongonkamrume.

13 Tonda, lumdongona pio gume. Allah tep, yana kareryakankamrum roti kwaneng deiyo keca, tepung do, yakung do, beras utopu keca do, ange utopu keca diketeneipkamrum jen keca yala-yala yumada, telep pena tep keca, garam uwa dipapu yupra deipmumdi, yana karenkamrume. Garam uwa yupra karenkamruma deiyoda, Allahdi nun tep, “Ukunkamrume, ukuprumnyopda, nedi ton, sun tep melipra kalengkamsene,” pepra, pedina upu nun damai pedisere ngeda, ‘Ace’ tenen, peten kemdina tep, “Tepung yala keca karenkamnerum taruda, garam uwa cap tapakra yukmumdi, karenkamnerume,” peipseua tep nengeda, akecada tamna gume. Cadi, Allah tep, tepung di ketenepra, kareryankumumnge yumada, garam uwa dipapu yupra, yana karenkamrume.

14 Tonda ukupmanto, sundi yakung do, gandum do, wa pepra kouamumpanen, bongopra du moupyopda, du menmena wisipre ngeda, weninge dakmumdi, ‘Allah er si Yahweh tep karepkune,’ tenepmumnyopda, bol kopmumdi, taikra telep kupmumngepu doupra yamumdi, uku bu deiki dapmumdi doupra, Allah tep kareryakankamrume. 15 Ange utopu, agandum du do, yakung du do, yuk tepung du yala keca do, taikra deipmumnge deikida, minyak saitun me mokon di dikra derinkamrume. Tonda, aminyak me di dikra deipmum gandumda, nintong telep keca, er si kemenyan ton doupra, agandum deiki deipkamrume. Deiyoda, Allah tep karenkamruma tepa.

16 Ukupmum pangeda, Allah cap, nimi cap, antamdana ati pumbon neitamai pel dona deiyo ngebo imamdi, agandum du taikmamumnge cap, minyak saitun me mokon cap, tonda nintong telep keca er si kemenyan cap, peten kemdina tep, tenpu buru di akeca neitamai yambula di wilipra dopropredi, Allah Yahweh er si eremna tep keca karena tep, uku dongonkamrure. Deiyoda, ‘Ange yuma, Allah Yahweh, er si eremna cap, er tep gispal donkupa cadi, er tep konum karepmape’ tenen, peten kemdina tep, akeca yuma uku dongonkamenge.