Leviticus 20

Allahdi, “Angeda ukuna gume,” pepu upu gekepra bouna di men kurami nesala wenepra portamna tep, pepu upu

1Allah er si Yahwehdi Musa tep pepu.

2Apeipken upuda, kandi Israel nesala gekenai bena lap pepkurume. Israel nesala yuma do, yuk mutu di tengyakan nimi bo nesaladi, sun cap pio kikiman kunkamrum nesala yuma do, anesala yuma tep pepkurume. Ada, tenpu ngebo, sun nyapu ton dopra, Kanaan mutu kunge nesaladi si eremami isok, er si Molok, er tep, karerbere ngeboda, adipapu anesala yumadi gel di dopra popmumpa denkamnunge. 3Ware nesala do yuma, sun nyapu isok si eremna tep Molok karepmengiopda, adeiki di ne si eremna ati tep mali kudinkamnenge. Tonda, ne pe si, pio lek telep ngeda, sundi, ‘Nun songe,’ tenepra, konum yanipnengedi, ne tep mali kudinkamnenge. Atep, ‘Anesalada, ne nyapu,’ men tenenkamne. Israel nesala kankan neitamai di, dopra bura tara enepra dokotepkamne. Anesala yuma popra gawal dakamne. 4Tonda, amutu neitamai kunkamrum nesala yumadi, isok si Molok, er si eremna tep, angebo er nyapu dopra kareprepa, amutu kurumu nesala ton, er mali kupmare keca tep epra kael keprumudi, angebo tep men weneprumyopda, nedi sun Israel nesala tep wenepkamne ja.

5Tonda, isok Molok er si eremna tep, sun nyapu dopra karerbange nesalada, ne pedipapu sun tep wenepra popkamne ja. Ada, sun nyapsilip yuma cap, tonda sun damai kikiman kunge nesala cap yumada, Israel nesala kunge mutu kankan neitamai di, doropra bura tara enepra dokotepkamne. Ukupnedi, sun tep wenepra poptapkamne ja. Ada, ne damai di tapra, isok Molok, er si eremna tep er si erepmenge nesala cap, yuk neng epmengedi, ‘E aneng kungetopu, nun peda kunkamepe,’ tenengedi, amali kecapu talepra kupmenge nesala peda, ‘Anesalada, ne nyapu sisa kununge,’ pio men tenenkamne. Israel nesala kankan neitamai di dopra, bura tara enepra dokotepkamne. Sun yuma tep wenepra poptapkamne. Deiyoda, nerapu doamenge neng dinin, amenda taru yuk nerapu tep, ‘E, sun ton kikiman maptepe’ tenen, anerapu ton doamenge nengdi mali kuramengtopu, sun Molok si eremenge nesaladi, ne Allah tep konum tamnenunge.

6Ware ngebo do, asuru kwa ngebo erda deamenge neng sambala cap, isok puto deiki di upu sisingamre ngebo cap damai beredi, “Kandi angeda ukupnetume,” pepra moropre ngeboda, ‘Angeboda ne mi sisa kurure,’ men tenenkamne. Deiyoda, ne Allah tepapu, ne sipu ereipnetenge dinin, tali isok si tep eremenga deiki di, nimidi nerapu konum doamenge dinin, anerapu tapra yuk nerapu tep upula nyangdaramengtopu kununga tep pepne. Atep, nedi Israel nesala kankan neitamai di, anesala dopra bura tara enepra dokotepkamne. Anesala yuma popra gawal dakamne. 7Ne sun nai bo Allah Yahwehdi pepsene. Sunda mali kun keca yuma taprumudi, moupra kalekdamumdi, pio teleppu kunkamrume. Ukunkamruma deiyoda, neda sun nai bo Allah Yahweh kununa tepa.

8Atep nengeda, nedi, “Angeda ukupra kunkamrume, angeda pio men kunkamrume,” pepra pedisenetopu moupra talepmumdi kunkamrume. Ada neda Yahweh kunedi pepsene. Ne Yahwehdi, sun tep, ‘Israel nesaladi angepu kunkamenge’ tenen, wepra deipsisi. Ne mawa nesala kuruma tep pepsene. 9Tonda, ware ngebo do, er nai cap, er nin cap tep, tulum teneramredi, er nai cap, er nin cap tep mali kupyopda, angeboda, adipapu popra tamkamrume. Tonda, angebo, er depkamre ngeda, er pe mali kudana deiki ja. Deiyoda er pua. 10Ukupmanto, Israel neng tenpu ngebodi, er kayapu yuk neng ner dopra nyaknyopda, angebo cap, aner capda adipapu popra tamkamrume. 11Ange utopu, nimi tenpu ngebo ton, er nai bo sisa domre ner dopra nyakyopda, er nai bo tep yanipredi mali kweipkamre. Atep, angebo cap, aner cap, adipapu popra tamkamrume. Angebo cap, aner cap, sun butene depkamrenga deiyoda, sun pe mali ja.

12Ukupmantoda, nimi ton erdi deiamre midi doamre ner, er yamal ner dopra nyaknyopda, angebo cap, aner cap, sun butene yumada adipapu wenepra popra tamkamrume. Ada aner cap, angebo cap, sun buteneda, Allahdi, ‘Angeda pio mem keca. Telep nimi cap, nerapu cap, angetopu pio men kunkamrume,’ peipseua cadi, pio mem keca kupmarengepa, sun depkamrengada, sun pe mali kuna ja. 13Tonda, ukupmanto nimi tenpu ngebodi, ‘E nerapu nyangamengtopu, ne cap, yuk nimi cap kikiman mapteneme,’ tenepredi, sun pe nimipu nyakdarengopda, sun butene pio ila malinge kupkamrenga cadi, adipapu sun abutene nengda, adipapu wenepra portamkamrume. 14Ange utopu, nimi ton er ner domredi kikiman maramrenge dinin, angebodi adoamre ner, er nin dopra, er ton nyaknyopda, Allah er kangeda, “Angeda pio ila malinge, pio mem keca,’ tenerura cadi, sun aweneri nesala yumada, adipapu poptaprumudi, uku dongopmengepa, ukudi sun nong jepropkamrure. Amali kun keca kamo utopu ngeda, sun damai pio men kunkamrure. Amali keca utopu ngeda, ne mawa nesala cadi, sunda ange utopu pio men kunkamrume.

15Tonda, ukupmanto nimi tenpu ngebodi, tali gam kurur keca kam do, sapi do, uda yuk keca ton, tonpa kikiman mapmengopda, adipapu angebo cap, agam kure keca cap popra tamkamrume. 16Ange utopu, ner ton tali gam kure keca kam do, ware keca do, er cap agam kure keca cap kikiman maprengopda, aner cap, agam kure keca cap, adipapu portamkamrume. Akeca utopu kunge nesalada, sun depkameng ngeda, sun nong deikipu kupkamrure. Deiyoda, sun pe mali ja. 17Ukupmanto, tenpu ngebo sun nai sun nin tenpudi, deiamrepane, er malnerpu dinin, sun tonpa maprengopda, Allahdi, ‘Anesalada, ne nyapu sisa kununge,’ pio men tenenkamre. Israel nesala kankan neitamai di dopra, bura tara enepra dokotepkamrume. Allahdi sun yuma tep wenepra poptapkamre. Autopunge kupre ngebo cap, anerapu cap pio mem keca, ila malinge konum kupmarenge. Anerapuda, er mal nerapu utopu cadi, akupmare keca deiki di er pe damaipu menengada sundi poptamkamrume.

18Tonda ukupmanto, nimi tenpu ngebodi, er doamre ner do, yuk ner do, er yapi embaramre taru neitamaida, er cap aner cap tonpa antapdarengopda, sun aneng butene tep nengeda, Allahdi, ‘Ne nyapu kurerunge,’ men tenenkamre. Israel nesala kankan neitamai di dopra, bura tara enepra dokotepkamrume. Ukuprumupa, Allahdi sun butene tep wenepra poptapkamre. 19Ukupmantoda, nimi tenpu ngebo ton, er nin er weit ner do, er du ner do, tonda er nai bo sisa, er mal nerapu do, tonpa antapmarengeyopda, akupmarenga deiki di, sun yala neng konum yanipra mali kweipdanmarenge. Ange tep menengada, Allahdi weneprepa, ikin keca sun damai yarepa, doronkamrenge. Sun yumada, nyapu kapul men derinmrengetopu, depkamrenge.

20Ange utopu, tenpu ngebo ton, er mambo domre ner bena upula gupra dopropyopda, pio malinge kupmarenga cadi, er mambo si konum yanipmare. Akupmarenge tep, Allahdi wenepredi, menenga kareprepa doronkamrengeda, nyapu ton pio men derinkamrengetopu depkamrenge. 21Ange utopu ukupmanto, nimi tenpu ngebodi, er weit bo do, er du bo do, er domre ner upula dopra nyakyopda, pio malinge konum kupmarenga cadi, er kabo si konum yanipmaredi mali kudinmare. Akupmarenge tep, Allahdi wenepredi menenga keca kareprepa doronkamrenge ngeda, nyapu ton pio men deriramrengetopu, depkamrenge.

22Ange tep nengeda, ne Allah Yahwehdi pepsene. Nedi, “Angeda ukunkamrume, angeda pio men kunkamrume,” peipsesi upu moupra talepmumyopda, teleppu kunkamrume. Gum dingeda, apeipmasen keca talepmumdi, mali kupmumnyopda, nimi dukna dungamengtopu, nedi doupra Kanaan mutu bena deipsenepa, kunkamrum mutu neitamai di, enepronkamsene. 23Menop taru sun Kanaan mutu neitamai kurami nesalada, apio mali keca yala-yala yumada, weika di kuramya tep nengeda, nedi anesala tep, “Gume, anesalada ne pio songe. Ne damai men yakankamenge,” teneramsi. Atep, anesaladi talepra kuramenge kecada, ‘Nun ton talepra kupetepkupe,’ pio men tenenkamrume. Atep nengeda, Kanaan mutu menop taru di dipra, ataru kunge nesalada, sun Israel nesala damai di enepronkamne. Ukupnepa, sunda amutu wekmumdi talepra kunkamrume.

24Kanaan mutu neitamai kurami nesalada, mali kun keca weika di kununga cadi, ‘Anesalada ne pio songe,’ teneramsi dinin, nedi, “Sun Israel nesalada, akeca-keca yuma kapu mutu, pio telep mutu karepkamsene,” pepra pedina upu peiamsisi mutuda, ataruda karepsene. Atep amutuda, sun pio talepra kunkamrume. Ne tek sisi sun nai Allah Yahweh kunune. Yuk nesala yala-yala yuma cap, ban-ban yuma cap, dakunge mutu neitamai di, konum wilipra deipsisi. 25Sunda, ‘Ne mawa nesala kunkameng’ tenen, wepra deipsisi. Atep, sun amutu kunkamrum taruda, nedi sun tep, “Uda ayapi keca cap, ma cap jena ngeda, telepnge ace. Angeda, ne kangeda, akecada malinge cadi, ayapi keca cap, ama capda, sun men jenkamrume. Ada meme,” pepra lap peipkamsene. Ange yuma lap peipsi ngeda, moupra kael kemumdi angepu talepra kunkamrume. “Angeda jena gumnge,” peipsesi ngeda, pio men jenkamrume. Atep nengeda, yapi keca do, ma do, “Angeda meme, peipsesi kecada, mali keca kurura tep, akeca dopra, tali lupra dopra jepmumyopda, sun nonge mali kudidankamrume. Atep, “Akeca yumada, pio men jenkamrume,” pepsene.

26Deiyoda ake. Ne nyapu sunda yuk mutu ban-ban yuma kunge nesaladi talepra kunge mutu neitamai di, sun Israel nesalapu yuk-yuk bokra deipsisipa, teleppu kunkamrume. Amutu neitamai kunkamrum taruda, ne nyapu sisa mengne nesala kunkamrume. Ada, neda sun nai bo Allah Yahweh kunune. Neda pio lengna ngebo kununa cadi, sun peda, mengne nesalapu kunkamrume.

27Uda tenpu upu ton pepkusene. Amutu neitamai kunkamrum nesalada, nimi do, nerapu do. Tonda, deramenge neng, sun sambala cap antapmengedi, upu sisingmenge nesala cap, tonda, isok puto deiki di ker dona pel utopunge talepra kungedi, kupbange nesala capda, sun adipapu gel dopra, amali kun keca kunge nesala popmumpa denkamnunge. Adepkamenga deiyoda, sun pe nong deikipu kupkamre ja. Sundi mali kupmanga deiki di depkamenga cadi, deiyoda, sun pua.