Leviticus 21

‘Imam-imam nengda, dumsisi pio telepepu kunkameng’ tenen, pepu upu

1Allah Yahwehdi, Musa tep, aupu pepra deipu.

Kandi, apeipne upuda, imam-imam neng sun gekenai bena penkamrume. Ada, Harundi deipupa, deipdanen benami neng, atau imam pel talepra kunge neng sun yuma tep, aupu pepkurume. Ada, imam pel dona neng neitamai di, tenpu ngebo ton, Israel yala nesala aneitamai dinin, sun pe nyapsilip ton depmangepa, sun nong dopra dadeipmanga, damai yana, pio men talenkamnunge. Ada, depmange neng sun nongeda, sun imam nengdi talepmengopda, sun pe nongpu mali kweipdanunga tepa.

2Angeda, pio men kunkamnung dinino, imam ngebo er mening damai nengpu, uda er nin sisa do, er nai sisa do, er mi sisa do, er ner mi sida do, tonda er duyapu do, er weit yapu do, er du nerapu do, er weit nerapu do, autopu nesala depmengopda, sun nong taleptu dinin, yuk nesala yumada, pio gume. 3Ange utopu, imam ngebo er mal ner kaber tupa kuramredi, nimidi men dopmangepapu depyopda, er nenge kapul men kurya cadi, aimam ngebodi er mal ner depyopda, aner er nong taleptue. 4Dinino, imam ngebo, er mal ner sisa gum dinin, er kayapu nengdi domi nerapu do, yuk tamna neng do, sun depmangepa, deipmanganen, pein taruda, tali kunkamrure. Sun nong pio men talenkamrure. Erdi er pe tep, mali men kweipdankamra tep pepsene.

5Tonda, sun imam pel talepra donge nengda, sun giso potong deiki tamna neitamaida, delaupu kurupra, deipmengedi men bumtamkamenge. Tonda sun si bana potong ton men tounkamnunge. Tonda, sun imam neng, sun kayapu neng depmengopda, ‘Uo, nunda ikin kange doupra engenkamep’ tenen, sun nong deiki, si keca di, dila men dodidankamnunge. Ukupmengopda, sundi sun pe nong tep mali kweipdankamenge. Adeiki di, sun depmange neng tep, weika di engenmangedi, sun nong deiki dila men dodidankamnunge.

6Deiyoda, sun imam nengda, ne Allah cap, nimi cap, antamna ati neitamai pel dona neng kunkamnenunga tepa. Ne mawa nengpu kunkamnunge. Tonda, Israel nesala, ‘Allahdi nun mali kupe keca kau kepkamser’ tenen, yapi keca dopra popmengedi, uku dongorbanunge. Jen keca yala-yala weike, ne Allah, ne gispal dona tep, kareryakanenunge. Atep nengeda, mali keca damai kuna do, talena do, akupmenga deiki di, neda Allah, ne si mali men kudinkamnenunge. Tonda, sunda ne gispal dona tep, mambul pel dongedi, neda pio lek ngebo tep pel donenunga cadi, atep ngeda sunda, mali keca bol bena gum dipapu, pio lengnapu kunkamnunge.

7Tonda, tenpu imam ngebo ton, ner dopkuryopda, kaber ner dinin, tali-tali nyangamenge ner do, yuk mali keca tep mali kweidanamu ner do, ange utopu tali-tali kuramre ner men dopkamenge. Tonda, nimi domre dinin, er nenge tapra, tali kuramre ner capda, pio men donkamrure. Angeda tali tep gume. Er aimam ngeboda, ‘Ne Allah cap, nimi cap antamna ati pel talepra dona ngebo kunkamre’ tenen, angebo tep wepra deipsi. Atep, angeboda ne mawange kurure. Erda mengnepu kunkamrure. 8Israel nesala yumada adipapu kael kemkamnunge. ‘Imam-iman nengda, Allahdi wepra deipu neng kununga cadi, sunda pio telep, lek neng kununge,’ tenekamnunge. Deiyoda, sun imam-imam nengdi jen keca doupra ne Allah si eremna tep kareryakankamnenunge. Neda, Allah Yahweh kunune. Neda pio telep, Lek ngebo kunune. Tonda, ne dipapu ne mawa nesala, ne nyapu Israel nesala, sun tep pio telep kupra derisenune. 9Tonda, tenpu Imam ngebo ton, er ner midi, ‘Co bo karepkamneng’ tenen, tali dakunge nimi cap, antapredi tali-tali nyangamenga deiki di, er pe nong tep mali kudidarure. Tonda, er nai bo aimam tep pio mali kudirure. Atep nengeda, imam ngebodi deipre ner mida, tali-tali nyangamenge ner kuryopda, adipapu aner mi dopra, uku dongopmengepa, jepyopda depkamre.

10Imam neng kan-kan di ila deiyo ngebo kuna tep, tenpu ngebo wepra deipkamnunge. Aimam ngeboda, sun yuma deiki tara, ila deiyo ngebo kunkamrure. Imam deiyo ngebo wepmenge taruda, minyak me er giso deiki dikra lingdinkamnunge. Tonda er wepra ereipmengopda, imam ila deiyo ngebo kenengna opkal ton kenengdinkamnunge. Atep nengeda, er giso potongda taprepa du men mounkamrure. Tonda, er kemamre opkal gwelepra men tamkamrure. Erda pio teleppu kunkamrure.

11Tonda, depmange nesala derinkamengaida, imam deiyo ngebo men diryakankamrure. Depmenge nesala nong damai yaryopda, mali kudidarura cadi, ange men kupkamrure. Ada er nai sisa do, er nin sisa do, depmarenga peda, sun nong deipkamengaida, men diyakankamrure. Ange kupreya deiki di, er pe nong deikipu mali kudinkamre. 12Tonda, neda Allah, ne lengna ati neitamai di pel donkamrura cadi, nimi depmengopda, ‘Anesala melipkamne’ tenen, akati tapra, bura tamna men bankamrure. Alek ati tapra bura tara beryopda, ada “Ne lengnaida tapra bana gume,” pepsi ngeda yanitamkamre. Tonda, ukurya deiki di, ne Allah si eremna ati tep, erdi mali kweipkamre. Tonda, ne Allah ati pel dona tep, wepra deipidi, minyak me er giso deiki dikra deipdi, ‘Allah er mawangepu pio kunkamre’ tenen, er tep erepra deipneiye. Neda er nai bo Allah Yahweh kunedi pepsene.

13Tonda, Imam neng ila deiyo ngebo ner dopkuryopda, nimi cap ton antamna pio gum ner, tek sisi kaber ner dinin dumsisi kuramre ner, er pemutu nerpu donkamrure. Tali ner gume. 14Dinino, solu ner do, er nenge tupa gam kuramrepapu tamre ner do, tonda yambula di tali kuramrepane, upula nyakamenge ner do, tonda co bo karepmengedi, tali-tali nyangamenge ner do, autopu nerapuda, pio men donkamrure. Dinino, er mutu neitamai nerapu dinin, nimi cap pio men antapu nerpu, mali kuna gum kaber nerpu donkamrure. 15“Angeda ukunkamrume,” peipsinge moupra men talepredi, aupu yaniptapyopda, er nyapu yumada, pio telep dumsisi mengnepu men kunkameng. Aupu yanipya deiki di er nyapuda mali kupra deipkamrure. Neda Allah Yahweh kunune. Tonda, nedi erda imam ila deiyo ngebo tep, ‘Telep mengne ngebo kunkamre’ tenen, telep kupra derinune. Allah Yahwehdi Musa tep pepu.

16Aupu konum pepyopda, Allah Yahwehdi Musa tep, aupu ton dukdongopra pepu.

17Apeipkuken upuda, kandi Harun tep lap peipkurume. Ware ngebo do yuma, kandi deipmempa, dadeipdanen yakanung neng neitamai dinin, tenpu ngebo ton er buru cap, yan cap, uda er nong bol deiki yuma capda, mali kwamre ngeboda, angebodi ne si eremna tep karen kecada, men kareryakankamnerure. Ange pepmaken upuda, atarupu gum dinin, ataru di dipra, dorkunkamre taru yuma neitamai peda, mali keca pio men kareyakan kamnerure. 18Ne si eremna tep kareyakankamneng nengda, sun nong bolda mali kuamre nengda, ne damai men yakankamenge. Ukupmanto ngeda, asuru puna ngebo cap, yane mali kuprepa ai bungna ngebo cap, urasin tara pona dila do, yuk mali kuamrenge do, ato ngebo cap, ne damai men yakankamenge. Ukupmantonge ton, ton tara yan lyom weik kupre dinin, ton tara yanda bum kure ngebo cap, ton tara buri lyom kupre dinin, ton tara buri bum kupre ngeboda, ne damai men yakankamenge.

19Tonda ange utopu, ware ngebo do yuma, er buri yo copupa buri mali kwamre ngebo cap, yan yo copupa, yane mali kwamre ngebo cap, 20Tonda, bali tara amnyo gu nemredi pu jeramrepa geipdongopra embaramre ngebo cap, asuru pu jeramrepa asuru puamre ngebo cap tonda, nong bol deiki tau pena suse jeramrepa, nong bol giringre ngebo cap, toro do, nong bol suse yuknge do, apu jeramredi tong peramrepa kwamre ngebo cap, tonda nimi ton saka er bolop mali kwamre neng yumada, tonda nimidi popdangepa er bolop mali kwamre nenge yuma capda, ne Allah tep karen keca doupra, ne damai men yakankamnenunge.

21Ange yuma deiyoda ake. Harun erdi deipupa, dadeipdanen bankameng neng, sun imam neng yumada, sun nong bol mali kwamre neng yumada, ne Allah Yahweh karena tep, jen keca doupra, ne damai men kareryakankamnenunge. Autopu neng yumada, ne karen keca doupra uku men dongoryakankamenge. Deiyoda, sun nong bol deiki mali keca kwamrura cadi, sun nai bo Allah, ne damai men yakankamnunge. Ne si eremna tep, jen keca doupra men karenkamnenunge. 22Dinino, Harundi deipupa, dadeipdanen bankameng neng, er yala neng dinin, apepmasen pu yala taleamre nesalada, yuk imam nengdi, ne tep dopra kareyakankamneng telep jen kecada, sun nong bol mali kwamre nengdi, ange neitamai di dopra, sun ton jena telepe pua. Ada telep lengna jen keca cap, tonda pio lengna jen keca capda, sun autopu nengdi doupra jena telepe pua pepsene.

23Dinino, Harun er yala neng dinin, apepmasen pu taleramrepa, sun nong bol mali kwamre nengda, ne Pio Telep Lengna Ati pumbon, ati yuk-yuk wilimna tep, lyom kain kapkotepya damaida, men bankamrure. Tonda, Israel nesala sun mali kunge keca kaukemna tep, yapi keca popnedi, uku dongomna keca, er si mesba deipyaida, akeca damai men yakankamnunge. Deiyoda, sun nong bol mali kwamre nesaladi ne lengnai yuma damai yangopda, alengnai yuma mali kudinunga tepa. Neda Allah Yahweh kunune. Ne Allah karena tep ketenepra deiami ati cap, akati pumbon wilipra deipsi lengna ati capda, pio telep kupra deipsipa, pio lengna keca kurure. Atep nengeda, sun nong bol mali nengdi, ‘Akati cap, akati pumbon kure keca capda, pu jerepa, nong bol mali kwamre nengdi, akeca bol bepmenge deiki di mali kudinung’ tenen, pepsene. Atep akati damai men yakankamnunge. Neda, sun nai bo Allah Yahwehdi pepsene.

24Ange-ange yuma, Allahdi Musa tep lap peipupane, Musa erdi, Harun cap, Harundi deipupa dadeipdanen yakarami neng yuma cap tep, tonda sun Israel yala nesala yuma cap tep lap peipupa, gekepi.