Leviticus 22

“Allah tep karen kecada, pio lengna kecapu kurure,” pepu upu

1Allah Yahwehdi Musa tep pepu.

2Nedi apeipken upuda, kandi Harun cap, er nyapu cap tep pepkurume. “Sundi pel donkamenge nge yumada, pio moupra tenepmengedi pel donkamenge. Ada, sun Israel nesaladi ware yala keca do yuma, ne Allah karena tep, akeca-keca doupra yangedi ne si eremna tep karenkamnenge. Karepnengepa, sun imam nengdi akeca yuma dopra pel donkamruma cadi, ‘Sun imam nengdi ne lengna keca mali kweipnenung’ tenen, pepkene. Sun imam nengdi ne lengna keca tali lupra talepmengedi, mali-mali kupmengopda, akeca yuma mali kweipnunga tep pepne. Ne sida pio lek si kunerura cadi, sun mali kupmengenge deiki di, ne lek si mali kweipnenung’ tenen, “Sun pelda pio moupra teneprumdi, pel donkamrume,” pepsene. Neda pio tek sisi Allah Yahweh kununedi pepkene.

3Tonda, kandi imam Harun tep pepmempa, er nyapu yuma tep penkamrure. Ada, nedi sun tep, “Angeda meme, men kunkamrume. Ange peda men talepkamrume,” pepra deipsisi keca dinin, sundi akeca talepmengedi do, akeca kupmengedi do, adeiki di mali kweipdangepa, mali keca sun deiki kunmarepapu, Israel nesaladi ne lengne ngebo karena tep yana karepmange keca damaida, pio men yakankamnunge. Ada, Israel nengdi, ‘Nun nai bo Allah er si eremna tep, angeda er mawa kecapu kupkamre’ tenen, ne tep ketenepra karenkamnenung keca tep pepkene. Dinino, sun imam neng balila di, tali lupra ange kupmengopda, sun akeca kupmange imam nengda, pio tapkamne ja. Tonda, ne damai ton men yakankamenge. Aneng cap, ne cap kikiman pio men kunkamepe. Apepra deipsene upuda, ataru di dipra doryankamre taru peda, pio tep kupbankamnunge. Ne Allah Yahwehdi peipsene.

4Tonda, Harundi deiprepa dadeipdanen bankameng neng neitamai di, tenpu ngebo ton er nong bol deiki kange mun kuramre kot suse jeramrur ngebo do, tonda jem dam neitamai di pu jeramredi, lin bisi di yapun embankamre do, ange kuramre ngeboda, Ne Allah tep karepmange jen kecada, pio men jenkamnunge. Ne tep karepmenge jen kecada, lengna keca kurure atep, amali kuna nengda, “Konum telep kupmakere,” men pepmenge taruda, ajen kecada dopra men jenkamnunge.

Tonda, imam ngebodi nimi depmange neng talepyopda, erdi konum mali kweipdanmarure. Ange utopu depmange neng deipmengai do, depmange neng sun nong bepmare keca do, ange ton mangkau di talepyopda, erdi konum mali kweipdanmarure. Tonda, imam nengdi sun lin bisi di yapun do, lin ul do, akeca embanmare ngeboda, er nong konum mali kweipdanmarure. 5Tonda, tu deiki tali embaramre keca, mali gam keca ton akapmarepa, imam nengdi akeca bol bepmengopda, sun nong konum mali kweipdanmanunge. Angetopu, tali akamre keca do, nimi nong do, nedi, “Angeda pio men talenkamrume, angeda bol bemna meme, mali kudiserure,” pepra deipsisi keca yumada, sun imam nengdi pio men talenkamenge. Dinino, mangkau di talepmengopda, sun nong deiki konum mali kweipdanmanunge.

6Imam ngebodi, autopu mali keca bol bepmare ngeboda, konum mali kweipdanmarure. Malipu kunkamre. Ada amali keca kupmare imam ngeboda, akeca talepmare taru dipapu, erda mali keca kuna ngebopu kunmarepane, keteng wengbankamrure. Konum keteng wekronmarya peda, er angeboda me men gakmaryopda, malipu kurura cadi, ne Allah tep yana karepmange jen kecada, lengna keca kurura cadi, angebodi ajen keca dopra men jenkamrure. Keteng kapul men wengbaryopda, er nong yuma me gekyopda, akeca jeptue. 7Dinino, keteng konum wekre taruda, konum me gakra telep kupyopda, alek jen keca dopra, jenkamrure. Ajenada angebo er jena cadi, tali jenkamrure. 8Dinino, ware keca do yuma, bura tara kuramre gam keca er pedi depmarenge do, sun pe meneng keca popmrepa depmarenge do, erdi adepmare keca tu dopra pio men jenkamrure. Akeca tu dopra jepyopda, er pe nong deikipu mali kudidankamre. Ne Allah Yahwehdi pepsene.

9Atep sun imam yala neng yumada, adipapu ne peipmasen upu moupra gekepmengedi, angepu talepra bouna di kunkamenge. Tonda, apeipnetopu men kupmengopda, sundi sun pe tep mali kweipdangedi, tonda, ne lengna ati pumbon bena pel dopmengopda, adeiki di ne lengna ati peda mali kweipkamnunge. Ukupmengopda, nedi, “Sunda mali kweipdanmangdi, ne si eremna ati mali kweipmanga cadi, walito poptapkamne,” pepnepa, ne lengna ati pumbon pel donmenge taru dipapu popnyopda, sunda denapu kunkamenge. “Angeda ukupra teleppu kunkamrume. Mem keca talena gume,” peipsen upu yanipmenga tepa. Neda Allah Yahweh, nedi sun imam neng wepra keteneipsidi, ‘Sun anengda teleppu kunkamnenge,’ tenepsidi, telep kweipsi neng sun kunkamenga tep pepne. 10Israel nesaladi, ‘Nun nai bo Allah er si eremna tep, angeda er mawa kecapu kupkamre’ tenen, ne tep ketenepra karenkamnenung kecada, lengna keca kurura tep, sun imam neng cap, sun nyapsilip cappu jenkamnunge. Dinino, yuk tali dakunge Israel nesala do, sun imam neng sun ati pel melimna tep pel don neng do, sun ati keana pel melipra donmangepa, co bo karenung neng do, sun atali nesala yumada, neda Allah, ne lengna mawa keca pio men jenkamnunge.

11Dinino, imam nengda, ne mawa lengna keca jenunga cadi, aimam ngebodi er pel dona tep, co bo deiki di kunuamrepa, er pel doramre ngebo, er ati kikiman kuramredi, pel doramre ngebo cap, tonda imam er pedi deiamre nyapu capda, Imam ngebo er jeramre jen kecada, sun peda jenkamnunge. Angeda telepe pua. 12Tonda, Israel nesaladi, ‘Nun nai bo Allah er si eremna tep, angeda er mawa kecapu kupkamre’ tenen, ne tep ketenepra karenkamnenung kecada, lengna keca kurura tep, Imam ngebodi deiamre ner mida, yuk tali ngebo domyopda, ne tep kareryakanenung keca, er nai boda jenkamre dinin, aner mi cap, er nenge capda, alengna keca dopra men jenkamrerunge. 13Dinino, aimam ngebo, er ner mi nimi konum domrepane, er nenge konum deprepa, solu kuramrur do, tonda nimi domya tamredi, mi men deiamredi, tamupra er nai bo koripu yanamrur nerda, er nai bo, aimam ngebo jeramre jen kecada, er ner mi peda jena telepe pua. Deiyoda, ajenada imam neng sun jen kecapu kurura cadi, imam neng sun nyapsilippu jenkamnunge. Dinino, sun tali dakunge nesala yumada, neda Allah, ne tep karenenung lengna kecada, pio men jenkamnunge.

14Tonda, imam ngebo er nyapsilippu guma dinin, tali ngebo mankau di Allah si eremna tep kareyakanung jen keca dopra jepyopda, ajepmare jen tep yo pununada, ajen keca er kunumna utopu dinin, tapakra dua puluh persen ton (20%) tapakra ketenepyopda, sun imam neng tep karenyakankamrure. 15Israel nesaladi, ‘Nun nai bo Allah er si eremna tep, angeda er mawa kecapu kupkamre’ tenen, ne Allah Yahweh tep ketenepra karenkamnenung keca yumada, lengna kecapu kurura tep, sun tali dakunge Israel nesala cap, sun imam neng capdi, akecada mali men kudinkamnerume. Alengna keca yumada, ne mawa lengna keca kurura tepa. 16Aderiryanmange kecada, ne mawa lengna keca kurura cadi, tali Israel nesaladi do, yuk nengdi do, mangkau di akeca jepmengopda, ne Allahdi anesala tep wenepkamtene. Atep nengeda, sun mali kupmatengepa, walito weneptenya cadi, sundi, ‘Uo, Allahdi nun mali kupmap keca tep, kau kepkamseredi, men wenepkamser’ tenen, ne tep karen keca ton ketenepra yana karepkamnenge. Deiyoda, ne lengna mawa keca dopra jepmanga deiki di, anengdi sun pe tep mali kweipdanmange. Neda Allah Yahweh kunune. Nedi, sun Israel nesala yuma tep, telep kupra derisenuna cadi, nedi aupu pepsene.

Allahdi Musa tep pepu.

Allahdi, “Akecada, ne si eremna tep karena telepe,” pepu upu

17Allah Yahwehdi Musa tep pepu.

18Aupu peipne ngeda, ange-ange kuna tep, kandi Harun cap, er nyapu cap, sun Israel nesala yuma cap tep, “Allahdi upeipmasere,” peipkurume. Ada, sun Israel nesala do, yuk mutu di yangedi, sun cap kikiman kunge nimi bo neng do, Israel nesala cap, sun kankan kikiman kunkameng nesala capda, sun mali keca kaukemna tep, uku dongonkameng kecada, tenipterepredi, ne Allah Yahweh tep karenkamenge nge do, sun pe kange dipapu tali karenkamenge nge do, angeda yumada, ukupra kunkamrume. 19Ne Allah karena tep, doupra kareyakankameng domba do, sapi bisam do, kambing bisam do yumada, jemngepu duyakankamnenunge. Ada bol pio telep ngepu duyangepa, Allah er kange derinkamsere. Bol mali douamre ngeda, pio karena gume. Telep ngepu karenkamnunge. 20Agam keca yumada, bol mali kwamrenge ton, pio men kareryakankamnunge. Autopunge karepmengopda, Allah Yahweh er kange telep men kuredi, sun tep men kaukemkamre.

21Tonda, Israel nesala sun mali kupmangedi, ‘Uo, nun nai bo Allahdi, nun mali keca daepseredi, telep kupra kikiman kunkamepe’ tenen, yapi keca popra, kareryakankameng kecada, bol mali douna ngeda, pio men duyakankamenge. Ada sundi, ‘Ne nai Allah er si eremna tep, ukupkamne-ukupkamne,’ pepmengedi, pedina upu pepmenga deiki di karepkamneng keca do, tonda sun pe kange dipapu tali karepkamnenge do, utoto pua. Bol malinge gum dinin, bol pio telep ngepu kareryakankamnenunge. Ada, sundi ne tep karenkamneng kecada, sapi bisam do, domba do, kambing do, ange yumada, bol telep ngepu karepmengepa, neda Allah, ne kange deipsenedi, akeca yumada doronkamne.

22Tonda, gam keca popmengedi, ne Allah tep, kareryakankamrum ngeda, asuru puamrenge cap, yo coamrenge cap, tonda susu dila kuamrenge cap, toro deiamredi, yapun embaramrenge cap, tonda bol kirikna kuramredi, pu jeramrenge capda, doupra yamumpa, yapi keca popra uku dongomengedi, ne Allah Yahweh, ne si eremna tep, ketenepra karepmumpa, imam ngebodi mesba damai bena, uku men dongomkamnunge. Neda, Allah Yahweh ne si eremna cap, karena cap tep, bol mali doramrenge yumada, men kareryakankamnerume.

23Dinino, ukupmantonge ton pepkune. Ada, sun kange dipapu ne Allah gispal dona tep, tali lupra kareryankamrum gam kecada, sapi bisam do, domba bisam mi do, er nong yuma teleppu kurur dinin, er yane tenpu, yambul lyom kurenge do, yambula di yane bum kurenge do, angeda doupra yana karenada telepe pua. Ange telep dinin, sundi, “Nun nai bo Allah er si eremna tep, ukupkamepe, ukupkamepe,” pepra, pedina upu puto di penkamenge tep nengeda, ange utopu yapi kecada, men karenkamnerume. Nong yambul mali utopunge doupra yamumpa ngeda, ne Allahdi, ‘Angeda malinge doupra yanmange’ tenen, men doronkamne. Dinino, pedina upu karena gum dinin, sun pe kange dipapu tali karenkamnerumnge tep nengeda, yane bumnge do, yane lyomnge do, karena telepe pua.

24Uda, ange utopu, ne Allah si eremna tep, gam keca doupra kareryakana ngeda, ake. Gem domba do, sapi do, kambing do, bolop darapredi bongoprenge cap, bolop sengtamkarumnge cap, tonda, bolop susu jeramrenge capda, ne Allah Yahweh tep pio men karenkamnerume. Tonda autopu ngeda, sun kunkamrum mutu neitamaida, ange utopu ngeda, ne Yahweh tep pio men karenkamnerume. 25Tonda, sun Israel nesala cap, kikiman kunkamrum nimi bo neng cap, yuk mutu neng cap, sundi peinkameng gam keca yuma peda, bol malinge doupra sun Israel nesala tep karepmengopda, ayapi kecada sun bol mali cadi, ne Allah Yahweh tep, pio men kareryakankamnerume. Yuk mutu nengdi talepra peiramenge gam keca peda, bol mali kupre ngeda, ne Allah gispal dona tep, mesba deiki uku men dongkamrume. “Angeda malinge,” pepra lap pepmasen utopu yapi keca bol malinge dopra, ne gispal dona tep karepmuma peda, ne Allah Yahwehdi, ne kange deipra men doronkamne. Bol mali keca karepnerumnya deiki di, sun mali keca men daepkamsene. Mesumpu karenkamrume. Allahdi Musa tep aupu pepu dingeda, kange di dukdongopra aupu ton pepu.

26Allah Yahwehdi Musa tep pepu.

27Uda, sapi bisam do, domba bisam do, kambing do utoto pua. Sundi mi deipyopda, ukupu deipmare taruda, er nin damaipu ue yoneitam bari tumi tupa kunkamrure. Dinino, ue banbari tumi konum kepyopda, sundi, ‘Nun nai Allah tep karepkupe,’ tenepmumyopda, ne Allah karena tep telepe pua. Banbari tumi konum nepmare gam kecada, dopropmumdi, ne Allah Yahweh si eremna tep, ne damai kareryakanada telepe pua. Karepmumpa, imam neng popmengedi, mesba deiki uku dongona telepe pua. 28Dinino, domba bisam do, sapi bisam do, kambing bisam do, ma yala-yala yuma do, ne Allah tep, ‘Popra karepkupe,’ tenepmumyopda, telep dinin, agam keca sun nyapu doupra Allah karerbemum tumipu, sun nin cap, tonda sun nai cap doupra atenpu tumi deiki dipu men popra kareryakankamrume.

29Ukuda, sundi Allah, er si Yahweh, er telepe pena tep gam keca doupra benkomumyopda, apeipsentopu kunkamrume. Tonda apeipsentopu kupmumdi karepmumyopda, Allahdi kange deipredi doronkamre. 30Atep, ukunkamrum ngeda ake. Ada, ne Allah tep karepkamrum jen kecada, uku dongomna pel dopmenge tumipu, tu keca tupa akapmare ngeda, atumipu jepra gawal dangkamrume. Tonda, ajenmamum jenada, tupa deipmamumpa, mapmarumnya berekyopda, ton tumi keprepa, men jenkamrume. Neda Allah, ne si Yahwehdi pepsene.

31Ange tep nengeda, ne Allah Yahwehdi pepne. Nedi sun Israel nesala tep, “Ukunkamrume, angeda men kunkamrume,” pepra deipsen upupu talepra pio kunkamrume. Neda sun nai bo Allah Yahweh kunedi pepsene. 32Tonda, ne ila lengna ngebo si Yahweh tep, mali upu peprumudi, mali men kudinkamnerume. Deiyoda, sun Israel nesala yumada, ne Allah tep, ‘Uo, erda pio ila lengna ngebo kurure,’ tenepnengedi, sun Israel nesala yuma di ne sipu eremkamnerume. Ne Allahda, ne si Yahweh kunune. Ne dipapu sun Israel nesala tep, ‘Ne mawa nesala kupmengedi, lengna nesala kunkameng’ tenen, nedi sun wepra deipsisidi, telep kupra derisenune. Ne Yahwehdi pepsene. Neda ila lengna ngebo kune utopu, nedi sun peda lengna nesala kepra derinkamsene.

33Sunda, Mesir mutu neitamai kuramrumpane, nedi doupra yuk mutu yanamsisi. Ada, ‘Neda, sun nai bo Allah kunedi, anesala talenkamne’ tenen, wepra deipsisi. Neda Allah Yahwehdi pepsene.

Allahdi aupu yuma pepu.