Leviticus 24

Allah er Pio Telep Lengna Ati neitamai deipi lampu weica kalengna tep, pepu upu

1Allah er si Yahwehdi Musa tep pepu.

2“Apeipken upuda, Musa kandi Israel nesala tep upepkurume. Sundi saitun co du mourenge dopropmumdi, taikrumupa, er minyak saitun me embaryopda, aminyak saitun du me mokon pio telep ngeda, ne damaipu duyakankamrume. Deiyoda, lampu weica Allah Yahweh er si eremna ati pumbonpu upmengepa, pio dajenkamrure. Ukupra upmengopda, pio tep lankamre. Atep minyak saitun du me mokon doupra, Allah si eremna ati damai yakankamrume. 3Alampu weica yumada, Harun er dipapu moupra ketenepredi, pel donkamre. Ada kapul ipbanmare taru di dipra, lukunda yuma lanmaryanen, berengkamre taru yuma moupra, kalengkamrure. Allah Yahweh erda aceipu pio kunkamra cadi, erdi aweica lampu dinkamrure. Allah er pedina upu kidin peti co pumbon deipi ati, ortara Pio Telep Lengna Ati kupkai dinin, atarada yuk ati wilipra dopi ati, er si Telep Lengna Ati daneitamaida, ila lyom opkal kapkotepi. Ada Pio Telep Lengna Ati leliprorure. Atep, Pio Telep Lengna Ati ortara kupkai, atarada aweica telep kupra lankamre. Apeipmasen nge yumada, sundi deiprumupa, dadeipdanen bankamrum nesala peda, autopu pio tep apelpu dopbankamenge. Ada ukutaru akuprumutopu, dortaru peda, akunkamrume. Pio-pio tep, tupa akunkamrume.

4“Harundi ange yumada, ukupkamrume,” peredi, kalekra pel dorepa, telep kunkamre. Alampu weica er yanda, kunumna weik keca er si emas, pio telepnge di deipdongopra dopredi, akati deipkamre. Tonda, ataru-ataru yumada, alampuda pio tep Allah Yahweh er Telepe Ati pumbon deiprepa lankamre. Atep nengeda, Allah Yahwehdi alampu pio dinkamrure.

Roti kwaneng dana tep, pepu upu

5Allahdi Musa tep pepu.

Kan adipapu roti kwaneng dana deiyo keca er sida tepung pio telepnge, tenpu kilo gram dopra, roti jen keca yuk-yuk dinin, 12 dapkamrume. Roti tenpu ngeda, tepung tenpu kilogram deiki di dopropmumdi, roti dapkamrume. Ukupmem dingeda, roti kwaneng dua belaspu dapra deipkurume. 6Ange konum dapmemnyopda, roti kwaneng derinaida butene keipkurume. Dunukmemdi dana tara ngantan bari deipkurume. Utopu dana tara peda ngantan bari deipkurume. Acei yumada ue deiki di dana tara, dua belas (12) roti kwanengda, ketenepra deipkurume. Kunumna weik urasin telep keca, er si emas di ketenepra deipi meja deiki deipkurume. Adopi mejada, Allah er keana tep, dodin opkal ati pumbon deipi meja deiki deipkurume.

7Aroti kwaneng damai ngeda, nintong telep keca er si kemenyan ton ketenepra deipra embenkurume. Tumi-tumi yuma aroti kwaneng dapra derinkameng ngeda, nintong telep keca, er si kemenyan deipkamrumnya deiki di, telep kudinkamrure. Angeda, Allah Yahweh er ati neitamai deipkamrume. Tonda, ange yumada Allah Yahweh er si eremna tep, uku dongoramenge utopu kupkamrure. 8Israel nesaladi, ne Allah si eremna tep, beipye peingameng tumi, Sabat tumi deikida, aroti kwaneng 12 ton dapra punupkamrume. Angeda, tupa-tupa Allah Yahweh er si eremna ati pumbon, emas di ketenepra deipi meja deikipu dapra deriryakankamrume. Angeda, sun Israel nesala yumada, ‘Allah cap, nun cap pio telep kupra kikiman kunkamep’ tenen, pedina upu perameng utopu kupra derinkamrume. Ada dortaru yuma peda, pio utopu kupbankamenge.

9Aroti kwaneng dapra derinkameng ngeda, Harun cap, Harundi deiprepa dadeipdanen bankameng neng yumada, sun jen kecapu pio kupkamra tepa. Sun imam nengdi, aroti kwaneng jen kamengaida, pio telep ati pumbon dipu jenkamenge. Arotida, pio telep lek mengnenge kurura tep, pio telepaipu jenkamnunge. Tonda, yuk nge Allah Yahweh si eremna tep imam neng damai duyangedi, karepmenge ngeda, sundi doropmengedi jenung ngeda, yambul mambul kurur dinin, aroti kwaneng ngeda, ila mambulnge kurure. Tonda, ange yumada, Allah Yahweh er si eremna tep, uku dongoramenge utopu kupkamrure.

Allah tep mali upu pepmengepa, amali kunange wenemna tep, ikin keca karena tep, pepu upu

10Tenpu taruda, Israel nesala sun ati dopra kuramya kankan neitamai tenpu ngebodi kupu ngeda ake. Angebo er naida Mesir mutu dinin, er ninda Israel ner kuramu. AIsrael nerdi deipu mi cap, yuk Israel ngebo cap, derepdanmareidi, buru di podanmarei. 11Aner er sida, Selomit. Tonda, er nai boda er si Dibri, er yalada Dan yala ngebo kuramu. Tenpu taruda, Selomit er mi cap, yuk Israel ngebo cap, ati dam pedanmareidi, buru di podanmarei. Apedanmarei taruda, Selomitdi deipu ngebodi Allah Yahweh er si tep, mali upu pepra deipu. 12Ukupupa, sun Israel nesaladi angebo doupra, wenemna ati dongopidi, Musa damai bena, “Angebodi ila mali kupmaunge tep, ware kupkamep do? Nun nai bo Allah Yahwehdi, ware pepkamser do?” pepra asipetepi.

13Duyai dingeda, acapu deipmai. Ada, ‘Allah Yahwehdi ware pepkamar do?’ tenen, geketamnapu kunmaidi, ‘Allahdi peipseretopu kupkamape’ tenen, sunda gekenapu kunmai. Ukupra dinmaipane, Allah Yahwehdi Musa tep, pepu. 14Ukutaruda, Allah tep, mali upu pepmare ngeboda, sun Israel nesala kunmarumai kankan di dopra, bura tara dubena deipkurume. Ukupra dokotepmum dingeda, angebodi Allah tep, er nong deiki mali upu peipmaupa, gekepmai neng yumada, amali upu pepmau ngebo tep, adipapu er nong deiki buru deipmenge dingeda, akati kumum nesala yumadi dinkurume. Konum kupmumnyopda, Israel nesala yumadi gel di dopra angeboda ponmamumnyanen, poptapmumpa depkurure, pepu. 15Ukupmum dingeda, Musa kandi Israel nesala yuma gekena tep, upepkurume. Ware nesala do yuma, Allah tep mali upu pepre ngeboda, er pe nong deikipu ikin keca deridankamre. Allahdi upepmare peipkurume.

16Ware nesala do yuma, Allah Yahweh tep er nong deiki mali upu peipmengedi, Allah tep yanipmenge nesalada, sun yuk Israel nesala yumada, adipapu gel di dopra amali upu pepmenge neng tep, portamkamrume. Apeipsen ngeda, sun Israel nesala sisa pe, yuk nimi bo neng do, yuk mutu neng do, sun kankan kunkameng nesala yuma peda, Allah Yahweh tep mali upu pepmenge nesalada, sun wenemna tep, adipapu anengda gel di dopra, poptapmumpa denkamnunge. 17Ange utopu ware neng do yuma, nimi yuk neng tep popmenge nengda, tek sisi wenepra popmumpa denkamnunge. 18Tonda, ware neng do yuma, sun kayapu yuk neng sun peiramenge gam keca poptapre ngeboda, adepmare gam kecada adipapu tamupra pununkamrure. Ada, tali tep gume, deiyoda, er kayapu neng nge poptapmarya, er yo pununa tepa.

19Ange utopu, sun tenpu-tenpu nengdi yuk neng sun kayapu tonpa kuramenge neng, sun keca ton dopropmengedi mali kupra deipmengopda, ange peda sun kupmengetopu kunkamrume. Ange ukupmumnyopda, “Sun kupmarumtopu tep, nun peda kupmepe,” penkamnunge. 20Atep, ukupmanto ngeda, sun yuk nengdi, yo copra tapsengopda, ayo pununa tep, tamupra sun yo peda comtamkamrume. Autopu, yuk nengdi sun dana tara asuru luktapsengopda, ange yo pununa tep angebo er dana tara asuru peda lungtamkamrume. Utopu erdi, yuk neng tep ponmaryane, aneng sun si du luktapyopda, asi du pununa tep er si peda lungtamkamrume. Tonda, yuk neng yuma tep, mali kweipmengepa, er nong deiki popmengedi mali kweipmengopda, tamupra akupmasengya utopu, sun peda aneng tep ukunkamrume.

21Uda ware neng do yuma, sun peiramrumu gam keca popdamumnyopda, tamupra agam kecapu punudanapu kunkamrume. Dinino, ware ngebo do, erdi nimi yuk neng ton poptaprepa depre ngeboda, er pununa tep, nimi popmarya deiyo ngebo peda, wenepra popmumpa denkamrure. 22Nedi upu deiyo tenpu sun tep karepsendi, “Angeda ukunkamrume,” peipsisi ngeda, pio moupra talepmumdi kunkamrume. Ada sun Israel yala nesala sisa cap, tonda sun cap, kikiman kunkamrum nimi bo nesala yuma cap tep, “Ukunkamrume,” pepsene, Neda Allah Yahweh, nedi pepsene. Sun nai bo Allah kunune. Allahdi Musa tep pepu.

23Allahdi aupu konum peipkopda, Musadi apeipu upu yumada, sun Israel nesala gekena tep, “Allahdi upepsere,” pepu. Upepkopda, sundi Allah Yahweh tep mali upu peiyamu ngeboda, wenemna ati pumbon di dopra, bura tara dokotepidi, gel di dopra ponmaipane depu. Atep, Israel yala nesala yumada, Allah Yahwehdi, Musa tep, “Ange utopu kunkamnunge,” pepra deiputopu, sun Israel nesalada ange utopu kurami.