Lev 25 | XteSC | STEP | Allah Yahwehdi, Musa tep, Sinai mutu deiki di upu pepra deipudi, upepu.

Leviticus 25

Keteng tamun yoneitam baringe keprepa, kunkaminge tep, pepu upu

1 Allah Yahwehdi, Musa tep, Sinai mutu deiki di upu pepra deipudi, upepu. 2 Apeipkendi “Ukupra-ukupra kunkamrume,” pepne upuda, Musa kandi, Israel nesala tep, ‘Allahdi upeipmasere,’ pepkurume. Upepu dingeda aupu ton cap pepu. Allah Yahwehdi amenda taru karepkamser mutu neitamai bena wekmumdi, dopropmum taruda, Allah Yahweh er gispal dona tep ukunkamrume. Amutu kunkamrum taru yumada, Allah tepapu er si eremumdi, ‘Pio telepe,’ pepra, gispal donkamrume. Tonda keteng tamun yoneitam bari kupre taru yumada, sundi wa pena cap, wa pepra yal keca ton kouna cap, pio men kunkamrume.

3 Keteng tamun ngangtan bari neitamai kunkamruma yumada, wa pepra yal keca kounkamrume. Tonda, sun anggur tapu du wa pena tep co deiprapmumdi, penkamrume. Sun amutu tuai di wa pepmumpa, nong kunkamrenge yumada, ngangtan bari keteng tamun neitamai di, akeca yuma buluprapmumdi jenkamrume. 4 Dinino, keteng tamun yoneitam bari kupre keteng tamun yumada, Allah Yahweh erdi ketenepra deipu tumi, ‘Allah er ila mambul tumi ake,’ tenepra, ketenemdinapu kunkamrume. Ayoneitam bari keteng tamun neitamai yumada, amutu tuai ton beipye peingna utopu kunkamrure. Ada, sundi wa pena pio gume, tamkamrume. Ataru pel ton pio men donkamrume. Ange utopu atumida, sundi wa pepra yal keca ton pio men kounkamrume. Tonda, sundi wa pepra kouamum anggur tapu peda, men sengtamkamrume. Anggur du ton men kinkamrume. Deiyoda, yoneitam keteng tamun kupre keteng tamun yumada, amutu tuai ton beipye peingna utopu kunkamrure. Ada, ne Yahweh gispal dona tep kunkamrume.

5 Ange utopu gandum du do, yuk yal keca do, ange ton er pe du di sakamredi, bolokamrenge peda, tonda anggur tapu du dinin, nimidi bolokamengedi teru ton men sekra deiamengepane, er pe yuk bolokredi, du mounkamrenge peda, sundi bulupra men derinkamrume, ton men jenkamrume. Ange tep nengeda, ayoneitam bari keteng tamun gonga kepre taru di dipra, doryankamre war yumada, keteng tamun tenpu yuma deiki di, atu tep beipye peikamrume. 6 Ukupra beipye peingkamrumtopu, nimidi kouna gum dinin, tali tu deiki di, er pe yuk bongopredi, nong kunkamre keca yala-yala yumada, sun jen kecapu kunkamre. Tonda, sun pel melipra don nesala cap, ‘Nun pel donkamseng’ tenen, co bo deiki di kunupra deipkamrum nesala cap, tonda sun cap kikiman kunkamrum nimi bo neng cap yuma tep, men yal keca men kounkamrum dinin, atuai yuma, er pedi tali bongopredi, nong kunkamre keca yala-yala yumada, sundi doprapmumdi, buluprap deipmumdi jenkamrume. Akeca puda, sun jen kecapu kunkamre pepsene.

7 Utopu ton, sun kunkamrum mutu neitamaida, gam keca yala-yala yuma, sundi talepra peinkamrum keca pe, tali bura tara kuramre keca yuma peda, atuai di er pedi tali bolokredi, nong kunkamre keca yumada, jenkamrume. Wa men peinkamrume. Ukupra tamumnyanen, keteng tamun tenpu ton kupbankamrure.

“Yobel keteng tamun kupyopda, akeca-keca yuma tamupra karenkamrume,” pepu upu

8 Nukbaramumnyane, ue yoneitam bari tujuh kali keteng tamun ton nukmumnyopda, minggu yoneitam bari utopu dinin, ‘Keteng tamun yoneitam bari konum kupre’ tenen, nungterenkamrume. Anungamempane, aketeng tamun yuma kupbanmareyane, denge weik empat puluh sembilan (49) tahun kunkamre. Keteng tamun 49 konum kupyopda, ‘Akonuma, keteng tamun lima puluh ngeda, er sida Yobel ^{▼▼Yobel keteng tamun Yobel keteng tamun perami ngeda, ada keteng tamun nukbaramiyanen, lima puluh tahun (50) konum kupyopda, aketeng tamun sida, Yobel perami. Aketeng tamun neitamaida, nimidi kunuami bung keca do, wa tu do, ange-ange yumada, menop taru taleamya deiyo neng tep, tamupra karerami} Aketeng tamunda, Allah er ila mambul keteng tamun konum yanmasere,’ tenenkamrume.

9 Tonda, aketeng tamun, empat puluh sembilan nge (49) konum kuprepa, ware yoneitam bari nukmamempane, yoneitam war konum kupre taruda, awar neitamai dinin, tanggal sepuluh (10) kupre dingeda, atumida, ila lelim pena keca, er si terompet di, lelim ila di penkamrume. Deiyoda, aketeng tamunda, lima puluh (50) keteng tamun, er sida Yobel keteng tamun konum kupmara cadi, nimi mali kuramenge keca, Allahdi kau kepseredi, gum kupra deipkamsere. ‘Kange di ton cap, teleppu kudinkamser tumida, ake,’ tenenkamrume. Atep nengeda, keteng tamun lima puluh nge (50) yaryopda, mutu-mutu yuma dakunge nesala cap, mutu-mutu yuk-yuk talepra dakunge neng cap, sun gekena tep, lelim pen keca, er sida terompet deiki di, lelim pepbankamrume.

10 Keteng tamun denge pio weik lima puluh (50) konum kupyopda, sundi aketeng tamun, Yobel keteng tamun tep, yuk wepra deipkamrume. Ukupmum dingeda, amutu neitamai kunge nesala yuma tep, “Sun yumada kange deipraprumudi, talipu kunkamrume,” pepra embankamrume. Aketeng tamun neitamai di sun Israel nesala yumadi, adipapu tamupra sun pe men di kuramrum mutu tamupra benkamrume. Tonda, sun pe nyapsilip kunge mutupu tamupra benkamrume. Ada, sundi deipipa, dadeipdanen yakanung nesala, sun pe tara neng kunung mutu tamupra benkamrume. Ware ngebo do, adipapu tamupra er cap kikiman kurami neng, er tarapu tamupra benkamrure.

11 Yobel keteng tamun lima puluh (50) ngeda, pio kange deipra kunkamrume. Sun Israel nesala yumada, sun wa peamrumngaida, yal keca ton pio kouna meme. Atuai er pe yuk bolokredi bongopra tekamre keca, er si gandum do, anggur tapu du wa tep do, yuk koun keca do, er pe yuk bongoramre kecapu bulupra jenkamrume. Wa peamumdi kouamrumu keca cap, tonda anggur tapu er teru men sekmarumnge dinin, er pe yuk di, deiyamre anggur du ton, pio men bupropkamrume. Ange yumada, sundi bupropmumdi, mawa pio men derinkamrume. Tonda, men jenkamrume. 12 Deiyoda ake. Yobel keteng tamun neitamai yumada, sun tep nengeda, ‘Gume, aketeng tamun lima puluh ngeda, pio telep lengna keteng tamun kurure’ tenen, kunkamrume. Atep wa pena pio gume. Awa neitamaida, ware yal keca do, er yukpu bolokredi pakra nepredi, pankamre kecapu jenkamrume. 13 Aketeng tamun neitamaida, keana tep, sundi sun pe mutu sisapu ka di tamupra benkamrume. Sun nai yapudi taleamidi, deipsisi mutupu tamupra benkamrume. Aketeng tamunda, er si Yobel tep, kange deiprumudi, teleppu kunkamrume.

14 Tonda, aketeng tamun neitamaida, sundi sun kayapu neng sisa Israel nesaladi taleamenge tu tep pio putapseredi, ‘Kunupkune,’ teneprumnyopda, sun tu kunupkumumnyopda, tek sisi atu kuramretopu co bo telep kupra karenkamrume. ‘Co bo meteka dipu karepkune’ tenen, mawa di mok upu pena gume. Tonda, mok upu pena deiki di, co bo meteka dipu karena gume. Tek sisingepu karepmumdi kunupkamrume. Ange utopu, sun kabodi, “Kau, kan taleamum tu kunupkune,” pepyopda, atu tek sisi kuramretopu, co bo moropkamrume. Katawai di lap pepkurume. Tu mali kupmarepapu, mawa di mok upu peprumudi, co bo weika di dorona meme.

15 Atep nengeda, Yobel keteng tamun neitamaida, ‘Wa tu kunupkune,’ tenepmumnyopda, atu er kunumna tep nengeda, ukupkamrume. Ada, men di kwamu Yobel keteng tamun di, nukraprumudi, tu kunupkumum taru teneprumudi, daneitamai kwamu keteng tamun utopu deiki di, co bo bulupra kunupkamrume. Ange utopu, tu taleamunga deiyo ngebodi, ortaru kwamu Yobel keteng tamun tenepredi, ataru di dipra nukrapredi, amenda taru kupyankamre Yobel keteng tamun tenepreyopda, aketeng tamun kupretopu, aco bopu moropkamrure. Ada, ataru di nukrapredi, ortaru yankamre Yobel keteng tamun tenepre dingeda, awa tu peprumudi, amenda taru bolongkamre taru ton teneprea deiki di, aco boda, moropkamrure. Yuk ton gume.

16 Atep nengeda, awa tu apeipmengedi, kounkamenge keteng tamun pio weik tupa kupkamre teptoda, atu taleramya deiyo ngebo di, atu er kunumna tep nengeda, pio weike moropkamrure. Dinino, awa tu peipnedi kinkamtenge keteng tamun metekanunpu kupyopda, atu taleramre deiyo ngebodi, atu er kunumna peda yambul pua moropkamrure. Deiyoda, wa tu yuma, er kunumna tep nengeda, awa peipmengepa, bolongkamre keca weika di kipkamenge teptoda, kunumna weika di moropkamenge. Dinino, a wa peipmengepa, bolongkamre keca meteka dipu kipkameng teptoda, atu kunumna co boda, meteka dipu moropkamenge. Ange yuma teneprumudi, adeiki dipu ‘E, awa tu er kunumna co boda, ake,’ tenenkamrume. 17 Sun kayapu neng sisa Israel nesala tep nengeda, kunupkamrumu keca yala-yala yuma tep nengeda, tali-tali upu peprumudi, men inimtamkamrume. Ange gum dinino, akeca-keca yuma er kunumna tek sisi akuretopu, angepu tenepra co bo moropkamrume. Mawa di pena pio gume. Uda, sun yumadi sun nai bo Allah Yahweh tep, ‘Uo, mali kupmepepa, Allahdi wenepkamser’ tenen, ne Yahweh tep kwar kupserepapu kunkamrume. Neda Yahweh, sun nai bo Allah kunedi pepsena tepa.

‘Keteng tamun yoneitamnge di mali kupnung’ tenen, pepu upu

18 Allahdi, “Angeda kunkamrume, angeda pio men kunkamrume,” pepra deipu upuda, moupra gekenkamrume. Tonda, nedi, “Angeda kunkamrume, angeda men kunkamrume,” pepra deipsisi upu yumada, lumdongona gum dipapu, pio taleprumudi, teleppu kunkamrume. Aupu yumada pio moupra tenemumdi, bouna di pio teleppu kunkamrume. Ukupra kunkamruma deiki di, nedi melipsenepa, sun amutu neitamai kunkamrum taruda, pio telep kupra bouna di, dim peprapu kunkamrume. Ukuprumnyopda, nedi kaleksenepa, ikin keca sun damai men yakankamsere. Kange deipra teleppu kunkamrume. 19 Apepmasentopu, teleppu kuprumu pangeda, nedi melipsenepa, amutu tu neitamai bena kunkamrumaida, wa peprumupa, nong keca weika di kinkamrume. Atu deiki di kunupsek pepra kareserepa, sun jen keca yumada pio weik kuserepa, weika di jenkamrume. Jen kecada, men sungtalenkamsere. Tonda, nedi kaleksenepa, ikin keca sun damai ton men yakankamsere. Kange deiprumudi, amutu neitamai pio teleppu kunkamrume.

20 Dinino, sundi asipetepnerumdi upeprume. “Naio, keteng tamun yoneitam bari deikida, kandi, ‘Wa pepra koun keca men kounkamrume. Yal keca kouprumupa, bongopredi nong kunkamre kecada, pio men kinkamrume. Atu taprumupa, atu er pedipapu bolongredi tengkamre kecapu buluprumudi derinkamrume. Akecapu kipra jenkamrume,’ pepra deipsemuma tep nengeda, ayoneitam keteng tamun neitamaida, ware jen keca jenkamep do,” pepra, sundi asipetepmanerume. 21 Angeda, sundi upepra asipetepmaneruma tep, lap pepsene. Gume, keteng tamun ngangtan bari konum kupyopda, ne Allahdi sun wa tu yuma pio telep kupra derinkamne. Ukupkamna deiki di, amutu tu yumada jen keca pio weika di pakredi bolongkamre. Atep, jen keca yala-yala yuma, pio weika di kinkamrume. Sun wa tu tep, pio telep kudisenedi, ukupra karesene pangeda, sundi yoneitam bari keteng tamun neitamaida, yal keca yala-yala yuma men kounkamrum dinin, atuda keteng tamun weneri neitamai yuma, nong keca pio weika di bongopredi bolongkamrure. Akecada, keteng tamun weneri deiki di kipra derinkamrume. Adeiki di, keteng tamun weneri neitamaida angepu jenkamrume.

22 Atep keteng tamun yoneitam bari ngeda yal keca men kounkamrum dinin, keteng tamun ban baringe yaryopda, wa pepra yal keca kouna cap, bolongna cap, kina cap kunkamrume. Nedi sun wa tu pio telep kupra deipsenyopda, adeiki di keteng tamun ngangtan bari neitamai yuma, nong keca yuma er pedipapu bolongkamrure. Adeiki di ngantan bari keteng tamun neitamai wa peamumnge tupa akapmarepapu, keteng tamun yoneitam baringe cap, banbaringe cap neitamaida, angepu jenkamrume. Ange utopu, nedi melipkamsena deiki di, jen kecada pio weik kuprepa, jepbaramumpapu, ortara keteng tamun banbaringe neitamai kepkamre yal keca ton, wa pepra kounkamrume. Ukupmumnyopda, keteng tamun topnebaringe (sembilan 9 nge) kupyopda, angepu kipra bulipmumdi jenkamrume.

Kunupkamrum tu cap, ati capda, tamupra karena tep, pepu upu

23 Amutu neitamaida, sundi talepra kunkamrum tu yumada, kunumdanapu kupdankamrum dinin, ‘Atu kunupnyopda, atu kunupmare ngeboda, doryankamre keteng tamun yumada, angebopu atu pio talenkamrure. Atuda, erngepu kurure,’ tenena gume. Angeda pio men kunumkamrume. Deiyoda ake. Ataru di dipra, dorkunkamre taru yuma tep pepne. Amutu tu yumada tek sisi, nengepu kunerure. Ne Allah dipapu, amutu tu yuma talenune. Atep atu yumada, sun penge gume. Allah ne pengepu kurura cadi, sunda nimi bo neng utopu kurume. Sunda, keana tep atu taleprumudi, wa pepra kinkamrume. Atu yuma talena deiyo ngeboda, ne pua. Amutu tu yuma tep nengeda, sundi, ‘Nun ton co bo karepmepepa, keana tep, atu talepmepedi, wa pepkupe,’ tenepmengedi atu taleamya deiyo ngebo tep moropmengedi, co bo deiki di kunupra taleramenga utopu kurume. Atu deiyo ngeboda, ne Allah kununa cadi, nengepu kurure.

24 Atep nengeda, amutu neitamai yuma, sun co bo deiki di kunuprumudi talenkamrum tu yumada, atu men di taleramu deiyo ngebodi, ‘E, ukutaru ka di tamupra atu kunupkune,’ tenepyopda, atu kange di ton cap kunuptudi, er dipapu atu talenkamrure. Wa tu yuma, menmena taleamya deiyo ngebodi, “Amutu tu kunuamsipa, yuk nengdi taleami dinin, ukutaruda, atu kange di ton cap kunupkune,” pepra lap pepre dingeda, er adipapu kunupredi talenkamrure. 25 Ange utopu, sun Israel nesalapu sun kabo ton, sun nyapsilip sun kankan ton, akuramre ngeboda, ikin keca er damai yaryopda, ikin kange douprepa, mambul keca ton putapkamre dinin, men kupmanto kupyopda, er tu kunuptu dinin, telep ngeda ake. Ada, er tara mening damai dakuramenge neng, er du bo do, er weit bo do, er nai bo do, er mambo do, ikin kupmare ngebo er melimna tep, adipapu er kabo yaredi, atu kunupkamrure. Ikin kupmare ngebodi, er ila di putare keca tep, er pe taleamre tu kunuprepa, yuk yala nengdi, melipra kunupmengopda, aikin kupmare ngebo, er pe tara neng, mening damai dakuramenge nesala ton yangedi, atu melipra kunupmengedi doronkamenge. Ada, sun kabodi er taleamu tu kunupmare ngebo, er melimna tep ukupkamnunga tepa.

26 Uda, yuknge ton pepkusene. Tenpu-tenpu nengda, ikin keca sun damai yarepa, sun putana tep, sun taleami tu tep nengeda, ‘Kunupkupe,’ tenepmenge dinin, sun tara neng, mening damai dakuramenge neng ton, sun co bo gum tep, sun kabo melimna tep, atu men kunuptengopda, tali yuk tara dakunge neng, yuk tara neng ton kunuptenge. Dinino, yuk taruda, atu taleamu ngebo, pel doprepa, er co bo ton weika di bulupra deiprenge akaprepa, er men taru taleamu tu kange di kunuptuopda, amenda taru, er men di kunupu tu, kange di ton cap kunupredi talenkamrure. 27 Dinino, erdi atu kunupkure taru di dipra, ortara yankamre Yobel keteng tamun ton tenepredi, ‘Keteng tamun ware kupra konum kupbeu do?’ tenen, nukpetepyopda, aketeng tamun kuretopu co bo ton, dopropyopda, tupa sisa akapkamre ngeda, buluprapredi, aco bo deiki di atu kange di ton cap kunupkamrure. Co bo pio weika di kunuptu dinin, keteng tamun konum kupbeunge nukya deiki di, yambulanunpu karepkamrure. Aco boda, er men di taleamu tu kunupka deiyo ngebo tep kareprepa, angebodi, dopropkamre.

28 Ukunkamrur dinin, er atu taleamu dinin, ikin kupupa er putana tep atu kunuamre ngebodi, akunupu tu yo pununa tep, co bo men kwamrepa, er pe tamupra men karepmanto kupyopda, er tu kunuamre ngebo dipapu awa tu yuma talenkamre. Ataleamrepane, awa tu tep tamupra karen keteng tamun, Yobel keteng tamun konum kupyopda, aketeng tamun neitamai dipapu atu menmena di taleamya deiyo ngebodi tamupra er pe tu tep, kange di dopropkamrure. Keana tep kunuamudi taleramu ngebodi, atu tamupra menmena taleamu ngebo tep, tamupra karepkamre. 29 Ange utopu, ila ati arum neitamai, ati dopyai dana-dana tara, ila gel beilya wiamenge nge ton akapyopda, daneitamaida, tenpu-tenpu neng ton, sun pe man ati dopra kuramenganen, amenda taru akati kunupmengepa, yuk neng ton akati kunupra dopropmengopda, sundi keana taleamenganen, keteng tamun tenpupu tali kange doupra kunkamnunge. Akati menmena domudi, taleramu ngebodi, akati kunupropu keteng tamun di dipra, keteng tamun tenpu nukbaramyanen, akati er tamupra kunupkamtu taruda, atanggalpu kembankamrure. Tenpu keteng tamun neitamaida, akatida ka di tamupra kunuptue. Dinino, keteng tamun tenpu cap, yuk keteng tamun butenenge cap, konum kupyopda, akati amenda taru kunuami neng dipu akati tupa talenkamtenge. “Tamupra menmena di taleamu ngebo tamupra karepmempa, kunupkamre,” men penkamrume, pepsene.

30 Uda, ila gel beilya wipmengedi, ila kota dopyai neitamaida, nimi man ati konum kunupmengopda, atumi di dipra pio nukbaramenganen, keteng tenpu ton konum kupyopda, ‘Akati tamupra men karepkamepe. Menmena taleamredi kunuamya deiyo ngebo tep, men kunupkamepe,’ tenepmengopda, telepe pua. Akati kunupmai nengdipu akati tupa talenkamenge. ‘Akati tupa talenkamepe,’ tenepmengopda, Yobel peramep keteng tamun neitamai di, ka di tamupra men kunupkamenge. Sun anengdipu deipmengepa dadeipdanen bangedi, kupbankameng neng dipu, akatida talenkamenge. 31 Dinino, dan mutu do yuma, taliyaipu ati dopmengedi, akunkamnung atida, gel beilya di wipra dana-dana yuma men ongopdongomenge ati kunkameng atida, bura tara wa pen damai tu utopu kunkamra tep, ato ati tep nengeda, “Yobel keteng tamun konum yanmara cadi, adipapu ka di tamupra menmena taleamu ngebo tep karepkurume,” penkamtenge. Ato ati men di taleamenga deiyo ngebodi, “Akuramum atida, ukutaru putapnera cadi, ka di tamupra kunupnyopda, atu tamupra karenkamnereme,” pepra konum pepmengopda, adipapu akati tamupra men di taleamu ngebo tep, kunupra karepkamrume. Ada Yobel keteng tamun taru konum damai kemyaryopda, akati cap, atu yuma cap tep, tamupra karena pua.

32 Uda, sun Lewi yala neng kunkameng kota tep, upu pepkusene. Sun Lewi yala neng kunkamrum mutu neitamai yuma, ati dopra kunkamengai yumada, sun Lewi yala neng dipapu talengedi kunkameng ati yuma tep nengeda, ukuprume. Sun Lewi yala neng dipapu ati doprumudi kunkamrumai cap, wa tu yuma capda, sun dipapu pio tep, talenkamruma cadi, akati kunupmengepa yuk nengdi dopropmenga peda, ware taru di do yuma, sun Lewi yala nengdi, “Men di taleamepu ati tamupra karepkamserume,’ pepmengopda, adipapu tamupra karenkamrume. Sun Lewi nengdi talenge atida, sundi deipmengepa, dadeipdanen bangedi kupbankameng neng yumada, sun ati keana taru tep kunupmenga peda, amenda taru, Yobel keteng tamun deiki di, “Ka di tamupra akati karepserume,” pepmengopda, adipapu karenkamrume.

33 Dinino, Israel nesala sun kunkameng kota mutu neitamai yumada, Lewi yala nengpu sun kankan kunkamenga cadi, Lewi yala nengdi amutu neitamai di ati tenpu ton dopmenge nge do, kunupkamenge nge do, Yobel keteng tamun yaryopda, ataru neitamai di, “Nun men di kunupropmepu ati ka di tamupra karepserume,” pepra moropmengopda, adipapu tamupra karenkamrume. Deiyoda, sun Lewi yala nengdi ati dopmengedi, ila kota konum kupyopda, akati-akati yumada, Lewi yala neng sun pengepu kurura cadi, Yobel keteng tamun neitamaida, akati tamupra karenkamrume. Sun dipapu talenkamenga tepa. 34 Sun Lewi yala nengdi kunumnung atida, moropmenge pangeda, ka di tamupra karenkamrume. Dinino, sun kota dopmengai, dana-dana tara wa tu do, bura tara mutu do, amutu yumada sun Lewi yala neng dipapu pio talenkamenga tep, amutu yuma neitamaida, ton pio men kunumkamenge. Deiyoda, sun Lewi yala neng dipapu amutu yumada, pio tep talepra kunkamenge. Sundi deipmengepa, dadeipdanen bangedi kupbankamnung nengda, amutu pio tep talepra kunkamnunge.

Kan-kan nesala makuna tep, pepu upu

35 Sun kunkamrum mutu neitamaida, sun nyapsilip sisa neitamai di, tenpu ngebo ton, akeca-keca yuma gum kuprepa, tali kan-kanpu kuredi, er pedipapu puto men kupmanto kuprepa, ikin keca weik er deiki yaryopda, sundi er tep, melipra karenkamrume. Akankan ngeboda, nimi bo ngebo do, sun mutu neitamai tengyakan ngebo do, utopu kunkamra cadi, sundi akeca-keca yuma weika di karepmumpa, sun ati pumbon aneng cap kikiman kumumdi, pio telep kupra meliprumudi, kange deipra kikimanpu kupbankamrume. 36 Sun cap, akankan neng cap, kikiman kurumu taruda, sundi angebo tep, co bo ukupra karepmum dingeda, akarepmumnge tep, “Kanda co bo weikanun ton, itara ton cap tapakra karepkamnerume,” pepra, men moronkamrume. Tonda, menmena taruda, “Co bo karepkamken dinin, menmenada co bo itarange ton tapakra karepnememnyopda, ne cap kikiman kunkamneme,” pio men penkamrume. Ange yumada pio gum dinino, sundi sun nai bo Allah, ne tepapu, ‘Mali kupmepepa, wenepkamser’ tenen, kwar tenenkamnerume. Ne Allah tep, kware men kupserepa, akankan nesala tep, kaukepra tapmumpa, sun kankan dinin, mesumpu kunkamnunge. Anesala tep men meliprumudi, kaukeptaprumu pangeda, ne Allahdi wenepkamsen ja. Sun cap kikimanpu kunkamenge.

37 Tonda, sun nyapsilip yuma ikin kuprepa, men kupmanto kupmengopda, sundi sun yala neng tep, “Kao, ne melimna tep, co bo ton karepnetume,” pepra, moropsenge pangeda, tali lupra karena pua. Sundi, sun nyapsilip tep, “Gume, sunda co bo moropmanerem utopu dinin, co bo itara ton cap tapakra karepnememnyopda, adeiki di melipkamken ja,” pepra, ikin keca sun nong deiki men derinkamrume. Ange utopu tenepra pio men penkamrume. Tonda sun putapretopu, jen keca tali lupra mesumpu karenkamrume. ‘Jen keca karepsetene dinin, co bo ton kunupra karepnememnya deiki dipapu karepkamsene,’ tenena meme. Sundi sun nyapsilip neng tep, jen keca tali lupra mesum dipapu karenkamrume. 38 Ange yumada, moupra tenenkamrume. Neda, Allah Yahwehdi pepsene. Neda sun nai Allah kunune. Nedi sun Mesir mutu kuramrumpane, doupra yanamsisi. Ne dipapu ukupu pio telep mutu, Kanaan mutu karepkamsene. ‘Israel nesala tep, amutu karepnyopda, neda sun nai bo Allah pio tep kunkamne,’ teneramsi. Ne Allah Yahwehdi pepsene.

Co bo deiki di kunuamenge nesalada, ka di tamuna tep, pepu upu

39 Tonda, sun kunkamrum mutu yumada, sun kabo, sun nyapsilip do, sun tara neng do, ikin kuprepa, pio kan-kanpu kuramredi akeca-keca yuma gum kupre pangeda, ukupmantoda, erdi sun tep, ‘Gume kao, neda kan tali pel melimna ngebo kunkamne. Atep co bo deiki dipu ne nong kunupkamnerume,’ pepra moropsenga peda, ange utopu men kunkamrume. Sundi sun pe tara neng tep, co bo deiki di pel dona melimna neng kunupmengedi, mali kuramenga utopu men kupkamrume. Sundi er tep, “Ne melimna pelpu dopkamnerum dinin, mesumpu kunkamrume. Co bo deiki di kunup keca cadi, akeca-keca yuma pio men karenkamkene,” pepra, mali men kupkamrume. Angeda pio mali cadi, men kunkamrume.

40 Angeda gum dinin, angeboda, ati do, wa pena do, pel dopmengepane, sun pel deiyo nengdi co bo karerameng utopu kupra melimkamrume. Sun nyapsilip do, sun tara kan-kan nengdi do, sun melimna pel dopmengopda, apel doramenga kunumna utopu, sundi anesala tep co bo karenkamrume. Tonda, yuk mutu neng dinin, sun mutu neitamai tengyangepa, sun cap kikiman kunkamrum taruda, sun nimi bo nengda melimna pel dopmengopda, apel deiyo nengdi co bo dopra sun nimi bo neng kareramengtopu, sundi sun nyapsilip kan-kan kurameng neng tep, melipra karenkamrume. Akunkameng taru yumada, sun pelpu dopra kuramenganen, Yobel keteng tamun yaryopda, ada akeca-keca yuma tamupra karena keteng tamun cadi, sun nyapsilip, apel don neng yumada, adipapu tamkamrume. Sun anengda, ‘Nun pe mutu tamupra benkupe,’ tenepmengopda, bana telepe pua.

41 Ada, Yobel keteng tamun konum kupyopda apio kan-kan ngebo cap, er nyapu yuma cap, tonda sun nyapsilip yumada, sun tamna nesala kuramenge mutupu, akuramre ati di tapra, er pe mutu beredi, er apu yapu nengdi taleamenge mutupu tamupra bankamrure. 42 Deiyoda, sun Israel yala nesala yumada, kan-kan nesala pe, isomka nesala peda, sun yumada ne nyapu sisa utopu kurume. Ne Allah Yahweh tepapu, ne pel melipra don nesala kunkamenga tepa. Sun yumada, Mesir mutu neitamai mali kange doupra dakuramipane, nedi doupra yanamsa tep, sundi, ‘E, kan-kan nesalada co bo deiki di kunupmepepa, nun pel talipu donkamsenge,’ pio men tenenkamrume. Sun Israel kan-kan nesalada, mesumpu pel don nesala utopu kupra men kunumkamrume. 43 Atep sun Israel nesaladi, sun tara nesala tep nengeda, pio kan-kan nesala kunkamenga peda, kunumna cap mali pedina cap, ikin keca sun nong deiki derina capda, ange yuma pio men kupmanto. ‘Nundi kan-kan nesala kunupkupe,’ teneprumudi, tali lupra men kunumkamrume. Deiyoda, ‘Uo, nun nai Allahdi wenepserur’ tenen, sun adipapu sun nai Allah, ne tep kwar tenepra kunkamrume.

44 Dinino, ‘Nun pel melimna tep, tali pel don nesala kunupkupe,’ teneprumnyopda, sun kikiman kurum Israel yala nesala co bo deiki di kunumna pio meme. Ange putapseryopda, sun pel dona neng do, pel dona nerapu do, tonda, ‘Co bo deiki di kunupra dopropmepepa, pel melipra donkamsenge,’ teneprumnyopda, Israel nesala men kunumkamrume. Ange gum dinin, sun kunkamrum mutu dana-dana tara dipu, tali dakuramenge nesala, yuk mutu nesalapu co bo deiki di kunumna telepe. Ada nimi do, nerapu do, sun pel dona tep kunupra deiprumudi taleprumupa, sun yuk mutu nesaladi pel melipra donkamsenge. 45 Tonda, yuk mutu nimi bo nesala dinin, tengyan neng, sun cap kikiman kunkamrum nesalada, sun cap, sundi derinkameng nyapu capda, anesalapu sundi kunumkamrume. Ange utopu, yuk mutu nimi bo neng ton, sun kunkamrum mutupu sun cap kikiman kunkamrum mutu neitamaipu kunge neng cap, sundi derinkamenge nyapu yuma cap neitamai di, sun pel don nesala kunumna telepe pua. Dinino, sun Israel nesaladi, yuk Israel nesala tep, men kunumkamrume.

46 Atep, sundi yuk mutu nesala do, sundi derinkameng nyapu do, kunuprumupa, sun pel dona neng kupmengedi dakuramenganen, amenda taruda, sun Israel nesaladi deiprumu nyape tep apel don neng karena telepe. Amenda taruda, sun pe nyapu tep, pel melipra donkamenge. Apel don nesala yuma bokrapmumdi, sun pe nyapu sisa ngepu karenkamrume. Atep nengeda, yuk mutu di tengyakan nimi bo nesalada, co bo deiki di kunuprumudi, pel dimna telepe pua. Dinino, sun Israel nesaladi, sun pe tara neng, yuk Israel nesala, sun cap kikiman kunkameng nesala sun kayapu neng tep nengeda, mali upu ton men pedinkamrume. Tonda, ikin keca sun nong deiki pio men derinkamrume.

47 Uda yuk upu ton pepkusene. Sun mutu neitamai kuramenge tengyakan neng dinin, tenpu nimi bo ngebo ton, pel telep kupra dopbaramyanen, amenda taru er peda isomka ngebo konum kuryopda, ‘Ne pel dona tep, Israel ngebo ton kunupkune,’ tenepkamtue. Ukupra teneprepane, sun Israel nesala cap kikimanpu dukdongopra kunkamenga cadi, Israel nesala ton sun keca gum kuprepa, tali kan-kanpu kungopda, sun animi bo nengdi do, yuk mutu di tengyakarami dinin, isomka konum kupre dingeda, er co bo deiki di Israel ngebo ton kunuptue. Akunupkamre ngebo talenkamre. Tonda animi bo neng, sun nyapsilipdi, Israel nesala dinin, pio kan-kan nesala ton kunuptenge. 48 ‘Nun pel dona neng kunkamseng’ tenen, yuk mutu nimi bo nengdi Israel nesala kunuptenge dinino, ‘Israel nesalada, sun du bodi do, sun weit bodi do, anengdi apel donkamre’ tenen, Israel nesala, sun lyemna tep, co bo deiki di ka di tamupra kunupkamtenge. Ada Yobal Keteng tamun deiki di ka di tamupra kunupkamtenge.

49 Agum dingeda, sun kabo do, sun nai bo er weit do, er dubo do, uda apel dona ngebo er mambo do, uda sun cap meneng damai kunge nesala, sun tara neng yuma peda, sun Israel neng pel dona nesalada, sun lyemna tep kunumna telepe. Ange gum dingeda, apel dona ngebo, er pedi puto kuprepa, kunumna keca weik konum mawa deipyopda, ‘Nedi ne yo pununa tep, ne deiyo ngebo co bo karepkamna deiki di kunupdatene,’ tenepyopda, ange peda telepe pua. Er pedipapu kupmanto kupyopda, er dipapu kunumdankamrure. 50 Apel melimna ngebodi, adipapu er kunuamre ngebo tep, penkamre. Er kunuamu taru di dipdongopra, nukbaramrepane, amenda taru Yobel keteng tamun yankamre tahun, lima puluhnge (50) konum kupkamre taruda, akonuma. Daneitamai di kupbaramudi, kupbankamre keteng tamun nukpetepkamre. Apel deiyo ngebodi, apel dona melimna ngebo kunuamu keteng tamun di dipra dukdongopra kikiman kuramrei keteng tamun nukyopda, akunumna kupre utopu tamupra karenkamenge. Ada tumi-tumi yuma do, keteng tamun, keteng tamun pel don neng tep kareamenga utopu nukrapredi, sun kikiman kuramrei keteng tamun konum teneprengopda, ange utopu tamupra karepkamenge. Deiyo ngebodi, angepu nukbaramreyane, ‘Akeca kunumna karepnengepa, doronkamne,’ penkamre ja. Erdi peramretopu, sundi er pel dona ngebo kunumna cap, er lyemna cap tep, tamupra karepkamenge.

51 Apel melimna ngebo er kunumna tep, pel deiyo ngebo men di kareamunge nukmengedi, weik kupyopda, tonda Yobel keteng tamun ortara keteng tamun ton cap tupa weik akapyopda, apel melimna ngebo, er lyemna tep er kunumna dengda weika di karenkamenge. Deiyoda, pel deiyo ngebodi, er melimna ngebo er nong kunuamu taruda, co bo weik karepu dinin, keteng tamun pel doramu ngeda, meteka pua. Atep, co bo weika di adeiyo ngebo tep tamupra karepkamrure. 52 Dinino, pel deiyo ngebo men di kareamunge nukmengedi, tenepmengopda, Yobel keteng tamun damai konum kupyopda, apel dona melimna ngebo, er lyemna tep, co bo meteka dipu tamupra karepkamenge. Deiyoda, pel deiyo ngebodi, er melimna ngebo er nong kunuamu taruda, co bo weik karepu dinin, apel melimna ngebodi keteng tamun weika di pel konum doramnga cadi, co bo meteka dipu tamupra karepkamrure. Er pelda, keteng tamun weika di pel doramnga deiki di, deiyo ngebodi co bo kareamunge konum yo punupka tepa.

53 Sun pel melipra kunkameng nengda, deiyo ngebo er amutara kunkamenge. Apel donkameng taru neitamaida, deiyo ngebodi, ‘Angeda pel donkamrume, angeda men kupkamrume,’ pepra deriramretopu, angepu er pel dona melimna ngebodi adipapu kupkamrure. Dinino, sun damaipu kunkamenga cadi, angebo er pel melimamya deiyo ngebodi, er pel melimna ngebo tep, ikin keca weik er nong deiki men derinkamre. Tonda, er tep mali upu ton men penkamrure. Sun yuk Israel nesala yumadi, ‘Pel deiyo ngebodi, nun kap tep mali kuprur’ tenen, er kuramre keca cap, erdi peramre upu cap moupra gekenkamrume. 54 Uda, Yobel keteng tamun kapul men kupre taruda, sun pel melimna tep kunupdanami nengda, sun lyemna tep kunupmantonge konum lap pepsene. Ange yuma men kupmengepa, talipu pel dopra dakuramenganen, Yobel keteng tamun, lima puluhnge (50) konum yaryopda, atali pel dona tep kunuami neng yuma tapkamenge. Atep nengeda, atali pel dona ngebo cap, er nyapu yuma cap, er nyapsilip yuma cap tep, ‘Telepe dabenkamrume,’ pepra, tapkamenge. Ukupmengepa, apel dona melimna nengda, sun pe mutupu tamupra bankamenge.

55 Ange-ange yuma lap peipmasen upuda tali tep gume. Deiyoda, sun ne nyapu Israel nesala yumada, ne mawa nesalapu kurume. ‘Sunda ne amutara kurumudi, ne pelpu donkamrume,’ tenen wepra deiamsisi. Tenpu ngebo peda, yuk neng tep, tali pel melipra don nesala utopu ton pio men kunkamenge. Tonda, ne Allahda Mesir mutu neitamai di doupra yanamsisi. Ukuamsa cadi, sundi ne tep, ‘Erda nun nai bo Allah kurure’ tenen, kunkamrume. Neda, Allah Yahweh kunedi pepsene.