Lev 26 | XteSC | STEP | Allah Yahwehdi pepu. Sun pe buru di petupra derin keca do, tali dakuamre keca do, akeca-keca yuma tep, ‘Akecada nun nai bo kuredi, kalekra melimkamsere,’ tenen, tali keca tep si men eremkamrume. Tonda, ‘Akeca nun nai bo kunkamser’ tenen, tali akwamre keca urasin utopu kupra, sun pe buru di, petupra deipmumdi, si men eremkamrume. Ange utopu, gel di do, co di do, lyom keca di ikra deiprumudi, akeca damai bena si men eremkamrume. Tonda, tali dakuamre keca urasin utopu ketekepra deipmumdi, ‘Akeca melimkamser’ tenen, akeca tep, si pio men eremkamrume. Ada tali tep gume. Deiyoda, neda Allah Yahweh kunedi, sun nai bo Allah, ne tenpu kunune.

Leviticus 26

“Allah er amutara bouna di kuramre ngebo tep, telep keca karenkamne,” pepu upu

1 Allah Yahwehdi pepu.

Sun pe buru di petupra derin keca do, tali dakuamre keca do, akeca-keca yuma tep, ‘Akecada nun nai bo kuredi, kalekra melimkamsere,’ tenen, tali keca tep si men eremkamrume. Tonda, ‘Akeca nun nai bo kunkamser’ tenen, tali akwamre keca urasin utopu kupra, sun pe buru di, petupra deipmumdi, si men eremkamrume. Ange utopu, gel di do, co di do, lyom keca di ikra deiprumudi, akeca damai bena si men eremkamrume.

Tonda, tali dakuamre keca urasin utopu ketekepra deipmumdi, ‘Akeca melimkamser’ tenen, akeca tep, si pio men eremkamrume. Ada tali tep gume. Deiyoda, neda Allah Yahweh kunedi, sun nai bo Allah, ne tenpu kunune. 2 Tonda, nedi sun tep, “Atumi deiki di, tali pel dona gum dipapu, beipye peikrumudi, ne sipu eremna tumi akunkamrure,” pepra deipsisi tumida, ada ila mambul tumi cadi, atumida pio moupra tenenkamrume. Ada ila Sabat tumi cap, tonda ne Allah si eremna tep, yuk wepra Pio Telep Lengna Ati ketenepra deipnerumai capda, ne tepapu gispal dopmumdi, ne tep si eremkamnerume. Neda Allah Yahweh kununa tep, aupu peipsene.

3 Sun tupa gam kunkamrum taru yumada, nedi, “Angeda ukupra-ukupra kunkamrume. Angeda men kunkamrume,” pepra deipsisinge moupra talenkamrume. Nedi, sun tep, “Sun telep kuna tep, kunkamrum ngeda ake,” pepra deipsisi upu yumada, tamna pio gum dipapu, pio moupra talemumdi kumum pangeda, pio telep kudinkamsene. Nedi melipra kunkamsen ngeda, ake. 4 Tenpu ngeda, nedi, ‘Mo cemna war ake,’ teneramsi taru tep, mo karen taru konum kupyopda, mo karepsenepa cemkamrure. Ukupnepa, mo cepya deiki di, tu deiki talepra kounkamrum keca yala-yala yumada, pio weika di bongonkamrure. Ukupre dingeda, co du yala-yala weika di mounkamsere. Ange yumada pio tep, teleppu kunkamrure.

5 Ange-ange yuma tep, pio telep kupra melimsenya deiki di, sun gandum wa pepra kounkamrum keca yumada, pio weika di nong bolongredi, wisiprepa nong kupyopda, kiprumudi gandum du dorona tep, co balena di bongonkamrum pel kapul men gawal dakmumnyopda, sun anggur tapu du weika di mounkamrure. Weika di melipra karenkamsena deiki di wa pepra kapul koupbaramumpapu, menmena wisipbaredi, du dangne taru kemkamre. Tonda anggur tapu du wisiprepa, dakrumudi, anggur du kapul dakra men purunmamum taru dipapu, kange di ton cap gandum du wa ton pepra kounkamrume. Gandum du menmena wisipredi, kin taru kuprepa kinkamrume. Ange utopu, menmena wisirepa sengkamrum taru dipapu, sun anggur tapu du peda, menmena wisipbanapu kunkamre. Atep, wa pepra yal koun taru pe, du mouna taru pe, wai dam kin taru yuma peda, menmena di nong kupbankamserure. Apio telep kupra kunkamsera deiki di, sun mutu neitamaida, jen keca pio weik kuserepa, weika di jerumupa, bounkamsere. Tonda, nedi melipra kalengsenya deiki di, sun podan neng, yuk mutu yu nengda, sun damai men yakankamenge. Sun mutu neitamaida, podana gum dipapu, kange deipra pio teleppu kunkamrume.

6 Sun kunkamrum mutu yumada, nedi melipra kalengsenepa pio teleppu kunkamrume. Amutu neitamai pio telep kupra kumumdi, tali lupra mankamrume. ‘Uo, ware kecadi do, ware mutu nengdi, yana popkuseng do?’ tenen, kware pio men kunkamrume. Tonda, yuk tali bura tara yu kuramre gam kecada, nimi popmanto gam kure keca yumada, sun mutu neitamai di dopropnedi, gum kupra deipnepa, sun damai men poryakankamrure. Angetopu, ne dipapu melipra kalengsenepa, yuk mutu yu neng yumadi, parang ya dopmengedi, ‘Sun Israel nesala popkup’ tenen, sun mutu neitamai men poryakankamsenge. Nedi kalengsenepa, podana ton pio men kunkamsenge. 7 Tonda, sun podan neng yana popetepsenge taruda, sun Israel neng balila weik kuprumudi, sun yu neng tep denge weik kupmenga peda, sun parang ya dopra popbisipmumdi bisbisa kapkamrume. Sun yu nengda, weika di poptapkamrume. Ton ngeda, sun kware weik kuprepa, sepdaro bendopkamenge.

8 Ukupmanto ngeda, ukupra kunkamrum taruda, sun Israel jen talen neng pamu bari nengdipu, sun podan neng, seratus neng tep popbisipkamrume. Tonda, sun Israel jen talen neng seratus nengdi, sun podan yu neng tep, nimi denge pio weik sepuluh ribu (10,000) neng popbisipkamrume. Ada, sun parang ya dopra popbisipmumdi, bisbisa kapkamrumnya deiki di, sun yuk mutu yu nengda, weika di poptapkamrume. 9 Ne Allahda, sun damaipu bicau tenesenedi, sun damai kunkamsena cadi, nedi sun tep melimkamsene. Meliamsenya deiki di, sun nyapu peda weika di karenkamsene. Ada sundi deipmumpa, dadeidanen, bankameng nyapu yumada, pio weik kunkamenge. Tonda, nedi, “Ukupra kunkamrume. Ukupmum pangeda, nedi tek sisi ange ton, ange utopu kupkamsene,” pepra, pedina upu peipsisi upuda, ange yuma tek sisi melipra kupbankamsene.

10 Tonda, sundi tu deiki di talepra wa pepra kounkamrum keca yala-yala yumada, weika di karenkamsene. Ukupra karesenepa, pio weika di kiprumudi, weika di jenkamrum dinin, pio weik, men nukmanto kinkamruma cadi, ton ngeda mawapu jen derin ati ton weika di derinkamrume. Ukupbaramrumpanen, amenda taru wa pepra koupmumpane, du moupbankamre ngeda, keteng tamun neitamai yumada, pio weik kupbankamrura cadi, menmena taru mawa deiamum ngeda, kapul men jenmamumpapu, ange dopra, tali dokoteprumudi, ukupunge ton punupra derinkamrume.

11 Tonda, ne Allahda, sun kunkamruma kan-kanpu kunkamne. Ada sundi ne si eremna ati dopkamneruma neitamaipu kunkamne. Sun cap kikiman kunkamepe. Atep nedi sun Israel nesala yuma tep nengeda, ‘Anesala ne songe,’ tenen, pio men kunkamsene. Bicau tenenapu kunkamsene. 12 Ukunkamsenya deiki di, neda sun kunkamruma kankan neitamaipu kunedi melimkamsene. Neda sun nai bo Allah kunepa, sunda ne nyapu sisa, ne mawa nesalapu kunkamnerume. 13 Neda Allah Yahweh, sun nai bo Allah kunune. Sunda, Mesir mutu neitamai kuramrum taru yumada, sunda ne amutarapu kuramrume. Sun Mesir mutu nengdi ikin keca weik sun nong deiki deriramipane, sun tali pel don nengpu kuramrume. Dinino, nedi sun tep lyeprapsidi, doupra yanamsisi. Atep sunda ka tamupra Mesir mutu neng, sun tali pel melimna neng ton men kunkamrume. Tonda Mesir mutu taleamsei nesaladi sun Israel nesala tep, ‘Sunda tali nesala cadi dakwapye,’ tenepra ikin keca deriramseu ngeda, nedi konum bisbisa kapra, gum kupra deipsya cadi, sundi, ‘Uo,’ tenen, giso genepra men embankamrume. Ukutaru di dipra dorkunkamre taruda, sunda kange deipra teleppu kunkamrume.

Allahdi Israel nesala tep pepu.

Allahdi, “Ukupra-ukupra kunkamrume,” pepu upu gekepra, men kurur ngebo tep, wenepra wimdongoramu upu

14 Allah Yahwehdi sun Israel nesala tep pepu.

“Nedi sun tep, “Angeda kunkamrume, angeda men kunkamrume,” pepra deipsisi upu, sunda aupu moupra men gekepnemumdi, talepra men kumumnyopda, wipdongopsenedi wenepkamsene. 15 Tonda, nedi sun tep, “Ukupkamrume,” pepra deipsisi upu cap, “Ange-angepu telep kupra kunkamrume,” peipsisi upu cap, men taleprumudi, nedi “Ukupra-ukupra kunkamrume,” peipsisinge yuma tep, ‘Nun pio songe,’ teneprumudi, ne upu yaniptapnemumdi mali kupmumnyopda, tek sisi wenepkamsene. Angetopu, nedi, “Ukunkarume. Ukupmum pangeda, nedi sun tep ukupra melimkamsene,” pepra, pedina upu peipsisi upu ton, gekena gum di, aupu tep yaniptapmum pangeda, tek sisi wenepkamsene.

16 Nedi sun tep, “Wenemkamsene,” pepmasenada, tali tep men peptapne. Ada, nedi sun wenemna tep sun damaida, ila kange mun keca karepsene pangeda, kware pio weik kunkamrume. Ada, sun nong yuma bupu kupra kuna pu cap, gat kulukna pu cap, karepkamsene. Karepsenyopda, apuda, pio men gum kupmanto kunkamsere. Ukupra jeseryopda, sun asuru puna deiyo pu ton jeramrepane, asuru punkamsere. Tonda, bol mali dona pu jeramserepane, puto bounpu kupseryopda, denapu kunkamrume. Tonda, sun wenemna tep, ikin keca ton sun damai deipnyopda, sun wa peprumudi, ‘Jen keca yala-yala yumada, nong kuprepa jen kamep’ tenen, wa pepmumdi kounkamrum dinin, jen keca nongda tek sisi kipra men jenkamrume. Deiyoda, yuk mutu yu neng, sun podan neng yangedi, sun tep yana popbisipsengedi, sun wa pepra yal keca kouamumnge yumada, kipra gawal dakropkamsenge. Sun podan neng dipapu, akeca yuma kipra jenkamnunge.

17 Ange utopu, nedi sun tep, ‘Anesalada ne songe,’ tenepnedi, sun wenemna tep ukupkamsene. Sun podan neng dopra deipnepa, yangedi yana popbisipsengedi, sun dipapu yana talepsengepa, kunkamrume. Tonda sun anengda, “Nun songe,’ tenesenung neng dipapu talenkamsenge. Sundi sun kankan ton nengda popbisipmengedi, poptapmengepa depkamenge. Ton neng tep popbisipmengedi, talepsengopda, sun amutarapu mambul kange doupra kunkamrume. Sun Israel nengdi, ayu neng sun podan neng tep kware kuserepa, sun pe mutu taprapmumdi, bura saka bendopkamrume. Tonda, kware weik kunkamsera cadi, yuk taruda yu nengdi men dombenkamseng taru peda, sun pedipapu, ‘Uo popyakankamseng do?’ tenen, sepdaro bendopkamrume.

18 Uda, nedi sun mali kuna tep wenemna keca yuma karepra kupetepsenepane, sundi dipru boun kupra, ne damai tamupra men kumum pangeda, nedi yuk wenemna keca ton cap tapakra karenkamsene. Ada, yoneitam bari kupra kange di ton cap, akecapu tapakra karenkamsene. Ada, tujuh kali lipat deiki di wenemna keca ton karenkamsene. Deiyoda, sun mali kumum keca kunumna tepa. 19 Sundi, ‘Nunda ila telep nengpu kunupe. Allah er amutara men kunkamepe,’ tenepra pio gemenapu kuruma cadi, sun wenemna tep ila ikin keca weik sun nong deiki deipsene pangeda, mali kange doupra ikin kangepu doupra kunkamrume. Ada, nedi sun tep ukupra wenepsene pangeda, adeiki di ne Allah tep kael kepkamnerume. Uda besi keca men coptapmanto kuretopu, nedi ne kange yuk men tenenkamne. Sun wenemna tep, ‘Mo ton pio men cemkamre’ tenen, upu sekdongopnepa, mo pio men cemkamrure. Ukupne pangeda, tu yuma gelal sepredi, atu yumada pio gatpu kuprepa, yal keca ton pio men koupmanto kunkamrure. Ada gat keca er si tembaga utopu, sun tu peda pio gat kunkamrure. 20 Ukupne pangeda, sundi puto dipu pel doprumudi, wa pepra kourpetenkamrum dinin, sun pelda talipu dortamkamrume. Atep nengeda, sundi wa pepra kounkamrum tu neitamai yumada, telep kupra nong ton pio men kunkamsere. Ange utopu ton, co du mouramre co yala-yala yuma peda, bongopkamre dinin, du ton pio men mounkamre. Co du yala-yala yuma men dakra jenkamrume.

21 Ukupsene pangeda, telep ngeda, sundi, ‘Uo, nun mali kunup ngeda, tapmepedi, Allah er amutarapu ton kunkamepe. Erdi peipseu upupu moupra gekenkamepe,’ teneptum dinin, gum dingeda, ila di ton cap wenemkamsene. Ada, sundi ne peipsisi upu tupa upu gekepra bouna di men kumumdi, ne upu yaniptapra malipu kumumnyopda, ange kunumna tep, ila wenemna keca ton cap tapakra, tujuh kali lipat di tupa-tupa karepkamsene. 22 Ne Allahdi, bura tara kuramredi, pio yu kuramre gam keca yuma loptapnedi, dopra deipnepa, sun damai poryakankamenge. Akeca yangedi, sun nyapu weika di yana popra jenkamsenge. Tonda, sundi talepra peinkamrum keca yala-yala yuma, yana popra gawal dangkamsenge. Utopu, sun wisi neng peda ponkamsenge. Ukupsengepane, nimi weik depmengopda, sun gam kunkamrum neng dengeda, metekanunpu kunkamrume. Nimi weik depmengepa, gum kupbange pangeda, sun kunkamrum mutu yumada, tali gopu kuptaprepa, embandamumdi dimumpa, amutu yumada dimbulungpu pepkamre.

23 Nedi ange yuma konum wenepra kurpetepsenepane, sundi tupa men gekepnemumdi, ne tep tupa balilapu kupbamumnyopda, tonda sundi ne tep, ‘Erda nun songe,’ teneprumudi, tupa ne upu yaniptapra kumumnyopda, nedi sun tep wenemkamsene. 24 Sundi, ‘Allahda, nun songe,’ tenepnemumdi, tupa malipu kumumnyopda, ne Allahdi sun tep, ‘Anesalada ne songe,’ tenepra ukunkamsene. Nedi wenepsenedi, ila ikin keca di peteremkamsene. Ada ortaru wenemna ngeda yambulanun utopu kuramu dinin, ukutaru wenepkamsen ngeda, yoneitam bari kupra wenemkamsene. Ada, tujuh kali lipat peramengtopu, adeiki di pio ila kange mun wenemna keca ton cap karenkamsene. Ada, sun mali kumum keca kunumna tepa.

25 Ukunkamsen ngeda, ake. Ada, nedi podana deiyo neng dopra deipsenepa, sun parang ya doprapmengedi, sun damaipu poryakankamenge. Nedi sun tep wenemkamsen nge deiyoda, ake. Ada, nedi sun tep, “Angeda ukunkamrume. Ange kupmumnyopda, nedi ange ton telep kupra derinkamsene,” pepra, pedina upu konum peipsesipane, aupu tupa-tupa yanitamumnya tepa. Tonda, sundi, ‘Uo, Allahdi wenepserur’ tenen, sun pe mutupu bena, gel beilya neitamai dipu bulupra kumumdi, ‘Acada, erdi men popsetue’ tenen, kunkamruma peda, nedi sun damaida, kange mun pu deiyo keca ton weika di karepsenepa, sun damaida ila pu jenkamsere. Ada, pu yala-yala yuma cap, suse cap karepsenepa, apu yumada kwetepsengepa, men dim pepmanto kunkamsere. Tonda, ne tep tupa mali kange doupmumdi, balila deiprumnyopda, sun podan neng ton dopra deipnepa, sun damaipu poryakankamsenge. Popbisipsengedi, ateng koupsengopda, sunda karen mutupu dubankamsenunge.

26 Tonda, sun jen keca bongopredi, bolongna deiyonge yumada, gum kupra derinkamsene. Ukupne pangeda, sun jen keca pio meteka nunpu kupyopda, sun mutu nerapu, sepuluh nerapudi, ‘Roti kwaneng jen keca dapkup’ tenen, putapre pangeda, roti bun dan kecada meteka nun dipu kupkamrura cadi, roti danada tenpai dipu dankamenge. Aroti kwaneng danmangane konum dapra deipmengopda, ‘Nimi nong ikin kuramretopu, roti jen keca ton bokra karepmepepa, jenkamenge,’ tenen, nimi nong ton ikin tep, dipetepmengedi, jen keca bokra karepeterenkamenge. Ukupetepkameng dinino, timbangan di kepmengepa, akupretopu bokra karepmenga peda, jen kecada metekanunpu kupkamrura cadi, jen keca men bounkamsere. Jen putanapu kunkamsere. 27 Uda, awenemna keca yuma, sun damaipu kareramsenepane, sundi ange yuma tenena gum di, ‘Allahda nun songe’ tenen, tupa ne Allah tep, bisbisa kapra ne upu yaniptapmumdi, ne upu moupra men gekepmumdi, men talepmumyopda, kange di ton cap tapakra wenemkamsene.

28 Ukupmumnyopda, ange kunumna tep, nedi ila di derepsenedi, wenepra ila ikin keca sun nong deiki deipkamsene. Ada sun mali kumum keca kunumna tep, yoneitam bari deiki di wenepkamsene. Ada, tujuh kali lipat deiki di peramengtopu, pio ila kange mun keca weika di karenkamsene. Ada, ikin keca men taru kareramsisinge utopunge guma dinin, ila kange mun ngepu, ne Allah pedipapu karepkamsene. 29 Ada, sun kunkamrum mutu yumada, jen keca yala-yala yuma gum kupra deipne pangeda, jen putana pio weik kunkamsere. Jen putankamsera deiki di, sun pe meneng deiyamum nyapu poprumudi, sun nong jenkamrume. Ada sun pe sal nyapu cap, ner nyapu cap, popra jenkamrume.

30 Ange utopu, sundi mutu gon deiki ketenepra deiprumudi, sun keca yuma doupra mutu gon dupai deribemumdi, isok si eremna tep, uku dongorumai yumada, nedi uruptapkamne. Tonda, isok si eremna tep, siltong keca dopra uku dongorbarumai yumada, dakra uruptapnedi, gum kupra deipkamne. Ukupnyopda, isok si eremna tep, peirbarumu keca sun gemna yumada, dakrapnedi, donokropkamne. Sun ton poptapnepa, depmumnyopda, sun nong dopropnedi, sun tali keca si eremrumnge cap, isok si eremna tep petupra derirum keca, er si patung cap, dakrapnedi, adeikipu sun nong cap deiptapkamsene. Ne dipru neitamaida, pio mali weik kuruma cadi, ne dabal kunerura cadi, dukmanto kunedi ange yuma tep nengeda, “Anesalada ne songe,” tenenune. 31 Tonda, sun ati weik doamrumdi, kumum kota mutu yumada, nedi yawa popra uruptapnedi, gum kupra deipnepa, tali gopu kuptapkamre. Sundi telepai teneprumdi, gam keca poprumudi isok si tep eremna tep, karerumai yumada, nedi daktapkamne. Tonda ne si eremna tep kareryakanerum keca yumada, karepnetuma peda, nedi asiltong men gekepnedi, tek sisi ne kange deipra men doronkamsene. Akecada tali dakwapkamre.

32 Angepu gum dinin, sun kunkamrum mutu yumada, ne dipapu pio malipu kupra deipkamne. Akupnepa, amenda taru, sun podan nengdi, ‘Israel nesala popbisipkamep’ tenen, sun damai meneng damai yangopda, nedi sun mutu mali kweipkamne ngeda epmengedi, ‘Uo, amutuda, pio mali konum kupmare. Ware keca deiyo tep, kupmar do?’ tenen, mambul kange doupmengedi, ‘Song,’ tenepra lukdankamenge. 33 Angepu gum dinino, sun Israel nesaladi, ne tep, ‘Erda nun songe cadi, erdi peipseu upuda, men gekepra talenkamepe,’ teneprumudi, ne upu tupa yaniptaprumyopda, ne Allahdi sun kunkamrum mutu yumada podana deiyo keca karepnepa, yuk mutu yu weik jen talen nengdi, sun parang ya cap, podan keca yuma cap doupmengedi, sun damai yana popbisipkamsenge. Popbisipsengedi, sun yuma ateng kouprapsengedi, sun pe karen mutu dubenkamsenge. Angetopu, ka di ton cap, ka di ton cap ukupsenyopda, sun yuk karen mutu yu nengdi, sun Israel nesalada, dana-dana tara mutu dubenkamsenge. Ataru neitamaida, tenpu mutupu men kunkamrume. Tek sisi mali kange dounkamrume. Mali kange doupmumdi, yuk mutu nimi bo neng kuramengaipu kunkamrum taru neitamaida, sun wa pen dam yuma peda mali kupra deipkamsene. Tonda, sun kunkamrum kota mutu yumada, tapmumpa tali gopu kuprepa, dimbulungpu pepkamra tep pepsene.

34 Sun wenemna tep, ange-ange yuma konum kupsenyopda, sunda yuk mutu yu nengdi ateng koupsengedi doupra, sun mutupu derirbesengepa, amutupu kunkamrume. Dakunkamruma cadi, sun podan neng dipapu talepsengepa, sun mutupu kunkamrum taruda, sun pe menop taru kuramum mutu ton tali dakunkamrure. Ataru neitamaida, sun men di taleamrum mutu beipye peingna utopu kunkamrure. Amutu taleamrum taruda, nedi, “Amutuda beipye peinga keteng tamun ton karenkamrume,” pepra deipsisitopu, beipye peinga keteng tamun kareamtum teptoda, konum telep kupmatu dinin, ange men kuramruma cadi, yuk karen mutu dubena deipsengepa, dakunkamrum taru neitamaida, sun pe mutu tep go ton karenkamne. Amutuda beipye peingna utopu tali dakunkamrure. 35 Atep, sun menop taru taleamrum mutu yumada, beipye peingna utopu tali dakunkamrure. Sunda amutu talepra kuramrum taru neitamai yumada, beipye peingna keteng tamun men kareramruma cadi, amutu deikida, wa pena cap, yal keca kouna cap, bolongna cap, kina cappu, pio kuramrume. Atep, wenemna keca sun deiki deipsene pangeda, yuk karen mutu dubesengepa, dakunkamrum taru yumada, sun pe mutu beipye peingna utopu tali dakunkamrure.

36 Sun yuk mutu neng yu weik jen talen nengdi, sun Israel nesala weika di poptapkameng dinin, ton nengda yambula dipu tapmengepa, gam tupa kunkamenge. Gam tupa kunkamrum nengda, yuk mutu nengdi sun mutu deribesengepa, dakunkamrum taruda, sun cap kikiman kunkamrum neng yuma tep, kwar kuna deiyo keca ton karepsenyopda, sunda pio kware weik kunkamsere. Ukupra dakuramumpane, nedi kumanya puto weiknge karepnepa, pung pepredi, co yuma yambula di lokredi, co bo ton sakya deiki di, lelim meteka dipu pepkamra cadi, aneng yuma gekepmengedi, ‘Uo, yu nengdi parang ya doupra poryanmaseng do?’ tenen, kware weik kupserepa, sun sepdara bendopkamrume. Ukupmantoda, nimidi podankunge taru sepra karenai badoramengtopu, kupkamrume. ‘Sepdara bandenkapmumdi ton, sakmumnyopda, ‘Nun podan nengdi popkuseng do?’ tenepra, kware men dangkamrume. Ada sun podan neng ton damai men kunkamenge taru peda, kware weik kupserepa, sepra bankamrume.

37 Ada, nimi sun podanmangedi, men dombasengepapu, sun pepu sepdaro bamumdi, ‘Parang ya di poptapkusen do?’ tenen, sepra bamumdi, ton ngebo deiki, ton ngebo deiki kwepdankamrume. Tonda ataruda, sun puto gum kupbankamrura cadi, sun podan neng tep men popbisipkamrume. 38 Sun yumada, yuk mutu derirbenamsengepa, dakunkamrumaipu denkamrume. Tonda, sun podan neng kunge mutu yuma di, popra gawal daktapsengedi, gum kupra deipkamsenge. Sun podan neng kunge mutu neitamai di, gum kupbankamrume. 39 Ukupra popropmengepa, metekanun gam tupa kunkamrum nesalada, sun podan nesala kan-kanpu kumumdi, mali kange doupra kunkamrume. Akunkamruma deiyoda, sun pe mali kuramumnge cap, uda, sun co puna neng ton, mali kuramenge nge cap, adeiki di ikin keca weik, sun nong deiki yana kupseryopda, mali kange doupra malipu kunkamrume. Telep kange doupra men kunkamrume.

40 Uda, sun mali-malipu kuramrum pangeda, arup pepmaken keca utopu, ikin keca weik, sun wenemna tep kupbankamsere. Ukupra wenepsenepane, dakuramrumnyanen, doryankamre taruda, ange yuma kange di ton cap moupra tenenkamrume. Ada, sun co puna deiyo nengdi, mali kuraminge cap, sun anengdi deriramidi, dordeipdanen barami neng capdi, mali kuraminge cap, uda sun aneitam taru peda, mali kunmarumnge cap tep, ‘Uo, nun yumada, tek sisi pio mali weika di kuramupka cadi, ukutaruda, nun nai bo Allah kaukepseredi, nun mali kun keca yuma gum kupra deipsetue,’ tenenkamrume. Tonda, ange utopu teneramrum dingeda, sundi ne upu yanipra, balila deipra kuramrumnge cap, sundi, ‘Gume, Allahda nun songe,’ teneramnerumnge cap yumada, katuai di lap penkamnerume. Ange yuma kange di tamupra tenenkamrume.

41 Tonda, sun cap, sun co puna neng capdi, mali weik kuramrumpa, nedi menop taru kurami nesala cap, sun ataru kurum nesala yuma cap, sun wenemna tep, go karepsipa, yuk karen mutu yu nengdi, bisbisa kapseidi, dopra yuk karen mutu derirbenamsei. Ukuramseipa, sun podan neng kurami mutupu dakurami. Ukuramya tep, sun apu yapu yuma tep, sundi deamipa, dadeipdanen bankameng nesala yumada, utopu mali kupbana cap, ne upu tep bisbisa kamna cap, angepu kupbarami. Yuk karen mutupu dakaramengepane, amenda taruda, anengdi sun mali kuramenge nge cap, ne Allahdi peiamsi upu yanipra balila deipra kuramenge nge yuma cap tep, tamupra tenepmengedi, ‘Uo, nunda tek sisi malipu kuramepu,’ tenepmengedi, ‘Ukuda dumsisi kupra kunkamep ja,’ tenen, ne tep gispal dopnengopda, nedi ton sun tep tamupra tenenkamsene.

42 Sun mali-mali weik kurami nengdi, dipru bouna di kungedi, ‘Uo, nun tek sisi malipu kuramepu,’ tenepmengedi, ne tep moropnengopda, nedi ton tamupra tenenkamsene. Ada, ne Allahdi, “Ukupra kunkamrume. Ukuprumu pangeda, nedi ton sun melimna tep, ukunkamsene,’ pepra, pedina upu peiamsidi, “Ukupkamsene,” peiamsi ngeda, tupa tenenkamsene. Ada, sun apu yapu, sun si Abraham cap, Isak cap, Yakub cap tep, peiamsi pedina upu tep pepsene. Tonda, ne Allahdi, “Apeipsen mutupu karepkamsene,” peiamsi mutuda, tupa tenenkamne ja. Dipru bouna di kupmengedi, ne tep telep kupra moropnengopda, nedi kareamsisi mutu yuma, sun wenemna tep mali kweipsi mutu yumada, kange di ton cap tenepnedi, telep kupra deipkamne ja.

43 Deiyoda, ne nyapu ne mawa nesala yumada, nedi pepra deipsi upu yumada, moupra men gekeramidi, yanirtamamidi, malipu kuraminge cap, nedi, “Ange talepmumdi, ukupra kunkamrume,” pepra deipsi ngeda, sundi, “Gume, aupu yumada, nun songe. Ange men kunkamepe,” teneraminge cap tep nengeda, ikin keca sun nong deiki deriramsidi, sun taleami mutu dopra, yuk mutu nesala tep kareamsi. Ukupsa tep, amutu yumada beipye peingna utopu kunkamrure. Sundi amutu yuma talerami taru neitamaida, beipye peingna utopu keteng tamun ton men kareramiya cadi, ukutaruda, yuk mutu neng popbisipidi, yuk karen mutu deriamipa, yuk karen mutu deriramipa, yuk karen mutu neitamaipu kununga cadi, ataruda, nedi kareamsisi mutuda, beipye peingna utopu keteng tamun kuna tep, tali gopu kupkamrure. Ukupredi, talipu dakunkamrure. Israel nesala, sun mali kuraminge kunumna tep nengeda, yuk karen mutu neitamai kunkamenge. Ataruda, mali kange doupmengedi, ne tep, “Naio melipra lyepseo,” pepra moropkamneng do, gum do, dinapu kunkamne.

44 Uda, sun mali weik kuraminge tep nengeda, wenemna keca karenkamsen dinino, sun podan neng kunge mutu neitamai kunkameng taruda, pio tep men tapkamsene. Sunda, ne nyapu kununga cadi, ‘Anesalada, pio songe. Sun tep, pio tapne,’ tenepra men penkamne. Tonda, sun yuma tep nengeda, men poptapnepa, men gum kupbankamenge. Sunda ne nyapu sisa tupa kununga cadi, sun podandam neng mutupu tupa kunkameng taru yumada, nedi sun tep, “Ange ukunkamrume. Ukupmumnyopda, nedi ange ton kupkamsene,” pepra pedina upu peipsisi ngeda, pio tep, men tapkamne. Ada nedi pedina upu peiamsi ngeda men gum kupkamre. Angeda men yanitamkamnune. Neda Allah Yahweh, sun nai bo Allah kunedi pepsene. 45 Sunda, pio tep men tapkamne dinin, ne pumun taru di sun copuna neng tep, sun damai di, “Angeda ukunkamrume. Ukupmumpa, nedi ukupra karepkamsene,” pepra, pedina upu peiamsi ngeda, tamupra telep kupra deipkamne. Tonda, ‘Ne ila putoda, sundi kael kepkameng’ tenen, pumun taru Mesir mutu kurami nesaladi ikin pel dopra, sun nong deiki deriramipa, ikin weik kuramipane, nedi lyeprapsidi doupra yanamsi. Ukupsa deiyoda, ‘Tuai nesala ban-ban yuma, ange epnengedi, kael kepkamneiya tepa. Tonda, neda Allah Yahweh, Israel nesala sun nai bo Allah’ tenen, apel doramsi. Uda, neda Allah Yahweh kunedi, aupu pepmasene.

Aupu yumada, Allah Yahwehdi Israel nesala tep pepu.

46 Adeiki tara sekra deipmepu upu yumada, Allah er si Yahwehdi, “Angeda ukunkamrume, angeda pio men kunkamrume,” pepra deipu upu cap, tonda, “Telep kunada ake, mali kunada ake,” pen upu cap yumada, Sinai mutu deiki di Musa tep upu karepu. Musa tep aupu karepupa, Musadi Israel nesala yuma tep, “Ukupra kunkamrume,” pepra lap peramupa, gekepra kurami.