Lev 27 | XteSC | STEP | Allah Yahwehdi Musa tep, aupu pepu.

Leviticus 27

Allah er si Yahweh karen keca tep, “Ukupra karenkamrume,” pepu upu

1 Allah Yahwehdi Musa tep, aupu pepu.

2 Apeipne upuda, Musa kandi Israel nesala damai bememdi, ‘Allahdi upeipmasere,’ pepkurume. Aupuda ake. Tenpu ngebo ton Allah Yahweh er mawange kupkamrura cadi, er nong kunumna utopu karen kecada, ‘Allah tep karepkune,’ tenepyopda, aketeneipmenge gel uang ton karenkamenge. Angebo erdi karenkamre ngeda, ‘Gel uang er si syikal perak ngeda, ^{▼▼syikal - Syikal perami ngeda, ada gel uang si tep perami. Tenpu ngebo tep, 50 syikal, ada 570 gram perak karerami.} ukupra-ukupra karenkameng’ tenen, lap peipkusene. Ange keteneipmengetopu karenkamnunge. 3 Angebo erdi Allah Yahweh er si eremna ati damai duyakankamre gel uang syikalda, Allah er ati pel donge nengdi, “Gel uang er si syikal ngeda, er kunumna ukupra-ukupra nukmepedi, karenkamep,” peramengtopu, nukra karenkamnunge. Uda nimida, keteng tamun 20 keteng tamun dine, adeiki nukra 60 tahun konum wisi derina kepu nengda, sun nong pununa kunumna ngeda, kunumna pio weik keca, er si uang perak syikal 50 nukra karenkamnunge. 4 Uda, nerapu tep, keteng tamunda 20 keteng tamun dine, adeiki nukra 60 tahun deiki di konum wisi deipu nerapu tep nengeda, sun nong pununa kunumna ngeda, kunumna weik keca, er si uang perak syikal 30 ^{▼▼Syikal 30 -Syikal 30 karerami ngeda, ada kunumna weik keca er si perak dinin, gel uang karerami. Tiga puluh ngeda, ada 342 gram perak karerami} nukra karenkamnunge.

5 Ange utopu, ware nesala do, nimi do, nerapu do, sun keteng tamunda 5 keteng tamun dine, adeiki nukra 20 tahunpu konum wisi deipi nesala tep nengeda, ukupra karenkamnunge. Nimi tep nengeda, sun nong pununa tep kunumna ngeda, kunumna weik keca, er si uang perak syikal 20 ^{▼▼Syikal 20 - Syikal 20 karerami ngeda, ada kunumna weik keca er si perak dinin, 228 gram perak karerami} nukra karenkamnunge. Dinino, nerapuda, sun nong pununa tep kunumna ngeda, kunumna weik keca, er si uang perak syikal 10 ^{▼▼Syikal 10 - Syikal 10 karerami ngeda, ada 114 gram perak karerami} nukra karenkamnunge. 6 Ange utopu, ware nesala do, nimi do, nerapu do, ukupu deipmenge nyapeda, war tenpu adine, adeiki nukra 5 keteng tamun konum kunge nesala tep nengeda, ukupra karenkamnunge. Sal nyapu tep nengeda, sun nong pununa tep kunumna ngeda, kunumna weik keca, er si uang perak syikal 5 ^{▼▼Syikal 5 - Syikal 5 karerami ngeda, ada kunumna weik keca er si perakda, 57 gram karerami} nukra karenkamnunge. Dinino, ner nyapuda, sun nong pununa tep kunumna ngeda, kunumna weik keca, er si uang perak syikal 3 ^{▼▼Syikal 3 - Syikal 3 karerami ngeda, ada kunumna weik keca er si perakda, 34 gram karerami} nukra karenkamnunge.

7 Dinino, sun wisi nesala tep nengeda, angepu karenkamnunge. Wisi neng tep nengeda, sun keteng tamunda 60 tahun adine, adeiki nukra keteng tamun weikanun ton, wisi konum deipi nengda, sun nong pununa tep kunumna ngeda, kunumna weik keca, er si uang perak syikal 15 ^{▼▼Syikal 15 - Syikal 15 karerami ngeda, ada kunumna weik keca er si perakda, 171 gram karerami} nukra karenkamnunge. Angetopu dinin, pio wisi nerapuda, sun keteng tamunda 60 tahun adine, adeiki nukra keteng tamun weikanun ton, wisi konum deipi nerapuda, sun nong pununa tep kunumna ngeda, kunumna weik keca, er si uang perak syikal 10 ^{▼▼Syikal 10 - Syikal 10 karerami ngeda, ada kunumna weik keca er si perakda, 114 gram karerami.} nukra karenkamnunge. 8 Dinino, ware kankan nesala do yuma, akunkamre ngebodi, ‘Angebo karepnepa, Allah er mawange kunkamre’ tenen, ketenepre dinin, apeipnetopu gel uang men karepmanto kupredi, tek sisi pio kan-kanpu kuryopda, angebodi Allah tep karerbankamre nimi do, ner do doupra, imam ngebo damaipu dubankamrure. Duberyopda, imamdi Allah tep karepkurenge dipetepredi, ‘E, er kunumna utopu ngeda, ake,’ tenepredi pepkamre ja. Imamdi peiramretopu angepu akapyopda, ‘Allah tep karepkune,’ tenepre ngebodi, angepu duyaredi, dipru amu kepra bouna di kuredi, er akapretopu karenkamrure.

9 Uda ukutaruda, Israel nesaladi, ‘Nun nai Allah karen keca tep, yapi keca popra karepmepepa, erngepu kupkamre,’ tenepmengedi, Allah er gispal dona tep yapi keca popra karena tep pepkune. Angebodi, ‘Allah tep karepkune,’ tenepre dingeda, angeboda adipapu malinge karena pio gum dinin, tek sisi telepngepu karenkamrure. Ada, Allah er kangeda, ‘Akecada, ne mawange cadi, lengna keca kurure,’ tenenkamra tepa. 10 Ware ngebo di do yuma, ‘Allah tep karepkamne’ tenen, yapi keca wipra keteneiamre ngeda, angepu doupra Allah tep karepkamrure. Menmena taru wipra deipmarenge tapredi, yuknge ton punupra men Karenkamrure. Tonda telepnge di malinge men pununkamrure. Ange utotopu malinge doupra, telepnge men pununkamrure. Tonda ukupmanto, gam keca telepngepu dipunen, ‘Allah er mawange tep, domba bisam karepkune,’ konum tenepyopda, ka di tamupra ange tapra, yuk yala yapi keca men pununkamrure. Menmena konum wepra deiprengepu, karenkamrure. Ange yumada, nong pio telep ngepu karenkamrume.

11 Uda, ‘Allah er gispal dona tep, yapi keca karepkune,’ teneprumnyopda, awepra ketenepra derinkamrum kecada, ne Allahdi, “Ayala keca yumada, telep ngeda ake, mali ngeda ake,’ pepra deipsisisngepu karenkamnerume. Dinino, ukupmantoda, ton ngeboda, ‘Allahdi, angeda mali cadi pio jena gume,’ peipseua tep, er kange men derinkamre dinin, ange doupra Allah er gispal dona tep karepkune’ tenen, keteneipyopda, menmenada akeca doupra sun imam neng damai dubankamrure. 12 Ange uka dubenge pangeda, imam ngebodi agam keca er nongda beta moupra dipetepkamre. Dipetepredi, ‘Ange er kunumnada, ake’ tenen, kael kepyopda, erdi “Kunumna keca syikal, ukupra ketenepra Allah tep karepkurume,” peipretopu, angepu sundi karenkamenge.

13 Dinino, agam keca duyanmare ngebo erdi tenepredi, agam kecada men popra karepnedi, ka di tamupra dopropkamne,’ tenepyopda, adipapu imam ngebodi, “Er akeca kunumnada, ukupra,” pepmarenge cap, tonda ton cap tapakra, dua puluh persen (20 %) ^{▼▼dua puluh persen (20%) Dua puluh persen (20%) peramengeda, ukuprap karenunge. Seratus ribu (100.000) tep nengeda, dua puluh ribu (20,000) ton cap tapakrap karenunge. Satu juta tep nengeda, dua ratus ribu (200,000) ton cap tapakra karenunge.} cap, imam ngebo tep karenkamenge.

14 Uda, ange yambulanun utopu, tenpu-tenpu nengdi sun telep kuna tep, sun pe keca, ada sundi talepra doamengedi kuramenge ati tep, ‘Allah er gispal dona tep, akati karepkune,’ tenepredi karepkure taruda, imam nengdi akati dipetepmengedi, “Akati er kunumnada, ukupra kurure,” tenepmengedi pepmengopda, akonuma. Sun imam nengdi pepmenge ngepu gekenkamrume. Ada akati urasin telep do, mali do, ange er kunumnada apepmengetopu kunkamrure. Tonda erdi, “Angepu Allah er karena tep, kunumna keca syikal ukupra karenkamrume,” peipretopu, angepu karenkamnunge. 15 Dinino, ‘Ne ati doupra, Allah er gispal dona tep, karepkune,’ tenepre ngebodi, ka tamupra tenepetepredi, ‘Gume, akatida ne pepu tamupra dopropkune,’ tenepyopda, imam ngebodi, “Akatida er kunumna ukupra kurure,” peiputopu, akati deiyo ngebodi karenkamrure. Tonda, adipapu dua puluh persen (20 %) ton cap tapakra karenkamre. Akati pununa tep, er kunumna keca konum karepyopda, men di akati taleamu ngebodi, akati tamupra dopropredi, ka di ton cap talenkamrure.

16 Ange utopu tenpu-tenpu nengdi, sun apu yapu nengdi talerami tu, aneng tep karepmengepa, atu talenkamenga deiyo nengdi, ‘Atuda, Allah er mawa keca kupkamrure. Allah er gispal dona tep karepkupe,’ tenepmengedi karepkunge taruda, awa tu neitamai yal keca koupkameng nge peda, nukpetepmengedi, akunumna utopu karenkamnunge. Ada awa tu yal keca koupkamenge nge kikimanpu kunupetepmengedi, “Ayal keca er kunumnada, ukuprap kunumkamenge,” pepmengetopu karenkamnunge. Ukupmanto ngeda, awa tu neitamai kounkameng keca gandum du er ikinda, 182 liter yal keca putapkamenga cadi, er kunumnada, uang perakda lima puluh (50) syikal ^{▼▼lima puluh syikal - Lima puluh syikal (50) perami ngeda, ukuprap karerami. Ada kunumna weik keca perak 570 gram karerami. Angeda, yal keca 20 kilogram akapyopda, uang perak syikal 10 karerami. Syikal 10 ngeda, ada 114 gram perak karerami} karenkamnunge. 17 Uda ukupmanto ton, atuda ila mambul keteng tamun, beipye peingna keteng tamun, er si Yobel keteng tamun neitamai, ‘Atu dopra Allah er gispal dona tep karepkune,’ tenepmengopda, arup pepmanutopu ange yuma uang perak 50 syikal karenkamnunge.

18 Dinino, ila mambul beipye peingna keteng tamun, er si Yobel ^{▼▼Yobel keteng tamun Yobel keteng tamun perami ngeda, ada keteng tamun nukbaramyanen, lima puluh tahun (50) konum kupyopda, aketeng tamun sida, Yobel perami. Aketeng tamun neitamaida, nimidi kunuami bung keca yumada, menop taru taleamya deiyo neng tep, tamupra karerami} keteng tamun konum kupre pangeda, adine nukra yambulanun ortaru keteng tamun konum yaryopda, ukupkamenge. Angebodi, ‘Awa tuda Allah tep karepkune,’ tenepre taru di dipdongopra nukmengedi, dorkunkamre keteng tamun nukbaramenganen, ‘Yobel keteng tamunda, konum kupkamre taru konum nukpetepmengedi, ‘E, keteng tamun ton cap ukuprap kupbanmaryanen, Yobel keteng tamunda konum kupkamre,’ pepra tenepmengopda, daneitamai kupbankamre keteng tamun akapkamretopu, ‘Awa tu, er kunumnada ake,’ pepra lap pepkamenge. Imam nengdi, ange konum tenepmengopda, awa tu er kunumnada, yambulanun ton sektapmengedi, Yobel keteng tamun dorkupkamra cadi, aneitamai kupkamre keteng tamun nukpetepmengedi, akapkamretopu, kunumna keca karenkamnunge.

19 Tonda, amenda taru, awa tu Allah teppu kareamre ngebodi utenepredi, ‘E, ne wa tuda, Allah er mawange kupkamre’ tenen, kareamsi dinin, ukutaruda ka di tamupra ne pepu kunupra dopropkamne,’ tenepre dingeda, awa tu tamupra kunuptu dinin, ukupkamrure. Ada, imam ngebodi “Awa tuda er kunumnada ake. Gel uang perakda, ukupra karenkamrume,” pepretopu, angebodi imam ngebodi peipretopu yuma karepkamre dinin, ngedi ton cap tapakra, erdi dua puluh persen (20%) ton karenkamrure. Ange yuma konum punupra karepyopda, er men di taleamu wa tu, ka di ton cap dopropredi talenkamrure. Ernge konum kupkamra tepa. 20 Dinino, menop taru awa tu taleamu ngebo, er pe dipapu awa tu tamupra men kunuamredi, tonda Allah tep ton men kareamu dinin, kange di tamupra yuk neng tep, “Awa tu kunupso,” peprepa kunuamengopda, akonuma. Awatuda menop taru taleamu ngebo peda, atu tamupra men kunumkamre. Tonda yuk neng peda atu men kunupkamenge.

21 Dinino, apepmanu wa tuda, awa tu menop taru taleamu ngebodi punupra men kunupyopda, keteng tamun kupbanmaryanen, 50 keteng tamun konum kupredi, Yobel keteng tamun konum kupyopda, akonuma. Yobel keteng tamun konum yanmara cadi, awa tuda tapkamenge. Ka di ton cap men kunupkamtenge. Yobel keteng tamun di dipra, dorkunkamre taru yumada, awa tuda Allah Yahweh er ngepu pio tep dortaru yuma kunkamre. Atep nengeda, awa tuda imam-imam neng karepmengepa, sundipu pio talenkamenge. 22 Uda yuknge ton pepkune. Ukupmantoda, tenpu-tenpu neng wa tu ton taleameng dinin, atuda sun apu yapu nengdi men kareami. Atuda, yuk nengdi, “Atu kunupseo,” pepipa, kunupmengedi, taleamengedi, dakuramenganen, amenda taru sun aneng dipu, ‘E, awa tuda, nun nai Allah, er mawange kupkamra cadi, er tepapu karepkupe,’ tenepmenge dingeda, ukupkamnunge.

23 ‘Allah er mawange tep awa tu karepkupe,’ tenepmenge tumida, imam ngebodi atumi di nukpetepredi, doryankamre Yobel keteng tamun yankamre taruda ake, keteng tamun gawal tupa kapkamrenge konum tenepyopda, “Awa tu er pununa tep kunumnada ake,” pepkamre. Imam ngebodi, ange yuma nukpetepredi, “Kunumnada ukupra karepkurume,” pepyopda, angepu kunupkamenge. Atumi deiki dipu, atu kunupkure ngebodi akunumna keca karepkamre. Ange karepmengopda, atu pununa tep karepkamre co boda, Allah Yahweh er mawangepu kunkamre. 24 Ukupkameng dinin, keteng tamun lima puluh (50) konum yarepanen, Yobel keteng tamun konum kupyopda, awa tu tep ka tamupra karen taru konum kupmara cadi, adipapu awa tu er pe menmena gonga kepra taleamu ngebopu tamupra karenkamnunge. Ada, er apu yapu nengdi, awa tu menop taru kareami ngebo, er dipapu atuda, kange di ton talenkamrure. 25 Uda Allah karena tep, ware kunumna do yuma, ange yuma er kunumnada, Allah er si eremna ati pel dona deiyo nengdi, “Kunumna weik keca, er si perakda, tenpu syikal ukupra-ukupra karenkamrume,” pepra deiamengepa, kuramenge ngepu, sun Israel nesala yumadi, ange tenepra nukrumudi, karenkamrume.

26 Ukuda, yuknge ton pepkusene. Ada, sun peiramrum gam kure kecada, nyapu menmena deipmare ngeda, ada Allah Yahweh erngepu konum kurure. Atep nengeda, sun menmena deipmenge nyapuda, sun Israel nesaladi dopra, ‘E, nun nai Allah er gispal dona tep, er mawange tali karenange ton deirbenkupe,’ men tenenkamrume. Deiyoda, sapi bisam cap, domba bisam cap, tonda kambing bisam cap, mi ukupu deipmarenge yumada, Allah Yahweh erngepu konum kurura tepa.

27 Dinino yuk yala gam kecada, Allahdi, ‘Ayala kecada, ne tep men karenkamnerume. Akeca tep nengeda, ne song cadi, sunda ange yuma pio men jenkamrume. Ada meme. Atep nengeda, akecada ne tep men karenkamnerume,’ pepra deipseu ngeda, Allah karena tep pio men duyakankamrume. Dinino, men jepmanto gam keca yumada, menmena weni deipmare ngeda, ‘Ne ka di tamupra kunupkune,’ tenepmumnyopda, imam-imam nengdi ange beta moupra dipetepmengedi, ‘Angeda er pununa tep, ukupra kunumna keca uang perak syikal karepmanto ngeda ake,’ tenepmengedi, peramenge nge deiki di kunuptume. Ange er pununa tep kunumnada sun imam nengdi peramengtopu cap, tonda dua puluh persen (20%) ton cap tapakra kareprumudi kunumkamrume.

Sundi punupra kunuptum dinin, sundi, ‘Angeda men kunupkupe’ tenen, tapmumnyopda, Allah er si eremna ati pumbon di pel donge neng, sun imam nengdi agam keca dopropmengedi, tali dakunge nesala tep kunupkamenge. Akeca kunupkameng kunumnada, sun imam nengdi, ‘Akecada er kunumna ukupra karenkamrume,’ peramenge ngepu karenkamenge.

28 Ukuda yuknge ton pepkusene. Ukupmantoda, ware keca do yuma, sun peirumu gam kure keca pe, nimi pe, sun apu yapedi kareami wa tu pe, tali yuk dakure bung keca peda, tenpu ngebo ton er pedi, “Ne talenun keca, ange ton dopra, Allah er gispal dona cap, er mawange cap tep karepkuna cadi, akecada poptapnedi, pio gum kupra deipkamne,’ tenepredi, ketenepra karenkamrur kecada, punuprumudi, kunupra ka di tamupra pio men doronkamrume. Akecada, ‘Konum gum kupra deipkamne,’ pepra pedina upu deiki di konum perumnge tep pepne. Akecada, kange di tamupra pio men kunupra doproptume. Ada Allah Yahweh, er pe mawange kurura tep pepsene. Ange yumada er keca pua. Atep ange yumada, pio lengna keca utopu konum kurura tepa.

29 Tonda ange utopu. Nimidi ila mali keca kupmengepa, sun wenemna tep, ‘Uda Allah wenepserur’ tenen, angeboda poptapkamepe. ‘Angebo popmepyopda, erda Allah er mawange utopu kupkamrure,’ tenepmumdi, nimi keteneiprum ngeda, ka di tamupra men punupra kunupkamrume. Angeda pio gume. Ange utopu nengda adipapu poprumudi, gum kupra derinkamrume. Sundi angebo tep men tamkamrum dinin, adipapu poptapkamrume. 30 Uda, yuknge ton pepkusene. Sundi talepra kurum keca yuma tep nengeda, nukpeteprumudi, ‘Er kunumnada ake,’ tenepmum dingeda, ange kuretopu, adeiki di sepuluh persen (10%) ton keteiprumudi, sun nai bo Allah tep karenkamrume. Ada, tu deiki di talepra kounkamrum yal keca yala-yala yumada, gandum pe, co du yala-yala yuma peda, Allah Yahweh ernge karena tep nengeda, sepuluh persen dopra karenkamrume. Tonda, ange yumada, Allah Yahweh er mengnenge cadi, er ati neitamaipu ketenepra derinkamrume. Ange yumada, Allah Yahweh er lengna keca utopu kurura tepa.

31 Nimi tenpu-tenpu neng ton kange di ton tenepmengedi, ‘E, ne talenun keca neitamai di, Allah karena tep, sepuluh persen (10%) ketenepra deipsi ngeda, punupnedi ka tamupra dopropkamne,’ tenepre dingeda, ukupkamrure. Sundi akeca er kunumna kuretopu nukmengedi, lima persen (5%) tenepmengedi, ange cap, sepuluh persen (10%) karepinge cap, tapakmengedi, Allah tep karenkamenge. Ukupkamenga cadi, “Ange er kunumnada ukupra karenkamrume,” pepra, konum peiamengetopu tapakra, dua puluh persenpu (20%) karenkamnunge. 32 Uda yuknge ton pepkusene. Sundi talepra peiramrum gam keca yumada, sapi bisam do, domba bisam do, kambing do, domba do, uda ayam ma do, ange yuma daneitamai di topnebari nukmumdi, angeda sun pengepu kupkamrur dinin, morokyo deiki sepuluh kupre ngeda (10), Allah Yahweh er mawange tep karepkamrume. Ada, abisam yumada, bisam peina deiyo neng nukmengedi, sun maca doupmengai damai banmare ngeda, sembilanda tali daembankameng dinin, nungmangyanen, sepuluh kepre ngeda, Allah Yahweh er mawange tep karenkamnunge. Angeda lengna keca utopu kupkamrure.

33 Tonda, agam kurepa sun peirum gam keca embangepa, peina deiyo nengdi nungmenge taruda, ware nesala do yumada, “Sepuluh banmare ngeda, telep do, angeda mali do?’ tenen, sundi men werteredankamenge. Tonda, malinge pe, telepnge peda punudana pio gume. Dinino, punupdan kepetenepmenga peda, telepnge cap, malinge cap, abutenenge yumada, Allah Yahweh erngepu kupkamrura tepa. Akeca karepre ngebodi, ‘E, sepuluh banmange ngeda, nedipu kunupnedi, kange di tamupra punupnedi, talenkamne,’ tenenada, pio gume.

34 Uda, aca sekra deipsen upu yumada, “Ukupra-ukupra kunkamrume. Angeda kunkamrume, angeda pio men kunkamrume,” pepra deipu upu yumada, Allah er si Yahweh Sinai mutu deiki di, Musa tep karepu. Ada, ‘Israel nesala damai lap peprepa, gekepra talepmengedi, ange pio talepra kunkamenge’ tenen, Allahdi Musa tep pepra deipu.