Lev 3 | XteSC | STEP | Ukupmantoda, nimi tenpu-tenpu ngebodi, er mali kuamrenge tep, ‘Ne mali kune keca kaukepneredi, Allah cap, ne cap telep kupra kikiman kunkamnem’ tenen, Allah tep karenkamrum kecada ake. Ada, gam keca doupra yan kuryopda, bol pio telep cap, galemna telep ngepu duyakankamrure. Bol mali ngeda, Allah Yahweh tep karena pio gume cadi, jem sapi bisam tenpu karepkurur do, nernge karepkurur do? Allah karena tep, er damaipu duyakankamrure. Dinino, sapi bisamda, bol cap, galemna cap, pio telep ngepu duyakankamrure. Bol mali ngeda, pio gume. Bol malinge karepyopda, Allah Yahweh erdi angebo tep, kange pio men derinkamre.

Leviticus 3

Allah Yahwehdi, “Sun mali keca daepra lyepnedi, ne cap, sun cap antapra deipnepa, telep kupra kikiman kunkamepa tep, yapi keca popra karenkamnerume,” pepu upu

1 Ukupmantoda, nimi tenpu-tenpu ngebodi, er mali kuamrenge tep, ‘Ne mali kune keca kaukepneredi, Allah cap, ne cap telep kupra kikiman kunkamnem’ tenen, Allah tep karenkamrum kecada ake. Ada, gam keca doupra yan kuryopda, bol pio telep cap, galemna telep ngepu duyakankamrure. Bol mali ngeda, Allah Yahweh tep karena pio gume cadi, jem sapi bisam tenpu karepkurur do, nernge karepkurur do? Allah karena tep, er damaipu duyakankamrure. Dinino, sapi bisamda, bol cap, galemna cap, pio telep ngepu duyakankamrure. Bol mali ngeda, pio gume. Bol malinge karepyopda, Allah Yahweh erdi angebo tep, kange pio men derinkamre.

2 Asapi bisam doupra yaryopda, angebodi, ‘Akarepkun kecada, ne mali kunun keca yo pununa tep, karepne’ tenen, er buru dopra, agam keca er giso deiki deipyopda, adipapu asapi bisam popkurure. Akeca popkuryopda, nimi cap, Allah cap, antamdana tep tenda bol di dopi ati wengbana tep, bisi buplan damai di bena ponkamrure. Popre pangeda, Allah si eremna ati pumbon talepra pel doramre ngebo Harun, erdi deipupa, deipdanen yakangedi, akati pumbon talepra pel donung neng, sun imam-imam neng damai doupra yaredi, yana karepkurure. Ukupre pangeda, imam yala nengdi, apopmarenge, er yapi doroprapmengedi, Allah karena tep, gel pala di yakra taplakra ketenepra deipidi, yapi keca popra uku dongona tep, er si mesba ketenepra deiyamrumai, mesba er kumun damai dana-dana yumada, ayapida buru di buruprapmengedi, pala gel taplakra yakeipyai orbena, ayapi keca deiki gege pepmengepa, yapi dourbena palepkamrure.

3 Tonda, mali kun keca kuramre ngebodi, ‘Neda mali kupsa tep, ne cap Allah cap antapra teleppu kunkamneme,’ tenepredi, gam keca doupra yaredi popyopda, Allah Yahweh tep uku dongopkamrure. Atep, agam keca popyopda, Allah er si eremna ati pumbon pel dona deiyo neng, sun imam-imam nengdi, ayana popre gam keca neitamai di, Allah karena tep, ketenepra doronkameng ngeda, ake. Deiplyu neitamai iriramre kop cap, agam keca deiplyu damai meta cap yumada, doronkamnunge. 4 Tonda, pio telepaida, gel du cap, gel du deiki paleramre kop cap, dipruai paleramre meta cap, dipru du cap, ange yuma sun anengdi doronkamnunge.

5 Adoropkamrenge yuma cap, tonda, ‘Allah tep, karepkamape,’ tenen, yuk tu keca cap, ketenepra deipmange nge yuma cap, tapakra uku dongona tep, amesba ketenepra deipyai di, Harun er nyapudi, ange yuma doupra, amesba deiki uku jenmarya neitamai, uku dongonkamenge. Ada, ‘Allah Yahweh tep karepkupe’ tenen, uku dongopmengepa, atu keca yuma uku jepredi, er siltong telep ngeda, weleprepa Allah gekepredi, kange pio telep kunkamre. 6 Ukupmantoda, ware ngebo do yuma, ‘Allahdi, ne mali kuramsi keca lyepropneredi, telep kupra deipnerepa, er cap, ne cap, nun kikiman teleppu kunkamnem’ tenen, gam keca doupra yaredi, kareryakankamre ngeda, domba bisam do, kambing bisam do, sapi bisam do, bol mali ngeda doupra kareryakana pio meme. Atep, jemnge tenpu do, nernge do, agam keca doupra kareryakankamre ngeda, bol pio telepngepu, doupra yaredi kareryakankamrure.

7 Ukupmantoda, tenpu-tenpu ngebodi, domba bisam mi tenpu ton, ‘Allah tep, karepkune,’ tenepyopda, angebo er pedipapu adomba bisam mi doupra yaredi, Allah Yahweh er si eremna tep, karenkamrure. Ada, opkal bol di keana dopi tenda ati damaipu, ‘Allahdi epkamre’ tenen, akati damaipu doupra yakankamrure. 8 Adomba bisam mi, akati damai doupra bere dingeda, akati bisi buplan damai bena deipredi, angebo er buru dopra, adomba bisam mi, er giso deiki deipre dingeda, ‘Akecada, ne mali kuramsinge, punupkamnere’ tenen, adipapu adomba mi ponkamrure. Ukupre pangeda, Allah cap, nimi cap, antamdana tep tenda ati, ada lyom opkal bol di dopi ati pumbon neitamai talepra pel dona neng, Harun er nyapu, sun imam-imam nengdi, adomba popra, yapi dopropnedi, yapi keca popra uku dongona tep, mesba ketenepra deiamengai, amesba er kumun damai dana-dana yumada, buru di ayapi buruprapmengedi, gel pala di taplakra yakeipyai orbena, akeca deiki gege pepmengepa, yapi dourbena palepkamrure.

9 Atep, apepmasentopu, angebo, ‘Allah Yahwehdi, ne mali kunun kecada, lyepropneredi, telep kupra deipnetupa, er cap, ne cap, antapra teleppu kuteneme’ tenen, yapi keca doupra kareryakankamre ngeda, uku dongonkamnunge. Ada, sun imam nengdi, er duyankamre domba bisam mi, er deiplyu neitamai paleramre kop cap, amu yo damai galepmengepa, kuramre meta cap, ange yuma doropmengedi, Allah Yahweh er karena tep, uku dongonkamnunge. 10 Tonda, pio telepaida, gel du butene cap, gel duai irina kop cap, dipru du cap, dipruai paleramre kop cap, ange yumada, doprapmengedi, gel pala di taplakra ketenepra deipyaipu duyakankamrure. Duyaryopda, imam-iman neng, sun deiyo ngebo tep karenkamrure. 11 Allah cap, nimi cap, antamdana tep, opkal bol di tenda ati pumbon pel dona deiyo ngebo, imam ataru pel donmare ngebo erdi, adomba bisam mi popra deipmumdi, bokra yuk ketenepra deipmumnge yumada, er akati pel donmare imam ngebodi, akeca yuma doupra beredi, bena uku dongoprepa, uku di jepropkamrure. Ajen keca bena uku dongonkamrur ngeda, Allah Yahweh er si eremna tepapu, doupra bena karenkamrure.

12 Ukupmantoda, tenpu-tenpu ngebodi, kambing bisam tenpu ton, ‘Allah tep, karepkune,’ tenepyopda, angebo er pedipapu akambing bisam doupra yaredi, Allah Yahweh er si eremna tep, karenkamrure. Ada, tenda bol opkal di dopi ati damai, ‘Allah erdi epkamrur’ tenen, akati damaipu doupra yakankamrure. 13 Acei doupra yaryopda, adipapu angebo er buru akambing bisam giso deiki deipredi, ‘Akambingda, ne mali kuamsinge punanange tep kupre’ tenen, akambing bisamda, Allah cap, nimi cap, antamdana tep lyom opkal bol di dopi dodin tenda ati pumbon wengbana bisi buplan damai dipapu ponkamrure. Akambing bisam er yapi embere ngeda, Harun er nyapu, sun imam nengdi, ayapi doropmengedi, buru di buruprapmengopda, yapi keca popra uku dongona tep, gel pala di taplakra yakeipyai, mesba damai orbena, akeca deiki gege pepmengepa, yapi dourbena agel deiki palepkamrure.

14 Akambing bisam Allah tep karena ngeda, akeca duyankamre ngebo, erdi akambing bisam telep-telepaipu wepra doprapredi, uku dongopkamenga deiki di, Allah tep karenkamrure. Akarena tep doropkure ngeda ake. Deiplyu deiki paleramre kop yuma tepa. 15 Tonda, akambing bisam er gel du butene cap, gel du deiki iriramre kop cap, tonda dipru cap, dipru irina meta cap, ange ton Allah tep dopra karenkamnunge. 16 Akeca-keca yumada, Allah cap, nimi cap antamna tep, tenda opkal bol di keana dopi ati pumbon neitamai pel talepra dona deiyo neng, sun imam-imam neng yuma dinin, ataru pel donmare ngebo, er dipapu ange yuma dopropredi, gel pala di yakra keteneipyai akeca duberedi, bena uku dongopkurure. Ukupra uku dongoprepa, atu cap, meta cap, kop capda, uku jepredi, nintong pio telep ngeda weleprepa, Allah Yahweh gekepredi, er kange telep kunkamre. Lumdongona gume. Agam keca neitamai kwamre meta cap, deiplyu damai paleramre kop cap yumada, Allah er tepapu karenkamrure. Ange yumada, Allah Yahweh, erngepu kurura tepa.

17 Uda, ange lap pepmasen upu yumada, sun Israel yala nesala yumada, ‘Allahdi nun tep, ‘Ukunkamrume,’ pepra deipseua cadi, ange yuma talepra pio kunkamepe,’ tenenkamenge. Tonda, ware gam keca do yuma, er yapi cap, meta cap, kop cap dopra jena meme. ‘Akeca ton dopra jepkupe,’ tenepra, pio men jenkamrume. Apepne upu yumada, tamna gume. Ataru di dipra, doryankamre taru yumada, pio tupa-tupa penapu kunkamrume. Upenkamruma deiki di, sun Israel yala nesala yumada, aupu gekepmengedi, kael kepra pio tep kupbankamnunge.

Allah Yahwehdi apeipu upu yumada, Musa gekepudi, sun Israel nesala damai yana lap pepu.