Leviticus 4

Mankau di mali kupmengedi, ‘Uo, Allah Yahwehdi, nun mali kunup keca yuma daepseredi, lyepkamsere’ tenen, kareryakan keca tep, pepu upu

1Allah Yahwehdi, Musa tep pepu.

2Apeipken upu yumada, Musa kandi, sun Israel nesala gekenmangai di, aupu pepkurume. Ada, ware ngebo do, Allah Yahwehdi, “Angeda men kunkamrume,” pepra deipu upu yuma, tenpu ngebo peda ton, mankau di mali kupyopda, Allahdi peipseu upu neitamai di, tenpunge peda yaniptapra mali kupyopda, ne Allah Yahwehdi, “Angeda kunkamrume, angeda pio men kunkamrure,” pepra deipnetopu, angepu talepra kunkamnunge. 3Menmena ngeda, imam-imam neng kankan, ‘Angebo aketeng tamun neitamaida, Allah tep karerbenkamrure’ tenen, er tep wepra deipmenge ngebo, imam neng sun deiyo ngebo tep pepkune. Ukupmantoda, Allah Yahweh er si eremna ati pumbon pel dona neng, sun deiyo ngebo mankau di mali kupyopda, ange wenemna tep, er nong deiki cap, sun Israel yala nesala yuma peda, sun nong deiki cap, ikin keca kunkamrure. Atep nengeda, aimam deiyo ngebodi mali kupmarenge tep, ‘Yahwehdi, kau kepneredi, lyepropkamnere’ tenen, ne Allah Yahweh tep, karepkamnerure. Ada, angebo er adipapu ukupu nenmare jem sapi bisam dinin, bol mali douna gum, pio telep ngepu, ne Allah tep doupra kareryakankamnerure.

4Ajem sapi bisam doupra, Allah cap, nimi cap antamdana tep, lyom opkal bol di dopi ati buplan potokra deiamengai, asapi bisam doupra bankamrure. Doupra beredi, aimam deiyo ngebo, er pedipapu, bena deipre jem sapi bisam, er giso deiki buru dopra deipredi, asapi bisamda ponkamrure. Ada, ‘Apopne bisamda, ne nai Allahdi epmardi, ne mali kun keca pununa tep, dopropkure’ tenen, kupkamrure. 5Ataruda, imam-imam nengdi, ‘Ataruda, Allah cap, nimi cap, antamdana tep tenda ati pumbon pel donkamre’ tenen, konum wepra deipmangu ngebo, sun deiyo ngebo er dipapu apopmare jem sapi bisam yapida, wilipra ton dopropredi, Allah cap, nimi cap antamdana cap, er si eremna cap tep, keana dopi ati pumbon neitamaipu doupra bankamrure. 6Ukupre dingeda, aimam neng sundi wepra deipmangu deiyo ngebo, er dum buru di, ajem sapi bisam yapi wiprapredi, Pio Telep Lengna Ati pumbon wengbana tep, bisi buplan damai lelipdongomenge lyom opkal urasin tara, acei damaida, er dum buru du deiki yapi burupropmarepa, palepmare yapida, ue yoneitam bari deiki di, gege peprepa, alyom opkal damai palenkamrure.

7Asapi bisam yapi tupa kapmare ngeda, yambulanun ton wilipra dopropredi, Allah cap, nimi cap antamdana tep, tenda opkal bol di keana dopi ati pumbon neitamai, siltong telep pen keca, er si dupa, uku dongona tep, yambul mesba ketenepra deiamengai, er sirik dana-dana tara di, takke utopu kupra deiamengepa, belemyai deiki bena lingdeirinkamrure. Tonda, ayapi ton tupa akapre ngeda, er adipapu doprapredi, kange di tamupra akati bura tara beryopda, akati wengbana tep, bisi buplan damai dinin, urasin tara ketenepra deipi mesba meneng damai dikra derinkamrure. Ada, ‘Allah karena tep, gam keca popra, uku dongona tep, gel pala di yakra ketenepra deiamengai, amesba damai bena, ajem sapi bisam yapi dikra derinkamrure. 8Ange konum kupyopda, imam neng sun deiyo ngebo er dipapu, ajem sapi bisam meta yumada, wepra doronkamrure. Awepra doronkamre meta yumada ake. Asapi bisam deiplyu iriramre kop yuma cap, meta yuma cap, wepra doronkamrure.

9Tonda, gel du butene cap, gel duai iriramre kop cap, dipru cap, dipru iriramre kop cap yuma, pio telepai yumada, wepra doronkamrure. 10Apel donkamrurada, mali kupmange nge tep, ‘Nun mali kunup keca kaukepseredi, Allah cap, telep kupra kikiman kunkamep’ tenen, gam keca yuma popra duyangepa, uku dongon keca, mesba deiki deipredi, uku dongoramre utopu kupra, apel peda utopu kupra, pel donkamrure. Angeda, mankau di mali kupyopda, apel utopunge dopredi, gel pala di yakra keteneipyai, er si mesba deikipu, ajem sapi bisam ton duyana uku dongonkamrure. Ada, gel du cap, deiplyu iriamre kop cap, meta yuma cap amesba deiki uku dongonkamrura tep, pepne. 11Dinino, asapi bisam er tu cap, er bol cap, tonda er giso cap, yan cap, deiplyu cap, er gwepnake cap yumada, wilipra weik tara yumada, yukai ton, sun Israel nesala kunungai bura tarapu dubankamrure.

12Apopmare jem sapi bisam sekra deipmare ngepu dinin, ton yuk bokra deipmarenge yumada, adipu doupra, Israel nesala kunungai meneng damai gum dinin, telepaipu dubankamrure. Ada, Israel nesala kunungai di tapra, bura tara sikke lukra donongbaramengai beredi, aceipu bena, uku dongopkurya tep, co toupra deipredi, uku sekre dingeda, abisam wepra deipmarenge yumada, aco deiki deiprepa, uku di jepropkamrure. Akeca uku sekra dongonkamruraida, taliyai gume. Ne Allahdi, ‘Acada, telepai. Sikke lukra donongbaramengaipu deipkamrure,’ pepra deipsaipu, uku dongonkamrure. 13Uda, yuk upu ton pepkusene. Ukupmantoda, sun Israel nesala yumada, Allah Yahwehdi, “Angeda kuna gume,” pepra deipupane, mankau di tenpu ton mali kupmengedi, ‘Angeda nun mali kupmape,’ men tenepmenga peda, tonda yuk Israel nesala peda men kael kepmengepane, ange tenena gum dinin, ne peipsi upu konum yaniptapmengopda, konuma. Ne kangeda, sun tek sisi konum mali kupmange. Sun Israel nesaladi, ‘Uo, angeda nun mankau di mali kupmapa cadi, dakwapye,’ tenenkamnung dinin, ne dingeda, ‘Gume, tek sisi mali kupmange,’ tenenkamna cadi, awenemna keca gum kupra derina tep, kunumna keca ton ketenepkamenge.

14Atep nengeda, tali dakunmangepanen, amenda taru, ‘Uo, tek sisi nun mali kupmepu ngeda ake,’ tenen, konum kael kepmengopda, ukupkamenge. Israel nesala sun adipapu jem sapi bisam ukupu nenmarenge doupra, sun mali kupmangu keca pununa cap, kunumna cap tep, Allah Yahweh tep karen keca karenkamnenge. Ada, ne Allah Yahweh cap, nimi cap, antamdana tep, tenda bol di dodina ati bisi buplan damaipu, jem sapi bisam ukupu weni nenmarenge doupra yangedi, ‘Gume, ada nun mankau di mali kupmapu keca pununa cap, kunumna cap tep, asapi bisam doupra bepepa, Allahdi kaukepseredi, lyepropkusere’ tenen, ne Allah Yahweh tep yana karenkamnenunge. 15Akunumna keca tep doupra yana karepmenge ngeda, Israel nesala sun ila nimi deiyo neng, sun wisi-wisi neng yumadi, ajem sapi bisam doupra duyana ketenepmengedi, ajem sapi giso deiki buru deipra, ‘Gume, ada nun cap, Israel nesala cap, nun yuma mankau di mali kupmapa tep, asapi bisamda yana karepmape,’ tenepmengedi, acei dipapu asapi bisam ponkamenge. Ada, ne Allah Yahwehdi dinmanyaipu, ne karena tep, ne si eremna ati damaipu popkamenge.

16Asapi bisam konum popmengopda, imam-iman nengdi, ‘Ataru angebo gonga kepra pel donkamsere’ tenen, konum wepra deipmai imam, sun ila deiyo ngebodi, asapi bisam yapi ton bokra doropredi, Allah cap, nimi cap, antamdana tep tenda opkal bol di dopi ati, Allah er si eremna ati neitamaipu doupra bankamrure. 17Ukupra abisam yapi akati pumbon neitamai dubere dingeda, angebo er dum buru di, ayapi wipropredi, Pio Telep Lengna Ati pumbon wengbana tep bisi buplan wilipra deiamenge lyom opkal urasin tarada, ue yoneitam bari deiki di gege peprepa, ayapida aceipu saka palenkamrure. Ada, ne Allah Yahwehdi dinmane taruda, ne karena tep, ne damaipu apel donkamrure. 18Asapi bisam yapi tupa akapmare ngeda, yambul ton wilipra doropredi, Allah cap, nimi cap antamdana tep, opkal bol di keana dodin tenda ati neitamai, co bekin pum peti kunumna weik gat keca emas di keteneipi mesba deiamengai, er sirik dana-dana di, takke utopu kupra deiamengepa, belemya deiki bena, asapi yapi lingdinkamrure. Tonda, ajem sapi bisam yapi ton tupa akapre ngeda, er adipapu doroprapredi, kange di tamupra akati bura tara beryopda, Telep Lengna Ati wengbana tep, keteneipi bisi buplan damai dinin, urasin tara ketenepra deiamenge mesba damai bena, dikra derinkamrure. Ada, ‘Allah karena tep, gam keca popra uku dongonai, gel pala di yakra taplakra ketenepra deiamengai, mesba damai beredi, ayapi doupmare ngeda dikra derinkamrure.

19Tonda, aimam deiyo ngebodi, asapi bisam er meta cap, kop cap yumada, dopropredi, yapi keca popra, Allah karena tep uku dongonai tep, akati bura tara mesba buplan damai ketenepra deipyai deiki duberedi, uku dongonkamrure. Uku di akeca yuma jepropkamrure. 20Ange uku dongona pel dona tep nengeda, ‘Mali kupmange ngeda, lyepropsetue’ tenen, jem sapi bisam ukupu nenmarenge popra yangepa, imam neng sun deiyo ngebodi ange doupra uku dongoramretopu kupra, ukupu pepmasen pel utopu dopredi, asapi nong peda utopu uku dongonkamrure. Imam-imam neng, sun deiyo ngebo dipapu apel yumada donkamrure. Aimam ngebodi apel donkamra deiki di, Israel nesala yuma, sun mankau di mali kupmange kecada, Allah Yahwehdi ange yuma daepra gum kupra deipredi, telep kupra derinkamre. Sun mali kupmange nge tep, weneptu dinin, asapi bisam popkamenga deiki di, sun tep kunupkamre. Adeiki, Allah Yahwehdi sun Israel nesala tep, telep kupra derinkamsere.

21Uda, apel yuma konum dopra gawal dakyopda, ajem sapi bisamda, imam neng sun deiyo ngebo erdi, Israel nesala sun kununga neitamai di doupra bura tara beredi, asapi nong cap, tu cap, bol cap, yan capda, uku bena dongonkamrure. Ange uku dongona pel dopkure ngeda, Allah cap nimi cap, antamdana ati neitamai talepra pel dona deiyo ngebo, imam er mali kurenge cap, Israel nesala yuma sun mali kunung nge cap tep, Allahdi daepropredi, sun yuma tep kange di ton cap telep kupra deipkamre.

22Uda, yuk upu ton pepkusene. Ukupmanto, sun Israel nesala tep talepra kurammenge ila deiyo neng ton, mankau kange dipapu dinin, Allah Yahwehdi, “Angeda men kunkamrume,” peipseu upu tenpu tep, yaniptapra mali kupmengopda, ange deiki di, tek sisi mali kudidanunge. Atep, sun si eremenge Allah, sun nai bo Allahdi, ‘Dakwapye,’ men tenenkamrure. ‘Amali kupmenge nengda, tek sisi mali kupmange,’ tenenkamre. 23Atep, dakunmaryanen, amenda taru, aila deiyo ngebodi, ‘Uo, angeda, tek sisi ne mankau di mali kupmanue’ tenen, konum kael kepdaryopda, er adipapu jem kambing bisam ukupu nenmarenge tenpu, bol pio telepngepu doupra, Allah karena tep, duyaredi, karenkamrure. Ada erdi, ‘Gume, ne mankau di mali kupmanua kunumna tep, akambing bisamda doupra benepa, Allahdi lyepropkunere’ tenena tep doupra kareryankamnunge.

24Ayana karepre deiyo ngebo, er buruda dopra akambing bisam er giso deiki deiprepa, ponkamrure. Akambing pona tep tarada, yapi keca popra uku dongona tep, mesba keteneiamengai utarapu, bena deipra ponkamrure. Ange utopu, sun yumada, Allah Yahweh er karena tep, gam keca popra uku dongopmumdi er karena tep nengeda, ‘Aca dipapu, Allah dinmaseraipu bena ponkamepe’ tenen, gel taplakra yakeiprumdi, ketenepra deiprumai dipapu, bena ponkamrure. Akambing bisam ponkamruma deiyoda, sun mali kun keca pununa cap, daemna cap tep, apel donkamrume. 25Imam pel dona deiyo ngebo, er adipapu er buru di akambing bisam yapi burupropyopda, Allah er si eremna ati bura tara dinin, urasin tara deiamyaipu, yapi keca uku dongona tep, aketenepiyai amesba damaipu bena dingdinkamrure. Ada, kumum dam dana-dana tara dumbari takke kupra betaipya deiki bena, likra derinkamrure. Tonda, sapi bisam yapi ton tupa akapre ngeda, er adipapu doroprapredi, Allah er si eremna ati wengbana tep, buplan damai dinin, urasin tara ketenepra deiamenga, mesba damai bena, ayapi yuma dikra derinkamrure. Ada, ‘Allah karena tep, gam keca popra uku dongona tep, gel pala di yakra ketenepra deiamengai, amesba damai bena, ayapida dikra derinkamrure.

26Ukupra apel dopra keteneipre dingeda, amutu nesala sun deiyo kepra taleamre ngebo, mankau di mali kupmare ngeda, Allahdi telep kupra derinkamre. Ange telep kupra derina tep, yana popmare kambing bisam er meta yumada, amesba deiki deipra uku dongonkamrure. Ada, amali kupmare deiyo ngebodi, ‘Ne mali kupman ngeda, Allahdi lyepropnetudi, telep kweipnetue’ tenen, gam keca popra, meta yuma duyarepa, Imam ngebodi akeca yuma doupra, mesba deiki uku dongonkamrure. Ada, ‘Allah cap, nun cap kange di telep kupra kikiman kutepe’ tenen, pel doramretopu kupra, adeiyo ngebo er melimna tep, imam ngebodi apelpu donkamrure. Ukupkamra deiki di, sun Israel nesala talena deiyo ngebo, er mali kupmare keca tep nengeda, Allahdi kaukepredi, gum kupra derinkamre. Amali kupmarenge tep, men wenepkamre. Kange di telep kweipkamre.

27Uda, ange utopu dinin, yuk upu ton pepkusene. Ukupmantoda, nimi deiyo nengpu gum dinin, tali Israel yala nesala yuma peda, Allah Yahwehdi, “Angeda men kunkamrume,” peipseu upu ton, er mankau di mali kupredi, apeipseu upu yanipyopda, ‘Uo, ne mankau dipapu Allah Yahweh tep mali kuipmanue,’ tenenkamrure. Allah er kangeda, ‘Mankau dipapu, tek sisi angebodi mali kupmaue,’ tenepkamre. 28Atep, dakunmaryanen, amenda taru, angebodi, ‘Uo, angeda, tek sisi ne mali kupmanu,’ tenen, konum kael kepdaryopda, er kunumna cap, pununa cap tep, er adipapu Allah karena keca ton duyankamre. Ada, kambing bisam nernge ukupu nenmare ngepu doupra yaredi, tonda bol malinge ton pio duyakana gume. Nong bol pio telepngepu doupra yaredi, ‘Gume, ne mankau di mali kupmanua tep, aner kambing bisam doupra benepa, Allahdi kaukepneredi, lyepropkunere’ tenen, Allah tep yana karenkamnunge. 29Akambing bisam yana karepre ngeboda, er buru dopra, aner kambing er giso deiki deipredi, ponkamrure. Akambing pona tep tarada, yapi keca popra uku dongona tep, gel pala di yakra keteneiamenga, er si mesba utarapu, bena deipra ponkamrure. Ada, Allah karena tep, gam keca popra uku dongopra karena tep nengeda, ‘Acei dipapu bena ponkamepe’ tenen, ketenepra deiyamrumai dipapu bena ponkamrure.

30Ange yuma konum seng pepyopda, imam pel dona deiyo ngebo, adipapu er buru di aner kambing bisam yapi wipra, ayapi keca uku dongona tep, gel pala di yakra keteneiamengai, er si mesba, er kumun dana-dana di takke utopu kupra betaipya deiki bena likra derinkamrure. Tonda, yapi ton tupa akapre ngeda, yapi keca uku dongona tep keteneiami keca, mesba damai dinin, tu deiki bena dingdinkamrure. 31Adoupra yarepa, popkamre ner kambing bisam er meta cap, kop cap yumada, adipapu doprapredi, men di kuramretopu, mali kupmare ngebodi, ‘E, ada ne mali kupmana tep, yapi keca doupra, Allah damai benepa lyepneryopda, er cap, ne cap kange di ton cap telep kupra kikiman kunkamneme’ tenen, abisam meta yuma doupra yarepa, mesba deiki uku dongomamretopu kupra, pel dopredi, uku dongonkamrure.

Ange utopu, angebodi, akambing meta yuma doupra, imam neng sun ila deiyo ngebo tep kareprepa, imam adipapu ameta yuma, mesba deiki deiprepa, uku jepredi siltong telepnge weleprepa, Allah Yahweh gekepredi, er kange telep kunkamre. Angeda, mankau di mali kure ngeda, pununa cap, kunumna cap tep, apel donkamrure. Tonda ange utopu, aimam ngebodi apel doramretopu kupra dopre pangeda, adeiki di, amali keca mankau di kure ngebo, er mali kupmare ngeda, Allah Yahwehdi kaukemkamre. Amali kupmaunge tep, wenepra men ponkamre.

32Uda, ware ngebo do yuma, mankau di mali kure ngebo, er mali kupmarenge tep, ‘Allahdi ne mali kun keca daepropneredi, telep kupra deipnetue’ tenen, ‘Domba bisam popra bena karepkune,’ tenepre dingeda, er duyankamre ngeda, ner domba bisampu denkamre. Ada, tenpu pio bol telep kupra nenmare ngepu, doupra kareryakankamrure. 33Ayana karepre ngebo, er buruda dopra aner domba bisam, er giso deiki deiprepa, ponkamrure. Adomba pona tep tarada, yapi keca popra uku dongona tep, utara keteneiamengai di, bena deipra ponkamrure. Ada, Allah karena tep, gam keca popra uku dongopra karena tep nengeda, ‘Mesba damaipu bena deipra ponkamepe’ tenen, ketenepra deiyarumai dipapu bena ponkamrure. 34Ukupyopda, imam pel dona deiyo ngebo, ada Allah cap, nimi cap antamdina tep, tenda opkal bol di keana tep dopi ati pumbon pel talepra pel dona ngebo, er dipapu er buru di aner domba bisam yapi buruprapredi, gam keca popra uku dongona tep, mesba ketenepra deiamyai, er kumun dana-dana di, sapi bisam er giso takke beleramretopu kupra betaipya deiki bena likra deipembankamrure. Tonda, yapi ton tupa akapre ngeda, yapi keca uku dongona tep keteneiami keca mesba damai dinin, deiyo tara yuma, tu deiki dikra derinkamrure.

35Adoupra yarepa, popkamre ner domba bisam er meta yumada, adipu doprapredi, men di kuramretopu, mali kupmare ngebodi, ‘E, ada ne mali kupman ngeda, yapi keca doupra, Allah damai bena karepnepa, Allahdi lyepneredi, telep kupra deipnerepa, Allah cap, ne cap kange di ton cap telep kupra tonpa antapra kikiman kunkamneme’ tenen, doupra yarepa, popra uku dongomamre utopu kupra, pel dopredi, uku dongonkamrure. Angebodi, apopmare ner domba meta yuma doupra, imam neng sun ila deiyo ngebo tep kareprepa, imam adipapu ameta yuma, mesba ketenepra deipya deiki bena uku dongonkamrure. Ada amali kupmare ngebo, er pununa cap, kunumna cap tep, karepkamrure. Ameta doupra uku dongoprepane, uku jepredi, siltong telepnge weleprepa, Allah Yahweh gekepredi, er kange telep kunkamre.

Tonda ange utopu, aimam ngebodi apel ukupra doramretopu kupra dopre pangeda, adeiki di, atenpu ngebo er mankau di mali kupmare ngeda, Allah Yahwehdi kaukemkamre. Amali kupmaunge tep, men wenepra popkamre.