Lev 5 | XteSC | STEP | Allahdi Musa tep lap pepu. Ukupmanto, nimi tenpu ngebodi yuk neng tep, mali kupmangepa, ton ngebodi ange epmau do, yuk nengdi lap pepmangupa gekepra kael kepmau do, dinino, nimi mali kupmangepa, upu lepsisikra telep kudina deiyo nengdi, er angebo tep, “Kandi, nun damai yamemdi, amali kupmangu keca penmaume, tonda, dinmamume. Atep, kandi epra gekepmamumdi, kael kepmamumnge yumada, yana lap pepkuserume,” pepmengepa, er angebo sun damai men yarur do, yarur do, dinin, “Anengda tek sisi mali kupmangue,” pepra men lap pepredi, inimtamnapu kupyopda, Allahdi angebo tep, “Gume, erdi tek sisi mali kupmarpa, wenepkamne,’ tenenkamre. Akuprenge tep, menengada, ikin keca er deiki weik yarepa doronkamre.

Leviticus 5

Allahdi, “Mali kupmange nge daepra, telep kudina tep nengeda, mambule,” pepu upu

1 Allahdi Musa tep lap pepu.

Ukupmanto, nimi tenpu ngebodi yuk neng tep, mali kupmangepa, ton ngebodi ange epmau do, yuk nengdi lap pepmangupa gekepra kael kepmau do, dinino, nimi mali kupmangepa, upu lepsisikra telep kudina deiyo nengdi, er angebo tep, “Kandi, nun damai yamemdi, amali kupmangu keca penmaume, tonda, dinmamume. Atep, kandi epra gekepmamumdi, kael kepmamumnge yumada, yana lap pepkuserume,” pepmengepa, er angebo sun damai men yarur do, yarur do, dinin, “Anengda tek sisi mali kupmangue,” pepra men lap pepredi, inimtamnapu kupyopda, Allahdi angebo tep, “Gume, erdi tek sisi mali kupmarpa, wenepkamne,’ tenenkamre. Akuprenge tep, menengada, ikin keca er deiki weik yarepa doronkamre.

2 Ange utopu ukupmantoda, ware ngebo do, Allahdi, “Akecada, mali pio weik keca kurura cadi, akeca nong damai bena pe, talena peda, pio men kunkamrume. Ukupmumnyopda, ne damai men yakankamrume,” peipu kecada, mankau di akeca nong bepyopda, Allahdi angebo tep, ‘Erda tek sisi mali kupmare,’ tenenkamre. Ada, angebo mankau di, bura tara kuramre gam keca potamnenge do, mankau di bal do, kwali do, akeca utopu keca tuai deiki embaramrenge do, nimidi peirameng keca dinin, Allahdi akeca yala-yala yuma tep, ‘Angeda mali cadi, men talepkamrume,’ peipseu ngeda, mankau di bepyopda, adeiki di mali konum kupkamare. Uda, akeca beprepa, men kael kepmarya peda, amenda taru, erdi, ‘Uo, amali keca bol bepmanada, pio mali mem keca bepmane’ tenen, er pe angebodi konum kael kepdaryopda, er peda, ‘Uo, angeda tek sisi mali kupmanue,’ tenenkamrure. Allahdi angebo tep, ‘Gume, mali keca talepmaua cadi, ne damai yakana gume. Erda konum mali kupdaue,’ tenenkamre.

3 Angetopu ukupmantoda, ware ngebo do, mankau di nimi dei do, nerapu embaramre yapi do, tuai nesala bol deiki mali kurur keca tep, Allahdi, ‘Akeca yala-yala yuma tep bol bena gume,” peiamseunge ton, bol bepyopda, tek sisi konum mali kurure. Mankau di kupmarur dinin, amenda taru, erdi, ‘Uo, amali keca bol bepmanada, pio mali keca bepmane’ tenen, er pe angebodi konum kael kepdaryopda, er peda, ‘Uo, angeda tek sisi mali kupmanue,’ tenenkamrure. Tonda, Allahdi angebo tep, ‘Gume, mali keca talepmaua cadi, ne damai yakana gume. Erda tek sisi mali kupmaue,’ tenenkamre. 4 Tonda, ukupmanto ngeda, ware ngebo do, “Akecada, nedi pio tek sisi kupkamne,” pepra pedina upu deiki di pepre dinin, tek sisi men kupyopda, erdi konum mali kurure. Uda, “Aupuda, tek sisi upu pepmane. Angeda, tek sisi kupkamne ja,” pepra, pedina upu penmarur dinin, tek sisi men kupmarura cadi, malipu kurure. Uda, nimidi, moupra tenena gum di, upu yala-yala yuma tali lupra pertamnung dinin, sundi, “Ukupkamepe,” penge upu men kupmengopda, Allahdi, sun tep, ‘Gume, tek sisi mali konum kupmange,’ tenerure. Atep, amenda taru, ato ngebodi, ‘Apepsi upuda, men kupsa tep, ne mali kupsi’ tenen, kael kepdare dingeda, Allah teneretopu, er peda, ‘Uo ne mali kupsi’ tenen, kael kepkamre. Allahdi ato ngebo tep, wenepkamre.

5 Uda, ukupmantonge alap pepmasen upu yuma, ada mankau di mali kupmenge keca yala-yala yumada, ware ngebo do, autopunge kupmarya deiki di, tek sisi mali kupre. Amali kun keca kupmare ngeboda, er adipapu, “Uo, ne mali kupmanue,” pepra, nimi yumadi gekenmangai di katuai di lap pepredi, lortamkamrure. 6 Autopu keca kupmarya deiki di, mali kupmange nge yumada, Allahdi amali kun keca daepropredi, telep kudina tep, amali kun keca yo pununada, amali kupmare ngebo, er adipapu Allah Yahweh tep, telep karen keca duyankamre. Ada, domba bisam do, kambing bisam do, nerngepu doupra angebodi, Allah Yahweh tep kareryakankamrure. Agam keca doupra, Allah cap, nimi cap antamdina tep, ati pumbon neitamai pel dona neng, sun deiyo imam ngebo tep karepyopda, aimam ngebodi doupra, Allah tep, kareyakankamrure. Ukupya deiki di, amali kupmare ngebo, er mali keca yuma tep, Allahdi kaukepra daepredi, telep kupra derinkamre.

7 Dinino ukupmanto, amali kupmare ngeboda, pio kankan ngebo kuredi, er domba bisam do, kambing bisam do, tek sisi men kapyopda, tonda men kunuptuopda, akecada pio gum ngebo dingeda, er angebo mali kupmare keca daemna tep, yo pununa keca doupra kareyakana tep nengeda, yalma ma butene doupra yatu dingeda kareptue. Agum dingeda, tekukur ma butene doupra karena peda telepe. Ada, ayal ma butene tomoprapredi, doupra er mali kun keca daemna tep, Allah Yahweh damai kareryankamrure. Ada, ton tenpu ngeda, imam ngebo er dipapu, ‘Angeda, er mali kupunge daemna tep, ketenepne’ tenen, menmena Allah tep karepkamrure. Ange utopu, ton ngeda popra, mesba deiki uku dongopkamrure. 8 Amali kupmare ngebodi, ama butene doupra yaryopda, Allah cap, nimi cap antamdana tep, ati pumbon neitamai talepra pel dona deiyo ngebo, imam er damaipu duyakankamrure. Ukupra menmenange doupra yare pangeda, imam ngebo er dipapu ‘Angeda, er mali kupmarenge daemna tep, Allah karepkamane,” pepra, keteneipmare ngepu doupra, Allah tep karepkamrure. Ama doupra yare pangeda, imam ngebodi, ama er giso talepra kum bepakraprepa, ama kum yo copkamre dinin, ama er kum yapla adipapu men sengtamkamrure.

9 Ukupre dingeda, amali kun keca daemna tep, popmare ma, er yapi embere ngeda dopra, Allah karena tep, gam keca popra uku dongoramengai, er sida mesba, ketenepra deiamengai, kumun sirik dana-dana bena, gege pepra emberepa, ayapi mesba gel pala di taplakra yakra deipya deiki palenkamrure. Tonda, weik tara yapi tupa akapmare ngeda, gam keca popra uku dongomna tep keca, mesba ketenepra deiamenga deiyo tarapu, dikdongoprepa, tu deiki neitamai wengbankamrure. Ama popredi, apel donkamrenge yuma deiyoda, ‘Allahdi mali kupmare ngebo, er mali keca daeptue’ tenen, kupkamrure. 10 Imam ngebodi, apel konum dopyopda, Imam neng sun ila deiyo ngebo er dipapu, mali keca kupmare ngebodi duyanmau ma butene ngeda, yuk ketenepra deipmare tenpu mada, uku dongona deiki di, ‘Allah tep karepkune’ tenen, adipapu doupra, ama popra, uku dongonai dubankamrure. Dubere dingeda, uku dongona tep nengeda, Allahdi, “Angeda, ukupra-ukupra pel dopmemdi, uku dongonkamrume,” peipupa, talepra pel dorameng utopu kupra, pel donkamrure. Ada, mali kupmare ngebo, er mali kun keca daepra, telep kudina tep, imam ngebodi apel dopre pangeda, amali kupmare ngebo, er mali keca adipapu Allah Yahweh erdi, amali kupmare keca yuma daepredi, telep kupra derinkamrure.

11 Uda, yuk upu ton pepkune. Ukupmantoda, ware ngebo do yuma, akeca-keca pio men talerur ngebo, mankau di er mali kupyopda, amali kupmare ngebo, er mali kun keca daepra, telep kudina tep, er yalma ma butene do, tonda tekukur ma butene do, akeca yuma ketenemdina gum ngebo dingeda, yuk keca ketenepkamrure. Ada, roti kwaneng ketenemna deiyo keca, tepung taikamenge nge, er si tepung pio telepnge, duyankamre. Atepung er kunumna ikinda, dua liter ketenepra, doupra yakankamrure. Atelep tepungda, minyak saitun me mokon cap, tonda nintong telep pen keca, er si Kemenyan cap, atepung deiki di men tapangkamrure. Akeca butene men tapakra deipmarengepu duyakankamrure. Deiyoda, aketenepra duyankamre ngeda, jena tep gum dinin, mali keca kupmare ngebo, er mali kupmare keca, atepung karepkamra deiki di, Allahdi er mali kupmare keca daepra, telep kudinkamra tepa.

12 Atep, amali kupmare ngebodi, aroti kwaneng ketenemna deiyo keca, er sida tepung pio telepnge keteneipmare ngeda, adipapu doupra, Imam neng sun ila deiyo ngebo, er damaipu duyakankamrure. Duyare pangeda, imam ngebodi, atepung yambulanun ton wilipra dopropredi, er buru tang pumbon dipapu peten kemdinange tep, douprapredi, Allah Yahweh tep karenkamrure. Ada, Allah er karena tep, gam keca popra uku dongonai tep, gel pala di yakra ketenepra deiamengai, er si mesba damai dopra beredi, atepung bena uku dongonkamrure. Apel donkamra deiki di, ‘Ajenda, konum Allah karepmane’ tenen, peten kemdinkamrure. Tonda, mali kupmare ngebo, er mali keca daemna tep, Allahdi, ange daepra telep kudinkamrura tep, apel donkamrure. 13 Apeipnetopu, imam neng sun ila deiyo ngebo, erdi mali kupmare ngebo, er mali keca daepra telep kudina tep nengeda, ukupra apel dopredi, Allah tep karenkamrure. Adeiki di, angebo er mali kupmarenge yala-yala yumada, Allahdi daepropredi, teleppu kupra derinkamre. Amenda taru akeca tep, pio men wenepkamre. Ukupra roti kwaneng ketenemna deiyo keca, yambula di doupra, uku dongona pel konum dopyopda, tepung weik tamna tupa atapre ngeda, imam ngebo er jena tep, ange dopropkamrure. Ada, men di Allah karena tep, gandum do, yakung do, du metek keca karepredi, kuramyai utopu kunkamrure.

Allahdi, “Angeda kunkamrume, angeda pio men kunkamrume,” peipunge dinin, mankau di kupmangedi, yo punupra karenkamnunga tep, peipu upu

14 Allah Yahwehdi, Musa tep, “Angeda kunkamrume, angeda pio men talepra kunkamrume,” pepra deipu. 15 Ukupmanto, Allah Yahwehdi Musa tep lap pepu.

Sun mali kun keca daemna cap, pununa cap tep, nedi, ‘Ange-ange yumada, ne mambul keca, ne mawa keca cadi, pio lengna telep kecapu kareryakankamnerume,” pepra deiamseu. Dinin, ware ngebo do, er mankau di, atelep keca karen taru, mali kupyopda, telep kupra men karepmarya deiki di, mali kupkamre. Mali kupmaryopda, atapmaredi, mali kupmarenge tep, er angebodi mali kupmarenge yo pununa tep, telep karen keca ton punupra kareryakankamrure.

Ada, domba bisam jemnge, nong bol pio telep kupra, weni nenmarengepu, doupra kareryakankamrure. Tonda, ajem domba er kunumnada ake. Ada, men di Allah er karena tep nengeda, kunumna weik keca, er si perak, “Ne si eremna ati karena tep, ukupra nukraprumudi, atongepu doupra kareryakankamrume,” pepra, lap peiamseunge utopu, kunumna weik domba bisam doupra, kareryakankamrure. Domba bisam kunumna metek ngepu dekana gume. Adomba er nong kunumna weik utopu ngepu, doupra duyakankamrume. Amali kupmare ngebodi, akeca karenkamra deiyoda, adomba karepkamra deiki di, er mankau di mali kupmaunge tep, yo punupkamre.

16 Ada tali tep gume. Ware ngebo do yuma, “Nedi, Allah er karena tep, ukupra-ukupra karenkamne,” pepra lap peiamu dinin, amenda taru ange tek sisi men karepka cadi, tek sisi mali kupmare. Angebopu men di ton, “Ukupra karepkamne,” peiamutopu, men doupra kareryanamyanen, amenda taruda, tek sisi men karepmarenge, ange yo punupkamre. Ange men taptue. Angebodi men doupra kareryanmarya tep nengeda, agum dingeda, amenda taru men kareprenge tep nengeda, akeca yo pununa tep nengeda, ukupkamre.

Erdi, “Ukupra karepkamne,” peputopu dinin, ton cap tapakra bokrapredi, ton cap karepkamre. Ada, dua puluh persen (20%) ton cap, tapakra karenkamrure. Ukupyopda, agam keca doupra yanmare ngeda, er adipapu imam ngebo, er damai karenkamrure. Ukupra yana karepre pangeda, akati talepra pel don imam ngebodi, sun mali kun keca daemna cap, pununa cap tep karepmarum jem domba doupra beredi, Allah tep, doupra bena karepre pangeda, adeiki di, Allah Yahwehdi angebo, er mali kupmare ngeda, daepropredi, telep kupra derinkamre.

17 Tonda, Allah Yahwehdi, “Angeda ukunkamrume, angeda pio men kunkamrume,” pepra deiamseu upu, daneitamai di tenpunge peda, tenpu ngebo mankau di, aupu yaniptapya deiki di, mali kurure. Uda, amali kupmare ngeda, mankau di kupmarur dinin, mali konum kupyopda, amali kupmarenge tep menengada, ikin keca yarepa doronkamre. Allahdi, er tep, ‘Gume, er mali kupmara cadi, wenepkamne,’ tenenkamrure. 18 Atep, amali kupmare ngebodi, er mali kun keca daemna cap, yo pununa cap tep nengeda, Allah tep domba bisam kareryakankamrure. Ada, domba bisam jemnge, nong bol pio telep kupra nenmare ngepu, doupra kareryakankamrure. Akecada, Allah er ati pumbon neitamai pel talepra, apel dona deiyo ngebo, imam ngebo tep yana karepkamrure. Domba bisam nong mali ngeda, pio men kareryakankamrure. Ajem domba, kunumna telep ngepu denkamrure. Ada men taru Allahdi, “Ukupra-ukupra, atongepu nukra karepkamnerume,” peipseu kunumna utopu ngepu, doupra karepkamrure. Ukupra yana karepre pangeda, Allah ati talepra pel dona imam ngebodi, doupra beredi, Allah tep, bena karepre pangeda, Allah Yahwehdi angebo er mankau di mali kupmare ngeda, daepropredi, telep kupra derinkamre. 19 Akarepkamrenge deiyoda, ake. Ada, Allah Yahwehdi pepra deiamu upu ton, mankau di men kupmarya deiki di, mali kupmarya tep, ange yo pununa cap, daemna cap tep, gam keca, jem domba bisam doupra Allah tep kareryakankamrure.

Allahdi Musa tep lap peipu.