Lev 6 | XteSC | STEP | Allah Yahwehdi, Musa tep, “Angepu gekepmemdi, Israel nesala yuma tep, ‘Angeda kunkamrume, angeda pio men kunkamrume,’ pepra lap penkamrume,” peipu. “Aupuda ake,” pepu.

Leviticus 6

Nimidi mok upu pepmengepa, amali kun keca daemna tep, pepu upu

1 Allah Yahwehdi, Musa tep, “Angepu gekepmemdi, Israel nesala yuma tep, ‘Angeda kunkamrume, angeda pio men kunkamrume,’ pepra lap penkamrume,” peipu. “Aupuda ake,” pepu.

2 Ware ngebo do yuma, sundi, ‘Neda pio teleppu kunkamne,’ pepmenge dinin, ange tapra mali kupmengopda, amali kun keca daemna tep, ukunkamrume. Uda, nimi tenpu-tenpu ngebodi, mali kupredi, sun kayapu neng tep, mawa di mok upu pepyopda, tek sisi ngeda sun nai bo Allah Yahweh cap tep, mali kupra deirure. Ukupmantoda ake. Tenpu ati deiyo ngebo tep, er kayapu neng, sun mawa keca dopra deipmengedi, “Ne kabo, kan atida, ne keca keana tep deipnetume,” pepmengepa, bena deipmaredi, er kayapu neng sun keca tep, “Sun keca keana doupmakenyanen, tamupra karepkamsene,” peptapredi, amenda taru erdi upula pio dororur do, yuk nengdi, er ati pumbon di akeca upula doronung dinin, erdi akeca deiyo neng tep, “Yo, ne walwale, akecada, tali di dim pepmaserpa, ne walwale,” pepra, mok upupu pepyopda, angebo tek sisi mali kurure. Ware keca do yuma, ange utopu, mawa di mok upu pepmengedi, sun damai kunge nesala tep, mali kupmengopda, Allah er kangeda, ‘Sun tek sisi mali kununge,’ tenerure.

3 Tonda ange utopu, yuk neng, sun keca yawarapmangepa, amenda taru angebodi, bisi tali bandenkap, akeca epra bupmare dinin, pio dopropredi, er penge sisa utopu kupra, “Neda men dopropmanue. Tek sisi pepne,” pepra, inimtamrur ngeboda, er peda tek sisi malipu kurure. Erda, mok upu pepyopda, ange peda, malipu kurure. Ange utopu kun keca yuma capda, Allahdi, “Angeda men kunkamrume,” peipunge konum yaniptapmara cadi, angeboda inimtamrur ngebo di, pio mali konum kupke. Amali kun keca cap, mawa di mok upu pena cap, ange yuma deiki di, Allah Yahweh er upu tep konum yanirure. 4 Akeca utopunge konum kupmaredi, amenda taru, ‘Uo, ne tek sisi mali kupsi’ tenen, kael kepyopda, er kabodi er ati keana tep, deipmarepane, upula dororur nge cap, tonda “Keana tep doupkamakena,” peptapra, pio dororur nge cap, tonda yuk neng keca yawarapmarepa, bupmare dinin, tek sisi katuai di, “Dopropmanue,” pena pio gum dipapu, akeca dopra, er pe kemdorur keca cap, yumada, yuk neng keca upula dororur nge cap deiki di, mali kuramre ngeda, tamupra karenkamrure.

5 Tonda, ware keca do yuma, inipra upula dororamre dinin, “Ne gume, tek sisi ne men dopropmane,” pemrepane, yuk nesaladi aupula dopramrenge konum kael kepmengedi, “Gume, angebodi er upula domu dipapu, iniptamu,” pepmengepa, ayuma kael pepmengopda, aupula domre keca yumada, tamupra akeca deiyo ngebopu karenkamrure. Dinin, pio mali kupka cadi, ton cap dua puluh persen (20%) tapakra weika di akeca deiyo ngebopu karenkamrure. Ada yuk tumi gume, erdi upula dopramre keca yuma tamupra karenkamre tumipu, er mali kupmarenge pununa cap, kunumna cap tep, Allah er karen keca ton kareryakankamre. Ada, ‘Ne mali kupsi keca punupra kunumna tep, Allah damai telep karen keca duyana deipnepa, Allah kaukepneredi, lyepropkamnere’ tenen, kareryankamre. Angebodi, atumipu apel butene donkamrure.

6 Mali kamre ngebodi, ‘Teka, neda mali kupsa tep, ne keca karepnepa, ne mali kupsinge yuma tep, kaukepkuner,’ tenepredi, mali kamrenge, daemna cap, yo pununa cap tep nengeda, domba bisam bol pio telepngepu doupra, kunumna telepnge doupra kareryakankamre. Ada, domba bisam bol malinge pio gum dinin, bol pio telepngepu doupra, Allah Yahweh cap, nimi cap antamdana tep ati pumbon pel talepra dona deiyo imam ngebo tep karepkamrure. Ukupyopda, ada, Allah Yahweh er tep karena utopunge cadi, ukupra karepkamre. Tonda men di, Allahdi, “Ne karena tep, sun mali kun keca yo pununa tep nengeda, kunumna keca ukupra-ukupra doupra, ne tep kareryakankamnerume,” peiamunge utopu kunumna weik jem domba bisam doupra, Allah tep kareryakankamrure. 7 Amali kamre ngebodi, telep jem domba bisa doupra, Allah cap, nimi cap antamdana tep ati pumbon pel talepra, deiyo kepra pel dona ngebo, imam er damai yana kareprepa, ada akeca dopra Allah tep karena utopu cadi, ange karepyopda, adeiki di, angebo er mali kamre ngeda, Allah Yahweh epredi, angebo er mali kuramu keca yuma tep, kaukepra telep kudinkamemere.

Allah karena tep, gam keca popra uku dongona pel dona tep, pepu upu

8 Allah Yahwehdi, Musa tep, “Ukupkurume,” peipu.

9 Apeipken upu yumada, Musa kandi, Harun cap, erdi deiamu neng yuma cap, sun tep lap peipkurume. ‘Allahdi nun mali kun keca kaukepra daepseredi, lyepropkamser’ tenen, gam keca yuma popmengdi, gel pala di yakra keteneiamyai, uku sekra dongonkameng pel tep, ‘Angeda, ukunkamrume,’ pepra deipkusene. Aupu peipnengepu sundi talepra kungedi, pio kunkamnunge. Ada ake. Imam ngebo erdi, gam keca popmangenge doupra, Allah karena tep, betapra keteneipi keca, er si mesba deiki yana deipnedi, uku dongonkamrure. Agam keca popra uku dongopmare ngeda, ukudi jenkamre dinin, lukunda yuma peda adipapu uku jenapu kunkamrure. Tonda aukuda, men tamkamrure. Alukunda yumada, uku bu jenapu kunkamrure. 10 Dakamamrepanen, berekyopda, ipna taru, imam ngebodi, sun imam-imam yuma nengdi, Allah si eremna ati damai cap, pumbon cap, pel dona tep, kenengameng opkal kenekamre. Ada, imam ngebodi, er pio telep boun lyom opkal, er si lenan, kenekamare. Lenan opkal di wiamenge nge, nong bol damai bum celana cap, nong deiki bura tara lyomnge cap kenekrepa, er nong yuma leliprepane, apel donkamrure. Menmenada, er adipapu gam keca konum uku jepropmaredi, sikke buktapmarenge terepyopda, Imam er dipapu, asikke lupra, agel pala di yakra keteneiamyai er si mesba damai deipkamre. Ada, yapi keca popra, uku dongonai tep, keteneiamenge keca, er si mesba deiki tara di, asikke lupra, amesba deiyo tara damai ben yamupra derinkamrure.

11 Ukupra asikke konum lupyopda, arup ipna kenekmare lenan opkalda, kwiripra deipredi, yuk opkal punupra kepre dingeda, asikke luprapredi, Israel nesala kunungai tapra, bura tara mutu bena deiptapkamre. Sikke doupra bura tara beredi, men di, ‘Asikke lupra derinkamep’ tenen, ketenepra deiamengai, mali kun keca gumai, pio telepaipu bena yamupra derinkamrure.

12 Ipna taru yumada, imam adipapu gam keca popra yangepa, uku dongona tep, gel taplakra yakra ketenepra deipyai, mesba deiki uku sekmarepa jenmare ngeda, moupra kalekmaredi dinmarepapu, uku jenkamrure. Moupra kalengna gum di, tapmarepa aukuda, men tamkarure. Ipna taru yuma, uku dongon co doupra, amesba deiki deipredi, uku sekyopda, auku tupa jenapu kunkamrure. Atep, akati pel dona ngebo, imam ngebo, er ila deiyo ngeboda, tupa-tupa ipna taru yumada, ‘Allah cap, nimi cap telep kupra kikiman kunkamep’ tenen, uku dongona tep, gam keca popnedi, daneitamai di meta cap, kop cap, uku dongon co cap doupra, amesba deikipu ketenepra derinkamrure. Ukupmaryadi, ‘Israel nesala sun mali kupmange nge tep, Allah kaukepredi, telep kupra deipkamaser’ tenen, doupra yanmange yapi keca popra, meta doroprapredi, uku dongopra kunkamrure. 13 Yapi keca popra, uku dongona tep, er si mesba ketenepra deipyai, moupra kalekmarepane, pio tep uku jenkamrure. Tonda, erdi taprepa, aukuda men tamdonkamrure.

Allah karenkameng jen keca, yakung do, tepung do, ketenepra derina tep, pepu upu

14 Allahdi Musa tep pepu.

Angeda, ne Allah Yahweh karena tep, yakung do, terigu do, beras utopu jen keca do, ayala keca yuma kareryakankameng jen keca doupra, bena derinai tep nengeda, ‘Angepu ukupra-ukupra kunkamrume,’ pepsenepa, ange pio kunkamrume. Ada, Harun cap, erdi deiamre neng cap, sun dipapu, ajen keca doupra Allah Yahweh tep, yana karepmenge ngeda, doupra uku dongona tep, gel pala di yakra ketenepra deipi keca, er si mesba damaipu dinin, urasin tara damai doupra bankamenge. 15 Sun imam-imam neng neitamai dinin, ‘Ataruda, angebo pel donkamser’ tenen, wepra deipmenge ngebo, er aimam deiyo ngebo adipapu roti kwaneng deiyo keca, er si tepung pio telep sikke utopunge, daneitamai di tenpu buru deiki yambulanun doupra yaredi, minyak me cap, tonda siltong telep pena keca, er si kemenyan cap, gam keca popra uku dongonai di, yana uku dongonkamrure. Deiyoda, ‘Auku dongopne jen keca yumada, Allah Yahweh tep karepne. Ange yumada, ernge pua’ tenen, peten kemdina tep kunkamrure. Uku dongoprepa, uku jepredi siltong telep ngeda, Allah Yahweh er damai welerepa, gekeredi, er kangeda pio telep kunkamre.

16 Peten kemnange konum karepyopda, roti kwaneng jen keca deiyonge, tepung ton tupa akapre ngeda, Harun cap, er nyapu cap, doropropmengedi, amenda taru jenkamnunge. Aroti kwaneng deiyo keca tepung cap, minyak cap jepkameng dinin, roti nena deiyo keca, er si ragi ton, pio men tapakamenge. Tonda, akeca di dapmange ngeda, taliaipu men jeptenge. Akati pel dona neng, Harun cap, erdi deiamu neng cap, sun jena tep, dapra deipmenge dingeda, sun adipapu doupra, pio mengne telepai dubengedi, jenkamnunge. Ada, Allah cap, nimi cap antamdina tep, opkal bol di dopi ati damai dinin, urasin tara bengedi, aceipu bena deipra jenkamnunge. 17 Arup pepmanutopu, aroti kwaneng dana tep nengeda, roti nena deiyo ngeda, er si ragi, akeca di tapakrap dana pio gume. Gume, nena gumngepu, dankamrume. Auku dongona tep, yana karepmange jen keca tupa akapmare ngeda, ne Allahdi, sun imam-imam neng jena tep, konum karepmane. Akeca yumada, ne mawa, nengepu cadi, ne kangeda, ajen kecada, lengna keca pio telep jen keca utopu kurure. Ada, ‘Mali keca pio men kapmaredi, pio telepnge kurure,’ tenepne. Atep, ajen kecada, sun mali kun keca daepnedi, telep kudinange utopu kurure. Tonda, nimidi mali kupmangepa, amalinge wenemna tep, ikin keca sun damai yanmantonge, daemna cap, pununa cap tep utopu kurure. Atep nengeda, ne tep karerameng nge utopu kurure. Akecada, ne mawangepu kurura cadi, pio lengna kecapu kurure pepne.

18 Ajen kecada, pio tep, Harun cap, erdi deiprepa, dadeipdanen bankameng sal nyapu yuma dinin, aroti jen keca karepkameng keca neitamai di, Allah cap, nimi cap antamdana tep, dopi ati pumbon neitamai talepra pel dopbankameng neng tep nengeda, Allah Yahweh tep, yana karepmenge keca, uku dongopmengepa, ton tupa akapre ngeda, Harun er yala neng, sun jena tepa. Atep, akeca dopra jenkamnunge. Ada, sun Harun er yala nengpu, aneng-aneng yuma, pio tep ukupbankamnunge. Allah er kangeda, ‘Akeca yuma tep nengeda, pio telep keca, ne mawange,’ tenerure. Atep nengeda, akati pel dona gum, tali nengdi, Allah tep, karepmangenge neitamaida, doupra jena pio gume. Allah tep karepkameng ngeda, ware ngebo do yuma, akeca sun bol bepmengopda, Allah er kangeda, ‘Sun aneng adipapu teleppu ^{▼▼teleppu - Yuk nengdi, Allah upu sengaminge neitamai di, “Akecada, pio lek keca cadi, akeca mangkau di talepmenge nengda adipapu depkamenge,” seki. Dinino Ibrani upu dipetepmepua deiki di, TB cap, nun capdi, “Akeca bepmenge nengda, pio teleppu kupkamenge,” sekmepu} kupkamenge,’ tenerure. Deiyoda, Allah er kangeda, ‘Akeca yumada, ne mawa keca, pio telep kurura cadi, ajena deikida, pio ila puto weik kurure.

19 Allah Yahwehdi, Musa tep, “Angepu talepmumdi, ukupra-ukupra kunkamkamrume,” pepra karepu upuda, ake.

20 Uda, sun Israel nesaladi, ‘Nun mali kupmape keca yuma tep nengeda, Allahdi kaukepkamser’ tenen, ‘Imam-iman neng wepra deipmepepa, sun dipapu Allah karena pel dopbankamsenge,’ tenepmengedi, Harun wepra deipkameng taruda, ukupbankamnunge. Ada, Harun cap, erdi deiamre neng, er nyapu cap, Allah cap nimi cap antamdina tep, opkal bol di keana dodin tenda ati pumbon pel talepra dona tep, deiyo neng kunkamenga cadi, sundi, ne Allah Yahweh tep, akeca doupra yangedi, karepkamnenunge. Ada, imam ngebo Harun wepra deipkurumu tumida, Harun cap, er nyapu capdi, apeipnetopu kupmengedi, ne Allah Yahweh tep doupra kareryakankamnenge. Harun cap, er nyapu cap, sundi duyakankameng keca yumada, ake. Ada, roti kwaneng dana deiyo keca, er si tepung cap, gandum pio telepnge 1 kilo cap doupra, Allah Yahweh tep, kareryakankamenge. Angeda, neitamai di wilipra ton ngeda, ipna taru di, Allah karenkamenge. Ton nge neitamai bokra deipmamenge ngeda, doprapmengedi, sintara di ton, ne Allah Yahweh tep, karenkamnenge.

21 Aroti kwaneng deiyo keca, pio telep sikke utopu tepungda, minyak me cap tapakurume. Tapakmumdi, adipapu roti kwaneng dana tep kecada, kuali utopunge deiki likra deipmemdi, dapkurume. Konum dapra deipmum dingeda, aroti kwaneng topra deipmumdi, doupra Allah tep karepkurume. Akupmum ngeda, nintong telepnge weleprepa, Allah Yahweh gekepredi, er kange telep kunkamre. 22 Akunkamrum ngeda, ataru-ataru yuma kupbankamrume. Dinin amenda taruda, Harundi deiamre neng, sun kan-kan neitamai dinin, er pununa tep, tenpu ngebo wepkamrume. Ada, ‘Ataru Allah karena pel talepra dorur ngebo, Harun er pununa tep, erdi deiamu mi tenpu wepmepepa, angebo Imam neng, sun deiyo ngebo kunkamre,’ tenen, angebo wepra deipkamrume. Angebo wepra deipkumum tumida, angebopu atelep roti jen deiyo keca, tepung ketenepredi, er dipapu Allah tep, karepkamrure. Ange pio tep, karepbankamnunge. Ada, Allah Yahweh er mawange cadi, er karena tepnge yumada, akeca ketenepmengedi, doupra yangepa, uku dongopmengedi, karenkamnunge. Uku bu di, akeca yumada jepropkamrure.

23 Ange pepmakentopu, ataru-ataru yuma, imam ngebodi, Allah tep, jen keca karenkamrenge yumada, uku deiki di dapra karenkamrure. Akeca yumada, uku di yuma jepropkamrure. Tonda, Allah tep uku deiki di dapra karepre ngeda, meteknge peda, dopra men jenkamnunge.

Mali kupmange nge yumada daepra, lyepra telep kudina tep, pepu upu

24 Allahdi, Musa tep, “Kandi aupu perbenkurume,” peipu.

25 Musa kandi, Harun cap, erdi deiamre neng cap, sun gekenai bena pepkurume. Ada, Israel nesala sun mali kupmangedi, ‘Nun mali kupe keca yuma daepseredi, telep kweipsetue’ tenen, sundi gam keca doupra kareryakankamenga tep, popkumum dingeda, apeipmasentopu, ange yuma kupmumdi ponkamrume. Ada, taliyai di men ponkamrume. Men di agam keca doupra yange ngeda, ‘Allah Yahweh, er damaipu popkupe’ tenen, Allah karena tep, gel pala di yakra ketenepra deiamumnyai, mesba deiki uku dongoramrumai dipapu bena, ange ton ponkamrume. Atep, uku dongonkamrum keca cap, nimidi mali kupmenge keca daemna tep, kareryakankamrum keca capda, acapu ponkamrume. Tonda, gam keca ayuma doupra kareryakankameng. Allah er kangeda, ‘Akeca yumada, ne mawa keca cadi, pio telep lengnangepu kurure,’ tenerure.

26 Uda, ‘Allahdi nun mali kupe keca yuma kaukepseredi, lyepropkamser’ tenen, uku dongonkamenge gam kecada, sun imam neng dipapu karenkamenge. Ada, Allah cap, nimi cap, antamdana tep, tenda opkal di dodina ati pumbon pel don neng, sun deiyo ngebodi, adoupra yanmange gam keca yuma poprapredi, ‘Akeca uku dongonkamep’ tenen, ketenepra deipyai adipapu doupra beredi, uku dongonkamrure. Tonda, apopmange keca er tu tupa akwamre ngeda, aimam deiyo ngebo, er dipapu akeca yuma dopra duberedi, jenkamrure. Akeca jena tep, yuk pio telep lengnai ketenepra deiamengai dipapu, bena jenkamrure. Ada, taliaida pio gume. Allah cap, nimi cap antamdana tep, opkal bol di dodina ati damaipu dinin, akati urasin dam tara di bena jenkamrure.

27 Tonda, ware ngebo do, ware keca do yumadi, apopra deipmange gam keca, er tu dopra deipmangenge deiki, bol bepre pangeda, abepre keca do, akeca bepre ngebo do, Allah er kangeda, ‘Akeca bepmare ngeda, adipapu pio teleppu kupmare. Angeda, ne mawange cadi, ukutaruda, pio lengna keca kurure,’ tenenkamrure. Ukupkamra deiyoda, ajen kecada, Allah erngepu kurura cadi, ange deikida, ila telep puto weik ngepu kurure. Tonda, ukupmantoda, apopmange keca, er yapi burupra, gege peprepa, angebo er kepmare opkal deiki, ayapi saka bapredi, palepyopda, me gwepra aopkal me kupkamrure. Dinin, taliaipu men me kupkamre. Autopu kupre ngeda, pio telep lengnaipu me kunkamrure. Atep, ‘Ukunkamrure’ tenen, ketenepra deiamrumaipu beredi, me kunkamrure. Taliaida, pio gume.

28 Tonda, tu di dopra betamrum mau, weik jen keca gamna mau, er si periuk ada, agam keca popmengedi, ‘Er tuda, aweik mau di gamkameng’ tenen, ketenepra deiamrum ngeda, copra tamkamrume. Ada, agam keca er tu dopra, ame mau pumbon konum gapmengopda, adipapu aweik amauda copra tamkamrume. Dinin amaupu, periuk mau, telep gat keca, er si tembaga di ketenepra deiamenge pumbon gapmengopda, amauda men copra tamkamruma cadi, atu cap, ayapi cap, amau deiki saka bol bepmau ngeda, ayapi saka aweik tembaga mau deiki dourbenmaryai yumada, kirikra pio telep kupra deipmumdi, me wenenga cap, me cap di, kirikmumdi, pio telep kupra me kunkamrume.

29 Imam-imam neng, sun sal nyapu neng yumada, ayana karepmange keca, pio telep mengne jen keca yumada, sun cap dopra, jena telepe. Dinin, tali neng yumada, akeca pio men jenkamnunge. 30 Dinino, Israel nesala sun mali kupmangedi, ‘Allahdi lyepra telep kweipsetue’ tenen, gam keca doupra yangepa, imam ngebodi popmare gam keca er yapida, ton neitamai di wilipra dopropredi, doupra Allah cap, nimi cap, antamdana tep tenda ati pumbon dinin, Allah er karena tep, Pio Telep Lengna Ati neitamaipu doupra bankamre gam keca tupa akwamre ngeda, bokra men jenkamnunge. Yapi doupra akati pumbon neitamai bere ngeda, agam keca tu tupa akapkamrura cadi, pio men jenkamnunge. Angeda, jena tep gum dinin, ayumada, ukupu dongoprepa, uku bu di jepra gawal dangkamrure.