Lev 7 | XteSC | STEP | Allahdi upepu. “Angeda ukupkamrume,” pepra, nimi mali kupmarepa, angebodi, ‘Uo ne mali kupsi,’ tenenange yuma, daemna cap, yo pununa cap tep, gam keca doupra yana popmengedi, doupra kareryakankamnerum nge tep, ‘Ukunkamrume,’ pepkusene. Ayana ponkamrum gam kecada, Allah er kangeda, ‘Angeda ne mawange cadi, pio telep lengnangepu kurure,’ tenerure.

Leviticus 7

Mali kupmenge nengdi, ‘Uo ne mali kupsa tep, Allahdi ange daepnetue,’ tenenange tep, “Kareryakankamrume,” pepu upu

1 Allahdi upepu. “Angeda ukupkamrume,” pepra, nimi mali kupmarepa, angebodi, ‘Uo ne mali kupsi,’ tenenange yuma, daemna cap, yo pununa cap tep, gam keca doupra yana popmengedi, doupra kareryakankamnerum nge tep, ‘Ukunkamrume,’ pepkusene. Ayana ponkamrum gam kecada, Allah er kangeda, ‘Angeda ne mawange cadi, pio telep lengnangepu kurure,’ tenerure. 2 Mali kupmangepa, ‘Uo, ada ne mali kupsi,’ tenenange, daemna cap, yo pununa cap tep, doupra yana karenkamenge ngeda, men taru gel pala di yakra keteneiamrumai, gam keca popra uku dongonai dipapu bena ponkamrume. Nimidi mali kupmange nge tep, ‘Allahdi lyepra telep kweipsetue’ tenen, gam keca doupra yangedi popra, uku dongona pel dona tep, ‘Angeda, aca dipu ponkamepe’ tenen, men di keteneiamrumai dipapu, acapu bena ponkamrume. Akeca popmumpa, er yapi embere ngeda, imam neng sun deiyo ngebo er dipapu doprapredi, men taru gel pala di yakra keteneiamrumai, ‘Uku sengkamep’ tenen, er si mesba deiyamumnya, er kumun sirik dana-danada, adopropmare yapi di, dopra dingdinkamrure.

3 Tonda, imam neng sun deiyo ngebo er dipapu, agam keca popmangenge, er amu damai meta cap, deiplyu deiki paleramre meta cap, kop cap, er meta yumada, douprapredi, ‘Gam keca popra, uku dongona tep, mesba ketenepra deiyamrum kecada mesba deikipu bena, derinkamrure. 4 Tonda, gel du butene cap, gel du iriramre kop cap, tonda pio dipru telepnge cap, dipru deiki paleramre meta cap, ange ayuma doupra karepmumpa, imam deiyo ngebodi, mesba deiki uku sengkamrura tepa. 5 Ange yumada, gam keca popra uku dongona tep, ketenepra deiyamum keca, er si mesba deiki dipapu, imam ngebodi, ‘Allah Yahweh tep, karepkune,’ tenepra, bena uku dongopredi karenkamrure. Imam ngebodi, ‘Ayana karepne ngeda, mali kupmangepa, ‘Uo, nun mali kupmepu’ tenen, ikin kange doupra tenena ngeda, daemna cap, yo pununa cap tep, ‘Allah kaukepseredi, lyemkamsere’ tenen, Allah Yahweh tep karepkamrure. Imam ngebodi uku dongoprepa, uku bu di ange yuma jepropkamrure.

6 Imam-imam neng, sundi deipmengepa, dadeipdanen, bankameng neng do, sal nyapu do, neng do yumada, ayana karepmange keca, pio telep mengne jen kecada, sun cap dopra, jena telepe. Dinin, tali neng yumada, akeca pio men jenkamnunge. Imam-imam yala nengdipu, akeca jenkamnung dinin, ajen keca dopra bena jenai tep nengeda, yuk taliai di men jenkamnunge. Jenkamengaida, pio telepai, lengnaipu bena jenkamnunge. Taliyai jena gume. Deiyoda, Allah er kangeda, ‘Akeca yumada, ne mawa keca cadi, pio telep lengna keca kurure,’ tenerura tepa.

7 Israel nesala, sun mali kupmange keca tep, ‘Daepseredi, ange yo pununa tep, kaukepseredi, lyepropkamsere’ tenen, gam keca popra karena cap, tonda ange utopu, mali kupmangepa, ‘Uo, nun mali kupmepu’ tenen, ikin kange doupra tenenange yo pununa tep, gam keca popra kareryakankamenge ngeda, utopu kurure. Ada, “Ange-ange yuma ukunkamrume,” peipnetopu, angepu kunkamrume. Apel yumada, urasin tenpu dinin, deiyoda yambul yuk-yuk kurure. Apel dona tep, ‘Ukunkamrume,’ pepra karepsisinge yumada, tenpu kurure. Tonda, mali kupmange ngeda, ‘Allah kau kepseredi lyepra, telep kudinkamser’ tenen, karena tep, gam keca popmangenge yumada, ton ngeda, uku di jenkamrur dinin, ton ngeda, er tu tupa akapkamre ngeda, imam neng sun dopra jenkamenge. Ada, agam keca doupra uku dongopredi, Allah tep karepkamre imam ngebo, er dipu atu akupkamre ngeda, jenkamre.

8 Tonda, apopra yamum yapi kecada, mesba deiki uku dongoramenge ngeda, agam keca er bol yuma peda, Allah er si eremna ati pumbon pel dona deiyo ngebo, Allah tep karepmamum imam ngebo, er dipapu agam keca bol kouptapra dopropkamre. Ada, gam keca karepmengepa, ange doupra uku dongopkamre imam ngebo, er dipapu, abol dopropotue. Angeda, ernge pua. 9 Ange utopu, Allah karena tep, roti jen keca deiyonge, er si tepung do, yakung do, terigu do, utotopu. Tumi-tumi yuma doupra yamumpa, uku bo deiki dinin, er si komfor do, tonda, uku deiki dinin, yangadin keca, er si kuali deiki di deipra, dankamenge nge cap yumada, karepmengepa, Allah er si eremna ati pumbon pel dona deiyo ngebo, imam ngebodi akeca doupra uku dongopkamre. Yambulanun tupa akapkamre ngeda, akeca karepre imam ngebo, er tepapu karenkamrume. Akecada, angebo dipapu dopropredi jenkamre. Yuk tali nengdi men jeptenge. 10 Ange utopu, Allah karena tep kareryakankamenge roti jen keca deiyo ngeda, terigu do, yakung do, tepung do, karepmengepa, yambulanun tupa akapkamre ngeda, Harundi deiamre neng dipu dopropmengedi, jenkamnunge. Ada, embek tupa akapmarenge cap, tonda minyak me di likra tapakra dapmamumnge cap, minyak me men likra deipmamumnge cap, sundipu dopropkamnunge. Ange yumada, Allah si eremna ati pumbon talepra pel dona deiyo neng, ada Harun cap, erdi deiprepa, deipdanen bankameng neng yuma capda, sun aneng dipu, ange utopu kupra, bokra jenkamnunge.

‘Allahdi telep kupra deipserepa, er cap telep kupra kikiman kunkamep’ tenen, kareryakankamenge nge tep, pepu upu

11 Israel nesaladi mali kupmang dinin, ‘Allahdi telep kupra deipserepa, er cap telep kupra kikiman kunkamep’ tenen, kareryankamengenge tep, “Ukunkamarume,” pepkusene. Ada, sun cap, Allah cap telep kupra deipredi, antamdina tep nengeda, “Angepu ukupra-ukupra kunkamrume,” peipnetopu kupmumdi, Allah Yahweh er si eremna tep, kareryakankamrume. 12 Ukupmantoda, tenpu ngebodi, ‘Allahdi telep kupra deipnerepa, er cap telep kupra kikiman kunkamnem’ tenen, gam keca popra kareryankamre dinin, ton cap tenepredi, ‘Allah tep, telepe pena tep, karen keca yuknge ton tapakra karenkamne,’ tenepyopda, erdi yuk karen keca ton tapakra karenkamre. Tenpu ngeda, roti kwaneng nena gumnge kareryakankamre. Angeda minyak me cap tapakra dana gumnge, kareryakankamre. Tonda, akeca doupra kareryakankamrenge ton, roti kwaneng dinin, pio yambul kue urasin utopunge peda, kareryankamre. Angeda, tepung cap tapakra deipmengedi, minyak me mokon di likra deipmangedi, dapmangepa, pala weik kuprenge kareryankamre. Tonda tepung pio telep kupra taikmenge nge cap, minyak me mokon di likra deipmengedi, dapmange nge, er si kue meteknge tapakra deipmangedi, dapmange nge, yambulnge cap doupra kareryankamre.

13 Angeboda, ‘Allahdi telep kupra deipnerepa, er cap telep kupra kikiman kunkamnem’ tenen, gam keca popra kareryankamre dinin, er dipu, ‘Tonda, Allah tep telepe pena tep, yuk keca cap tapakra karepkune,’ tenepyopda, erdi Allah tep karepkamrenge pepkusene. Ada, yuknge roti nena deiyo keca deiki di dapmange nge ton, er si kue, adipapu doupra kareryankamre. Akecada, angebodi, ‘Allah cap, ne cap, telep kupra kikiman kunkamnem’ tenen, karen keca cap, ‘Telepe’ penange cap, ataru dipapu tapakra, Allah tep kareryankamre. 14 Ware ngebo do yuma, ‘Allah tep karenkamne,’ tenepyopda, aupu neitamai di lap pepmanu karen keca, ada roti kwaneng yala-yala yuma, neitamai di bokrapredi, aroti kwaneng yala yuma, tenpu-tenpu dopra, ton adipapu Allah Yahweh tep, kareryakankamre. Konum karepre pangeda, akarepmau ngeda, atumi pel dopre imam ngebo dipapu dopropkamre. Ada, Allah er si eremna tep, sun mali kupmamumnge tep, gam keca popra yamumpa, imam ngebo yapi doprapredi, uku dongona tep, gel pala di yakra ketenepra deiyamengai, er si mesba pirman dana-dana yuma gege peprepa, yapi paleramre. Aimam ngebo, er dipu aroti jen kwaneng keca dopra jenkamrure. Ada, sun nimi cap, Allah antamdana tep, roti kwaneng jen keca yala-yala yuma dinin, tenpu-tenpu doupra karenkamrumnge, er dipapu dopropkamre. Akecada erngepu kupkamrure.

15 ‘Allah cap, nun cap, telep kupra kikiman kunkamep’ tenen, “Telepe,” peprap, gam keca doupra karerameng ngeda, konum popmengedi, imam deiyo ngebo tep karepmengepa, Allah tep karenange bokra, uku konum dongopyopda, ayapi keca tu yambul tupa akapkamre ngeda, atumi dipapu imam ngebodi jenkamrure. Ayapi kecada, akarepmenge tumi dipapu, er tu yuma jedonkamnunge. ‘Mawa deipkupe,’ men tenenkamenge. Deipmangedi mapmangnyanen, ipna keprepa, dopra men jenkamenge. 16 Dinino, ukupmantoda, nimi tenpu-tenpu nengdi, sun mali kun keca kau kemna tep gum dinin, sun pe kange dipapu, “Nun nai Allah, kan tep ukupra karepkukene,” pepra pedina upu pepmengedi, Allah karen keca doupra kareryankameng ngeda, agam keca doupra yana popmengedi, Allah tep konum karepmengopda, galemna ton tupa gawal akapkamre ngeda, imam ngebodi atumi jenkamre. Tonda, ambutumito tumi deiki di jena telepe pua. Ange utopu, sun mali kun keca tep gum dinin, sun pe kange dipapu, ‘Allah tep telep karen keca karepkupe,’ tenepmengedi, tali kareyankamenge keca yuma tep nengeda, ukupkamenge. Ada, gam keca popmengedi, imam ngebo karepmengopda, atumi dipapu, imam ngebodi Allah tep karen keca doupra mesba deiki uku dongonkamre, dinino, tu keca galemna ton tupa akapkamre ngeda, atumi neitamai di doupra jenkamre. Tonda, imam ngebodi agam keca tu konum jepyopda, galemna ton tupa akapkamre ngeda doupra, dadeipmaryanen, mapmarya bereng yan taru, ipna kepre pangeda, erdi akeca doupra, jena peda telepe pua. Ambutumito tumi deiki di jena telepe pua.

17 Dinino, apel dona tep, popmare bisam tu galemna doupra, imam ngebodi akeca damapmaredi, jenmaryanen, deipmarepa, komuni weneri tumi konum kepre pangeda, abisam tu galemna tupa akapmare ngeda, adipapu dopra uku sekredi, dongopkamrure. Uku di jepra gawal dankamrure. Tumi weneri akapkamre ngeda, sun imam-imam neng peda pio men jenkamnunge.

18 Tonda, ange moupra tenenkamrume. Uwe weneri tumi konum kuprepapu, agam keca galemna tu dopra jena pio gume. Tali lupra akeca jepmumnyopda, ‘Ne mali kun kecada, Allahdi daepkamnere’ tenen, agam keca karena deiyo ngebo, er mali kupmau keca tep, Allahdi kaukepredi, telep kupra men derinkamre. Tonda, agam keca karepmau dinin, tumi weneri deiki jepmengopda, karepmaua peda, Allahdi akarepmau keca men tenepredi, kange men derinkamre. Atep, tumi weneri deiki tupa akapkamre bisam galemna tuda, doupra pio men jenkamnunge. Ada meme. Allahdi akeca tep, ‘Telepe,’ tenepra men dopropkamre. ‘Angeda, pio malipu kurure,’ tenenkamrure. Atep, agam keca karepmaua deiyo ngebo tep, Allahdi er mali kupmau keca, tek sisi daepredi, men kaukepkamre. Deiyoda, Allahdi, ‘Akecada konum mali kupmare,’ tenerura tep, tamrure. Atep nengeda, Allahdi, ‘Angeda jena meme,’ peprenge doupra, tali lupra jepre ngeboda, ajepmarenge wenemna tep, ikin keca er pe angebo deikipu kuprepa, doronkamre. Allahdi akeca jepre ngebo tep wenepkamre ja.

19 Allah karena tep, domba do, sapi do, tu keca yumada, agam keca popmamumdi, galemna tu dopra deipmamumpane, yuk mali keca di adeiki bol beprepa, Allah er kangeda, ‘Atu kecada konum mali kurure,’ tenenkamre. Atep, akeca konum mali kupre pangeda, adipu uku dongopmumpa, uku di jepra gawal dangkamrure. Tonda, mali keca di bol bepmaryaida, dopra men jenkamrume. Angeda pio meme. Sun mali kurumu keca tep, ‘Allahdi daepseredi, telep kupra deipserepa, er damaipu kunkamepe’ tenen, doupra yanmangepa, popmamum gam keca, er tuda, mali keca men talenge nengpu, sundi tu keca dopra jena telepe pua. Dinino, ware neng do yuma, Allahdi, ‘Angeda mali keca,’ tenerurnge, bol bepmengopda, Allah tep karepmange gam keca tu tupa akapkamre ngeda, pio men jeptenge. Angeda meme.

20 Allahdi, “Anengda mali keca bepmangua cadi, sundi, ‘Nun cap, Allah cap telep kupra kikiman kunkamep’ tenen, ne tep karenenung keca ton pio men jeptenge,” pepra konum deipmaser dinin, ukupmantoda, ware neng do yuma, sundi mali keca talepmangepapu, tonda sundi yuk mali keca bepmengepa, tupa ton mali kunmangepapu, Allah er tep karenung bisam tu dopra jepre ngeboda, angebo tep, Allahdi wenepkamre ja. Deiyoda, akecada, tali dakungedi, mali keca bepmenge nesalada, Allah er keca men doupra jeptenge. Akeca kupmenge nesalada, doupra Israel nesala kunungai tapra, wiliprapmumdi, angebo doupra, tali bura tarapu enepra dokotepkamrume. Israel nesala cap, kikiman men kunkamenge. Allahdi angebo tep weneprepa, depkamre ja.

21 Ange utopu, ukupmantoda, ware ngebo do yuma, Allahdi, “Angeda talena meme, angeda pio mali keca cadi, angeda ne songe, akecada bemna pio meme,” pepra deipseunge, sundi amali keca bol bepmange dipapu, sundi konum mali kudinunge. Ada, nimidi mali keca deiptamnung nge do, Allahdi, ‘Abura tara kure gam kecada malinge kurure,’ peipunge do, Allahdi, ‘Akecada ne pio songe,’ peipu keca do, akeca utopu keca yuma taleramenge neng cap, bepmange neng cap, Allah er karena tep, kareamenge jen keca yumada, pio men jeptenge. Ada, nimidi, ‘Allah cap, nun cap telep kupra kikiman kunkamep’ tenen, Allah tep kareryakanung kecada, Allah Yahweh erngepu kurura cadi, pio lengna keca kurure. Atep, mali mem keca talepmenge nesalada, Allah Yahweh tep kareramenge gam keca tu pio men jeptenge. Dinino, balila di do, mankau di do, tali lupra ato keca jepmengopda, Israel nesala cap, kikiman men kunkamenge. Aneng doupra, bura tara enepra dokotepkamrume. Allahdi angebo weneprepa, depkamre ja.

Allahdi, Musa tep lap pepu.

Allahdi, “Ware gam kure keca do yuma, sun nong neitamai kure meta yumada, pio men jenkamrume,” pepu upu

22 Uda, Allah Yahwehdi, Musa tep, “Apekenetopu, angepu ukupra-ukupra kunkamrume,” pepra deiyamu. 23 Aupu yumada, sun Israel yala nesala tep, “Ukunkamrume,” pepra deipu. Allahdi Musa deiki pepra deipu upuda ake.

Sun Israel yala nesalada, ware gam kure keca do yuma, sapi bisam do, domba do, kambing do, agam keca neitamai kure metada, pio men jenkamrume. 24 Tonda, tali kuramre gam keca yuma, er pedi depmare ngeda, er meta men jenkamrum dinin, ameta dopra, yuk pel dona tep nengeda, telepe pua. Ange utopu, ware yala gam keca do yuma, tali bura tara gam kure yu kecadi, nimi peiramenge gam keca yana poptapra jenmaredi, sesekra tapmare metada, sun Israel yala nesaladi men jenkamrume. Dinino, ameta dopra yuk pel dona tep nengeda, sundi, ‘Angedi yuk pel ton kupkupe,’ tenepmumtopu kunkamnunge. Ange telep dinin, meta yala-yala yumada jena meme.

25 Angeda tali tep men pepsene. Deiyoda, ware ngebodi do yuma, Allah Yahweh tep, gam keca popra yana karepmangepa, imam nengdi uku dongonkameng bisam yala-yala yumada, agam keca er meta dopra jena pio meme. Ameta jere ngeboda, er angeboda Allah Yahwehdi wenepkamre. Atep, ameta jere ngeboda, Israel nesala kununga neitamai di, men kunkamrure. Angebo er wenemna tep, er dopra Israel nesala kunungai di, bura tara enepra dokotepkamrume. Allahdi angebo tep wenepkamre ja. Wenepre pangeda, angebo depkamre ja.

26 Tonda, sun Israel yala nesala, kunkamengai yumada, dan mutu do yumada, sundi gam keca yala-yala yuma, ma do, yuk gam keca do, popmum dingeda, er yapida, dopra men jenkamrume. Tonda, yuk yala keca yuma peda, popmum dingeda, er yapida, doropra men jenkamrume. 27 Angeda tali tep men pepsene. Ada ware ngebo do, “Yapi keca yala-yala yuma jena meme. Angepu ukupra-ukupra kunkamrume,” pepra deipmasen nge yaniptapredi, ange men kupre ngeboda, Allah Yahwehdi, ‘Angebo, ne tara ngebo kurure,’ men tenenkamre. Israel nesala kununga neitamaida, men kunkamrure. Angeboda, er wenemna tep, er dopra Israel nesala kunungai di, bura tara enepra dokotepkamrume. Allahdi angebo tep wenepkamre ja. Wenepre pangeda, angebo depkamre ja.

Allah cap, nimi cap antamdina tep, er si eremna ati pumbon pel donkameng imam-imam nengdi dopropkameng keca tep, pepu upu

28 Allah Yahwehdi, Musa tep, “Ange-ange yuma, ukupra kunkamrume,” pepra deipu. Allah Yahwehdi peipu upuda ake. 29 Ada, “Kandi sun Israel yala nesala yuma tep, aupu lap perbenkurume,” pepra deipu.

Ware ngebo do, er mali kupmaredi, ‘Uo, neda mali kupmana tep, yapi keca doupra benepa, telep kupra deipnengepa, Allah cap, ne cap antapra, teleppu kikiman kunkamneme,’ tenepredi, gam keca ton doupra yakankamre. Agam kecada, adipapu sundi neitamai di wilipra, ‘Angeda, Allah Yahweh, er si erepkamapnge’ tenen, ketenepra derinkamnerure. 30 Ada, er mali kupmare ngebo dipapu, ‘Ne mali kupmanue,’ tenepredi, er pe buru dipapu, yapi keca doupra, ne Allah tep kareryakankamnerure. Karepyopda, ne si eremna tep, imam ngebodi, akeca dopra uku dongopkamre. Tonda, ayana popra karepmarenge bisam taram cap, bisam meta capda, imam ngebodi doprapredi, ne Allah Yahweh ne din tarapu, “Telepe,” pena tep, imam ngebodi er buru deiki deipra, akeca butene erepra bena doupredi, ne karena tep, peterem donkamnerure. 31 Ange konum kupre pangeda, ne si eremna ati pumbon pel dona tep neng, imam neng sun ila deiyo ngebo, er tep karepyopda, aimam ngebo, er dipapu, abisam meta doprapredi, Allah er karena tep, gam keca uku dongona tep, gel pala yakra ketenepra deiamengai, er si mesba deiki dipapu, uku dongonkamrure. Dinino, abisam er taram tuda, Harun cap, erdi deiamre neng, sun imam neng, sun pe jena tep ketenepra derinkamre. Sun dipapu agam keca taram tu doropra jenkamnunge.

32 Tonda, ‘Allah cap, nun cap, telep kupra kikiman kunkamep’ tenen, karenkameng keca yumada, galepmengedi, abisam yan, er kail tu dumsisi tara ngeda, Allah er si eremna ati pumbon pel dona deiyo ngebo, imam tep, ‘Angeda ernge pua’ tenen, ketenepra yuk derinkamrume. 33 Ada, Harun erdi deiamre neng, Allah er si eremna ati pumbon pel dona neng neitamai dinin, ‘Allah cap, nun cap, telep kupra kikimanpu kunkamep’ tenen, mali kupmenge nge lyepra, telep kudina tep, duyanmange keca, popmangedi, aimam ngebo tep karepmengopda, angebodi abisam yapi cap, meta cap dopropredi, ne Allah karena tep, uku dongopkamre ngebo, er dipapu abisam yan, kail tu dumsisi tarange, er tuda, dopropkamrure. Ayan tuda, ernge pua cadi, er tep karerbankamrume.

34 Uda, ada tali tep men pepsene. Deiyoda, apopmange bisam dumsisi tara yan tu cap, bisam taram cap, ne Allah Yahweh ne si eremna tep, ne urasin din tara bena erepra doupredi, ne karena tep, peteremdonkamnerure. Ukupre taruda, ‘Angeda Allah Yahweh ernge pua’ tenen, yuk ketenepra derinkamrure. Ada, angeda ne tep karenkamnerure. Konum karepneryopda, nedi, ‘Angeda, sun imam pel don neng, sun nge,’ tenepra, nedi sun tep karenkamne. Atep, sundi, ‘Allah cap, nun cap telep kupra kikiman kunkamep’ tenen, karenkamnerum gam kecada, galepmengepa, sun imam nengdi, apopmange bisam dumsisi tara yan tu cap, bisam taram cap, dopropkamnunge. Ada, Harun cap, erdi deiamre neng, sun imam-imam neng sun nge tep, ne si eremna ati pumbon neitamai talepra pel donkameng neng bulupra deipmengedi, yana karenkamrume. Angeda, atumi di dipra doryankamre taru yumada, pio tep angepu kupbankamrume.

35 Ange lap pepmasen ngeda, ne Allah Yahweh tep, yana karepmangepa, imam nengdi uku dongonkameng keca dinin, daneitamai di, abisam yan dumsisi tarange cap, taram cap wilipmengedi, sundi akeca butene jenkameng nengda, Harun cap, erdi deiamre neng cap tep, yana karepmumpa, sun aneng dipapu dopra jenkamnunge. Ada, ‘Sun anengdi Allah er si eremna ati pumbon pel donkameng’ tenen, aneng wepra deiprum taru di dipra, dorkunkamre taru yuma peda, sunpu alap pepmasen keca dopra jenkamnunge. 36 Sun Israel deiyo nengda, ‘Anengdi, Allah tep karenkamep keca yuma doupra, nun pununa tep, Allah Yahweh karenkamnunge,’ tenepra, sundi aneng wepra deiamrum tumi deiki di, ne Allahdi lap pepra deipsisi. Ada, “Aimam neng, sun pel donkamenge nge kunumna tep, sun Israel nesaladi karenkamrum kecada, ake,” pepra deipsisi. Atep, ataru di dipra dorkunkamre taru yuma peda, apepmasen keca doupra sun imam-imam neng sun jena tep, ukupra karenkamrume. Apepra deipsen ngeda, sun Israel yala nesaladi moupra talepmumdi, bouna di pio tep ukupbankamrume. Angetopu, sundi deiprumupa, dadeipdanen bankameng Israel nesala peda, ange utopu sun imam neng tep karepbankamnunge.

37 Uda, ne Allahdi lap pepmasen upu yumada, ake. Sun Israel nesaladi mali kupmengedi, ‘Uo, nun mali kupe keca yuma daemna cap, pununa cap tep nengeda, Allahdi kaukepseredi, lyepropkamser’ tenen, gam keca popra, uku dongoryakana tepnge cap, tonda, roti kwaneng jen keca deiyonge, tepung cap, terigu cap, yakung cap dapra ketenemdinange cap, tonda, Israel nesaladi mali kupmange nge kunumna cap, daemna cap tep, tonda, mali kupmengedi, ‘Uo nun mali kupmape,’ tenepmengedi, ikin kange dounkamenge nge kunumna cap tep, tonda, ne Allah si eremna ati pumbon pel talepra dona tep, nimi wepra deipkamrum taru doupra, kareryakanange cap, tonda, Israel nesala mali kupmange nge, ‘Telep kupra deipserepa, nun cap Allah cap, telepepu kikiman kunkamepe’ tenen, gam keca popmengedi, doupra kareryankamrumnge cap tep, pel dopra kunkamrumnge yumada, akonum lap pepra deipsene. Ange yuma tep nengeda, apeipsisi ngepu, “Ukupra-ukupra kunkamrume,” pepra deipsisitopu kupra, apelpu pio dopbankamrume.

38 Aupu yumada, Allah Yahwehdi Musa tep, Sinai mutu deiki di, “Ange yumada, ukupra-ukupra kunkamrume,” pepra upu peipu. Apeipu upu yumada, Musadi sun Israel nesala gekenai yana lap pepu. Apeipunge yumada, me pio gum cadi, nimi men kuramyai, amutu si perami ngeda, Padan Gurun Sinai mutu perami. Tonda, Allahdi apeipu upu yumada, Israel nesaladi gekepi dingeda, ataru di dipra, dorkunkamre taru yuma tep, akecapu talepra pel dopbarami. Allahdi sun Israel yala nesala yuma tep, “Apeipmasen keca yuma gekeprumudi, ne Allah Yahweh, ne si eremna cap, sun mali kurumu keca pununa cap, tonda ne karena cap tep nengeda, gam keca popra pio tep kareryakankamnerume,” pepra deipu.