Leviticus 8

Musadi, ‘Allah cap, nun cap antamdina pel donkamseng’ tenen, Harun cap, er nyapu cap, wepra deipua tep upu

1Allah Yahwehdi, Musa tep upepu.

2Kandi, Harun cap, er nyapu cap, sun yuma tep kongpepkurume. Kongpepmempa, sun yakange taruda, kandi sun imam neng kenengkameng lenan opkal cap, nimi deiyo neng wepra, deipmengedi, sun giso deiki dikra derirameng minyak me cap, ketenepkamrume. Tonda, sun awepra deipkamrum neng, sun mali kun keca ‘Allah Yahwehdi kaukepra daepkamre’ tenena tep, jem sapi bisam tenpu cap, tonda jem domba bisam butene cap, tonda keranjang alen tenpu, nena gum roti kwaneng dapra kipmange keranjang alen deipmangenge cap, “Ange yumada, doupra denkamrume,” pepmempa, Israel nengdi ange yuma doupra yankununge. 3Tonda, kandi sun ne mawa nesala sun Israel yala nesala yuma tep, “Bulupra yankurume,” pepmempa, ne Allah cap, nimi cap, antamdana tep ati, keana lyom opkal bol di, dodina ati doaminge, akati buplan damaipu bupra wengyankununge. Allahdi Musa tep pepu.

4Upepu pangeda, Allah Yahwehdi, Musa tep, “Angeda ukupra kunkamrume, angeda pio men kunkamrume,” pepra, deipmaunge yumada, apepmautopu Musadi kupu. Ukupu pangeda, Israel nesala yuma bulupra, Allah si eremna tep dodin tenda ati damai yana weki. Akati buplan damai konum bupra weki taruda, sun Israel nesala yuma akati damai wekra dinmaiyaidi, Musada konum pel dopu. 5Ukupu dingeda, Musadi, sun awekmai Israel nesala yuma tep, upepu. “Allah Yahwehdi, ne tep, ‘Harun cap, erdi deiamu nyapu cap tep, angeda ukunkamrume, ukupra pel donkamrume, angeda pio men kunkamrume,’ peipneutopu kupra, pel dopkune,” pepu. 6Ukupra pepu dingeda, Musadi, Harun cap, er nyapu cap, sun yuma tep, “Acei apu yankurume. Ayamum dingeda, sun yan cap, buru cap, nong yuma capda, me kweipkusene,” pepu. Musadi, apeputopu yaipa, Musadi aneng yuma me kupra deipu.

7Ange konum kupyopda, Musadi Harun tep nengeda, imam neng sun deiyo neng kenengameng opkal, nong damai kenengameng ngeda, kepra deipudi, aopkal deiki di, yuk imam neng kenengameng lyom opkal, er sida juba cap keipu. Juba konum kenekeipu opkal deiki dinin, er deiyoteng derin keca, lyom opkal di keteneiamenge deiyo teng, er sida ikat pinggang ton, kepra deipu. Ukupu dingeda, ‘Allahdi lap pepserepa, nun kunkamep keca kael kepkup’ tenen, dirameng keca, er si Efod, akeca doupra, Harun er taram damaipu kepra, tapu di darapdongopu. Efod opkal kepnedi, daramdongona tep, ila kael nengdi boun opkal di wirami lyom opkal, Harun er deiyo damai getepra darapdongopu. 8Ukupu dingeda, Harun er taram damai deipra kepu opkal, Efod deikida, kunumna weik gel butene, sun sida, Urim gel cap, tonda Tumim gel cap di dopra, aopkal deiki bena palepra deipu. Ada, ‘Allahdi lap pepserepa, nun kunkamep keca kael kepkup’ tenen, urasin telep gel butene diraminge tep pepne.

9Tonda, Harun er giso kemna tep geten lyom opkal, er si serban getepra deipu. Aserban deikida, kunumna weik gat keca, er si emas di, urasin telep kupra petupra deiaminge bena kepra deipu. Akecada, er si hiasan emas dinin, er deiyoda, ‘Akeca kenekmar ngeboda, Allah er mawange kurure,’ tenen, kenengami. Tonda, ange ukupra kepra deipka deiki di, ‘Harunda, Allah Yahweh er keana ati pumbon pel dona neng, sun deiyo ngebo kunkamre’ tenen, peten kemna tep, keteneipu. Ange yumada, Allahdi Musa tep, “Ukupra pel dopkamrume,” peipmautopu, apel dopu. 10Tonda, ange yuma konum kupu dingeda, Allah er keana tenda opkal di dodin ati, ‘Atenda bol atida, Allah erngepu pio kunkamre. Tonda, imam nengdi, akati pumbonpu pel donkamenga deiki di, Allah cap, nun nimi cap antapra telep kupra kikiman kunkamep’ tenen, Musadi, minyak me douprapudi, er buri di yambulanun bupra, akati opkal deiki cap, akati pumbon ketenepra deiami keca yuma cap, adeiki likra deipu. Tonda, gege pepupa, akeca yuma deiki dourbena palepu.

11Tonda, Musadi minyak me ton yambulpu dopra, yapi keca popra uku dongona tep, ketenepra deiami keca, er si mesba cap, mesba damai pel don keca, alat-alat yuma cap, ‘Sun buri cap, yan cap me kupkameng’ tenen, ketenepra deiami me mau cap, ame mokon derin keca, er akeca deiki deiamipa, kwamu keca capda, minyak me doprapudi, ue yoneitam bari deiki di bena, gege pepupa, akeca yuma deiki dorbena palepu. Ange kupa deiki di, ada, ‘Allah Yahweh er ngepu,’ tenenkamenga tep, peten kepra deipu. 12Ange yuma apel konum kupu dingeda, Musadi, Harun wepra deipudi, nimi deiyo neng wepra deipnedi, giso deiki dikra derirameng minyak me yambulanun ton, Harun er giso deiki dikra deipu. Akupunge deiyoda, ada, ‘Harunda, Allah er si eremna ati pumbon, pel dona deiyo ngebo kunkamre. Erda mali kun keca yuma taprapredi, erda teleppu kunkamre’ tenen, minyak me yambula di, Harun er giso deiki dikra deipu.

13Musadi Harun tep, konum pel dopra seng pepkopda, Harun er nyapu yuma tep, “Ne damai yankurume,” pepupa, sun yuma bulupra yai pangeda, nong damai kenengami lyom opkal, kemeja opkal kenekra deipudi, sun deiyo teng derina tep, ikat pinggang ton gerekra deipu. Tonda, sun giso getena tep nengeda, lyom opkal ton, er sida serban di getepra deipu. Ange yuma pel dopu ngeda, ada Allah Yahwehdi Musa tep, “Angeda, ukupra pel dopkamrume,” peiputopu kupra pel dopu. 14Ange yuma konum pel dopra, gawal daku dingeda, Musadi, ‘Harun cap, er nyapu cap, sun mali kurami kecada, Allahdi kaukepredi, daepkamre’ tenen, jem sapi bisam tenpu doupra yau. Ayana deipu sapi bisam deiki di, Harun cap er nyapu cap, sun buruda asapi bisam, er giso deiki depi. Ada, ‘Nun mali kun keca, asapi er nong deiki deipmepepa, nun pununa tep, popkamep’ tenen, er giso deiki sun buri deipi.

15Ukupu dingeda, Musadi asapi bisam popu. Popupa, aembau yapida dopra, gam keca popra, uku dongona tep mesba dopra ketenepra deiamyai, kumun sirik dana-dana di, takke beleramre keca utopu kupra deiamyai deikida, er buru du di, ayapi me buruprapudi, atakke utopu keca deiki bena, likra deipembeu. Ukupka deiyoda, ‘Amesba yumada, Allah Yahweh ernge pua’ tenen, mengne kuprapudi, telep kweipu. Asapi bisam popmaunge tupa akapu yapi douprapudi, amesba damai dinin, deiyo tara tu deiki dingdongopra deipembeu. Ukupka deiki di, amesba tep nengeda, ‘Allah erngepu kunkamrure. Tonda, amesba tep mali kun keca akwapmare ngeda, Allahdi daepredi, telep kweipkamrur’ tenen, amali kun keca yuma pununa cap, gum kupra derina cap, apel dopka deiki di, telep kweipu. 16Ukupu popu sapi bisamda, kop telepnge deiplyu iriramre geleng-gelenga cap, gel du butene cap, gel du iriramre kop cap, dipruai paleramre meta cap yumada, Musadi doropra dubeudi, Allah karena tep uku dongorameng keca, er si mesba deiki bena uku dongopupa, ukudi jepropu.

17Dinin, asapi bisam tu yuma cap, er bol cap, er deiplyu neitamai kuramrenge wilipra deipmau nge cap, tonda deiplyu sirik cap yumada, doprapudi, Allah si eremna ati bura tarapu bena, Israel nesala kuramyai bura tara utopu bena, uku sekrapudi, akeca yuma doupra, uku dongopu. Ukupupa uku bu di jepropu. Ada, Allah Yahwehdi, Musa tep, “Ukupra ukunkamrume,” peiamutopu kupra, apel dopu. 18Ange konum pel dopu dingeda, gam keca popra uku dongona tep nengeda, Musadi jem domba bisam jemnge doupra yau. Adoupra yau domba bisam, er giso deikida, Harun cap, er nyapu cap, sun buruda, ajem domba bisam er giso deiki deipi. Ada, ‘Allahdi, nun mali kun keca tep, wenepra popsetu dinin, nun pununa tep, ajem domba popmepepa, Allahdi nun mali kun keca yuma kaukepseredi, lyepra telep kweipkamser’ tenen, kupi.

19Harun cap, er nyapu cap, adomba er giso deiki sun buri konum deipyopda, Musadi adomba bisam dopra popu. Popupa, er yapi embeu ngeda doprapudi, yapi keca popra, uku dongona tep, mesba deiki cap, amesba er kumun damaida, dumbari ketenepra deiamyai sirik dana-danada, ayapi di bena dikra deipembeu. 20Ukupu dingeda, adomba bisamda, sekra atara-atara yuk-yuk wilipudi, ketenepra deipu. Ukupu dingeda, adomba bisam er giso cap, er nong sekra deipmaunge cap, er meta yuma cap yumada, Musadi dopra uku dongopu. 21Dinino, ajem domba er nong neitamai kuramre keca cap, tonda yan cap yumada, sekra doropu. Ukupudi, me kupra yuk ketenepra deipu. Ukupudi, yuknge yumada, uku dongona tep, mesba dopra ketenepra deiamyaipu, dubeudi bena, uku dongopu. Auku dongopu ngeda, ‘Uku jepredi siltong telepnge weleprepa Allah Yahweh gekepredi, kange telep kunkamnere’ tenen, tonda, ‘Allah Yahweh karepkune’ tenen, uku dongopu. Apel dopunge yumada, Allah Yahwehdi, Musa tep, “Ukupra pel donkamrume,” pepra, lap peiamutopu kupu.

22Ange utopu, Musadi jem domba bisam butenenge, tupa tapmaunge tenpu ton dopra yau. Ada, ‘Anengdi, Allah karena pel donkamseng’ tenen, awepra deipu imam neng, sun mali kun keca daepra, telep kupra derina tep, ajem domba bisam butene ngeda duyau. Adoupra yau dingeda, Harun cap, er nyapu capdi, ‘Nun mali kun keca tep, Allahdi wenepra popsetu dinin, nun pununa tep, abisam popkupe’ tenen, sun buru yuma dopra, ajem domba bisam giso deiki deipi. 23Sun buru yuma dopra, adomba bisam giso deiki deipyopda, Musadi adomba bisam popu. Popupa, er yapi embau ngeda, yambulanunpu ton dopropudi, Harun er dumsisi amul dam dutara deiki bena likra deipu. Tonda, er buru du pamunge dumsisi tarange cap, yan du pamunge dumsisi tarange cap bena, likra deipu.

24Tonda, Musa dipapu, Harun er nyapu tep, sun yuma peda, “Ne damai yankurume,” pepupa, yai pangeda, sun dumsisi amul deiki cap, tonda buru du pamunge dumsisi tarange cap, yan du pamunge dumsisi tara nge cap deikida, ayapi gawal tupa akapmaunge, yambulanun doprapudi, likra deipu. Ukupu dinin, ayapi yambul weika di tupa akapu ngeda, doroprapudi, yapi keca, popra uku dongona tep, amesba dopra deiamyai kumum dam dumbari sirik dana-dana bena dikra deipu. 25Adomba bisam er kop pio telepaida, deiplyu deiki irina tep paleramre geleng-gelenga kop cap, amu damai meta cap, tonda dipruai paleramre meta cap, gel du damai paleramre kop cap, gel bu butene cap, tonda, yan dumsisi tarange, kail tu cap yumada, Musadi dopropu.

26Tonda, Allah Yahweh tep karerami roti kwaneng nena gumnge, konum daprapidi, kipra deiami keranjangda, ‘Allah dinkamre’ tenen, Allah er si eremna ati pumbon deiamyai di dopra, Musadi aroti kwaneng nena gumnge dopropudi keteneipu. Dopropu dingeda, yuk roti kwaneng minyak me di likra dapmainge, er si kue cap, tonda yambul roti kwaneng cap, pukra doropu. Ukupu dingeda, domba bisam yan dumsisi tarange kail tu cap, meta yuma deipmaunge cap, bena deipmauaipu, aroti kwaneng yala-yala yuma doupra, bena tapakra deipu. 27Ange yumada, Musadi dopra, Harun cap, er nyapu cap, sun buru tang deiki bena deipu. Dopra bena deipupa, sun aneng yumadi, Allah Yahweh er urasin damai tarapu, erepra doupidi, Allah tep gisal dopidi, “Telepe,” pepra, bena peterepi. Akupinge deiyoda, ‘Allah Yahweh diseredi, er tep akarepkup kecada, erepra doupmepedi, peterepmepenge yumada, Allah Yahwehdi, epredi ange yuma tep, kange deipkamser’ tenen, kupi.

28Sun imam nengdi, aroti kwaneng tep konum bena, “Telepe,” pepra peterepi pangeda, Musadi adoupmai jen keca yumada, sun buru deiki di tamupra doropu. Doropu dingeda, uku dongona tep, er si mesba ketenepra dopra deiamyaipu, duyaudi, uku dongopu. Akeca yumada, jem domba arup taru uku dongopmaunge deiki deipupa, uku di jepropu. Apel dopunge deiyo yumada, ‘Imam nengdi mambul pel donkamseng’ tenen, nimi wepra derina pelda, telep kudina pel dona tep, akeca yuma tapakrapudi, uku dongopu. Ukupupa, uku jepropudi, siltong telepnge welepupa, Allah Yahweh gekepudi, er kange deipu. 29Tonda, Musadi ajem domba bisam taram damai tu doprapudi, Allah Yahweh er urasin damai tara bena, erepra doupudi, bena Allah Yahweh tep peterepudi, “Telepe,” pepu. Angeda, Allahdi Musa tep, ‘Ajem domba bisam taram damai tu yumada, kan dipapu dopropkamrume,” pepka tep, Musadi ange dopropudi, Allah tep karepu. Apel dopunge deiyo yumada, ‘Imam yala neng pel donkamseng’ tenen, wepra derina taru tep, pel dopu. Ange pel dopunge yumada, Allah Yahwehdi, Musa tep, Ukunkamrume,” peiamutopu bena, pel dopu.

30Ange yuma konum kupropu dingeda, Musadi minyak me lingdina tep, yambulanun ton wilipra doropu. Tonda, yapi keca popra, uku dongona tep mesba deiki ketenepra deipmaunge, yapi burupra gege peprapupa, dourbena palepmaunge di, yapi yambulanun ton wilipra doropu. Doropu dingeda, Harun cap, er nyapu cap, sun kenekmai opkal deikida, ayapi di gege pepra deipu. Angetopu, Harundi deiamu neng yuma capda, sun nong cap, sun opkal deiki capda, ayapi gege pepra deipu. Apel dopka deiyoda, ‘Allah Yahweh er mawangepu kunkamenge. Sundi er pel donkamenga cadi, sunda imam neng kunkamenge. Sun Harun cap, erdi deiamu neng cap, sun kenekmang opkal cap, ange yuma peda, pio telep kupkamre’ tenen, wepra deipudi, telep kweipu.

31Ukupu dingeda, Musadi Harun cap, er nyapu cap tep, aupu pepu.

Sunda ajem domba bisam tuda, tupa akapmarenge neitamai di, tu dopropmumdi, Allah cap, nun nimi cap, antamdana tep atida, opkal bol di keana dodin tenda ati, er buplan damaipu dubemumdi, atu keca dapra jepkurume. Tonda, imam neng wepra derina tep, ketenepmai roti kwanengda, keranjang alen pumbon kipra deipmainge cap, doroprapmumdi, ange yumada, acei adipapu tapakra jepkurume,” pepu. Ada, Allah Yahwehdi, Musa tep, ‘Harun cap, erdi deiamre neng cap, akeca ukupra jenkamnunge,’ peiputopu, Musadi lap peipupa, Harun cap, er nyapu cap gekepidi utopu kupi. 32Tonda, Allahdi peiputopu, Musadi Harun cap, er nyapu cap tep, lap peipu. Ada, “Adomba bisam tu cap, roti kwaneng cap, jenmamumnge dinin, tupa ton gawal akapmare ngeda, adipapu dopra, uku dongoprumupa, uku di jepra gawal dangkamrure.

33Tonda, apel dona taruda, tenpu tumi di dipra, yoneitam bari tumi neitamai yumada, nimi cap, Allah cap, antamdana tep, lyom opkal di domi dodin tenda ati buplan damaipu kunkamrume. Aceida tapra, yukai bana gume. Ada, sun imam neng wepra deipmasen dinin, sun apel dona tep, wepra derin taru yumada kapula. Apelpu talepra donmamumpane, yoneitam tumi gawal dakre pangeda, tapra taliyai peda, dabankamrume. 34Allah Yahwehdi, “Apel dopkurume,” pepmaserpa, atumi dopmap pelda, doramepya deiki di, sun mali kupmumnge yuma pununa tep nengeda, Allah lyepseredi, kaukemkamsere. Apel dopmapa deiki di, konum telep kweipmasera cadi, men wenepra popkamsere, pepsene. 35Dinino, apepmasentopu, yoneitam bari tumi yumada, keteng komuni cap, lukunda cap, tumi-tumi yumada, Allah cap, nimi cap, antamdana tep lyom opkal bol di keana dodin tenda ati buplan damaipu kumumdi, Allahdi, ‘Ukunkamrume,’ peipkamsertopu, apelpu donkamarume. Tonda, utopu kupra pel donkamrume. Ada, Allah Yahwehdi, ‘Ange kupkurume,’ peipseutopu kupra, pel donkamrume. Ange men pel dopmumnyopda, sunda adipapu depkamrume. Atep, ange yumada, Allah Yahwehdi ne Musa damai pepra, deipneutopu kunkamrume.

Musadi Harun cap, erdi deiamu neng cap tep, lap pepu.

36Musadi upepka cadi, Allah Yahwehdi Musa er damai pepra deiyamupa, Musadi peipu upu yumada, Harun cap er nyapu cap, sun gekenai lap pepupa, apeiputopu pel dopbanmai.