Lev 9 | XteSC | STEP | Musadi Harun cap, erdi deiamu neng cap, ‘Imam-imam neng kunkameng’ tenen, wepra derina tumi kepupa, Musadi, “Apel dopbankamrume,” pepra deiputopu, Harun cap, er nyapu cap, Allah er si eremna ati buplan damaipu yana dakunmaiyane, ue yoneitam bari tumi neitamai di, apel dopbanmaiyanen, ue ban tumi kepu. Atumida, Musadi Harun cap, erdi deiamu neng cap, tonda Israel nesala, sun deiyo-deiyo neng yuma cap tep, “Acapu yankurume,” pepu.

Leviticus 9

Allah cap, nimi cap antamdana tep, pel dona deiyo neng, sun imam-imam nengdi, sun pel gonga kepra pel dopbaramya tep, pepu upu

1 Musadi Harun cap, erdi deiamu neng cap, ‘Imam-imam neng kunkameng’ tenen, wepra derina tumi kepupa, Musadi, “Apel dopbankamrume,” pepra deiputopu, Harun cap, er nyapu cap, Allah er si eremna ati buplan damaipu yana dakunmaiyane, ue yoneitam bari tumi neitamai di, apel dopbanmaiyanen, ue ban tumi kepu. Atumida, Musadi Harun cap, erdi deiamu neng cap, tonda Israel nesala, sun deiyo-deiyo neng yuma cap tep, “Acapu yankurume,” pepu. 2 Tonda Musadi, Harun tep pepu, “Kandi jem sapi bisam ukupu nenmarenge cap, jem domba bisam cap, duyankurume. Adoupra yamem yapi keca buteneda, Allah Yahweh er si eremna cap, karena cap tep, yana karepkurume. Tonda, jem sapi bisamda, kan mali kun keca daemna tep, yana, popra karepkurume. Dinin, jem domba bisamda, Allah er si eremna tep, ange popra uku dongona tep, doupra yankurume. Agam keca buteneda, ukupu nenmaredi, bol pio telep ngepu dopra yankurume. Bol malinge duyana meme. Agam keca buteneda, Allah Yahweh tep karepkurume. 3 Ukupmumyopda, Harun kandi sun Israel nesala yuma tep, aupu lap pepkamrume.

“Sun mali kurumu keca tep, ‘Allahdi kaukepredi, lyepropkamser’ tenena tep nengeda, sundi jem kambing bisam tenpu doupra duyankurume. Ada, sun mali kurumu keca, ‘Allahdi nun mali kun keca daepseredi, lyemna tep nengeda, jem sapi bisam mi cap, domba bisam mi cap, dopra yankurume. Agam keca buteneda, keteng tamun tenpu deiki di ukupu nenmare bisamda, bol pio telep ngepu, doupra yankurume. Dopra yamumdi, yana popra nun imam neng tep karepserumnyopda, nundi akeca dopra, Allah Yahweh, er karena tep, uku dongopkamepe.’ Upepkamrume. 4 Tonda, Harun kandi, sun Israel nesala yuma tep, ange peda ‘Ukupkurume,’ pepmempa, sun adipapu kupkununge. Ada, “Jem sapi bisam cap, tonda jem kambing bisam capda, doupra yankurume. Ange butene karepkamruma deiyoda, ‘Allah cap, nun cap telep kupra kikiman kunkamep’ tenena tep, akeca poprumudi, Allah Yahweh tep karepkamrume. Tonda, akeca cap tapakra karepkamrum ngeda, ake. Ada, roti kwaneng dana tep deiyo keca, tepung terigu do, yakung do, akeca peda, minyak me di likra dapmange jen keca cap, duyankurume. Ange yumada, ‘Allah di, nun mali kunup keca kaukemna cap, tonda lyepra telep kudina cap, kuipkusere’ tenen, doupra kareryankurume.” Harun kandi aupu lap pepkurume.

Aupu lap pepmempa, sun Israel nesaladi adipu doupra, Allah Yahweh er damai kareryankununge. Ada tali tep gume. Deiyoda, atumida Allah Yahweh, sun damai yankamare. Ange tep aupu pepsene.” Musadi Harun cap, erdi deiamu neng cap, Israel nesala sun deiyo-deiyo neng tep, aupu yuma upepra lap pepu. 5 Musadi sun aimam neng yuma tep, “Angepu ketenepra doupra yankamarume,” peipunge yumada, gekepidi, sun Israel nesala yuma tep lap pepipa, sun aneng-aneng yumadi, ‘Akeca-keca bulupra duyarume,’ pepra lap pepitopu, Allah cap, nimi cap antamdana tep, opkal bol di dodina ati deiyamyai damaipu bulupra yaidi, ‘Acada, nun nai Allah Yahwehdi dinmasere’ tenen, er damai utopu bulupra wekidi, er sipu yana erepi. 6 Sun Israel nesala yuma akati damai yana bulupi pangeda, Musadi, sun yuma tep upepu, “Atumida, Allah Yahwehdi sun tep, ‘Ukupkununge,’ pepra deipmasutopu konum kuprume. Erdi peipseutopu konum kuprumnyopda, akupruma deiki di, Allah Yahweh erda pio teleppu kurura cadi, er ila dirinda, konum katawai kupra deipserepa, sundi epkamarume,” pepu.

7 Uda, ange yuma konum kupi pangeda, Musadi Harun tep pepu. “Kan adipu yapi keca popnedi uku dongona tep, gel pala di taplakra yakra ketenepra deipyaipu, er si mesba damai benkurume. Bemem dingeda, ‘Allahdi nun mali kun keca kaukepra daepseredi, lyepropkamser’ tenen, gam keca popra Allah karenange cap, ange utopu gam keca popra, uku dongonange capda, adipu bena ketenepra deipkurume. Nun mali kunup keca tep, Allahdi tali lupra poptapsetu dinin, akaren keca karepmemnya deiki di, kan mali kumemnge cap, sun Israel nesala mali kunungnge cap yumada, Allah Yahwehdi kaukepseredi, nun mali kunup keca daepseredi, telep kupra deipkamasere. Ange yuma, Allah tep karepkumem keca yumada, Allah Yahwehdi ne damai yana, ‘Ukupra kupkamrume,’ pepra deiamneutopu kupra, pel dopkurume. Musadi Harun tep pepu.

8 Musadi upepu pangeda, Harun gekepudi, adipu yapi keca popra uku dongona tep, mesba keteneipya damai beudi, er pe mali kuramunge tep, ‘Allahdi, ne mali kun keca kaukepneredi, daepra telep kweipkamaner’ tenena tep nengeda, ajem sapi bisam mi, ukupu neramungepu bena popudi, Allah tep karepu. 9 Harun erdi ajem sapi bisam popupa, yapi embeu ngeda, erdi deiamu neng, er nyapudi, asapi bisam er yapi embare ngeda dopra, Harun damai duyaidi, ‘Konum keteneipmape,’ pepra, Harun er damai bena pepipa, Harun yaudi, er buru di, ayapi deiki bena burupropudi, “Yapi keca popra uku dongona tep, gel pala taplakra yakra keteneiyami keca, er si mesba tep dopra deiaminge kumun damai dana-dana di, welepra deiami keca, bisam ekweda co takke utopu keca deiki bena likra deipu. Tonda, ange konum kupu dingeda, yapi ton tupa akapu ngeda, doroprapudi, ayapi keca popra uku dongona tep, mesba keteneipinge deiyo damai dana-dana tara yuma bena dikra deipu.

10 Dinino, apopmau bisam er meta cap, gel du butene cap, dipru deiki paleramre kope cap, doprapudi, ‘Yapi keca popra uku dongona tep, gel pala taplaplakra yakra mesba ketenepra deiyamyaipu doupra, beudi uku dongopupa, uku di jepropu. Akeca yuma, mesba deiki deipmaunge yumada, ‘Allahdi ne mali kun keca kaukepra lyepropkamner’ tenen, karepmaunge neitamai di dopra, uku dongopu. Apel yumada, Allah Yahwehdi, Musa tep, “Apel dopkamarume,” peipmaupa, Musadi, aupu peipmautopu lap pepupa, Harundi ange utopu kupra, pel dopu. 11 Ukupu dinin, apopmau sapi bisam er nong deiki bura tara bol cap, tu cap yumada, mesba damai di, Israel nesala sun tenda bol dodina ati pum kuramyai di, bura tara dubeudi, bena uku sekrapudi, akeca yuma dopra auku dongopupa, ukudi jepropu.

12 Ukupu dingeda, tonda Harun er pe mali kuramunge daemna tep nengeda, yapi keca ton poprapudi, ketenepra deipu. Apopunge er yapi yumada, erdi deiamu neng, er nyapudi, ayapi dopra keteneipidi, sun nai bo tep, bena karepipa, erdi ayapi dopra, gam keca popra uku dongona tep, gel pala yakra ketenepra deiyamyai, er si mesba deiki cap, mesba tep dopra deiaminge, er kumun damai dana-dana tara yuma cap, bena likra deipu. 13 Harun er nyapudi, ayapi dopra karepipa, apel yuma konum dopkupda, er nyapudi, abisam er giso cap, yuk tara tu sek-seka ketenepra deipmayainge yuma di, yuk-yuk dinin, ange-ange yuma dopra, ange yuma dopra, tenpu-tenpu karepi. Harun tep karepipa, erdi doroprapudi, yapi keca popra uku dongona tep, mesba ketenepra deiyamyaipu dubeudi, bena uku dongopupa, ukudi jepropu. 14 Ange konum kupu dingeda, apopmai yapi keca, er deiplyu cap, yane capda, Harundi doprapudi, me kupra telep kupra keteneipu dingeda, ayapi keca popra uku dongona tep, ketenepra deipmaunge deiki, akeca peda bena uku dongoptapupa, uku di jepropu.

15 Apel yuma konum dopra seng pepkopda, Harun dipapu, Israel nesala sun pe mali kurami keca daemna tep, ketenepra deipmai kambing bisamda, doupra yaudi, adipapu popra yana karepu. Popu dingeda, Israel nesala sun mali kuraminge tep, ‘Allahdi kaukepredi, anesala telep kweipkuser’ tenen, Allah tep karepu. Ada, er pe mali kupunge daemna tep, apel dopra kupmautopu kupra, Israel nesala sun mali kuraminge tep, ‘Allahdi kaukepra daepredi, anesala telep kweipkuser’ tenen, apelpu dopra, Allah tep akeca yuma karepu. 16 Tonda, Allah karena tep, yapi keca popra uku dongonai bena dongopu. Ada, Musadi, ‘Allahdi lyepsetu’ tenen, gam keca popra uku dongopnedi, “Allah tep karena pelda, ukupra-ukupra apel donkamrume,” pepra lap peiamutopu, Harundi apel ton dopu. 17 Tonda atarupu, jen kecada, roti kwaneng jena deiyo keca terigu do, tepung do, yakung do, Allah er karena tep, ketenepra derirami kecada, Israel nesaladi, duyanmai ngeda, Harun er buru tenpudi, yambulanun ton doupra yaudi, uku dongona tep, mesba ketenepra deiamyai yaudi, yana uku dongopu. Atumipu dinin, arup ipna taruda, gam keca popmaudi, uku dongopmau ngeda, konum uku dongopmau dinin, ataruda kange di ton cap tapakra, aroti kwaneng jen keca deiyonge ton karepudi, Allah er karena tep uku dongopu.

18 Utopu tonda, Harun er dipapu jem sapi bisam cap, jem domba bisam cap, doupra yanmangudi, er tep karepipa, ange ton yana popu. Ada, ‘Nun Israel nesala yuma, nun mali kunup keca karena tep, Allah daepseredi, telep kuipserepa, nun cap, er cap antapra telepepu kunkamep’ tenen, apel ton dopu. Apopmai ngeda, Harun er nyapu sundi, yapi dopropidi, sun nai Harun tep yana karepi. Harundi ayapi keca popra, uku dongona tep, ketenepra deipyai, er si mesba deiki cap, amesba kumun damai dana-dana yuma cap, bena dikra deipu. 19 Dinino, ajem sapi bisam cap, jem domba bisam capda, sun meta cap, kop cap, tonda gel du kop cap, amu damai meta cap, tonda dipru paleramre meta cap yumada, ketenepra deipu. 20 Aketenepra deipu meta cap, kop cap yumada, apopmare jem sapi bisam cap, jem domba bisam cap, sun taram tu yumada, dadeipmaiyaipu bena, ameta keca yuma doprapudi, ataram tu deiki deipu. Ukupu dingeda, Harundi, ayapi keca neitamai di dopropu meta yala-yala yuma dopra, uku dongona tep, ketenepra deipyai mesba deikipu duberedi, bena uku dongopupa, uku di jepropu.

21 Harundi abisam taram tu cap, dumsisi tara kail tu cap, uku kapul men dongopu taruda, abutene keca doroprapudi, Allah Yahweh tep, ‘Telepe,’ pena tep, er damai tarapu, akeca erepra doupudi, bena peterepra karepu. Akarepu ngeda, ‘Allah ati talepra akati pumbon pel dona neng, sun nge pua’ tenen, Allah tep karepu. Apel dopunge yumada, Allahdi peipupa Musadi, “Ukupra apel donkamrume,” pepra, lap peiputopu, Harundi ange utopu kupu. 22 Harundi, ange yuma ukupra konum karepyopda, er buru erepra, Israel nesala sun abulupmaiyai urasin tara ereprapudi, ‘Allah Yahwehdi, Israel nesala kalekra melimkamre’ tenena tep, telep upu pepra moropu dingeda, er buru erepmau ngeda, ka tapu. Ukupya deiki di, ‘Allahdi sun Israel nesala telep kupra derinkamre’ tenen, pel dopu. Tonda, arup taruda, Allah er karen keca yala-yala yuma, konum karepka cadi, mesba damai di yambul yukai kwerepu. Harundi konum Allah tep karepu ngeda, nimi mali kunge keca daemna tep, gam keca popra karepu. Tonda, nimi mali kunge keca tep, Allahdi tali lupra wenepra poptaptu dinin, sun pununa tep, gam keca popra uku dongona tep, mesba deiki karepudi uku dongopu. Tonda, ‘Nimi mali kunge keca kaukepredi, Allah cap, nimi cap, kange di ton cap telep kupra kikiman kunkamep’ tenena tep, konum karepu. Harundi, akaren keca yala weneri konum karepkopda, mesba damai di, kwerepu.

23 Ukupu dingeda, Musa cap, Harun cap, sun adipapu Allah Yahweh cap, nimi cap antamna tep, tenda ^{▼▼tenda ati – Akeca gambar dina tep, Imamat 1:1 dinkurume.} opkal bol di dodina ati pumbon deipmaiyai neitamai, bena wekrei. Wekra dakunmareianen, kange di bura tara yarei dingeda, ‘Allahdi Israel nesala yuma tep, telep kweipkamre’ tenen, telep upu peprapreidi, telep kupra deiprei. Telep kupra deiprei pangeda, sun Israel nesala yumadi, Allah Yahweh er pio telep kurura cadi, er ila dirinda, sun damai yana katuai kupmau pangeda, sun yumadi adirin kupu ngeda, epra kael kepi. 24 Ataru puda, Allah Yahweh er ila dirine neitamai di dato-dato di, uku dokotepupa, uku dongona keca, er si mesba deiki deipmau yapi keca cap, meta keca yala-yala yuma capda, ukudi menmena jepra gawal dakropu. Ukupu taruda, sun Israel nesala yuma epidi, ila kange deipidi, ‘Uo’ tenen, Allah Yahweh gispal dona tep, sun urasin tarada, tuai deiki mapmaidi, Allah tep gispal dopi.