Luk 1 | XteSC | STEP | Allahdi, ‘Amenda taru kupkamu keca ake,’ peamu ngeda, ukutaruda nun kan-kan Allahdi pel weik doramnganen, gawal daku ngeda, sun nesala weik diramidi, akeca yuma lap pena tep, yuk neng ton upu sekra deipidi lap penunge.

Luke 1

Abuku gonga kemna tep, lap pepu upu

1 Allahdi, ‘Amenda taru kupkamu keca ake,’ peamu ngeda, ukutaruda nun kan-kan Allahdi pel weik doramnganen, gawal daku ngeda, sun nesala weik diramidi, akeca yuma lap pena tep, yuk neng ton upu sekra deipidi lap penunge. 2 Akeca yuma dirami ngeda, Yesusda er pel ukupu gonga kepu taru di, sun asuru dirami neng cap, tonda, er cap melipra Allah upu pel dopembarami neng capdi, lap peramseitopu, anengdi konum sekra deipi. 3 Ange tep nengeda, ne peda ‘Yesus er pel gonga kepu taru di, lelepra tenepsidi, gonga kepka deiyo taru di dipdongopra adinen, sirya daku tara yuma, Yesus peteremamudi, pel dopra kuramutopu, ange yuma sekra deipkamne’ tenen, sekra deipsi.

4 Teofilus ne kabo sisa, kanda pio telepe. Aupu sekra deipmasada, kan peterepkei keca yuma, ‘Tek sisi kuramnge’ tenen, kael kepkamruma tep, sekra deipsi. Atep aupu pepkukene.

Teka tenena neng me dongoramu ngebo, Yohanes Pembaptis deipkamnga tep, pepu upu

5 Yudea mutu yuma ila nimi deiyo ngebo, Raja Herodes talepra kuramu taru neitamai di, Allah karena tep, ila deiyo ngebo er sida Zakaria kuramu. Zakariada, Allah karena deiyo neng ^{▼▼Allah karena deiyo nengda, Allah er si eremna ati pumbon pel dorami. Sun lap pena upuda, nomor 14 dinkurume.} dinin, er cap pel dorami neng sun gung sida, Abia. Zakaria er ner Elisabetda, nun apu bo Harun yala nengdi deiami. 6 Zakaria cap, er ner Elisabet cap, Allah upu pedisere utopu kupra dumsisipu kuramreidi, Allahdi, “Ukunkamrume, ange men kunkamrume,” peamu upu yuma moupra taleamreidi, dombaramrei. Aupu peretopu kunupseng pepra pel doramreidi, mali kuna keca tenpunge peda, men kuramrei. Allahdi sun tep, kange deiamu. 7 Dumsisipu kuramrei dinin, Elisabetda, you ner kuramnga cadi, sun nyapu ton men deiamreidi, youpu kuramreiyanen, konum wisi deipreipa, nyapu men deipmanto kuramrei.

8 Tenpu taruda, ‘Allah karena cap, morona cap pel donkameng’ tenen, Zakaria er gung wepra deipipa, Zakariada Allah er karena cap, er si eremna cap tep barami ati ^{▼▼Allah tep karerbaramidi, er si eremami ati tep lap pen upuda, lap pena upu nomor 15 dinkurume.} pumbon pel donmau. 9 Sun Allah karena tep pel dorami neng kuramitopu, tenpu tumida, Zakariadi Allah karena ati pum bena wekredi, uku sekredi, ‘Nintong telep keca uku dongopkur’ tenen, Allahdi peipupa, sun anengdi, Zakaria wepra deipipa, Zakariadi Allah er si eremna ati pumbon wekudi apel donmau. 10 Pel donmauanen, nintong telep keca uku dongopkou taruda, nesala weike, akati dam bulupra Allah moronmai.

11 Moronmaipane, Zakariadi akati pum pel donmaupane, nintong telep keca uku dongopkouai dumsisi tara, Allah er im deiki pel don ngebo tenpu, malaikat dato-dato di belepra tengyau. 12 Malaikat tengyaupa, Zakaria epudi, lukdana dung-dung pepudi, kware weik kupu. 13 Kware weik kupu dinin, amalaikatdi Zakaria tep aupu pepu.

“Kan kwar dangna gume. Kandi Allah tep mororamum kecada, Allah konum gekepkeue. Kan ner Elisabetdi sal mi deipkamre. Konum deipre pangeda, er sida Yohanes pepra deipkamrume. 14 Allah er kangeda, ‘Amida ila mambule,’ tenerure. Atep, ami kurya deiki di, kange ila di deipmemdi, pingpinga di kunkamrume. Tonda, kan nerdi ami deipyopda, nesala weika di ami tep, kange pio deipkamenge. 15 Deiyoda, ami nepyopda, ila mambul pel doramrepane, Allahdi angebo tep, pio kange derinkamre. Ami nepyopda, anggur me kange yawaramne me cap, yuk tali kange yawaramne me cap, pio men jenkamre. Tonda, er ukupu deipre taru adinen, dorkunkamre taru yumada, Allah er Lek Sambala ami er dipru wekra dinikredi, puto weik karepyopda, Lek Sambaladi angebo pio talenkamre. 16 Israel nesala weike Allah tapra, yuk tara bisi benami dinin, ami nepyopda, erdi anesala-anesala weike dopra, sun nai Allah er tara ka tamupra deriryakankamre.

17 Pumun di Allah upu jenek peramu ngebo nabi ^{▼▼Allah er upu lap pena nengda, Allahdi ‘Nimi gekepkameng’ tenen, erdi wepra deiamu neng tep, er upu lap pepu pangeda, anengdi, yuk nesala yuma tep lap perbarami. Anengda nabi neng penupe. Nabi neng, sun lap pena upuda, nomor 25 dirume.} Elia, Allah er Lek Sambala puto deiki di, Allah upu peteremamutopu, ami nepyopda, er peda utopu kunkamre. Yesusda, amenda yankamra tep, amidi menmena menepra ketenem dinkamre. Er kurya deiki di, sun Israel nengdi, sun nyapu yuma tep, bicau tenepra kange deipra kunkamenge. Tonda, sun Allah upu yanipra mali kuramenge nengda, ami er kurya deiki di, aneng sun mali kunge keca tapmengedi, ka di tamupra Allah teka tenepra, dumsisi kunge neng ila kaele di kungetopu, Allah er tarapu kepronkamenge. Akunkamra yumada, Yesusdi talenkamre nesala ketenem dina tep kunkamre.” Amalaikatdi aupu yuma Zakaria tep pepu.

18 Upepu pangeda, Zakaria gekepudi tamupra pepu. “Apepmaneremada, ware keca kuptua deiki di, ‘Apepneremnge yuma, tek sisi kunkamre,’ teneptene do? Ada, ne pe, ne ner pe, wisi pio konum deipnemnga tep pepne,” Zakariadi pepu. 19 Upepupa, amalaikatdi tamupra pepu. “Neda, tali ngebo gume. Ne sida, Gabriel kunune. Neda, Allah damai kunedi, Allah erdi dokotepmanerpa, akai telep upu peryanmakene. 20 Apepmaken keca yumada, Allahdi tenemu tarupu tek sisi kupkamre dinin, kandi teka men tenepmanerema tep, ataru di dipra, ami kapul men deipre taru yumada, lup ngebopu kunkamrume.” Amalaikat Gabrieldi, Zakaria tep pepu.

21 Aupu tupa talenmarei taru yumada, Allah karena tep, akati dam bulupra wekmai nengdi, ‘Zakaria ati pum pio kunmare ngeda, ware keca deiyo tep do?’ tenen, tenimtonmai. 22 Ukunmaipane, Zakaria ati pum di gupra, bura tara tengbeu dinin, upu ton pio men pepmanto kupu. Upu men pepmanto kupudi, ‘Er upu men pepmanto kupmara tep penmara, tenepkenenunga’ tenen, buru bata derinmau. Buri bata derinmaua tep, aneng yumadi, ‘E ken mapmengedi, ken deiki dirameng keca utopu, Allah karena ati pumbon di epmara tep, buri bata derinmara’ tenen, kael kepi.

23 Zakaria er Allah karena tep pel dona cap, morona cap taru konum gawal daku dingeda, er cap, er ner Elisabet capdi, sun pe mutu tamupra berei. 24 Bereidi, dakuramreianen, Elisabet mundu doupudi, er yuk ati pumbonpu ware pamu kuramu. Erda yuk mutu men embaramu. Tonda, yuk nerapudi, er ati uruna tep men yai. Elisabet pio yuk kuramu. 25 Akuramu taruda, aupu peramu. “Ne nai Allahdi amambul pel konum dopmanerpa, mundu doupsi. Allahdi ne tep, bicau tenepra kange deiamneua deiki di, mundu konum doupsi. Tonda, yuk nesala yumadi, ‘Kanda you nere,’ peramneipa, ali kuramneuada, Allahdi konum gum kupra deipneue,” Elisabetdi peramu.

Yesus deipkamnga tep, lap pepu upu

26 Elisabet mundu douamnganen, ngantan bari war konum kupu taruda, Allahdi er im deiki pel don ngebo Gabriel dokotepupa, Yudea tara damai dinin, Galilea tara neitamai ati arum doramyai sida, Nasaret mutu kai perbeu. 27 Ada, Yahudi yala neng, sun apu bo Raja Dauddi deipupa, dadeipdanen baramyanen, Daud nengdi deipi ngebo Yusupda, erdi mun peramu ner, er damai perbeu. Anerda, nimi dona gum pio kaber nerpu kuramu. Er sida, Maria. 28 Amalaikat Gabrieldi, Maria damai beudi aupu pepu.

“Ka nero telepe. Allahdi kan tep kange deipkeudi, pio mambul pel dopkamkere. Allahda kan cap kuremumdi pio melimkamkere,” pepu. 29 Malaikatdi upepupa, Maria gekepudi, ‘Ware kupkamnera tep pepmaner do?’ tenen, teniptopudi kware weik kupu. 30 Kware kupu dinin, Gabrieldi Maria tep upepu. “Gume kan kwar dangna yapo. Allahdi kan tep bicau tenepra, kange konum deiamkeu. 31 Allah melipkerya deiki di, sal mi mundu douamemyanen, amenda taru ami deipmemnyopda, er sida, Yesus pepkamrume.

32 Amida, akeca-keca yuma deiki tara kure ngebo, Allah im deiki kuredi, akeca yuma talerur ngeboda, er mi sisa kunkamre. Amidi ila mambul ngebo cadi, nimi epmengedi, ‘Ada Allah er Mi Sisa kurure,’ penkamenge. Amida er apu bo Daud, ^{▼▼Yesus er apu bo Daud perami ngeda, deiyo ake. Maria cap, Yusup capda sun butene di nyakdareidi Yesus men deiprei dinin, Allah er Lek Sambala puto deiki melipupa, Mariadi mundu douamnganen, Yesus deipu. Maria pe, Yusup peda, Daud yala nengdi deipya tep (Matius 1:16), Yesusda Daud yala nengdi deipi peptepe.} Israel nesala yuma talepra, ila nimi deiyo ngebo kuramutopu, er peda, Allah puto kareprepa, amidi Israel nesala yuma talepra, ila nimi deiyo ngebo kunkamre. 33 Uka talepra kunkamre taruda, Israel nesala dinin, sun apu bo Yakubdi deiamupa, dadeipdanen bange nesala yuma, pio talepra kunkamre. Pio men tapkamre. Apio talepra kunkamre. Erdi talenkamre ngeda, pio talepra kunkamra cadi, men gum kupmanto kunkamre,” Gabrieldi pepu.

34 Upepupa, Mariadi tamupra asipetepu. “Apepmanerem keca yumada, ne nimi men dopsa tep, ware ka kupnetu do?” pepra asipetepu. 35 Asipterepupa, malaikatdi tamupra Maria tep pepu. “Allah er Lek Sambala kan nong deiki deipkeredi, Allah er putoda, kuki utopu kan nong deiki kunkamkere. Ukupkamkera deiki di, mundu douamemyanen, amenda taru, mali kun keca tenpunge peda pio men kunkamre mi deipkamrema tep, nesala yumadi er tep, ‘Amida, Allah er Mi Sisa,’ tenepra penkamenge. 36 Tonda, kan yala ner Elisabet, pio wisi konum deipu dinin, er peda, sal mi deipkamre. Elisabet tep, you ner perami dinin, ukuda mundu doupudi, war ngantan bari konum kupre. 37 Ange yumada kupkamrada, tali tep gume. Deiyo ake. Akeca-keca yumada, Allahda ikin men kuptue. Allah erda akeca yuma kanampu kurure.” Gabrieldi pepu.

38 Malaikatdi Maria tep, aupu pepu pangeda, Mariadi tamupra pepu. “Neda, Allahdi ‘Ukuprume,’ penere kecada, ‘Telepe’ tenen, kange deipra kununa tep, ‘Apepmaneremtopu kupkamnere,’ tenepne.” Mariadi pepu. Upepupa, amalaikatdi Maria acapu tapra beu.

Mariadi uruna tep, Elisabet damai beu upu

39 Ataru dipapu, Maria ketenepudi, menmena Yudea tara neitamai mutu buma bukamudi welena cap, kwerena cap kwamu mutu beu. 40 Beudi, tenpu ati arum domyai beudi, Zakaria er ati pum wekra, Elisabet cap epdarei pangeda, “Telepe,” pepra gispal dopu. 41 Mariadi, “Telepe,” pepupa, Elisabet gekepu dingeda, adipapu er mundu pumbon di ami gam popupa, Allah er Lek Sambaladi, Elisabet er dipru neitamai yana wekudi dinipu. 42 Dinipu pangeda, Elisabet ila di aupu pepu.

“Uo, yuk nerapu yumada, Allahdi sun tep kange deiamu dinin, kan Maria puda, ila di melimkerure. Tonda, kan deipkamrem sal mi peda, Allahdi konum wepudi kange deipu. 43 Uo ne yambul ner cadi, nun Israel Lyemna Deiyo Ngebo er nin ne damai yanmaneremada, warya tep do? 44 Kandi, ‘Telepe,’ pepmanerempa, gekepmakendi, adipapu mi mundu doupsaidi, ami er kange deipmardi gam popmare. 45 Allahdi, ‘Ukupkamkene,’ peiamkeu upuda, ‘Tek sisi kupkamnere,’ tenepra konum teka tenepmuma tep, Allah melipkerepa kange deipra teleppu kunkamrume. Kanda ila mambul nere.” Elisabetdi Maria tep pepu.

Mariadi Allah tep, ‘Telepe,’ pepu upu

46 Mariadi aupu pepu.

Ne kange dipru yuma tenipmandi, ne nai Allah er si eremane. 47 Tonda, ne kange dipru di, ne Lyemna Deiyo Ngebo ^{▼▼Lyemna Deiyo Ngebo – Alkitab neitamaida, Lyemna Deiyo Ngebo sengnungada, ton taru Allah tenena tep sengnunge. Ton taruda, Yesus tenena tep sengnunge, dinin deiyoda, Yesus er depseua deiki di Allahdi lyemserure.} Allah tep, ne kange pio deipne. 48 Ne nai Allah, er amngai yambul ner kunun dinino, erdi ne tep bicau tenepra kange deipneudi, ila mambul pel dopneupa, sal mi deipkamna tep, kange deipra er si eremnune. Ataru dipra dortaru kunkameng nesala peda, ne tep, ‘Erda ila mambul ner,’ penkamnenge. 49 Upenkamnengada, tali tep gume.

Ada, ne yambul nerpu kunun dinin, Allah im deiki pio ila puto ngebodi, mambul pel dopneua tep aupu penkamnenge. Allah erda, tali tuai nesala utopu ngebo gume. Erda, pio dumsisi ngebo cadi, er sida pio telepe. 50 Ware nesala do yuma, ataru pe, yuk dortaru pe, Allah er amngai bukmengedi, er tep, ‘Erda ila mambule’ tenen, er sipu erepra kunge nesala yuma tep, Allahdi anesala tep, lumdongona gum di, pio bicau tenepra melimrure. Ada, ataru kunge nesala pe, sundi deipmengedi, dadeipdanen, deipkameng nesala peda, er si eremenge nesala tep, telep kupra melimkamre.

51 Allah er buru puto deiki di, ila mambul pel doramu. Tonda, sun kange tenena deiki di, ‘Nun ila neng kunupe,’ tenepra, gemerami nesala yumada, konum gum kupra deriramudi, bisipra yanirure. 52 Sun ila nimi deiyo neng erepra deipnedi, kuramyai di dopra, er amngai deriramu dinin, er amngai kurami nengda dopra, erepra telepaipu deriramu.

53 Tonda, sun akeca-keca yuma putaramu nesalada, Allahdi sun putapre keca weika di karepnepa, dororamipa, bouramu. Ukuramu dinin, sun isomka nengda, karena gum dipapu tali nongpu dokoteramu. 54 Tonda, er nyapu utopu nesala Israel nesala tep, men lumdongorur cadi, nunda mali kunup neng dinin, menmena men wenemserur dinin, bicau tenepra pio melimnapu kurure. 55 Ada, Allahdi nun apu yapu ^{▼▼Yahudi yala neng, sun apu yapu tep, lap pena upu nomor 20 dirume.} tep, ‘Ukupra melimkamsene,’ pediramutopu, konum kupsere. Ada, lumdongona gum dipu, nun apu Abraham cap, Abrahamdi deipupa, dadeipdanen, baramyanen, ukutaru deirenge neng yuma cap tep, pio bicau tenepra melimnapu kurure.

Aupu yumada, Mariadi pepu. 56 Maria cap, Elisabet cap, kikimanpu kuramreipane, ware weneri konum kupkopda, Mariada er pe mutu Nasaret tamupra beu.

Yohanes Pembaptis deipu upu

57 Elisabet mundu douamudi dakuramnganen, er mi deiyo jepkou taru konum kupkopda, sal mi deipu. 58 Ataruda, er meneng dam kurami neng cap, er yala neng cap, “Allah bicau tenepra meliamnga deiki di, sal mi konum deipre,” pepipa gekepi pangeda, sun aneng yuma cap kange deipi. 59 Elisabetdi sal mi deipupa, sun yuma dakuramipane, ban bari tumi konum kupkopda, ‘Amida Allah er mipu kunkamre’ tenen, Allahdi peipupa Musa sekeiamutopu, ‘Er den bam bol deiki tarange ^{▼▼den bam bol sengna – Aupu deiyo kael kemna tep, lap pena upu nomor 19 dirume.} sekup’ tenen, yanmai. Ukupidi, er nai si atenpu, “Zakaria pepkupe,” pedandenkapidi, ami er nindi aupu pepu. 60 “Gumde, ami er sida, Yohanes penkamepe,” pepu. 61 Upepupa, aneng yumadi tamupra Elisabet tep pepi. “Kanero, kan tara nesala yumada, asi ton men si pepnunge,” pepi. 62 Upepidi, ami er nai Zakaria tep, ‘Kan mida er si tep, ware si sipepkuserem do?’ tenen, buru bata deipidi asipetepi.

63 Asipetepipa, Zakaria tamupra buru bata deipudi, ‘Sengne keca cap, co lase cap karepkuneng’ tenen, moropu. Moropupa, karepi pangeda, Zakariadi, ‘Ami er sida, Yohanes,’ pepra sekra deipu. Ukupupa, abulupra wekmai neng yumadi, ‘Uo,’ pepra lolomai. 64 Zakariadi, ami si konum seku pangeda, adipapu Allahdi er lyemu telepe kupra deipudi, upu karepupa, ataru upu gonga kepra penmaudi, Allah si eremau. 65 Ukupu pangeda, Yudea tara neitamai, sun atara neitamai kurami nesala yuma, akupu keca tep ‘Uo angeda mambul weike’ tenen, malye peramidi, upu talerami. 66 Upu taleramipa, upu gekerami neng yumadi, tenimtoramidi, pio asimdarami. Elisabetda, Allah er puto deiki di meliamupa, Yohanes deipu. Deipupa, Allahdi ami meliamupa telep kuramnga tep, sun adirami neng yumada, asimdaramidi aupu perami. “Ami deipu taru kupu keca yumada, ila mambul atep, amida nepredi wareto ngebo kupkamre do?” pedarami.

Yohanes er nai Zakariadi pepu upu

67 Allah er Lek Sambaladi, Yohanes er nai Zakaria dipru wekra dinipupa, amenda kupkamu keca tep aupu lap pepu. 68 Zakariadi, amenda taru kupkamre keca tep, aupu pepu.

Nun nai Allahda, pio telepe kurure. Nun Israel nesala pio kalekra melimserur Allah tep, er si erepra gispal dopne. Ada, Israel nesala er nyapu nun lyemna tep, konum yana keteneipmasera tep, er si erepra gispal dopne. 69 – 70 Allahdi, nun apu bo Abraham tep, “Ukupkamne,” pepra deiamupa, er upu jenek pepra lap perami neng, sun nabi nengdi, sekeiamseitopu, Allah er pel doramu ngebo Dauddi deipupa, dadeipdanen, yakaramyanen deipkamre ngeboda, nun lyemna tep, ila puto ngebo konum erepra deipmasere.

71 Erdi lyepkamserada, ‘Nun song’ tenen, ateng kouna cap, pona cap kusenge nengdi, talesenungai neitamai di, Allahdi loptapkamsere. 72 Tonda, Allahdi nun co pununa neng tep, bicau tenepudi, dipru kareamnga cadi, ange tamna gum di, lyemseredi, pio teleppu derinkamsere. ‘Israel nesala ne mawa,’ teneamudi “Ukupkamsene,” pediramseudi apio teneamnganen, konum keteneipmasere.

73 Allahdi nun apu bo Abraham tep, “Ukupkamsene,” peiamu upuda, ake.
74 – 75 “Ada ‘Sunda nun songe’ tenen, pona cap, ateng kouna cap kusengedi, talesenge neng tep, ne Allahdi loptapkamsene. Loptapsenepa, kwar dangna gum di, ne amutara kumumdi, ne pelpu pio donkamnerume. Ada, sun yuk nesaladi tali kange doupra kuramengtopu gum dinin, mali kuna pio gum di, dumsisi kupra kurumudi, sun kunkamrum taru yumada, nedi sun tep, ‘Angeda ukunkamrume, angeda men kunkamrume,’ pepra kareamsisi upu, ‘Moupra talemumdi, ne pelpu pio donkamnerume’ tenen, ne puto karenkamsene.” Allahdi peiamu.

“Angeda, Allahdi nun apu bo Abraham tep pedina upu pepra pediramutopu konum kupmasera tep, aupu pepsene,” Zakariadi pepu. 76 Zakariadi aupu pepu dingeda, er mi Yohanes deipmaua tep, aupu pepu.

Ne mi Yohanesda, nun Lyemna Deiyo Ngebo tep, er yankamre bisi mepra bememdi, ketenem dinkamruma tep, yuk nengdi, ‘Allah akeca-keca yuma deiki tara kuredi, ila puto weik cap, eremna cap kure ngeboda, er upu lap pere nabi ngeboda, Yohanes, er kurure,’ penkamkenge. 77 Er bisi ketenem dinkamremnyada, Yohanes kandi, ‘Allah er nyapu sun lyemna keca kael kepkameng’ tenen, lap penkamrume. Ada, nesala yuma, sun mali kunge keca cap, mali tenenge keca cap tep, Allah kaukepredi, gum kupra deipya deiki di lyepkamre upuda, lap penkamrume.

78 Nun nai bo Allahdi, nesala yuma tep, menmena men wenepra popserur dinin, dipru karerepa, bicau tenepra melimserur ngebo cadi, nun mali keca yuma kaukemseredi, lyepkamsere. Ipna taru keteng deipredi, kunungnai dirine kuramretopu, nun nai Allahdi nun Lyemna Ngebo im deiki di dokoteprepa, nun damai yankamsere. 79 Nun kunungna cap, dena cap neitamai kunup nesala damai yaredi, dirine kweipseredi, lyepropkamsere. Nun Lyemna Ngebo dirine kweipseredi, nun cap, Allah cap, ‘Telep kupra kikiman kunkameng’ tenen, bisi peteremdinkamsere. Ne mi Yohanes kan kunkamrum keca cap, nun Lyemna Ngebo erdi kunkamre keca cap tep, pepne. Zakariadi pepu.

80 Yohanes er nong nepbaramupa, er kange dipru cap ila di wisipu. Konum nepbaramu taruda, nesala cap, me cap, pio gumai dabena kuramnganen, Allahdi ‘Ukunkamre,’ tenemu pel, er pel katuai gonga kepu tarupu, yuk Israel nesala kuramyai beupa, Israel nesala yumadi diramidi, kael keami.