Luk 11 | XteSC | STEP | Tenpu taruda, Yesusdi Allah moronmaupane, er nyapudi gekenapu kunmai. Gekenmaipane, Yesus konum moropra sengpepkopda, er nyapu kan-kan tenpu ngebodi Yesus tep pepu. “Naio, Yohanes Pembaptisdi, er upu gekerami neng tep peteremamutopu, kandi ton nun tep, ‘Allah moronada, ukupra moropkurume,’ pepra peterepsetume,” pepra moropu.

Luke 11

Yesusdi Allah morona tep, peterepu upu

(Matius 6:9-13; Matius 7:7-11)

1 Tenpu taruda, Yesusdi Allah moronmaupane, er nyapudi gekenapu kunmai. Gekenmaipane, Yesus konum moropra sengpepkopda, er nyapu kan-kan tenpu ngebodi Yesus tep pepu. “Naio, Yohanes Pembaptisdi, er upu gekerami neng tep peteremamutopu, kandi ton nun tep, ‘Allah moronada, ukupra moropkurume,’ pepra peterepsetume,” pepra moropu. 2 Angebodi aupu asipetepka cadi, Yesusdi er nyapu yuma tep tamupra aupu pepu.

Sun Allah moronkamrum taruda, upepra moronkamrume.
Nun nai Allah im deiki kurem ngebo, ‘Nun pe, yuk neng yuma pe, kan sipu ereprap kunkamep’ tenen, moropkepe. ‘Menmena yamemdi, nesala ban-ban yuma talepra kunkamserem’ tenen, moropkepe.
Tonda, ‘Kandi mutu-mutu yuma cap, nun tuai neng yuma cap, talepsememdi, nun Ila Deiyo Ngebo kan tenpu kunkamserem’ tenen, moropmepe.
3 Tumi-tumi yuma nun kwaneng cap, yuk keca cap, putapseretopu, ‘Makupra karepsemempa, dopra jenkamep’ tenen, moropmepe.
4 Yuk nengdi nun tep mali kupsengepa, kaukemepetopu, ‘Kandi ton, nun mali kupe keca tep, kaukemsememdi, nun mali kun keca gum kupra derinkamserem’ tenen, moropkepe.
‘Mali kupkameng do?’ tenen, ‘Ila ikin kurpeten keca men karepkamserem’ tenen, moropkepe.
Tonda, pio Mali Kun Keca Deiyo Ngebo, Kain Jen Ngebodi, mali kudiserur cadi, ‘Mali kupnup’ tenen, ‘Kandi kalekra disememdi, makunkamserem’ tenen, moropkepe.

‘Aupu utopu pepra, Allah moronkamrume,’ Yesusdi er nyapu tep pepu. Upepudi aupu ukupmantonge ton pepu.

5 – 6 Sun kabo er ati akunmatupane, tenpu tumi pio lukunda neitamai, er ati dam betumdi, “Kao, ne nimi bo ngebo karen mutu di yanmanerpane, ne jen keca gum tep, kandi kwaneng weneri karepnetumpa, ne kabo karepkune,” pepra moroptume. 7 Moroptum pangeda, akati ngebodi ka tamupra, “Gume, ne bungdina yapneo. Buplan konum dekdongopmanudi, ne cap, ne nyapu cap, kikiman mapmapa cadi, kan moropmanerem kecada, men karepkukene,” peptue. 8 Angeboda, pio mapluk pepmaudi, mapra u dakmaua cadi, ‘Ne kabo sisa’ tenena deiki di, men karepketu dinin, pio tamna gum di, moronapu kunmatum pangeda, ‘Warya tep pio penmaner do?’ tenen, dabal kuptupa, bukroredi, kan putapkeretopu, weika di karepketue.

9 Ange tep nengeda, nedi pepsene, sun putasere keca moropmum pangeda, Allahdi akecapu karenkamsere. Sun putasere keca tep, ‘Dan tara epkup do?’ tenen, ergiringmum dingeda, epkamrume. ‘Akati wektene’ tenen, kuluk-kuluk pepra peten pepmum pangeda, Allahdi buplan pangdinkamsere. 10 Ukunkamrumada, tali tep gume. Ne tek sisi pepsene. Ware neng do yuma, Allah tep mororur ngeboda, Allahdi kareprepa dopropkamre. Ergiringrur ngeboda, Allahdi meliprepa epkamre. ‘Akati wektene’ tenen, kuluk-kuluk pepra peten perur ngeboda, Allahdi abuplan pakeipserepa wekamrume.

11 Sun teniprume. Sun awekmarum neng kan-kan, ware ngebo er midi er nai tep, mekina moroprepane, nimi pon balpu karepkamrum do? Gume, sun nyapudi moropmenge kecapu karerume. 12 Tonda, er midi ma du moroprepane, nimi pon tanga karepkamrum do? Gume, sun nyapudi moropsenge kecapu karerume. 13 Sunda dipruai mali kurum neng dinin, sun nyapu tep, telep keca karenada konum kael keprume. Ukumum ngeda, yambul telep keca, yambula di karerum dinin, sun nai Allah im deiki kurur ngebodi, er tep moropmenge neng karenkamsere ngeda, ila weika di er Lek Sambala karenkamsere. Yesusdi er nyapu tep pepu.

“Yesusda Kain Jen Ngebo er puto deiki di pel dorure,” pepi upu

(Matius 12:22-29, 43-45; Markus 3:23-27)

14 Ton taruda, yuk nengdi, lup ngebo tenpu Yesus damai duyai. Angeboda, isok er dipru taleamnga deiki di, lup ngebo kuramu. Keteng tamun weike isok taleamupa, luppu kuramu dinin, Yesusdi aisok enepupa, ataru dipapu, angebo upu telep kupra penmau. Upu telep kupra penmaupa, abulupra weka gekenmai nengdi, uo tenen, lolomai. 15 Lolomai dinin, ton nengdi aupu pepi. “Gume, aisok enemrurada, isok-isok yuma, sun deiyo isok, Kain Jen Ngebo, er si ton Belesebul, ^{▼▼Belesebul – Kain Jen Ngebo er si butene cadi, ton nengda er tep, Belesebul penunge.} er puto deiki di, Yesusdi isok-isok enemrure,” pepi. 16 Ton nengda, “Yesusda, tek sisi Allah er Mi Sisa men kurure,” tenepya tep, Yesus kurpetena tep aupu pepi. “Im neitamai di nimi men kupmanto keca, kunupsek pen pel dopsetum pangeda, epmepedi, adeiki di nundi kan tep, ‘E, teka Allah er puto deiki dipu pel dorure,’ tenepketepe,” pepra kupetepi.

17 Aupu penmaiya tep, Yesusdi aneng sun dipruai neitamai tenepinge kael kepka tep, Yesusdi, aneng tep pepu. “Dan mutu do yuma, tenpu ila deiyo ngebodi talerur nesala, neitamai bokmengedi, popdanmengyopda, gawal dakdankamenge. Anesala yumadi podange pangeda, tenpu ngebodi ware kupra taleptu do? Kikiman men kutenge dinin, yuk-yuk bendoptenge. Ange utopu, ware yala neng do yuma, sundi popdangopda, gawal dakdankamenge. Ware kupra kikiman kuptenge do? Konuma bokra yuk-yuk bendoptenge. Atep, sundi, ‘Yesusda, Kain Jen Ngebo er puto deiki di, isok enemrure,’ pepmanerum ngeda, men kupmanto, tali upupu pepmanerume.

Isok-isok enemnunada, Allah er Lek Sambala puto deiki dipapu enemnune. Ware pel do yuma, Kain Jen Ngebo er puto deiki di pel men donune.” Yesusdi pepu. Upepu dingeda, Yesusdi adomon upu deiki di aneng tep aupu pepu.

18 Apepmangenge utopu, Kain Jen Ngebo cap, Kain Jen Ngebo er nyapu sisa, isok-isok cap, sun pepu podatengedi, Kain Jen Ngebo er nyapu sisa tep, enepra dokoteptuopda, sun puto pio men kuptue. Kain Jen Ngebo er puto gum kuptu pangeda, nesala ton men taleptue. Ange tep nengeda, isok-isok enemnunada, Belesebul, er si ton Kain Jen Ngebo, er puto deiki di enepra men dokotemnune. Ange gum dinin, Allah er Lek Sambala puto deiki dipapu apel donune. Apepmasen ngeda, ‘Kain Jen Ngebo er puto deiki di isok-isok enemrure,’ penuruma tep, aupu pepsene. Sunda tali upu penmarume.

19 Isok-isok yuma enepra dokotemnyada, ‘Kain Jen Ngebo er puto deiki di dokotemrure,’ tenepmanerum dinin, sun Farisi neng, sun melimna neng peda, isok enepra dokotemnunga cadi, anengda, ware ngebo puto deiki di isok enepra dokotemnung do? Sun upu gekepra melimenge nengdi, isok-isok enepra dokotemenga deiki di, konum jenek kupmasere. Sun kange wilimtona meme. Sun nyapu pe, ne peda, utopu pel donupa tep, Allah er puto deiki dipapu isok enepra dokotemnupe. Sunda mok upu perum neng adano.

20 Gume, ne isok-isok yuma enepra dokotemnyada, Kain Jen Ngebo puto deiki di men dokotemnune. Allah er puto deiki di enepra dokotemnune. Ange tep nengeda, Allah nesala yuma lyepredi, sun dipru talenkamre taru konum gonga kepmardi, sun damai konum yare. Ne isok-isok bisipra dokotemnuna deiki di jenek konum kupsere. 21 Sun pepmarumnge men kupmanto tep, ukupmanto upu ton pepkusene, Yesusdi pepu.

Bon tenpu ila puto ngebodi, ‘Yuk nengdi nati wekra ne keca upula dopropnung’ tenen, nimi pon keca jen cap, parang cap, keteneptudi, er mawa keca kalektuopda, yuk nengdi er keca men doproptenge. 22 Akati deiyo ngebo, ila puto ngebo dinin, pio ila puto ngebo ton yatudi, angebo ateng kouptaptuopda, er keca upula doproptue. Tonda, akati deiyo ngebodi, ajen cap, parang cap deiki di, ‘Lyepdatene,’ teneramtu keca yuma, yuk pio ila puto ngebo doproptu dingeda, akati ngebo er keca yuma dalupra doproptudi, upula don ngebo, er kayapu neng tep, bokra kareptue. Ange utopu, Seramkida puto ngebo kurur dinin, neda ila weik puto ngebo men kutene dingeda, isok er nyapu men enepra dokoteptene. Dinino, nesala ateng kouramengtopu, Kain Jen Ngebo bisipnedi isok er nyapu dokotemnune. Yesusdi Farisi neng aweka penmai neng tep pepu.

23 Upepu dingeda, aupu ton cap pepu. “Ne cap kikiman men pel dorur ngeboda, upu sekra bisbisa kapra, yanipta embarameng utopu kurure. Tonda, kwaneng yongopra tenpai bulupra deipmenge taruda, er cap bulupra men derirur ngeboda, yamumupra donongamengtopu kurure. Ne cap, sun cap, tonpa men pel dopmepyopda, arup pepmasen neng utopu, ne upu yanitamna neng utopu kurume.” Yesusdi pepu.

24 Aupu pepu dingeda, aupu ton cap, pepu. “Sunda, kange moupso. Isok-isok yuma nimi dipru neitam taleamreanen, gupra embaredi, ‘Dan cei beipye peiktene do?’ tenen, me pio gumai embaramreanen, telepai men epyopda, kange di tamupra er men di taleamu ngebo damai wengyakarure. 25 Yana dinmarepa, er men di kuramya ati neitamaida, ason cap, derin keca yuma cap, telep kwamredi, nesala ton kuna gum tep, ‘E, akatida go tupa kwapmara tep, acapu kunkune,’ tenepra kurure.

26 Utenepredi, erda yambul yu dinin, ila yu isok yoneitam bari bena dopra yarepa, angebo er dipru neitamai wekra kunkamenge. Angebo er dipru taleamenge ngeda, men di yambul mali kuramu dinin, ataru dipra dorkunkamre taruda, pio ila mali kunkamre. Aupu pepmasentopu sun peda, men di mali kuramum keca yambula di konum taprum dinin, dipru go kapmasere ngeda, Allahdi nesala yuma talenkamre taru pesene upuda, moupra men talepmum dingeda, amendada pio mali kunkamrume,” Yesusdi pepu.

27 Yesusdi aupu tup penmau taruda, awekmai nesala kan-kan di tenpu ner, upu ila di pepu. “Kan deipkeudi, moum diniamkeu nerda, pio mambule. Anerda, Allahdi pio telep kudinkamre,” pepu. 28 Upepu pangeda, Yesusdi aupu pepmau ner tep tamupra pepu. ‘Gume, ware nesala do yuma, Allah upu moupra gekepmengedi, teka tenepra, dumsisipu kungedi, Allah tep dombange nesalada, sunpuda, pio mambule. Anesalada, Allahdi telep kudinkamre,’ Yesusdi pepu.

‘Erdi nimi men kupmanto keca, kunupsek pen pel dopsetupa, teka teneptepe’ tenen, Yesus kupetepi neng tep, Yesusdi pepu upu

(Matius 12:39-42)

29 Nesala pio weike ton cap, Yesus damai yakanmai pangeda, Yesusdi abulupra yakanmai neng tep pepu.

Sun ukutaru kurumu nengda, Allah upu yanitamnapu kurum neng cadi, ‘Nimi men kupmanto keca, kunupsek pen pel dopsetupa, adeiki dipapu teka teneptepe’, pepra moronerume. Dinino, nimi men kupmanto keca, kunupsek pen pel ton cap men pel dopkusene. Ne tep teka men tenepnerum neng cadi, sun kurum keca utopu keca pepkusene. Ada, sun yuma pio mali kecapu talepra, mali weik kuruma tep pepsene. Sundi tapnemuma tep pepsene. Allah upu lap peramu ngebo nabi Yunus kuramu taru kupu kecada, akupu keca utopunge puda, amenda kupkamre ngeda, epkamrume. Yuk peten kemna keca ton men karepkamsene. 30 Aupuda, mesum tep men pepsene. Deiyo ake. Ila mekinadi Yunus amandukpa, mekina mundu pumbonda, u weneri dakuamnganen, amekinadi Yunus er nong duktapu.

Akupunge yuma epidi, Niniwe mutu kurami nesala teka tenemitopu, neda Nimi Mi Sisa Utopu Ngebo kune keca epmenga deiki di, ukutaru kunge nesaladi teka tenenkamnenge. Yunus kuramu taru kuputopu, neda, Nimi Mi Sisa Utopu Ngebo popnengepa, tu pumbon mapnedi, ue weneri tumi konum kupyopda, tamupra gam bukronkamne.

31 Ila nimi deiyo ner, Seba mutu taleamu nerdi, ^{▼▼Seba mutu ila deiyo ner Seba mutu taleamudi, ila deiyo ner, er upuda 1 Raja-Raja pasal 10 neitamai dirume. Seba mutu perami ngeda, amutupu dinin, ukutaru yuk si Yemen mutu penunge.} ‘Raja Salomo ila kael di perur upuda, ne ton gekeptene’ tenen, putaramupa, pio karen mutu dinin, Salomo damai gekeryau. Ukupka tep, sirya taru Allahdi nesala yuma bokra wenepkamre taruda, aner tekrapredi, sun ataru kumum neng tep, ‘Sunda pio mali kuramrum neng pua,’ pepra wenepkamsere. Ne tek sisi pepsene. Tek sisi Salomoda, yambul kael ngebo kuramu dinin, neda, ila kael ngebo sun kankan konum yasipane, tupa ne tep teka men tenenerume.

32 Ange utopu ton, Niniwe mutu nengda, Yunus yambul mambul ngebo kuramu dinin, Allah upu peterepupa gekepidi, sun mali kurami keca tapi. Ukupya cadi, Allahdi tuai nesala yuma bokra wenepkamre taruda, sirik taruda, Niniwe mutu nengdi tekra, sun ataru kumum neng tep, ‘Sunda, pio mali kuramrum neng pua,’ pepra katuai di pepkamsenge. Yunus yambul mambul ngebo peterepka deiki di, Niniwe mutu kurami nesala teka tenerami dinin, ukutaruda, ila mambul ngeboda, ne konum yasi dinin, tupa teka men tenepnerume. Yesusdi abulupra wekmai nesala tep pepu.

Yesusdi, ‘Sun nong upna utopu kecada, asuru kapseu,’ pepu upu

(Matius 6:22-23)

33 Yesusdi aupu pepu. “Sun yuma kaele, nesala yumada, sun weica uprapmengedi, ati pum dekaramengada, ‘Kau pumbon singidongonkamepe. Yuk nengdi aweica men eptengaipu deipkupe’ tenen, upra yakarameng do? Tonda, ason dangapra, ‘Weica singidongonkamep’ tenen, upra yakarameng do? Angeda, gume. Weica uprapmengedi, dela taramai deipmengepa, dirine weik kuprepa, akati wekmange nesala yuma dinunge. ‘Nesala yuma epkameng’ tenen, upna deriramenge.

34 Sun nong upna utopu kecada, sun asuru kapseu. Asuru telep kupsetuopda, bisi telepngepu epra embetume. Dinino, asuru mali kupseryopda, asuru pupra kopdanen, mali bisipu benkamrume. Ange utopu, sun kange dipru neitamai, sun pe keca cap, mali kun keca cap, ange tepapu tupa tenemumyopda, amenda kunkamrum keca yuma, malipu kunkamsere. Sun asuru neitamai dirine men weksetuopda, kunungnaipu benkamrume. Utopu, sun kange dipru neitamai mali keca tepapu tenepmumpa, mali kecapu kapsere pangeda, sun pio malipu kunkamrume. Pio kunungnai utopu kunkamrume.

35 ‘Sun dipru neitamai dirine kusere keca kunukserur’ tenen, sun kange moupra kunkamrume.

36 Sun kange tenena cap, sun dipru neitamai cap, dirinepu kupseredi, tenpai pe ton men kunukseryopda, pio dirinepu kuprepa, teleppu kunkamrume. Ukunkamsere ngeda, ada upna upmengepa, dana-dana yuma cap, sun nong deiki cap, dirine weike kuramrepa, telep bisipu epra baramengtopu, sun dipru neitamai dirinepu kupseryopda, teleppu kunkamrume. Yesusdi pepu.”

Yesusdi Farisi neng tep, “Uo tenepra, mambul kange dounkamrume,” pepu upu

37 Yesusdi aupu yuma konum pepu dingeda, Farisi ngebo tenpu di, ‘Nati jen jeryayo,’ pepra moropupa, Yesusdi er ati bena jen jenmau. 38 Ukunmau dinin, Yesus er buru men me kupmau dipapu jenmaua tep, aFarisi ngebo dinmaudi lolomau. (Ada, sun Farisi nengdi, ‘Gume, buru me kunada, mem keca utopu keca tep, ange men kupmepyopda, Allahdi derepserura tep, men taptepe,’ tenen, buru me kuna keca weika di peteremamitopu, sun pe ton ukurami.) 39 AFarisi ngebo lolomaua tep, Yesusdi angebo tep pepu.

Uo, sun Farisi nengda, sun dipru neitamai mali keca akwapmaserpapu, ‘Telep neng tenepkamseng’ tenen, nong bol deikingepu telep kurume. Allahdi wenepra popkamsere. Sun me mau cap, piring cap, ‘Buta palepmaserya mankau di jepnup’ tenen, bol deiki tarada, telep-telep kupra me kuprum dinin, sun kange dipru neitamai pio mali kun keca cap, yuk nesala keca aram dona cap, akwapserpapu, ange tenena gum dipapu tali kange doupra, sun pe putapsere kecapu, pio tenerume.

40 Sun pio walwal neng kurum adano. Katuai jenek kure keca cap, nimi asuru di men epmanto keca cap, akeca-keca yuma ketekepra deipu ngebo Allah pua. Atep nengeda, nong bol deikinge pe, nimi dipru neitamai kurenge peda ketekepra deipka tep, nimi dipru neitamai kure keca yuma diserure. Ange men tenipmarumdi, mali tupa kurum do? 41 Sun me mau cap, sun piring cap, neitamai jemum kecada, bokra tali kan-kan kunge nesala tep, kareamtum teptoda, sun kun keca yumada dumsisi teleppu kunkamrume. Nong bol deikingepu tupa tenena gume. Tek sisi kun keca peda tenepra kunkamrume.

42 Sun Farisi nengda, sun dipru neitamai mali keca akwapmaserpapu, ‘Telep neng tenepkamseng’ tenen, nong bol deikingepu telep kurume. Sun bicaue, Allahdi wenepra popkamsera tep, mambul kange doupra kunkamrume. Sun mali kumum kecada ake. ‘Akeca-keca yumada, Allah er dipu kareserure’ tenen, pio metek keca dinin, kuma cap, tolong cap, erica cap bokra, Allah tep ton karerume. Ukurum dinin, ila mambul kun kecada, yamdongorume. Sun yamdongomum kecada, Allahdi nesala yuma bicau teneseredi melimseretopu, nimi bicau tenepra dipru karenada, sun yamdongorume. Tonda, nimi akupmangetopu upu dumsisikrap pena cap, upu bongdina cap ayumada, Allah upu neitamai akupupane yamdongorume. Ametek keca Allah tep karemumnyada, telep dinin, ange tamna gum di, ila mambulnge peda kunkamrume.

43 Sun Farisi nengda, ‘Uo’ tenepra kange mun kunkamrume. Ton mali kuramrumada, Yahudi yala neng Allah upu peteremna ati, Allah upu peteremna taruda, sunda, ‘Yuk neng epsengedi, telep neng tenepkamseng’ tenen, ila neng bukmantoai, nimi urasin dinaipu bungbarume. Tonda, nesala yuma jen keca deipra kunumamengai, ‘Pasar neitamaida embapepa, nesala yumadi gispal donkamseng’ tenen, kange pingpinga di embarume.

44 Uo, sunda, pio mali kurume. Nesaladi nimi peina tep, tu palipra nimi gemna konum deipmenge dinin, tu singina gum di, taptengopda, yuk neng mankau di yanipra atu pumbon saka popdatenge. ‘Ukupnung’ tenen, sesa derirameng keca men deipmengopda, amendada yuk neng mankau kange doupra bandenkapmengedi, apeikmenge keca mankau di yaninunge. Ange utonun, sun peda ukurume. Ada, sun mali kumum keca cap, mawa di peteremum keca cap deiki di peteremumpa, yuk nesaladi tali mankau kange doupra, mali kun keca kael kepra kununge. Yesusdi Farisi neng tep pepu.

45 Yesusdi upepupa, er cap kikiman jen jenmai neng, tenpu ngebodi pepu. ‘Ne nai Guruo, autopu upu pepsemem pangeda, “Nun tepapu pepsera” tenen, mali kange dounupe,’ pepu. Aupu pepu ngeboda, Allahdi, ‘Ange kunkamrume, angeda men kunkamrume,’ peamupa, Musadi sekeiamu upu, peteremna deiyo ngebodi, Yesus tep pepu. 46 Upepu dinin, Yesusdi dukdongopra aupu ton cap pepu.

Allahdi peamupa, Musadi sekeiamu upu peteremna deiyo nengda, sunda bicaue. Allahdi wenepkamsera tep, kange mun kunkamrume. Sunda, sun kange tenena deiki dipu tapakra, ‘Ukupkamrume,’ pepra, mem upu peterepruma deiki di, nesala yuma sun nong deiki ikin keca weik derirume. Ikine pio weik cadi, aupu gekepra men dombenmanto kununge. Nesala nong deiki ikin keca weike derirum dinin, nesala ikin kupre ngeda, ‘Nundi ton melipkupe,’ tenepmumdi, tenpu metek pel peda, sundi ton pio men melimrume.

47 Allahdi wenepra popkamsera tep, sundi, ‘Uo,’ tenepra, kange mun kunkamrume. Deiyoda ake. Allah upu jenek pepra lap perami neng, nabi nengda, sun apu yapudi poramidi, peiramyaida, ukutaruda sundi anabi neng gispal dona tep, nimi pein ati, urasin telep ati dorume. Sun telep nimi pein ati dorum dinin, sun apu yapudi aneng porami. 48 Nabi neng poraminge, nimi pein ati urasin telepnge dorumnya deiki di, ‘Nun apu yapudi Allah upu lap perami neng poramyada, telepe pua,’ perume. Ada, sun apu yapudi, aneng poramipa, sunda, aneng sun pein ati, urasin telep ati doruma tep, pepne.

49 Allah er ila kaele di uperamu. ‘Allah upu jenek kupra lap pen neng, nabi neng cap, Allah upu dopra peterep embankameng neng cap, sun Yahudi yala nesala damai dokotemkamne. Dokoteramnepane, ton nengda, portamkamenge. Ton nengda, “Poptepe” tenen, sun nong deiki ikin keca weike derinkamenge,’ peramu. Allahdi pumun taru uperamutopu, sun ukutaru kurumu nengdi konum kurume.

50 Ukumumnge cap, ukunkamrumnya cap tep nengeda, Allahdi wenepra popkamsere. Ada, ware neng do yuma, Allahdi tuai mutu ketekepra deiamu taru di dipra, pumun taru di dipra, daneitam taru portamami nabi-nabi neng yumada, sun yapida, sun ataru mali kurum neng, sun deiki kupkamsere. 51 Ada, sun dumsisi kuramipane, Habel adinen, poptapnen yakaramyanen, ukutaru Zakaria, Allah karena tep, deriramengai damai popi ngebo cap, aneng yuma sun yapida, sun ukutaru kurumu neng, sun buru deiki kupkamsere. Aporami neng yuma tep, Allahdi sun ataru kurum neng tep wenepkamsere.

Ukupkamsera tep, ne tek sisi pepsene. Aportamami neng yuma, sun yapida, sun ataru kurum neng, sun buru deiki kupkamra tep, Allahdi wenepra popkamsere. Yesusdi Farisi neng tep pepu.

52 Yesusdi aupu pepu dingeda, dukdongopra aupu ton cap, Musa sekeiamu upu peteremna deiyo neng tep pepu. ‘Allahdi wenepra ponkamsera tep, sun bicaue. Sun mali kumum kecada, pepkusene. Nimidi, “Ati wekup” tenen, buplan pangna keca, kunci di buplan pakra wengamengtopu, “Allah teka tenena kael kemna deiyo keca doproptepedi kael kepkupe,” tenenge neng tep, kunci utopu keca konum upula dopropmarume. Allah er upu yuma kael kemna tep, deiyo keca men lap pepra peteremrume. Atep, aneng tupa walwalpu kununge. Tonda sun pe ton, Allahdi nesala lyepredi, sun dipruai taleseryaida, teka tenepra men wekmarume. Tonda, sundi ne tamnerume.

Tonda, yuk nesaladi, “Uo, nun Allah kael kemna deiyo keca kael keptepedi, Allah talenkamserai wekupe,” tenenge nengda, upu sengdongorume. Tonda, “Nun teka tenepra Allah talenkamserai wengkamepe,” tenenge neng peda, sun Yahudi yala deiyo nengdi mali kumum keca deiki di, yuk neng tep upu sengdongorume.’

Yesusdi Farisi neng cap, Musa sekeiamu upu peteremna deiyo neng cap tep pepu.

53 Yesusdi aupu pepudi benmaupane, ataru dipra ortaru yumada, sun Farisi neng cap, Musa upu peteremna deiyo neng capdi, tulum weik kupupa, ‘Yesus upu bisbisa kapra yaniptaptepe’ tenen, asimna weik asimpeterami. 54 Sun ukurami ngeda, ‘Yesus mali upu peptupa, angeboda, mali kurur ngebo pepkamep’ tenen, asimpeteramidi, Yesus tep kurpeterami.