Luk 12 | XteSC | STEP | Yuk taruda, nimi denge weike, beribu-ribu pio men nukmanto Yesus damai yanmai cadi, dekpepmaidi meneng nong deikipu yanidanmaipa, Yesusdi er nyapu 12 neng tep pepu. “Sun Farisi nengda, sun mali kunge kecada, nong bol deikingepu telep kunung dinin, tek sisi sun dipru neitamaida mali keca weik tupa akurure. ‘Farisi nengdi kunungtopu, nun peda mali kunup’ tenen, pio kalekra dinkamrume. Ukupmanto upu pepkusene. Roti kwaneng nena deiyo keca metekanunpu roti bun neitamai akapmarepa, weik kupbaramretopu, sun Farisi nengdi mali kunge kecada weik kupbaramrepa, nimi weik mali kununge. Atep, sun Farisi neng kunge keca tep, pio kalekra dinkamrume,” pepu.

Luke 12

Yesusdi, dipru kwa dimna upu cap, wenemna upu cap tep, pepu upu

(Matius 10:26-33)

1 Yuk taruda, nimi denge weike, beribu-ribu pio men nukmanto Yesus damai yanmai cadi, dekpepmaidi meneng nong deikipu yanidanmaipa, Yesusdi er nyapu 12 neng tep pepu. “Sun Farisi nengda, sun mali kunge kecada, nong bol deikingepu telep kunung dinin, tek sisi sun dipru neitamaida mali keca weik tupa akurure. ‘Farisi nengdi kunungtopu, nun peda mali kunup’ tenen, pio kalekra dinkamrume. Ukupmanto upu pepkusene. Roti kwaneng nena deiyo keca metekanunpu roti bun neitamai akapmarepa, weik kupbaramretopu, sun Farisi nengdi mali kunge kecada weik kupbaramrepa, nimi weik mali kununge. Atep, sun Farisi neng kunge keca tep, pio kalekra dinkamrume,” pepu.

2 Upepudi aupu ton pepu. “Nimi yuma, ‘Yuk nengdi kael kepsenung’ tenen, dipru neitamai tenepra inimamenge keca yumada, Allahdi jenek kupra deipkamre. Katuai di lap penkamre. 3 Nesala yuma ‘Yuk nengdi gekepsenung’ tenen, lukunda neitamai inipra sisingamenge upu yumada, amendada Allahdi keteng komuni di, jenek kupra lap peprepa, gekepkamenge. ^{▼▼jenek lap pena – Nesala ban-ban yuma sun inipra kunge keca cap, inipra penge keca cap, sirik taruda, Allahdi jenek keipredi, ange yuma katuai lap pepkamra tep, Yesusdi aupu pepu.} Tonda, sun ati pumbon di inipra mur-mur peramenge upu yumada, Allahdi katuai kupra deipredi, ati deiki di nimi yuma gekenmangai di, lap penkamre,” pepu.

Uda, Yesusdi, ‘Mutu ban-ban yuma kunge nesaladi inipra kunge keca cap, tenenge keca cap, Allahdi katuai kupra lap pepkamre’ tenen, pepu.

4 Upepudi, aupu ton pepu. “Ange tep nengeda, ne kayapu mali upu peprap, sun nong deiki ikin keca deipkamseng neng tep, kwar dangna gume. Sun nong konum popsengopda, yuk ikin keca ton men kupsetenge. Sun sambala men popsetenge cadi, aneng tep, kwar dangna gume. 5 Dinino, sun kwardangkamrum ngeboda, pepkusene. Nimi nong cap, sambala cap popra, gawal dakrapseredi, uku jen ban dongopkamser ngebo, Allah tep kwar dangkamrume. ‘Allahdi wenepra popserur’ tenen, er tep kwar dangkamrume, pepsene.” Yesusdi pepu.

6 Upepudi aupu ton pepu. “Pupalema mada, pio metek gel uang deiki di pamu kunumnung dinin, ama peda, Allahdi, ‘Ama deptue,’ men tenepre pangeda, tenpunge peda, deptudi tuai men saktue. Metek ma peda, sun nai bo Allahdi men lumdongorure. 7 Pupalema mada, weike kuptu dinin, mambule pio gume. Dinino, nimi yuma yuk-yukpuda, ila mambule cadi, Allah bicaue tenepseudi, ‘Ne mawa’ tenen, sun giso potong yuma peda, konum nukra kael kepseu. Ange tep nengeda, kwar dangna gume. Sun putasere keca yumada, Allahdi men lumdongonkamsere.” Yesusdi pepu. Upepu dingeda, aupu ton pepu.

8 “Ware neng do yuma, nimi yuk neng damai bengedi, ‘Yesusda, tek sisi ne deiyo ngebo kurure. Nedi er upu gekepra kunune,’ penge nengda, ne Yesusdi, ne nai Allah im deiki pel donge neng, malaikat sun gekena tep, ‘Angebo tek sisi ne mi kurure,’ pepkamne. 9 Dinino, ware neng do yuma, ‘Yuk nengdi autupsenung do, popsenung do?’ tenen, ‘Neda, Yesus mi men kunune,’ pepmenge nengda, nedi ne nai er im deiki pel donge neng, malaikat sun kori, ‘Anengda, ne tep teka men tenenenunga tep, ne nyapu pio men kununge,’ pepkamne.

10 Ware neng do yuma, sundi neda Nimi Mi Sisa Utopu Ngebo tep, mali upu pepnenge nesalada, sun mali pepnenge kecada, sun tapmengepa, Allahdi gum kupra deipredi kaukepkamre. Dinino, sun anengda, Allah er Lek Sambaladi pel dore keca tep, mali upu pepra, ‘Angeda, Kain Jen Ngebo er puto deiki di pel donunge,’ pepmengopda, Allahdi sun mali penung upuda, gum kupra deipredi, men kaukepkamre. Ange pio tupa akwamrepane, wenepkamre. Ange utopu, sun dipru neitamai aupu pio tenepmengopda, akeca pio tupa akwamrepane, Allahdi sun tep wenepkamre. Aupu penge ngeda, men lyepmanto keca kununga tep pepsene,” Yesusdi pepu.

11 “Sunda, ‘Upu talena deiyo nengdi wenepra popkameng’ tenen, ateng koupra karerbankamsenge. Tonda, Allah upu peteremna ati neitamai dubenkamsenge cap, uda ne tep teka tenepmanuruma tep, ‘Anengdi popkameng’ tenen, ila nimi deiyo neng, Gubernur neng cap, ila-ila nimi deiyo neng, Raja neng cap, sun damai dubenkamsenge cap tep, kwar dangna gume. Ware taru do yuma, sun ateng kouprapsengedi, upu bongdin neng damai dubesengopda, upu kapul pepkumum taruda, ‘Ware kupra pepkup do?’ tenen, mambul kange men dounkamrume. 12 Allah er Lek Sambaladi sun dipru neitamai ataru peipserengepu penkamrume. Ada, sun nai Allah, er Lek Sambala puto karepserepa, aputo deiki di sun upu pepkamruma tep pepsene,” Yesusdi er nyapu tep pepu.

Isomka kuramu dinin, walwal kupu ngebo tep, Yesusdi pepu upu

13 Yesusdi aupu yuma konum pepu pangeda, anesala weik wekmaiya kan-kan di, tenpu ngebodi aupu pepu. “Ne naio, kandi ne du bo tep pepmempa, ne nai depu taru tapu keca bokra karepkamnera tep, moropkene,” pepu. 14 Upepupa, Yesusdi angebo tep pepu. “Amio, ‘Upu bongdina deiyo ngebo kunkamemere’ tenen, ware ngebodi wepra deipneupa, pepmanerem do?” Yesusdi pepu. 15 Upepu dingeda, aweka gekenmai neng yuma tep aupu pepu.

“Sun yuma, sundi sun pe teppu, ngangan kuna cap, anuna kuna cap, kupsurur tep, dipru kalekra didankamrume. Nimi gam kuna cap, nimi telep kuna tep, mambul keca capda, akeca-keca isomka kemna deiki di telep men kweipsetue.” Yesusdi pepu.

16 Arup pepmau upu, ‘Telep kupra kael kepkameng’ tenen, tonda, apepmau upuda, ‘Moupra kael kepkung’ tenen, adomon upu ton cap pepu.

Tenpu ngebodi, wa pepra kouamupane, bongopudi nong weik kupupa, awai kiprapudi ati duyau. 17 Duyaudi, ‘Uo ne jen keca derin ati go gum tep, dan cei deipkun do?’ tenen, tenimtonmau. 18 Tenimtonmaudi, utenepu. ‘Ne men di domsidi jen keca deriramsi atida, metek cadi, uruprapnedi pio ila ati dopkune. Ukupnyopda, ne bung keca yuma cap, jen keca yuma cap, akati pum derinkamne. 19 Ukupne dingeda, ne pedi ne pe yuk tep tenenkamne. Uda, konuma, amenda kunkamre taru yumada, akeca-keca yuma pio weike konum deipsa tep, jen teleppu jepnedi, me jeprap pio kange deipra, tali kange doupra kunkamne,’ tenepu.

20 Angeboda, utenepu dinin, Allahdi angebo tep pepu. ‘Gume, akumem ngeda, pio walwal kurume. Alukunda dipapu kan gam kuna deiyo keca tamupra dopropkenepa, depkureme. Dorketeng tamun tep, “Ne mawa” tenen, akeca-keca yuma bulupra deipmumada, konum depmem pangeda, ware ngebodi dopropkamar do?’ Allahdi angebo tep pepu. Yesusdi pepu.

21 Yesusdi adomon upu pepu dingeda, agekenmai nesala tep aupu ton cap pepu. “Apepmasen ngeboda, ‘Ne mawa’ tenen, akeca-keca weike deiamu dinin, men dopramu dipapu deputopu, ware neng do yuma, Allahdi mambul tenere keca derina cap, ketenemna cap, kuna gum di, sun pe kun keca tepapu deriramenge nengda, utopu kunkamenge,” pepu.

Yesusdi kange mun kuna tep, pepu upu

(Matius 6:25-33)

22 Yesusdi aupu ton pepu.

Sun putapkamser keca yuma tep, ‘Uo ware kupkup do?’ tenen, kange mun kuna douna gume. Sun jen keca cap, opkale capda, yambul mambul dinin, sun nong cap, gam kuna capda, ila mambul cadi, Allahdi sun putasere keca tep makunkamsere. Ange tep nengeda, ‘Uo, nun ware me cap, ware jen keca cap, jenkamep do? Nun opkalda, wareto opkal kenengkamep do?’ tenen, kange mun men kunkamsere. 23 Nimi gam kuna cap, nimi telep kuna tep, mambul keca capda, akeca-keca yuma, jen keca jena deiki di telep kupra men deipsetue. Tonda, nimi nong telep kunada, opkal kemna deiki di, telep kupra men deipsetue. Jen keca cap, opkal cap putapserenge, akwapmar dipunen, akecada, mambule gume. Ila mambulada, telep kuna tepa.

24 Sun ma kunga yumada tenimkamrume. Mada yal keca kouna cap, nong kina cap, jen keca mawa derinai cap, pio men kunung dinin, sun nai Allahdi ama sun jen keca tupa karerepa, jenunge. Mada, yambul mambul dinin, nesala yumada ila mambul cadi, Allahdi sun putasere keca yuma tep makunkamsere. 25 Sun awekmarum neng neitamai ware ngebodi, er kange mun kuptua deiki di, ue tenpu taru ton cap gam kuptu do? Ada men kupmanto. 26 Apio metek pel puda, sundi men pel doptuma tep, ila mambul ngeda, ‘Ware kupkamep do?’ tenen, mambul kange doumum ngeda, warya tep do?

27 Sunda, moupra tenipso. Mutmuta kan-kan di kuramre kait kecada, tenenkamrume. Akait keca urasinda, pio telep kurur dinin, akecada pel dona cap, opkal wina cap, men kurure. Apel men dorur dinin, ila nimi deiyo ngebo Raja Salomo kenengamu opkalda, urasin yambul telep dinin, akait keca urasinda, pio ila telepe. 28 Mutmuta neitamai tali kure kait kecada, atumi di kait popmaryanen, keteng deipredi kouluprepa, uku dongonung dinin, Allahdi urasin pio telep kuprap ketekemdirur. Akecada mambul gum dinin, sunda ila mambul tep, Allahdi sun opkal putaserepa, karenkamsere. Dinino, sunda Allah tep, ila di teka men tenerume. Sunda, ‘Nun putapsere keca Allahdi karenkamsere,’ tenen, teka tenemum ngeda, metekpu kuserure. 29 Allahdi tek sisi makunkamsera cadi, sun kunkamrum keca yuma tep, ‘Uo,’ tenemumdi, ‘Nunda, ware jen keca cap, me cap, jenkamep do?’ tenen, kange mun men kunkamsere. Sun dipru cap, kange cap, akeca tali-tali keca deiki men derinkamrume.

30 Aupuda mesum tep men pepsene. Tuai keca kaprepa, nesala putare keca yumada, Allah teka tenena gum nengdi, ‘Akecapu doproptepe,’ tenengedi, sun dipru akeca deikipu derinunge. Ukunung dinino, sunda ne nyapuda, sun putasere keca yuma, sun nai Allahdi konum teneseredi, karenkamsera tep, tali tuai keca tep kange mun men kunkamsere. 31 Akecapu tenepra men kunkamrum dinin, ila mambul ngeda, Allahdi ‘Ukunkamenge,’ teneseretopu, dumsisi kuna cap, lyepseredi nun dipru talepra kunkamserenge cap, akecapu menmena tenepmumdi, pio moupra talepmum pangeda, yuk yala keca yuma pape, erdi karenkamsere.

32 Ange tep nengeda, ne nyapu, sunda ne domba nyape utopu kuruma cadi, bicau tenesenune. Allahdi kange konum deipseua tep, er lyepseredi dipru talenkamsere keca cap, er pel donkamrumnge cap, sun putapsere keca cap, ange yuma tek sisi erdi karenkamsera cadi, sun kange mun kuna cap, kwar dangna cap gume. 33 Sun taleprum kecada, kunuprapmumdi, co bo dopropmumyopda, tali kankan kunge nesala tep karenkamrume. Sun pedi sun pe tep sumaya, mali kupra men tu pepmantonge ketenemdinkamrume. Ada, Allahdi mambul tenere kecada, im deikipu moupra derinkamrume. Sun mambul kecada, tuai mambulngepu bupra, mawa men derinkamrume.

Tuai mambul keca yumada, sisilya kuna cap, sinedi jena cap, yuk nengdi dorona cap deiki di, mali-mali kuprepa gum kurure. Tonda, upula don nengdi, sun buplan pakra wekmengedi, upula donunge. Dinino, im deiki moupra derinkamrum kecada, mali pio men kunkamre. 34 Ada mesum tep men pepsene. Sun mambul keca mawa derirumaida, sun kange dipru acapu tenenkamruma cadi, im deikingepu mawa derinkamrume. Yesusdi pepu.

Yesusdi, “Sundi kange moupra, kalekra dinkamrume,” pepu upu

(Matius 25:1-13; Markus 13:33-37; Matius 24:43-51)

35 Yesusdi aupu pepu dingeda, adomon upu ton pepu.

Ati deiyo ngebodi ner don kalemna tep kalemnai benmareia, ‘Tamupra dato-dato di yaserur’ tenen, er melimna nengdi telep opkal kepra, weica uprap, ‘Dan taru yankur do?’ tenen, ketenepra diramengtopu kunkamrume. 36 Ada, ‘Nun deiyo ngebo yaredi, buplan gogo pepre pangeda, buplan adipapu paipmepepa, wektu’ tenen, kununge. Sun peda utopu, ‘Nun nai dan taru tamupra yankamre do?’ tenen, dinapu kunkamrume. 37 Ware neng do yuma, ‘Nun deiyo ngebo yankur do?’ tenen, dinmangepane, er yaryopda, sun deiyo ngebodi, aneng tep kange deipredi, telep kudinkamre. Angebodi er pel melimna neng tep, kange deipredi, pel don opkal kepredi, er melimna neng tep, ‘Jen jenai bungyaso,’ pepredi, sun jen keca tep karepkamre.

38 Ware pel don neng do yuma, sun deiyo ngebo lukunda yankamrenge pe, sikke dakupmareanen, manduk-manduk peramre taru yankamrenge peda, sundi, ‘Nun deiyo ngebo dan taru yankamre do?’ tenen, keteneipra deiya dinmangepane yaryopda, telep kudinkamre. 39 Dinino, ne pepkusen upuda, moupra gekepkurume. Ati deiyo ngebodi, ‘Upula don ngebo alukunda neitamai, aketeng deiki di upula doryankamanere’ tenen, kael kepmatu teptoda, mana gum di, pio kaleka dinmatu teptoda, upula don ngebodi, er ati wekra, er keca upula men dopropmatue. 40 Ange utopu ne peda, Nimi Mi Sisa Utopu Ngebo yankamne taruda, sun mankau kange doupra, kunmamum keteng deiki dipapu yankamna atep, dipru ketenepra deipmumdi, kange moupra pio kaleka dinkamrume, Yesusdi er nyapu tep pepu.

41 Upepupa, Peterusdi tamupra asipetepu. “Naio, adomon upu pepserem ngeda, nunpu tep, pepserem do? ‘Nesala yuma gekepkameng’ tenen, pepserem do?” pepra asipterepu. 42 Asipetepupa, Yesusdi tamupra pepu.

Ati deiyo ngebo tenpu di, yuk mutu benkou taruda, er pel don ngebo tenpu tep, ‘Pel ukupra donkamrume. Ne pel melimna neng yuma tep, sun jen putapre taruda, bokra karenkamrume,’ pepra bokra deipu.

43 Akati deiyo ngebo tamupra yankamre taruda, er pel don ngebo tep upu pepra deiputopu, pel doramre pangeda, angebo tep telep kupra deipkamre. ‘Ne keca yuma talepmemdi, deiyo ngebo utopu kupra, ne pel donkamnerume,’ pepra, adeiyo ngebodi er pel dona ngebo dopra ereipkamre. 44 Ne tek sisi pepsene. Akati deiyo ngebodi, ‘Ukunkamrume,’ peiputopu, er pel don ngebodi, dumsisipu pel doramre pangeda, adeiyo ngebo er taleamre keca yuma angebo kareprepa, erdi talepredi, deiyo ngebo utopu kunkamre.

45 Agum dingeda, apel deiyo ngebodi peprepa, gekepra pel dore ngebo malipu kupredi, malipu kupra kuptuopda, ‘Gume, ne deiyo ngebo konum benamudi, dakurura cadi, sika di orketeng tamunpu yankamre,’ teneptue. Utenepredi er cap, pel donge neng cap, nerapu cap tep, bongopra popredi, kange yawaramamre me jen neng cap, tonpa jepra kutuopda, ‘Ne deiyo ngebo, er aketeng yankamre,’ men tenepredi, tali mankau kange doupre tumida, er deiyo ngebo tamupra yankamre. 46 Adeiyo ngebo tamupra yare dingeda, amali kupre ngebo er nong popredi, metek-meteka di, sekra buluksingipkamre. Ukupredi, angebo er sambalada, Allah teka tenena gum di, pio mali kun neng kunkamengai, uku jen ban dongopre taruda, kange mun kupkamre. Yesusdi pepu. 47 Upepudi aupu ton pepu.

Ware pel don neng do yuma, sun deiyo ngebodi pel dimamre keca konum gekepmengedi, moupra kael keamenge dinin, er peamretopu men kuramenge pangeda, sun deiyo ngebo yare dingeda, pio weika di wenepredi, nong bol deikipu bongopkamre. 48 Dinino, ware pel don neng do yuma, sun deiyo ngebodi pel dimamre keca moupra men gekepmengedi, moupra men kael keamenge deiki di, walwal dipu mali kuramenge pangeda, sun deiyo ngebo yare dingeda, meteka di wenepra sun nong bol deikipu bongopkamre.

Ada tali tep gume. Allahdi akeca-keca yuma cap, kael kemna deiyo keca cap, weika di kareamu nesala tep, ‘Ne pel weika di dorami do, gum do?’ tenen, asipredi weik kupetepkamre. Ange utopu, Allahdi ke tarupu, ‘Ne pel dopkamneng’ tenen, akeca-keca yuma kareamu nesalada, akeca deiki di, ‘Ne pel tek sisi dorami do, gum do?’ tenen, asipredi weik kupetepkamre. Atep, sun yumadi kange moupra kunkamrume. Yesusdi pepu.

Yesusdi, “Ne tep teka tenepnenge neng tep, mar penkameng,” pepu upu

(Matius 10:34-36)

49 Yesusdi upepu dingeda, adomon upu ton cap pepu.

Ne pel done keca deiki di, ‘Mutu ban-ban yuma, uku jenkamre’ tenen, uku duyasi. ‘Imna konum iptenepa, jenmatu’ tenen, kange mun kupnere. ^{▼▼kange mun kupnere – Yesusdi, ‘Mutu-mutu yuma uku jepkamre’ tenen, yasi, pepu upu deiyoda ake. Ada ukudi mali keca yuma jerorepa gum kuramretopu, Yesusdi, ‘Mali kun keca yuma gum kupra deipnetupa, tuai mutu yuma teleppu kuptue’ tenen, pepu.} 50 Neda, ila kange mun keca kupkamnenge ngeda, ^{▼▼kange mun keca – Yesusdi, ‘Kange mun keca kapmanere,’ pepunge deiyoda, ada mali nengdi, sengdin co deiki popkaminge tep pepu.} akapmarepane, kapul men gawal dakrepapu kupne taruda, pio kange mun kunerure. 51 Sundi ne tep, ‘E, Yesusda nesala ban-ban yuma tenpu kangepu doupra, kange deipdangedi, tali-talipu kunkameng tenen, yaue,’ men tenenkamnerume. Ne upu dopra, yuk neng tep peterep embamum pangeda, sun kange yuk tenenge nengdi aupu tep, ‘Nun song’ tenen, yu kuprepa pedana cap, podana cap kunkamenge. Ukupmengedi, bokra yuk-yuk kunkamenge.

52 Ataru di dipra doryankamre taru yumada, tenpu ati nesalada, pamu kunkameng dinin, butene nengdi, ton weneri neng tep, pedana cap, podana cap kudankamenge. 53 Gume ne pene upu cap, ne tep teka tenenkamenga deiki cap, tenpu ngebodi er nai sisa tep, ‘Er teka tenerura tep, ne songe’ tenen, dipru wilimdinkamre. Ange utopu, er naidi er mi sisa tep, dipru wilimdinkamre. Tonda, tenpu ner midi, er nin tep, ton tenpu nerdi er ner mi tep, ‘Er teka tenerura tep, ne songe’ tenen, wilimdinkamre. Tonda, tenpu ngebo er mi, er nerdi er yamal ner tep, ‘Er teka tenerura tep, ne songe’ tenen, dipru wilimdinkamre. Tonda, er yamal nerdi, er mi domre ner tep, ‘Er teka tenerura tep, ne songe’ tenen, wilimdinkamre. Ada, tali tep gume. Ada, ne cap, ne upu cap tep, dipru wilimdinkamenge. Yesusdi pepu.

Yesusdi amenda sirya taru kael kemna tep, pepu upu

54 Yesusdi aupu pepu.

“Ipna taru im sukupredi, ^{▼▼Ipna taru im sukupredi – Pumun taru amutu kurami nengdi pepi ngeda, “Keteng wengbaramre tara di, metek doua belepyopda, mo tek sisi cepkamre ja,” pepi. Apepi ngeda, ada Israel nesala kurami mutu, ange ukuramnga cadi, aupu perami.} doua kunukreyopda, ‘Atumi cap, ambutumi cap, mo denepredi cemkamare,’ pepmamumtopu, mo denepredi cemrure. 55 Tonda, sunda, sintara kepre taru, im kalum kupredi, ^{▼▼im kalum kupredi – Pumun seki buku neitamai pepi ngeda “Dapu mutu tara di, kumanya pupyopda, dou maprepa bupu weik kupkamre,” seki. Aseki ngeda, ada Israel nesala kurami mutu ukuramnga cadi upepra seki.} mutu siri-siri ke deipre pangeda, ‘Ambutumi dou mapkamare,’ pepmamumtopu, dou marure. 56 Sunda, im deiki kure keca cap, tuai kure keca cap, eprumudi, ‘Ukupkamare’ tenepra, perum dinino, sunda dipru neitamai pio mali keca akwapmarepapu, ‘Telep neng tenepkamseng’ tenen, nong bol deikingepu telep kun keca kurum neng adano. Mo cemna cap, dou mana cap tep nengeda, mutu urasin epmumdi, kael kemrum dinin, ne kune keca cap, peteremne upu cap, ‘Deiyo ake,’ tenepra, ataru konum kapsere keca pio tek sisi men kael kemrume.” Yesusdi pepu.

57 “Sun pedi, ‘Dumsisi kun keca ake,’ tenepra men kael kemrumdi, upu telep kupra men bongdirumada, warya tep do?” Yesusdi pepu. 58 Upepu dingeda, aupu ton pepu. “Sun derepsenge nengdi dopra, dubesenge taruda, menmena sun adipapu upu talepmumdi, teleppu kudinkamrume. Dopra dubasenge taru, bisi neitamai di, telep men kweipmumyopda, derepsere ngebodi, upu bongdina deiyo ngebo karepserepa, angebodi wenepra, jen talen ngebo karepsere pangeda, wenemna ati dongopkamsere. 59 Angeda tenipkurume, ‘Co bo ukuprap karepkamserume,’ pepserenge utopu, yuma kapul men karepmum taruda, wenemna ati neitamai di men loptapkamsenge. Apio kunkamrume.

Atep, menmena derepsenge ngeda, adipapu betamdinkamrume. Apepsene utopu, ‘Allahdi wenepra popsurur’ tenen, sun mali kumum keca taprap, Allah er upu gekepra teleppu kunkamrume. Go tupa kwapre tarupu, sun mali keca tapmumdi, teka tenenkamrume,” Yesusdi pepu.